گعدت على حيلي و خواتي هَم فزن حاچتني مرأت اخوية ـ نام اخوچ ، خل نتفاهم ، بس گليلي آني شمسويتلچ؟
رديت عليها ـ مادخلني كلشي ماحچيت
اختي "منى"حاچتها ـ رفاه محد حچة ، مجتبى شك بيچ لأن دوم تتعاركين وية سكينة
و تبارك گلتلها ـ إذا عندچ كرامة چا ما رجعتي ويانا و سكينة لو تكرهچ ما دافعت عنچ، بعدين شمدريها مرأت عمي بدورة سكينة؟ يمكن انتِ گايله لخالتچ
" مرأت اخوية " خلت ايدها على صدرها و گالت ـ آنييي، ولچ شنو شايفتني؟ تگولن ماحچينا شي هااا شنو هالكلام؟؟
تبارك شالت البطانية عن رجليها و هي تگول ـ و الله رايحة اگعد مجتبى
صحت بيها ـ تبااااارك كافي
باوعت لمرأت اخوية و گلتلها ـ اي اني وياچ و لا مرة تصافينا ، بس اني ما اكرهچ و كلش ماراضية على سواية مجتبى، هاي هية ما دام انحلت المشكلة خلص خل نعيش مثل باقي الناس و الله تعبنا
قاطعتني مرأت اخوية ـ حبيبتي انتي ما تعيشين مثل باقي الناس ، انتي رافعة خشمچ على الدنيا ، شغل مثل الناس ماتشتغلين و المرض حجة
قبل المرض هَم چنتي تشتغلين؟؟
اشرت على الباب و كملت كلامها ـ احاچي مجتبى يگلي ما علية ، احاچي امچ تحچي كلمتين تضحكين عليها بدرجة عالية لو بدموع التماسيح و تسكتيها
منى ردت عليها ـ مو احنا نشتغل وياچ
مرأت اخوية ـ معلية بيچن احچي عنها
غمضت عيوني و اخذت نفس عميق يلا گلتلها ـ هاي هية ام خولة تتدللين
من باچر شنو تردين بس كلفيني و اشتغل
و اني احچي حسيت نفسي جاي ادوس على كبريائي بس قاومت هالشعور ، لإن من تجاهلته كل مشاكلي وية اهلي إنحلت
مرأت اخوية هزت راسها و ردت ـ نشوف
طلعت و طبگت الباب وراها ، تبارك ضاجت و گلتلي ـ ليش تنطيها عين احنا مو نشتغل وياها، شنو تشَغلچ انتي المريضة
ما رديت عليها فتحت قناة الدورة الاخلاقية
و اخيراً الشيخ سواها و نزللنا درس عن الصلاة
اختي منى گامت تحضر ملابسها ما اعرف شنو طلبت مني فرديت عليها و اني فاصلة وية الموبايل ـ اخذي
فتحت صوتية الي اسمها
أهمية و ماهية الصلاة
🎧بسم الله الرحمن الرحيم اللهم صل على محمد و ال محمد ، الصلاة عمود الدين ، الصلاة إن قُبلت قُبل ما سواها و ان رُدت رُد ما سواها و الصلاة أفضل و أحب الاعمال إلى الله تعالى
مدير دائرة بسيطة لا يساوي شيئاً امام قدرة الله ، و مع ذلك لا يمكنك أن تصل اليه بسهولة
لكن يمكنك ان تصل الى الله تعالى بقلب خاشع متوجه
الصلاة معراج المؤمنين ، اي إنّ من يصلي تُفتح له نافذة على السماء فتطلع الملائكة عليه و يسروا به
أول ما فرض على الناس من اعمال هو الصلاة ، أول ما يحاسب عليه الانسان هو الصلاة
أول ما يسأل عنه الميت هو الصلاة
لكن
بعض الناس يتركون الصلاة ، بعض الناس لا يؤدون الصلاة بشكل صحيح
و آخرون يأدوها صحيح لكن صلاة فقهية لا ملكوتية "اي صلاة بدون خشوع"
واحد من الطلاب سأله ـ شيخنا انت تطلب منا الخشوع ، و اني احاول و مع هذا يروح بالي بعيد
فجاوبة الشيخ ـ ان شاء الله بالدرس الجاي نبين الاسباب و علاجها
لكن هذه الفترة حاولوا تصلون النوافل (صلاة الليل، صلاة الغفيلة) حتى لو تصلون من جلوس، و حتى لو تأدون فقط ركعة الوتر و حتى لو تقللون الارقام المذكورة بيها للعدد الي تقدرون عليه
أقروا القران قبل الصلاة ، سبح بأفضل الأذكار و هو «الصلاة على محمد و ال محمد»
عباس دز ـ شيخنا احچيلنا بعد عن الصلاة ، افتح گلوبنا و عقولنا منريد درس ثاني خلي اليوم بس عن أهمية الصلاة
اخذ الشيخ دقايق و دز صوتية
🎧 الصلاة حق الخالق فلابد من الاعتناء بها ، علينا أن نُحسن الوضوء
فالبعض حتى الآن لديه اخطاء في وضوئه و صلاته ، و لا حجة لكم فمواقع التواصل الاجتماعي ممتلئة بالمؤمنين الذين يعلمونكم الصلاة و الوضوء بصيغتهما الصحيحة
✨الصلاة عنوان المسلم كيف تكون مسلم و لا تصلي !
✨من حافظ على صلاته كانت له نوراً في قلبه و وجهه و قبره و حشره الله تعالى مع المؤمنين
لاحظوا الايات: ﴿ إِلَّا أَصْحَابَ الْيَمِينِ (39) فِي جَنَّاتٍ يَتَسَاءَلُونَ (40) عَنِ الْمُجْرِمِينَ (41) مَا سَلَكَكُمْ فِي سَقَرَ (42) قَالُوا لَمْ نَكُ مِنَ الْمُصَلِّينَ ﴾
و سقر و هو وادي في قعر جهنم
✨الآية الاخرى : ﴿ فَخَلَفَ مِنْ بَعْدِهِمْ خَلْفٌ أَضَاعُوا الصَّلاةَ وَاتَّبَعُوا الشَّهَوَاتِ فَسَوْفَ يَلْقَوْنَ غَيًّا ﴾
أول سبب اضاعوا الصلاة !
✨قول النبي الأكرم الذي يوضح أن الصلاة هي مفتاح محو الذنوب
قال «صلَّ الله عليه و آله»: لو كان على باب دار احدكم نهر واغتسل في كل يوم منه خمس مرات أكان يبقى في جسده من الدرن شيء ؟
قالوا: لا ، قال : فإن مثل الصلاة كمثل النهر الجاري كلما صلى كفّرت ما بينهما من الذنوب
✨قول مهم جداً للنبي الأكرم : ليس مني من استخف بصلاته ، لا يرد علي الحوض لا و الله
آخر ما اختم به هو قصة مؤثرة :
«احد الشيعة بالعراق وصى صديقه الي چان رايح للمدينة يزور الامام الصادق عليه السلام و يسلم على الامام و يگلة : يا مولاي اني اريد شفاعتك يوم القيامة
فانتظر هذا الرجل فوگ الشهرين الى أن رجع صاحبه للعراق ، راح تلگاه منتظر البشارة و سأله :وصلت رسالتي لمولاي؟
فجاوبه صاحبه و الحياء بادٍ على وجهه : اي وصلتها بس الامام رد علية بـ " لا ينال شفاعتنا من استخف بصلاته "
من ذلك الوقت و هذا الرجل صار يؤدي صلاته بخشوع و بوقتها و في المسجد حتى صلاة الصبح»
نعم اكو حسرة بگلوب هواي منكم بعد ما سمعو هالكلام ، فهم يتمنون لو يكلمهم امامهم مثل ما يجيب الامام الصادق شيعته
لكن طريقك الى امامك ميكون بدون صلاتك
و يارب يجي اليوم الي يكون بي امامنا موجود بينا و يشخص اخطائنا و يساعدنا على تلافيها
حسيت بحرارة دموعي و هي تنزل على خدي ، طلعت من الگروب و وقتت الموبايل لصلاة الصبح
لإن صوت الآذان بحقيبة المؤمن مايگعدني
گعدت و صحت بخواتي حتى يگومن يصلن محد گامت
نزلت توضيت بالمطبخ ، و شفت ابوية يتوضى بمدخل الاستقبال
من صعدت قريت سورة القل لحدما وگفت على سجادتي ، هو صح راح البال بس زينة خوش صلاة الحمد لله بعدما خلصت صحت بخواتي مرة ثانية فگعدت منى و نزلت تتوضى
إفتحت القران و قريت صفحتين منه بعدين قريت الذّكر الي كتبته من الشيخ بورقة و خليته بسجادتي
الذكر
لمدة ٤٠ يوم
الإستعاذة بالله عشر مرات
والبسملة عشر مرات
والصلاة على النبي وآله عشر مرات
خليت صح بمكان اول يوم
من خلصت صلاة و اني على السجادة اجتني رسالة من عباس
داز بيها ـ 40 يوم بعد صلاة الصبح
1- دعاء العهد
2 - الإستعاذة بالله عشر مرات
و البسملة عشر مرات
و الصلاة على النبي وآله عشر مرات
دز رسالة بعد ـ "علي چان اخوية و شريكي بكل التزام ، اذا تسمحين تشاركيني بهالاربعين يوم"
جاوبته ـ اكييد
دزلي ـ ممنون
جاوبته ـ اني شسويت ، انت الي ساعدتني هواية و هسة خليت عندي همة حتى ما احس بالملل
طلعت دعاء العهد من حقيبة المؤمن و قريته بالموبايل ، بعدين قريت الاذكار
و رجعت للگروب الشيخ ديجاوب الاسئلة
فوگ التسعين سؤال و كلها يجاوبها بدون ملل
السؤال الي ظل ببالي هو لطالبة
سألته ـ شيخنا اني اخاف اصلي گدام الناس او ابچي على الامام الحسين گدام الناس خاف يصير رياء او عجب
فجاوبها ـ العُجُب هو إستكثار عمل الخير ، و الرياء هو انك قصدت ترواي الناس
الحال الذكرتي عبارة عن وساوس لاتهتميلها
ما حسيت غير الشيخ سوالي تاك بسؤال ـ لماذا تمنيتي الموت؟
و مو بس اني لهواية طلاب
جاوبته ـ سابقاً صارت بسبب قلة توكلي على الله
و الطلاب كتبوا اسبابهم
فدزلنا صوتية بعنوان
تمني الموت
🎧 : هل يجوز للإنسان أن يتمنى الموت؟
مسألة تمني الموت مسألة مَنهي عنها بالاسلام
فقال الرسول صلَّ الله عليه و آله و سلم : لا يتمنى احدكم الموت لضُرٍ نزل به و ليقل اللهم احييني ما كانت الحياة خيراً لي و توفني اذا كانت الوفاة خيراً لي
لذلك لا يجوز للإنسان ان يكون سلبي لهذه الدرجة ، لا بالعكس عليه ان يكون ايجابياً و سنرد عليكم بمعالجة الحالات الخاصة التي كان اولها ما عالجناه بالأمس و هي الوسواس
سنأخذ اغلب المشاكل التي تواجهكم و نضع لها حلولاً اخلاقية تغنيكم عن أي شعور سلبي
فشلكم او المصائب التي تنزل بكم جميعها قابلة للحل إن شاء الله
فالرب كريم رحيم لطيف
دز عباس و هو مسوي تاك لصوتية الاستاذ ـ صباحكم ايجابية و رحمة شيخنا ، كلامكم احسن شي نبدي بي يومنا مشكورين
گمت بدلت و من خلصت اخذت دفتر و خليت قلمي بالجنطة ، وگفت الف شاليي على المراية
و اشوف منى مدت ايدها اخذت من الكلنس الي على مرايتنا چانت لابسة شاليي الجديد
ياااا هذا الطلبته امس مني و اني مندمجة بالموبايل
ردت اتعارك وياه بس گوة لزمت نفسي
شعور كلش مو حلو صرت اتمشى بالغرفة شنو هاي معقولة هيچ الشيطان يلج علية حتى اتعارك وية اختي على شال و انزعها الشال
ولك يملطوم شااال
نزلت ستوها 6:30 شلت الصينية من المطبخ للصالة امي صاحت وراية ـ يااا لا يمة لا تشيلين
وصلت بباب المطبخ لاگاني مجتبى اخذها من ايدي و هو يگلي ـ شنو هاي الندارة دجيبي
رجعت جبت گدر الخبز و مجتبى خازرني ، من خليته و گعدت وياهم
گلي ـ عندي اليوم شغلة ببغداد لا تموتين بربچ تانيني اكملها
امي گالت ـ اسم الله ، شجاك
اشر على الصينية و هو يصيح ـ ما شفتيها شسوت ، تريد يوگف گلبها مدري تتگطع شراينها و نبتلي
نزلت منى لابسة گعب ناصي چانت تطگطگ و مزروقة وجهها على گولة مجتبى
لابسة تنورة و قميص من شفتها تذكرت سؤالي الي ردت اسأله للشيخ على هاللبس يعني اني بالعملي اذب العباية و اشتغل بالصاية شلون بالله؟
گعدت تاكل ويانة ابوية گلها ـ منى انتبهي شتگلچ اختچ ، هي تعرف الناس بالجامعة و عدها خبرة
انسي الحب و العلاقات ، ركزي بس بدراستچ طلعة برا الجامعة ماكو بس داخلها ، افتري وية اختچ افتهمي منها اكو مكانات بالجامعة لا تدنيلها ابببد لا تجربة و لا اول مرة خووش
ردت منى ـ ان شاء الله
گام ابوية و طلع خمسة و عشرين من جيبه و گل لمنى ـ انتِ و اختچ بيها خاف تحتاجن ملازم
لگفها مجتبى من ايده و رد عليه ـ يمعود خمسة و عشرين شنو؟ عشرة تكفيهن
گمت لمجتبى تعاركت وياه ، يشيل ايده و ينزلها لمن خذت الخمسة و عشرين منه
بستها و خليتها بجنطتي
التفتت على منى گلتلها ـ خمس بنات بالخط ادارة و اقتصاد يجيبلچ الملازم ببلاش و الأكل لفة بسبعمية و عصير بربع و الباقي ضمي يفيدنچ ملابس
مجتبى سأل امي ـ شسمه هذا السوري البخيل التباوعوله بالمسلسل
ضحكت آني و جاوبته ـ ههههه ابو نجيب ، اي ببداية السنة الاولى كتلت روحي آكل و كذا لحد نص السنة ، اندليت مرأة بقسم العقود تبيع اللفات بخمسمية و نظيفات كلش و چاي بربع
فصرت ارجع من الألف ربع
ابوية گلهم ـ لا خلوها تعرف مصلحتها ماعليكم بيها
مجتبى طلع محفظته و صرفلنا الخمسة و عشرين
راحو و اني ظليت گاعدة بالگراج منتظرة السايق
تأملت السماء ثواني يلا خليت ايدي على صدري و گلت ـ السلام عليك يا مولاي يا صاحب الزمان
انتچيت على الحايط و حاچيته ـ انت وينك؟ معقولة بس تصلي و تصوم زين وين مكانك شنو تشتغل خلال فترة غيبتك؟؟
طلعت موبايلي من الجنطة و رحت لحساب عباس ردت اسأله ، آخر ظهور من ساعة
يعني الرجال طالع لشغلة طفيت النت و رجعت الموبايل لمكانه
دگ هورن الخط لبست حذائي و منى جابتلي دفتري ، امي اجت ورانا
گتلها ـ مع السلامة
ردت ـ الله وياچن ، الله يوفقچن
صعدنا السيارة سلمت على الكل و گعدنا اني و منى بالأخير
ظلت عيني على هدى ، تمنيتها تلتفت هواي مشتاقتلها بس هي شلون بقت وية بلقيس و تركتني؟ رغم بلقيس الغلطانة
من وصلنا الجامعة سألت منى ـ هَم وياچ صديقات بالكلية؟
ردت علية ـ لا وحدة قانون و الثانية آداب
ابتسمت و گلتلها ـ ولچ انتي كليتچ بالشرق و ذني بالغرب ، ديربالچ ترحيلهن بين المحاضرات تروح عليچ المحاضرة
اخذتها اني و بنات الادارة الي بالخط و وصلتها للكلية ، دورنا الاسماء حدما حصلناها عفتها وية البنات و رجعت لقسمي
ماكو و لا طالب من مرحلتنا ، يبوو بس لا متأخرة شوف حظي
دورتهم بالقاعات لمن لگيتهم ، الاستاذ الماخذهم محاضرة سامعة عنه عصبي
فما تجرأت ادخل
ارجعت و بطريقي لاگيت استاذ "علاء" جاي يريد يدخل قاعة التدرسيين
من شافني گلي ـ صباح الخير
رديت ـ صباح الخير استاذ
وياه بنية شابة ، تتلفت بالقسم مبينة طالبة مرحلة اولى
سألني ـ شنو شعبتكم اخذت محاضرة؟
هزيت راسي بالإيجاب ، ردت امشي مد ايده منعني
و التفتت على البنية گلها ـ اسراء عمو ابقي هنا ادخلها للمحاضرة و ارجع
إجة وياية للقاعة دگ الباب و صافح الاستاذ
اشرلي حتى اجي يمه و گل للاستاذ ـ هاي الطالبة سكينة مداومت العام بس بالامتحانات، خطية متيهة ماتدري عن مكان المحاضرة
اشرلي الاستاذ حتى ادخل و هو مبتسم ، سلمت بـ"السلام عليكم" على الطلاب و گعدت بستول فارغ
بدأ الدكتور يشرح و آني اكتب وياه خلص بعد ماكو بس اكل و ونسة ، هاي آخر سنة اشد حيلي و ما اخلي شي يشغلني عن دراستي
ولت أيام سرحان خيالي بجية و رومانسية ظافر
الي تبقى خيال ، ظافر من يجي ما اسمع منه غير «شلونج ، خو ماعندج شي ، لا ما اگدر اجي للنادي عندي شغل»
من طلعنا بوست سمية و رحنا اني وياها گعدنا بالحديقة گبال القسم
گلتلي ـ نص الولد ما مداومين شفتي و باچر يگلولنا ليش اجيتو و خربتو علينا
جاوبتها ـ ما علينا بيهم اني الگروب منطيته كتم
سرحت سمية بوجهي و گلتلي ـ بعد وفاة ابوية زغرت الدنيا بعيني و الكل گال تغيرت
صدگ تغيرت ، هواي امور تركتها و شفتها تافهة بس مو بگدچ احسچ صايرة شخص ثاني
هزيت راسي بلا و گلتلها ـ حالي حالچ المرض و الصدمة فتحن عيوني و يمكن رب العالمين جمعني بيچ و گطعني عن صديقاتي لان اني وياچ نفهم على بعض و بنفس الطريق
شفت استاذ علاء طلع من القسم و وياه نفس البنية ، اسم "اسراء" مو غريب علية !!
چانت لابسة عباية و مخلية مكياج خفيف ، و مثل ماتوقعت مرحلة أولى لإن اخذها للمكتبة و المكتبة فاتحيها للتسجيل
اخذنا محاضرة ثانية ، من طلعنا منها خابرت منى و رحنا اني و سمية لكليتها
جامعيهم الاساتذة و مخوفيهم عن الجامعة و الدراسة
صرعت روسنا بسوالفها
اخذناها للنادي و گعدنا ناكل
سمية كملت اكلها و خابرها الخط
فطلعت ب11 و نص ، و احنا خطنا يظل لـ2
لمن چنا گاعدين بالنادي طبو هواية ولد بينهم ماجستير و موظفين طبگو تلث ميوزة سوة و گعدوا
سألتني منى ـ هذا مو ظافر ؟!
اشرتلها براسي و گتلها ـ ديري وجهچ عنهم لا تباوعين
خلصنا اكلنا و گمنا و رحنا للمصلى رجليها يوجعنها و تدردم من طول المسافة
توضينا و صلينا ، المصلى ببداية الصلاة ازدحام بس خف شوية شوية
منى بس خلصت صلاتها تمددت على سجادتها و اني اخذت قرآن اقرا
من عرفت معاني "سورة الكهف" بليلة القدر الفاتت صرت احب اقراها
قريتها و فتحت القارئ بسماعاتي حتى اقرا صح ، من خلصتها لگيت منى نايمة
يربي اضحك ابسطها هاي بعدها اول يوم و هيچ
عفتها لـ 2 الا ثلث يلا گعدتها و طلعنا للخط
شفنا وحدة من بنات الخط گاعدة على المدرجات ، منى اشرت عليها
لزمت ايدها و نزلتها و اني اهمس ـ لا تأشرين ولچ عيييب
ردت ـ چا مو گلتو المدرجات مو زينة هاي ليش تگعد بيها؟
ما ردت اغتاب البنية فسكتت عن منى
رحنا للسيارة و منى بدت تاخذ صور بالسناب
اخذت وياها صورة و گلتلها ـ البنية الشفتيها گاعدة على المدرجات زميلتنا و مثل اختنا بس ما تشبه تفكيرنا
شفتها ملتهية بموبايلها و ما منتبهة علية فلزمت ايدها و گلتلها ـ أبد لاتحچين على بنية بالجامعة ، واگفة وية الشباب او ملابسها مو محتشمة مو مهم
المهم ما تحچين عنها لان كلنا بينا اخطاء
اني قبل حچيت على بنية و الله من تأنيب الضمير تمنيت الموت حاولت اعتذرلها گلتلي ما اسامحچ ليوم القيامة
اتركي كلشي لا تتدخلين بأي شي خليچ آخر شخص يحچي دوم
انتبهت لهدى مندارة و تباوعلنا ، من خليت عيني بعينها دارت وجهها
فاتن البنات و هاي الچانت گاعدة على المدرجات الوحيدة الي اجت و بوستني و سألتني على مرضي و شلون صرت
وصلونا للبيت نمت نص ساعة و گعدتني بت اخوية نزلت متكسرة عندي مادة لازم احضرها و مابية حيل
من شافتني مرأت اخوية فتت للمطبخ اجت وراية و گلتلي ـ اغسلي الگراج و الممر و التواليت الخارجي هذا شغلچ اليوم
هزيت راسي و طلعت نظفت ، لميت الشغلات الي شامريهن بالممر و صعدتهن للسطح صار نظيف و بي مجال
من اجو الزلم سألوا منو نظف گلولهم اني
مجتبى قطب حواجبه و سألني ـ مو گتلچ لا تمدين ايدچ
جاوبته ـ الممر من زمان مخربط و ردت انظفه
تبارك رددت ـ ايييييييي
گرصتها و سكتتها
ورة العشاء صعدت لغرفتي حضرت مادتي ، ماكو درس جديد لسة ففتحت فلم
من فتحته صارت تجي اشعارات دروس بالتليغرام انطيتها حظر حتى اكمل الفلم
بس كملته ارجعت للخيال و ألف خيال نسجته على هالفلم و حتى خيال جنسي
ما افهم الجاي يصير و ما اگدر اقاوم
نزلت اريد ادخل للتواليت رجلية يوجعني و كليتي اليسرى مال علي توجعني
ثاني يوم الصبح هم مافتحت الگروب بس عباس دزلي الصورة يذكرني
كملت الادعية الي ورة صلاة الصبح ، و صراحة صلاتي ميجوز تتسمى صلاة
قريت الاذكار و انوب دعاء العهد حسيت نفسي مستحية من خيال امس
شلون اقرا دعاء العهد و اني جاي اتخيل هيچ شي؟
كتبت لعباس تم و حتى السؤال عن الملابس ما سألته للشيخ
رحت للدوام خلصت محاضرتين و طلعت وية سمية ، لحگتنا البنية "زهراء" نفس الي حچيت عليها العام و وياها كم بنية
گالت ـ هلاو سكينة شلونچ
كلش ارتبكت من شفتها ، سألتها سمية عن احوالها
فجاوبت البنية ـ ردت اننقل بس ما قبلت الجامعة
قاطعتها وحدة من البنات الجايات وياها و گلتلي ـ سكينة بدون لف و سحب حچي ، ما احب هالشي صدگ انتِ حاچية على زهراء و گايله عليها مكبلة؟ صدگ انتِ نفسچ الي اعتذرتي منها
صفنت بوجههن و حرت بحالي
تنفضح لو تچذب؟
جريت نفس و جاوبتها ـ اي اني ، بس اعتذرت ماكو واحد مايغلط و اعتذرت عن غلطي
زهراء گلتلي ـ انتي حچيتي بعرضي بشرفيييي
رديت ـ حقچ على راسي بس وية ثنين والله و رحت و گلتلهن غلطت و جيت و اعتذرت منچ
قاطعتني صديقتها ـ البنات الثنين هن هدى و بلقيس مو؟
ماعرفت شرد عليها ادنت صديقة زهراء علية و گالت ـ بلقيس راسلت زهراء و گلتلها انتي الي اعتذرتي
عادي بعد ما انصدم من عمايل بلقيس
التفتت لزهراء و گلتلها ـ زهراء اني غلطت و اعترفت بغلطي و ما عندي دفاع عن نفسي ، الله يقبل التوبة انتي ليش متقبلين
ضربتني على صدري وصاحت بية ـ و انتي تعرفين الله ادبسزز
سمية دفعت ايدها عن صدري و صارت بيني و بين زهراء و هي تگلها ـ اول شي شيلي ايدچ البنية مريضة و گلبها تعبان، يعني اذا صارلها شي اسم الله تصير هي حاچية عليچ و انتي كاتلتها ياهو اليسامح الثاني بالله
ثانياً اعتذرت منچ ، صارلنا اربع سنين بالجامعة سمعنا الماينسمع من غيبة و چذب و حچي علينا بس محد اعتذر منا، انتي و صديقاتچ زعلتن كل بنات القسم و طلعتنها كلها بلاية ذوق على لون شال التخرج
لا تصيرن انبياء براسها ، ماتردين تسامحيها انتي و ربچ
بس ببالي شغلة هي الي سولفتچ مو نفسها البدت الموضوع و گالت عليچ "مكبلة"ليش ما حاسبتيها ؟ سكينة بس گالت الشافته بعينها
الا هاي حچت بلا دليل لو لإن سكينة فقيرة و اعتذرت
.
.
.
يتبع