السلام عليكم
رواية هذيان بين جمر وجليد
الفصل ٢٦
نورا ناصر
لربما ضاق الفضا ..
لربما كنت قويةة لم أشعر بأسئ..
كنت أود أن ارمم قلبي ع عاتق عينك..
بدفء يديك .. لتؤنسي روحي بسمة شفتيك..
ولكن حال بيني وبينك شيء تخطى الشعور..
لربما يشابه البحور ولربما كان قدراً..
ولكن ما بال روحي فأعلنت لك الأمان..
وافقدتني نبضات القلب الاطمئنان..
فقلبك ينادي قلبي • ﭑآنتـٰـهہ َ'ارضي التي لا تحتل..
ومالي والحزن قد حل..أصابني وابل الهم ..
فقد اذبل ربيعي والورد ..
ﭑعلم ان قلبك لو أطفى آخر السائر لا يطفئ..
بقلم smsma89
******
لمن كال هيج حسيته هواي استفزني واني بوضع لا أحسد عليه ، كمت ونزلت من السرير واني مخليه ايدي المصابة جوة صدري متوترة ومنهارة.
باوعتله باستهزاء بعد ما ابتعدت عنه كم خطوة اضمن نفسي بعيدة عنه خوف من ردة فعله
قربت اوصل للباب ووكفت على الحايط ..
_ لا والله هواي عايشين الدور انته ويا واحد يكبس واحد يرفع واذا الاضرب منه على روحك مووو عليه اني!
كام من مكانه ونظراته تراقبني بتهديد ، اجه يمي مد ايده وطبك الباب حيل ، خله ايده ع الحايط الورايه وعيونه وبنظراته يتوعد .
خليت ايدي اللخ السليمة على الحايط بتوتر
كتله ليش هيج تباوعلي خليني اروح لبيتنا قبل لا يجي اوس!
رفع ايده وضربها على الحايط بقوة
وكال ماتطلعين منانه قبل ماتحجيلي بشنو متورطة انتي ويه أوس وليش جايبج هنانه وحابسج بهالشقة هاي ؟ صار بينكم شي ؟ احجي ولا تخافين الج الامان ويمكن اساعدج اني .
ابسمت بسخرية وألم : هو منو الي فتح عين اوس عليه غيرك انته كله منك والله بعمري مراح اسامحك انت السبب بدمار حياتي .
انهاريت واحس رجليه صارت خيوط وكرفصت ع الكاع ورجعت ظهري وراسي ع الحايط ، غمضت عيوني وصرت انحب...
سمعت صوت حسرته ، حسيته ابتعد عني خطوات
وصوت جدحة وريحة دخان صارت بأجواء الغرفة .
فتحت عيوني مسحت دموعي واباوعله يدخن ويباوعلي .
كال بهدوء وببرود وهو ينفخ الدخان من حلكه
_ احجيلي هسه يمكن اكدر اساعدج .
ابتسمت باستهزاء : يمكن!!
اجه كرفص كدامي واني كعدت ع الكاع
اباوعله ورموشي مبللة بالدموع ..شي ع خدي وشي بباطن عيني ..
هز راسه بعصبية : احجي ؟ شسوالج اوس ؟
اختنكت وكمت وكفت واني منهارة ..
كولي شنووو ماسوالي كوول .. منين تريد ابدي
من ورطني بالملايين لو من اخذني للسجن لو من خلاني انزل من عيون اخويه وابويه واكسرهم .
وانت السبببب انته انتتتته ..
بقى واكف كبالي وصافن متفاجئ من كلامي
تقرب مني خطوات ، لزمني من عكسي يريد يهدأ
من ثورتي .
ظل يباوعلي بعمق ونظراته متسعة .
كال ساومج على نفسج ؟ لهذا انت قبلتي بيه ؟
الكو*** السافل اليوووم اله اشعل عشيرته ..
بس كعدي واحجيلي بهدوء خلي افتهم منج!
دفعني على السرير بخفة وكعد ظليت امسح بدموعي واحجيله كل شي من البداية . وهو يصغي الي بأهتمام وترقب وعصبية .
كام على حيله معصب وظل يصيح
وانتي شلوون توافقين على هيج عرض شلون
واني عبالي بيج خيرررر وذكية وتفتهمين طلعتي حمارة لا واالله حتى الحمارة هم احسن منج .
حجيت بقهر احترم نفسك ولا تتجاوز سلام اني اعرفه وهو زميلي بالكلية جان ومن سنتين اشتغل ويا بالجم بس ماعرف شنو سواله اوس يمكن هدده بأهله وخلاه يقبل .
وبعدين العرض كولش مغري وجان همي الاول اتخلص من ذيج المنطقة الي بيها المطعم مالة اوس لان كولش ضايقني ....
صاح بعصبية : بس مووو هيج ولج موو هيج تشمرين روحج بالتهلكة يا مطية ...
خليت اديه على اذني اسدهم ماريد اسمع كلامه
الجارح وصرخت كافي كااااافي خليني ارووح للبيت
ظليت اشهك واريد اطلع من الغرفة ..
لزمني من عكسي ودارني عليه اجت عيوني بعيونه
بقهر وحزن ....
كال ليش اتصلتي بيه اني ؟؟ شمعنى اني بالذات!
درت وجهي منه خاف يكشف كذبتي لان ناويه اكذب عليه ..
جاوبت واني دايرة وجهي : مادري بس شفت رقمك بالتليفون هذا واتصلت بيك وانته الوحيد الاعرفك .
من بين كل الارقام .
رفع التليفون وكال الرقم بي رمز ترة بس تكدرين تسوين مكالمة طوارئ مستحيل تكدرين تفتحينه
الا اذا اوس منطيج رمز تليفونه .
صكيت اسناني .. خابرتك وووخلص وعوفني اريد ارووووح .
سمعت صوت اوس بالصالة وشرار صار يجهز نفسه يواجهه ، فات وبيده كزازة كولش كبيرة واجه ظل يتهجم على شرار ويصييييح .
ولك شعندك ويااهه شسوووي يمها شجااابك هااا.
صار قريب لحتى يضربه متتت خوف عليه ظليت اصررخ ..
شرار ظل يباوع على اوس بقسوووة
ويأشرله بأصابعه : لك تعااال جبان تريد تضرب مووو تعااااال زلمة انته تعااال يله.
هجم عليه شرار بس اوس الجبان ماتحمل رأسا شمر الكزازة لان جّرحت ايده ، قيده من اديه وشمره ع الكاع وظل يضرب على ظهره وصفاحيه دفرات ..
والدم يطلع من ايده المجروحة.
ظل اوس يصييح متوجع واني واكفة وبس اكمزززز
لشويه دخلوا الحماية مال اوس .. بس اريد اعرف شنو يشتغل هو وهيج عنده نفوذ وحماية ..
اجو ورفعوا مسدساتهم بوجه شرار ترك اوس هو واوس كام واني متتت خوف ختلت وراه ...
اوس يتنفس بصعوبة وشراري باولهم للحمايه ويبتسم بسخريه واستهزاء
عاوز ووجه كلامه لشرار وهي تلهث ومتالم شرار اطلع برا وعوفني و هي خطيبتي احسن ما تشوف شيء ما يعجبك ترى والله ماكو شيء يوقف بوجهي وانت ادرى بهذا الشيء
قتل تور شرار اكثر والزمت بقميصه من ظهره شرار الله يخليك لا تتركني والله ياذيني شرار فدوه اشرلي بايده اسكتي انت ولا صوت اسمعلك
وجه كلامه الى اوس بتهديد خلي مز عطتك تنزل سلاحها احسن الك والهم
عاط اطلع برا اطلع برا لا تخليني اسوي شيء واندم عليه بعدين
قال لا ما اطلع بدون ما هي وياي خليني اطلع واخذها وياي اوديها البيت اهلها
جاوبه اني اوديها ما عليك انت هي خطيبتي اني
ودار وجهه عليه وكمل كلامه الي : موج والله كنت معصب اعذريني وهسه اني ندمت على اللي سويته بيج خليني اوصلج لبيتكم ونتفاهم ويصير خير .
ظليت اهز راسي برفض وانهيار ..
لالالا نسيت قبل شويه شنووو ردت تسووي بيه لوو اموت ماررجع وياك
التفت عليه شرار عيونه حتطلع من مكانهم ع كد ما هو عصبي صك اسنانه ووجه كلامه الي : كتلج سكتي اني اتصرف ماتطلعين غير ويايه .
اوس وهو يتقرب من شرار ولزمه من ملابسه انت شنو انت اخوها ابوها ابن عمها شنو انت شنووووو .
ووولج موج اخذج واطلعج منا مابقيج والله بس احجي وياج كلمتين!
عطت لا وياك ولاا ويا ولا ويااا احد انطيني تليفووني اخابر اخويه .
شرار كال سكتي ولا تدخلين اخوج وبلا فضايح
تقرب منه اوس فضايح شنوو ولك ؟ شنوو بينكم انتوا وشسويتلها وشجابك لهنا وشون عرفت هيه هنا واحيت مراقبني انته .
شرار ضربه كله على وجهه وكع بالكاع والحماية سحبوا اقسام مسدساتهم صرخت اني واوس اشرلهم بيده مايسوون شي وهم وكفوا.
شرار بغضب : وهاي شسميها يا عار يا ساقط ماتسمى فضيحة حتى لو خطيبتك جايبها لشقة شعندك هاا ؟؟
صار اوس ينزف من خشمه واحد من حمايته سنده كام و اخذ المسدس منه وتوجه علينا
كال موج لا تجبريني اسوي شي غلط لا تخليني اكتله كدامج هسه امشي وياي نطلع يله بمكان عام نحجي وارجعج لبيت اهلج .
شرار ظل يضحك بسخرية ويستهزء بي
هه ديله زلمة انته اضررب يلله شمنتظر .
بخوف نطقت شرار لا تستفزه عوفوني اطلع وحدي وارجع عوفوووني .
ماعليج بي كولشي مايسوي جبان وبس هوبزة
هو اوس سمع هيج لو تخبل مسح الدم من وجهه وجه المسدس على شرار .. وخلاه بوضع الاستعداد
شرار يباوعله ولا خايف عبالك ديلعب وياه
وعبالك يعرفله .
طلع باكيت جكارته وظل يدخن ، اوس تقرب مني يريد يسحبني من وراه ، شرار لزم ايده واوس خله المسدس براس شرار .
انتفضت اني ولزمت اوس من ايده واتوسل بي الله يخليك اوووس مو هيج .
باوعلي شرار خزرني وبراسه اشرلي اتركه
حاجيته شرار لا تتخبل الله يخليك اني مستعدة اروح وياه بس ماريد احد يموت بسببي !
اوس وخر المسدس وكال يله لعد امشي
شرار كال من كل عقلج لج هذا اكبر جبان محد يعرفه بكدي وكدرته بس ع النسوان نملة ميكدر يكتل وخاف اكلج المسدس ميعرف يرمي بي .
اوس ضغط بالمسدس على راس شرار وكاله
لا تختبر صبري شرار والله انهيك .
بهاللحظة دخل حسان شافهم على هيجي وضع
تخبل عاط بالحماية الي رافع مسدسه
_ نزل سلاحك لك نزززله ..
ذاكه الظاهر يعرفه خاف منه نزله بسرعة بعد ما باوع لأوس .
اجه حسان باتجاه اوس داره عليه وصرخ بوجهه
_ لك حيوان عليمن رافع سلاحك عليمن خسيس!
اوس وهو يمثل دور المظلوم
_ شتريد مني اسوووي شتررريد شفته ويه خطيبتي بالشقة هايه تريد اصفكله لوو اكله ووواوو كمل .
ظليت اصرررخ بلا وعي : ياا نذل ياا حقير لك اني عرضك هو منو الجابني للشقة هايه غييرك منووو؟
التفت عليه شرار : سككككتي ..
ورجع باوع لحسان ووجهله كلامه : حسان لهي واشمرله عظم خلي اوصلها لبيت اهلها وكافي فضايح !
صييح اووس : وانته بصفتك منو وتوديها ابوهه خالهه عمها لاتشوفني ساكت عن وجودك هنا والله ضاملك ضميمه بس اصبرلي .
صاح شرار بغضب : ولك هو منوو لي جابها هنا وراد.....
ماكمل كلامه كزز اسنانه ورفع شعره ليفوك وتمالك نفسه وظل يستغفر.
حسان كال حلاً للنزاع اني اوديها لااا انته ولا هو ..
حاجيت شرار واني اباوع لحسان
لاشرار لا اثنينهم مااثق بيهم اروح وحدي عفية اتركوني اروح وحدي .
التفت الي شرار عاض شفته بعصبية
يحجي بهمس مصرور : عبالج من ترحين وحدج مراح يتبعج صعبة عليه هذا البغل مو؟ لج حركي المطي المدد براسج ترة هو هم عنده عقل المطي بس انتي ظالمتيه من محشيه دماغج بي.
غمضت عيوني بيأس وحزن هم صدك كلامه...
نزلنا جوة كلنه بعد مااتفقوا يرحون كلهم يوصلوني عبالك عروسة وزافينها ناقصنه بس دنبك وهوسات.
كل واحد شكده وياي عبالك صبات تمشي والله تلاثتهم يخوفون تلاثتهم مخابيل ومهابيل كولة خالتي .
وصلنه للسيارة لزمني اوس كال خل نحجي وحدنا امشي لسيارتي ..
نفضت ايده وعطت وخرر والله اذا لزمتني
شرار صار بيني وبينه ظهره عليه ووجهه على اوس
واجه حسان فاككهم لان حيتعاركون
رزلهم والتفت علليه
كال ترة اجنه بالشارع صوتج ولاتنسين نفسج ! كافي استرجال وياج زلم صمي حلكج
ابتسمت باستهزاء وعيون شرار عليه بترقب
وجهت كلامي لحسان : شوفو منو يحجي نسيت نفسك مو ؟ لو اذكرك ؟ منو الي اعترض طريقنا بالشارع قبل فترة لو ذاك شارع وهذا غير شارع ؟
جاوب : هناك جان ليل هسه نهار ، ذاك فارغ هذا مليان هناك جنت سكران هسه صاحي
ودار وجهه صفح بشرود وتكلم بانكسار
سألي اختج الشيخة الرعنة فرح شنو سوت وجبرتني اتصرف هيج ؟
شرار ظل يباوع باهتمام وبتساؤؤل : شكوو شصاير شمسوي للبنات ولك حسان ؟ احجي!
اوس تدخل : حلوا مشاكلكم العائلية بعدين اريد احجي ويه خطيبتي.
رديت عليه : هه خطيبتك ، خطوبتنا صارت في خبر كان من هسه تتركني حتى لو ادخل للسجن بعد مايهمني!
اوس بتلعثم كال موج اني...
قاطعه حسان بصوت مصرور فوتوا للسيارة ماتشوفون الناس ظلت تباوع علينا .
صعدت بالوره بسرعة واوس عبالك ديلحك على قيمة صعد يمي ، شرار باوعله بعدم رضى وكعد بصف حسان الي ساق السيارة .
جان يحاول يحجي ويايه بس اني ارفض انتر ايده وابعد عنه واحشك روحي بالباب مال السيارة .
وصلنه لفرعنا واني اباوع من الجامة وشاردة
فجأة حسان وكف السيارة ورجعها ع الباك
وكال هاي مو ان... اختج!
باوعت وركزت واشوفها صدك انو اختي خطية مبينه محتارة مدري شبيهه واني رغم جنت اباوع بس شاردة وهو حسان بسرعة لمحها.
نزلت بسرعة من السيارة بعد ما وكفها حسان ويه ما وصلنه يمها . لمن نزلت تفاجئت من شافتني .
كالت بلهفة وتوتر موووج؟
سألتها شبيج ليش هنا واكفة شكوو بابا شبي احجي انين ؟؟
ظلت نظراتها تشرد لوراية وترجع تباوع عليه
التفتت اشوفه حسان مركز بنظراته عليها ، من شافني التفتت اله باوعلي رافع حاجبه خزرته ودرت على انو .
حجت بخوف وتوتر : خالة ماكو ممبينة شكد دورت عليها مدالكاهه .
خليت ايدي على قلبي صار ينبض حيل ...
حسان حجه التفتت على صوته شفته يباوع لأنين ويحجي : رجعوا للبيت احنه هسه ندور عليها نعرفها شايفيها احنه .
اخذت انين دا اروح للبيت اوس تبعني وصاح عليه
مووج انتظري خلي اجي وياج بس نحجي .
لزمه شرار من ايده وتدخل حسان بعد شرار عن اوس
وتكلم وياه بنبرة حادة : عوووفهم وصلت لبيتهم بعد خل يحجون ويفضوها واحنه امشي خلي ندور ع المرية .
ووجه كلامه الي : وانتي اسمعي منه كافي عناد .
سحبت انو ورحت للبيت حسان طول ما جان يحجي جان يباوع عليها ويرجع يباوع ع الي جان يوجه له كلامه .
هي لابسة برمودا كابوي وبدي احمر ربع ردان ... ورافعة شعرها ليفوك وواكعة خصلات منه على جوانب وجهه .
ردت اخذها واضمها من عيونه نظراته مو راحة وتذكرت تهديده بذاك اليوم بالليل لمن هو سكران
وانين طفلة بس ١٦ سنة عمرها .
كافي الي صار النه بسببهم اريد انين ماتتورط ويه هالعائلة الي كل وحدة منه اخذت نصيبها منهم
سواء اني او فرح .
وصلنا للبيت دفعت انين من ظهرها تفوت جوا لأن اوس جان وراية ويتوسل بيه اسمعه .
وكفت بالكراج وانين طبت جوا ظليت اباوعله بحقد ومكتفة اديه ..
كال والله احبج واغار عليج انت عنيدة اكلج تحجبي اني اهلي ناس عشاير ماتقبلين فاتحة الشعر طاكة البنطرون وطالعة اني خطيبج وانتي مرتي عاقدين احنه توكفين بنص الجامعة تحجين وي شباب شون تردين اسكتلج ولج اني حتى اهلي مسكتهم عنج يحجون عليه واكول ميخالف ورة الزواج تتعود عليه وتتفهم كل شي بس انتي هم مدري شونج يعني اجي اشوف شرار يمج بالشقة ؟ ترة شرار يعرف هاي الشقة جنه نسهر بيها مرات وابالي افكار اكول خاف جايبج بيها قبل هالمرة ترة بالي هم يشطح بس راح اعديها ونبدي من جديد .....
عطت بي ولك تليفونك وكع منك وخابرته لشرار لاتظل تمسلت كافي سمعتك هوايه كااافي تطعن بيه اني ماعندي وي شرار شي ولحتى اريحك ترة شرار خطبني واني اني اني رفضت ررررفضت دتفهم عليه لو عندي شي ويا اكدر افره فررر واخلي يطلك مرته بس اني لا ابالي زواج ولا ارتباط واكدر ادوس على كلبي وروحي ومايهمني شي ومشاعري اعدمها كل همي ادرس واشتغل على نفسي اصنع مشروعي الخاص بيه بس انته جيت دست عليه عدمتني انته كسرتني
اوس لا تتوقع احبك كافي دخيلك كافي .
جنت اعض على شفتي واشد على اسناني واحجي خايفة لأ أفقد واعيط ويوصل صوتي لبابا مايتحمل
خطية .
اوس دل يباوعلي بقهر ثواني ، وبعدها خله ايده على ذقنه ودنك . وبعدها بلحظات رفع راسه
مد ايده لجيبه طلع تليفوني وانطاه الي
وكال اتركج ترتاحين ونحجي بغير وكت .
رفعت كف ايدي بوجهه لا تتأمل مني شي اوس بعد احنه منتهين شووفلك صيدة غيري ماشي؟
فتتت جوة وعفته كعدت بالصالة اديه على وجهي وابجي ، سمعت الباب اندكت اجتي انين تركض
كالت يمكن جابوا خالة .
لزمتها من ايدها خزرتها وكرصتها لتطلعين اني اطلع
لزمت مكان الكرصة وتفرج بيها وتباوعلي مستغربة
اخخخ موج شبيج .
رديت ببرود مابيه شي ، عفتها وتوجهت للباب
شفت جيرانه جايبين خالة ، اخذتها وتشكرت منهم
ظلت هي تدردم واني بس ساكتة ماعلقت ع اي شي .
تلكتني انين حضنتها وتبوس بيها وخالة ضربتها على ظهرها خلتها تتراجع بخطواتها مصدومة
وكالت شبيكم عليه واحد يكرص واحد يضرب .
مجاوبته وداروح لزمتني من ايدي المجروحة عطت
آآآآآي أنين وووجع لا تلزميني من هالايد .
هي وخرت ايدها مني وكالت مو حاجيتج وهم داكولج ترة حموين فرح هسه ديدورون على خالتي خابريها تكللهم لايدورون بعد .
لزمت كصتي بالوسطى والابهام وغمضت عيوني احس الدنيا ظلمة وتفتر بيه ، اجيت اوكع لو ما أنين لزمتني .
تريد تكعدني ع التخم بس اشرت الها بمعنى لا. اريد اروح لغرفتي .
ودتني لغرفتي وصيتها تديرر بالها على خالة وتقفل الباب وبعد لا تطلع . هزت راسها بأي وباوعتلي ثواني باستغراب وطلعت .
جريت تليفوني خابرت شرار اجاني صوته
كتله رجعت خالتي للبيت جابوها الجيران مشكورين انتوا ماقصرتوا .
كال بس يرجع الشيخ نخلص شغلتج ويه اوس تمام ؟
همست يصير خير مع السلامة ...
مهيب ..
جمانة كالت اريد اشتكي على رجل امي اريده يعفن بالحبوس ومايطلع منها ...
سألتها ببرود ليش شبي وياج لتكولين يتحرش بيج ؟
كالت ها لا بس يضرب امي يكسرها من الكتل والله فصخ عضامهه خطية ..
وبعد غير هذا جمان ؟؟
ماكو بعد والله ..
عنده جهال من امج من غيرها يعيلهم هو لو لا ؟
اي عنده اربعة .. من امي اثنين ومن غير امي هم اثنين وهم يمنه .
زين اذا دخل للسجن من راح يصرف عليهم برأيج ؟
ندبر وضعنه ..
ماكو هيج حجي يا.. جوجو ماكو هيج بطة تلعب شناو شون تدبرن وضعجن وانتن نسوان لا حول ولا قوة وبعدين تعالي جاي واحجيلي الحقيقة هو خما يتحرش بيج ؟
اشووو سكتتت لا حس ولا نفس ..
كتلها يابه اعتبريني اني الضابط التحقيق هسه وتردين تشتكين على شخص كولي الحقيقة .
كالت ها لا والله بس هو يباوعلي بنظرات وصخة ؟
نظرات وصخة من ايدج تره ، يعني هذا لبسج وبالبيت ووياج رجال غريب صدك هو رجل امج بس ترة النبي يوسف بس واحد ومات ..
وبعدين هو لا خالج لا عمج ولا ابوج هو غريب والغريب ذيب وبطبعه غدار فانتي اذا متعرفين وامج ممعلمتج اني اعلمج ابويه ادللي
شكد حلو من تكلي ابويه والله اني صدوك محرومة من حنان الابو ...
سكتت عنها شويه ردت كملت ..
اني راح اخذ بحجايتك وراح اغير لبسي .
اي وبعد شغلة قبل لا اكولها كوليلي شكد عمرج انتي ؟
ردت عمري ١٩ سنة
وشعندج ويه ميسلون ؟ ترة ميسلون اكبر منج بهوايه شون مرافقتها !
ها ميسلون جيرانه والله حبابة حيل ..
مال حبابة هيه اي حبابة بس ترة ديري بالج منها واخذي حذر دائما ومو اي شي تكوله الج تسوينه
ترة تذبج بمصايب محد يطلعج منها.
انته تطلعني تكدر !
اي بس اني مو كل الاوقات يمج
اوكي سيدي تدلل والله كل نصائحك اطبقها اني ..
اني شداخل بجيبي ماتكليلي بس على مودج ولمصلحتج..
ردت فدوة الكلبك ..
كتلها يله اروح ادخن جكارة واروح انام
كالت اني هم راح انام ..
تصبحين على خير
وغلقت المكالمة ..
رحت دخنت جكارة ونسيت موضوعها ، واكف بالممر وكبالي الدرج وافكر بريلام
بلكي تنزل اشوفها كبل لا انام بس ماصار هالشي .
كملت جكارتي ورحت لغرفتي اخذت تليفوني اوقته
شفت رسالة جايتني فتحتها دازتلي صورتها لابسة طويل ومحتشم مو مثل البدي الوردي الي بربع ردن .
يخلي المطي ينثول ومايشوف دربه .
رديت الها ولج لا تدزين صور لا تدزين احركج هسه ولج انتوا ياهو اليجي تدزيله صورتج شنو عندج استعراض لو شنو .
ردت بسرعة والله ماادز لأحد بس الك سيدي
رديت وحتى اني لا تدزيلي الشيطان مامات ترة خليها ابالج لاتثقين بأحد .
اشو ماكلت ابويه عفية لاتحرمني من هالكلمة احبها منك .
لج اني وين وانت وين ماترووحين من خلقتي دخييلج .
فرح ...
واكفة ع المراية اني داسوي شالي حتى اطلع للسوك
علي وصاني اروح ويه بلقيس والبنات حتى اشتري اشياء لهدى لأن راح نروح الها .
طلع هو من الحمام واني لفيت الشال بسرعة وظليت اباوعله ، هو نشف شعره وخله الخاولي ع الزاوية
جان شعره الاسود يلمع وبي خصلات من الشيب متفرقة هنا وهناك .
هو ابد مو مصلع ولا شويه بس شويه شيب بي
سامعة من بيبي تكول الي يصلع مايشيب والي يشيب مايصلع بس اكيد لكل قاعدة شواذ ، علي الدر من االي يشيبون ومايصلعون .
اجه يمي لزم الشال مالتي كال هذا بعد ممنوع اللبس خفيف ومايكعد على راسج زين ويسرح ويطلع شعرج
اريدج تلبسين مثل الي يلبسنه البنات ريلام وهيام .
كتله مصدومة لااا عزااا لا والله اختنك ..
كال اششش تتعودين هذا مايسترج ولج خفيف .. مريتي انتي ماريد احد يشوف شعرج .
اني بالعادة اللبس من هاي الشالات الي تصير ويه العباية الاسلامية وشويه خفيف ، بس ريلام وهيام
لا يلبسن شال وجواته كب .
كتله ماعندي والله كله من هذن شالاتي ....
كال روحي طلبي من البنات وهسه مو راح ترحين حتى تجيبيلج عباية راس همين ولا تكولين ماعندي .
ضربت رجلي بالكاع وكلت اووووو .
خزرني بنظرة تهديد وكال ولللج لا تكولين اووو ماريد اسمع هاي الكلمة منج بعد كولي صار .
كتله ماتريد اكلك صار شيخ بعد ؟
لزمني من خصري وسحبني اله قوووي وبعده خازرني
كال شنو ولج ؟ زايدة عليج تكليلي هيج ؟
كتله لا والله مووو قصدي .
لزم راسي باثنين اديه بشكل مااكدر ابعده او احركه ووقرب شفايفي من شفايفه وظل يلتهمهم مثل جوعان وصرت احس البوسات هي بوسات عقاب عنيفة .
بعد عني جنت بعدني تحت تأثير قبلاته ..
حجيت بهمس وذوبان : هاي شنو والله اذيتني احس دتعاقبني والله مو قصدي اكول هيج .
كال بصوت مصرور حتى تتحكمين بلسانج مرة ثانية ولاتحجين كل شي ليجي ابالج مفهوم؟ والجلمة ردديها بعقلج يله تحجينهه .
كتله شدعوة ترة هي حجاية
خزرني مو اي حجايه تنحجي ....
هزيت راسي ، هو جر شالي وشمره وخله راسه بركبتي ..
اديه على صدره وهو اديه على خصري ويقربني اله .
كتله ها انوب درت على ركبتي والله اكلتها اكل ترة ركبتي بريئة هو لساني فالت .
كال شنسوي هي ركبتج جنهه خبزة عرب تنشم تنباس وتنوكل .
ضحكت بصوت عالي ، هو خله ايده على حلكي كتم ضحكتي نسيت روحي هسه صوتي وصل لعاشر جار .
كال يله يله روحي جيبيلج شالات من ريلام ولبسيهم وهسه اوصي ام رحاب تشتريلج احسن عباية راس تلووك الهالراس هذا .
باسني على راسي ونزل على خشمي هم باسه وتالي شفايفي وخر مني باوعلي التقط انفاسه
كال وخر من يمي ترة اذا تبقين هيج االيوم ماتطلعين من الغرفة صاحية .
رفعت اصبعي واتوسل بي الله يخليك الله يخليك البس نفس شالات ريلام بس عباية راس والله ماعرف البسها .
كال تتعودين العافية بالتداريج محد طلع من بطن امه يقرا ويكتب!
كتله والله اوكع واني راعية طفل وممتعودة .
خله اصبعه السبابة على حلكه كال اششش طلعي يله لا تتأخرين .
دااطلع سحبني من ايدي رجعت وطخيت بي
كال هبلة انتي طالعة بلا حجاب هيجي .
كتله محد بالبيت الولد كلهم ماكو
كال وهاي ركبتج هيج تطلعين بيها استريها ولج انستري .
حجيت واني اقلد كلامه ياا جااا انته مو تكول حلالك شكووو بيها .
خزرني ولج بنات حديثات وياج بالبيت تفتحين عينهن ليش .
هاي البنات الحديثات لتكول عليهن يعلمنك ويعلمني ويعلمن عشرة مني ومنك .
خزرني بنظرات تمووووت خوف خليت ايدي على حلكي اني جيت اكول هالكلام بقلبي بس هو غصب صار على لساني غير جفصة هاي
يله شنسوي هيه شنيه الحياة جفصات وتجارب والعاقل الي يلم لسانه ويضبه .
درتله ظهري اخذت شالي من الكاع لفيته على ركبتي وطرت لغرفة ريلام .
هدى ...
جنت رايحة رادة امشي انتظر الشيخ وفرح يجون اليوم ، وجانت مرة ابوي تباوعلي بنظرات ترقب وتفحص .
كالت اكلج هديوه انت جنج حامل موو لاتضمين عليه ترة والله اني كاشفتج .
خليت اديه على حلكي وهي ظلت تباوعلي وتفر بيدها قابل راح احسدج لو انت حامل بالحرام وهيج ضامته عني .
اني جنت محتاجة افضفض واحجي لان جنت على وشك الانفجار وميتة من القلق ، رحت كعدت يمها
وبديت احجي الها كل شي .
لطمت خدها وكالت عزااا بعينج رحتي بيها ولج
حجيت بحيرة وخوف والله مادري شون صارلي هيج والله..
كالت ولج خاف غلطانه ويه احد احجيلي اتصرف لا تضمين عليه
حجيت لا والله ورووح امي ونظر عيني علاوي اخويه وعيون ابويه ماحد لمسني غيره هو
منووو هووو ولج .....
لهيب لهيب رجلي من غيره انتي تعرفيني ترة صارلج جم سنة ويانه اني لا عندي ناقصة ولا زايدة اروح بدربي وارجع بدربي .
لعد واكعة من جنتي صغيرة صاير بيج شي ؟ متعرضة لحادث؟ احد جبرج على شي ؟
لا والله لااا ما صار هالشي ابد ولا اتذكر صار هيج .
لطمت على فخذها يا عزا بعينج ولج شيفكج منهم غير يذبحوج وخاصة رجلج تكولين مايطيقج ولا يحبج واجاه العيد بهاي السالفة وبس يريد يخلص منج صرتي طوك وبركبته انتي .
بتوسل حاجيتها عفية كليلي شسوووي الله يخليج اني حجيتلج ماعندي غيرج والله ماعندي غيرج .
لازمة بيدها واهزها وابجي واتوسل .
خلت ايدها على صدرها وكالت : لا تخافين دبرتها عندي بس انتي كون توافقين ولا تطلعيلي بيها منا ومنا وماريد وابني ومن هالحجي وافقي وسكتي لمصلحتج اني ترة والله تنذبحين بدم بارد.
باستغراب حجيت : ها شنو ؟
يتبع ..
توقعاتكم للي راح يصير ويه هدى احب اشوفها هنا بهذه الفقرة ... 😬
ان شاءالله نرجع لنظام النشر يومين نشر يوم استراحة
نورا ناصر
احبكم 😘