السلام عليكم
هذيان بين جمر وجليد
الفصل ٣٥
نورا ناصر
***********
گولوله :
مـا تعشَك بَـعد ،
مره وچوتها الحرگه
وگولوله :
مـا تنشف دمع ،
مو هيّنه هـيـچ الفرگه ...
كولوله ...
.. ******************
فرح ..
بقيت ارافس ، يربي شورطني أني!! شوورطني شون هيج تسرعت والله تندمت ومية شغلة فرت راسي فر
ومن كل عقلي علي هنانه وينقذني .
ظليت احاجيهن انتن منوو هاا منووو انتن ومنو الي انطاني هذا العنوان وجيت عليه ، وعلي وينه علي ويين .
اجت وحدة منهن كمبصت كَبالي وتباوعلي من فووكَ ليجوه : جايين دننطيج درس حتى بعد متجاوزين حدودج ويه اسيادج .
ظليت احوس وذيجه ربطت اديه
نترت بيها اسيادي منوو تحجين صدك انتي اني ممتجاوزة ويه احد فكووني هدوووني والله اخلي علي يطيح حظجن والله .
ذيج الي دتربط بيه كالت خلي علي يكدر يخلصج من السجن بالاول ..
كتلها ولج انتي ماتعرفين علي محامي وشيخ عشيرة وامير قبيلة والله يطيح حظجن والله يطلع حليب امجن من خشومجن .
ظلن وحدة تباوع للثانية وحدة منهن طكت ضحك
ام نعال اصفر ابو كركوشة رجلج شيخ وانت مخبلة مانصدك .
ظلت ذيج تباوع بخوف كالت انت منو هو رجلج ؟
كتلها رجلي علي الدر شيخ عشيرة *** وامير ال*** .
وحدة تباوع بخوف وحدة تضحك
وذيج كررت سؤالها انتي صدك رجلج شيخ لو تتشاقين ؟
ظلت احوس بأكتافي احاول افك وثاق اديه
كتلها ومنين اعرفج حتى اشاقيج فكيني فكيييني .
ظلت تباوعلها الخايفة وحلكها مفتوح وذيج غاصة من الضحك السخيفة التافهة .
كالتلها الخايفة ولج خاف ورطتنا ام سحر شلووون ؟
ردت عليها دنجبي لا تكولين اسمها وهي ماورطتنا ولاتنسين صديقها عقيد بالداخلية هي بظهرنا مايصير النه شي .
ام سحر ام سحر عزاااا شون وكعتني وكعة الله ياخذها مايتوبن مني ، استهترت وظليت اهدد بيهن وحدة خايفة بس ذيج السعلوة تتمضحك ولا هامها .
اندكت الباب وراحت تركض فتحته ، طب ضابط وويا شرطة اثنين .
ظليت ارجف لااا يا الله لاااا سووها صدك ولا نفعت وياهم تهديداتي الله ياخذهم وياخذ سحر و امها والي ساعدهم .
ماكو غيرها هيام هي الي اخذت تليفوني من دانيال وخلت بي هالرقم واني شكوكي راح تقتلني .
اني ما اكدر اعيش ويه علي ما اكدر ، غموضه يتعبني ابتعاده عني يشلني واني تعرضت لصدمة بعد ما اكدر ابد اتأقلم ويه شخص غامض نفس علي الدر بدون ما اتهمه بالخيانة.
اني بالصالة كبال الباب ودخل الضابط ..
كال انتوا مبلغين على حرامي ؟
جاوبته ذيج تتموع : اي سيدي حرامية موو حرامي بنيه بنيه
كال بنتر كومي ويانه يله ..
ظليت اباوعله اتوسل لالا عفية والله جذابات والله اني لابايكة ولا حراميه هن اتصلن بيه وجيت عليهن والله فلس مماخذة ..
الضابط كال بنتر شعندج حجي كولي بالمركز لضابط التحقيق وهسه كوومي ويانه ..
بقيت كاعدة وابجي : لا حباب الله يخليك زين انطيني تليفون اخابر اهلي اني ابن زوجي ضابط وزوجي شيخ والله مراح يخلونكم تسوون بيه هيج .
كال الكل سواسية وانتي عليج القاء قبض يله كوومي
اشر للشرطي كال جيبوووهاا ...
انوب هذا الشرطي مو بس روحه بخشمه لا حتى شواربه هم بخشمه من كد ما معصب .
كتلهم لا تلزمووني لحد يلزمني اني اكوم
وفعلا كمت وكال هلي الكلبجات باديها .
يريد يخليهم كتله عفية خلي بس احط الشال على وجهي لا الناس تشوفني ويعرفوني اني رجلي شيخ ومعروف بين الناس .
كال مدام رجلج شيخ ومعروف ليش تكسرين وجهه ليش تنزلين راسه بين الناس .
عضيت شفتي هسه انته شعليك ابو شوارب طبق القانون وانته ساكت كطيعة ضباط اخر وكت بس يلغون ويتدخلون بشي مايعنيهم .
خليت الشال على وجهي بس ظليت افكر خاف انزل للشارع انوب يعرفوني من نعالي الاصفر ابو كركوشة قوس قزح!
حتى مرة هذا النعال نسيت نفسي ورحت بي لأهلي وموج واحمد وانين طكو بالكاع من الضحك وسووني نصبة .
ومرة رحت بي للسوك ويه بلقيس وريلام وحتى استحوا يمشون ويايه خلوني وراهم بس اني ما اهتم صراحة المظاهر ماتهمني .
لا وصايتي همينه كضاية الكلفات هايه تصير لف وبالكتف بروش اسود وفضفاضة كلش ، هم نفسها الي
رحت بيها لبيت اللواء ابو ختام .
الشرطي خله الكلبجات بيدي واني ارجف وابجي وخايفة وافكر خاف هذول مو شرطة وشوف وين راح يودوني .
ياربي ياربي ساعدني بامانك اني!
ديطلعوني من الشقة ظليت ادعم والضابط يس يزمخ
وظل يصيح ع البنات كاللهن يله امشن .
جاوبته الوكحة : وين نروح سيدي خما احنه بايكين هيه الحرامية ..
رد : كلجن كدامي يله امشي قدمي شكوة وافادتج يله .
ظلت ذيج تعصر باديها وتكول لصاحبتها
عفية وداد روحي انتي واني خليني هنانه انت قدمي شكوة وانطي افادتج .
عاط سي السيد : كتلجن كلجن ترحن يله كدامي وبلا لغوووة زايدة .
واحد من الشرطة ظل يدردم لمن شاف الضابط طلع
كال كطيعة تكطع النسوان كلهن كل البلاوي من وراهن
كعدن استجنن كبر .
كوة نزلت الدرج مال العمارة ، رجليه وحدة تضرب بالثانية ، واخاف احجي الضابط يسمطني برزالة .
سامحني علي سامحني نزلت راسك بس والله اني قلبي متشعوط من يوم الي سمعته يحجي مدري ويه منو بالتليفون .
اخذونه احنه التلاثة بسيارات الشرطة ، اني وحد وهنه وحد ، ووصلنه للمركز ، وبقينه ننتظر علما يخلص الضابط عنده دعوة قبلنا وظلوا الشرطة واكفين على راسنه الى ان حان دورنا ودخلنا .
اخذوا اقوال البنات ، الي اسمها وداد كالت جنه طالعين ومن رجعنه شفناهه كاسرة الباب وفايتة تبوك بالذهب والفلوس .
جيت اكمز واحجي بس اخاف احصل رزالة واصلا لساني بلعته بهاللحظة واني اسمع التهم الموجهه الي ظلم وزور .
اكيد سحر ماعبرتها الي لمن دفعتها على الجدر وانصلخت ايدها بالمركة وانتقمت مني بس منو راح يصدكني خاف علي مايصدكني ياربي شسوي .
ظل يحقق وياي الضابط يباوعلي واني مخليه الشال خفيف على وجهي ..
كال بحدة نزلي وانطيني اسمج الكامل ووين بيتكم ..
وخرت الشال من على وجهي ولفيته على ركبتي قوي اعاقب نفسي ..
انطيته اسمي الكامل واني اعصر باديه وظليت احجيله
وهو ممصدكني صدك وين اكو وحدة مخبلة هيج تسوي .
كال هسه انت مثل ماتكولين مرة شيخ بس كليلي الشيخ هذا ما طبنج ما كاتلج بحياته ومخوفج حتى ماتتهورين وتتصرفين من كيفج .
انت شون تطلعين لمجرد اجاج اتصال ورجلج شيخ عشيرة واكيد عنده خصوم واعداء يتحينون الفرص حتى يوكعوا ويضرونه مافكرتي بيها هاي انتي ؟
ظليت اعصر بأصابعي : عفية الله يخليك طلعني منانه والله ما اعيدها .
كال هو لعب واطلعج منا انتي عليج القاء قبض ولزموج بالجرم المشهود .
بنحيب وتوسل طلبت منه : لعد خليني اخابر احد من اهلي يجي يتصرف الله يخليك اني والله مريضة والله عندي صرع وبسرعة اوكع ويمكن اموت بركبتك ترة انت المسؤؤل .
جر حسسرة وشمر التليفون على الميز كال هاج خابري
اخذته ايدي ترجف ، اريد اتذكر رقم من الارقام اي واحد اي واحد مااتذكر اصلا ماحافظة ولا رقم .
كال هااا ترة ماعندي اليوم بطوله وياج فضيها .
اشرتله بيدي برجاء زين ماعندك فيسبوك ابحث بي حسابات اهلي والله ما حافظة ولا رقم من ارقام اهلي .
كال بحدة جيبي التليفون مافارغلج المشاكل دك على راسي ومن البارحة منايم وانت تردين فيس ديله تعال حسام وينك وديها للتوقيف .
ظليت اتوسل بصوت اشبه بالهمس ودموعي على خدي .
لاعفية الله يخليك فدوة خليني احاجي اهلي ... زين ماتعرف ملازم مهيب ؟ هو بالجنائيات لابد تعرفه .
رد ماعرف اخذها يله ودخل الي بعدهم يله ..
ظلت وداد تحجي ويا واني اخذني الشرطي
للتوقيف ، اني ممسوية شي حتى مابايكة .
ليش اخذوني ياربي ليش ليش.... والله ممسويه
كله بكفه وشون راح اواجه علي بكفه .
لا لا اكيد مراح يغفرلي هالمرة ، بس اني والله مادري شصارلي كلها التمت عليه ، انوب هو كال بعظمة لسانه اكو غير ختام فتوقعتها وحدة من حبيباته .
ياناس ياعالم الخاين اخو اخوووه واني خايفة انخان مرة ثانية خايفة من صدمة ثانية خيبة ثانية وخذلان اخر والله ما اتحمل والله .
اعصابي تعبانة من العلاج من وفاة بابا من غموض علي من الي محيطين بيه كلهم اعدائي ويكرهوني ويردون الزلة عليه.
وعلي هاملني ابد ماحاول يتقرب مني ولا مرة ويعرف شنو اريد وخاصة اخر فترة واني بأمس الحاجة اله .
اني ما امثل دور المظلومة بقدر ما اني مجاي اكدر اسيطر على نفسي واحس بنفسي مو طبيعية أبد .
دخلني جوه بالتوقيف ، كعدت على الكاع منهارة ، الكاع مفروشة مثل الجودليات قديمة ومهترئة ووصخة ، لعبت نفسي .
ارتجيت ع الحايط جان بارد حييل بداية الشته هسه
كل جسمي رجف ، عضيت شفتي من القهر والالم واديه بحضني اعصر بأصابعي .
اجت يمي وحدة كعدت انطتني جكارة
صفنت بوجهه ، كلت بقلبي اي والله مال جكارة هسه وانسى قهري .
بس مااعرف ادخن خاف اختنك عزااا هم بالسجن وهم ادخن يافرحتك بيه يا علاوي صخام بوجهي .
كتلها لا خالة مشكورة ما ادخن ....
غمزتلي كالت دعارة مو ؟
لطمت خدي : لاا عزا دعارتيش حجية دكولي غيرها الله يستر عليج اني مظلومة والله .
طختني بزندها وكالت يمه يمه منجن تستشرفن شافونه سود كالوا هنود ترة شبعانة منها هاي السوالف داده بيعيها على غيري .
التفتت عليها التفاتة كاملة وبعصبية جاوبتها
كتلها انت لايكون ام سحيلة دازتج عليه الله يخليج روحي بعيد ترة روحي بخشمي .
كالت على كيفج دادة ام سحيلة منو هاي انت ويامن تشتغلين وتخاربتن ؟ كليلي عليها وولا يهمج عيني بس يجي صديقي من السفر ويطلعني منانه اخذج يمي ولا يهمج .
عزااا هاي مصرة اني *** هيج شكلي يوحي لو هاي تريد تلعب عليه!!تريد تجرجرني اشوو مصرة لعبت نفسي وانوب دخان جكايرها بخشمي لعبت روحي من الريحة وعبالك اريد اتقيء .
دااكووم من يمها كتلها اكولج وخررري عني بالله
تره اني زوجي شيخ عشيرة مو مال هالسوالف
ضحكت ضحكة صاخبة مال وحدة خبرة
وكالت مرة شيخ وبالسجن لا والله غير تنذبحين ذبح لمن تطلعين شون مأمنة على روحج ، لج كلها يومين واطلع واسويلج واسطة واطلعج انهزمي قبل لا يكتلوج بليلة ظلمة .
اني منا متوترة ومنا هاي تخوف بيه ، كمت من يمها ورحت كعدت يم باب التوقيف ولزمت بالقضبان مالته خليت راسي عليه وظليت ابجي ملخت روحي من البجي .
اجت الشرطية رزلتني كالت سم حتى سم ولي مناك كعدي وكافي عوي .
متت من القهر ياربي ليش هيج اني شكد نزل من قدري صدك الي يطلع من داره يقل مقداره كولش كرهت روحي والساعة الي طلعت بيها من القصر ، لو ماخذة حجايته وماطالعة ومن جاي مواجهته احسن ليش تسرعتي ام جاسم ليش .
اخخخ ابني حبيبي جاسم والله اشتاقيتله ميخالف حتى لو اسمي جاسم بس ارجع احضنه ، خاف يعاقبني علي هالمرة بي وياخذه مني .
هو بالمرة الفاتت طلعت من البيت خطوات ورجعت حرمني منه بالساعات ، هسه شلون يااللهي واكيد يحرمني منه العمر كله لأن نزلت راسه ودخلت مراكز وسجن .
ظليت طول الليل انوح وابجي ، ومحد اجه سأل عني
اووف هسه اكيد قلقانين عليه وميتين خوف ويتسائلون وين رحت!
اخواتي هسه يفكرون بيه ويمكن هسه وصل الخبر لعلي !! عزا هو بدبي هسه وويوصله خبر اختفائي شيصير بي .
هو مرة كلي انت راح تجيبيلي الضغط والسكر والجلطة مرة وحدة لااايربي لااا احمي واحفظه ، كون اطلع منانه بس هو مايدري ولا عنده خبر بالموضوع دخيلك ربي .
للصبح اجت الشرطية صاحت فرح فاضل ...
اني جنت نايمة واسمع صوتها ، اعصابي تعبت احتاجيت علاجي لاادري نمت لاادري اغمى عليه .
كمت على حيلي متعاجزة عضامي مطحونة
هي فتحت باب السجن وصار كدامي مهيب .
كمت على حيلي ركضت باتجاهه ، عيونه حمرة ومبين بقمة عصبيته .
تراجعت ودنكت ماخليت عيوني بعيونه ، دنكت واعصر باصابعي وندمانة حيل ، هذا مهيب وهيج ضعفت كدامه ، شون راح اوكف كدام علي !
اجه يمي همس بحدة : صدك جذب فرح هيج تسوين بينه ؟ الله عليج من البارحة لليوم احنه ندور عليج لا خلينه مستشفى لا خلينه اقاربج لا خلينه مراكز شرطة بغداد كلها فريناهه .
بلعت ريك وباوعتله ونصيت كتله مهيب والله مظلومة اني انته ماتدري شصار بيه .
طلعتج من البيت وحدج غلط احنه عايشين بغابة واحنه ناس واصلين وعدنا اعداء اكيد مافكرتي بيها هاي ؟
مو علمودنا ولا علمود سمعتنا يابه طززز بس سلامتج انتي اهم من هذا كله مافكرتي بيها .
رديت بتوسل : مهيب واحد من البيت اخذ تليفوني وسجل بي رقم غريب على رقم ابوك وخبلوني مهيب خبلوني والله ماظل عقل براسي .
جر حسرة
كتله بتردد وغصة ابوك عرف ؟
كال وهو يلزم جبينه بابهامه وسبابته بتعب ..
اي عرف ومن البارحة هو متخبل واليوم يله كدر يجي وهسه جاي بالطريق اجه بطيارة خاصة علمودج .
كتله لا مهيييب لاااا ...
كال ماكدر اضم عنه يسمع مني احسن مما يسمع من غيري وهسه تعاي يله .
كتله بس اللبس نعالي واجي نمت ونزعته ..
التافيت رجعت للسجن ادور نعالي مكان مانمت
ماكو ..
وكفت كبال المسجونات كتلهن ياا هي الاخذت نعالي ياهي الي تريكت بي طلعنه يله .
ولا وحدة قبلت تطلعه وساكتات ، سمعت صوت مهيب ..
تعاي فرح دخيلج يولي يانعال خلي نخلص شغلتج يله كبل لايطلع الضابط هذا عرف ديله .
عزااا واروح حافية ؟
كال هسه اشتريلج من يم المركز يله مو حلوة تبقين هنا اكثر يمعودة وعدت ابوي اطلعج كبل لا يوصل .
مشيت وراه الصاية تخط بالكاع مامبينه حافية
وصلنه لغرفة طب بيها واني وراه اشرلي افوت
جانت بيها بنية بملابس مدنية وكاعدة وره ميز
سلم عليها وهي ردت بابتسامة واشرلي ابقى يمها
كال هسه اجي ابقي هنانه .
هزيت راسي بقبول وكعدت والبنية ملتهية تكتب
رفعت راسها باوعتلي وبعدين دنكت ع الاوراق الي كدامها .
ورة شويه اجه بيده علاكة ، اخذتها منه
كال لبسيها هاي شحاطة ويله امشي ندخل على القاضي توقعين على التعهد حتى نطلع .
اخذتها منه فتحتها ، بيها شحاطة سودة مالة عجايز
يله بلكي وجهه خير عليه احسن من الشبشب الاصفر المشؤؤم ابو المصايب .
لبستها ومشيت وراه ، دخلنه على القاضي
وقعت على التعهد وطلعت ويه مهيب من المركز .
تونا طالعين واني دأمشي وره مهيب ، شخطت سيارة
ووكفت يمنه وانفتحت الباب الورة ونزل منها علي .
بلعت ريك واحس قلبي صار ببلعومي من الخوف ، ملامح التهديد على وجهه خلتني امووت من الخوف ومن الفزع .
اجيت اوكع بمكاني ، تقرب مني وعيونه بهامته وحمرة دم وبلا رحمة واحسه كارهني بهاللحظة ونظراته تغتالني بكل ثانية .
اجه يمي باوعت بعيونه استجدي الشفقة منه
واتوسله بنظراتي يخفف عني العقاب .
وصل يمي همست بخوف واعصر بأصابعي
علي أني!
هو عينه عليه بقسوة وعنف مكتوم
ووجه كلامه لمهيب ..
مهيب وينها سيارتك ؟
مهيب رد بطاعة : منانه شيخ تفضل ..
كال بصوت مصرور تعاي امشي كدامي ...
لزمني من عكسي حيل واني ماملك اي قوة وكوة كوة امشي ..
مشينه لسيارة مهيب فتح الباب وعلي الدر اشرلي بقسوة افووت للسيارة ، باوعتله بتوسل وفتت بالسيارة هو دفعني من ظهري حسيت اصابعه اخترقتني بعنف وتوجعت هاي اولها هاي تاليها شلون!
فتت وكعدت وهو اجه وكعد يمي
واحتل مكانه بكل جبروت ...
كتله بغصة وتوسل : علي اني ءء بس اسمعني احاجيك .
اشرلي بحواجبه وبنبرة تهديد ونظرات كلها وعيد
: هوو راح اسمعج وللأخر وبعدها عقابج عسير يافرح عسيييير .
شهكت وبجيت واني اسولفله ..
وكتله علي والله اهلك يكرهوني هم الي وكعوني بهذ الفخ .
كال بتهديد باعي الكل راح يتعاقب على هاي الفعلة بس اولهم انت تدرين ليش ؟ لان كتلج طلعة من القصر بدون علمي مااااكو شبر واحد ماكووو ترحين تطلعين وحدج وتفرفرين بتكسي شنووو ولج ماعندج الي يردج ماعندج الاكبر منج ؟ انت بس كليلي انتي شنوو ولج شنوووو
واشايفتني اشايفتني ؟؟ ابووو نسووان ؟ هاا فهميني ابوو نسوان انه ؟
ولج انه صمت عن النسوان اكثر من عشر سنوات وفطرت بيج
مااكدر اتزوج اثنين وتلاثة وانتي الرابعة ؟ صعبة عليه ؟ صعبة باوووعيلي صعبة ؟
ظليت اطكطك اصابعي بتوتر واححجي بنحيب
علي انته غامض ويايه ولا داافهمك ادخل للمكتب يا الكيك يا ما الكيك واشوفك متختل وي ختام يا اشوفك تخابر وحدة .
عصب وضرب الكشن الكدامه بقبضة ايده
وصاك سنونة بعصبية وغضب ..
ولج اتختل شنووو حتى حجي وماتعرفين تحجين ؟ اعلم بيج على تالي وكت واعوف شغلي طفلة انتِ
ولج لايفيد وياج حبس لا يفيد وياج ضرب لا يفيد وياج هجر طابه بزودج ومسويتني اركض وره النسووان ؟
تنفست بعمق وجمعت شجاعتي : انته عايفني وغامض ويايه مجاي افهمك واهلك اهلك السبب اذا مايردووني طلكني واخلص مني وخلصهم .
عاط انتي تسوين كل هالبلاوي حتى تتطلكين ادري بيج وانه بعد ابد مااتحمل تصرفاتج واذا اخذج وياي للقصر هسه يمكن انهيج وماخلي بيج شي صاحي لا والله اعدمج اعدام على فعلتج هاي ولج كسرتي وجهي ونزلتي راسي ولج انتي شنوو انتي!!!!
بس بسيطة اطلكج هايه مثل متردين وهسه راح اشمرج بيت اهلج من هاللحظة .
نزل من السيارة وطبك الباب حيل وسمعته صاح
_ مهيييب .
ودخل بالصدر مال السيارة واجه مهيب صعد وحرك .
مسحت دموعي ماريج هيج شي يصير
انحنيت وسألته بنبرة حزن خافتة: علي وديني للقصر اخذ ابني وبعدين اروح لبيت أهلي .
التفت عليه وبنظراته انعدمت الرحمة وانرسمت القسوة والحقد كال بغضب مكتوم : سكتي ولا نفس اسمعلج .
ارتجفت شفايفي وتمتمت بس علي اني
رد كتلج سكتي ...
خفت احجي شفت بنظراته انعدمت شكو شي اسمه رحمة وهمزين لحد الان ما موتني فعلا الي سويته مو شي قليل ابد ابد بطني مغصتني شناوي عليه علي ؟
كل شي ولا يحرمني من ابني .
وصلنه لبيت أهلي نزلني ودخلني للكراج مالتهم
لزمت بدشداشته استغربت جاي بالدشداشة ووين البشت مالته !
كتله بتوسل علي الله يخليك جيب إبني الله يخليك ..
كال انسييي وورقة طلاقج تووصلج وخلاني وطلع ..
موج ..
انفتحت المكالمة بالغلط ، غمضت عيوني ثواني وعضيت شفتي واسمع صوته يكول الو الو .
خليته على إذني ورديت بفتور
ش .. الو .
داكول اسمه بلا وعي بس انتبهت لنفسي وكلت بس الو .
واجاني صووته المستفز : همزين حنيتي يابه ورديتي علينه تره اني اريد اعزيج لا اريد ابوسج ولا دافوت عليج للحمام .
رديت عليه عفية انت شكد سخيف وبعدين شفتني ما ارد ليش دا تلح الله يخليك تعبانة .
رد باصرار : اني خطيبج وغصبا عليج تجاوبين اني الي حق شرعي عليج .
رديت : شرار العب دور الرجل الشرقي الي لازم مرته تطيعه على مرتك الروسية مو عليه اني .
رد : وانتي شنو فرقج عنها يابه انتي انثى شرقية متمردة وهي انثى روسية مكفخة لوو شنو ؟ اثنينجن عليجن حقوق ووجبات خاف اني مقصر وياج لان بعيد عنج بس ننجمع واعوضج .
رديت هه ننجمع شلون بالله؟
دافكر اقدملج على فيزا دراسية واسحبج يمي لروسيا اقدملج على جامعة روسية تكملين بيها الماستر واجيبج يمي مرتي حبيبتي .
سكتت مجاوبته بس صدمني!!
كال حبيبتي موت شلونها انكليزيتها ؟ تدبريها اقدملج على اختصاصج باللغة الانكليزية لو تدخلين دورات مكثفة باللغة الروسية تدبرينها ؟ لان اكو مجالات بالجامعات الروسية يدرسوها بالانكليزي واكو بالفرنسي والاكثرية باللغة الروسية .
تجاهلت موضوع الدراسة وسألته مستغربة
وليش تريد تسحبني يمك لروسية ؟
رد : أحميج و .... أحبج ...
ليش كال احميج قبل احبج ؟؟ اكرهك ... يربي ليش دااهتم الهالتفاصيل ليييش ..
أوس مراح يتركج اعرفه وشغلة ثانية اني مدا اخذ رأيج لا دا اعلمج بقراري الي اتخذته ناوي اسحبج يمي .
شرار انته ليش اتصلت ؟
رد باختصار : أعزيج ...
اشو ماسمعتك عزيتني بس داتملي عليه اوامرك
دزيتلج مسجات هوايه اعزيج بيها وانت حضرتج مارديتي صار هواي على وفاة ابوج الله يرحمه راح وقتها التعزية فكلت ابلغج بلي دافكر بي وبعدين نشوف شنسوي .
زين بروسيا اني وين راح اعيش ويه مرتك ؟
اي اكوللها بنت عمي جايه دتدرس هنا وكولش عادي ابوسج كدامها اشبكج لتهتمين من هالناحية .
سديت التليفون بوجهه مقرف بعد ولا اتحمله ...
هدى ..
الي تلث ايام من ولدت وتوه يله اجه عمي من الزيارة واجه شافني اخذ البنية وخلاهه بحضنه
ظل يباوع الها
كال شنو سميتوهه ؟
رديت عمو مادري اريد ابوهه يسميها بس اني ماعندي رقمهم ولا واحد منهم وتليفون ابويه راحت ويا كل الارقام ممحفوظات بالشريحة والشريحة هم متشتغل مدري ليش بلكي تخابرهم وتكللهم .
كال سهلة ان شاءالله جان خابرت هسه بس تليفوني مابي رصيد اكلج بويه مايصير تبقى بتج بله اسم ترة هذا نحس سميها .
رد عليه ابوي اي مو كتلها سميها ماتقبل موزين اله ابوهه يسميها .
كال ان شاءالله خير .. بوسها ودلعها وطلع ..
وبعدها كلما يجي يكول اخابر على تليفون عمج الشيخ مغلق ماكو شكد خابرت ماجاي احصله .
خفت وظل بالي بس خاف مسافر هو عمو دوم من يسافر يغير رقمه وخاف عمي ماعنده رقمه الثاني بس ظليت قلقة عليهم كلش .
ورة ما جبت ب ١٥ يوم جنت كاعدة ارضع بنتي
دخلت سهام تبجي وتعيط ..
سألها ابويه شبيج ؟
ردت خالتي ماتت
جاوبتها اخترعت الله يرحمها ويرحمنا كلنا على هذا الطريق كلنا نموت .
ظلت تلح تريد احد يوديها لبغداد للفاتحة
وابن عمتي وداهه واني ظليت وحدي ايد لابويه وايد لعلاوي اخوي وايد لبنتي وهي بعدها حتى ماكبرت ارضعها من صدري وصوتها ناصي كلش وضعيفة حيل
والفلوس العندي انطيت منهن لابويه سوا عمليه سحبوا ماي على الرئتين جانت ماتخلي يتنفس .
وفلوس علاج علي اخوي هم دفعت منهم
جان اشتريت الها حليب وممة
وشته وبرد وتريد ملابس وحفاضات والبيت بارد .
كطع بيه عمي مدري شبي مو من عوايده هلكد يتركني ومايسأل عني و الله دعيتله بظهر الغيب الله يجعله بخير هو وعائلته .
راحت سهام ويه رجل عمتي لبغداد ، طلبت منها رقم عهود حتى اخابر عليها اخذ رقم لهيب بروسيه اكيد عدها بس هيه راحت ونستني .
فلوس ماعندي اشتري تليفون وبنتي تريد حفاضات
كلت اوفر .
المغرب رحت لابويه شفته خطية شصاير بي مدرر على نفسه ويبجي ويضرب على راسه
متت قهر عليه سخنت ماي اله سخان ماعدنا ورحت دخلته للحمام وكعدت اشطفه .
طلعته للغرفة فتت على الصالة انوم بنتي بيها طليت ع الكاروك مالتها مكلووب وماكو هيه .
تركت ابويه وركضت عليها ادورها ماكو .
بس اسمع صوت بزون يخوف ..
باوعت باب الصالة مفتوح الي يطلع ع الكراج احنه راسا الصالة وباب والطرمة لا كليدور ولا صخام .
ركضت فتحت الباب واشوفها بالعتبة والبزون يعضعض بيها وكماطها مفتوح وهي تبجي بصوت كلش ناصي وتحرك باديها .
تدافع عن نفسها وهو يجر بكماطها ويعضعض بيها ..
صررررررخت صوووت اخترررق سكون الليل
وركضت على بنتي سودة عليه لا حول ولا قوة
شرد البزون جان كلش جبير ككككلش ومتوحش واسوووود بلون الليل .
حضنت بنتي واصرخ وابجي وعلى صوتي اجه ابوويه وطب علاوي بيده طوبه من الباب
بلا وعي مني ضربته مادري وين وكع صوابي على كتفه العليل لوو وين بس هو ظل يبجي متألم
ظليت الف بيها مددمها البزون ياعمري مدممها وصوتها متقطع وهيه تبجي .
صرخت عليه ليش خليت البوب مفتوحة يااااثول ولك بنتي راح تموووت راااح تمووووت .
ابوي طلع للجيران يفزع بيهم واني ركضت لفيتها ابطانيه وخليت عباتي على راسي وركضت اشوف يا ابن حلال يودينه للمستشفى .
شفت ابن جيرانه وجايب امه ويا دخلت لسيارته بلا وعي وابجي واصرخ وهي سكتت سودة عليه لا حس ولا نفس .
والمرة جيرانه تهدي بيه واني منهارة بنتي ظنايه راح تمووووت وابوها ماشافها لايربي امتحانك صعب ماكدر اكمل ارجووك ارحمني وعطف عليه بعد ماكدر دخيلك .
وصلنه للمستشفى ولقسم الطوارئ مال الاطفال فحصها الطبيب وبعدها اخذوها مني ...
وكفوا عليها الاطباء وظلوا يعالجونها ويعقمون جروحها
و يشكلولها اجهزة اشكال مادري شبيها بنتي .
وراها طلع الدكتور توسلت بيه
كال عدها نزيف داخلي براسها الوكعة من الكاروك مأثرة على راسها .
دكيت ولطمت وبجيت ، لا يربي والله حرام الي يصير بيه ، معقولة حوبة لهيب هاي
سالت الدكتور يعني راح تموت بنتي لوو شنو
رد بقت يم الله الي علينا سوينا ادعيلها .
بقيت كاعدة على الكاع وكلبي يفوور وعلى فد دمعة توكع من عيني مانشفت عيني ابد .
وبعدها اجه عمي باوعتله عمي حصلي اهل زوجي الله يخليك عمي .
ظل يخابر فلان وعلان وهم ماكو
كال ماكو والله وعمج جهازه مسدود اخابره وهم ماكو .
عمي عندك رقم خالي ابو عهود الله يخليك .
رد والله مادري هسه ادور بالارقام ..
ظل يدور وهم ماعنده ورجع يخابر الى ان ردوا اله ..
حجيت ويه خالو وكتله بسرعة اريد عهود احجي وياهه ماكو غيرها تعرف رقم لهيب بروسيا .
بس اجاني صوتها كتلها اريد رقم لهيب الروسي بسرعة
كالت ليش ترا اني شفت رقمه العراقي متنشط اعتقد هو رجع للعراق .
كتلها شوكت رجع ؟
كالت مادري بس اكيد رجع علمود ابوه واخوه ..
سألته بسرعة ليش شبيهم ؟
كالت لعد ماتدرين مو عمج الشيخ وابنه الضابط ضربوهم طلقات!!!
انصدمت وضربت خدي شنوووو ؟
يتبع ...
طبعا الشبشب الاصفر انتشر وكسر حتى على كرك نجية وبجامتها 😂
هنا زهور تفوز باكثر وحدة تتوقع توقعات شاطحة بالقصة 😂واختاريتلكم هذا منشورها
الغلاف من ابداع Nana_0325
الشكر اليوم لكل من 👈💚
وكل الي يتفاعلون ع الفقرات خلي ينتظروني بالبارتات الجاية وان شاءالله ما انسى احد ابد 😍💚
احبكم ولا تنسوون التصويت والتوقعات 😘