السلام عليكم
رواية هذيان بين جمر وجليد
الفصل ٢٧
**********
سلاما شهداء تشرين الجنة مثواكم والقلب لن ينساكم 💔😔
*********
اتراني لا ابالي
هل جربت الدخول الى اعماق قلبي ورية خرابه
هل تجرأتَ على سؤالي كيف حالكِ.
لأجيب لك حالي بكل وسوء ٍ تزين
وبكل َالمٍ تغنجَ .. حالي بالبكاءِ قد غرقَ.
وبالندمِ تلحفَ. حالي لم يعد كما كان بوجودكَ.
حالي صامتٌ ينظر بأعينٍ دامعةٍ لخراب احوالي ..
أتراني لا ابالي. فيالكَ من كفيفٌ لا يرى مدى احزان احوالي .... بقلم الكاتبة HafsaHafsa710
********
طختني برجلي وكالت انت هسه شكد عليج ؟
جاوبتها والله مادري شكد حتى تحليل مماخذة حتى مادري بنفسي صدك حامل لولاء ..
كالت شوكت تقربلج هو ؟ عاد لاتصيرين كلش فاهية ؟
رديت مادري شوكت بالضبط بس هيج بشهر الثالث .
ردت : حلو وهسه احنه بشهر السادس يعني عليج اربعة اشهر والطفل جبير هداوي ومااعتقد نكدر نسقطه الج .
ضربت ايدي على صدري لا عزااا اكتل رووح!!! لالا ومو أي روح هاي روحي طفلي شون اسقطه .
كلت هيج واباوع بالفراغ بعصبية وابتعدت عنها .
ظلت تفر بيدها وسحبتني من طرف ملابسي وقربتني منها وكالت بحدة : ولج يامضيمة يا مصخمة تعاي ووجع اني مكايلتلج سقطي شدااكل تبن اني دااكلج جبير صار ومايوكع .
هزيت راسي متوترة وحجيت بنتر : اي اي لعد شتقصدين الزبدة اريدها .
عوجت حلكها وظلت تفر ببوزها وترفع بحاجبها
تردين الزبدة يا مصخمة شكالتلج روحج من احم
خليتي يتقرب الج وهو سكران!
قطبت حواجبي وجاوبتها ماكدرت عليه ماكدرت ولا تخليني اندم لأن كتلج عندج حل كليليا ماعندج سكتي عني وخليني يحلها الف حلال .
مصيبتج ماتنحل اله بذبحج يا صخيمة اذا ماسمعتيني وماطعتيني .
اي بالله كولي اسمعج اريد خل بالله شنوووو ..
جيبي الطفل واني اخذه اربي باعتبار ابني واشوفلج دكتورة سستر ترجعج بنية ..
نزلت راسها شهكت ، خليت اديه على بطني واباوع
لايمه لااا حرام عليج شون اضحي بأبني لا عفية ماكدر .
جا موووتي يطبج حمس شسويلج وبعدين هو ابنج كدام عينج قابل وين يروح وين اودي هو يمي هنانه
واذا تردين تطلكي من رجلج وكابلي وكعدي .
عضيت شفتي : خاف مايقبل يطلكني .... وبعدين انتي شلون تكولين الطفل ابنج وابويه مريض و
_ انت حامل كبل لا يتمرض ابوج وبعدين شكو بيها نجذب جذب وببلاش نكول حامل من زمان بس ماحجيت وكبل لا يتمرض الشويب .
_ واني بطني وكلما الها تكبر شون اضم حملي على الناس .
_ هو منو الناس ماتكليلي شو احنه كاعدين بصحراء محد يدخل علينا غير عمج ومرته كل شهر مرة عود من يجون هالجم شهر لاتطلعين مرة نكول مريضة ولافه راسها ونايمة ومرة نكول طالعة للجيران وهيج تعبر واذا كلش كلش اخيطلج شون دشاديش كل وحدة يدخل بيها فيل وماتبين بطنج .
باوعتلها احس براسها ثعلب ماكر وكاعد يخطط
ما تتأمن والله بس خوفتني وخلتني ارجف والله الروح عزيزة وخاف صدك يكتلوني الموضوع مو هين ابد .
اني مالكيت كدامي غير اني افضفض لمرة ابوي خصوصا هي عايشة وياية اكيد لاحظت عليه تغيير جسمي ، مشيت وجهي كلشي متغير بيه والموضوع ماينضم بعد .
شسوي ياربي منين اجيب امي تنصحني ، تنفض تراب كبرها وتجي وتعيني وتوكف وياي ببلوتي وتحميني .
فتحت عيني على الدنيا ابوي ايده والضرب لا يعرف تفاهم لا ثقافة واخرها لمن شمرني ع لهيب بحجة هدية وتقدير الهم وفرضني عليهم
ومافكر انو هاي اكبر اهانة لكرامتي .
كالت ها شوو سكتي !
كمت على حيلي باوعتلها ودنكت
كتلها الله كريم منا لمن اولد ...
_ اني اريد مصلحتج وخايفة من الفضيحة لا عبالج اريد استغلج .
بس هزيت راسي وطلعت بره اشم هوا وانتظر جية عمو وفرح .
فرح ..
كاعدة بالغرفة ع الجرباية واسفط بالاغراض الي اشتريتهم لهدى وتذكرت علي كالي جيبي تليفونها من الغرفة هماتين ناخذه ويانه لان ناسيته ...
خلصت كل شي ونومت دانيال ورحت لغرفة هدى
هي ممقفولة ، فتحتها ودخلت فتحت الضوه
وظليت ادور على الموبايل .
حسيت حركة ورايه ، كمزتني درت واشوفها هيام
واكفة يم الباب وتباوعلي متعجبة .
خليت ايدي على قلبي واباوعلها بخوف وارمش
كالت بصدمة هاي شعندج هنا وليش تفتشين باغراض هدى!
حاجيتها بعصبية اكلج انت ماعندج غيري شكو جايه وراي شكووو ؟
تخصرت ووكفت : غير شفت الغرفة مفتوحة واصحابها مموجودين تفاجأت عبالي رجع لهيب!
مشيت ودااطلع وقلبي يدك سريع
كتلها وخري من خلقتي الله ياااخذج ...
ردت : ليش تدعين عليه الله ياخذج انتي كون يومج قبل يومي ان شاءالله ...
جاوبت بحدة واضغط على اسناني ..
_ ياخذج ويخلصني منج حقيرة.
داا ادخل لغرفتي ، غيرت وجهتي ونزلت جوة توجهت
لغرفة المكتب .. فتحت الباب وفتت ، شفته كاعد على الكرسي الي ورة الميز ، من شافني دار الكرسي عليه باوعلي ونزع نظاراته .
واني جنت بعدني دالهث واعصابي متوترة بسبب الهبطة الي اكلتها ..
كتله شوكت تجي ننام ترة نعست اني ، ودانيال نام ومابيه اسهر لل ثنعش بعد مو تكول نمتي وخليتيني!
ظل يباوعلي مقلص عيونه ، درت وجهي منه احاول اهدأ روحي ادري بروحي منفعلة وراح اجفص ..
هو كال تعالي ويأشر بيده على المكتب بخفة ..
رحت يمه وكفت واتنفس سريع ، وهو كاعد لزم ايدي جانت ترجف عصرها حيييل .
دااسحبها منه ما اكدر قبضته اقوة مني ..
كال بهدوء : شبيج ؟ ياهو ويا فرحتي ؟
سحبت ايدي منه حسيتها عركت بضغط اصابعه
شبكت اصابعه وامطط بيهم واحجي ..
_ جنت ادور على تليفون هدى بغرفتها اجت هيام خرعتني عبالها داخلة بغرفتهم ابوك .
تفحصني بنظراته لحظات وكال : هيه كلتلج تبوكين لو عبالهه ؟
_ شنو الفرق اني شفت كل شي بنظراتها عبالك دتكولي دتبوكين وحتى نبرة صوتها همين هيج تكول .
غمض عيونه ثواني مبتسم عبالك يضحك على طفلة
وباوعلي بعده مبتسم : واحنه نمشي ع النظرات بويه؟
درت وجهي زعلانة : اصلا اني مجاية اشكيلك منها ادري بيها تكرهني بس خوفتني واني بأمر منك رحت دادور ع الفون قابل شعندي بغرفتهم!
دااريد اروح واسوي نفسي زعلانة سحبني من ايدي وكام من الكرسي ، طوق اكتافي وضعت جوة ذراعه ..
باس راسي ، رفعت راسي اباوعله وتحسرت
لزمني من حنجي وابهامه على شفتي .
واني اباوعله بزعل وهو مبتسم
عصر حنجي وشفتي سوه
شد على اسنانه وكال ليش هالحسرة ؟
كلت بزعل ماكو شي بس احسك تستهزء بيه
فتح عيونه ورفع تك حاجبه وكال أفاااا ما عاش بويه مااعاش . امشي وياي ..
مشينه على هالوضعية حاضني من اكتافي
وصلنه للباب طلع قبلي وسحبني وراه من كف ايدي .
صعدنا فوك وكفنا يم باب غرفة البنات ..
وصاح هياااام ..
عفت ايده واريد افتح باب غرفتهم ، هو سحبني ورجعني باوعتله بصدمة وانزعاج
كال وين رايحة ومسوية هجوم هيه هسه تطلع وماريد اسمعلج حس انه احجي وياها .
سحبت ايدي منه : اي فهمت مراح احجي بس اتركهه لأيدي وبعدين شكو بيها اذا دخلت لغرفتهم بدون مادك الباب اني هم بنية مثلهن .
كال لاء كل واحد اله خصوصيته حتى لو بنات تعلمي دك الباب ماراح تخسرين شي .
اي بس اني متعودة ادخ
قبل لا اكمل كلامي طلعت هيام مسويه نفسها منعسة
وكالت نعم خالو ..
كال الها روحي طلعي تليفون هدى من غرفتهم باجر الصبح اريده يمي ويه اذان الفجر تلكيني كاعد جيبي الي .
جاوبت بس خالو فرح قبل شويه دورته مالكته ..
اي وانه اريدج انت تدورينه وتجيبينه الي واذا مالكيتي اخذ تليفونج ترة واودي الها .
انتفضت بتوسل لا خالو فدوة هسه اروح ادوره واذا لكيته اجيبه الك .
باجر ويه اذا الفجر جيبي مو هسه انه راح ادخل انام ...
خالو اني خاف ما اكعد ويه اذان الفجر اني لماما لو لبيبي!
كال باصرار وخشونة : مشكلتج هاي تكعدين على وكت تنطينيا وحتى يصيرلج درس مرة ثانية لا تتدخلين بشي مايخصج وهذا اول درس الج يا هيام ..
كال هيج ويأشر بسبابته باتجاهه بوعيد .
هي تباوعلي وترجع تباوعله بتوتر ..
جنت مبتسمة باوعلي بقسوة وكال بحدة
_ شبيج فرررح ليش تضحكين اكو شي يضحك بويه ؟
بلعت ريك وهزيت راسي واختفت ابتسامتي بخوف ..
دخلنه للغرفة ... كتله ليش فشلتني كدامها ..
كال بحدة فشلتج كدامها شنو جاي احجي وياها تتمضحكين ليش ؟
اي انته كلتها تحجي وياها لا ضاربها ولا مصيح عليها مجرد حجي عادي رغم هي تستاهل الضرب والصياح لان خبيثة .
لزمني من اكتافي وقربني اله وكال باستنكار
لاء لاء بويه مو هيج ، هيام بنيه حديثة مايصير اقسى عليها زايد هالشي راح يولد كره وحقد والنتيجة مشاكل الهه اول ماالها تالي .. وانه مو قاسي لهالدرجة اقسي على يتيمة انه لو اريد اصير قاسي جان قسيت عليج كل جفصة بكد راسج واسكت عنج واعاقبج بغير طريقة ويغمزلي .
حركت اكتافي وابتعدت عنه ، انطيته ظهر وكتله واني اعصر باصابعي اي لا خطية اني مااخذت نصيبي من قسوتك مو حبستني ويه الموته وجلطتني وسويت عملية!
سحبني من خصري ودارني عليه ، طخيت بصدره
باوعتله وشحيت نظري منه بزعل
كال لا تنطيني ظهر ولج من تحجين وياي مفهووم ؟
سكتت عنه عصرني حيل عليه ، خليت ايدي على صدره ادفع بي بخفة توجعت وهو ظل يهز بيه وهو شابكتي حيل انجبرت احجي اكله بانزعاج
اي خوش .
كال بحدة كووولي صااار ....
سكتت شويه ، رجع وجعني من يضغط بيه على اضلاع
واتوجع ..
كلت مرغمة صاااار.. صااار .
رخ اديه مني وكال يعني لو هيام سوت سوايتج الي سويتيها تتوقعين اسكت عنها وما اعاقبها .
رفعت راسي اباوع بعيونه بحزن ...
مادري بعد ظلت انته وياها المهم اني اخذت نصيبي واصلا لهسه راسي عبالك بي شي ينبض ويوجعني ..
ترك خصري ولزم وجهي باثنين اديه ويباوعلي
بتفحص ويبعد خصلات شعري عن وجهي ..
ليش ماكتيلي وليش ساكتة ؟ نأجل روحتنه لهدى اوديج للدكتور باجر ..
وخرت اديه مني ورحت كعدت على السرير
لالا عندي مراجعة الشهر الجاي واريد اروح لهدى اني اريد اغير جو تعبت نفسيتي منانه .
اجه صار كبالي واني رافعة راسي اباوعله
وهو يحجي : ميخالف ورا ما نطمأن على صحتج يم الدكتور اخذج ونسافر الدولة الي انتي تختارينها نروح الهه .
رديت واني مدنكة اصابعي بحضني اعصر بيهن
_ لأ مو هسه خليها ورة سنوية حمدان الله يرحمه احسن .
راح لداني على السرير وشاله بين اديه
وباسه على راسه .
وكال براحتج ..
وراح خلاه بسريره وغطاه .
وراح تمدد على السرير واني ظهري عليه صفنت
كال فرح ..
التفتت اله لازمة بطرف الجرباية الخشب
وباوعت عليه ظل يأشرلي بأن اروح يمه .
تجاهلت تأشيراته وكتله مراح تكولي منو قتل حمدان اني ابني هذا اذا كبر وسألني على ابوه شون مات ومنو قتله شكوله ؟
جان مرتكي على ظهره من كتله هيج عدل كعدته
_ وانه وين رحت بويه ؟ انتي ماعليج خليه عليه .
حجيت بنبرة اقرب للرجاء : علي انته كتلي حمدان قاتل كلي هو قاتل منو ومنو قتل ؟ لا يكون هو قتل سامر ؟ جان وضعه وره اختفاءه مو تمام ! كلي علي الله يخليج والله دا اكل بروحي .
تنهد وجر حسرة كال تعاي نامي ام جاسم تعاي وتركيها هاي السالفة باجر ورانه سفر من الصبح ..
كال هيج مدد روحه روحه عدل ونام صفح وغطه راسه .
بقيت شويه لا اراديا دموعي نزلت على خدي
مابقى اله كم شهر على سنوية حمدان
باوعت لعلي ودائما اباوعله واتساءل بداخلي
هم راح يخوني مثل اخوه ؟ لو لا ، دائما هذا التفكير شاغل بالي صرت عديمة الثقة ومستحيل اثق او اعبر شي بعد .
ويروح بالي لبعيد واقارن واتخيل معقولة كل هالخبرة والرومانسية وصابر ع نسوان صار سنين!
معقولة ماكو وحدة منامنا يعني ! خاف هم يطلع متزوج بالسر نفس اخو !
كمزت من طرف السرير لنص الجرباية
شمرت نفسي يمه طخيت بي بعنف .
كعد هو وباوعلي وعيونه حمر طوخ
خفت منه ..
كال بصوت عالي ومعصب : شبيج تكمزين بنص الليل شبيج؟
يريد يكمل شاف دانيال ظل يحوس وراح يكعد على صوته سكت وظل بس يستغفر ..
واني جيت اريد اسأله بس من شفته هيج خفت
تمددت ونمت ونطيته ظهري وهو هم رجع نام
كعدت شفته جاي يصلي صلاة الفجر
وشفت تليفون على الميز ، يمكن تليفون هدى
والله حلو الخوف يمكن هيام صدك كعدت من الفجر وجابته اله والله خوش يعرف يتعامل وياها .
كمت توضيت وصليت وراه وهو خلص صلاة
وديقرا قرأن ...
خلصت صلاة ورحت نزلت جوه الحجية وبلقيس كاعدين صوتهم جاي من الغرفة ، رحت للمطبخ
شفت الجاي حار اكيد بلقيس حررته لان تدري بينه نطلع على وكت لان السماوة بعيدة عن بغداد.
سويت ريوك وحضرته ودااصعد اله اصيحله
شفته نزل رجعت للمطبخ .. اجه وراي
كال جيبي الريوك لغرفة امي نتريك يمها .
هزيت راسي وخليت الريوك بصينيه ووديته
لغرفة الحجية ، شفته كاعد يمها على السرير ..
يسولف وياهه كلت صباح الخير ودخلت
ردوا عليه هو وامه كالتله ترجع هداوي وياك ؟ والله هالبنية صدك ماظلت هنا هواي بس مكانها فارغ تعودت عليها انه .
جاوبها لا حجية تكول لمن مايجي لهيب يله ترجع تريد تبقى يم ابوهه مريض وتعرفين هيه وحيدته ومرضه خطير خاف يصير مايصير تالي تظل بحسرته وتدرين الطريق طويل من السماوة لبغداد وهم ومابقى شي ولهيب يرجع وارجعها .
خلصنا ريوك ورحت كعدت دانيال كعد مطنكر
وبس يبجي ، حتى ممه ماايريد ، يريد يرجع ينام ...
بدلتله واريد ارجعه على نومته خبصني ..
علي اخذه مني بينما سبحت و بدلت رجعت شفته منومه ومنزل الاغراض للسيارة ، لبست صايتي وشالي ودخل هو دنك على الجنط الباقية ويحجي
مناسيه شي اغراض هدى تليفونها اخذتيهم ؟
دااجاوبه بس هو رفع راسه باوعلي
كال هاي شنو شلابسه انه شكتلج لبسج هذا تنسينه وين العباية الي اشتريتيها ؟
كلت اوووو .. خزرني ، عضيت شفتي من الخوف
كال انه شلون اظل اعلم بيج هاي الكلمة مااحبها اذا كررتيها تتأذين وقد اعذر من انذر ..
كتله تره هي والله حتى متعتبر كلمة هيه بس حرفين
(أ) و (و) تعتبر ريكشن ....
كال بشدة بلا عناد فرح ماحب هاي الكلمة وماحب تعترضين من انبهج على شي وامنعج منه
هذا هو خلص تبطلين تسوينه وتكولين صار فقط!!!
رفعت حواجبي وكتله فقط!!
خزرني مرة الثانية خفت لا يركعني بالجنطة الي بيده جبيرة لو بالثانية ميخالف بس هاي كبل للنجف مو للسماوة .
درت وجهي وطلعت العباية وخليتها على راسي ..
ونزلت جوة وكفت يم السيارة ، شافني هو باوعلي باستغراب ، فتحت عيوني وحركت وجهي بمعنى
شنو ؟
كال ابنج وين ؟
كتله فوك بالغرفة
رد : وليش مانزلتي وياج ؟
جاوبت واني الف العباية من وسطها : مو ماعرف اشيله والله وانت كتلي تشيله عني لمن نطلع واني لابسة هاي العباية ..
حسيته عصب سحب نفسه بقوة وفرك كصته باصابعه
كال انت عقلج وين ؟ وين وين مخليته ؟ بالكنتور لو بجيبج ؟ اذا هيج طلعي وخلي براسج وفكري عدل .
نزعت العبابة وتقربت عليه واحجي بسياسة
بس لاتعصب هاك هاي العباية الزمها اصعد اجيبه واجي .
بقت العباية معلكة بيدي وهو بقى خازرني
خليتها جوه ابطي وصعدت جبت دانيال ونزلت
وصعدت بالسيارة هو جان كاعد بالصدر التفت عليه
كال خو ماناسية شي ؟
هزيت راسي بمعنى لا ..
بعدها اجه السايق وانطلقنا للسماوة ، الطريق طويل
واني احب الطرق الخارجية ، نباوع من الجامة اني ودانيال على الطريق والسيارات ..
ابتعدنا كلش هواي عن بغداد ودانيال راد ممه
باوعت يمي حتى جنطة ماكو يا يا نسيت الجنطة الي بيها ممة دانيال! ووووو تليفون هدى.... ركعت ايدي بكصتي .
ودانيال زاد بالبجي يريد ممته ، التفتلي علي بتساؤؤل
عضيت شفتي واتوسله بنظراتي واستحي من السايق
اكول نسيت جنطة ايدي .
خليته على صدري وحضنته وابوس براسه واسكت بي
شسوي بعد ولا احصلي رزالة . عود من نوصل يمهم بلكي ننزل سوك ونشتري منه بس موبايل هدى شلون
وعلي هواي اكد عليه ! ياربي شكد ثولة أني....
اني مترزلة مترزلة اليوم ...
دخلنه للسماوة وبالكراج جان ينتظرنه عمها
مشى قبلنا ومشينه وراه حتى يدلينه البيت ..
الى ان وصلنا لبيت اهل هدى وهي جانت باستقبالنا
سلمت عليها وبوستها وسلمت على علي باس راسها وبوست ايده وفتنه جوه .
علي دخل للاستقبال واني رحت وره هدى للصالة
تلكتني مرة ابوها سلمت عليه ، بوستني مية بوسه العباية ادورها وكعت ع الكاع صارت جوة الرجلين ودانيال خطية يدفع بيها ويتفل عليها لان جعصته جعص وهي تبوسني وتسلم عليه.
كعدنه بالصالة وهدى خطية ضيفتني
واجت كعدت يمي تسأل عن البنات ..
باوعتلها كتلها سمنانه هداوي ..
هيه خطية دنكت وخجلت مدري توترت ..
نطت مرة ابوهه عيني دكي الخشب لا تحسدينها .
ظليت اتلفت كتلها وينه الخشب حتى ادكه وبعدين اني مااحسد وولايهمج راح ادك الحايط خاف تكولين احسدها .
كالت هي جانت خطية ممرتاحة يمكم وهسه اجت هنا وارتاحت جان رجلها ساكمها سكم خطية بعد عيني .
باوعت لهدى بتفحص : وحتى مااشوف بوجهه الراحة اصلا خطية ووجهه شاحب على مخطوف لونه والسمن مو معناه الراحة خاف هداوي حامل ؟
كالت برفض قاطع وقوي فززتني من مكاني وظليت اتلفت وحصنت دانيال لزمته قوي ..
_ لا عيني لاااااا منين تحبل وهو ابنكم حتى مامتقرب الها ..
انصدمت وباوعت لهدى خطية وجهه ظل يشمر الوان وتدنك وتنصي وتعصر باصابعها وتباوع لمرة ابوها
بس هنه عبالك ضامات شي مدااكدر اعرفه حيرني ...
اوووو شعليه بيهن اني بس هاي مرة ابوها كولش نرفزتني مال اركع الصينية براسها احجي حجاية تردها عليه بألف .
ظليت انفخ ، سمعت صوت موبايلي ببنطروني
ماتذكر شوكت مخليته والحمارة الي هيه اني ناسية تليفون هدى ، هسه لو جايبه تليفونها وناسية تليفوني
يله بعد هيه صارت السالفة .
طلعت تليفوني من جيب البنطرون ودزيت رسالة للعرندس كتبتله ضجت اريد اجي يمك ..
ورة دقيقتين رد عليه ولج بويه وين تجين يمي! انه يمي زلم ، ابو هدى والسايق وعمها ، شعندج جاية ظلي بمكانج وبالثنتين نطلع منا .
جيت ادزله اوووو واخرب مزاجه مثل ماخرب مزاجي بس رصيدي صار صفر .
الظهر بعد الصلاة صبوا الغده ، نسوان وحد وزلم وحد وهاي مرة ابو هدى ولا تنطاق ، كلساع وكرصت هدى مدري ليش وشعدهن .
ورة الغدة ودانطلع لبغداد اجتني هدى خجلانة
كالت فرح عذريني وامسحيها بيه هيه مرة ابوي متعرف تتصرف ومعليج بكلامها فدوة لا يوصل للهيب .
جاوبتها : لا يمعودة ولا تهتمين ولا تحجين اصلا وبعدين انتي ولهيب خصوصياتكم هاي اني ما اكعد اتدخل بيها ..
وبوستها ودعتها ومشينه منهم ..
وصلنه للبيت سألني علي اذا انطيتها تليفونها لو لا
ظليت اعض بأصابعي وشفتي وانطيته ظهري .
دارني عليه وملامحه مستفسرة .
رفعت كف ايدي اهدئه كتله من الاخير اكولها الك اني نسيت تليفون هدى ومااخذت ويايه ...
ضرب الميز بأيده بعصبية
انت شون تنسين هيج شغلة ومية مرة اكدت عليج ماتنسينه مو زوجها يريد يحاجيها شبيج انتي؟؟
يعني فرح ماكدر اعتمد عليج بشغلة لازم تلوصينها ؟
ارتبكت انته موو انطيتها فلوس بلكي تشتري بيهن تليفون ..
بقى خازرني ..
كتله بدلع والله نسيته والقران وروح ماما وحتى الجنطة جانت بيها ممة مالة دانيال نسيتها ممتعمدة .
كال خو انه ربيت ولدي وكبرتهم ماتعبت بكد ماجاي اتعب وياج ولج انه لا ضغط ولا سكر بس من وراج راح تجيني حتى جلطة مرة وحدة .
شهكت لاااء اسم الله عليك ان شاءالله بيه مو بيك ..
خله ايده على حلكي سكتني وتالي طلع من الغرفة ...
لليل يله دخل للغرفة واني جنت نايمة تعبانة من الطريق فززني بدخلته لان نمت واني قلقة فنومتي صارت خفيفة .. كعدت اباوعله
كال خابري اختج موج باجر تجينه ..
كمت منعسة واتمطط ليش خير شصاير ؟
وكف ع المراية نزل الشماغ مالته وباوعلي بنظرات عتب : انتي ليش ماكتيلي على سالفة اختج جان تصرفت وساعدتها ليش سكتي ؟
وخرت الغطى ورحت يمه : ياقضية علي شبيها اختي خوفتني ..
_ لا تخافين محلولة وسهلة انه احلها بس خابريها خل تجي ..
_ علي غير افتهم والله بديت اقلق شبيها موج!
التاف عليه متفاجأ : شنو انتي ماتدرين ؟
وبدا يحجيلي انصدمت عمري موج كل هذا صاير بيها وماادري اني ليش ليييش ..
وينه تليفووني وينه اخابرها ارزلها واطيح حظها .
شفته على الميز اخذته ودااخابر ، سحبه مني بسرعة وشمره على الميز بعصبية وظل يحجي بحدة
ولج بووويه موو هيج موو وكت رعونيتج هسه عوفي البت عوفيها شغلة صارت وراحت ماريد منج شي تجفصين بي انه ادبرها ...
اني مو رعنة هاي اختي شون تسوي هيج وبابا مافكرت بي اختي تدخل سجن واني مادري ليش ليش هيج تسوي بيه موج ليش ماكالت جان جيت الك وكتلك ع الاقل ..
ظل يهدأ بيه كال انه احلها ابوج لا يدري ولا يسمع خبر خاف يتعب وانت هم اهدي ماصار شي والبنية اكيد تعبانة وماتتحمل حجي هسه بعد ..
موج ...
ررن موبايلي شفته شرار يتصل ، رحت للغرفة وجاوبته
اجاني صوته غمضت واني اسمعه قهر بداخلي فضيع وقوي وينغز بقلبي ايام واني ممرتاحة وخايفة ....
كال موج تسمعيني!
حسيت بنبرة صوته زعل وعتب ..
انقهرت اكثر وانفتحت جروحي .
جاوبته بغصة : اي اسمع .
كال الشيخ رجع من السماوة وحاجيته بموضوعج وهو راح يتصرف ويه عائلة أوس تعاي باجر لبيتنه بس ديري بالج تمام خاف كل شي يصير اوس يتبعج ويحاول يأذيج تردين اجي عليج اني ؟
جاوبته لا لتجي اخلي ابن عمي يوصلني او اخويه وها ترة احمد هم ميدري بأوس عباله هو طلعني السجن وبس .
وصلتني ضحكته باستهزاء : اي اتوقع منج كل شي وما انصدم .
جاوبته بحدة شبيك شرار وشنو تقصد انته ..
رد ماقصد شي ويله مع السلامة لا تنسين تعاي باجر .
يوم ثاني احمد وصلني وراح كال بالرجعة انزل اسلم على فرح والشيخ .
نزلت وتلكتني فرح وخبصتني خبص
شرار يدري واني مادري ليش هيج موج ليش
رديتها بعصبية سكتي فرح والله ماطايقة نفسي شنو تردين انتحر واخلص لوو شنوو .
تريد تحجي دخل الشيخ ووراه شرار اجت عيني بعينه جانت بنظراته الحقد ماعرف ليش حسيته ضايج مني
يمكن بسبب غبائي بس شسوي اني انكسرت وبعد ماكو شي يهمني شون مايريد يباوعلي خلي يباوع بس اشتاق لذيج النظرة الي جان يباوعلي بيها قبل لا انخطب لأوس وقبل لا هو يسافر .
جنت كاعدة على طرف القنفة وفرح بصفي
واسمع كلام الشيخ واحس بنظرات شرار عليه تحركني احس بضعفي تجاهه واكره حالي ..
_ يابنتي الي سويتي غلط المفروض ما تتصرفين من كيفج تصرفج هذا خلاج تصير لكمة سهلة بحلك اوس .
جاوبت بحزن شسوي عمو والله جنت عاجزة ويائسة وكل الابواب مسدودة بوجهي !
ثاني جنت اكول انو هاي غلطتي ولازم اصححها بنفسي ..
رد جان لجأتي لمحامي مو تسلمين نفسج بهالسهولة زين انه موجود وينج عني المفروض تجيني جان ابد ماقصرت .
باوعت لفرح تباوعلي بحزن واستغراب
دنكت ورديت والله عمو بوقتها فرح جانت مريضة
ماردت اقلقها .
المهم ابوه وجده علاقتي بيهم طيبة وهم حيل يحترموني وهسه رايح الهم انه وراح احجي وياهم ونشوف حل لمشكتلج لاتضوجين نفسج سهلة ومحلولة ان شاءالله .
عمو هو هددني يأذي بابا وأحمد واني كلش خايفة ..
لا تخافين مايكدر يسوي شي بس حجي هذا جبان
كام على حيله وشرار كال اجي وياك شيخ
رد عليه لا انته ابقى هنانه ، مهيب يروح وياي
وينك مهيب ...
مهيب جان قريب منه : امرني يابه
كاله : امشي وياي يله نروح لبيت الشيخ عبد الرزاق هسه ..
مهيب ...
طلعنا اني والوالد ورحنا لبيت الشيخ عبد الرزاق ابو عبدالله الي هو جد اوس وعبد الله يصير ابو .
عبدالله مسؤؤل بالدولة وابو شيخ معروف واوس ماخذها فلاحة ملاجة عبالك الدنيا بس اله .
دكينا الباب فتحوا النا ودخلنا للبيت وتلكانه الشيخ وابنه .
الشيخ عبد الرزاق : هلا بويه اليوم شيخ علي وشبله مشرفينه ...
رد عليه ابوي : انت الشرف كله شيخ ابو عبد الله ..
سلمنا عليهم ودخلنا بالمضيف مالتهم ..
كعدنا بالمضيف وابوي طلب منهم يصيحون على اوس
وبعد دقايق اجه وجان وجهه ممطمئن ويباوع علينا بنظرات عدم ارتياح .
كعد اوس وابوي بدا يحجي
برزانة ووقار : شيخ عبد الرزاق انته تعرف وانه اعرف اوس خاطبها لاخت المرة بس ماتعرفون شنو الظروف الي تممت هاي الخطبة . وانه اليوم وجاي واريد احلها
تردون نحلها بالعشائر اني رجال شيخ وافهم بأمور العشاير تردون نحلها بالقانون هذا مهيب ضابط تحقيق ويفهمكم شنو السالفة ..
ظلوا واحد يباوع للثاني مستغربين واوس دنك راسه
الشيخ عبد الرزاق كاله خير شيخ شمسوي غوس شبدر منه بدر منه شي غلط ؟ غلطان ويه البنية ؟ انه اردلهه حكها .
رد ابوي وهو يباوع لسبحته : والله الي سوا للاسف مو من شيمكم وانه ادري بيكم ناس اجاويد ماتطلع منكم العيبة .
الشيخ عبد الرزاق ضرب بعصايته على الكاع
وكال افااا عبدالله شمصخم ابنك هالمرة ؟
ظل ابوي يحجيلهم شسوا اوس بموج ..
والجد شال العصايه وظل يضربه على ظهره ..
أوس كال : شسوي والله هي شريكها اخذ الملايين وراح واني ترة وكفت وياها والفلوس مو اليه ولالأخوية لا لواحد ثاني واحنه كفلناهم هي وسلام .
رد ابوي : زين اذا تورطت بملايين من وره اخت المره ليش تتحايل عليها وتسجنها وتساومها
زين خلصتها من السجن شكو تزوجتها ...
جده عصب وظل يركعه على ظهره وينبت العصا بي
_ احجي يمن كون ما اللطم على هل حلك الي ما نطق كلمة بيها خير ..
هو ظل يفر بيده ومعصب : صارت بعد يا جدي صااارت ..
رد الشيخ عبد الرزاق بعصبية : صارت بعد صارت موو صايرلي مثل النسوان من يحبلن ويكولن صارت بعد صارت وركعه بالعوجيه ولك انلصم لا تحجي شي بس تحجي اطمك بالحديقه يالحرمه .
لا والله حشى الحرمه اعتذر للحريم شبهتهن بغوس هي هاي تربيتك عبدالله .
ابو اوس بس يباوع لابو بعتب ..
وبعدها وجه كلامه لابوي : عمي ابو مهيب انه هذا غوس ما ربيته عدل ان شاء الله من اليوم وغاد اربي من جديد واسوي زلمه لان هاي فعلته مال حرمه .
رد عليه احنه مانريد تربي نريده يعوف البنية بحالها ..
رد اوس والله البنية احبها اني ومتمسك بيها وان شاءالله نحل مشاكلنه بيناتنه . واني سويت كل هذا لان حبيتها وعجبتني
رد ابوي حبيتها وعجبتك تجي تخطبها مثل الوادم مو تدك الناقصه وتستغل ضعفها وهاي مو من شيم اجدادك
زين شلون تقبل بوحده نفسها عنك ما راضيه ولا تهواك وين كرامتك وين شخصيتك انته ؟
مهيب : من رخصة ابوي ...
الشيخ علي الدر : مرخوص بويه ..
الجد لاوس : شوف الناس المحترمه يغوس احسن منك يالاثول شوفه رتبه ونجومه على جتفه ويترخص من ابو وانت لا رتبه لا نجيمه لا نسير حتى خويط ماكو ولا عندك احترام ولا عندك عرفه من تف عليك .
مهيب دنكت وابتسمت بعدها وجهت كلامي لأوس
_ اذا تريد نفتح القضية من جديد ونردلكم حككم اني حاضر عندي جماعة تحفر الكاع وتطلع سلام وترد الكم الفلوس فلس فلس .
والقضية اني استلمها وخليت ايدي على صدري
وكملت كلامي : ولازم نلزم راس الحيه اول شي فالحقيقه مبنيه على اعتراف سلام لذلك لازم نفتح باب التحقيق من البداية .
انتفض أوس : لا لا بعد القضيه وأنغلقت وموج افسخ الخطبه منها ميخالف ..
حسيت عنده لعبة حاجيته : اذا انت غلقت القضية موج هي الي تفتحها ..
_ ماله داعي تفتحها كتلك اني متنازل .. وراح افسخ الخطبة وهاي الصفحة تنطوي .
ابوي كال وبعد شغلة مهمة انته مهددها بأبوها وأخوها ...اذا صار عليهم اي شي انته المسؤؤل ..
اووس انتفض يحجي ومدنكة : اني مالي شغل شدخلني بيهم اذا ماتو
الشيخ عبد الرزاق انتفض لا ياااعار ولك هيج احنه ربيناااك ..
اوس كال لا ياجدي بس جاي اخوفها تبقى وياي والله جدي عشكتها قابل شسوي ؟
ابوي كاله بحدة : اذا انت انتفضت هسه شكو تهدد واذا مو كد الحجايه لا تحجيها ...
ظل يباوع لابوي بحقد وجده وابوه ظلوا يتعذرون
وامسحوها بينه ومن هالكلام .. بالطريق رجعنه
خابرني شرار يستفسرر مجاوبته خليته يفر بأذاناته
اذانات المطي ، ادري بي بعده هاويها وميت عليها بس حاقد ومتأذي منها.
وراها صارت سنوية عمي حمدان وسوينه طبخ
جبنه طباخ يطبخ ، المغرب اخذت جدر بي لحم والمي مالته دااودي للمطبخ للنسوان بالبيت ، صارت ريلام كدامي احنه منحجي من اشهر بس شفت بعيونها نظرة صلح .
حاجيتها تاخذه مني .. هي مكالت شي ، لزمته ويايه ، داوخر ايدي اجه اصبعي السبابة على ظاهر كفها
الثولة شالت ايدها بسرعة والجدر تمايل عطت بيها ريلاااااااام وخري وخرت هيه ووكع منه مي على رجليه واحتركت رجليه .
خليته يم الباب وهي شردت مدري وين راحت كعدت يم الباب اكو صوندة سحبتها من الحديقة وظليت اغسل رجليه .
سمعت صوت انفاسها ورايه جانت تبجي التفتت عليها وكمت كتلها شبيج تبجين .
زادت بجي وانطتني عصارة كالت اخذها هاي مال حروق وشردت بسرعة ..
اخذت العصارة ورجعت للمضيف كعدت يم الباب دهنت رجليه اول مخليت الدهن على الحرك انسمطت سمطة شاغت روحي .
اجه عمي حسان كال هاي شجاي تسوي واخذ العصارة من ايدي .
كتله احتركت رجليه بالمي مال اللحم وجاي اخليلهم دهن مال حرووق بس اشو هذا حار يسمط .
وكع بالكاع من الضحك كال ولك هذا جل مال مفاصل ولك هو هذا حار طبعا يسمطك يا مطي انطاه الك يريد ينتقم منك .
اخذته منه وعصرته حيل معقولة سوت هيج تريد تأذيني!!!
أنين ..
رحنه للسنوية مالة حمدان الله يرحمه ، جانوا كلهم ملتهين بالطبخ واني ادير بالي على دانيال ، خبلني حيل وكح .
انوب طلع برا بالحديقة واني ظليت اركض وراه
وهو مايكعد وصاروا كدامي زلم خجلت كلش
وهو راح جوه بالبستان صح الدنيا مغرب بس البستان بي ضون داير مداير البيت واني ماعرف بيتهم زين مااجي هوايه بس هالمرة .
ظليت اتوسل بي حباب تعال ندخل ولك والله تيهت شون ارجع للبيت هسه داني فدددوة .
شفته وكف ويباوع لورايه ويضحك فتحت عيوني بصدمة لمن درت وشفت حسان ديصيح اله وهو راح اله يركض ، خفت وتذكرت ذيج الليلة .
هو دنك واخذ دانيال من الكاع وظل يبوس بي ويباوعلي ..
فكرت بعد هو عمه خلي يمه واني ارجع ..
داافوت من يمه واروح ، لزمني من ايدي ورجعني
حاجيته بتوسل : لا عفية عووفني .
كال بهمس شبيج تخافين ؟
مارديت سكتتت وهو استمر يحجي
مو توج تكولين لدانيال مااندل ارجع انتظري اني ارجعج .
وخرت ايدي منه وظليت اتلمس مكان قبضته
يم عكسي وكلت بلعثمة : لا أرجع اني .
كال طلع اسمج أنين بس والله حلوو اسمج .
بلعت ريك لا مو وو مو حلو كله حزن .
هو رد حزين بس حلو .
واكفين واشوف فرح اجت ومعصبة ..
اخذت ابنها من حسان بعصبية وصاحت عليه
ولج شسوين هنا هاا وشعندج واكفة يمه .
هو باوعلها وخزرها : على كيفج لاتصيحين ووثول زلم بالمضيف يسمعووج والله مستغرب اني كتلة البراءة هاي تصير اختج واخت ذيج المسترجلة وانتي العرمة .
ردت عليه بنتر : احتررم نفسك افتهمت شعليك بيها ليش لا حكها ها ؟؟؟
دتصيح عليه وجان دانيال سوالها بف وصفكها راشدي بيده الصغيرة ، هي من الفشلة جرتني من ايدي واني اضحك ودخلت بيه للبيت ..
صاحت عليه صعدي فوووك صعدت بسرررعة
دخلت لغرفتها اجت ورايه وحدها ودانيال مو وياهه .
اول كلمة كالتها شعندج واكفة يمه
رديت باستنكار ماعندي شي
لعد لمن شفتي ؟ ليش ما جبتي دانيال ودخلتي ؟
هو اخذه ومالحكت ..
ولج انين يولي هذا واحد قاتل نسيتي شسوا بينا بذيج الليلة هاا نسيتي ؟؟؟
رديت بهدوء وتوتر : قاتل ؟ قاتل منوو ؟
اخووو ه اخوو هو قتل حمدان لان خايف يكشفه ..
كمت على حيلي .. فررح اني موو طفلة حتى تجذبين عليه وتوهميني بشي مو صاير حمدان انتحر مو حسان الي قتله بعد شنوو .
فتحت عيونها على وسعها شنوووو ؟
اي اني سمعت موج تكول لأحمد اوس كايل الها انو حمدان محد قتله انما انتحر قتل نفسه .
ظلت تضرب على راسها مثل المخبلة ، خفت حييييل
فتحت باب غرفتها ونزلت تركض مادري وين رايحة !
يتبع .....
الفديو تصميم المبدعة meme60302416
الفديو يمثل حال شرار و موج بالبارت الجاية ..
والبارت اهداء لرئاوي 😍😁
خاف اكو سحكات او اخطاء بهالبارت او البارت السابق اني اعتذر والله تعبانة حيل 💔😔