"အစ်ကို Hongjoong"
ပြေးလာရင်း သူ့အနားရောက်တော့ ထိုကလေးက ခဏအမောဖြေပြီး Hongjoong ကို ခေါ်လိုက်သည်။
"ဟို ... ဟိုလေ"
ပြောရခက်နေသော ကလေးပုံစံကို ကြည့်ပြီး ရှစ်ယောက်လုံး စိတ်ဝင်တစား နားစွင့်နေလိုက်ကြသည်။ အဲ ခုနစ်ယောက်ပဲ Yunho ရဲ့ ပုံစံက အရမ်း စိတ်ဝင်စားနေပုံမပေါ်။
"ပြောလေ ညီလေး ... ဘာမှမဖြစ်ဘူး"
သူပြောလိုက်ပြီး ထိုကလေး ခေါင်းလေးကို အသာပုတ်ပေးလိုက်သည်။ ခုနက စိတ်ဝင်စားမှု အလျဥ်း မရှိသော Yunho ၏ မျက်ဝန်းအစုံသည် Hongjoong ကလေးခေါင်းကို ထိလိုက်သည်နှင့် အရောင်များ လင်းလက်လာကာ ထိုကလေး၏ ခေါင်းကို စူးရဲစွာ ကြည့်လာသည်။ ထိုအခြင်းအရာကို မြင်သော Mingi က မလွယ်ဘူး ဟူသော ပုံစံနှင့် ခေါင်းသာအသာရမ်းနေတော့သည်။
"ဟို ... အစ်ကို Yoyo ကလေ ... ကြောက်စရာကောင်းတယ် ... သူ့ကို သွားမရှာနဲ့နော် ... အစ်ကို့ကို သတ်လိမ့်မယ်"
ပြောရင်း အလွန်ကြောက်လန့်ပုံပေါ်နေသော ကလေးကြောင့် ရှစ်ယောက်လုံး၏ သိချင်စိတ်က ပိုပြင်းပြလာသည်။ ထိုစဥ် Seonghwa က
"ဘာလို့လဲ"
"သားကို ... လည်ပင်း ညှစ်သတ်ဖို့ ... လုပ် ... လုပ်သေးတယ်"
ဆိုကာ ငိုသံပါလာသော ကလေးကြောင့် စိုးရိမ်စိတ်ဝင်လာသည်။ Hongjoong မနေနိုင်တော့ဘဲ
"အစ်ကို့ကို သေချာပြောပြပါလား ... အစ်ကို ရှိတယ် ... မကြောက်နဲ့နော်"
"သား ဒီကိုရောက်ပြီး ကြာတော့ အနိုင်ကျင့်ခံရတယ်။ သားမှာ သူငယ်ချင်းမရှိဘူး ... သားကို အနိုင်ဝိုင်းကျင့်တော့ ... ဟင့် ... သားလည်း ကြောက်ပြီး အခန်းထဲ ဝင်ပုန်းနေတာ ... အဲ့ဒါကို ...ဟင့် ... အစ်ကို Yoyo ရောက်လာပြီး ... သားကို သူ့ဆီလာဆိုပြီး ပြောတော့ ... သားလည်း ကြောက်လို့ အစ်ကို Yoyoဆီသွားတာ ... အွတ် ... အဲ့ဒါ ... အစ်ကိုက သားကို ဖက်ပြီး ချော့တော့ ... သားလည်း မကြောက်တော့ဘဲ ... အစ်ကို့ကို ပြန်ဖက်တာ ...ဟင့် ... အဲ့ဒါ ခဏကြာတော့ အစ်ကိုက သားကို ... အွတ် ... ပိုဖက်လာပြီး ... ဟင့် ... လည်ပင်းညှစ်တာ ... ဟင့် ... သားအသက်ရှူ ...အွတ် ... အသက်ရှူကြပ်သွားလို့ ကန်ရင်း ကန်ရင်းနဲ့ ... အွတ် ... အစ်ကို့မျက်နှာကို ကန်မိရင်း ထွက်ပြေးလိုက်တာ ... အဲ့နောက် ... အစ်ကိုက ဒီက ထွက်သွားတာ ... ဟင့် "
သူ့ကို ငိုယိုပြီး ပြောလာသော ကလေးကြောင့် Hongjoong ကလေးကို ရင်ခွင်ထဲ ဆွဲသွင်းပြီး ချော့ပေးလိုက်သည်။ ဒီကလေး ဘယ်လောက်တောင် လန့်သွားလိုက်မလဲ။ Yoyo ကရော ဘာလို့ အဲ့လိုလုပ်ရတာလဲ။ Yoyo က စိတ္တဇများ ဖြစ်နေတာလား။ အဖြေရှာမရသော မေးခွန်းတွေ Hongjoong ခေါင်းထဲ ပြည့်လာသည်။ အတွေးထဲ နစ်မျောနေတုန်း ရင်ခွင်ထဲက ကလေးက ခေါင်းလေးမော့လာကာ သူ့နားနားကို တိုးလာရင်း
"ဆရာမ Shal ကို မယုံနဲ့ အစ်ကို Hongjoong ... သားကို အစ်ကို Yoyo လည်ပင်းညှစ်တာကို ဆရာမတွေ့တယ် ...သားကို မကယ်ဘဲ ဒီအတိုင်းပဲ ကြည့်နေတာ"
သူ့ကို တိုးတိုးလေး ပြောပြပြီး သူတို့ကို နှုတ်ဆက်ကာ ဂေဟာထဲသို့ ပြန်ဝင်သွားသည်။ ထို့နောက် သူတို့ ရှစ်ယောက်လုံး ကားပေါ်တက်လိုက်တော့သည်။ ကားထဲရောက်တော့မှ ထိုကလေးပြောပြတာကို အားလုံးကို ပြန်ပြောပြလ်ုက်သည်။ ထို့နောက် San က
"ဘဏ် account နံပါတ်ကို စုံစမ်းခိုင်းထားတယ် ... မကြာခင် သိရတော့မှာပါ"
_________________________________________
"Erika?"
သူ့နာမည်ခေါ်သံကြားလိုက်လို့ လှည့်ကြည့်လိုက်တော့ အရပ်မြင့်မြင့် ခန္ဓာကိုယ် ကြည့်ကောင်းလွန်းလှပြီး မျက်နှာတည်တံ့နေသော အမျိုးသားတစ်ဦးကို တွေ့လိုက်ရသည်။
"ဘယ်သူလဲ"
သူမေးလိုက်တော့
"ငါ့ကိုမမှတ်မိတော့ဘူးပေါ့"
ဟု ဆိုလာရင်း သွားစွယ်များ ပေါ်လာအောင် ပြုံးပြလာသည်။ ထိုရင်းနှီးနေသော အပြုံးကြောင့် သူဝမ်းသာသွားသလို ဝမ်းနည်းသွားသလို ခံစားလိုက်ရပြီး ထိုသူထံ ပြေးသွားကာ ဖက်လိုက်သည်။
"Yoyo ...ဟုတ်တယ်မလား ... Yoyo မလားဟင်"
ပြောရင်း ထိုသူရဲ့ ရင်ခွင်ထဲ ပိုတိုးဝင်ကာ ဖက်လိုက်သည်။ သူ့ကို ပြန်ဖက်လာသော လက်များကြောင့် သူ့ရင်ထဲ ကြည်နူးမှုတွေ စီးဝင်လာသည်။ သူဘယ်တော့မှ မေ့မှာမဟုတ်တဲ့ သူ့နှလုံးသား အပ်နှင်းထားရသူ ဖြစ်နေသည့်အတွက်ကြောင့်ပင်။
"ကလေးလား အခုထိ ငိုနေတုန်း"
ပြောရင်း ထိုသူက သူ့ကို ခေါင်းမော့စေကာ မျက်ရည်များ သုတ်ပေးလာသည်။ ထို့နောက် ထိုသူကို သူ့အိမ်သို့ ခေါ်လာခဲ့တော့သည်။
Erika အိမ်တွင် ...
"နေနိုင်လိုက်တာ ...တစ်ခါလေးတောင် အဆက်အသွယ်မလုပ်ဘူး"
သူပြောလိုက်တော့ Yoyo က
"မဟုတ်ရပါဘူးကွာ ... ကိုယ့်မှာ မင်းကို တွေ့ဖို့ အခြေအနေ အဆင်မပြေသေးလို့ပါ ... အခု ကိုယ်လာတွေ့ပြီလေ ... မင်းကို တင့်တောင့်တင့်တယ် ထားနိုင်တဲ့ အင်အားရှိနေပြီ ..."
Yoyo က ရှင်းပြရင်း သူ့ကို ဖက်ထားသည်။
"အင်း ... နောက်ဘယ်တော့မှ ထပ်ထားမသွားပါဘူးလို့ ကတိပေး"
သူ့လက်သန်းကို ထောင်ပြပြီး ကတိတောင်းတော့
"အခုထိ ကလေးစိတ်မပျောက်သေးဘူး"
ဟု ဆိုလာကာ သူ့လက်သန်းကို ချိတ်လာရင်းမှ လက်ကို ဆွဲလိုက်ကာ သူတောင့်တခဲ့ရသော လွမ်းဆွတ်နေခဲ့ရသော ချိုမြိန်လွန်းလှသည့် အနမ်းတို့ကို ပေးအပ်လာသည်။
ဘယ်လောက်ပဲ စိတ်ဓါတ်ခိုင်မာသူ ဖြစ်နေပါစေ၊ ဘယ်လောက်ပဲ ကြံ့ခိုင်သူ ဖြစ်နေပါစေ၊ ထိုသူရဲ့ မသိစိတ်တစ်နေရာမှာတော့ ကာကွယ်ပေးမှု၊ မြတ်နိုးမှုတို့ကို တောင့်တနေသော အားငယ်စိတ်လေး ရှိနေစမြဲပင်။ ။
_________________________________________