سجينة كارلس (باللهجة الجزائرية)

سجينة كارلس (الكاتبة زهرة)

سجينة كارلس:
الكاتبة زهرة

الحلقة1:
17 جانفي 2015في فرنسا:
كان قاعد في الطونوبيل مع صاحبو و الشوفير من القدام
سيف : وشبيك دايما تجيبنا لهنا وش قصتك مع هاذ البلاصة؟
كارلس: والو جيست تعجبني و نحب نريح فيها
سيف : هممم اوكي
كانت الشتا خيط من السما البرد و هوما مقابلين البحر الهايج ، يعجبو منظر البحر هكذا يحس انو يمتصلو الغضب التاعو ، بعد شوية شاف وحدة خرجت هكذاك بالبليغة تجري تجري بلا فيستا كانت لابسة جيست بيجامة قطنية و شعرها مطلوق في هذاك البرد و هو لابس ماكانش ناجم حتى يخرج من الطونوبيل كيف هي خرجت هكذاك و راحت تجري بقا يتبع فيها بعينيه جازت عليهم على الطونوبيل لي زجاج تعها كامل اكحل فيمي هو ينجم يشوفها اما هي ماتنجمش ، كملت جرات كي وصلت عند البحر حبست و صرخت باعلى صوتها
جيهان: علاااااش علااااش ياربي علاااش كامل لي نحبهم راك تبعد فيهم عليا واحد ورا الثاني علاش جدة و خذيتها لعندك اما علاه ياربي علاه تخلي تامر يبعد عليا و تاخذو بالسرعة هاذي علاه هو الوحيد ليكان يفهمني علاااش هئ هئ هئ كانت تبكي باعلى صوتها في بالها ماكان حتى واحد يشوف فيها اما هو كان مراقبها كان يحاول يفهم كلماتها اما مانجمش يسمعها مليح كان يشوفها جيست تبكي و تضبح و تحاول تخرج وش كاين في قلبها مي مافهمش وش بيها
سيف: عجباتك؟ و تبسم معاه
كارلس: ايه هههه
سيف: نجيبوها؟
كارلس: مش ضرك و مش بالخطف نخليهالك في راسك ونتا دبر راسك
بقا هكذاك مراقبها و يشوف فيها تشمخو كامل حوايجها شعرها يقطر حالتها حالة اكيد رح تمرض بعد هاذ الشي
اما هي و لا على بالها تجمد الاحساس جواتها ماعادتش حاسة بالبرد كان البركان لي في صدرها اقوى من البرد لي برا، بقات مقابلة البحر دموعها شلال  ، الالم لي تحس بيه في قلبها قوي اكبر من طاقتها ماعادتش متحملة فقدت اعز الناس لقلبها خوها "تامر" كان اكبر منها باربع سنين كان الوحيد لي تحسو يفهمها و يحس بيها كان ديما قبل ماترقد يجي يحاكيها حتى والديها مالغري يبغوها اما ماكانوش كيفو يماها عمرها ما سقساتها على حوالها و لا وش يوجع فيها و لا سيات تحكي معاها كصديقة و تقربها منها مكانتش قريبة ليها لذيك الدرجة ، باباها كان شوي متفهم منينذاك يسال عليها يخرجها يعني عاطيها حقها من الابوة اما مش لذيك الدرجة لي تتمناها اما هو "تامر" كان سندها الوحيد حتى في الليل كانت اخر واحد يخرج من شمبرتها حتى ترقد و يغطيها بش يروح من عندها كان خوها و صديقا وقت الحاجة لحد انها كانت تحبو اكثر من والديها اما اليوم الاجل خذاه منها دار اكسيدو و انتقل لرحمة ربي و صار ذكرى في حياتها، اول ماقالولها الخبر كان كي الصاعقة عليها ماتت و حيات الف مرة كذبتهم مانجمتش تصدق بعدما فقدت جدتها زادت فقدت شخص عزيز على قالبها مافاقتش بروحها كيف خرجت تجري و رجليها داوها للبحر ، عيطت و صرخت باعلى صوتها ترجات ربي انو لي صار يكون حلم تتمنى تستفيق منو همها كان كبير ماقدرتش تتقبل الواقع المر لي عايشاتو
جيهان طفلة كيف لبنات عايشة حياة طبيعية عندها 18 سنة تقرا في الجامعة تخصص طب و جراحة بشرتها قمحية شعرها ماهو اسود ماهو بني كان مزيج بيناتهم ، اسرتها عائلة جزائرية انتقلوا للعيش في فرنسا كي كان في عمرها 6 سنوات ،ناس لاباس بيهم تقدر تقول عليهم مرفهين عندهم سيارات و عايشين في فيلة شابعين تحواس عمرها ما كان ناقصها شي باباها حسان و يماها جميلة و خوها الوحيد تامر لي كان عمرو 22 سنة و ضرك انتقل لرحمة ربي و بقات هي الابنة الوحيدة لهاذ العيلة ، في بالها حياتهم طبي و لكن ما خفي كان اعظم
بعدما دفنو تامر دخلت لشمبرتها و بقات هذيك الليلة شادة تصويرتو و تبكي حتى جفو دموعها و رقدت .

في الفيلا:
كان السي حسان قاعد في بيروه يسنى هو و مرتو جميلة بعدما جاه اتصال من شخص كان يتمنى عمرو مايشوفو ، بعد شوية دق الباب و فتحت الخادمة
الخادمة: تفضل مسيو حسان راه يسنى فيك في البيرو (طبعا تحكي بالفرنسية)
دخل و راح قبالا مد يدو بش يخمس مع حسان مي حسان ماحبش
حسان: وش جابك وش تحوس ماكفاش همنا ليرانا فيه اليوم دفنت وليدي و نتا جاي ليا من ضرك تزيد عليا
سيف: اولا عظم الله اجركم ربي يعطيكم الصبر ، بلاك هذا ماهوش الوقت المناسب بش نحكيو في هاذ الامور مي من الاحسن نحكيو فيها ضرك اذا راكم حابين تامر يكون مرتاح في قبرو
جميلة: وش من الامور تفضل احكيهم
حسان ديجا بدا يطلعلو العصب للراس بقا ساكت
سيف: كيما تعرفو تامر كان مدين من عند كارلوس مبلغ كبير و كون نزيدولو الفوائد رح يزيد يكبر ووليدكم رهن الفيلا و العقارات لي تملكوها في حال ماقدرش يسدد الدين تاعو رح ناخذو منكم كلشي
حسان: و المطلوب صافي بعدما مات تامر جيتو تسلبو منا كلشي
سيف: ياسي حسان ماتتقلقش نقدرو نحلوها كل حاجة راهي في يدك نتا
حسان: مافهمتش كيفاش في يدي
سيف: تعرف كارلوس و طباعو ماكاش اللعب معاه و تامر غلط كي خلط فيه و ضرك هو مات و ماسددش دينو و كون ناخذو منكم كلشي و تبقى طول حياتك تدفع في الدراهم ماتنجمش ترجعهم ، مي كاين حل صغير و حاجة عندك اذا قدمتها لكارلي ره مستعد يتنازل على كامل ديونو و يتخلى على الفوائد و كل حاجة يرجعها على اسمك كيما كانت في الاول
حسان: حاجة صغيرة عندي! وش من الحاجة الغالية ليراهي عندي تخلي كارلس يتنازل على هاذ الشي كامل في جالها ماتقليش....
هزلو براسو
سيف: هي بذات
حسان: مستحيل نموت و مانتخلاش عليها تامر مات و راح اما هي لا مستحيل نخليها لعبة بين يدين هذاك الوحش
جميلة : شكون هي وش من اللعبة و حاجة غالية !!!
حسان: برا برا اخرج عليا و خبر كارلوس الحاجة ليراه يحوس عليها ماهيش عندي و مستحيل نمدهالو برا
وقف سيف و ناض من مكانو
سيف: خمم مليح ميسيو حسان كارلس كي يحط حاجة في راسو مايرتاحش حتى يديها و بنتك جيهان يقدر ياخذها منك  بالغصب و ماتزيدش تسمع عليها شي اما هو سهلك الامور و طلبها منك مش كي باقي البنات بنتك رح تكون زوجة كارلوس مش كيما راك تخمم
حسان: برا اخرج عليا مستحيل هاذ الشي برا تقدرو تاخذو منا كلشي و تشردونا مي مستحيل نخلي بنتي لهذاك الشيطان برا

اراءكم لبنات ماهي توقعاتكم للحلقات القادمة كيفاش رح يتصرف سي حسان في هاذ الموقف؟/يعني ممكن يتخلى على بنتو كبدتو بش ينقذ عيلتو يعني ينجم يضحي بفرد من العيلة بش يعيشو الباقييين؟!!!! انتظرونا في الحلقات القادمة مع مزيد.من المفاجئات