#سجينة_كارلس
#سجينة_كارلس
الحلقة2 :
كارلس من اب جزائري و ام فرنسية عندو 28 سنة اسمو الحقيقي لي سماه بيه باباه هو "جهاد" مي يماه حبت تسميه كارلس و من صغرو يعيطولو بهاذ الاسم حتى كبر و انشهر بيه ، هو اسمر عينيه حاذقتين جذابتين و مخيفتين في نفس الوقت شعرو اكحل لحيتو خفيفة و زايدا فيه النص ، عضلاتو ماكلاه نحكيلكم عليها لانو لي تشوفو طيح في ذوك العضلات مخدوم كور و ديكور عندو شركة اعمال و يقدم ديون للمتعاملين مقابل فوائد كبيرة ممكن توصل لضعف المبلغ المستدان او يكلفك خسائر كبيرة انت في غنى عنها و لي يتوارى عن دفع استحقاقاتو يخلصها غاليا مكاش الغلطة معاه لانو شخصيتو ميزاجية و يتقلق بلخف و مايحبش العوج و ينحسبلو الف حساب لي يحبها تجيه تكون عندو بلا مايدور عليها كل حاجة ساهلة عليه، من ناحية الحب عمرو ماحب لانو النساء يجوه لعندو بلا مايحوس عليهم طبعا السوسيالات لي يحوسو غير على الدراهم و الجاه لانو غني و معروف ،لكن و لا وحدة قدرت تدخل قلبو ، كلهم حاولو و لكن و لا وحدة قدرت تنجح ،اول مرة يشوف وحدة و تعجبو لهاذ الدرجة و من النظرة الاولى حتى سيف حس بهاذ الشي و حب يفرحو و يدير المستحيل باه تكون جيهان مع كارلس، لانو سيف يعتبر كارلس اخ ليه و صديق عمرو و يعزو لدرجة كبيرة و كان يعرف انو جيهان هي اخت تامر شافها من قبل و بحكم انو تامر كان اخذ من عندهم ديون و ماقدرش يسددهم و توفى قبل مايسددهم قرر سيف يستعمل طريقة الابتزاز بش يخلي مسيو حسان و مرتو جميلة يقبلو انهم يزوجو جيهان لكارلس
جميلة: حسان اعمل اي شي انا مستحيل نمد بنتي لواحد كيما هذاك مريض و متوحش و بلاك يكون هو السبب انو تامر عمل تكسيدو من لابريسيو لي كانت فيه
حسان: تامر كان داي عليه دين كبير و علابالو الفوائد ليديهم كارلوس كبيرة و هكذاك و ريسكا و زاد رهنلنا كامل ممتلكاتنا ضرك كيفاش نديرو باه نسددو دينو و احنا كون نخدمو طول حياتنا ماننجموش نرجعوه و ممكن نتعرضو لمواجهة القضاؤ و نتشردو
جميلة: مستحيل نعيشو في الشارع وين نروحو معندناش وين
حسان: خلاص ضركا روحي ترقدي و خليني نخمم
راحت جميلة لبلاصتها و بعد تعب شديد رقدت اما حسان بات يخمم و جاب الصباح حتى توصل لاتخاذ قرار و يسال بنتو بروميارمون
________________________________
ناضت الصباح على صوت الرفاي كان مورالها هابط كيتفكرت اليامات ليجازو عليها و تفكرت تامر عينيها تعمرو بالدموع ممبعد مسحتهم قررت تكون اقوى
جيهان: لازم نبدى بداية جديدة و لازم نكون قوية و نواجه الصعاب وحدي ، تامر مات الله يرحمه و دموعي مراحش يرجعوه، ماكانش يحب يشوفني ضعيفة كي كان حي و انا ماليوم مراحش نكون ضعيفة
دخلت للدوش دوشت بعد شوي خرجت جبدت السيشوار نشفت شعرها دارتلو سيروم و خلاتو بوكلي هي شعرها رطب مي يتبوكلا وحدو و يعطيها منظر جذاب لايق بيها ، عملت مكياج خفيف لبست غوب قصيرة رفدت ساكها ، مفاتحها و هي هابطة في الدروج سمعت باباها و يماها يحكيو في البيرو مش قصدها تسترق السمع اما كي انذكر اسمها قطعت الحس و بقات تصنت
جميلة: يعني ماعندناش حل وحدوخر لازم نقبلو نزوجوه بجيهان
حسان: مانيش حاب بنتي تتزوج بواحد كيما هذاك حتى و لو كان يحبها يالوكان يديلي كامل ثروتي و كل حاجة نملكها ماراحش نمدهالو مستحيل
جميلة: الدين لي داه تامر من عندو كبير بزاف مانقدروش نرجعوه و عندنا مهلة قصيرة بقالنا اقل من 15 يوم اذا ماوفقتش على عرض الزواج لي قدمو راح نصفاو في الزنقا و ماعندناش وين نروحو
حسان: نبقاو في الزنقة و مانغصبش بنتي تتزوج واحد هي ماتحبوش و هي مازالها صغيرة
جميلة: انا تان مانحبش بنتي تتزوج بالطريقة هاذي اما فكر لوكان جيهان تتزوج كارلس راح تصير امراة غنية و رح يكون ليها كلشي تحلم بيه وتتمناه يكون بيديها، خاصة انو كارلس يحبها كان قادر يخطفها و لا يلعب بيها تعرف هو عندو علاقات سابقة و سمعتو مش مليحة اما هاذ المرة حاب جيهان كزوجة و ماعندناش حل وحدوخر حسان وليدي راه يتعذب في قبرو وحنا مازال ماخليناهش يرتاح
حسان: تامر غلط غلطة كبيرة كي لجا لواحد كيف هذاك و ضرك حنا رانا نخلصو فيها
جميلة تبكي: تامر ماكانش داير في بالو بلي راح يموت هو سلف هاذوك دراهم باه يوسع مشروعو و ثروتنا مي مانجحلوش المشروع
حسان: لازم نبداو نخملو في حوايجنا لانو مراحش يكون عندنا اي الشي راح نولو فقرا
جميلة: قصدك مشردين
حسان: جميلة خلاص اخر مرة تجبديلي هاذ السوجي قتلك ماراحش نغصب بنتي على زواج هي مش حاباتو
خبطت الباب عليهم و دخلت بغفلة
جيهان: موافقة نتزوج و نصلحو كلشي و مانيش مغصوبة
جميلة: يعني سمعتي كلشي اسمحيلنا....
حسان: بنتي ماكيش مضطرة تقدمي اي تضحية علاجالنا حتى و لو صرنا فقراء مايهمش مراحش نرغمك على حاجة مش حابتها
تبسمت و حاولت تخبي حزنها
جيهان: بابا نتا مارغمتني على حتى حاجة و نحمد ربي صباح و عشية لي عطاني والدين كيفكم طول حياتكم و نتوما تهتمو بيا و بخويا الله يرحمو و ضركا دالتي لازم نردلكم خيركم و نبرهنلكم بلي عندكم طفلة تنجمو تتكلو عليها في الشدة
حسان: بنتي بلى ماتبرهنيلي حتى حاجة نعرف وش ربيت مستحيل نخليك تتزوجي بهاذ الطريقة
اراءكم؟
تفاعلكم هو لي يشجعني بش نقدملكم اكثر ❤