#خيوط ام حبال
البارت الثالث والعشرون
ل ورد العامري
مالذي بين السماء والارض
من الذي علق بينهما
هل انت ام انا
لا انها انا ها هي سعادتي
بيتي استقراري
راحتي دنيتي المصغره
ها هي الان بين السماء والارض
ها هيه الحبال الذي ربطت
لا الذي قطعت
قطعت حياتي كلها
وربطتني بما لاافهمه
ربطتني بعذاب المجهول
………………………… .
حلا: خالد لازم يده الباب وصافن ع باب 🚪 مديت ايدي افتحها باوع عليه ورجع باوع ع باب فتحها وضل واكف ركضت
طبيت جوه مشيت مسافه بسيطه شفت ابشع شي بحياتي
اسمااااااااعيل
ركض خالد شاف المنظر بركضته تعثر لمس الارض باايده وركض ركض عله
من فتت شفت…
كرسي محطوط وفوق الكرسي بمسافه متعلق اسماعيل من رقبته بحبل مشدود بجنكال البنكه
حسيت رجلي انضربت بالارض كعدت ع ركبي كان خدر سكن موبس رجلي لا كل جسمي
خالد يصيح اسمااااعيل لاا لاتسويها
ولازمه من رجله كان يرفع بيه
لازم رجله ويرفعه ليفوك
خالد: اسماعيل لا لك لاتسويها اسماعيل لك ابببببنننننننييييي انت مواخويه اسماعييييل
حلا: كاعده بالكاع واباوع عليه حبل برقبته مشدود ورجله طايفه بالهوه
اكو حبل طويل ملفوف مذبوب بالكاع يم. الكرسي
خالد من يحركه ايده تهتز كانها ورقه شجر تحركها الرياح
ركبته مائله عيونه مسدوده جنت اباوع عليه من شعر راسه ل اضفر رجله بس ماطلع مني صوت جنت بس احس كل شي بيه توقف وانكتم حته نفسي انكتم بس عيوني مفتوحه
صعد ع كرسي لزم خالد اسماعيل من بطنه ويرفعه
خالد: حبيبي هسه انزلك انزلك واروح للبيت امي امي تنتظرك من الصبح لك اسماعيل امي تموت دير بالك تسويها اسماعيل اسماعيل امي امي تموت لخاطر امي لاتسويها صدك وتعوفني
حلا: يلزمه من بطنه ويحاول باايده يفتح الحبل من ركبته
-منوووو هنااااا ابو مسسسسككك
حلا: صوت بره وفات الولد الي يشتغل ويه اسماعيل اسمه صادق عاط وركض لزم اسماعيل جان خالد رافعه من بطنه
من لزم رجله صادق هده خالد وفتح الحبل من ركبته وبسرعه حضنه وده ينزلوه وكع خالد وبيده اسماعيل تمدد بالكاع
خالد: اسم الله حبيبي اسم الله ياسندي كووم خويه كلشي الك فدوه لك اني فدوه بس كووم لاتكسرني
صادق: انا لله وانا اليه راجعون مع الاسف ليش ياابو مسك ليش
خالد: شنو انا لله وانا اليه راجعون كوووم اسماعيل هسه اروح للمستشفى كوم حبيبي
حلا: من نزلوه صارت رجله يمه زحفت زحوف عيوني تغوش ماكدر اشوف بس لساني اربط اريد احجي ماكدر لزمت رجله وشويه شويه الزم جسمه وصلت لوجهه بس جانت رجله بيها بروده
صرت يم راسه لون وجهه شااحب
خالد من وكع هوه واسماعيل كعد بسرعه يم صدره وجان حاط ايده ثنينهن ع صدر اسماعيل ويضغط عله صدره
صادق لزم رقبت اسماعيل وكال انا لله وانا اليه راجعون دفع ايده خالد وصاح عليه
يريد يرفعه ايشيله رفعه وياه صادق وشاله خالد شيول من بطنه صار صدره ع كتف خالد وراسه مدندل لنص ضهره الخالد
من شفته شاله اريد اكوم مااكدر واريد انطق ياربي صوتي وين راح لا اني تهيت الحجي نسيت شنو الكلام كاني طفل بعده مايعرف يلفظ حته الحرف
صرت احرك باايدي وامتمت باااا اا اااااا اريد الزمه ل اسماعيل شاله وراح يريد يطلع
اريد اكوم مااكدر كمت ازحف زحف وراه وصلت لباب المخزن
اتسندت بالباب وكمت وكفت بس وكفت ع رجلي وكعت اباوع عليه صار يم السياره كمت ازحف بسررررعه وراه صرت يم باب السياره الثاني مفتوحه واكف صادق حته يتلكه اسماعيل من خالد
من شافني وخر لزمت التاير بس رفعت نفسي ذبيت حملي ع باب السياره وشمرت روحي شمر كعدت ع كشن ويه كعدي صار راس اسماعيل بحضني وكتافه
وخالد يعدل برجله صادق سد الباب اليمي وخالد سد باب اسماعيل وكعد بصدر صادق ايسوق خالد بس رجله بصدر نص جسمه رافعه وراجع ليوره
ماعرف ليش ايدي ثنينهن لازمه بيهن وجهه اسماعيل واباوع عليه دموعي جانت تنزل ع وجهه بس غريب الي ده يمر بذاكرتي
هذا عرسنه صوت اسماعيل يرن ب اذني
لاتخافين بحياتي ماافكر ائذيج
لا هذا يوم موتت امي اخوتي طردوني
صوت اسماعيل بااذني
اني كلشي الج اني اخوج وابوج وامج وصديقج وكلشي لاتخافين من شي اني وياج لاتكولين مابقه احد الج اني الج
قطع صفنتي ع وجه اسماعيل صوت خالد
خالد: عن كلشي اسامحك اله هاي مااسامحك عليها ابد
اذا سويتها ومتت مااسامحك اقسم بالله يااسماعيل اذا ماوصلنه للمستشفى وكالولي الي اريده يحرم عليه ذكرك يحرم عليه اسمك مااسامحك طول عمري
كوم وارجع راضي بكلشي اني مصدكك بس كوم لك طلعت هاي اصعب من ذيج
حلا: ايدي تلمس وجهه حاجبه عيونه خشمه واباوع عليه وجهه كان مابقه بي لون
صوت خالد ايصيح
خالد: لللككك دوسس صادق دخيل الله دووس بانزين لك بسررررعه
حلا: اريد انطق احس شي واكف بزردومي وقاطع نفسي حته من ابلع ريكي مااكدر
وكفت السياره وخالد نزل بسرعه وانفتحت الباب الي يمي
صادق:نزلي اختي
حلا: رفعه ل اسماعيل خالد ارفع راسه عن رجلي احس رجلي ثكيله نزلت رجلي بالكاع وبس وكفت وكعت ع وجهي اسمع بس الله الله وارفعت كعدت كعود شي حار ينزل ع وجهي وذقني يحركني وخشمي
صادق :هاج اختي هاي الجفيه حطيها ع خشمج هسه انفوت ايشوفوه
حلا: شرطي وصادق فوك راسي واكفين كومني صادق لازمني معصمي كوه امشي رجلي كاني ارفع جبل
بس دخلنه لمستشفى اكو هوسه جوه وناس كعدني ع كراسي ودخل
خالد جان منزل اسماعيل وداخل التهه صادق ويايه بوكعتي مسحت ذقني باايدي تراب ودم صار باايدي
شفت خالد طلع كبالي صار بعد مسافه بينه
اريد اصيح خالد ماكو صوت ماعندي صوت افتح حلكي بس ماكو صوت
لزمت الكراسي وامشي شلون طفل يلزم الحايط ويتسند ويمشي يتعلم اول خطواته هيج. احس لدرجه جنت اجر برجلي كوه اندار خالد شافني جان يمسح وجهه بذراعه بردن القميص
باوع عليه فتح قميصه بشك اتكطعن الدكم وانفتح
نزعه واجه عليه .
حط القميص فوك راسي لان بله حجاب
خالد: هسه هسه يطلع ويانه غطي راسج انتي شرف اخويه انتي عرضه غطي راسج
هسه اسماعيل ناخذه ونرجع للبيت هذا الدكتور طلعني طردني
ده اكوله اخويه عايش هوه زمال بس هسه يفحصه ويطلع عايش لاتخافين صادق صادق جوه هسه يطلع ووياه اسماعيل اي اسماعيل هسه اخذه للبيت امي تنتضرنه اتأخرنه هسه امي بالباب كاعده اسماعيل
حلا: حط القميص ع راسي كعدت ع كرسي وهوه يمسح بوجهه ويحجي شلون طفل يبجي ويشهنك
ويٱشر ع باب الردهه راح ايريد ايفوت اكو ولد واكف مخلاه يدخل
خالد: اخويه جوه صيحه اسماعيل يله كوم عاد يمعود
حلا: تخوصر ووكف بالباب ويصيح اسماعيل طلع صادق يبجي
خالد: ها وينه
حلا: صادق حضن خالد ويبجي
خالد: دير بالك تحجي مااسمع ماااسمع شي لاتكول شي اسكت
حلا: دفع صادق ويصيح لاتحجي انهاريت اضرب بروحي ايدي متروسه دم من خشمي ينزف وحنجي واضرب بروحي اريد صوت يطلع ماعندي صوت
وخالد ايصيح لاتحجي مااسمع حاط ايده ثنينهن ع اذنه المستشفى كلها التمت علينه هوسه صارت نسوان جني عليه يحاجني ارفع راسي ليفوك وحطو قطن ايدي لازميها وارافس ابينهم
بس صوت خالد مغطي ع كل الهوسه ايصيح
خالد: اسسمااااعيل لككك خويه كوم لاتفشلني لك كووووم شكووول ل امي لخاطر امي تعال ارجع ويايه
لللللللك خووووووووووووويه دخيل الله كوم
حلا: جنت اتمنه اعيط بس كأن لساني اربط
فجأه صارت ام صادق كبالي وولد ثنين اعرف انهم اخوه صادق وياها جرو خالد الي جان كاعد بالكاع ويصيح
هوسه وناس واكفه نسوان ماعرف منين طلعن ايلزمن ايدي
وناس متكومه ع خالد وصوته فجأه سكت خالد
صادق: دكتور ابر لخ لزوجته يرحم موتاك
حلا: جتي السستر الي حطت قطن لخشمي سمعتها تكول
دكتور حامل عادي اطيها الابره ورد الدكتور باوعت ع مكان الصوت كان خالد امدد بالكاع
اطتني الابره باايدي ووخرت شفت خالد كعد ساند ضهره ع حايط و حسيت بخدر او برود بجسمي
مالي حيل اسوي اي شي بعد بس دموعي تنزل بكتم
هدت الهوسه شويه واسمعهم يحجون
صادق :خطيه ام خالد منو راحلها
ام صادق: دزيت اختك ومرت يحيى يمها وخابرت مرت عمك تروحلها
يحيى: لاكيها متخبله كاعده من النوم ع صوت الطفله تبجي صاعده ماكو احد بالغرفه. وطالعه بشارع لاكيها
حلا: بنتي اريد انطق ماكدر بس احرك باايدي
ام صادق: شتردين يمه لا اله الاالله ادري شجاك يااسماعيل شجابك ع الانتحار
يحيى: شلون عرفت انت منتحر اكيد مااصدك اسماعيل ايسويها
صادق: والله لوماشفته بعيني مااصدك
يحيى; شلون شفته وين ابيتهم وامه ماتدري شلون
صادق: لا خابرني خالد يريد مفاتيح لمحل كتله موعندي الصبح هستوني افتح لقفاله واجه اسماعيل استغفر الله الله يرحمك ويغفرلك كتله اجه كالي مانفتح واخذ لمفاتيح مني
ضل بالي صوت خالد جان غريب صيحت الو ماجاوب واسمع صوت دك بحديد سديته ودكيت عليه مايرد
ضل بالي دكيت ع اسماعيل ماكو رد كلت هاي اكو شي طلعت اتمشه وصلت للمحل الباب مال لمخزن مفتوح فتت شفت خالد يحاول يفتحه و اسماعيل مدندل
يحيى: مده تدخل بعقلي حرامات والله يااسماعيل ماتستاهل هيج موته وليش انتحر
صادق :ماعرف ماعرف اوووف صار منع التجوال تره تعال انقنعه لخالد عاد نرجع ايروح ع امه
ام صادق: اي تره وصيت البنات مايحجن كتلهن كولن متخربط اسماعيل و ودوه مرته واخوه وشايفهم صادق وخابرنه
صادق :زين تسوين
خالد كوم راح اضل كاعد هنا تره مايسلموه النه اليوم وراه تحقيق يكولك كوم نروح للبيت يحيى ضبط الشغله وع صبح نجي بس نشهد اني وياك ان هوه انتحر
خالد: ماروح كاعد هنا هسه يكوم واخذه ل امي
ام صادق: يايمه كوم روح شوف امك مايصير متخبله لمره وماتعرف شي دزيت بنياتنه عليها يكولن بشارع واكفه
خالد: شكول شكولها ل امي
حلا: حسيت بنعاس بس منايمه بس خدرانه اسمعهم يحجون
خالد يم لكرسي الي يمي بالكاع كاعد ومثل السد صارو اخوه صادق وام صادق واكفين كبالنه وام صادق لازمتني وتحجي ويه خالد
ضلو ايقنعون بي ماعرف اخوه صادق شسوه لان ع اساس يحققون ع موته بس منع تجوال وهوسه وماعرف شصاير مقتول واحد واكو حادث هوسه جانت لمستشفى كوه قنعو خالد ايصيح ماعوفه ابقه وياه
قنعوه علمود ام اسماعيل كالوله تريد امك تموت عاد انت تهون عليها وانت الجبير ولازم هسه تشد حيلك ومن هل حجي سندت الي المره وامشي اشحط برجلي كوه
صعدنه بسياره بس كان الوقت ده يكون مختصر عندي يعني اررروح بصفنه بعيده يكون دماغي كان شريط بي فلم يسترجع ابويه وامي واخوتي واسماعيل والايام. الي راحت وارجع من جديد وياهم بصوت صرخه او طبه او يوكفونه وين جنتو وين رايحين
انفتحت الباب مال السياره ونزلتني المره ده انزل كوه اشيل روحي
خالد: شكول مااطب ماكدر شحجي ويه امي
حلا: نزلتني المره خالد واكف يم الحايط مال بابنه يصيح. مافوت بعدني بالباب
وانفتحت الباب صارت بوجهي ام اسماعيل
ام. اسماعيل: جيتو وين اسماعيل شبي
حلا: من كالت وين اسماعيل صار يطلع مني صوت مثل ال ييي اااا احرف متقطعه ومخنوكه بالبجي
طلعت بره
ام اسماعيل: ها خالد شبيك وين رايح
حلا: ساندتني المره طويله ام صادق. وخشنه واني بس بطن منفوخ بحيث صايره ام صادق مثل حايط وسد الي
عيوني وره ام اسماعيل صارت شفت خالد ناطيها ضهره وده يمشي شلون يريد ينهزم
صاحته وكف مااندار عليها راحلته
لزمته اندار عليها
ام اسماعيل: شمسوين مصيبه وماتردون تكولولي اعرف بيك من ماتريد تكولي شي تنهزم مني اخوك مسوي حادث هااا شبي ضارب احد كولي شمكسور بي ايد رجل حاجيني ولك. يمه اخيك شبي اني كتلكم كلبي مامرتاح سيارته هنا احد دعمه لالا جاي ماهمه منع التجوال وجاي مكادر ايبات اليوم لازميه العسكر مو
حلا: خالد مدنج ويبجي وهيه تحجي
ام اسماعيل: خالد حاجيني شبي اخوك متعور مصيوب كولي ولك احجي
حلا: نزل كنبص بالكاع كعد وغطه وجهه ويبجي بنات لزموني راحت ام صادق بتجاههم
طببوني للطرمه وسمعت صوت عيطه
-وينه اخيييك وينه
حلا: طببوني جوه مسك نايمه ع قنفه وتشهنك بنومها كعدت بالكاع يمها وحطيت راسي يم رجلها وابجي
طببو ام اسماعيل لازميها من الصفحتين شايليها من ايدها وهيه تهز براسها بينهم شعرها طالع وتصيح
موووابني موووابني المات موووابني
يكعدوها وتكوم تملخ. نفسها وتكمز بينهم وتصيح وينه جيبوه جيبولي ابني
وتصيح خااالللد وياخالد جيب اخوك العالم كلها التمت ع صوت بيتنه هوسه مسك كعدت تصرخ من طببو ام اسماعيل
حضنتها واعيتي عندي بس لساني ماكو
ماعرف شلون صار الصبح
وشلون التمو عمات اسماعيل وخالاته وناس رايحه ناس جايه اني بس عيون بينهم وياهيه الي تحضني كان اريد بس احد يلزمني حته ابجي اكثر احرك ايدي ودكيت ولطمت وملخت نفسي بس لساني واكف
يومين بس هوسه واسمع ان تحقيق ومايسلموه
بس اخذو قرار باجر يستلموه
بس الغريب ام اسماعيل تصيح منين اجاه القلب
ام اسماعيل :منين اجاه والله بعده شاب شلون جلطه تضرب قلبه شجابك ع موت يمه شنو الي جلطك يابعد بيتي يايمه
جابوه للبيت الله يرحمه خالد واكف فوك راسنه مخله احد يفتح التابوت رادت امه حاولت ان بس تبوسه وتودعه ماقبل شالها شيول ل ام اسماعيل
وماخلاها تفتحه تمنيت اشوفه ل اخر مره بس ماقبل
من ردنه نفتح التابوت حضن التابوت لمجرد شويه اتحرك الغطه الي عليه
حضنه وسده وضل حاضنه حته محد يفتحه
شالوه وشيعوه الله يرحمه راحت ام اسماعيل وياه وام مازن ولحكوهم بسياره مازن مااخذوهم ويه الجنازه
3ايام عدت اني مامفتهمه شي حته بنتي مادري بيها
بس ام مازن ثاني يوم الفاتحه
ام مازن: حلا حاجيني ولج شبيج عياطج جنج خرسه
حلا: احرك باايدي واحجي بس ماكو شي ينفهم مني
زمن بنت ام مازن: موكتلك لبنيه ماتحجي صار كم يوم بس ايدها تاشر ع بنتها
ام. مازن: ايسويها لبخت ولج يمه شبيج اويلي عليك يااسماعيل المن عفت امك ومرتك. وبنتك
حلا: 3ايام وفضت الفاتحه طببوني بغرفه ام اسماعيل والتمو عماته وخالاته ل اسماعيل وولدهم ماكو احد غريب بينهم ام اسماعيل مو بدنيه تملخ روحها لحد ماتوكع ويتراكضون عليها
بالفاتحه محد اجه من اخوتي ولااحد وصل
فرغ البيت بس علينه وبس ام مازن باقيه يمنه وبنتها زمن هنه يقومن بكلشي وصلت ويه ام مازن تريدني بس احجي حته ضرب ظربتني
ام مازن: ولج. عيطي طلعي صوتج
زمن: يمه اصابيعج طبعن بوجهه
ام مازن: ولج عيطي طلعي الي جواج روح ولج حرك كلوبنه كلنه هذي ارادت الله بيمن انحير ولج ب امه الي ماتعرف بدنيا شكو تنام وتكعد تشهك بااسمه لوانحير بيج الي اربط لسانج ربط ولج حاجيني ياحلا
حلا: تهز بيه هز وتضرب لحد ماايست مني عافتني وطلعت
وره 4ايام سمعت ام اسماعيل تصيح
ام اسماعيل: خااالد خااالد
خالد: نعم. يمه
ام اسماعيل: اخوك ليش انتحر خالد
خالد: انتحر شنو هل حجي. منو كاله
ام. اسماعيل: كل. الي بالفاتحه حجوه وانت تكولي كذب وهسه نسوان الي جني كلها تحجي
خالد: يمه اسماعيل مات موت الله
ام اسماعيل: ليش انتحر ولك برد كلبي وليدي شلون مات
خالد: الله اختاره يمه عمره اجله لهنا مات موت الله جلطه قلبيه كتلته
ام. اسماعيل: لييش منين جته
خالد: ربج وحده العالم تعددت الاسباب والموت واحد
ام مازن: خيتي اني مو كتلج ذني يكولك بعده شاب والعالم بكيفها تحجي تره
خالد: اجيبلج شهاده الوفاه مالته تقرين سبب الوفاه يمه
ام اسماعيل: اوووف يمه صارت الك شهاده وفاه يابعد بيتي ولك يمه انت الي تدفني وتمشي بجنازتي
ولك يمه عبالي يعزوك بيه عمت عيني بعدني عايشه ويعزوني باابني
حلا: اسمع عياطها ولطمها بس ماكدر اطلع من الغرفه من ثالث يوم الفاتحه كالو بعد لا اطبين ولااطلعين تلزمين عده هنا حته خالد بسطح اينام وماينزل ولايوصل اله احد ايصيحه
عدن يومين سمعت صوت خالد يصيح
خالد: عمه انزل
ام. مازن: انزل يمه
حلا: نزل واسمعهم يحجون يصبر امه وبعدها سمعته
خالد: هاي شهاده الوفاه اقري يمه شمكتوب جلطه قلبيه ربج كاتبله هل موته الله يرحمه هسه المن تصدكين اتصدكين العالم لوهاي شهاده الوفاة
حلا: عدت ايام اني ع حالتي وام اسماعيل ماينسمع الها غير بس صوت البجي والدك وكل يوم صارت تدعي ع روحها تموت واني ع حالتي سمعت ودوها ودكاتره وهاي صدمه بس بيا حال احنه
جانت ام مازن تحجي ويايه وويه ام اسماعيل وتخفف علينه
ام اسماعيل حاطه مسك يمها وتشمشم بيها صارت حته من تنام تصيح جيبو مسك يمي
بمره بليل احتاجيت حمام كمت بعد ما زمن كالت طلعي ماكو احد
طلعت من الحمام ورحت اشرب مي من المطبخ سمعت طكطكه بره شفت من الشباك خالد وام مازن واكفين بطرمه
وكل الي سمعته
خالد: ماكدر اكولها انتحر الي يجي نبهي عليه عمه مايحجي
ام مازن: بس كولي ليش انتحر شصار وياه وهيج فكر
خالد: خسران بضاعه ومن قهره
زمن: ديري بالج خالد بره
حلا: هزيت راسي اي ورحت للغرفه افتهمت ان خالد مزور شهاده وفاه علمود امه كان عنده اهون ان تعرف ميت موت الله ولاتعرف ان سبب موته انتحار
جان. متأكد انها ماتطلع للشارع حته تسمع راح تضل كاعده بالبيت. والي يجي يسيطر عليه ان يوصيه مايحجي بس اني رن سؤال ابالي
بيومها رجعت ليوم موت اسماعيل
بيومها تذكرت بكلمه ليش انتحر
بيومها انعاد كلام الرساله الي جنت اصفن ارتبه
واكول مستحيل لومهما يكون حد التفكير عد اي بشر
مستحيل يوصل بيه التفكير ان ايات واسماعيل ينجمعون بجمله وحده
بيومها كانت صحوه داخل نفسي لكن صحوه نفور
احس بنار اشتعلت بداخلي انتضرت الكل اينام وصعدت للغرفه مالتي من فتحتها صارت كبال عيني صوره عرسنه
باوعت عله الصوره بنضرتين
بنضره الي ماشافت الراحه بيوم اله من شافت هل الرجل وعاشت ايام حلوه وياه
وباوعت بنضره مره بداخلها نار لروحها
اخذت التلفون ونزلت انتضرته بس يفتح شويه اخذ شحن وفتحته ورحت بسرعه ع رسائل
اقره وابجي ابجي بزعل لا ابجي بقهر
عليه اي بس ع روحي اكثر
يمكن مجنونه صرت ساعه احجي ويه نفسي اكول مستحيل الي افكر بيه ايصير اسماعيل مايوم فكر ب ايات لا ايات مرت خالد وبحياتي ماشفت خوه مثل خوه خالد واسماعيل
وارجع اكول شلون كدر وسواها واثور لنفسي غدرني خاني لا خان اخوه يستاهل همزين مات
وارجع من جديد اعاتبه ليش متت وكل الي كانو الي ماتو واني المن بقيت
عدت ايام اني بدوامه بين نفسي وبين عقلي
جنت متمنيه يرجع حته اسئله بس سؤال واحد
معقوله لان مده اعقلها ان تطلع منه
مرات اكره ذكره ومرات ادور اي احد يكعد ويحجي ويايه بيه حته لوبس اسمع
اترتب بدماغي الحجي
وافتهمت الرسائل منين وكل مااذكر المكتوب تهيج عليه روحي
وشلون كدرت عرفت ان اكتشف انها ايات من سامع صوت خالد يصيح ايات عارف صوت اخوه
وصار سؤال الشك الي غصب عني ايصير
اذا بريءليش انتحر
ليش مااجه ودافع عن نفسه
ليش ما واجهه ليش اختار. الموت
راد ينتحر ويضيع كلشي بس مايواجهه
مايبرر راح واكتفه بترك رساله رساله وداع وبس
يكول بيها احنه اغله ثنين
منو اني ليش عافني ليش تركني بهل حيره هوه مات خلص حلا سامحيه
لا مااسامحه مااسامحه لان تركني بهل مجهول
ياريته وكف كبالي وبرر جنت راح اصدكه اعرف بي بحياته مايكذب بس مايروح بهل طريقه
لو اخوه الغالي ليش لعد انجرف ليش ماواجه اخوه. وثبت برائته يمكن خاف لا استحه
استحه من ايام فاتت يطلب الي جانت ادزه الشيطانه يطلبه مني
لالا هيه موشيطانه حته الشياطين الها حدود وتنتهي بالاستغفار بس هيه وين حدودها
صرت افكر ب ايات واتمنه اعرف وينها وشصار ووين بسس اخ يالساني الي نعكد وماكادره انطق
وحته ان حجيت شكول شحجي وشلون مثل هل شي ينحجي ومنو يصدكه اذ جنت اني. نفسي موكادره اصدكه
ترن بااذني كلمه خيتي الي جنت دائما اسمعها بالبيت
اسمعها من خالد الي واسمعها من اسماعيل ل ايات
يمكن مرات الاخرس مرتاح واني هسه خرسه صح
بس يمكن افضل اكون خرسه حته يضل الحجي وماينحجي يمكن ستر للميت ويمكن ستر النه ويمكن لخاطر ام. او بنت او زوجه او اخ
وصرت اسمع خالد يدور بيت ويريد انشيل من المنطقه
عدن 17يوم دخلت بشهر الثامن
كاعده بالغرفه ودخلت زمن
زمن: حلا اجوي اخوتج فوتهم خالد للصاله امي كالت اكولج
اخاف نايمه تكعدين هسه يجون للغرفه ايشوفوج
……… يتبع
هواي سئلو سبب التأخير وعدم النشر
اعتذر منكم بس تلفوني انكسر والحمدلله
وماكدرت اكتب ابد بيه
واليوم اتأخرت تعرفون جهاز جديد وتنزيل ايكلود ودوخته وترجيع حسابات
اعتذر منكم وان شاءالله مكملين
تحياتي الكم
ورد العامري