السلام عليكم
رواية هذيان بين جمر وجليد
الفصل 22
نورا ناصر
******
ابحث عن زهرة شبابي بين حطام السنين ..
لاجدها تيبست وتصحرت وباتت ذابلة
ابحث عن نفسي بين الجميع
لاجدني ارتدي قناع القوة الزائف
والملم بقايا قوتي واتمرد ولكن
كفى تعبت من كوني قوية شامخة
فو الله مايدور في قلبي ليس بوجع بل هو اشد
مااشعر به ليس بتعب بل هو اكبر
فكم اود ان انزع ذلك القناع الذي يدعي القوة واكف عن المكابرة
فتالله في وسط صدري براكين تمزقني ولهيب يحرقني .
بقلم الكاتبة ssarahh_333
******
موج ..
ابتسمت سخرية واباوعله باستحقار ..
واثق من نفسك انته!!! والله لو تلوح السما ماتحصلني ..
مشيت بهدوء وبداخلي نيران مستعرة .. هو حرك سيارته
فات من يمي ظل يحجي : والله راح تندمين على هذا كلامج لج اني اذا اخلي وحدة ابالي اخليها تجيني راكعة .
التفتت عليه بنصف نظرة باوعتله وحجيت
هاي انته كلتلها وحدة!! واني مو أي وحدة افتهمت!
لعد خوش ظلي بهذا خشمج العالي شوفي شراح تجنين منه وانتظري الشرطة بعد يومين تجي تسحلج وتاخذج للسجن..وتصير سيرتج على كل لسان ..
رديت باصرار وحزم : هلا بيهم مستعدة انسجن ولا اقبل بشخص حقير مثلك .. عديم احساس وغيرة وشرف .
رفع تك حاجب وابتسم بدنائة هيج واحد خسيس مشايفة اني ..
حرك راسه وكال نشوف ست موج..
ومشى بسيارته عساه لارد ان شاءالله .
غمضت عيوني بيأس وفتحتها ، جريت نفس بعمق بس احس اسحب وياه اهاتي وعذابي المكتوب .
وفجأة شفت نفسي اتمتم بأسم شرار
وكتها هسه تتركني شرار ؟ حقير نذل جبان ..
ظليت احجي وارد على نفسي ..
هو شرار شعليه كل شي وكلتي شرار ..
لالا اكيد هو السبب هو لان هو الي خلا اوس بطريقي وهاي نتيجتها .
ااااه شرار ااااه ، كلساع يتكرر الفديو الي مصوره كبالي
وصوت الي تضحك يمه يضرب بأسماعي ويخترقها ويعذبني .
امشي واعض على شفتي بقسوة وقهر وقبضة ايدي اضربها براحة الايد الثانية ومتجاهلة كل شي من حولي .
ويروح بالي لبعيد وافكر بعلاقته ويه مرته الروسية
ياترا هم رف قلبه الها! هم حباهه وتلهف عليها
معقولة بعده يحبها!
زين واني!!
هه وانت بيش الكيلو حيري بمصيبتج هو اصلا مو داري عنج ولا عمره راح يدري عني .
اني مجرد لعبة يريد يكضي وكت وياهه وهسه رجع لمرته حبيبته ام ابنه .
عمري ما جنت اتخيل نفسي راح اوكع بشباك انسان متزوج وجنت احتقر كل وحدة تحب هيج شخص
وهسه صرت منهن! الله يعينني على عذابي فعلا صرت احتقر نفسي وكرهت هالمشاعر الي مقيدتني.
مشيت وتعديت الكراج وفوته ، وكفت بنص الشارع الدمعة عصية تنزل من عيني بس تعذبني وعيوني تحركني .
رجعت بطريقي وتوجهت للكراج فتت بالسيارة حركتها واديه ترجف وراسي عبالك صار بكد الكون كله .
حركت السيارة وتوجهت للبيت فتحت الباب وفتت جوة ، البيت هدوء مبين خالة نايمة او شوف بشنو لاهية .
دخلت للغرفة جانت فرح متمددة وصافنة وابنها يمها نايم ، رفعت راسها باوعتلي ابتسمت .
ها موجه اجيتي ؟
هزيت راسي بأي وشمرت مفاتيح السيارة ونزعت سترتي الرياضية وشمرتها ورحت كعدت على سريري واديه فوك راسي .
هيه عدلت كعدتها وظلت تصيح عليه
موج موج ..
بيأس جاوبتها : ها!
_ شوو باعيني شبيج احسج هاليومين مو على بعضج احسج مهمومة!
باوعتلها واني ساكتة وبس اهز براسي بمعنى ماكو شي .
بنبرة تساؤل اردفت: شو جنهم عيونج حمر لو اني ما اشوف زين؟
_ لا عمري ماكو شي ليظل بالج ..
_ ها تمام ، اكولج عمري بعد يومين عمليتي فدوة حبابة ماريد علي الدر يعرف بيها .
تفاجئت سألتها ليش؟
_ كافي لهنا وبس ماريده يتدخل بحياتي بالطالعة والنازلة شوفي شصار بيه بسببه وبسبب قراراته اني ميتة خوف من العملية وهو السبب الي خلاني اوصل لهاي المرحلة بالمرض .
لذلك قررت ما اكوله على موعدها اريد ابتعد عنهم واعيش حياتي وابدي من جديد محد دمرني غيرهم والله .
جريت حسرة جنت مفكرة الجأ اله بس بعد كلامها تراجعت وفعلا جنت يائسة لدرجة كبيرة .
هزيت راسي وابتسمت والالم محتل كل داخلي .
رحت لزمت ايدها وحجيت بصوت مهتز وابلع ريك كل شوية .
_ ان شاءالله عمري تدللين الي تريدي يصير .
همست والدمع يلالي بعيونها : موج خايفة ، موج ابني امانتج .
_ اششش فرررح لتكولين هيج الله يخليج ..هي عمليه بسيطة ترة لاتصعبين الامور ان شاءالله تكومين بالسلامة ..
حضنتها وظلينه نبجي احنه الاثنين ..
طلعت من الغرفه ورحت لغرفة بابا ، شفته متمدد على السرير و نايم ، دنكت على راسه وبسته ، فتح عيونه بسرعه ، باوعلي : ها بابا موج اجيتي ؟
هزيت راسي والغصه تارسه صدري اخاف اجاوبه يحس بيه ماريد اضوجه ، اكتفيت بهزة راسي .
باوعلي ركز على عيوني ،
وكال شبيج بابا صاير شيء؟؟
بلعت الغصة كوة وجاوبته لا بابا ماكو شيء .
سالني احمد اخوج اجه بابا ؟
_ لا بابا تدري بي يتاخر ..
_ زين بنتي ..
سالته اخذت علاجك ؟
جاوب ايه انطانييا احمد قبل لا يروح موجه بنيتي خابري اطمئنني عليه شوفي وينه الدنيا ماتتامن همست ... ان شاء الله
طلعت من بابا ورحت الغرفة انين شفتها بحضن خاله وخاله تملش بشعرها وكفت اباوع حتى الضحكه ما تطلع مني .
فعت راسها من حضن خالة وظلت تباوعلي بنظرات توسل لحكيني موج خاله تكول تريد تنظف شعري من الكمل والله مابي كمل كوليلها تعوفني .
وهي دتحجي جرتها خالة من شعرها ورجعتها لحضنها وتصيح عليها : خل انضفج ام الكمل والصيبان عرس عليج حميدان .
رفعت راسها تباوع لخالة وتحجي برجاء : خالة والله حميدان رجل فرح وعرس عليها مو اني ولج موج لحكيلي حبابة ..
ابتسمت بقهر : خليها خليها خطيه وين تروح
هسه شويه تمل وتتركج ..
طلعت من يمهم و رن موبايلي شفته احمد واني جنت ناوية اتصل بي .. اجاني صوته تعبان ويلهث جاوبتها شكو احمد شبيك ؟
جاوب بتعب : رحت ادور على هذا الساقط سلام بمنطقتهم ولكيت عنوان بيته طلع ا لي اخوه ظلينا نتعارك ويا وابنه راح جاب بالبندقيه وظل يهد علينا .
لطمت خدي : عزااا احمد ياااربي الله ياخذهم ان شاءالله ..
رد بعصبية : اليوم ما اجي للبيت طمني ابوي اخاف يشوف الكدمات اللي بوجهي ويسالني ماريد شي يقهره .
جاوبته عزا بعيني احمد لا تاذي نفسك وهي تصفى
....
_ ولج شيصفيها ماتكليلي ؟ على فكره دبرت مليونين هاي ايجار القاعة مال الاشهر الفاتت انطيهن للولد وراح اروح للشيخ عمود ينطيني فد كم مبلغ .
رديت سرعة لا لا تروح الا هذا لا تروح اله.
رد هو : ليش ولج ؟ هو خوش رجال ماراح يقصر ويانه
_ لا فرح ماتقبل هي بروحها تريد تخلص منهم ومن هذا الشيخ الذات نسيت شسوه بيها ومن وراه انجلطت وحتسوي عملية احمد دخيلك ما اريده يدخل باي شيء
_ هاي شنو صدك تحجون انتوا والرجال اذا رحنا له طلبنا مساعدة اكيد ما يقصر .
_ احمد اختك مريضه وتعبانه ووراهه عملية بمكان حساس ما اريدها تنقهر .احنه عائلة بيت ماكو داعي نطلع اسرار بيتنه لفلان وعلان هسه هم بيت الشيخ يطلعون اسرارهم ؟
وبعدين انت ما تعرف النسوان ما يضمن سالفه ونصير علج بحلگ اليسوه والمايسوه
وباجر عكبه عيرونه اذا مو احنه فرح واذا مو فرح ابنهم داني هم يكلوله هيج خالتك وهيج خالتك لذلك لتدخل الشيخ وعائلته
_ انتي مخبلة مثل اختج عود نروحله من وراها .ولج محد دايقبل يدايني يدرون بيه اني لا موضف ولا عندي شغلة وابويه متقاعد محد يقبل زين ودبرت هالمليونين .
_ لاتصيح شبيك تخبلت ، احمد هاي قضيتي واني الوحيدة المسؤولة عنها واني الي راح الكه الها ل بدون مايأثر على احد منكم اترك الموضوع الله يخليك..
رد بحديه وقهر : من صوجج والله مو صوجج صوجي اني اليوم زين ما انكتلت بسببج وانتي هيج تحجين .
ولو هو غصبا عليه لان انت اختي خليتيني امسلت وماعرف شنو احجي .
رديت بنتر : اي لاتكول شيء ولا تسوي شيء وما عليك بيه خوش اني ادبرها كل شيء لا تسوي انت خليك اني الي ورطت نفسي و اني الي اطلع منها تمام!
سديته منه وكنت يائسة لدرجه كبيره ما اعرف شنو اسوي .. ماردت مساعدة الشيخ لازم نبتعد عن هالعائلة
احس ضايجة منهم وكارهتهم كلهم ، حاقدة على شرار الحقير هو السبب بكل شي انوب شون خدعني وجذب عليه وكال اتزوجج وراح لمرته ، اني صح رفضته بس ماعرف شصار بيه احس انجذبت اله واحس جنت مخدوعة مو بعيدة هو متفق ويه اوس حتى يدمروني ابد مااستبعدها هاي .
قبل عمليه فرح بيوم تحديدا بالليل كنت كاعده يمها بالغرفه وهي كل ساعه اتاكد لي بانه ما نطي خبر عمليتها لبيت الشيخ .
غرست اصابعي بشعرها بحنان وبديت اسحب الخصلات بهدوء واهمس حبيبي فرح اني باجر ما راح اكدر اكون وياج بالمستشفى .
جفلت فتحت عيونها وظلت تباوعلي بقوه واستغراب
_ ليش موجه اني اريدج يمي باجر فدوه اجلي كل شيء عندج .
حاولت احبس دموعي وانفاسي وجاوبته لا حبيبتي والله ما اكدر راح اخلي منال بنت عمتي تجي يمج
اني لازم ابقى يم داني و منال بنت عمتي ما تقصر سباعيه وتعرفين بيها هي صيدلانيه تفتهم كل شيء بالمستشفيات اني مالي خلك والله لازم ابقى يم دانيال .
كالت بحزن : مالج خلك ليش شبيج هو اني الي راح اسوي عملية والمفروض اخاف انتي شبيج بعد اصلا وضعج كله مخربط وماعاجبني!
_ اي اني وانتي واحد ياروحي وبعدين باجر يمج بابا
و احمد ومنال هماتين انا هنا راح ابقى فدوه حتى بابا قال ما راح يعوفج لازم ابقى يم دانيال فدوه عندي بعد شغله ضروريه لازم اسويها وبعدين ما يتأمن بس خالة وانين يم داني .
كامت اسندت نفسها بايدها على السرير كالت دانيال يبقى يم انيين وخاله ما عليهم شيء .
تحجين صدك تامين بخاله ليلة كامله هي على نفسها مانأمنها .
_ بابا يرجع بالليل ويبقى يمهم خو مايبقى يمي بالمستشفى .
_ بابا تعبان ومريض يا دوب يهتم بنفسه اني راح ابقى يمهم احسن وافضل حل والله اكره المستشفيات فرح بلاها .
عصبت و كامت من يمي وكفت على حيلها
_ اي ادري بيج ضايجه مني تعبتكم اني مو ماشي ماشي براحتج .
خلت وطلعت من الغرفه يا ريت تحس بيه يا ريت تعرف شنو الالم اللي بداخلي حقها ما تدري والله ما تدري ما اكدر اكوللها واكدر عليها ، عمليتها خطره بالمخ يا ربي خايفه عليها كلش ولازم ما اجيب الها سيره
قبل عمليتها بليلة حضرت كل شيء يخصها بس هي زعلانه مني ثكيل وجهه عليه ، تريدني و ياها حبيبتي اعرف بيها ظليت بس ادعي الها واكيد قلبي وياها بس ما راح اكدر اكون يمها باجر حتجي الشرطه و تلزمني واني كنت يائسه ومستسلمه ومتحدية اوس انه افضل السجن على الزواج منه .
بلغت البنات كتلهم القاعه انسدت والفلوس الي تداينها احمد سددنا بيها ايجار القاعه مال شهرين ..
مكلت الاحمد علي راح يصير وما كلت اله راح ياخذوني الشرطه كتلهم لازم ابقى ويا دانيال ما امن عليه ليله كامله وحده راحت فرح واني ودعتها بدموعي وهي مستغربة عليه .
يوم ثاني .. كاعدة بالبيت وبس اعصر بأصابعي واعضض بيهم ودمي يفور ، لبست ملابس محتشمة وخليت شال على راسي وانتظرهم يجون .
سمعت صوت سيارة الشرطة ابتسمت على حظي باستهزاء وطلعت للكراج وسمعت الباب تندك .
رجعت حاجيت انين وحضنت وجهه باديه
كتلها احمد يفهمج على كل شي اني رايحة هسه ديري بالج على دانيال ولا تكولين الهم اله لمن تخلص عملية فرح بالسلامة.
لزمت اديه وتبجي وتنحب .. ابتسمت ودموعي صارت على خدي ، تركتها لمن سمعت صوت الباب تندك حيل ومسحت دموعي بقهر .
فتحت الباب صار كدامي ضابط سألني هذا بيت موج فاضل عدنان ؟
هزيت راسي بأي وجاوبت أني موج .
كال احنه اجينه وويانه مذكرة اعتقال اكو شكوى ضدج .
باوعت صفح شفت اوس واكف يم سيارته رفع تك حاجب درت وجهي منه وسلمت اديه للضابط الي خله الكلبجات بيهم واخذني لسيارة الشرطة وكعدت وره .
باوعت على باب بيتنا شفت انين واكفة تنحب وتبجي وبيدها دانيال يبجي وياهه .
لا اراديا نزلت دموعي على خدي غمضت عيوني بقهر وخوف من مصيري المجهول وخايفة على بابا اذا سمع شراح يصير بي .
اخذوني للمركز ، ودخلوني لغرفة التحقيق واجت حققت وياي الضابطة مالة المركز وبحضور اوس .
واني كوة اطلع الحجاية ، قدمت اقوالي على اني شريكة سلام بالمشروع .
سألتني عن سلام اذا اعرف مكانه ..
جاوبتها بالنفي ..
كالت شرط العقد التسديد من اول شهر واذا مرت شهرين وماسددتوا بداية الشهر الثالث تسددون نصف المبلغ والي هو ٢٥ مليون عندج هالمبلغ تسددينه لو لا ؟
هزيت راسي بنفي رغم اعرف ماجان هيج شرط بس اوس مدسترها كلها ومرتبها واحنه اكيد لا حول ولا قوة ومانكدر عليه ابد افضل ابقى بالسجن حتى اخلص منه ولا اخليه يأذي احمد او اي احد من اهلي .
الي عرفته من كلام الضابطة انو هم دزوا مذكرة اعتقال لسلام بس هو مختفي حاليا وماكو اي اثر اله .
صاحت على الشرطية دتاخذني للسجن .. اجه اوس تبعني كاللها من رخصتج هي ابتعدت شويه وهو
ظل يحجي ويايه .
والله يعز عليه اشوفج بهالوضع وبهالمكان بس شسوي انت راسج يابس وعنيدة يعني اني شناقصني وماتقبلين بيه ها ؟ بس كليلي ؟؟؟ احسلج تبقين هنا؟
اوس عبالك المركز كله اله عرفت اني بورطة كبيرة عرفت انو مسنود من جهات عليا ولو اموت مااطلع منانه الا يسوي الي براسه والمسألة مو مسألة فلوس وبس .
ظليت احس دمي متجمد ومتبلدة من اي شعور عدا اليأس الي وصل بيه لمرحلة خطيرة وصرت ما اهتم لشي .
كتله خلصت ؟ يله خليني اروح ولوو تموت مااصير الك افتهمت نام واحلم ..
ابتسم باستهزاء واني اخذتني الشرطية ونزلتني بالسجن ..
اباوع ع البنات المسجونات وهنه يباوعلي همينه وافكر هم اكو وياهن وحدة مظلومة مثلي! لو بس اني .
خليت راسي على ركبي وصفنت اول مااجه كدامي شرار كله منك عرفت اوس عليه وبسببك اني هنا ..
هه انوب احمد يريد يستعين بالشيخ والله كرهت هالعائلة كلهم دمروناا اني واختي اي والله هم السبب بلي اني بي ..
بقيت ليلة كاملة بالسجن لاغفت عيني ولا هدأت روحي افكر ببابا فرح شلون بيهم ياربي . بقيت ادعيلهم واحد واحد ونسيت حتى نفسي .
الصبح اجت الشرطية وصاحت بعلو صوتها وين موج فاضل ؟
جاوبتها من مكاني اني موج ..
صيحت عليه بنتر ماتكووومين شبيج صار ساعة اصيح عندج زيارة كومي يله ..
وفتحت الباب .
بس لا اوس هذا يربي شلون بيه!!!
انوب الشرطية زادت بالصياح عليه واني ماريد اروح اشوف اوس .
كمت من مكاني ووكفت يمها وهي روحها بخشمها
سألتها منو اجه عليه ..
جاوبت بنتر مادري شمدريني امشي يله ..
قفلت الباب ولزمتني من ايدي وسحبتني وتمشي ..
وصلت للغرفة فتخت الباب وفوتتني بيها ..
ماشفت احد غير بابا ..
جان بابا مدنك راسه ومبين مقهور حيل ..
تمنيت ميته ولا شايفته هيج ..
رحت اله اركض وكعت يم رجليه وخليت راسي على ركبه .
صار يشهك ويبجي واني اتمتم سامحني بابا ..
خلى ايده على راسي .. ليش بنتي ما احترمتي شيباتي !
انفطر قلبي ومتتت قهر تمنيت اموت بهاللحظة تمنيت ماجايبتي امي!
ظل يحجي اني صح مريض ومابيه حل بس مو هيج يا بنتي مو هيج تسوين كل شي من وراي وتورطين نفسج ماشاورتيني ماحجيتي ولا كلتي ليش ابويه ليش ؟
عفنه اختج بالمستشفى مريضة وعمليتها بمكان حساس مدري تطلع منها مدري لا نحتار بيج بيها يا بنتي!
اجه احمد يمي جان معصب وعيونه حتطلع من مكانها نزلت عيني منه وغمضت بيأس ..
لزمني من عكسي ..
ولج هيج تسوين بينا موج ؟ تتصرفين من ورانا ولج الناس شتكول علينا ؟ شتكوول ؟
سكتت ماعندي اي اجابة ومدنكة ماخلي عيني بعينهم ..
اجه الشرطي وكال لبابا يله حجي خلص وقت الزيارة هاي التعليمات .
هو كام بابا يستفسر منه على قضيتي .
جاوبه اسأل الضابط كله يمه ..
وخرت ايد الشرطية مني ورحت حضنت بابا وهمست بأذنه سامحني حبيبي بابا والله غلطت ..
هو غمض عيونه وظل يبجي بحسرة وقهر..
اخذتني الشرطية ورجعتني للسجن واني افكر اقبل بعرض اوس والله كسرتني دموع بابا بس وربي يا اوس راح اطلع قهرتي على بابا كلها بيك بسيطة .
طول الوقت دموع وشهكات بابا مافارقتني ابد
....
اجتني الشرطية للمرة الثانية خلال اليوم وكالت عندج زيارة عيني ..
اشرتلها على نفسي اني!!
كالت اي مو انت موج فاضل؟ صرنا نعرفج من اول يوم هلكد ماصرعونه بيج .
كمت على حيلي ودعيت يكون اوس اجه .. حتى باسرع وقت اطلع منا وانتقم منه الحقير ماكو غير هاي الطريقة ..
ودتني لغرفة غير الي التقيت بيها بابا واحمد
فتحت الباب وفوتتني دفعتني من ظهري بخفة وطلعت وسدت الباب وجان اشوفه كاعد وره المكتب على الكرسي ومخلي اديه وره راسه .
ابتسم بكسل وعيونه عليه . درت وجهي وتأفاأت ..
هو كال ها ماناويه تغيرين رأيج ؟ قبل لاتروح اوراقج للقاضي وتنحكمين!
باوعتله باحتقار وجاوبته إي موافقة ..
طفر من المكتب واجه يمي ابتعدت للخلف بخطوات ارتعبت منه .
هو كال هدي هدي مراح اسويلج شي مستحيل اذيج اني صدكيني وهسه اخابر اخويه واخلي يتنازل عن الدعوة وتطلعين منانه باسرع وقت وبعدها نتزوج .
على كيفك شبسرعة نتزوج غير اتعرف عليك احبك مثلا ؟ شون نتزوج واني كارهتك بسبب الي سويته بيه ؟
ضحك كال تحبيني تحبيني ادللج دلال والله مصاير
تتمنين لو متعرفة عليه من قبل .
ابتسمت نص ابتسامة ودرت وجهي وهو كمل
والله شبيج والله ليش ماتصدكين ترة انتي الي وصلتينه الهالمواصيل من البداية طلبتج وكتلج اجي اخطبج ماقبلتي ..
اي بس انته متنحب والحب مو غصب مو بهالطريقة تخليني احبك .
شسوي حسيت راح تضيعين من ايدي واعترف تصرفت بتسرع يس والله اعوضج .
تأفأفت ماتحمل وجوده سألته شوكت اطلع منا ترة تعبت ..
اطلعج اليوم لاتهتمين بس لازم تكتبين تعهد خو مو اطلعج وتشتليني!
ابتسمت بحقد جاوبته لتخاف مو كل الناس مثلك اني مو عار .
ضحك مقبولة منج يالسمره ولا يهمج شعل عشيرتي سمارج والله ماتتصورين شكد تمنيتج شكد قاسية انتي!
ترة هنا مو مكان مناسب للغزل رجاءً ..
هسه ابقي هنانه ماخليهم يرجعوج للسجن بعد اخلص الاجراءات وتطلعين وهسه راح ادزلج على اكل همين مرتي المستقبلية..
كل شي ماااريد بس اخابر اخويه يجي ياخذني خو ما اطلع وياك اني ما امن بيك ..
ولا يهمج يجرالج ..
اسمع اوس ترة ننخطب منتزوج وفكرة الزواج شيلها من بالك والتزم بحجايتك احسن لاتخليني اكرهك اكثر .
شنو شنو ماكو زواج المن خاطبج لعد ؟
اي نتزوج بس لمن اني اقرر شوكت مو تجبرني يعني يمكن اظل احبك يله نتزوج .
تدللين عيوني انتي ..
ديله اختنكت فضها ..
اصيرلج هوا اني ..
نطيته ظهر شون اكله اختنكت منك بس سهلة بسيطة اوس اله اجمعلك نجوم الليل واشوفكياهم بعز الظهر .
بعدها طلع هو واني بقيت بمكاني انتظر رايحة جايه
ورة اكثر من ساعتين رجع ويا تعهد وقعت عليه .
وكال اخويه ديمشي باجراءات التنازل عن الدعوة وخابرت اهلج يجون عليج .
استغربت منين يعرف رقمهم بس ماسألته انقرف من الكلام ويا بس هزيت راسي ...
خلصت اجراءات الافراج واجه احمد عليه واخذني للبيت بالسيارة كلساع يباوعلي مستغرب
كتله ها شكو ؟
كال منو هذا الي ظل يزامط بروحه واني واني وطلعتها وطيحت حظ اخويه لان اشتكى عليها .
تقصد اوس؟؟
منين تعرفي ؟
غير هو اخو هذا الي اتداين منه سلام ..
صدك يكول هو اقارب الشيخ علي الدر ويكول مرة ابو علي تصير عمته .
ها ماعرف ..
ماتوقعتج هيج غبية موج ولج يعني هذا ابن خال حسان خاف هم راسميلج هالمكيدة ؟
وحسان شعليه بيه قابل ؟
مو حسان فد واحد عااار ويكره فرح .
اوو احمد انته وين راح بالك يمعود دخيلك الي صار صار هسه واني طلعت فدوة اسكت شويه بس خلي انام .
نامي نامت عليج طابوكة ماكو هيج بهذلة بهذلتينا .
اي صدك دير بالك تكول كدام فرح شي ترة هم خاف عبالها صدك حسان ورة هالشغلة وتروح تعصب وتتعارك وهيه مريضة .
لا اطمأني مو غبي مثلج ووصيت ابويه وانين هم نفس الشي كتلهم مايجيبولها سيرة كبل لا اعرف هذا مدري شسمه قوس مدري اوس .
بداخلي كلت قوس قزح النذالة والحقارة والخباثة مو الالوان .
هدى ..
واكفة بصف الميز واشوفه يجمع بأغراضه وملابسه
راح يسافر ..
ماعرف شنو احساسي كل الي احس بي هو المرض ، من فترة واني مو زينة لا اشتهي اكل ولا اشتهي هو ينام بصفي اكره ريحته انزل جوة انام وهو يعصب يطلع من الغرفة يركع الباب حيل ويفززني .
اجه يمي ونظرات عيوني تفترسني بغضب حارق
كال وخري منااااا .
وخرت بسرعة وهو فتح الجرارات وطلع جواز السفر مالته وخلاهم ع الميز ..
سألته وصوتي يرتجف مثل ورقة بمهب الريح
وجسمي ينتفض مثل الي لدغته حية سامة
_ لهيب راح تسافر ؟
وكف كبالي و جاوبني بغضب : انتي شنو دتشوفين ؟
دنكت وجاوبته : اي سافر انته واني هم راح اروح
بتر كلامي : وين تردين ترحين رووحي ..
يريد يطلع التفتت عليه بسرعة
للسماوة اروح ويه اهلي راح يستقرون هناك وبابا مريض تحاليله طلعت بي سرطان واني اريد ابقى يمه .
هز راسه بدون ميجاوبني وطلع ..
ويوم ثاني سافر كعدت من النوم شفته ماكو
حسيت اكو فراغ جبير كعدت ابجي حيل وبحركة
تلث اشهر ويا بس احس تعودت على وجوده ويايه .
العصر حاجيت عمو حتى يوديني لأهلي وخطية ماقصر وداني الهم وانطاني فلوس ودخل سلم على بابا وانطاه فلوس وكاله شتحتاج حاضر .
طلع عمو وكعدت يم بابا ابجي على حالته واتذكر شلون جان صوته يلعلع وبس يتحرك مايكعد ابد
هسه لا حالته فد نوب .
رحت كعدت يمه كال وجهج اصفر متغيرة بويه خدودج ذبلانة شبيج .
هزيت راسي ماكو شي يابه مقهورة عليك والله ..
لا تنقهرين عليه مابيه شي انه ، رجلج شونه وياج وينه مااجه يشوفني لايكول اشوف عمي مريض .
ها بويه مو لهيب سافر لروسيا .
افااا سافر وعافج بنيتي ليش تخلينه
شسوي يابه هو كال راح يريد يسوي ماستر .
وهذا شنو بعد ؟
مادري والله يابه هو يكول هيج ..
ولج خاف هذا عرس بلغتهم يريد يعرس عليج .
غير تسألين تستفسرين منه شمالج عوبة .
لا يابه مو زواج هو دراسة يدرس .
مو درس وخلص وصار مهندس بعد شنو ؟
مادري والله اني هم ماكدر اعترض هو الرجال لو اني!
اي والله بويه .. سكت باوعلي ثواني بندم
دنكت راسي كال انه جني ظلمتج بويه هدوه ..
انقهرت وظلت دموعي تصب ... وهو هم ظل يبجي حضني وحسيت بحنيته ..
وراها بأيام اجو عمامي حتى ياخذونهم للسماوة سألني عمي متفاجأ : انتي ترحين وياهم يقبلون عيالج ؟
هزيت راسي بأي .. وابويه جاوبه رجلها مسافر خليها تجي ويانه من يرجع هو يجينه ياخذها .
طول الطريق من بغداد للسماوة واني بس اتقيء
حتى مرة ابوي كالتلي شبيج ولج بس لا حامل انتي ؟
فتخت عيوني مصدومة وارجف حامل حامل شنو ؟ دكولي غيرها .
يا لعد مو معرسة انتي شون ماتحبلين ولج شو احنه هم ماشفنه نيشانج ؟ شيوخ وشيوخ شون عبرت عليهم هاي السالفة .
بكلامها خلتني اتذكر مصيبتي وحسيت حيغمى عليه واني بالسيارة .. انوب تذكرت كاكلت لعمو راح اروح للسماوة ويه اهلي ولا اخذت تليفوني وياي .
فرح ...
بعد عمليتي بأسبوع جنت بالغرفة والعب دانيال
فاتت خالتي كومي كومي رجلج ابو عكال وجفية اجه كاعد بالاستقبال يريدج .
كمت على حيلي وكلت عزاا العرندس هذا ...
رحت لأنين ولج انوو كومي لهي خالتي لا تدخل تفشلني كدامه رجلج ورجلج كافي عليه هو مفشلني .
ماكو نايمة ماتكعد اهزز بيها ماكو ، موج ويه بابا عنده مراجعة عمود قلبه واحمد طالع ... بالتواسيل يله كامت انو منعسة كعدت خالتي يمها .
واني رحت غسلت وجهي ولبست شالي ، لفيته عدل خنكت روحي بي خجلانة ومتوترة هو مايدري سويت عملية ومحتارة اذا سألني شكله .
اخذت دانيال من ايده يمشي على كيفه واتمنى ما اوصل اله ، بس وصلنه للاستقبال جان كاعد على كرسي منفرد محتله كله ، وكالعادة اناقته الرجولية الصارخة والعطر الي ملئ المكان .
دخلت سلمت عليه وهو نظراته فصلتني تفصال
توترت دنكت على داني الي ترك ايدي وراحله
هو اخذه شاله وخلاه بحضنه .
كعدت بمكان يبعدني عن نظراته الملتهبة
ظل يلعب بدانيال وبعدها التفت عليه اني كاعدة على القنفة الي بصف الكرسي الي كاعد عليه بس بعيدة عنه .
كال شلونج ام دانيال ان شاءالله زينة ؟ الوالد شلونه ؟
بلعت ريك اي والله الحمدلله زينين وبابا راح للطبيب عنده اليوم مراجعة ..
سألني اخابرج ماتجاوبين خير ان شاءالله ؟
ها مو التليفون كله عند دانيال يشوف بي العاب وما انتبه على المكالمات ..
كال بنبرة غموض مرة مرتين هم ماتشوفينها ؟ ..
جاوبت باختصار واحس ركبته حتنكسر عليه ونظراته تحرقني ؛ ها اي .
هو اخذ ايد دانيال الصغيرة وخلاها بباطن كفه
بلكت جاسم تجاوب علينه ولك .. ولك بويه جاسم ليش ما ترد علينه لهالدرجه انه مضايقكم .. جااا عمي اسحب روحي كل الي ردته اتطمن عليكم ماكل شارب بويه .
ابتسمت بخجل واحراج ..
كال شوكت عمليتج ؟
جاوبت بارتباك هاا بعد موو هسه ..
باوعتله اجت عيني بعينه جان رافع حاجب ومنزل حاجب ومقلص عينه اليمين .
بعدت نظراتي منه وعضيت شفتي .
كال شو ام جاسم كومي كومي بويه كومي هزي طولج خلينه نشوفه كعدي كبالي هناك ويأشر على القنفة الي مقابيله .
همست لا مرتاحة هنانه تسلم ..
بحدية كال كتلج كومي كعدي هنانه ليش تعاندين ؟
من نبرة صوته كمزت ورحت كعدت كدامه باوعتله شويه طخت عيونه بعيوني ودرت وجهي بسرعة .
ام جاسم بويه جم خياط عمليتج وشسمه الدكتور السواها
ليش ضميتي عني موضوع عمليتج ؟
عزااا منين عرفت ؟
عرفت عرفت ماكو شي يخفى عليه هواي جاي تضمين عني شغلات بس ترة هذا كله مو بصالحج .
باوعتله وحجيت بفخر ودلع : انته مو تكلي انتي لبوة اني فعلا لبوة وما احتاجك اكدر اعتمد على نفسي بدون ما اتعبك او اشغلك .
انت بويه انتي بلووووه بلووووه لبوتيش ولج عمر اللبوه ما كسرت كلمة الاسد .. ولج انتي ثعلبة ماكرة
انتي مصيبه هاي اني موصيج وهيج سويتي ليش كسرتي كلمتي بويه ..
وبعدين ترة انتي ماتعبيني ولا تشغليني شيلي هالافكار من بالج
باوعتله مقلص عيونه ونظراته خطيرة ، سكتت
وكمت كتله ها اتركك يم ابن اخوك اني اكوم اسويلك جاي .
اجه يمي انطاني دانيال ماريد جايج انه رايح وشوفي ولج ام جاسم حتى ما اتحمد الج بالسلامة ..
ودار وجهه ومشى .
ورى فترة خابرتني نرجس تدك وتلطم ...
حاولت اهديها خيرج ولج شكوو شبيج ؟ بس اهدي خل افهم منج !
جاوبت بنحيب : حبابة فرح حبابة حسان يهددني بصوري يريد ينشرهم لو يفضحني يروح لخطيبي يكوله على علاقتنه .
عزاا شوكت انخطبتي انتي من فترة اشهر هو كال انو هو بعده على علاقة بيج ورجعت المياه لمجاريها شوكت لحكتي تنخطبين ؟
بابا عرف بعدني اتواصل وياه ومنعني منه وحتى قيدني بهواي امور وخاصة بالكلية وهسه قبل فترة اجه شخص ابن صديق بابا تقدملي وبابا شبه جبرني عليه .
حاجيت حسان كتله اني بطريق وانته بطريق كلب الدنيا وماكعدها وظل يهدد ينشر صوري يفضحني حتى فديوات عندي يمه ينشرهم .
جاوبتها بصدمة عزاا بعينج يالمصخمة شنو من فديوات وانت شدعوة هلكد تتنازلين اله تدرين بي كلب نذل وحقييير .
شمدريني شمعرفني غبية غبية ..
هسه عرفتي نفسج غبيه دروحي اشتكي عليه شمنتظرة كولي يبتزني ويهددني .
لالا عفية ماريد فضايح بس اريدج ترحين للشيخ تكوليله على اخوه بلكي يساعدني بس فدوة ماريد اتضرر اني احجيله على كل شي حبابة هو شيخ ويفتهم خلي يقنعه يتركني بأقل الخسائر .
والله محد خسران غيري اني اوكفلج وانبهج واحصل اشكال حجي شجابج عليه هالمرة شذكرج بيه بالله .
بس وكت الشدايد تجيني مو بذاته .
لا والله فرح على بالي دوم انتي بس والله انشغلت اني هم اعذريني .
اي معذورة اصلا صرت اعرفج ..
وهسه مراح تتوسطيلي يم الشيخ فرح بشاربج اني والله لا يخليج بالموقف الي اني بي .
لا عمري اني مو مثلج دادة اطكطك صور وادز هو اني عايزة ناقصة ..
ختمت وياها ووعدتها اساعدها ، خابرت على العرندس عشتو زعلان سواهه وحدة بوحدة مايرد عليه .
رحت على موج شفتها تصيح مدري شبيها
_ افتهمت افتهمت انته مو موقعني على تعهد شبيك خابص روحك ومستعجل اصبر ..
كالت اوووو وسدت التليفون وشمرته على السرير ..
رحت يمها شكوو شبيج ليش تصيحين ويه منو تحجين .
حجت بنتر ويه المصخم اووس ..
يا عزا هذا الي جاب اهله وخطبج موو ؟ ولج هيج راح يشرد منج تهدي ويا .
ظلت تأشر باديها وتصيح اني اريده يشرد انيي ..
يا شبيج ماتردينه كولي شكوو ساكتة وتحاجينه لعد وبعدين تعالي هذا ياتعهد الي تحجين عنه ؟؟
راحت كعدت على السرير وحطت رجل على رجل
كالت هيج مو يمج لتحطين بالج .
رحت كعدت يمها اكولج حياتي موجه وديني لبيت االشيخ هسه اذا ماعندج شي .
باوعتلي باستغراب شعندج موليه هناك بعد .
انت شبيج اليوم عصبية خيرج ؟
ماكو شي ..
يله لعد وديني حبابة محتاجته بشغلة العرندس .
سألتني بعصبية : شرار بعده بروسيا موو ؟
اي اي بعده وبعدين انت شعليج منه تسأليني عنه .
نترت انلصمي .
يا شبيج موج صايرة حيل متنطاقين ابد .
ماتردينه اوس رفضي احنه شعلينه تحطين حركتج بينه شجابرج را
ميلت روحها عليه خازرتني خفت منها عبالك مسودنه صايرة هي وكفشتها شكدها وعيونها لونهم ا حمر هالايام
كالت مو تردين اوديج بيت حماج كومي بدلي يله كبل لا اغير رأي .
كمت وياها ورحنه لبيت الشيخ اني نزلت وهي بقت بالسيارة مقبلت تنزل ..
دكيت الباب الفلاح فتحه الي سلمت عليه ودخلت جوه
جان الوقت ظهر ادري بالعرندس الظهر يجي بثنعش .
طبيت جوه سلمت عليهم كلهم وكعدت يم الحجية اخذت دانيال تبوس بي وتباوعلي باستغراب .
كالت شعجب ذاكرتنه اليوم ؟
جاوبتها ها مو عندي شغلة ويه الشيخ علي الدر محتاجته اخلصها واروح .
هيه كالت ها ورجعت تلعب بدانيال ..
كمت وكفت يم الشباك اباوع من البردة بلكي يجي بسرعة خطية موج هسه انحمست حمس برى وهسه تعصب وبروحها مزاجها ازرك هالايام .
اجت هيام وكفت يمي كالت شتردين من خالو ؟
باوعت عليها وتخصرت بعدج فضولية ؟ ماغيرتي طبعج ؟
رفعت حواجبها كالت شوكت تتزوجون ..
عزاا بعينج شنو هالقباحة انتي ؟ شوكت تتغيرين مللتيني كببر . عفتها وطلعت بره .
شفت سيارته فاتت للكراج ونزل منها نزع نظاراته تغيرت نظرات عيونه عبالك مرته مستقبلته .
بعدها لف البشت مالته وتقدم باتجاهي واني رحت سلمت عليه هو كال ها ذاكرتنه اليوم ام جاسم ؟
ابتسمت كتله محتاجتك بشغلة صغيرة وان شاءالله ماتفشلني انته .
ولو بعدني زعلان عليج على سوايتج ذيج بس انه بعمري ماراح افشلج ان شاءالله احجي كولي شتردين ؟
ها نحجي هنانه ؟
كال لالا طبي جوة بالمكتب .. هو مشى كدامي واني وراه شفت هيام واكفة يم الشباك وتباوع ، خزرتها وغميتها ودخلت.
هو راح كعد وره المكتب وبيده سبحته ، خله موبايله واوراق ونظاراته وكعد .
وكفت اني كباله ظل يباوعلي بنظرات نفاذة
ويهز نفسه بالكرسي ببطئ .
كال احجيلي فرح شصاير وياج ؟
كتله مو ويايه لا بس اخوك حسان ترة زودها هواي انته لازم تخليله حد ترة هذا عار عليكم كلكم .
قلص عيونه واني درت وجهي واشتعلت خدودي من الحرارة من الفشلة الخجل احس جفصت جفصة لم يجفصها احد من قبل .
كال من بين شفايفه ماراح تنطيني الزبدة ؟ لو انتظر للصبح ؟ ترة انتي شكد ماراح تحجين انه ماراح اخذ بنصائحج وفريها واحجي .
كلت احم اااي وسولفتله ..
عصب وثار اخذ تليفونه وخابر مهيب واني من الخوف اخذت ابني وطلعت رحت لموج شفته مشتعلة بنار العصبية مدري شبيها حركت السيارة ومشينه .
بالطريق خابرني علي الدر وكال اي ام جاسم همزين رديتي وينج انتي كالوا طلعتي ليش مابقيتي على الغدة ؟
ها لا تسلم بس شراح تسوي ؟
خليها عليه مو اخوي الي يهدد بنات العالم احنه هم عدنه عرض ونخاف عليه طمنيها البنية ولاتخاف والله يسعدها ويوفقها .
اريد اكله الله وياك هو كمل : واختج مرة ثانية لاتخلينها بالباب عيب خليها تتفضل وتدخل هذا هم بيتج مو بس بيتنا .
ان شاءالله ع الجايات وختمت المكالمة ..
رجعنه للبيت وخابرت نرجس وكتلها تطمأن الشغلة صارت يم الشيخ بعد .
ورى فترة خابرتني وعزمتني على حفلتها
كتلها ولج ما اكدر زوجي حتى سنة ماصار من مات .
كالت ولج هو المرحوم الله يرحمه تزوج عليج وانت حية ترزقين اذا متي على حياته شيسوي لعد ؟ تعالي ولا تفشليني والله ممنونة منج اني والي سويتي الي ابد ما انساه بعمري .
واني من صدك جنت ضايجة ومحتاجة تغيير جو
طلعنه اني وانين للسوك ، موج جان مزاجها ازرك كالعادة ، اشتريت فستان اسود طويل بينصل بي لمة
ورحت لحفلتها اخذتنا موج بسيارة بابا اني وأنين .
جانت نرجس بين الضايجة والفرحانة والقلقة ..
كعدت يمها كالت جنت احس نفسي مجبورة ابقى ويا حسان كل مرة جان يهددني وهسه احس هم وانزاح .
باركتلها وطلعنه من يمها وجانت الدنيا ليل ..
موج كالت اكو سيارة تمشي ورانه ..
خفنا كلنه وظلينه نتلفت ، حضنت دانيال بقووة ..
وميتة خوف ، دخلنه بفررع وصارت سيارة مقابيلنه وكفت وجبرت موج توكف .
متتنه خوف وظلينه نصرررخ لانكدر ننزل لا نكدر نبقى
انفتحت الباب الي يمي وصار بوجهي حسان عطت .
وهو جان وجهه مورم ومزورك وعيونه كلها حقد وكره .
كال خربتي بينه ورحتي للحفلة مالتها تحتفلين موووو ؟؟
ظليت اهز براسي برعب وخوووف واصيح حساان عووفني اني معليه .
هو مد ايده لزمني من عكسي ونزلني من السيارة غصب ويصيح تعاااااااااااي .
يتبع ..
االبارت طويل 😥💔ومشيت هواي احداث وسرعت بالسرد ويارب كون يطلع يمكم لان من صدك التحديث مال وتباد كسر واهسي ☹