غير حبك يا بعد ولفك شريد
عايش بكلبي واشوفنك بعيد
تنتهي الدنيا ويظل حبك جديد
وشوفتك شبه البدر يوم التمام
:::::::::::::::::::::::::::::::::::::::::::::::::::::::::::::::::::
احمد:شكلت
صلاح:كمره راح تروح من ايدينا شيخ
اخيتي وبنيتي ورفيجتي راح تروح شيخ
راح ينحرم ابنها منها شيخ
احمد:كافي لا تحجي هيج
مستحيل تعوفني وتروح هي انطتني وعد وكالت ما اعوفكم
وسام:اباوع لأحمد وجه احتقن وانكلب احمر وخشمه طك دم ركضنا علي راد يوكع ما خلانا عافنا وركض لغرفة العنايه الي بيها مرته لحكنا علي
عادل:احمد بعد اخوك امشي نقيس ضغطك اكيد صعد هسه ومرتك جاي يسعفون بيها لا تخاف عليها هسه يطلع الدكتور ويطمنا
احمد:احس حيلي انهد وما كمت اشوف كدامي شي حجيت
عوفوني معليكم بيه خلوني هنا
عمار:احمد حاجينا لا تسكت فدوه
احمد:ما بيه شي
بس عوفوني اولي انه بس كون هي ترجع
ربي دخيلك اريده منك ربي ما اكدر اعيش بدونها
ربي ارحم بحال ابنها ربي لا تحرمنا منها
شويه وطلعوا الدكاتره وركضنا عليهم
الدكتور:الحمدلله هل مره عدت سلامات ورجع النبض لكلبها
منا لباجر اذا استمر على وضعه تكون عدت مرحلة الخطر وإذا رجع وكف
معناها تحضروا للأسوء وكلشي بيد الله
احمد:"الحمدلله ربي ما قصرت
دكتور خل ادخل يمها شوي حتى لو دقيقه
الدكتور:دكتور احمد اصبر منا لباجر ما ظل شي هذا كله مو زين عليها
احمد:يـ؏ـنـي باجر ترفعون الأجهزة عنها
الدكتور:• ﺂنٰ شۨـِﺂءۙ ﺂللـِه۫ہ ٰاذا ما تعرضت لأي حالة انتكاسه
اندعولها
احمد:اوووووف شيخلص اليوم
يارب دخيلك لا تفجعني بيها يا رب سلمتك امري يا رب رجعلي الياها سالمه
عادل:احمد يله امشي ويانا حالتك مو اسؤ من حالتها بس نقيس ضغطك ونرجع وهاي وسام راح يظل هنا يمها
احمد:اخاف اتحرك ويرجع يصير الها شي
عمار:انت مو وكلت امرك لله
ثق بالله ما يصير الها شي ما سمعت حجي الدكتور شكال
احمد:كال منا لباجر يـ؏ـنـي الخطر بعده موجود
كون انام واصحى الكى كلشي منتهي وحبيبتي رجعت الي
عمار:• ﺂنٰ شۨـِﺂءۙ ﺂللـِه۫ہ ٰترجعلك اتفائل وخلي إيمانك بالله جبير
هو كادر على كل شي
احمد:ونعم بالله
عادل:يله خويه امشينا
هاي اهلها كلهم هنا وسام هنا لا تخاف واحنا بنفس المستشفى امشي لا يصير بيك شي
احمد:أخذوني وقاسوا ضغطي لكوه مرتفع كلش
ركبولي مغذي وضربوني ابره بعدها حسيت بنعاس وغفيت
كعدت مخروح وفزيت من حلم يخوف
الشيخه:اسم الله الرحمن ماكو شي يمه هذا كابوس
احمد:يمه شجابج هنا
الشيخه:شلون تريدني ما اجي من كلولي اخوتك عليك وعلى مرتك وانه تسودنت ردت بس واحد يجيبني هنا وخابرت على شداد هو الوصلني
احمد:والطفل وين عفتي
الشيخه:كلبك على ابنك
احمد:شعبالج يمه انه اكرها هذا ابني
بس ما ردت اشوفه الا وهو بحضن امه
الشيخه:• ﺂنٰ شۨـِﺂءۙ ﺂللـِه۫ہ ٰتشوفهم وتفرح كلبك بيهم •ﺂﭑمــۧـٰ̲يـِـטּ يـُـٰﺂ رب العالمين
وابنك لا تخاف علي اجت خالتها ومرت اخوها يمه
احمد:صيحيلي اي واحد يجي يشيل هاي الكانونه
الشيخه:وانت بكيفك تشيلها
احمد:والمغذي وخلص المن ظاله بعد
راحت صاحتلي للمرضه قاست ضغطي لكته زين شوي نازل شالت الكانونه
كمت على حيلي ورجعت كعدت بعدني دايخ
عمار:احمد ارتاح المن كايم
احمد:اريد اروح يمها
عمار:توني جنت يم الدكتور حالتها تقريبا استقرت والوضع شبه طبيعي
منا لباجر تفتح عيونه وتشوف وتتأكد بنفسك
احمد:ما اصدك الا اسمع بنفسي
ادري بيكم تردون تصبرون علي
عمار:صير زين وشد حيلك وانه بنفسي أخذك للدكتور وتسمع منه
احمد:مي خالف مشيني انت وصلني يمها بس خل اشوفها شويه
اخذني عمار سندت روحي علي وصلني لغرفة العنايه شفتها من الجام
ما اصدك باجر يشيلون كل هاي الأجهزة العليج وترجعيلي وتفتحين عيونج الحلوه
عمار:يله احمد شفتها خل نرجع
احمد:اخذني للدكتور
عمار:استغفرالله امشي عمي أخذك
احمد:اخذني للدكتور وكلي نفس الحجي الكاله الي عمار
دكتور الله عليك خو ما متفقين علي
الدكتور:هههههههه
دكتور احمد استهدي بالله هاي حياة إنسان مستحيل اجاملك لو اطمنك جذب
انه دكتور الي كلمتي وسمعتي
احمد:دكتور اعذرني بس المريت بي مو هين
الدكتور:عاذرك وحقك
وهسه ارجع ارتاح وضعك مو تمام
احنا مو نصحي مرتك وانوب تطيح انت
احمد:رجعت للغرفه طمنت امي علي وكتلها ترجع يم الولد لا تعوفه
صح خالتها موجوده بس لازم واحد من عدنا يبقى يمه كلشي يصير بعده طفل نفاس وهي خلته امانه عندي ما اريد تصحى وتلكى صايرله شي
وهي ضحت بنفسه على موده وخليت وسام وعادل يرجعون وياها
بقى يمي شداد وعمار شفته هم تعب كلش يركض منا ومنا ساعه يمي وساعه يمها وكل شوي مودي للدكتور تالي ما انطاني كلبي كلت لشداد مشيني يمها
شداد:خل يستقر ضغطك وانه أخذك
احمد:ما اتحمل بعد اريد اروح يمها
شداد:امشي امري لله بس اذا دخت ارجعك والله
احمد:سندت روحي علي وصلني لغرفة العنايه وظليت مكابلها وكاعد شويه واجى يمي اخوانها ثنين الباقين رجعتم وأبوها تعب وأخذوا للبيت وامها راحت وياه الليل كله مناطر يم الغرفه وكل شويه اباعلها من الجامه عبالك مخليها بسجن وممنوع اي واحد يدخل يمها تالي غفيت وانه كاعد على الكرسي
عمار:احمد. احمد
احمد:هااا شنو صار
عمار:لا تخاف ما صار شي ليش غافي هنا
احمد:ما كدرت اظل بالغرفه شداد وين
عمار:راح للكافتريا
عمار:كوم ارتاح بالغرفه وانه اظل مناطر بمكانك
احمد:ما اكوم ما ظل شي على باجر كلها كم ساعه ويخلص كلشي
عمار:مي خالف بس هيج تعب روحك
احمد:خل اتعب بس كون هي ترجع
عمار:يـ؏ـنـي ما تتحرك منا
احمد:خطوه وحده ما اتحرك منا
ظل كاعد يمي وتالي تعب وراح للغرفه وانه ظليت اناطرها وسمعته اذن رحت دورت على مصلى وصليت الفجر وصليت ركعتين طلب حاجه
واندعيت من الله باجر يعدي على خير وترجع كمرايتي لحضني
بعدها رجعت وما اجالي نوم لحد الساعه سبعه اجت امها وأخوها صلاح
بقى ساعه على دوام الدكتور بس كلبي بهاي الساعه مشتعل نار
ما اعرف شلون خلصت بالاه والونه لحد ما اجى الدكتور بس شافني ضحك
الدكتور:لك انت جكد وفي
احمد:هاي روحي دكتور
الدكتور:• ﺂنٰ شۨـِﺂءۙ ﺂللـِه۫ہ ٰتكوملك بالسلامه
احمد:شفته دخل عليها وكلبي انقبض
يا ربي ما بيها شي يا ربي تعدي سلامات
بدى يفحص بيها وانه اباعلهم من الجامه وروحي مقبوضه شفته اشرلي براسه بأي وابتسم ابتسامة رضا يـ؏ـنـي زينه
ما سيطرت على دموعي بسرعه نزلن كدام الكل الموجودين بالمستشفى
صلاح:خير شيخ بس لا تكول بيها شي
احمد:ما اتحملت شبكته وكتله رجعت الغاليه رجعت كمرايتي
صلاح:الله يبشرك بالخير
احمد:رجع شبكني ودموعه هو هم ظلت تنزل ما مصدكين هاي المعجزه تصير
ام صلاح:الف الحمدلله والشكر ربي ما قصرت
احمد:تالي اجى ابوها وسمع بيها ونزل سجد خطيه
دنكنا علي وكومناه انه وصلاح
ابوصلاح:رجعت بنيتي
ربي الك الحمد والشكر لو ابقى طول عمري كله ما اكدر اوفيك حقك
صلاح:يابه كافي انت مريض كول ياالله لا تبجي
ابوصلاح:بويه الليل كله ما نمته لا تكلي لا تبجي هاي بنيتي وردة بيتي وحيدتي
احمد:تالي طلع الدكتور بسرعه سألته
الدكتور :الحمدلله عدت مرحلة الخطر وشلنا الأجهزة عنها
بس يبقى كلبها تعبان
اهم شي الحاله النفسيه كون مستقره اي اجهاد اي تعب ما يصير الها
شويه وتجي الممرضات تنقلها للغرفه خاصه وانتظروا ساعه لو ساعتين حتى ترجع لوعيها بس يبقى وياها بالغرفه لو شخص لو شخصين على الاقل
النفس الزايد مو زين عليها
والحمدلله على سلامتها مره ثانيه
احمد:الله يسلمك دكتور مشكور وما قصرت تطلب اي شي انه حاضر
الدكتور:هذا واجبي بس اريدك تجي يمي بالغرفه دقيقتين
احمد:خير دكتور
الدكتور :• ﺂنٰ شۨـِﺂءۙ ﺂللـِه۫ہ ٰ خير
احمد: رحت وراه دخلت وكال
الدكتور :تفضل استريح
احمد:دكتور احجي لا تكول اكو شي ثاني
الدكتور:لا تخاف بس اريد أنبهك على شغله
احمد:احجي دكتور اسمعك
الدكتور:زوجتك لازم تمتنع عن الحمل على الاقل سنتين او اكثر
بهذا حملها طلعت بمعجزه بس المره الثانيه ما اصدك تطلع منها
احمد:دكتور بعد لا سنتين ولا حتى خمسه
انه مكتفي والحمدلله وما مستعد اخسرها ما تعرف شنو عشت بهل كم شهر
كبرت سنين لي كدام
الدكتور:لا مو هيج
اول شي لازم كلبها يرتاح وتتعالج ويرجع كلشي طبيعي
بعدها تكدر تحمل حالها حال كل مره طبيعيه
احمد:لا دكتور هذا كافي
الدكتور:ترى زوجتك مرضها مو تعجيزي
خفقان مصاحب للحمل فقط بس لأن تختنك فقدنا السيطره عليها بس تتعالج ترجع طبيعيه ولا تنسى بعدها شابه وتحس بنقص اذا حرمتها تحمل مره ثانيه المفروض توكف وياها وتشجعها اذا طلبت هذا الشي بنفسها
ولا تنسى انتو شيوخ ما ترهملكم بس طفل واحد
احمد:انه ترهملي ومكتفي بمرتي وما اريد اي شي بس هي
الحمدلله ربي ما قصر ورزقني بطفل منها وهذا كلش كافي
وبعد سنتين او اكثر اذا الله راد عود نفكر بس اذا المرض بعده وياها مستحيل اخليها تفكر ولو مجرد تفكير تحمل بعد
الدكتور :اي هذا الي اريده منك
ولا تهمل مراجعاتها وفحوصاتها على الاقل كل شهر
احمد:• ﺂنٰ شۨـِﺂءۙ ﺂللـِه۫ہ ٰ
بأيدي اجيبها الك
طلعت من الدكتور كبل رحت الها لكيتهم مطلعينها من العنايه ومدخليها غرفه خاصه دخلت عليها بس انه
اول مره ردت اشبع شوف منها صح هي بعدها ما صاحيه بس اشوف نفسها يصعد وينزل هذا كلش كافي الي
تقربت منها بست راسها وشفتها واخذت ايدها بستها وطلعت كلت لأمها تدخل تشوفها وتالي ابوها لأن الرجال منتهي خطيه يكسر باب الكلب
حقها ما ألومه هاي على كولته عزيزة كلبه وكلبي
تالي دخلت بس انه وظليت كاض ايده اريده تصحى ماكو اخر شي غفيت على جف ايده
كمره:فتحت عيوني بيها غواش وما افرزن منويمي تالي بديت استوعب شويه شويه لحد ما وضحت الصوره عندي
ما كدرت احرك روحي وجع بطني يموت تالي شفت مدري منو نايم على جف ايدي عيوني مغوشه بس منو هذا ماكو غير احمد اي هذا احمد
ما ردت اوخر ايدي مبين علي تعبان تالي تأذيت كلش الوجع موتني صحت بصوت تعبان
احمد هذا انت حبيبي
احمد:جنت غافي على ايده وتالي سمعت صوته ما صدكت عبالي جاي احلم واخاف أفز وتالي يطلع كلشي ماكو اخر شي كالت
كمره:احمد الله يخليك اكعد
احمد:كعدت وشفته فاتحه عيونها مثل الما مصدك
كمت بست راسها وخدودها وعيونها وشفتها وكل وجها مثل المخروع والما شايف وكلت
واخيرا كمرايتي صحيتي ولج هديتي حيلي
كمره:احمد
احمد:يا روح احمد وكلبه
كمره:وجع بطني موتني
احمد:هسه اصيح الدكتوره بسرعه
طلعت بسرعه رحت صحت الدكتوره اجت فحصت عمليتها وضربتها مسكن واشوفها تتلوه من الوجع فوك ضيم كلبها سالت الدكتوره ليش هيج
الدكتوره :طبيعي هذا الوجع كل بنيه تمر بي لا تنسى البطن فرغت وهي عمليه لازم تتوجع ولا تخاف عليها شويه ويخف الوجع منها
احمد:طلعت الدكتوره رجعت كضيت ايدها وبستها وهي بس تباوعلي بتعب
الحمدلله على سلامتج يا عمري ٲℓانــتيہ
ما تعرفين شفت بهل اليومين تصدكين شفت الموت حالي حالج
كمره:اسم الله ﻋﻠﻴﻚ من الموت حبيبي
احمد:بستها من شفتها الي تنطق حبيبي وكلت
جعل محد ينطق هل الكلمه غيرج
يا روح حبيبج ٲℓانــتيہ
كمره:احمد ارفعني شوي اريد اكعد احس ظهري يوجعني من النوم
احمد:رفعته على كيف خفت الجم عمليتها
كمره:احمد
احمد:عيونه
كمره:اريد اشوف ابني هو وين ليش مو يمي
احمد:بالبيت يم امي
كمره:جيبلياه
احمد:ما تسوى بعد باجر احتمال تطلعين وتشبعين شوف منه
كمره:ما اتحمل لباجر عفيه جيبلياه حتى لو بس اشوفه
كلي هو شلونه
احمد:تصدكين ما شفته
كمره:ليش
احمد:ما كدرت اشوفه وانتي بين الحياة والموت
كمره:هاي عود وصيتك علي وامنته عندك
احمد:ردتج تصحين وبس هذا كل ألهمني
كمره:ضجت من سمعت هيج درت وجهي عنه
احمد:لا دورين هذا الوجه عني ما صدكت رجع الي
كضيته من وجها ودرتها علي وأخذتها بوسه من شفايفها بدخلة امها علينا
ام صلاح:يااا دهر كون هاي شجاكم ولكم هاي مستشفى
احمد:عمه مشتاقلها بعد ما اتحمل
كمره:عزااا جكد انت جريئ شو وخر عني هسه امي شتكول علي
احمد:رجعت بستها وكدام امها وكلت مرتي حلالي لا عيب ولا حرام
ام صلاح:خل اطلع احسن الي والله ما تستحون
كمره:كافي احمد شجاك فشلتني ويه امي
روح جيب ابني فدوه
احمد:رايح اجيبه بس ما يظل هنا بس تشوفينه ويرجع
كمره:ليش
احمد:التعب مو زين عليج وهو طفل نفاس يرادله مداراة وهو الليل كله ما ينام
هسه راح اصيح لأمج تجي يمج على ما اروح اجيبه واجي
طلعت منها لكيت بوجهي صلاح وصيته عليها ورجعت للبيت
الشيخه:خير يمه شجابك لا تكول صاير شي
احمد:لا يمه بس حضري الولد اخذه لأمه تريده
الشيخه:يمه ليش تعلعله خطيه بعده وينه وين الطلعه هسه
احمد:اول ما فتحت عيونها سألت علي
يمه حقها هذا المرت بي كله على موده
ما يظل يمها بس تشوفه وارجعه
الشيخه:خوش انه اجي وياك اريد اشوفها واظل وياه كلبي ما ينطيني اعوفه
بس انت ادخل اول مره كحل عيونك بشوفته وكبر باذانه
احمد:ليش لسه ما مكبرين ابوي شمنتظر
الشيخه:ما قبل كال ابوه يكبر بأذانه يريد يكسر عنادك
احمد:اخذتني امي اله شالته وكالت بِسْم الله وخلته على ايدي بس شفته
سبحان الخالق يشبه امه بالضبط
اللهم صل على محمد وال محمد بسته من كصته وكبرت بذانه
الشيخه:شحسيت من شلته
احمد:ما ينوصف الشعور يمه بس معزته تختلف
الشيخه:انتظرني البس عباتي واجيك
احمد:رجعت بسته من كصته وشميت ركبته ريحته طيبه تخبل وينكرط مثل امه جنت بكمره صرت بثنين
كمره:راح احمد ودخلت يمي امي وصلاح بس ابوي لسه ما شفته سألت امي علي
ام صلاح:ابوج شوي تعب ورجعناه كوه للبيت
كمره:ليش شبي
صلاح:يمه ليش كتيلها
خويه ما بي شي بعد تعرفين ضغط وسكر من هاي الأمراض
كمره:خابرولي علي اريد اسمع صوته
صلاح:خويه بعد اخوج وكلبه ارتاحي هسه وباجر من الصبح اجيبه بنفسي الج
كمره:ليش ما ترضى تخابرلي اكيد صايرله شي
ام صلاح:لا يمه شبيج ٲℓانــتيہ
خابرله يمه ما تعرف اختك بعد لو رادت شي لازم يتنفذ
كمره:خابر علي وشاله سمعت صوته تعبان وكوه يحجي
ابو صلاح:ها بويه اختك سالمه
كمره:يابه انه كمره
ابو صلاح:هلا بهل الصوت الحلو هلا بيج يا بعد اهلي كلهم وطوايفي
هسه ردت روحي شلونج بويه
كمره:انت شلونك يابه ظل بالي يمك كلولي تعبان
ابو صلاح:كلشي ما بيه بويه التعب كله راح من سمعت صوتج
كمره:دير بالك على روحك
ابوصلاح:روحي فدوة الج بويه بس كون أنتي تشمين الهوا
كمره:لا يابه اريدك سالم وتبقى خيمه على روسنا يومي كبل يومك كون
ابو صلاح:اسم الله عليج بعد بيتي بويه انه كبرت وشبعت من الدنيا أنتي بعدج بعز شبابج شفتي من دنياج اريدج سالمه لوليدج وهسه بنيتي ارتاحي ولا تعبين روحج وانه باجر من الصبح اجيج واكحل عيوني بشوفتج
كمره:سديت التلفون وانطيته لصلاح
صلاح:هسه ارتاحيتي
كمره:لا بعدني اشوفه ياله ارتاح صوته ما عاجبني احسه تعبان وكوه يحجي وياي
ام صلاح:يمه ما بي شي وداعتج باجر يجيج وتشوفينه
احمد:وصلنا انه وامي للمستشفى بس وصلنا للغرفه كتلها انطينياه انه اشيله
الشيخه: ليش
احمد:ضاجت من كتلها لسه ما شايفه
اريدها تشوفنا سوى حتى ترتاح
الشيخه:هاك بس كضه عدل وعلى كيف
احمد:اخذته منها ودخلت بي الها ظلت بس تباوع علينا ما عرفت شتحجي
خليته بحضنها وشفتها بجت كتله
عليش البجي لا تخليني اخذه منج
كمره:ما مصدكه عيوني
احمد:كافي لا تبجين لا تخليني ابوسج كدامهم
كمره:شتحجي انت عيب منا اخوي
احمد:جا سكتي بلا بجي جبته الج حتى تضحكين مو تبجين
صلاح:ما تكلولي شعدكم تحجون صارلكم ساعه
احمد:مره ورجال انت شخصك
صلاح:عمي براحتكم بس خلوني اشوف ابن اختي هم يستاهل هذا التعب كله
احمد:تصدك بالله يستاهل
كمره:شفت ابني حبيبي يخبل احس التعب والوجع كله راح مني
دنكت بسته وهو نايم فديته يجنن شنو من شعور حسيت يخبل ودي احضنه بس اخاف علي
الشيخه:شافت ابنها ونستنا بعد
كمره:عمه اعذريني والله ما شفتج
الشيخه :معذوره بنيتي الحمدلله على سلامتج
كمره:الله يسلمج عمه
ام صلاح:شو انطينياه وتمددي شوي مو زين عليج مو شفتي روحج شوي زينه ارتاحي يمه
كمره:لا يمه خلي عندي شوي ما شبعت منه
ام صلاح:يحفظه الج الرحمن • ﺂنٰ شۨـِﺂءۙ ﺂللـِه۫ہ ٰ
كمره:دنكت علي وهمست بصوت ناصي ماماتي حبيبي
احمد:محد حبيبج غيري والله اذا سمعتج كتيله هاي الكلمه
كمره:شلون سمعت حجيت على كيف
احمد:سمعت لا تعيديه
كمره:تغار من ابنك
احمد:اي أغار
كمره:دخلت علينا دكتوره صغيره يمكن من ذن المقيمات عاطت بالكاعدين
الدكتوره :شنو هاي عيني ما يصير هيج
المريضه ما تتحمل رجاءا فرغوا الغرفه ويظل وياها شخص واحد وأفضل تكون امها
احمد:صار دكتوره هسه كلنا نطلع
كمره:شكو رديت عليها
احمد:سكتي صوتج
كمره:طلعوا كلهم من الغرفه بقت بس امي يمي وابني بحضني
اجى احمد راد ياخذه ما قبلت تالي كال
احمد:كمره باجر تطلعين وتشبعين منه بس اليوم ارتاحي
كمره:ماشي اخذه بس ديروا بالكم علي
دخلت الدكتوره مره ثانيه
انه مو كلت فرغوا الغرفه ليش ما تسمعون الحجي الدكتور أنتي بالذات نبهنا عليج
كمره:احمد اخذه هاي الدكتوره كلش دقتني
احمد:هههههههه جيبي اودي وارجع الج
كمره:لا ترجع ظل اخواني يمي
احمد:اهااااا هاي ليش ما ترديني
كمره:شلون ما اريدك بس هاي الدكتوره كلما تشوفك تجي تركض بحجة مو زين علي وهي بدها تأكلك لا تخليني أكوملها افعصها هنا
احمد:هههههههه هههههههه
وبيج حيل تكومين الها
كمره:احمد لا تضحك علي لا ابجي والله
احمد:دخيل ربج شهل الغيره هنا وبالمستشفى
كمره:يله روح ولا تجي بعد
احمد:ما اكدر ما اجي اودي وارجعلج
ولا تعبين كلبج الدكتوره وعشيرتها تروحلج فدوه
اخذت الطفل منها وبستها من خدها وطلعت وصلتهم للبيت هو وامي تالي رجعت الها دخلت عليها لكيتها نايمه هي وامها على السرير الثاني
صفنت بوجها وحمدت الله الف مره من كامت سلامات وربي ما ضيع الها تعب شفتها ظلت تون وهي نايمه يمكن من الوجع كعدتها
كمره شبيج شتحسين
كمره:موجوعه
احمد:تكدرين تتحملين لو اصيحلج الممرضه
كمره:صيحها اريد اروح للحمام امي نايمه ما يهلي اكعدها
احمد:امشي انه اخذج للحمام
كمره:لا احمد الممرضه وياي احسن انت ما تعرف شي
احمد:امممم يله رايح اصيحها
كمره:اجت الممرضه ساعدتني احمد وصلني لباب الحمام وهي دخلت وياي وساعدتني وتالي طلعت رجعت للغرفه وضربتني مسكن بديت اغفي
احمد:تحتاجين شي بعد
كمره: تعال نام يمي لا تتكسر على الكرسي
احمد:انه مرتاح هيج ٲℓانــتيہ معليج بيه
كمره:تعال يمي مشتاقه انام على صدرك
احمد:اي كولي من الاول مشتاقتلك
بس اخاف ااذيج لا تنسين جرحج لسه ما طاب
كمره:لا تخاف علي بس خل اغفى وتالي كوم
اجى يمي تمدد خليت راسي على صدره وشميت ريحته وكلت
أفيش هاي ريحتي لأنام عليها عاد هو شبكني وباس كصتي وتالي غفيت
كعدت الصبح على صوت امي
ام صلاح:عززا بعينكم هاي شلون نايمين هيج
كعدوا لحد يجي ويشوفكم هيج
كمره:يمه انه كتله يجي ينام يمي شفته تعبان ونومة الكرسي تموت
وما تشوفينه شلون ذاب روحه
ام صلاح:يمه كتل روحه عليج لو شايفته والله تبجين على حاله
لو دورين الدنيا كلها ما تلكين مثل حنيته عليج
حافظي علي بنيتي وجلبي بي بأيديج ورجليج
وهسه انه كلبي بارد من ناحيتج ومطمنه عليج ما دام هو وياج
ادري بي يخاف عليج من الهوا الطاير وهسه كعدي لا يجي الدكتور ويشوفه هيج
انه رايحه للحمام
كمره:طلعت امي وكعدته وهو خطيه نايم شلون الميت من التعب ما ودي اكعده بس شلون لازم يكعد هنا مستشفى والدكتور على جيه واذا اجت هاي الدكتوره المايعه وشافته هيج تموتني
احمد حبيبي احمد اكعد يله راح يجي الدكتور
احمد:فتحت عيوني وشفت وجه الحلو كبالي
صباح الخير
كمره:صباح الخير كتلك ظل بالبيت ادري بيك تعبان
احمد:ما ينطيني كلبي اعوفج شلون انام الليل
كمره:صرت زينه والله
احمد:• ﺂنٰ شۨـِﺂءۙ ﺂللـِه۫ہ ٰدوووم زينه
اجى الدكتور وجيكها وكال كلشي تمام وشدد علينا نراجعه كل شهر حتى يتابع حالتها وكتب الها على خروج
وطلعنا من المستشفى وصلنا للبيت لكيت الوالد محضر ذبيحتين وحده لأبني وحده على سلامتها ذبحهن على رجليها ودخلنا للبيت محضريلها غرفة الحجيه لأن ما تكدر تصعد فوك لحد ما تشيل خيوط العمليه وهم تفحط من تصعد الدرج وهذا كله تعب ومو زين على كلبها
كمره:عدت عشر ايام على ولادتي وصرت زين وكمت اتحرك وابني طايره بي وبالبدايه ما اعرفله عمتي وامي ساعدني هواي ياله شوي كمت اعرفله
وأخذني احمد للمستشفى حتى اشيل الخيوط واحمد خبصني يمته تصعدين الغرفه يكلي ظلمه من دونج وما يكدر ينام يمنه الضوا يبقى مفتوح للصبح على مود الطفل لأن صار بي ابو صفار وهو هم يبجي الليل كله وينام الصبح وتبدي معاناتي وياه الليل كله كاعده على موده وحسره علي النومه
صرت أتمناها وابجي بس حتى انام ساعه وحده وأتوسل بأحمد يجي يكضه الي بس شوي وما يقبل يكلي ما اعرفله اخاف اسويله شي بس مرات وسام يدخل يمي ويخلي عنده وانه اكوم اسوي شغل لو شوي اتحرك لو اغسل ملابسه ومره جنت بالمطبخ جاي افور المميات واكفه على الطباخ
دخل علي شداد وكال
شداد:كمره شلونج
كمره:زينه الحمدلله
شداد:شلون صار كلبج شوكت تراجعين الدكتور
كمره:اذا تريد احمد اتصل علي وهو ينزل الك
شداد:سألتج على صحتج ما كفرت
كمره:وانت معليك بصحتي
شداد:كمره ليش تكرهيني
كمره:ما اكرهك بس ما أطيق نظراتك الي انه مو غبيه وملاحظه كلشي
شداد:ما كدرت اطلعج من كلبي بس كليلي شسوي حتى تطلعين
كمره:شوف حياتك وأتزوج وانت تنساني انه ما افيدك
شداد:ما كدرت كمره ٲℓانــتيہ حياتي
كمره:اسمعني زين
انه مرت احمد وحياة احمد وبس لا تنسى هذا الشي ابد
شداد:هذا الموتني ٲℓانــتيہ لو ما لأحمد جا من زمان صرتي الي
كمره:رجاءا بلا هل حجي لو يسمع احمد ما تعرف شيسوي وهو رجع امن بيك هذا ابن عمتك ويحبك حالك حال اخوانه حرام ﻋﻠﻴﻚ تغدر بي
راح اعتبر روحي ما سمعت شي منك واطلب منك طلب المكان الي تشوفي بي لا تدخله رجاءا ولا تخليني اكل لأحمد على كل مضايقاتك الي
شداد:ما جاي اضايقج بس حبيت تعرفين ....
كمره:لا تكمل ما اريد اعرف اي شي
عفته وجاي اطلع وشفت احمد واكف يم باب المطبخ وعيونه تطافر منها الشرار
::::::::::::::::::::::::::::::::::::::::::::::::::::::::::::::::::::::::::
لهنا ينتهي البارت ٥٠