سألته ـ فلم؟
رد عباس ـ هيچ فلم حلو ، شوفي يفيدچ
ـ بشنو؟
رَد ـ اعرفي بنفسچ، انتِ مو سألتيني غير اسئلة خل اجاوبهن
ضغطت بايدي على غلاف الدفتر حتى اسيطر على توتري و خجلي ـ تمام
باوع لدفتري و سألني ـ هَم قريتي حديث الامام الصادق عن الوسواس؟ انو هو من علماء الشياطين
جاوبت ـ اي قريت
رد ـ اسمعي القصة كلها مني ، الله تعالى من خلق الانسان جعله من جسد و روح
الجسد نعرفه بس الروح شنو؟
الروح بيها نفس الانسان و النفس بيها جزء يميل للعقلانية و جزء يميل للشهوات و الملذات
رفع اصبعين و كمل ـ الانسان گدام طريقين طريق حق و طريق باطل
النفس و شهواتها + الشيطان
ابتسم و گال ـ من اكبر النعم الي ينعمها الله عليه انو ينولد بأمة الاسلام و على حب هالامير الگبالنا
سكت ثواني يلا زفر و كمل ـ تبدي هاي الروح الي عند الانسان تكتسب حسنات و سيئات و تكتسب علم
الى أن يوصل البشر مرحلة النضج و يلاحظ الشيطان الموكل عليه و الي اسمه (المُزَيِّن) انو رجحت حسنات هالانسان على سيئاته
يجي (المُزَيِّن) و يحاول يزين الباطل: بوگ يمعود ، اترك صلاتك، عوف اهلك
بس ما يلگه استجابة من الإنسان
وين ذاك الي بس يگله اترك صلاتك يتركها؟ وين ذاك الي بس يگله انت عطشان افطر فيفطر؟
فتحت عيوني على وسعهن ، اني لحد عمر 18 يلا صرت اصوم عدل
هزيت راسي بصدمة و كلش مبين انو هاي دروبي
كمل كلامة ـ شافچ الشيطان صرتي اتصلين و احتراماً لرمضان حتى بطلتي تسمعين اغاني و بس خلص رمضان كرهتيهن
و اكتسبتي خلق حلو مثلاً اذا أحد طلب مساعدتچ ماترديه او اي خلق حلو و يحبه رب العالمين
مؤمنة انو الي ترجعيله بكل احزانچ و امورچ الصعبة هو الله
و تنزل دمعتچ على اوليائه و كلنا نعرف الدموع ترقق القلب
هنا رب العالمين كتبلچ الهداية و ممكن يكون المرض من أسباب تقليل ذنوبچ
لان المؤمن من يتمرض يحس بذِلته امام الله ، فرب العالمين يخلي سيئاته تتساقط مثل أوراق الشجر
كل هالاشياء رفعن درجتچ عند الله فالشيطان (المُزَيِّن) ابتعد و إجة مكانه الوسواس
قاطعته ـ اي هيچ كاتب "علي" عن الوسواس و القَرين صدگ شنو القَرين هو نفسه الجيثوم ؟ شو يگولون زين ؟
رفع حواجبه متعجب وسألني ـ معقولة علاوي هيچ كاتب؟
رفعت ادية بسرعة بحيث فلت موبايلي من ايدي و جاوبته ـ لا لا مو هيج كاتب بالعكس گال "القَرين" مو خوش بس بالنت يگولون زين
هنا رتل الحجي "ابوعلي" الاية ﴿هَلْ أُنَبِّئُكُمْ عَلَى مَن تَنَزَّلُ الشَيَـاطِينُ (221) تَنَزَّلُ عَلَى كُلِّ أَفَّاك أَثِيم ﴾
ابتسم عباس و گلي ـ احفظي ببالچ هالاية كلش زين ، هاي تتكلم عن القرين
القرين هو شيطان الناس السيئة كلش : المفارگ الله ، يبوگ ، يطعن بشرف الناس
هذا الي شيگله ابليس يسوي
فيتسمى شيطانه بـ (القَرين) لإن يصير صاحبه و قَرينه
تمر الايام و الليالي و العشيات بدون ذكر الله ، مثل ماتگول الآية ﴿وَمَن يَعْشُ عَن ذِكْرِ الرَّحْمَٰنِ نُقَيِّضْ لَهُ شَيْطَانًا فَهُوَ لَهُ قَرِينٌ﴾
و اعيد مو كل الناس ، لا الي كلش خلص اغسلي ايدج منهم
اما سالفة الجيثوم لا تخافين منها و لا تهتمليها ،" الجيثوم" اصلاً تسمية مو يم الدين اسمها (شلل النوم)
النوم يكون على مراحل
اولاً: ارتخاء العضلات اي شلل الجسم
و هذا من رحمة الله ، حتى الي تشوفه بحلمك ما يخليك تنفذه
شايفة اكو ناس تتحرك و هي نايمة ، هاي الناس يصير عدها خلل بهالمرحلة فتتحرك
ثانياً: لازم تطفه حركة العين السريعة
انتي بخلال هالمرحلة و قبل متوگف حركة العين فزيتي عيونچ مشتغلات بس العضلات لا
فتشوفين شي إما بسبب التوتر و العقل الباطن المملي بقصص الرعب
و إما بسبب الوسواس
الحل بسيط ، اذا انعادت هالحالة حركي عيونچ لليمين و اليسار و حاولي تحركين عضلات وجهچ و رددي ذكر «لا إله الا الله» بگلبچ ، و وعد ماتشوفين شي يخوف
برطمت بوجهه و گتله ـ أريد افتهم هالشيطان على كلشي لاحگنا ، ماعنده شغلة و عملة غيرنا
هنا الحجي ما تحمل ضحك من گلبه و عباس گلي ـ ما قريتي حديث الشيطان وية النبي؟ متأكد علي كاتبة
تذكرت برير من حچة عن انه الشيطان دخل للرسول فجاوبته ـ اي يمكن موجود اتذكرت هيج شي ، اقراه مرة ثانية
دنگ عباس على خاتمه صار يحركه و هو يگول ـ شوفي خيتي هذي الشغلات الي حچيتلچ عليهن يسموهن "السلوك الى الله"
يعني تصير تسوي كلشي لخاطر الله غش و مضطر ما تغش ، تتنازل عن كرامتك لله
تطيع ابوك و امك لله ، كلشي لله و كلما يتنازل الانسان من أجل الله كلما يرفعه
ما عجبني حچية و رديت عليه ـ بس الله عادل ، يعني إذا مرت اخوية تغلط و تحچي علية وين ما چان اسكتلها؟؟
صارت عيني بعينه بسرعة رفعها و باوع على قبة الامام علي يلا رد ـ عن الغضب چان علي دوم يستذكر موقف الإمام علي وية عمرو بن ود
و عن العُجب چان دوم يستذكر الإمام زين العابدين الي يردد دعاء ابي حمزة الثمالي بسَحر ايام السبي ، الإمام الي انطه كلشي لله چان يگول ...
قاطعت عباس بترديدي الدعاء ـ أيْ رَبِّ جَلِّلْني بِسَتْرِكَ ، وَ اعْفُ عَنْ تَوْبيخي بِكَرَمِ وَجْهِكَ ، فَلَوِ اطَّلَعَ الْيَوْمَ عَلى ذَنْبي غَيْرُكَ ما فَعَلْتُهُ
عوج راسةو هو مبتسم ، سألته ـ يعني هو هذا معنى الشغلات الي صار يذكرهن فجأة بدون سلام و كلام؟
مدالي ايدة يريد الدفتر انطيتهيا
خلاه بيناتنا و گال ـ خيري نفسچ اتكملين حياتچ مثل الناس المتخبطة و البعيدة عن الله لو تمشين بهالطريق و ترا هالطريق صعب بس حلو
صفنت دقايق بيني و بين نفسي ، شنو حصلت من ذاك حالي
صلاة گوة اصلي ، مشاكل و عرك ، ظافر...
التفتت على الامام علي ، اجت ببالي كلمات سامعتهن من ابوية " الامام علي انطه كل كيانه لله فرفعه الله على سائر الناس و خلاه ألق بكل زمان "
ليش ما اصير مثل امامي و اقتدي بي؟ شحصلت من هاي الدنيا؟
ليش ما ارتقي بسلوكي و كياني؟
التفتت عليه ، سحبت الدفتر و جاوبته ـ اي أكمل
رد ـ خوش
رفعتله حواجبي و سألته ـ بس خوش؟ علمني كلشي
رد عباس ـ النبي «صلى الله عليه و آله» گل للإمام علي عليه السلام "يا علي إن هذا الدين متين فأوغل فيه برفق"
شوية شوية ، كلشي بوقته ماكو علمني كلشي
سألته ـ بس ماگتلي منو الغالي؟
الحجي تدنه من عدنا و سألني ـ صدگ بابا شايفة نفس حلم علي
ماعرفت شرد عليه
عباس خلة ايده على رجل عمه يهدي و گلي ـ أول شي الحلم لو يجنن ما تسولفينه غير لواحد اذا اضطريتي او اكتمي، ترا عمي مايدري اني الحچيته إلة
رديت عليه ـ و الله ما اچذب
اختنگت بعبرتي و آني اسأله ـ منو الغالي؟ منو الي جسمه متروس جروح؟ ليش ما اگدر اساعده؟
عباس ما سيطر على نفسه بچة، لا و صار ينحب و اني ام دميعة صرت ابچي على بچي عباس
طلع كلنس و مسح دموعه و جاوبني و هو مدنگ ـ من سنتين شاف علي ذاك الحلم و حچالنا اني و الشهيد مؤمل الله يرحمهم و فسرناه
بلل شفايفه و اختنگ بعبرته يلا كمل ـ مرت شهور و اتصل علي يگول شفت هالحلم و شفت مؤمل يم الغالي مجروح
ثاني يوم بالضبط استشهد مؤمل
خلة ايده على حلگه و كمل و دموعه يجرن ـ و هو هسة توفى ، تعرفين...
نشغ عباس و رجع يبچي
كمل كلامه و هو غاصب نفسه حتى يسولف و مايبچي ـ تعرفين بليلة وفاة علي راسلته گتله خوية آني كتبت وصيتي إذا توفيت لا تنساني و دوم اذكرني بزيارة آل ياسين، تالي هو الراح گبلي
الحجي خلة ايده على متن عباس يهديه و سألني ـ شنو شفتي ؟؟
هزيت راسي و سردت الشفته ـ شفت ايده من چان يسجد
ابتسمت گوة عني مثل العاشق الي يذكر معشوقه راحة مو طبيعية و اني اوصف الإيد ـ چانت بيضة و بيها حمار شلون ايدي بالشتاء ، هيچي من البرد يصير بيها حمار
عباس مسح دموعه و رد ـ قارية صفات الامام المهدي و شبهه برسول الله ( انه ابيض مائل للحمار) و انه أعمالنا السيئة تكون مثل الطعنات بصدر الامام الحجة
هذا هو الغالي يا سكينة ؛ هذا الغالي الي ذاك من ذاك باله يمه ، و مو بس هاي لا احنا النعرفه هَم غافلين عنه
الحجي ضرب عباس على ظهره بخفة و گال ـ كافي سولفتو هواية و البنية تأخرت ، و انتبهو زين
باوع الحجي علية و وجه الكلام الي ـ يابا التغيير مَينقبل بسرعة ديريبالچ على اهلچ و ناسچ ، شيستفيد الواحد اذا الناس حواليه عندها مشكلة وياه و ما مضبط امورة وياهم
مثل ما الله يحبك هو يحب الي گبالك
گام الحجي و عباس گام وياه مشينا لباب الخروج
سألني عباس ـ منو يوصلچ لبيتكم؟
دنگت على موبايلي و جاوبته ـ يمكن برير ابن خالي ، هسة اخابره يجيني
گلي الحجي ـ چا ننتظر وياچ لحدما يوصل
رديت عليه ـ لا عادي ما اريد اتعبكم وياية جبتكم لهنا و هسة تنتظرون
وصلنا الدرج مال باب القبلة دار وجهه الحجي سلم على الامام يلا رَد ـ ما منتظرين بشارع ، احنا يم ابو الحسنين
رحت للكيشوانية لبست حذائي و دگيت على برير مرة ثانية ، و هُم بعدهم گبالي
رد برير ـ الو
جاوبته ـ ها برير تگدر تجيني؟
گلي ـ ليش مو اني ما دخلني و ما مسؤول عنچ
ضوجني غلقت الاتصال بوجهه و دگيت على خالي موبايله مشغول
إجة عباس سويچه بيده سألني ـ ها إجة گرايبچ؟
جاوبته ـ لا ، راح اخذ تكسي
رفع حاجبه و سأل ـ تندلين عاد؟
دنگت و ما عرفت اجاوبه
وصل الحجي يمنا
عباس التفت عليه و گله ـ خطية نوصلها ويانا ، گرايبها مايگدر يجي و يمكن ما تندل
قاطعت عباس ـ لا عادي اخابر خالي و هو يجيني بس هذا مطنگر علية
عباس ابتسم و استغفر ، مشى گدامي و هو يگلي ـ و الله انتِ اليوم خبطتي اعصابي خبط ، ساعة تبچيني ساعة تضحكيني سالفتچ سالفة تعرفين اسم منطقتكم؟
جاوبته ـ اي يسمو ال **** و بيت خالي يمهم جامع و مولدة
اشر بيده على الشارع و هو يرد ـ لو تموتين ما تلگين تكسي يوصلچ لهالمكان ، امشي ويانا و ندور المكان الي بي جامع و مولدة ههههه
الحجي رد عليه ـ خطية بنية و مو محافظتها حقها
عباس طلع سويچه من جيبه و گله ـ حجي ماتعرفهن ذني ، ذاك الاسبوع اسراء مخابرة ابو التوصيل تگله بيتنا بدور الضباط و بابنا لونه بيجي و الرجال خطية يدور بذيچ المنطقة
فتح باب سيارته و صعد
كمل كلامة ـ ساعة الرجال يدور لمن وصلت للبيت و انطتني الموبايل دليته ، إلا يدولبن الواحد ما بيهن حيل يحفظن اسم الشارع و اقرب علامة دالة
گلبت خلقتي يااا على اساس العراق مرقمينه ترقم خو النجف الواحد يتيه بيها نفس الفروع الضيگة و نفس الوايرات
و بيت خالي صارلة فوگ ال 100 سنة
بيوتهم اثرية و يريدني اندل و افرق ببينهم
خالي آخ يا خالي شگول عليك ؛ شيخ عشيرة و تخابر هالگد ! و ضرغام ما ماخذة رقمه
خابرت زينب ردت علية ، و مرأت خالي دلت عباس على بيتهم
من وصلنا للفرع طلعت مرأت خالي للباب ، سلمت عليهم و شكرتهم
و بس طبيت بلشت بية ـ ادري شبيكم انتِ و برير ما تسحتون؟ ولكم كبار عبرتو العشرين شلون تسوون هالعملة گدام الغربة
رديت عليها ـ شمسويتله هو حاط گوره بگوري و يتدخل بية ، ما يرتاح لمن يضوجني
ذبيت عباتي على القنفة و كملت كلامي ـ اني مجتبى من يتدخل بية اتعارك وياه و اطلع روحه مو انوب هذا يتحكم بية
ردت مرأت خالي ـ زين خابريني گليلي و اني اجي آخذچ مو الغربة تجيبچ ، ليش فضحتينا خالة
من گالت هيچ عفتها و فتت للغرفة اني مال واحد يتدخل بية و اطلع فاضحتهم ما يعجبني
طلعت موبايلي من الجنطة و دگيت على مجتبى رَد ـ خوية إذا ما مستعجلة عندي شغل
جاوبته بصوت مخنوگ ـ مجتبى إذا ما تجي تاخذني و الله اجي وحدي للديوانية و تعرفني مخبلة
بالبداية مجتبى صار عصبي و غلط علية ، و اكيد ذبلي من اليحچي دوم "انطيناچ مجال زايد
" شنو تجين بكيفچ" اكسر رجلچ"
بعدين ما اتحمل بچيي و سأل ـ منو مضوجچ ولچ؟
گتله ـ برير
طبت مرأت خالي و سألت ـ هاي ويامن تحچين؟ ليش خالة ؟
مجتبى سمعها فگال ـ اني اخابره و افهم منه عيب سدي الاتصال
رديت عليه ـ و الله ما علية تجيني يعني تجيني
سد الخط من يمه ، ما نزعت ملابسي و گعدت بالگاع ابچي
اجت زينب وگعدت يمي تسكتني ـ ولچ امي من خوفها عليچ گالت فضحتيني ، شبيچ تركزين بكل كلمة و برير نفتهم منه و نحاسبه عليمن تبچين؟
صارت تتشاقة وياية و شالت ملابس البيت و شمرتهن علية حتى ابدل
لبستهن و مسحت دموعي
وصلت الباب و استحيت افتحه ، بالله شگل لمرأت خالي من أطلع
صارلها شهر مهتمة بية و مخليتني على راسها و هسة على كلمة ازعل و اگلب عليهم
بالله اني وحدة صاحية ؟!
طلعت غسلت وجهي ماكو ما لگيتهن بالمطبخ ، عدهم مكان يسموه مكشوفة مخلين بي بس كم شغلة و وياهن التنور و مرأت خالي تخبز بي
سمعت زينب تگلها ـ يمة برير حقه ، امس ابوية يگله اخطبلك سكينة ، لا و خليتوه يغار من گلتوله خالتك حاطة عينها عليها خاف تاخذها لخالد ، و هسة الخبلة تگله عوفني وحدي وية رياجيل غُرب!!
.
.
.
يتبع