نهوة السلطان
**للكاتبه **سارة وليد **
البارت 17 ❤❤
عشك زمزم.........................💑
💧💧💧💧💧💧💧💧💧💧
شجاها عيوني تعشك كَبل متشوف.....
وبيك تعلقت من غير صدفة.......
غريب احساسي بيك تولع شلون.......
شعور بداخلي يدور ماينحزر وصفه......
الكَلب يهواك عاشك ومفتون .....
يا أجمل غرام بعمري شفته.....
شوكت ترجع وتلمم دمع العيون....
يا عيد الله الجبير وعظم حجته.....
عشكَتك عشك زمزم لليطوفون....
مثل قيس السطر التاريخ قصته....✍️
_________________
احمد : سلطان اني احجي ويا عمي ثامر يشوف شيسوي
سلطان : لااء .... امشي كنان
كنان : وين
سلطان : انت موتكول علي القاء قبض غير اروح اسلم نفسي يول شبيك انت شو مدوخن
احمد : سلطاااان
جنت واكفه واسمع الحجي بس مصدومه شنو سجن شنو للقاء قبض ......
عشق : سلطان
يريد يروح سلطان بس وكف على صوت عشق التفتت استقبلنه عيونها المغوركه بالدموع ......
سلطان : كنان اسبقني اني جاي وراك
كنان : ماشي
طلع كنان واجه سلطان على عشق الي مكدر يروح ورى دموعها
عشق : اني احجي ويا علي واخلي يسحبها لان اني السبب ماكدر اخليك تدخل السجن من وراي
تحجي ودموعها يسيلن على خدها ورى كل جمله تسحب شهكه وهذا الشي كطع كلب سلطان وخلا حاير هاي الدموع معقوله علي لو لان ماتقبل تكون السبب ... خله اديه على خدودها ومسح دموعها
سلطان : باعي علي
جانت مدنكه راسها وبس صوت شهكاتها يطلع
سلطان : عشق باعي علي
رفعت راسها وعيونها الكحلها اللون الاحمر من الدمع
سلطان : اني مستعد اشمر روحي بالنار مو بالسجن .. ولا اخلي بشر ياذيج ولا يلمسج انتي ملك سلطان وسلطان ملكج واذا على سالفة السجن هاي مو اول مرة متعود على هاي السوالف ... بس لا تنزلين هاي الدموع لان تزرف كلبي .... واوعدج كدام كل الموجودين باجر لتلكيني هناا
عشق ...
باوعت علي ياربي شبيه اني ليش هيج كلبي ديحترك بس اتخيل هو راح يدخل السجن ليش كلبي ديوجعني وليش هاي عيوني متقبل تبطل تنزل دمع معقوله احبك يسلطان معقوله سواها كلبي وعشقك شلون مااعشقك وانت جنت راح تقتل واحد بس لمسني ومستعد ترمي روحك بالسجن ولا تنزل دمعه مني معقوله تحبني لهاي الدرجه لعد شكد جنت غافله عنك .......
حسيته طبع بوسه على راسي عطره جان قريب مني اخذني لغير عالم ... حسيته بعد عني فتحت عيوني شفته وهو يطلع من البيت ...... حسيت ادين صارت على جتافي باوعت مروة جانت حالتها ماتفرق عن حالتي هماتين غركانه بدموعها ..
ام سلطان : بعد شيصير بينه اكثر من الصار من ورى ست عشق ماضلت مصيبه مانزلت على راسنه بس كليلي شسويتي للولد وخليتي يتخبل هيج
مروة : يوووووووم
ام سلطان : انتي ولا نفس شنو انتي هماتين مسويتلج سحر
مروة : يووووم كاافي عاد كلشي تحطينه براس عشق الي صار ويا سلطان من ورى ابن اخوج كافي عاد تتغافلين عن تصرفاتهم وتسوينهم مو غلطانين بس اسمعي وهاي اخته بصفج هماتين خل تسمع الي راح اكوله اذا علي ماسحب الشكوة اسوي بي سوا السلف كله يضل يحجي بييي
ام سلطان : مرووووووة تحملتج هواي ولي من كدامي لا افقد اعصابي عالاخير
مروة : لييييش لان حجينه على حبيب كلبج لحتى تفقدين اعصابج كمت اشك تحبين ولد اخوج اكثر من عدنه ميهم شنو الي سوا علي ويا سلطان وعشق المهم علي مو غلطاااان ( مقاطعه ... )
دتحجي مروة فجاءة اجاها راشدي سكتها من ام سلطان
ام سلطان : مو انتي الي تقررين احب منو واكره منو سلطان ابني وعلي ابن اخوي
لزمت مروة ..
عشق : مروة
مروة : ياوسفه والف وسفه لحد الان ادافعين علي خلي يفيدونج بس يايوم راح يجي يوم متلكين بي لا واحد من ولدج وساعتها حبي ولد اخوج بكد متريدين
طلعت مروة من الصاله انكسر كلبي عليها خطيه شلون اخذت راشدي رحت وراها واخذتها لغرفتي جانت حالتها حاله بس تبجي ...... اليوم من شفت حركة كلب مروة على سلطان وشلون اتخبلت لهف كلبي للأخوه شكد حلوة لعد ...... اني جان عندي اخ بس ( تذكرت عشق كلام سمير 《بس اني مو أخووج افهميها عااد 》 ) طلع هو ميعتبرني مثل ما ا اني اعتبره ............
صارت الدنيا لليل احمد طلع ويااا سلطان وكنان ............وام سلطان راحت على اخوها لحتى يحجي ويا علي يسحب الشكوى ... مروة بكد مابجت غفت ونامت اما عشق بقت روحها هايمه بالها يم سلطان .... والسجن وزاد توترها بعد ماتصلت باحمد وكال لباجر يلا تبدي المحاكمه مالته ويجوز على هذا العنف يسحبون الرتب ماته ويفصلونه من العسكريه
بقت ادور بالغرفه تنتظر خبر .......
عشق ...
نزلت جوة بلكي احد افتهم شي شفت سلوى واكفه يم احمد .رحت على احمد افتهم شصار وياهم هناك
عشق : هاا احمد شصار
احمد : هو غير الكتلج علي ماكو تطور اذا علي مسحب الشكوة سلطان راح يروح بيها
عشق : يعني ينسجن
احمد : السجن بسيطه يكدر يطلع بكفاله بس لا يسحبون الرتب مالته ويفصلونه لان سلطان يتخبل
عشق :زين اني ماكدر اروح واشهد علي الغلطان
احمد : انتي تريدين سلطان يدفنه واحنه عايشين اسكتي واكعدي شوف شلون ربج يفرجها .. بس اني لحد الان مافتهمت شصار هناك لان حجة سلطان مدتقنعني شلون اجه بمزاجه وهيج كسر الولد عشق انتي جنتي موجوده هناك وشفتي كولي شصار
عشق : صراحه هو علي ....
دك التلفون مال احمد
احمد : لحضه .... الوو هاا كرار .... ماشي انطينيا ... الو سلطان
كال الو سلطان رفعت راسي علي
احمد : ماكو شي سلامتك ..
باوعت على احمد لحتى ينطينيا
احمد : سلطان اكو احد يمي يريديحجي وياك هياته
انطاني التلفون
عشق : الو
سلطان : هلا ياحلو
عشق : سلطان اني ياجر راح اجي واشهد بالمحكمه علي هو الغلطان
سلطان : عشق ابقي بالبيت وخليج بعيده من الموضوع
عشق : انت شلون تحجي هيج احمد يكول اكو احتمال يسحبون الرتب ويفصلونك
سلطان : اي واذا فصلوني عادي الله يعوض
عشق : اني مدافتهم طريقة تفكيرك يعني ليش متقبل اجي اشهد
سلطان : عشق الي صار اليوم ماريد بشر يدري بي لان يحولون الشغله الصغيرة لشغله جبيرة اكعدي ولا ادخلين روحج واذا احد سالج عالصار كولي اني مادري وصلت متاخرة
عشق : سلطان انت وعدتني كدام الكل باجر انت بالبيت
سلطان : عشقي اسمعي الي دكوله ولا يضل بالج يمي ترى بس بالجذب مسجون باب السجن مفتوح وهذا كرار كاعد يمي والنركيله اصلا مرتاح والولد الهنا كلهم يشتغلون يمي عادي ....
عشق : ههه
سلطان : ايي ضحكي اروح فدوة لهاي الضحكه ... احمد وين انطينيا
انكيت التلفون لاحمد شويه ارتاحيت من كال ماكو شي بس بعد اكو خوف .... رجعت لغرفتي وكدرت انام ......
.
.
.
.
حسيت الصبح على صوت التلفون اجت رساله باوعت من جمانه فتحتها
"" تعال سمير بسرعه هالبيت بيبيتي اتخربطت واخذها ابوي للمستشفى من البارحه بالليل مانعرف شبيها تعال البيت مكلوب ""
ماهرف شسوي اديه كامت ترجف خابرت على جمانه اريد اعرف شنو هاي الرساله
جمانه : هلو عشق
عشق : جمانه بيبيتي شبيها
جمانه : هااا ؟؟ شبيها
عشق : شنو هاي الرساله الدازتها
جمانه : اهوو بالغلط اجتج هاي دزيتها لسمير ماليها شي بس
عشق : جمانه لاتضمين علي شي كوولي شبيها بيبيتي
جمانه: البارحه عفتها تصلي بالصاله على كد ماطلعت سمعت صوت رجعت للصاله لكيتها مغمى عليها وابوي اخذها للمستشفى لحد الان مانعرف عليها شي اخابر ابوي تلفونه موجود هنا وسمير مو بالبيت رجليه مديشيلني من الخوف
عشق : اووف ياربي كل هذا صاير وبالغلط تكليلي
جمانه : ماردت اضوجج
عشق: جمانه سدي اني رايحه عليها
ماعرف شلون غيرت ملابسي بس كلبي يدك بسرعه خايفه لايصير بيها شي لاسامح الله وهي زعلانه مني لاياربي هي الوحيده البقتلي لاتاخذها هماتين والله اموت وراها.... نزلت اركض شفت احمد
عشق : احمممد
احمد : شكو شبيج عشق
عشق : احمد اخذني للمستشفى بيبيتي متخربطه
احمد : هاا خوما بيها شي
عشق : ماعرف خابرتني بت خالي مايكدر يتواصلون ويا خالي تلفونه بالبيت
احمد :ماشي سبقيني انتي للسيارة راح اجيب السويج واجيج
عشق : ماشي بس بسرعه الله ينطيك
صعد احمد عل غرفته اريد اطلع للحديقه عالسيارة
ام سلطان : شكد فكر لعد خطيه راح تروح بيها المكروده
عشق : لاتحجين هيج عمه
ام سلطان : انتي من اجيتي لهاي الدنيا وانتي تكرطين بالعالم اول شي اهلج وبعدين عمج ابو سلطان وجدج ابو امج وهسة بيبيتج
بقيت اسمعها وساكته وكلبي يحترك يجوز كلامها صحيح اني هيج .....
سلوى : عشق روحي عللسيارة عوفيها لامي ماتسمعيلها
مسحت دموعي وطلعت عالسيارة شويه واجه احمد ...
.
.
الطريق كله ماخليت لا ايه لا دعاء ماكلته خايفه بشكل دك التلفزن جمانه رديت عليها وخايفه لا تكولي خبر مو زين
عشق : ه..ها جمانه
جمانه : عشق ابوي جاب بيبيتي هسة كلشي مابيها الحمدلله
عشق : صدك الف الحمد والشكر لله .. احمد اخذني على خوالي هي بالبيت هسة
احمد : الحمد الله
وصلت بيت خوالي .... طبيت ورحت مباشرة على غرفتها ماسلمت على احد بس اريد اشوفها مابيها شي... طبيت لكيتها مدده وبيدها مشكلين كانونه
ماسيطرت على نفسي وطيت بجي منظرها هزه لكلبي هز ... حست على صوت البجي ماتي
بيبي : عشق ... تعاي يروحي شوكت جيتي
رحت عليها وكعت بحضنها وبديت ابجي واسحب بشكاتي
بيبي : مابيه شي يعمري انتي
عشق وهي تبجي: بيبي اني اسفه ببيبي اني زعلتج مني هوايه سامحني بيبي اني وحده انانيه اهتميت بروحي وهملتج
بيبي : شدتحجين انتي .. ليش اني اكدر ازعل منج.. بس هو هذا العمر بي مطبات وحده من المطبات تاخذه الانسان
عشق : لا تحجين الله ينطيج انشاء الله اني قبلج
بيبي : لا يعمري اسم الله عليج اني شفت وفيت من هاي الدنيا انتي بعد كدامج عمر بعدبسم الله توني زوجتج
جنت غركانه بدموعي وهي تمسح بيهن بو صاير بيها شي جان مسامحت روحي ابد....
بيبي : لو ادري بيج تجين بس امرض جان من زمان وكعت
عشق : لاتحجين هيج الله ينطيج تعرفين ماعندي احد غيرج انتي
بيبي : واني شعندي غيرج
بهذا الحجي دخل سمير وهو ملهوف والخوف مبين علي
سمير : بيييبي ...
راح مباشرة عليها كعد لزم ليدها ويباوع عليها بخوف
سمير : بيبي انتي زينه ...خوما بيج شي
بيبي : الحمد الله والشكر واخيرا انتو الاثنين اجيتو علي هاي الوكعه بيها خير لكثر من شرها
باوع سمير على عشق الي مجان ملاحضها من الخوف
عشق : ماشي بيبي انتي ارتاحي تعبناج هواية اني راح اطلع
بيبي : لا يووم تعالي تعب ايش انتو راحتي بالدنيا
عشق : يروحي انتي(باستها من راسها ) بس لازم ترتاحين شويه اني انتظرج برو من تكعدين تلكيني يمج
سمير :اي بيبي عشق تحجي صدك انتي توج طلعتي من المستشفى ارتاحي
بيبي : هه لذا انتو تشوفين هيج ماشي راح ارتاح شويه
عشق : ماشي اني برة
طلعت عشق من الغرفه وراها طلع سمير طلعت مباشرة لاحديقه ... طلعت تاخذ هوا مخنوكه
سمير : عشق
عشق...
التفتت شفته.
عشق : انت بيا حق دتصيحلي لو سمحت عوفني ماريد احجي وياك
سمير : ماتريد تحجين وياي ليش بسرعه نسيتي منو اني
عشق : اني مانسيت كل الموضوع حايرة اذا انت نفسك سمير لو متوهمه
سمير : عششق
عشق بانفعال :شنو عشق شنوووو
سمير : اني اسف عشق
عشق : ليش دتتاسف لانك طلعت مو مثل مو اني اشوفك لو لانك داهمت العرس وبديت تخيط وتخريط كدامي على ياهو دتعتذر انت
سمير : على كلهن اني اسف والله مجنت بوعيي حجيت لان كلبي جان ديحترك مكدرت اضل ساكت لان جان يخنكني من جوة
عشق: حقك خوش حجه
سمير : 😠 متكوليلي شبيج انت شنو ترديني اركع كدامج واعتذر مثل المذلول لحتى تسامحيني
عشق : اعتذارت ميغير شي لايرجع عفويتي الجانت وياك ولا يصلح الي دمرته
سمير : شتريديني اسوي لعد هااا اني ندمان كلش الحب مو بيدنل اني حبيتج بدون ماحس بس كافي عادي عشق سامحيني لحتى اكدر اسامح نفسي اني ماكدر لا انام ولا اكدر اعيش مثل البشر كل ماتذكر كلامج اني اعترف حجيت حجي موراهم بس والله موبيدي والله سامحني عفيه لخاطر السنين العشناها سوا
باوعت بعيونه شفته الي ديكوله صدك ...
عشق : اريدك توعدني بالبدايه بشغله
سمير :كولي شنو واني من هسة اوعدج
عشق : بعد متشوفني وجهك
سمير : ه..ه.. ها.. عشق هذا صعب
عشق : اني هذا الي عندي تقبل اهلا وسهلا ماتقبل الله وياك
سمير : مااشي ... اوعدج بعد متشوفين وجهي
عشق :ههههههههههههههه
بديت اضحك علي
رفع راسه هو وصفن بيه
سمير : هااي شبيج
عشق : ههههههه ... باوع على وجهك شلون انكلب جذب دتشاقه وياك اصلا اعتذارك يكفيني وبعدين احنه متعودين انت الي تغلط واني الي لشامح مو بلله
سمير : ياحقيرة والله راد يوكف كلبي صدكتج
عشق : ههههههههههههه
لزم الكوشه مال المرحوحه وضربني بيا
سمير : كافي تضحكين سدي حلكج
عشق : ماشي ماشي باوع امممم
دحجي وياااا دك التلفون باوعت مروة
عشق : ها مروة
مروة :عشق تعالي سلطان طلع علي سحب الشكوة
عشق : صدك يلاا جايه ... سمير تكدر ترجعني للبيت
سمير : ماشي يلاا
رجعني سمير للبيت ارتاحيت الحمد لله واخيرا كلشي انحل او مدحلت صعدت لاغرفه بسرعه شفته بالغرفه
عشق : الحمدلله عالسلامه
بس هذا ماعرف شبي
سلطان :وين جنتي
نهاية البارت 😍😍😍😍