السلام عليكم
رواية هذيان بين جمر وجليد
الفصل عشرون
نورا ناصر
*******
ماذا فعلتي يا مجنونتي ؟
هل هذا هذيان ام انكي متعمده على تحريك مشاعري !
فأنا اصبحت متيم بكي وانتي لاتعلمي .....
ولا اعرف كيف اعبر لكي عما في داخلي ..
اسمحي لي بلوصل الي جنونك واقناعك بان الحياه ///
تنتضرك وانا انتضر منك رفع الغشا عن عينيك لترى مدا خوفي عليك
فانتي امراه سليطه السان لا تسمع ولا ترى غير جنونها !
ولا اعرف اين يأ اخذك جنونك الي اي هاويه تمهلي
قليلا #
فانا لا احب ان اراكِ معذبه متعبه
/// اعطني اشاره واحده
بان اقف الى جانبك واحمل عنك ما لا تستطيعي حمله
سوف اكون وطن اذا تخلت عنك كل البلدان و خنجر
نابت بصدر عدوك وسند لا يخذلك ابدا ////#
اسمحي لي يا مجنونتي ان استعيد لكي ذهنكي اسمحي لي !
haneenali422 بقلم الكاتبة
******
طبوا جوه وكعدوا يم الحجيه بالصاله تفاجات بجيتهم السريعه بعد ما طردهم الشيخ ، وعمة بلقيس خابرتهم وكالت الهم هذا الكلام وهم معبالك مطرودين لا والله عبالك معزومين اشو اجو بسرعة .
يمه يمه الصلافه شلون يجون وهم مطرودين عجيب غريب امرهم لا والله ما استغرب هي اللي تزوجت هيج زواج يطلع منها كل شيء.
شويه وصاحت عمة بلقيس : هداوة جيبي الجاي عيني ..
جاوبتها من مكاني : صار عمه دقيقة ..
سخنت الجاي وصبيته ووديته الهم سلمت وقدمته
نزل عمو الشيخ من فوك وجانت ملامحه متجهمة وغاضبة .
هنه من شافنه كامن على حيلهن ومدنكات وعود خجلانات بس والله مامبين الخجل عليهن يمكن خوف اي .
سلمن عليه رد عليهن بتمتمة من شفايفه ومبين عليه كاتم غضبه وكعد على القنفة ..
كالت سحر : شيخ اني جايه اعتذر منك بس والله هي تجاوزت علينا بالاول واحنه طالبين قربكم باعتبار احنه بينه هالبنية وهاي بنيتكم .
بدون مايباوع عليها جاوبها : شوفي خويه خلينه بعيدين احسن انتي مره غريبه لا عشتي ويانه ولا چنناچ تزوجتي ابنا مو برضى منه ولا خليتي النه قدر وقيمه ..
وحتى لو افترضنا اعتبرناج منا انت ما احترمتي حرمة بيتنا لذلك انت عمرج ما راح تصيرين وحدة منه انت سويتي البراسج وانطردتي وانه الي اطرده ما الفي مرة ثانية .
جاوبته : بس يا شيخ انت شفت كدامك شلون طعنتني بالقلم والله اني من رحت منكم حتى تسممت بس غير انتوا ماتشوفون .
جاوبها بهمة : واحنه مو ثولان احنه تربايت دواوين نعرف منو الغلطان ومنو البريئ وترى هاللبوه ما تعارك السحالي اله مغثوثه منهن .
ام سحر كالت : انت شيخ ونعم منك ومن كلامك على
راسي بس انتَ منحاز لفريحة
رد عليها ببتسامة : ما يلوك الها تكسرين اسمها خويه وانه على الحق فرحتنا بريئة ولو لسانها طويل انه اذا امي باطله اكلها انتي على باطل
سحر بتمسكن اي يمكن ما تنحاز الها بس هي عندها حظ
رد : عينج ام فاطمة عينج لا تطكين البت عيين وهي ما عايزه
سحر : شنو شيخ قابل راح احسدها شنو على املاكها لو عماراتها
الشيخ علي الدر : لا والله خويه بس ثلثين المكابر من العيون واحنه يعز علينه نفاركها .
سحر : هو اني دوم ما عندي حظ لان اني ام بنيه وهي جابت ولد لهذا السبب انتم متمسكين بيها واني طارديني .
الشيخ بغضب : وانتي شنو موقعج من الاعراب انتي دخيلة على باطل لا اكثر ولا اقل انتي اخذتي زوجها وخلفتي منه وكسرتوها .
كمل بحدة : شنو تردين نتحمل اخطائج يوم التزوجتي حمدان وهو متزوج وعنده ولد ؟ باعي كلمن يتحمل نتيجة اخطاءه ومحد يحمل ذنب غيره وكل لشه تتعلك من كراعها احنه اذا وكفنه وياج نكون ضلام وانتي اختاريتي هالطريق وكملي الوحدج .
بحزن مصطنع : ليش اكمل لوحدي اني محتاجتكم سند الي اني ماعندي احد غيركم .
_ ولج بووووويه انتي غلطااااااانه وحمدان غلطااااان هو لو ضال بعد كم سنه ما هجمتي بيته والواكف بعينه هل بذره المسكينه الخلفتيها والتحتاجه يوصل الها للباب وحقها اخذتي وزايد واحنه ان شاء الله ما نقصر ونروح ونجي عليها .
واصلا حتئ عيب تدخلين بيتنا انتي مرة اجنبية واحنه عدنه ولد والشيطان ما مات بس انتي ممنوعه من الدخله البيته
_ وهذا الشي ليش ماينطبق ع فرح بس عليه اني ؟
رد عليها بهدوء : باعي خويه فرح عاشت ويانه تاكل وتنام وتكعد متعودين عليها ومحد ينظر الها نظره دونية مو مثلج غريبة وتضلين غريبة وانتي حتى بزواجج غريبة واحنه فرح نعرفها ونعرف اخلاقها ما ترضى بالباطل ولا تحب الحرام .
ظلت تصييح بانفعال : شنووو شيخ قصدك اني ساقطه .
رد عليها برفض قاطع : لا لا اسمحيلي انه ما كلت هييج و بحياتي كلها ما الفظ هيج اشياء
بس اكو مثل يكول الي ما يعرفك ما يثمنك واحنه ما نعرفج اجيتينه فجأة .
واحد من يريد يخطب غير يسال عن الاصل الفصل ويكولون الساس نداس والعرق دساس واحنه لا خطبنه ولا عرفنه اصلج ولا فصلج ولا خطبناج فتعذرينه مثل مكتلج الميعرفك ميثمنك احنه فرح نعرفها ومثمنيها .
بزعل : اني طالبة السماح منكم والله غلطت بس حقدت عليها ضربتني وتسممت وغلطت على امي واجينه نعاتبها طردتنه .
_ اي مسامحينج والنفس راضيه عليج بس احنه ناس منحب المشاكل وما عايزين وانتي شنو الج عدنا خط المحبه انكطع واندفن اذا حابه روحيله للنجف .
ويله هذا اخر كلام عندي كال هيج ووكف على حيله ولف البشت مالته ..
وكمل كلامه : اذا خلصتوا توكلوا بويه ..
موج ..
قلبت عيوني بضجر وكفت ثواني هو صعد كم بايه واجه عليه يباوعلي و عيونه الملتهبة بشغف وهيام .
شتريد اعرفك تعرفني تصيح عليه ؟
رفع حواجبه بصدمة اهاا صدك عود بسرعة نسيتي العشرة المكالمات واللايكات والحظر .
وظل يغمز ..
فتحت عيوني متعجبة : عزاا بعينك شوكت انطيتك لايك اني ليش تجذب ؟
رفع حاجب ونزل الثاني : شسوويلج اذا انتي ذاكرة ذبانة بسرعة تنسين .
ومد ايده لزم خشمي جعصه . نترت ايده وصعدت كم باية ..
ضغطت اسناني كتله : لاتلزمني احذرك انت مو جنت تخابر مرتك شكو لحكتني!
اتسعت ابتسامته : لا يابه منو يكول جنت اخابر مرتي هذا واحد صديقي دكتور روسي .
حجيت بنتر : اي يلله روح كمل مكالمتك ولا تتبعني ..
عفته وصعدت اشوف فرح ..
وصلت الغرفتها دكيت الباب ودخلت شفتها ممدده على السرير وبصفها ريلام و يمها دانيال ، ابتسمت رحت حضنتها بوستها وسلمت على ريلام واخذت منها دانيال هي ترخصت وطلعت ظليت اباوع الوجه واتامله تعبانه حيل وجهها شاحب بشكل محزن .
سالتها فرح شنو ليش هيج وجهج شصاير بيج
كالت احجي لج بعدين كوليلي بابا شلونه .
بابا زين زين طلعنا من المستشفى انتي شصايرلج
كالت بنتر لا مو كتلج السعلوات ضربني
الشيخ بس سوي غير شيء .
شهكت : عزه شنو سوا الج ؟
ابتسمت بسخرية وظلت تحجي الي صار بيها
ظليت اكمز من الخوف لا عفية شون هيج يسوي بيج اووي شون تحملتي مايدري بيج مريضة .
كامت على حيلها مايدري مايدري ، وين هو اريد اروح اتعارك وياه لانه ماكلي بابا تعبان و بالمستشفى و عرف بللي سويته .
ها يا خلينا بالمهم هسه لا يروح يعصب عليج مره ثانيه ..ويحبسج بالمخزن .
ردت برفض : لا لا ما يعصب عوفيني خلي دانيال يمج راح اروح اشوفه وينه .
خلتني وحدي بالغرفة وطلعت ، انتبهت عليها
كوة نزلت من السرير وكوة تمشي .. موتنني قهر عليها .
فرح ..
طلعت من الغرفة ودانزل جوه ، بس احس اطرافي ترجف والصداع ملازمني ، عيوني احس راح تطلع من مكانها .
انصدمت لمن سمعت صوت سحر وامها هنانه جوه هسه الصبح طردهم وهسه جايين وكاعد ويسولف وياهم شون يريد يجيب اخرتي والله اني بسببه راح انجلط انفجر واطك واموووت ..
وكفت ولزمت بالحايط واحس رنين بأذني يمنعني من ان اسمع زين ، غمضت عيوني وجريت نفس بقووة .
واني واكفة فوك على البايه قبل الاخيرة .
اتمنى اسمع شيحجون بس ماد اسمع زين ولابيه اكمل انزل جوه ..
اووو شعليه بيهم مو اني راح اولي من هذا البيت شكو مهتمة .
باوعت شفته ديصعد ..
لا اراديا مني كعدت على البايه بتعب ، دا اريد اكوم اجا هو بسرعه وصل يمي وكومني
وكال بهمه
شبيج كاعدة هنانه..
جاوبته بلسان ثكيل بس بحدة
_ يعني شبيه معقوله انت مو الصبح طردتهم وهسه كاعد يمهم وتسولف وتحجي بس كوللي انت شنو.
احس ذبحني بنظرات مهددة تامرني بالتوقف عن الكلام والهذيان ..
وارداف بحدة .
_ على كيفج على كيفج انت شدعوة هلكد متحملة ؟ ماتكليلي ! هسه انتي بيا حال حيري بروحج.
همست بتعب انته بسببك انته ولو اني مجايه عمود احجي وياك عنهم معليه منهم لان اصلا طالعة من هذا البيت وانت هذا بيتك شماسوي بي سوي بس ليش مالتزمت بحجايتك ..
كلت هيج واني اشح بنظراتي منه لان حسيته ثار .
بصوت مصرور كال مو انه الي مالتزم بحجايتي سمعتيني شحجيت وياهم لوولا .
كال اخر كلمة بنتر ..
ظليت اتلعثم واصلا لساني ثكيل بالكلام كتله مو موضوعي معليه احجي وياهم الي تريده بس بابا مريض وواكع وانته جذبت عليه ولا كتلي .
خزرني بنظرة اخطر ونطق وهو ضاغط على اسنانه ..
هو منو اللي مكذب عليج اشو انت ما تعرفين تحجين حجايتين بيهم خير ؟ على كيفج فكري بنفسج شويه انت تعبانه فكري بابنج على الاقل مو اله بنفسج .لو عقلج ماتعرفين تشغلينه ؟ بينما لسانج بي كي سي مايلحكه .
ارتبكت اكثر احسه مسيطر عليه وهمين فشلني
_ يعني فرضا صار على بابا شي واني مادري وانته ضام عليه ؟
_ ما احد راح يصير بي شي غيرج انت شايله الدنيا على راسج نزليها شويه وارتاحي ما يصير هيج راح تنجلطين او يصير بيج شيء منو يفيدج بعدين .
_ ع الاساس مجلطتني انته وبعدين شنوو قصدك بابا مايفيدني ؟؟
احجي ويا بخوف وتوتر بس معصبة منه ولازمة بالحايط..
غمض عيونه بصبر مفقود وفتحهم : انتي شون تفتهمين الكلام بس كليلي ؟ انطيني طريقة اخليج تفهمين حتى استخدمها ويا ، ولج منو كلج اقصد ابوج انه ؟ ماتشوفين نفسج شون متحملة زايد!
_ ما لك علاقه بيه حتى ما اريدك توديني للطبيب اختي هنا هي اللي راح توديني .
كال بعدم اهتمام : خلي توديج هيه وخلي شرار يروح وياكم ..
دااكوله ميحتاج بس هو تجاهلني وما انطاني فرصة وعافني وراح ..
موج ..
دخلت فرح متعصبة وكوة تمشي ، رحت سندتها بأيد ودانيال بيد اللخ وظليت اهدي بيها ..
_ على كيفج شسالفة ..
ردت ولج اني جمر صايرة وهو اببببرد من الثلج حيموووتني دخيلك ياربي ..
علي كيفج اهدي شوي ..
قاطعتني انت ويا منو جايه ؟ لو وحدج جيتي بسيارة بابا!
رديت احمد وصلني و راح يدور على علاج البابا ماكو من الصيدليه اللي يمنا وبعدين يرجع ويجي يشوفج
جاوبت يولي خابريي ليجي يوصلنا شرار للطبيب نسوي رنين ومناك اروح وياج البيتنا ، ساعديني خلي اغراضي بالجنط خلي اخذهن وياي .
جاوبتها اهو خلي احمد ياخذنا ما اروح ويا شرار اني...
_ دولي ما اريد نكسر حجاية العرندس مالي خلكه ..
_ ها بس منو شنو بعد عرندس ..
_ هذا اسم من اسماء الاسد نفس الوقت الممثل اللي بمسلسل فوارس مدري كواسر مدري جوارح اللي مسوي نفسه شجاع وبطل وكذا وانا اقصد بيه علي الدر..
ضحكت على سوالفها ومليت الها الجنط واخذتها و طلعنا من الغرفه بعد ما بدلت ملابسها سمعنا صوت بالصاله سألتها عدهم خطار ؟
رفعت تك حاجبها وجاوبت : اي السحلية وامها
منو ذول اليوم كلهم محيونتهن هههههه
ضرتي عشتو وامها الحية ..
يااا لعد خلي نطلع من باب المطبخ بلا مشاكل
هزت راسها وطلعنا شفنا سيارة علي الدر حركت من وطلعت باوعنا شرار وين ماكو مو ع الاساس يوصلنا ..
اشرت كالت ذيج سيارته راح اكعد بيها ..
راحت هيه واني خابرت على احمد اخويه ...
وره دقايق طلعت سحر وامها من البيت..
هي اشترت لي وكالت هذه ضرتي عشتو
باوعت عليها والله حلوة سحر مو قاصرة بس مبينه خبيثة .
باوعن علينا و امها كالت عيني عيني مسويها محترمه فدنوب وشوف اختها شلابسه بعد شويه وتنزع...
باوعتله شفتها عبالك ميته وما دافنينها وجهه جنه مخدة مال خبز هلكد منافخته وسوسلي الشيطان بهاللحظه اخذ اللفاف الشتوي مالتي الي مخليته على رقبتي واشنقها بي .
التاتو مال حواجبها ساحبته يمكن الاذانها الله لا يكذبني ، واني كنت معصبه حيل نار تاكل بيه منا عرفت بيهن ضاربات فرح ومدمماتها .
ومنا بعد ما سمعت صوت ضحكة شرار وهو يتصل بالتليفون ضجت منه وكرهته ، بهذه اللحظه بس افكر اعتقد كان يخابر زوجته ويضحك وياها واني عباله يريد يسويني لعبه يلعب بيها .ويقضي وقت وياهه ..
كتلها بعصبية وقهر ونار تاكل بيه مثل الحطب..
_ شتقصدين ولج .؟
ردت سحر : ولج شنو احترمي نفسج احسن مرة كد امج هايه ..
رديت : واذا بكد امي خل تحترم نفسها ، يمها بكربهه اني وبعدين شجابها على امي تقارنينها بيها تروح فدوة الها .
تقربت كم خطوة وتنتر بعصبية : والله انت كلش ماتحترمين تردين واحد يعلمج الاحترام من اول وجديد شلون علمنا لاختج نعلمج مجانا تدللين بس كولي.
رديت بغضب وصياح: شوفوا منو يحجي عن الاحترام عشتوو انتي لازم ناسية نفسج انت الي تزوجتي واحد متزوج وعنده ولد واخذتي من مرته تعلميني اني الاحترام علمي روحج بالاول .
واني دااحجي صار كدامي شرار ، لا من صدك كرهت نفسي وحسيت بروحي متناقضة احجي عليها واني بمشاعري انجرف لشرار وهو هم متزوج وعنده ولد ياربي لا تخليني من الي ينهي عن فعل ويسوي نفسه .
هو اجه كال شكو شنو هالصياح هنانه ؟؟
ام سحر جاوبته : تعال يمه شوفها شلون نهدت بينا هاي ام شعر عبالك بيت الخلفوها .
هو ظل يباوعلي درت وجهي منه وعدلت شعري بغرور .. وكوة اتنفس واحس حرارة تطلع من خدودي .
هو تقرب منهن وكاللها بنتر : خلصتوا مو ؟ يله حجية كلام الشيخ جان واضح رجاءً احنه ناس مانحب المشاكل اخذي بنتج وتوكلي .
ظلت تفر بيدها هيه واخذت بنتها وطلعت واني
رحت لفرح جانت كاعدة بالسيارة وتتفرج بس معصبة وبقمة غضبها حسيت حيصير بيها شي . كعدت بصفها
جرت نفس كوة كالت طلعيلي تليفوني من الجنطة
خليني اخابر على علي الدر نسيت اكول راح اروح وياج لاهلي ..
طلعت تليفونها وانطيته الها ، اديها ترجف وتطلع بالاسماء ، خطية جانت كوة ساطتة عنهن يمكن ماتريدهن يشوفن لسانها شون صاير ثكيل ومتكدر تحجي ماتريد تبين ضعفها رغم هنه اكلنها اكل بنظراتهن .
مهيب ..
ظليت ابيت عمي حسان كاعد اقلب بالرسائل ، رسائل هواي حاجيات اشكال والوان واني راح اتاخر عن شغلي شمرت التليفون رحت للحمام وغسلت وجهي و حسيت بندم باوعت الايديه يا ربي شسويت اني ضربتها اذيتها انقطعت ايدي و لا مديتها عليها ..
اني اعرف ريلام بريئه ليش سويت هيج و ليش استعجلت ، كرهت حالي رجعت للصاله شفت عمي حسان دخل للبيت .
باوعلي بغضب كال : ليش جايب هالطفله هنا ومشبعها كتل شنو شفت عليها احجي ..
كمت على حيلي اخذت سترتي من ع القنفة وتليفوني
وببرود جاوبته غير مرة احجيلك بس خل اتأكد ..
اجه يمي ضربني على كتفي وعاط
_ لك لا تصير كذاب ما تريد تحجي تتهرب موو
عبالك ما اعرفك احجي شصاير ، واذا ممتأكد شكو جايبها هنا ومشبعها كتل!
فركت جبيني بالسبابة والابهام وغمضت عيوني ثواني
_ عمي دخيل الله اتركني هسه تعبان وما لي خلك.
بعصبية تقرب مني اكثر ونتر : جيب المفاتيح ولك .
_ يا مفاتيح تقصد ؟
_ مفاتيح البيت هذا لاتصير غشيم بعد ما لك دخلة هنا الا باذني مو جايبها الطفله من هناك لهنا شابعها كتل وببيتي .
طلعت المفاتيح وانطيتهم له ..
كال هيج رباك ابوك تجيبها هنا تنفرد بيها وتضربها على شنو بالله .
ا كول عمي حسان لاتستغل الي صار حتى بس تفتح موضوع وتطلع حركتك بابوي لان انت ضايج منه فرجاءً خلي ابوي بحاله .
كال بنبرة تهديد هيج صارت مو ؟
كتله بحدة : ايه هيج ..
طلعت من يمه افكر شلون انتقم من مرتضى مومال اروح واضربه لا ماريد افضح ريلام اريد اخلي بس يتندم على اللي سواه بدون ما اسيئ لريلام ولو بحرف واحد ..
اجرت تكسي وطلعت رحت اخذت سيارتي ونسيت اسال عمي حسان وين وده ريلام اكيد رجعها للمدرسه .. هيه سجاجة وماتفوت الامتحان .
بطريقي لشغلي تذكرت ميسلون شرطية ويانه
بس هي اللي راح تكدر تساعدني ، جريت التلفون وطلعت رقمها .
خابرتها اجاني صوتها الو
رديت .. هلو ميسلون
ردت بدلع هلو مهيب هلو شلونك شلون صحتك
اليوم ذاكرنا شعجب ..
ضحكت .. والله محتاجج ..
_ توقعت انت ما تتصل الا لمن تكون محتاجني بشغله
.. و لج ليش تصيرين بذاته نسيتي وكفاتي وياج
_ لا ماانسى بس انته هواي تبيع ثقل لاترد ع المسجات لا ع التعليقات ..
_ ولج هو اني شايف دربي الله يخليج ..
_ الله يخليني الك بس مكتلي شنو تريد مساج؟
رديت متفاجأ : ...اششش هالكلام وكت مساج ماكو غير شغله طالعه من عقلج المنحرف
_ سيدي مهيب انت تامر وتدلل اذا مو انت اخدمك اخدم منووالله امنيتي احط راسي على صدرك واشبع منك حنان
رديت بصدمه...هاااا هااا على كيفج يمعوده يا صدر يا حنان يا جنان يا جليلة يا فاطمة .
ردت بسرعة ؛ مهييب احبببك
ضحكت وبصوت عالي جاوبت :- ...ولج انت تحبين السلك العسكري كله ما خليتي لا مقدم انور ولا عقيد اياد وحتى شرطي اول خليل حبيتي
ردت بدلع : كلب والده شسوي
تمتمت : قصدج كلب كوستر ..
_ بس والله انت اكثر واحد حبيته اله ذولاك شنو واحدهم شواربه جنهن عش مال حمام
_ شكرا ميمي من ذوقج هسه عوفينه من سوالف وتعاي للمهم
اكو واحد اريد ادخله سجن واريدج ترفعين عليه دعوه بان هو متحرش بيج
ردت بجديه...واغتصبني مرتين
... هااااا هااااا ميس مو هيج تذبين مصايب مو تهايم مجرد تحرش يوم يومين ويطلع
كالت بدلال تتدلل تدلل كم مهيب عندنا .
ما يدلل عليج ظالم اوكفلج بعرسج ان شاء الله..
ضحكت بغنج و دلع : اذا عرست منك راح تصير احلى وكفة والله ..
_ لا يابه ، الله يرزقج اللي احسن مني ..
_ وين الكى احسن منك بالجبس ..
_ تلكين تلكين وهسه يلا لازم اسد لان اني راح اوصل..
_ الله وياك سيدي توصل بالسلامه ان شاء الله
وصلت لشغلي واني اصلا مترخص من الضابط حمود عمود سيارتي ، اول ساعات الشغل ما مركز وافكر بريلام .
بعدها رحت استريح ، اخذت التلفون وفتحته على حسابها والحجي هذا الساعه بثنعش ونص الظهر
معناها هسه هي بالبيت تفاجات الحساب مسوي خروج من جهازي .
الكلبه غيرت الباسورد فرت وعصبت حيل
دكيت رقمها و اتصلت بيها بعد عدة مكالمات ما ردت يمكن بعدها خايفه او اكيد ضايجه مني
بعثت الها رساله ردي لا احركج.
وصلت الها الرساله وبعد ثواني رجعت اتصلت بها اجاني صوتها الزعلان و المتعذب.
_ شو تريد مني مهيب شنو تريد ما كافي اللي سويته بي قبل كم ساعة!
جاوبتها بعصبيه ليش غيرتي الباسورد ولج ؟ شنو اللي خايفه منه شنو عندج .
ردت بنتر ما عليك بيه خصوصياتي هذه مو من حقك تحتفظ بحسابي مو من حقك
اخر كلمه كالتها بصياح .
جاوبتها ادبسسز نصي صوتك ما مسويه شي مو ؟
لا عاد شنو جنتي تسوين بسيارته؟
جاوبت بنحيب : جنت مجبوره .
ضحكت باستهزاء : سولفيها للدبه وهسه صوري لي المحادثه اللي وياه مرتضى ودزيها اللي بسرعه .
جاوبت بحديه بس صوتها يرجف
_ حذفتها والله اذا بعد عدتها و ضربتني يا مهيب الا لا اكول لخالو عليك واذا خالو ما وكفك عند
حدك الا اروح العمامي اشتكي عليك والله اني مو تايهه الك ولا مقطوعة من شجرة تكفخ بيه اني واختي محد مخليك مسؤؤل عنه عندك شي كول لعمامي او لخالو .
افتهمت ...
بسخرية رديت وضحك : ها صايره سباعيه وتريدين و تهددين وصليها العمامج او ولابوية وشوفي شراح يصير لمرتضى .
ردت متعصبة : ما يهمني خلي يصير اله الي يصير
و انته ويا همين اثنينكم اذيتوني.
غمضت عيوني وبزفرة تدل على صبر مفقود .....
نطقت بشتات متماسك : سهلة ريلام سهلة يتدلل مرتضى ..
سمعتها بجت و سدت التلفون دموعها تجوي قلبي بنار تسعر اذيتها اليوم اذيتها ..
بقيت انتظر للعصر جابو للمركز ، طلبت انه احقق ويا
فتت لغرفة التحقيق وشفت بيده الكلبجات .
هو انصدم كال بصوت يستنجد بيه : مهيب بريء وداعتك اصلا البنية ماعرفها .
فتت من كدامه كعدت وره الميز وصعدت رجليه فوكه ظليت اباوعله ثواني بحقد وكره هو مثل الي حس بيه ضامله ضميمه ابن منطقتي ويعرفني "وعود" اصدقاء وصارلنه سنين سوى .
ظليت احاجي بعيوني ولك بسببك اليوم اذيتها ضربتها بقسووة ودميت شفتها الاحبها ..
كمت من مكاني ورحت وكفت كدامه خليت اديه على الميز الي كدامه وميلت نفسي عليه
هو سألني شبيك مهيب نظراتك مو عاجبتني صاير شي!
حجيت بنبرة وعيد : تريد تقنعني انته ماتحرشت بالبنية ؟
لا والله وداعتك ولا حتى اعرفها شبيك مهيب قابل متعرفنيى؟؟
لزمته من ركبته خنكته حيل رفعته احس غضبي ينطيني قوة ويرفع هرمون الادرنالين ..
همست بفحيح : اي اعرررفك لك كلب خسيس لك حتى ريلام اشكت منك .
وهو مخنوك تمتمت شفايفه ر يل ام ..
نزلته وضربته على حلكه وعطت لك لاا تلفظ اسمها بلسانك الوصصصخ ك ****د
تكلم بانفاس مسحوبة : اني ر ايده ااا بالحلا ل بس ب س انته واكفلي حج ررر عثرة ..
نترت بي اطييح حظك اذا وصلتلها بعد لو حاجيتها لو بس اشوفك يم مدرستها ادفنك بأرضك والله ..
ابتسم بسخرية وبلل شفته المدماية
هسه افتهمت انت لفقت هاي التهمة عليه مو مهيب ؟
رحت كعدت بأريحية ورة الميز واباوعله بسخرية وكره
هز راسه بوعيد وكال اني اريد اجي اخطبها من الشيخ ومعليه بيك مدام وصلتنه لهالمواصيل مهيب جنت محترمك اني بس هسه بعد مادير لك بال ولا عليه بيك ولا جني اشوفك الكلام ويه الشيخ وبس انته ماعترف بيك .
كمت على حيلي وكتله انته تعال واوصل واخطبها وشوف اذا ما كسرتلك رجليك ..
خليتهم يودونه للسجن واني كملت باقي شغلي وطلعت .. دااروح لسيارتي بالكراج ، سمعت صوت ميس ورايه .. التفتت شفت وياهه البنية صديقتها جمانة الي اشتكت على مرتضى بتهمة تحرش .
البنية بصراحة حلوة وصغيرة وجذابة عيونها ناعسة وعسلية شعرها قصير لايك الها لونه يضرب على عيونها وينطيهم لون مماثل .
جانت تباوعلي بنظرات اعجاب واني للحظة مكدرت اوحر عيني منها بسبب جمالها بس القلب مو يمها ابد
يم ذيج القاسية العنيدة المعذبة لقلبي .
انطيتها فلوس على اتعابها بالتالي ماكو شي ببلاش
وكتلها اي شي تحتاجوا اني حاضر ، صعدت سيارتي
ورحت للبيت الوقت جان المغرب ، عمي حسان هسه نايم اكيد بعد شويه يطلع بس اني ضايج منه واريد اروح لبيتنه احجي ويه ريلام واشوفها .
رحت للبيت وقت صلاة وهدوء ، صارت عيوني تترقب وقلبي ينبض بقوة مخيفة ، دورت عليها ، سمعت صوت يم المغسلة ، اخذتني رجليه لا اراديا طليت شفت وحدة منهن اقتربت منها باوعلي بس شافتني اجت تروح وعافت المي مفتوح .
قطعت عليها طريقها لزمتها من زنودها ، انتفضت ورجفت خايفة عبالها راح ارجع اضربها بس اني ثبتتها ع الحايط وظليت اباوع لوجها لشفتها مكان وجعي وصرت مركز بنظراتي عليها ..
سألته وجعتج مو ؟ ما تكفيج كلمة اسف ! مو ؟
خلت عيونها بعيوني تحاول تتحرر من سجني وقيودي
وبحدة جاوبت : لأ ما تكفي وخليها ابالك مهيب مو غصب احبك مووو غصب .
لا اراديا وخرت اديه منها وابتعدت عنها كم خطوة ..
بخيبة .. وشنو تريد يا قلبي! تستقبلني بالاحضان واني اليوم مأذيها ومددمها!
بقيت ساكن واباوعلها بهدوء وقلبي مورث عليها ..
شحت بنظراتها مني ببريق اجهله وكملت كلامها
عمري مراح اسامحك على الي سويته بيه اليوم!
ولازم تعرف اني اتزوج شوكت ماريد والشخص الي اريد بس ماتزوج تقليدي ولا هسه اريد اكمل دراستي. واليوم ماسويت شي تريد تروح تكللهم كلهم كللهم مخايفة .
ضربت ايدي بالمغسلة هي جفلت ودتروح لزمتها
الي صار اليوم مراح يتكرر ورهف تقطعين علاقتج بيها .
ما اخذ اوامر منك اني انت مو الأمر مالتي روح مشي اوامرك على الي جوه ايدك بشغلك مو عليه اني .
ررهف راح تبليج وتوكعج بمصيبة وساعتها ماراح ارحمج ريلام مراااح ارحمج!
باوعتلي باستنكار وراحت تركض .. طلعت من يم المغسلة صار ابويه بوجهي ابتسمت اله بتوتر
وسلمت عليه .. رد عليه وكال شبيك صاير شي وجهك معاجبني .
ها لا يابه ماكو شي بس صدك شتسوي بموضوع قبر عمي الله يرحمه ..
ابتسم كال خلي بمكانه وصيت الدفان يبني القبر وان شاءالله بس اشوف صحة فرح شلونها وشلون راح تصير اروح اله ازوره .
ليش يابه هم ناوي تاخذها تدليك ..
ضحك لا بويه مايحتاج بعد انه اخذتها اعاقبها والا مايعصى عليه الكى كبر اخوي بس هيه تعبانة صحتها وصديقي البروف كال احتمال تختاج عملية حسب تشخيصه الها .
صدك ماتستاهل فرح خطية بس عملية شنو ؟
احتمال عدها شرايين مسدودة براسها او متضخمة بس بعد ما متأكد لمن تطلع نتيجة اشعة الرنين .
الله يهون عليها ان شاءالله بسيطة !
تحسر وهمس ان شاءالله ..
ترخصت منه وتوجهت لغرفتي .. وكلام ريلام على بالي يضرب باسماعي كل شوية ، غيرت ملابسي .
شلون اكدر اخدر عذاب قلبي ..
واني بكل يأس احبها .
تمددت على السرير ، تلحفت خيبة قلبي ونمت ..
هدى .. ..
ردت اسولف ويه موج على شغلتي ، احسها مثقفة واعية وتفتهم بس طلعت ملحكت عليها حرامات ..
وبالليل عمو الشيخ صاحلي ورحت يمه بمكتبه ..
دكيت الباب بهدوء سمعت صوته تعالي بويه ..
دخلت هو ابتسم بوجهي وكام من مكانه
وكال تعاي بويه كعدي هنا ..
رحت كعدت وهو صار كبالي ع الكرسي الي بجانب المكتب ..
كال : شلونج بنيتي هداوي ان شاءالله مرتاحة ويانه ؟
دنكت وهزيت راسي وهمست الحمدلله عمو بخير ..
كال : انه ادري بيكم انتوا ولهيب مو على اتفاق ميخالف تصير لاتهتمين ولا تضوجين خلي كل شي للوقت يجي يوم يحبج ويتعلق بيج وتصيرين اله زوجة حقيقية ..
سكتتت واستحيت اكوله هو مايريدني وخايفة من موضوع عذريتي ، قلبي ظل ينبض بسرعة وانفاسي انخطفت مني .
هو كمل كال هو جاي يلح عليه يريد يسافر بس انه ما اخلي ، اريده يقضي وقت اطول وياج يتعلم عليج ويتعود حتى من يسافر يروح ويرجع مشتاقلج وملهوف عليج .
شهكة صغيرة طلعت من حلكي فعلا جنت بهاي اللحظة اريده يسافر وجوده قالقني ..
جاوبته ورجفة بصوتي : لا عمو خلي يسافر عادي واني هم اريد اروح يم اهلي ابويه تعبان هالفترة اريد ابقى يمه اذا تسمح .
جاوب برفض : لا بنتي اذا تردين ترحين لاهلي انه اوديج او هو يوديج ميخالف بس مو هسه يسافر بعدكم ماصارلكم شهر من متزوجين شي ثاني انه ابوج ماعندي بنيه وانتي بنتي اي شي تحتاجينه تدللي بس كولي واذا لهيب اذاج لو مس شعره منج بأذى بس كليلي .
فرحت لكلامه تمنيت اكدر اكوله بس مستحيل مستحيل اخجل واستحي .. تشكرت منه وطلعت
صعدت لغرفتي كعدت على السرير ميتة قهر ..
ضجت لوحدي ، رحت يم ريلام وهيام ..
كعدت يمهم سألت ريلام عن شفتها ليش وارمة ..
حجتلي الي سوا بيها مهيب شهكت من الصدمة شنو هالقسوة الي عدهم ..
هيام جانت على السرير متمددة اختها تسولف وهي تضحك ...
سألتها امج ماشافت حلكج ؟ ما سألتج ؟
جاوبت بقهر : بلي سألت بس اني كتلها طالعتلي حباية ..
عفتهن يقرن ورحت لغرفتي ، صارت ب ١١ .. بالليل
انفتحت الباب وطب لهيب .. فز قلبي متتت من الخوف وكعدت على حيلي واعدل بشعر وملابسي .
هو باوعلي وابتسم كال بنبرة استهزاء
لتخافين مو سكران الليلة شبيج خفتي ؟
وغمزلي .
درت وجهي منه جاوبته مخايفة منك اني وها صدك ابوك كال انته تلح عليه تريد تسافر عادي سافر اني ميهمني تره واني همين اروح ويه اهلي للسماوة .
خزرني منيلج هالحجي ؟ ما ترحين اله تعترفين بكل شي يله .. لاعبالج اني غشيم ومادري بيج ضامة شي عليه وماترديني اعرفه .
شمرت البطانية وبعصبية وارجف : ماعندي شي اعترف بي مااااعندي خووش فكني الله يفكك .
شمر السويج مال سيارته واجه يمي ع السرير
قيدني باديه القوية والضخمة وسحبني اله حيييل .
تكلم وهو يضغط على اسنانه ..
_ لا تصيحيييين وهسه اعترفي لو نصير اصدقاء ساقطين وهتليه انتي اختاري ام خدود!
يتببببببع ..
الفديو من ابداع meme60302416
طبعا بالنسبة للبث سويته لمتابعين الفيس لان حيل متفاعلين ع القصة بمنشوراتهم فديتهم ويستاهلون ❤
شكر خاص لجيرانا ام جمووونه halolo96
😁جيرانه الماشايفتها بس ان شاءالله نتشاوف .. طبعا اشكرها ع الاغلفة الحلوة الي تسويها للقصة ..
وشكراا للكاتبة الجميلة alraawih ع الاغلفة الرائعة
ولجنتي المستقبلية 😂 princess_diyar ..
واشكر كل الي دزولي اغلفة وللاسف ماعرف حساباتكم بالوتباد ..
طبعا ماراح اطلب منكم تصوتون وتتفاعلون بس اذا يبقى التفاعل هيج اغير النشر اسوي بين يوم ويوم ...
🙂
حاليا النشر يومين انزل يوم استراحة