الحلقة 21:
غير كوبات ما امنش وش سمع من عندها يعني رح تستناه للعشا ، ماعلابالوش وش يدسر مي فرح و جوز هذاك النهار يليكسدس في الخدمة غير بش يكمل بكري و يروح ليها عداك كان رح يبطا سمح في كلش غير من كلمة منها ، لحقت 7:00 خرج من الخدمة ديراكتومون للدار في طريقو جاز على حانوت يبيع الورد كان رح يغلق هذاك الحانوت حبسو و شرالها بوكي تع ورد وراح
كي وصل دخل للفيلا استقبلاتو هي الخدامين هي خلاتهم يروحو حبت تبقى وحدها هي وياه ماعدا الحراس كانو برا ، كانت لابسة غوب نواغ في البوردو قصيرة و ظهرها كامل باين و صباط طالون عالي في نفس اللون تع لاغوب راحت ليه تبسمت ، عطاها البوكي تع الورد
جيهان: طولت مي مش بزاف المهم جيت في الوقت هذا وين حطيت العشا، ايه حقا خليت الخدامين يروحو لديورهم بش يريحو شوي و نا ستفت الطابلة مي مش انا لي طيبت هههه
كان يخزر معاها من غير ماينطق اي كلمة مش مصدق لي يشوف فيه ولا لي يسمع فيه
جيهان: وشبيك ساكت هههه
كارلس : فاجاتيني
جيهان: هههههه جوز نتعشاو
قعدو في الطايلة هو على راس الطاولة و هي على جنبو ليمن كيما قلها ذاك نهار جبدت ليبلا و يدات تساربيلو و تساربي لروحها و هو يتبع فيها غير بعينيه مش مصدق راهي تضحك معاه تساربيلو تحطلو و تحكي معاه كانو مش جيهان لي تكرهو و ماتحملش قربو منها
جيهان: كول وشبيك غايس ، راك متفاجئ صح
كارلس: بزاف وشنو هو سر هاذ التغير المفاجئ ، اول مرة نشوفك تهتمي لامري لاكليت و لا ماكليتش و تضحكيلي كنتي ديما تشنفي في وجهي و ماطيقيش شوفتي
جيهان: مش هاذ هو لي لازم يصير يعني لازم نهتم بيك و بماكلتك
كارلس: مافهمتش وضحي
جيهان: كارلس حابة ننساو لباسي و ليجاز و نبداو بداية جديدة و حاباتك تصبر عليا شوي حتى نوالف حياتنا الجديدة و ناكدلك رح ندير جهدي بش مانعملك حتى مشاكل
كارلس: هذا لي نحوس عليه منك و فرحت كي راني نسمعك تقولي فيه
جيهان: كاين حاجة وحدوخرا حابة نطلبها منك معلاباليش اذا توافق عليها و لا نو
كارلس: قوليهالي لي تطلبيها نديرهالك وشنو هي؟
جيهان: حابة تتعامل معايا معاملة مليحة مانيش حابة نبقى مسجونة هنايا ملي تزوجنا ماحكيتش مع دارنا حتى التيليفون و ديتهولي اوين نمشي نحسهم يراقبو فيا نحب نعيش بحرية مكاش لي تحب هاذ المعيشة المرا تان كائن حي
كارلس: بخصوص التيليفون رح نرجعهولك بش تحكي مع عيلتك اما الحراس ماننجمش نحيهم
شافها هبطت راسها
كارلس: هوما رح يحميوك في غيابي و يحرسوك، مي باه تكوني مرتاحة كثر ماعدش نخليهم يدخلو للفيلا رح يبقاو البرا و ديجا ضرك رح نرجعلك تيليفونك و كي نحب نسقسي عليك نعيطلك وش رايك
جيهان: ميغسي بزاف مارحش ننسالك هاذ الشي ( و تبسمت معاه)
كملو عشاهم ياكلو و يحكيو و يضحكو. و كارلس كان اكثر واحد فرحان بهاذ الشي لانو و لا مرة حكات معاه بهاذ الضرافة
__________________
و هكذا جازو اليامات و جيهان و كارلس تحسنت علاقتهم بزاف علي كانت ماعادوش يتفاتنو و ملي عطاها تيليفونها و لات مرة على مرة تعيط لاهلها و تطمن عليهم كانت متوحشتهم و مش عارفة وينتا تشوفهم
اما كارلس الفرحة ماكانتش واسعاتو عجبو التغيير لي عملاتو جيهان و كيفاش راهي تعاملو ، كان كل مرة يحط احتمال تع ممكن راهي شفقانة عليه ممكن تعمل هكذا بلعاني و يجي نهار و تخليه كان هاذ التخمام ديما يجيه في راسو خايف يروح للدار و مايلقاهاش خايفها تسمح فيه و مايعودش يشوفها ، مي كي يروح للدار و يلاقاها تم و تضحكلو بمجرد انو يدخل كان ينسى كامل هاذ الافكار السلبية و يضحك معاها مي بقا شي وحيد يتمناه "انها تحبو" لانو كامل هاذ الشي هو تحسن في العلاقة مي راهم عايشين كاصدقاء مش كزوجين و ديما يراقب فيها بعينيه و حبو ليها كل مرة يزيد يكبر كل مرة يشوفها يحب يضمها يبوسها كلش مي هي ماعطاتوش هاذ الحق و هو راه صابر من محبتو ليها و كلما ترقد قدامو في الليل و يشم ريحتها قدامو يسوفري بش يرقد لانو مالغري راهي قريبة ليه مي مازالت بعيدة عليه
YOU ARE READING
سجينة كارلس (باللهجة الجزائرية)
Romanceتزوجتك دون ان احبك، قبلت بك و ضحيت بنفسي من اجل ان تعيش عائلتي ،تقبلت فكرة ان اكون زوجتك و لكني لم اتقبل ان اكون امراتك فسجنتني عندك حرمتني حريتي و حرمتني من كل شيء حطمت احلامي و ذكرياتي و تقول لي احبك ! اتسمي هذا حبا اتسمي هذا عشقا ........ يتبع
