الشيخ مثبت رسالة: منهم الي قبل اعتذارك و منهم الي طردك و يمكن فضحك و دعى عليك ، و منهم الي سامحك و حبك و تقرب منك
باقي الطلاب اكدو حچية و كلمن صار يكتب عن تجربته ، اني هم كتبت عن سمية لمن دزتلي رسالة تگلي بيها "الله أرحم الراحمين ، الله ستار العيوب"
عباس دز ـ الي اعتذرت منه واحد ، بالبداية ضاج و حاول يطردني بس بعدين اتقبل اعتذاري
فالشيخ رد عليه ـ انت المدلل هنا ، العالم اعتذرت من تلاثة و انت طالع بواحد، الله يوفقك حبيبي
دزالنا الشيخ صوتية
🎧موفقين هاي أول الخطوات ، الي زعلو منكم ظلوا تحاولون وياهم بس اكو حد للاعتذار ، مو بشر تروح تعتذر منه فيستغل اعتذارك لفضحك و التقليل منك
دوم من تستغفر بصلاة الليل، استغفر للي حچيت عليه
من تروح للزيارة اذكر الحاچي عليه بركعتين نيابة عنه
تگلي بس شيخنا هو گلي ما اسامحك ليوم القيامة ، هو هم عنده اخطاء وية رب العالمين
تعالى رحيم قابل التوبة فالي يريد التغيير و يحاول التعويض الله يغفرلة
لهذا استغفر للي حچيت عليه ، اذكره بالزيارة
و يوم القيامة يخلي تعالى اعمالك الهديتهن الة مع خطأك بحقه و إن شاء الله ترجح اعمالك الصالحة
من هذا الدرس ردتكم تعرفون شنو الحالة الي وصلتها النفس من الذنوب ، ردتكم تعرفون شنو نوع الذنوب الي سويتوها و شلون راح توگفون گدام رب العالمين
اليوم انت نفضحت گدام بشر يومين و ينسون ، چا شلون بفضيحتك گدام الجبار ؟
دز درس جديد
🎧 الذنب بعد التوبة
الانسان الذي تاب يلاحظ عودته الى الذنب مرة اخرى لماذا؟
اولاً : إنّ هذا الانسان لم يتب توبة نصوحة فالتوبة ليست لقلقة لسان انما هجر الذنوب و محاربة الشيطان
ثانياً : لا يفهم الإنسان معنى المعصية
الانسان العاصي هو الخارح عن عبودية الله ، حيث يحاول ان يضع قدرته امام قدرة الله
و من كثرة تعوده للذنوب و ابتعاده عن الله تحولت ذنوبه الى اعمال اعتيادية
ثالثاً : لابد من فهم الموقع الوجودي للإنسان امام قدرة الله
الانسان مخلوق ضعيف ، اعرف مرتبتك بالوجود أنت غني مطلق ام ضعيف محتاج ؟
هل يمكنك دفع الموت عنك ؟ لا فنهايتك الموت مهما امتلكت من اموال و املاك
جميع كائنات الوجود لا يمكن ان تكون قطرة في بحر امام قدرة الله
طيب قرر الانسان ان يتوب توبة نصوحة ماذا يحصل له؟
تجده صار يشعر بلذة بصلاته ، لذة بقراءة القران
لكن فجأة تجد الانسان رجع للذنوب ، لماذا؟
و ذلك لإن الشيطان يبحث حتى يجد ثغرة في الانسان لتُثنيه عن طريق الطاعة و يعود الى الذنب
لكن هل هذا حجة لكي تخاف من الشيطان ، لا أبداً فلا سلطة لإبليس على الانسان ، لكن على الانسان عدم الغفلة عن عدوه و مراقبة نفسه
📄الاية الكريمة "إنَّ آلله يُحب التوابين" و قول الرسول الأكرم ان «التائب من الذنب كمن لا ذنب له»
من هو التوّاب : التَوّاب هو صيغة مبالغة لاسم الفاعل (تائب)
الانسان الذي يتوب من الذنب يسمى التائب اما التواب فهو كثير التوبة
مع ذلك يفهم الناس هذا الأمر فهم خاطئ كأن يقول الانسان « الله يحب التواب اذاً جيد ارتكب ذنب و اتوب و ارتكب و ارجع اتوب كما اريد و الله يبقى يحبني ، سواء كانت ذنوبي تضر الآخرين أو لا»
هل يعقل ذلك؟ بل مستحيل
معنى التواب هو انه كلما شعر الانسان بإنحرافه يرجع للتوبة
و ليس الانحراف بسبب كثرة التوبة
نزل الشيخ بهالاثناء تلث صوتيات كل صوتية
دقيقتين و هذي طريقته أكثر شي الصوتية توصل 3 دقايق
🎧 ماهي التوبة؟
جرت مشيئة الله بحكمه و عدله ان يُشرع التوبة ، و هذه نعمة من الله تعالى كما في قوله تعالى
﴿ قُلْ يَا عِبَادِيَ الَّذِينَ أَسْرَفُوا عَلَى أَنفُسِهِمْ لَا تَقْنَطُوا مِن رَّحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعًا إِنَّهُ هُوَ الْغَفُورُ الرَّحِيمُ ﴾
فنسأل ما هي التوبة؟
التوبة هي مشيئة إلهية و عفو رباني للمذنبين ، و لا يتصور احدهم ان التوبة هي اغراء للقيام بالمعاصي
بل إن هذا التفكير الخبيث يصنع حجاب سميك بين الانسان و بين التوبة ، فلا يوفقك الله للتوبة
اما لو فرضنا ان باب التوبة مغلق في وجه العصاة ، فلنفرض انسان مجرم قيل له لا توبة لك تُقتَل تُقتَل ، هذا يسلم نفسه لو يتمادى اكثر فاكثر؟
و كذلك الانسان المذنب فلو قيل له ان مصيرك جهنم ، الن يتمادى بارتكاب الذنوب؟
لذلك باب التوبة باب عظيم
🎧 ماهي المعصية
المعصية هي انتهاك حرمة المولى اي تعدي على حقوق الرب و خروج عن حق الطاعة، العاصي داخل في دائرة الملعونين و المغضوب عليهم
المعصية معناها التولي للشيطان و الخروج من ولاية الرحمن
صاحب المعصية عدواً لله ، صاحب المعصية مبغوض عند الله و لا يستجاب له اي دعاء
صاحب المعصية خارج عن طاعة الرسول و أهل البيت
و كل هذا لأجل نزوات و شهوات زائلة
هزيت ايدي ، على هالحچي ملك السيئات مالتي يسجل و ما يلحگ
لان اني ما شاء الله اليوم الي ما أضوج العالم بي هذا ما يعتبر يوم عندي
دز الشيخ آخر صوتية
🎧 ماهي الطاعة
الطاعة هي ان تحس بأنك مملوك لله الذي خلقك ، و أن تعتقد انه الخالق الذي يلتجأ اليه العباد ، المُنعم العظيم
و ايضاً العبادة ليست تجارة او تملق اني اطيعه فيعطيني الجنة ، لا بل هي خضوع تذللي
يقف الإنسان لله خاضع ذليل فالذلة لله تعطي عزة و رفعة
حيث يُنقل عن حال امامنا الصادق
«ان لون بشرته يصفر عندما يقف للصلاة بينما نفس الامام عندما يمشي بين الناس يكون عزيزاً عندهم»
و لتعلم انك من تحتاج للعبادة و ليس الله من يحتاج لك ، تجد نفسك عندما لا تعبده ضائع ذليل لا تعلم ماذا تريد
فتح الشيخ الگروب و صاروا الطلاب يسألون ، اسئلتهم دوم حلوة و تفيد
لفتني سؤال لواحد منهم
كاتب 📄شلون نتخلص من الذنوب ، مرات اگول خلص هاي هية تبت بس ارجع للذنب
فجاوبه الشيخ 🎧 ـ تتذكرون من گلنا انه الانسان من يدمن عمل صالح 40 يوم تصير عنده "مَلَكة"
طيب سؤال ما معنى مَلَكة؟
عباس و هواية طلاب جاوبو السؤال
فدز الشيخ صوتية
🎧 ـ كل الاجوبة صحيحة" المَلَكَة صفة راسخة لا تزول بسهولة " و انطباق كلمة المَلَكَة على الذنوب شيئ محزن جداً
لان الانسان الذي تعود على الذنوب أصبح آلة شيطانية و صارت ذنوبه صفات لشخصه
ترى أحياناً اناس يفعلون المستحبات لكن لديهم ذنوب تعودوا على فعلها ، فصارو اسارى للشيطان
فبدل أن يُحلي الإنسان نفسه بالفضائل يصبح ملوثاً بالمعاصي
مثلاً إنسان مدمن غيبة ، إنسان مدمن كذب و الى آخره
اذاً ماذا يفعل؟
الجواب يدخل معنا خطوة التخلي التي سنبدأ بها الدرس القادم
طلابي اعزائي اقرأوا دعاء كميل الي في احدى فقراته يقول الامام علي عليه السلام «« و باعدت بيني و بين اوليائك و احبائك»»
الحسين الذي تمشي له و تخدم زواره كل عام و تبكي من أجله اليست امنيتك هي رؤيته و شفاعته؟
لكن إذا كنت غارقاً بالسيئات الن يباعد الله بينك و بين الامام؟
هل تفكر في كمية الحسرة عندما ترى الناس في الجنة يحفون بالحسين و انت مغبون و محظور من عطفه
اني كتبتله سؤال ـ استاذ و الصلاة؟ قبل فترة سمعت عن صلاة البطيخ للسيد عبد الحسين دتستغيب ، إذا السيد صلى صلاة وحدة اني كل يومية اصلي صلاة بالحركات و بس؟
رد علية ـ سؤال ممتاز بنتي سَكينة
الحل كالتالي :
📌اولاً : اقرأوا تفسير السور ( سورة الحمد، سورة الاخلاص، سورة الكوثر، سورة الكافرون، سورة النصر، سورة العصر، سورة القدر، المعوذتين) لما تعرفون المعنى راح تلاحظون تغيير بالصلاة
📌ثانياً : قبل الصلاة اقرأوا القرآن الكريم ولو صفحتين فقط ، انت عندما تصلي تخاطب الله و لكن عندما تقرأ القرآن الله يخاطبك
و كل علاقة تحتاج طرفين فتارك القرآن علاقته بالله من طرف واحد فقط ، فتكون تلك العلاقة هشة
📌 ثالثاً: اقرأوا التعقيبات و تسبيحة الزهراء عليها السلام و صلوا النوافل و خاصة صلاة الغفيلة لا تعلمون كم يبذل الشيطان لكي يمنعك من صلاة الغفيلة من كثر ما هي رائعة لتنظيف النفس
طبقوا و لكم عليً عهد ، باسبوعين او أقل تجد انك ارتقيت الى مرحلة جديدة و رائعة من أداء الصلاة
اني بعد كلام الشيخ صرت اوزع فدوات ، شگد لطيف هالرجال و يبث الأمل بالروح
و الله قبل فترة اگول مراح ادبرها هسة حسيت بإرادة قوية مو طبيعية
عباس دزله سؤال ـ شيخنا سوي عهدك نذر
الشيخ رد عليه ـ منو ينذر اني لو انت عيوني
اكو طالب رافعه الشيخ مشرف "اسمه فراس" ، دوم يحول صوتيات الشيخ للقناة و يثبت الدروس
رد على عباس ـ بروح اهلك لاتخلي ينذر
دز المشرف رسالة ثانية : فد مرة من تخربط شيخنا إجه علي الله يرحمه يشوفه ، الشيخ سنونه تعبانات و المرحوم جايب حلويات
فتحنا الحلويات و گعدنا ناكل گدام الشيخ
علي رحمه الله گل للشيخ : انذرلي شيخنا و انت تطيب
و الشيخ جاوبه نذرت
بس صار عمي زين رحنا لبيت "علي" علمود نوفي النذر ، لان الشيخ ناذر إذا صار زين يتعشى بـبيت علي
ضحكت و رددت بصوت عالي ـ يااا فدوة شنو هاي شيخنا
صاحت اختي الزغيرة "تبارك" ـ اووف لعبت نفسي اريد انطمــــــــــر شنو ما شايفة شيوخ اللصمي
سِحَبت المخدة اريد اشمرها عليها بعدين لزمت نفسي و رديتها لمكانها و اني استغفر ، لا خوش اتعلم دين
نزلت سويت ريوگ ، ابوية برا جاي يرش الحديقة
امي جتي للمطبخ وسألتني ـ خدرتي چاي
رديت عليها ـ اي هسة اجيبه
شالت امي صينية الأكل للصالة
ابوية طب يباوعلي مستغرب لإن گاعدة من الصبح ، گتله ـ صباح الخير
ابتسم ورد ـ صباح الخير
إجة يغسل ايده على السنگ و سألني ـ شو گاعدة؟
رديت ـ صليت و ما جاني نوم فظليت گاعدة
حميت الخبز بالفرن و اخذته للصالة وراهم ، گعدت وياهم و بديت آكل يلا تذكرت اگول بسم الله الرحمن الرحيم ما شاءالله وين الشيخ عني
نزل مجتبى شايل بته و الطفلة تبچي ، طفرت و رحتله شلتها من حضنه
امسح دموعها تدفع ايدي و تنحب
سألتها ـ يااا شبيچ
ما تقبل تحچي بس تبچي
ابوية سأل مجتبى ـ شبيها؟
رد مجتبى عليه ـ فزت من الحلم هيچ و امها تصيح عليها
صاح مجتبى بصوت عالي حتى تسمعه مرته ـ لا تخلفين المن مخلفة اذا ما تعرفين تربين ، شغلة بيها عركة ، بيها مشاكل حاضرتلها بس بتچ لا
اخذت الطفلة و طلعت للگراج ، رحت للمغسلة غسلت وجهها و راويتها الحمامات
گتلها ـ يا شووفي تلث حمامات، شوفي شلون راح يوكلون بتهم
و هي تنشغ سألتني ـ وينهم؟
اشرتلها على الواير الي گبال بيتنا شافته و گلتلي ـ خل ننطيهم عمية
رديت عليها ـ خطية يخافون
رادت تبچي اخذتها للممر و اني اگلها ـ خلي نشوف البزونة اذا هنا ننطيها لحم من الي بقة من عشاء امس
و الحمد لله لگيت البزونة موجودة
نزلت "خولة" و طلعنا الماعون
صاح وراية ابوية ـ وين؟
گتله ـ بس ننطي البزونة اكل و نرجع
اخذت بت اخوية و شردنا منه لإن ابوية كلش مايحب البزونة ، فتتنا اللحم و صرنا نشمرلها و هي تاكل
گلتلي خولة ـ عمة خل نسويلها بيت و ننطيها عميات
ابتسمت و رديت عليها ـ اي حتى جدچ يطردنا وياها من البيت و الله ياعمة ههههه
اخذتها و رجعنا نتريگ و من خلصنا طلعنا بالگراج ، مجتبى طلع يلبس حذائه و يباوعلنا انوب اجه علية و حاچاني ـ بثمانية راح يرحن للسوگ روحي وياهن غيري جو
ـ ان شاء الله
خولة گالت ـ و اني همين
باسها بخدها و گلها ـ غير انتِ القائد ،تروحين و تصعدين يم السايق و شنو تردين يشترولچ
باوعلي راد يحچي شي و سكت، طلع محفظته و انطاني 2 حمر و عافني
اني گدما متعجبة نسيت نفسي و زين لحگت اگله قبل مايطلع ـ الله يرزقك
ركضت لموبايلي و قريت اسم كتب ذكروها الطلاب ، بلكي اشتري من المكاتب
شو رحنا للسوگ و كل المكاتب تگول ماعدنا
تالي واحد گال ماكو بشارع المصورين هيچ كتب ، اشتري من النجف
امي جرتني و هي تگول ـ يلا اني اخابر خالچ يجيبهن بس امشينا
رجعنا لسوگ التجار اختي "منى" خو بس تدورلها حجة حتى نمر على جهة البدلات ، هالسنة تداوم وياية كلية "ادارة و اقتصاد"
اصلاً الطلعة علمودها ، اني بالجامعة ما انزع العباية بس للمختبر ، بالبداية لبستها علمود ظافر بس بعدين حبيتها و تعودت عليها
فإجة ببالي سؤال ، من ارجع اسأل الشيخ ليش العباية بالضبط ؟ صدگ هي الوحيدة الي تستر ، زين الي تلبس جبة لو تنورة شلون؟؟
مجتبى لاگانا بنص السوگ شال بته و صار يمشي ويانا
سولفتله امي على الكتب فهو گلي ـ شلچ بيهن غير رجع دوامچ
رديت عليه ـ عادي حالي حال اي واحد يقرأ كتب وية دراسته
رد ـ مخبلة ، بسيطة نسأل برير حتى بلكي يحصللچ توصيل
اول مرة ما اضوج بسرعة و ارادده على غلطه ، حسيت كلمة "مخبلة" شقة و حتى ابتسمت
و ما سويت الحباية كباية مثل كل مرة
اني الي ردته اشتريته و خلصت ، و هن بقن يدورن لـ "منى"
من وگفن على ابو الاحذية ، مجتبى صار يطلع احذية لبته و اني البسها
اختارت "خولة" حذاء بيها صور اميرات
نريد نشتريها من الرجال و هي ماتقبل تنزعها و تريد تشرد من المحل
شالها مجتبى و انطه للرجال فلوسه
خولة تدفعه و ابوها يگلها ـ ولچ اثبتي بوية و الله ما تنزعيها ، استغفرك ربي شجاب الله هنا طاحظ ابوچ
فهمت انو ابوها غلط على روحه فصارت تضحك و اجت لزمت ايدي
عضلها شفته و ضربها راجدي بخفة على وجهها
التفت باوع للنسوان شافهن بعدهن يگدرن بالأحذية هز ايده و التفت علية سألني ـ ليش ذاك اليوم تبچين فوگ السطح
دنگت و درت وجهي رجع سأل ـ شبيچ ويامن احچي
گتله ـ ذنوبي بيني و بين ربي ، خو ما اسولفلك ذنوبي
گلب خلقته و گلي - امس هذا عباس اجاني يعتذر مني و الله اسأت الظن بيك شنو هاي؟
ما رديت حرت اسولف لو لا
عَلة صوته ـ شبيچ انخرستي؟
ابو المحل صار يباوعلنا فإدنه مجتبى عليه و سألني ـ شنو ناصب علية؟
گتلة ـ ذاك اليوم الشيخ گال اعتذرو من الي غلطتو بحقهم خاف علمود هيچ اعتذر منك
رد مجتبى ـ و هاي شنو معناها؟
گتله ـ شتسوي بمعناها هو يعلمنا
تكتف و بلل شفايفة بلسانه يلا گلي و هو يهرب بعيونه عني ـ اني سألت عنه كلها تگول خوش ولد و ملتزم بدينه شلون يدرس حوزة و يشتغل سوة
جاوبته ـ و اني شمدريني و عادي مو هاي ادرس حوزة و ادرس بالجامعة
نفخ و شال بته و راح وگف بباب المحل من خلصن النسوان ، مجتبى حاچة أمي ـ باچر عيد ميلاد بت زين اشتري هدية للطفلة
خولة ردت ـ عيد ميلادي اني مو فطومة
مجتبى رد عليها ـ انتِ خو يومية عيد ميلادچ
اشترينا الحذاء للطفلة و هي شبعت بواچي
من رجعنا ضميت الحذاء بكنتوري ، تالي العصر "خولة" جايبة الكرسي و صاعدة عليه فاتحة الباب و مطلعة الحذاء ، الحذاء كلش زغيرة و هي تريد تطببها برجلها
رَجعت الحذاء و خليت "خولة" بحضني
گلتلها ـ بس انتِ بت اخوية ، هاي هدية مو معناها نحبها أكثر منچ
ردت ـ حبيثة فطومة
الغلط منا ، احنا دللناها و خليناها تغار مانعرف شلون نسولف وياها و نفهمها
راسلت برير و دزيتله اسماء الكتب و طفيت النت
بعدين من فتحت لگيته راد ـ تتدللين اليوم اسألچ عليهن
ماحبيت تصرفي يعني وياه اطلب منه و ما ارد عليه ، زين هو يريدني و اني لا ، برير خوش ولد بس ما راح يفهمني
هو متحرر و عايش حياته طول بعرض
هَم راح يگعدلي ركبة و نص علمود دراستي بالحوزة
اصلاً اني اريد أرتب اموري ، بعدين اختار الشخص الصح و الي يفهمني
بالليل دزالي برير اسم المكتبة و رقم التوصيل
محول الرسالة من خالي
و كاتب جواها ـ هذا صاحب مكتبة يگول بس تختار الكتب و هو يدزهن
دزيتله ـ ممنونة برير هسة راح انطي الموبايل لمجتبى حتى يخابره
رحت لغرفة مجتبى دگيت الباب صاح
ـ فوتي
طبيت انطيته الموبايل و گتله ـ هذا برير دزلي المكتبة
شاف الموبايل و رداه الي يگلي ـ بعده الولد يسولف وياچ
شفت الموبايل لگيت برير داز ـ ان شاء الله استقريتي؟
جاوبته ـ الحمد لله
رديت الموبايل لمجتبى سجل الرقم و رفع راسه خزرني ، و خابر برير من موبايلي
طلع من غرفته لغرفتنا و اني رحت وراه من طبيت
سمعته يگل لبرير ـ خالي شجاي يسوي
التفت مجتبى شافني دخلت
گال ـ اجت هاي هية بسيطة ، چا شنسوي الله كريم مع السلامة
ردالي الموبايل و گلي ـ هذا الحجي ابو التسمي شهيد
بلع ريگة يلا كمل ـ ابو الشهيد الي انطاچ اعضائه گيال لخالي لا تشتري كتب جديدة و منطيه كتب المرحوم
اخذت موبايلي منه و مجتبى رجع لغرفته
شفته فات و اني دخلت للتلي
راسلت عباس كتبتله ـ مو تجي تطالبني بكتب الشهيد من يوصلن، ذني الي
شاف الرسالة و رد ـ لا تظلميني عمي سألني تريدهن ، گتله لا عندي منهن و طلبت منه يوصلهن الچ
يبوووه و الله فشلة منه
كتبتله ـ ها يعني اسأت الظن تمام اعتذر
رد بعد ـ اذا ما عندچ شي اروح
كتبتله ـ وين؟
صار بودي ارگع راسي بالحايط على هالسؤال
بسرعة حذفتها بس هو شافها و رد ـ لأمي انزل يمها اشوفها
اكتب و ايدي ترجف ـ الله يحفظها
رد ـ و يحفظلچ اعزازچ موفقة
خليت المخدة على راسي و نمت على بطني طاح حظي على هالچفصة طاح حظيييي
و الله كرهت روحي حتى من فتحو ثاني يوم الگروب للأسئلة و لا سألت من الخجل لأن چان موجود
اكو ست رفعوها مشرف تعلمنا احكام الدم "الحيض و الاستحاضة و النفاس"
تدرسنا هالشغلات بگروب البنات
فشفتها سلمت على عباس و ترحمت على علي و سألت عباس على الدفتر مالته جاوبها عباس ـ راح احترگ
سألته المرأة - شلون؟
جاوبها عباس ـ حرگه واحد ما يعرف شنو جواه ، الله يسامحه مايقصد
عباس سولف وية الولد و الشيخ ، سألو اسئلة اني ابد ماحچيت حاولت استفيد من اسئلتهم
العصر خالي مرلنا ياخذ امي لبيت خالي الوسطاني ، ابن خالي الوسطاني هو "رجل اختي" فأخذو امي وراحو يصالحون خالي و مرته
جايب وياه كتبي اخذتهن منه
گلي ـ ذني ملات المرحوم علي ، ابوه ما انطاني جدد گال ذني بدال دفترها الراح
اخذتهن و گلبتهن ، الشهيد مأشر هواية و كاتب بالجاف
بعد العشاء رحنا لبيت عمي علمود عيد ميلاد بت زين و كلها تجمعت هناك
ازدحام و كلمن يصيح بصفحة
سوينا العيد ميلاد ، مجتبى و برير يعلون اصواتهم و زين يمر علينا وحدة وحدة حتى يخلينا نصفگ لبته
من خلصو انطيت الهدية لام البنية ، ما اگدرت انطيها للطفلة لأن بت اخوية عينها على الهدايا خاف ننطي
برير اخذ كيكته و إجة يمي
ظافر گبالنا باوع لظافر و گال ـ هذا و الله لازم ينفوه من العشيرة
مناوي ردت عليه ـ اي و الله كون هيچ يصير
طلعنا للحديقة ، گعدت يم شجرة بيت عمي "ابو ظافر" و البنات گبالي صارن
بت اخوية اجت و گعدت بحضني
دخلت الانستا و رحت للستوري فانفتحت الكاميرا ، طلع وجه بت أخوية بيها
الطفلة نايمة بحضني
أشرت لامها گلتلي بصوت ناصي ـ اي خليها نايمة بحضنچ لا تگعديها
جريت حسرة و طفيت موبايلي مشيت ايدي على خد "خولة" و سرحت ببراءتها
عبر ظافر گبالي لبيتهم و برير إجة يمي سألني ـ ها نامت
و اني مدنگة رديت ـ اي
سألني ـ شنو ضايجة مني؟
باوعتله و جاوبته ـ لااا ليش؟
رد برير ـ زين تعاي يمنا و ادرسي بهذي الحوزة واقعياً، ليش على النت
گتله ـ لا احسن راح يبدي الدوام
قاطعني ـ اننقلي
رديت ـ لا مرتاحة هيچ ، ما اريد شهادة اريد بس اتعلم
خليت موبايلي بجنطتي و شلت خولة رحت لبيت عمي لگيت امي توها جاية من بيت خالي
سلمت على مرأت خالي و گعدت يمهن
ثاني يوم العصر رحت للطبيب علمود كليتي
حللت و المحلل گل لمجتبى كليتها مو زينة
مجتبى ما قبل نكمل وية طبيبي فأخذاني للطبيب صاحبه
الطبيب الجديد هم طلب بعد تحليلات فنزلنا اني و امي للمختبر الي بنفس البناية
گعدنا منتظرين دورنا
صاحتنا شابة من المختبر حتى ندخل ، گعدتني على كرسي و سحبت مني دم
سمعت صوت "عباس" يگول ـ هلا خالة كل الهلا
رفعت راسي و شفته ، سلم على امي و عبر گبالي لميز مخلين عليه غراضهم
و گلي ـ السلام عليكم
رديت السلام بصوت ناصي
سأل امي ـ شنو غيرتو الطبيب حجية؟
ردت امي عليه ـ اي و الله ، يمة كِليتها هي هي و لا تغيرت
دخل محلل ثاني گعد على اللابتوب ، و عباس گام و اخذ عينة الدم من البنية حتى يشوفها
گعدنا على كراسي گبالهم ، عباس يشتغل و يسولف وية امي ـ جاي تاخذ ادوية هاي كلش قوية ، انتبهو لأكلها عدها فقر دم ما يصير هيچ ، چا شلون تتعافى؟ ترا ادوية القلب تعذب الكلية
خلة عينه علية و گلي ـ كليتچ حالياً ماتدري تمنع الأدوية تأذيها لو تشتغل شغلها ، اتغذي عدل
جاوبته ـ ان شاء الله
حاچته البنية على تحليل ـ عباس يمعود مادبرتها هاي
كرسيه بي چروخ فحركه و راح يم البنية ، اخذ منها انبوبة زغيرة و خلاها بجهاز الطرد المركزي و شغله
راحت البنية و وگفت يم راسه تباوع لشغله وهو كمل حچيه وياية ـ إعتلال الكلية من ورة الادوية عادي ، فخلال هالفترة ممكن يمنع الطبيب عنچ الادوية
حافظي على هدوئچ و ابتعدي عن التوتر و اكلي زين
هاي البنية باوعتلي من فوگ لجوة و انتچت للحايط تراقبني ، بعدين التفتت على عباس و سألته ـ تعرفها؟
رد عليها ـ هذي سكينة الي چانت وياية بالمستشفى
اشرت علية بإصبعها و گالت ـ قصدك الي اخذت كلية علي
ضجت منها و رديت عليها ـ اييي اني اخذتها ، هَم عندچ حلقة تراوينيياها
عدلت وگفتها و گلتلي ـ احترمي نفسچ حياة رجلها راح منها بشبابها ، من حرگة گلبها راوتچ حلقتها فوگ ما قبلت تن…
قاطعها عباس الي گام و گال ـ هاهاها يمعودات
عفتهم و طلعت صعدت بس مارحت يم عيادة طبيبي ، گعدت ابچي يم غرفة دكتور ثاني
.
.
.
تابع