"Lucy က ဘယ်လိုဖြစ်ပြီး..."
Yeosang မေးလာသည်ကို ပြန်ဖြေစရာ Wooyoung မှာ အဖြေမရှိ။
"အလောင်းသွားစစ်ကြမလား"
သူမေးလိုက်တော့ Yeosang က
"မစစ်နဲ့ဦး သူမနေ့က ဘယ်တွေသွားခဲ့တယ် ဘယ်သူနဲ့တွေ့ခဲ့တာဆိုတာ အရင်လိုက်ရအောင်"
ဟု ဆိုလာသဖြင့် သူလည်း သဘောတူပြီး Yeosang နဲ့အတူ Lucy အကြောင်း စုံစမ်းခဲ့သည်။ သူတို့စုံစမ်းချက်အရ သိရတာက Lucy က Kevin နဲ့အတူ bar တစ်ခုမှာ တွေ့ပြီး သူ့အိမ်ကိုအတူပြန်သွားသည်ဟု သိရသည်။ အဲ့ဒါကြောင့် Lucy ရဲ့အိမ်က အဝင်အထွက် CCTV ကို စစ်ကြည့်တော့ Kevin နဲ့အတူ အိမ်ထဲဝင်သွားတာ တွေ့ရပြီး ၃ နာရီလောက် ကြာတော့ Kevin ပြန်ထွက်သွားသည်ကိုလည်း တွေ့ရသည်။ ထို့နောက်တွင် မည်သည့်လှုပ်ရှားမှုမှ မတွေ့ရ။ ဒါဆို Lucy က အိမ်က မထွက်ခဲ့ဘူးလား။ သူသေဆုံးချိန်ကလည်း Kevin သွားပြီးမှ ဖြစ်တာဆိုတော့ Kevin ကိုလည်း သွားမေးလို့မရ။ ဒါ့အပြင် သက်သေမပါဘဲ သွားမထိရဟု သတိပေးခံရထားသည် မဟုတ်လော။ Wooyoung တစ်ယောက် Jongho ဆီ ဖုန်းဆက်လိုက်သည်။
"Hello"
"Hello ... စခန်းမှူး ... Lucy ရဲ့အလောင်းကိုဘယ်မှာတွေ့တာလဲ"
"သူ့အိမ်မှာတွေ့တာ ... ဒီမနက် အရာရှိ Won က Lucy ကို သူ့ဆီခေါ်ခဲ့ဖို့ လူလွှတ်ရင်း တွေ့တာတဲ့"
"Ah ... ဟုတ်ကဲ့ ... ကျွန်တော်တို့ အကြောင်းထူးတာနဲ့ အကြောင်းပြန်ပါ့မယ်"
ပြောပြီး Wooyoung ဖုန်းချလိုက်သည်။ ထို့နောက် Yeosang ဘက်ကို လှည့်ပြီး
"အိမ်မှာပဲ တွေ့တာတဲ့ အလောင်းကို ... ဘယ်အချိန် လူသတ်သမားက ဝင်သတ်သွားတာလဲ ... CCTV မှာလည်း ခြေရာလက်ရာ မကျန်ဘူး"
Wooyoung ပြောလိုက်ရင်း
"ကွင်းဆက်လူသတ်မှုနဲ့ဆိုင်မယ်ထင်လား"
သူမေးလိုက်တော့ Yeosang က
"အလောင်းကို သွားကြည့်ရအောင်"
ဟု ပြောလာသဖြင့် သူလည်း ခေါင်းညိတ်ပြကာ ရင်ခွဲရုံသို့ ထွက်လာခဲ့သည်။
ရင်ခွဲရုံတွင် အလောင်းကို ကြည့်ရင်း
"အတူတူပဲ"
Yeosang က ဆိုလာသည်။ Wooyoung က ဟုတ်လို့လား ဆိုသော အကြည့်မျိုးနှင့် ကြည့်လာသဖြင့် Yeosang ကပဲ
"ဓါးထိုးချက်ကို ကြည့်လိုက်။ တစ်ထေရာတည်းပဲ။"
ဟု ဆိုသည်။
"လူသတ်သမားက ဂေဟာက မိဘမဲ့တွေကိုပဲ ပစ်မှတ်ထားတာ မဟုတ်ဘူးလား။ Lucy က အရာရှိသမီးလေ ဂေဟာနဲ့ ဘာမှမဆိုင်ဘူး"
ဟု Wooyoung မေးလာသဖြင့် Yeosang က
"အင်း ... ပစ်မှတ်ပြောင်းသွားတာများလား ..."
ဟု တွေးတွေးဆဆ ဆိုလာသဖြင့် Wooyoung လည်း အလောင်းကောင်ကြီးကို ကြည့်ပြီး တွေးနေလိုက်သည်။ ထို့နောက်
"ငါကတော့ Kevin ကို မသင်္ကာဘူး။ သေတဲ့အချိန်မှာ ရှိမနေပေမယ့် သူက နောက်ဆုံးတွေ့ခဲ့တဲ့လူလေ ... ပြီးတော့ သူနဲ့ Erika က ဘာလိုလိုညာလိုလိုနဲ့ ... Erika ကို မသတ်ရက်လို့ Lucy က ဓါးစာခံ ဖြစ်သွားလား မပြောတတ်ဘူး"
ဟု ဆိုလိုက်သည်။ ထိုအခါ Yeosang က
"Erika... ငါတို့ Erika နောက် လိုက်ရမှာလေ"
ဟု အလန့်တကြားပြောလာသဖြင့်
"Shit"
Wooyoung လည်း ကျိန်ဆဲပြီး သူတို့နှစ်ယောက် ရင်ခွဲရုံမှ အမြန်ထွက်ကာ Erika အိမ်သို့ ထွက်လာခဲ့သည်။
_________________________________________
"ကိုကို"
Hongjoong တစ်ယောက် Yunho အလုပ်လုပ်နေတဲ့နား သွားပြီး ဂျီကျနေခြင်းပင်။
"အင်း ပြော Hong လေး"
စကား ပြန်လာသော်လည်း သူ့ကို လှည့်မကြည့်သည့်အတွက် Hongjoong စိတ်နည်းနည်း ဆိုးချင်သွားသည်။ သူလည်း အခုတလော အကျင့်တွေ အရမ်းပျက်နေသည်။ အဲ့ဒါ ကိုကို့ကြောင့်။ ကိုကိုအရမ်းအလိုလိုက်ထားလို့ ဖြစ်တာ။ သူတွေးရင်း Yunho နားကို လျှောက်သွားပြီး ပေါင်ပေါ်ကို ခွထိုင်လိုက်ကာ Yunho ရဲ့ ရင်ခွင်ထဲ တိုးဝင်လိုက်သည်။ Yunho ရဲ့ မြင့်မားသော အရပ်၊ ကျယ်ပြန့်သော ရင်ခွင်က သူ့တစ်ကိုယ်လုံး အသာလေး ခိုဝင်နိုင်သည်။ သူ့ကို Yunho က ငုံ့ကြည့်လာကာ
"အချွဲလေး ... တအားချွဲနေတယ် ... ဘာပူဆာမလို့လဲ"
သူ့ပါးလေးကို အနမ်းတစ်ပွင့်ခြွေကာ အလုပ်ကို အာရုံပြန်ရောက်သွားသည်။ ကိုကို!!! တကယ်ကြီး သူ့ထက် အလုပ်ကို အာရုံစိုက်နေတာလား။ ဟွန့် သူ့စည်းစိမ်တွေကဖြင့် သုံးမကုန် ဖြုန်းမကုန်ကို ...။ သူစိတ်ကောက်သွားသည်ကို ထိုလူကြီး ရိပ်မိအောင် ရုတ်ချည်းထရပ်လိုက်ပြီး ခြေထောက်ကို ဆောင့်အောင့်ကာ အခန်းထဲ ဝင်သွားလိုက်သည်။
သူ့ကို မကျေနပ်ကြောင်း သိသိသာသာကြီး ဆန္ဒဖော်ထုတ်သွားတဲ့ ပိုးတုံးလုံးကို ကြည့်ပြီး Yunho ခေါင်းအသာခါလိုက်ကာ ရယ်လိုက်သည်။ သူအလိုလိုက်ထားလွန်းလို့ကို ဆိုးချင်တိုင်း ဆိုးနေတာ။ ဆိုးပါစေ ... သူဆိုးချင်သလောက်ဆိုး ... ဆိုးဖို့၊ချွဲဖို့က ပိုးတုံးလုံးတာဝန်... အလိုလိုက်ဖို့၊ ချော့ဖို့က သူ့တာဝန် ...။ ထိုစဥ်
Phone vibrating....
"ပြော"
"ဆက်လိုက်နေ ... တစ်ခုခုထူးတာနဲ့ တန်းအကြောင်းပြန်"
ဖုန်းချလိုက်ပြီး Yunho တစ်ယောက် Laptop မျက်နှာပြင်ကို စိုက်ကြည့်နေလိုက်သည်။ သူ့အတွေးထဲတွင် screen ပေါ်က စာရင်းဇယားတွေအစား Mrs. Kim က နေရာယူထားသည်။ သိပ်မကြာတော့ပါဘူး ... ခင်ဗျား လျှို့ဝှက်ချက်တွေ အကုန်ဖော်ထုတ်ပြမယ် ... ခင်ဗျားကြောင့် သေသွားတဲ့ ကျွန်တော့်မိဘတွေအတွက် ကျွန်တော်လက်စားပြန်ချေရမှာပေါ့ မဟုတ်ဘူးလား....။
Yunho အတွက် Mrs. Kim က Hong လေးကို ခိုးယူသွားတာထက် ပိုပြီး တာသွားသည်။ သူတို့ US က ပြန်ရောက်ပြီးတော့ Hong လေးကို ခိုးယူခဲ့တာ Mrs. Kim မှန်း Yunho ရဲ့ အဖေ Mr. Jeong က အရင်သိသွားခဲ့သည်။ ဒါကြောင့် ကလေးကို ပြန်တောင်းဖို့ လုပ်ခဲ့သည်။ ဤသည်ကို Mrs. Kim က ငြင်းဆိုပြီး သူ့မိဘတွေစီးလာတဲ့ ကားကို ဘရိတ်ကြိုး ဖြတ်ထားကာ ကားမတော်တဆမှု အဖြစ် ဖန်တီးခဲ့ခြင်းပင်။ ဒီအကြောင်းတွေကို သူ့အဖေရဲ့ လူယုံက ပြန်ပြောပြ၍သာ သိရသည်။ တရားစွဲရအောင်လည်း သက်သေအခိုင်အလုံ မပြနိုင်။ ဒါကြောင့် Mrs. Kim ရဲ့ ကိစ္စမှန်သမျှ သူဝင်နှောင့်ခဲ့တာပင်။ သူမသိသေးတဲ့ ကိစ္စတစ်ခုရှိသည်။ ဤသည်က Mrs. Kim နဲ့ Kevin နဲ့ ဘယ်လို သိနေတာလဲ ဆိုတာပင်။ သူ့ကို Hong လေးက ပြန်ပြောပြ၍ Mrs. Kim နဲ့ Kevin နဲ့ ဆက်သွယ်နေတာကို သူသိခဲ့ရသည်။ ထိုနေ့ကပင် သူလည်း Mrs. Kim နဲ့ သူ့အကြောင်းကို Hong လေးကို အကုန်ပြောပြခဲ့သည်။ တစ်ယောက်နဲ့တစ်ယောက် ဖုံးကွယ်ထားတာတွေရှိရင် အဲ့ဒီလျှို့ဝှက်ချက်တွေက သူတို့ဆက်ဆံရေးအတွက် အဖုအထစ်ဖြစ်လာနိုင်သည်။ ဒါကြောင့် သူနဲ့ Hong လေးကြားမှာ လျှို့ဝှက်ချက်ဆိုတာ မရှိအောင် သူတို့နှစ်ယောက်လုံး အကုန်ဖွင့်ပြောပြပြီး ယုံကြည်မှု၊ နားလည်မှုတွေကို ခိုင်သထက်ပိုခိုင်လာအောင် တည်ဆောက်ထားကြသည်။ အခုတော့ သူ့ကို ဆန္ဒပြသွားတဲ့ ပိုးတုံးလုံးလေးကို ချိုမြိန်လှသော အနမ်းပွင့်များ ဆက်သကာ စိတ်တော်ပြေအောင် ကြံဖန်ရပါဦးမည်။
_________________________________________