مساء الخير أحبتي ❤💕
من هنا نبدأ بقصه و ابطال و عبر جديده
عسى ربي يوفقني بالقصه وأتمنى اوصلها بأجمل صوره الكم
بسم الله الرحمن الرحيم
أتمنى لكم قراءة ممتعه
بقلم: زهراء البياتي
اولا طبعا القصه راح اسردها اني والقصه حقيقيه
ثانيا الاسماء تختلف عن الحقيقة و اهم شي البطله مسيحيه بس مراح اذكر من يا طائفه بالضبط
واكو قسم من المسيح لغتهم فقط اللغه العربيه
بس اكو منهم يحجون بلغه السريانيه و اللغه الارمنيه
مراح اكول اذا البطله تحجي لغه غير العربيه لان حته لو جانت تحجي غير لغه فالقصه حتكون بس بالعربي
لان هواي اجو سألوني هيه مسيحيه و المسيح ميحجون عربي لا غلطانين المسيح يحجون اللغه العربيه و عدهم لغه ثانيه
واني راح انقل كلام البطله و البطل يعني مو باجر تجون تكولون بس ماكو شي هيج بالعراق او اني اعرف المسيحين هيج و هيج تره بكل دوله يختلفون المسيح و عاداتهم و كل كنيسه او دير يختلف عن الباقين
..............
ريم..سنه 2005 جان عمري ٩ سنوات
كاعده وارسم بالدفتر و ماما تظفر بشعري و تبجي
رفعت راسي باوعت عليها و ابتسمت
..ماما ليش تبجين راح ارسمج حته اضحكين
باوعت علي بنظره خووف و بعدين حضنتني حييل
غمضت عيوني واني ابتسم شكد احب ماما خاصه ريحتهه كولش طيبه
ام ريم.. حبيبتي ما ابجي بس طب بعيني شي و كمت ابجي انتي كملي الرسم خل انظف الغرفه
هزيت راسي و كعدت اكمل رسم
و ماما استمرت بالبجي و تلملم بالغرفه
جنت اباوع على دموعها التنزل وكولش اضوج ليش دائما اشوفها تبجي
دنكت وراحت ابتسامتي وشمرت القلم على الدفتر
ماريد ارسم اذا ماما تبقه تبجي
رحت وكعدت على الكاع ولميت رجلي لحضني
وكمت اباوع عليها و هيه تبجي وتلملم بس منتبهت الي
بعدين من شافتني اخذت نفس وحجت بنفاذ صبر
ام ريم..ماما انتي كبرتي شهل سوالف مال تزعلين وتكعدين بزاويه
..لان انتي بس تبجين واجذبين علي وتكولين اكو شي دخل بعيني
ام ريم..لج شنو اجذب ميصير هيج تحجين ويا امج اشو يلا كومي كملي رسمج يلا
مجاوبته درت وجهي عود زعلانه لان اريدها تجي و اتراضيني وتبوسني نفس كل مره
بس هل مره عافتني و راحت للمطبخ اول مره ماما متصالحني لييش شبيها ماما؟؟!
اندك الباب و بسرعه طفرت و اني فرحانه و اعيط
بابا اجه بابا اجه واكيد جايب الحلويات الاحبهن
فتحت الباب و اني الهث بس مشفت بابا شفت خالتي مريم واكفه وبأيدههه علاكه
مريم..هلا هلا بريمه
دنكت لمستواي وضلت تبوس بيه
..شهل خدود شهل بياض صايره اتخبلين و كبرانه
ابتسمت بخجل وهزيت شعري الطويل بدلع
..شكرا خاله
اجت ماما بعصبيه ومن شافتني عيطت بوجهي
ام ريم..شلووون تفتحين الباااب هااا شلوون اني مو كتلج اذا احد يدك الباب متفتحي الا اني شلون وياج انتي يمه منج ابد متسمعين الكلام
..اسفه ماما
ام ريم..ماما حبيبتي الوضع مو زين ميصير تفتحين الباب هاي اخر مره
هزيت راسي بأي واني مبرطمه شفايفي
مريم..متدري شبيج طفله شوي شوي عليها
ام ريم..من وراهه نسيت اسلم عليج شلونج حبيبتي
مريم..زينه انتي شلونج
ام ريم..والله حالي حال الضيم خايفه على وسام
مريم..لتخافين الرب يحمي
ام ريم..امين تعاي دخلي جوه للأستقبال شعندج واكفه
راحت خالتي للأستقبال و ماما راحت للمطبخ تجيب عصير واني بقيت صافنه وبراسي كلام ماما على بابا ليش خايفه على بابا ليش شبي بابا
نفضت افكاري ورحت للأستقبال يم خالتي
ام ريم..ملكيت عصير سويت جاي
مريم..عادي كلشي من ايدج طيب
ام ريم..شلونه يوسف ليش مجبتي وياج
مريم..رايح طالع ويا جماعته صاير مراهق وميكعد بالبيت بس يم جماعته
ام ريم..ديربالج علي تره الاوضاع مو زينه لا ابنج يروح منج مدتشوفين الخطف و السرقه و الاغتصاب الديصير
مريم..داشوف داشوف الاوضاع ابد مطمن بس شسويله ميقبل يكلي اختنك من البيت ويطلع ويا جماعته و ابو ممتشدد علي لان كله بالكنيسه ملتهي
ام ريم..ههههه والله اضحك عليج
مريم..ليش
ام ريم..يعني انتي من جنتي صغيره متدينه وتموتين على الصلاه والكنائس وازوجتي واحد كاهن بالكنيسه
وهم نفسج بس ابنج طلع العكس ولا يم الديانه
مريم..اي غير حضي بعد
ريم..خاله شوفي ماما شنطتني
طلعت الكلاده مال الصليب
مريم..شنو هاي كلاده امج
ام ريم..اي انطيتهيا اني
مريم..بالعافيه حبيبتي ابقي لابسته حته الرب يحفظج
زيين ودائما صلي للرب حته يوفقج
هزيت راسي وابتسمت
ضلت خالتي يمنا للظهر بعدين راحت
اتوسلت بيها اروح وياها للكنيسه بس ماما مخلتني كل ما اكول شي اتكول وضع مو زين
وره مراحت خالتي بساعه اندك الباب
ركضت واني اضحك فتحته و شفت بابا و اخويه ابراهيم
دخلو للبيت واني اكمز وفرحانه
..بابا وين الحلويات
وسام..بنيتي انتظري خل ارتاح واطلع بعد شوي اشتريلج
اختفت ابتسامتي وعفتهم ودخلت للأستقبال كعدت بالزاويه وحضنت رجلي حته يعرفون اني زعلانه منهم
براهيم..بابا هاي دللتوهه هوواي وهسه راح تخرب ميصير على كلشي تكولولها اي
ماما بسرعه دخلت وحضنت ابراهيم
ابراهيم..ماما مابيه شي شكو
ام ريم..خفت عليكم اتأخرتو
وسام..لتخافين مابينه شي
ام ريم..شسويتو اخذتو الفلوس
ابراهيم..اني حطلع ويا يوسف ساعه واجي
ام ريم..مو تتأخر ماما
ابراهيم..لا ما اتأخر
طلع اخويه واني بعدني حاضنه رجلي وكاعده بالزاويه
بابا فتح ايده بحركه تعالي خل احضنج
اني بسرعه ابتسمت ورحت ركض لحضنه
ام ريم..يا وسام شبيك داكلك احجيلي اخذتو الفلوس لا
وسام يبوس بريم بكل مكان وهيه تضحك
رفع راسه وباوع على ماما
..مقبل ينطيني
ام ريم..يمه ليش فلوسنا شنو ميقبل انته مو حطيتهم يمه حته تسون مشروع وصارت الظروف ولغيتو المشروع قبل لتبدو اصلا على اي اساس مينطينا فلوسنا
وسام..الكلب مديقبل ينطيني ايكلي صرفتهن
لحيت علي ضل يهدد ويعيط بالاخير يكولي
شبيه مخبل انطي فلوس لواحد مسيحي نفسك
كتله هاي فلوسي مو بس فلوسك واني خليت ثقتي بيك شلون هيج تسوي بيه يكلي ماعندك فلوس يمي شسوي يعني اتورطت بعد
ام ريم..وهسه شلون اوف منك وسام كتلك لتأمن بيد هل انسان معروف سكير وسمعته مو زينه شكو تحط ايدك بأيده
وسام..مادري بعد مادري
جنت كاعده بحضن بابا واني اباوع على وجوهم الحزن
حطيت راسي على صدر بابا امنيتي اوخر الحزن من وجههم
كعدت ماما حطت ايدهه على وجهه وتبجي
وبابا صافن على الحايط ويتنفس بصعوبه
بعدين حجه بنفاذ صبر
وسام..لتبجين ادبرلي شغله واجمع فلوس
ام ريم..شدبر وسام شدبر انته مدتشوف اوضاع العراق
سقط صدام وهسه حيشكلون حكومه انتقاليه
يمعود اني ردت الفلوس حته نطلع من العراق نهاجر مالنا كعده بعد اني اذا ابراهيم يطلع بره اضل لازمه كلبي لا ياخذو او يسوله شي
وسام..باجر اروح اخذ جماعتي ونروح علي هم اطالب بفلوسي ما اعوفهن هذن من حقي
ام ريم..اي بلكت ينطيك
ريم..وخرت من حضن بابا وعفتهم يحجون لوحدهم ما احب اكعد اشوفهم ضايجين
رحت للمطبخ جريت كرسي وحطيته بصف الباب الخارجي من المطبخ صعدت على الكرسي وفتحت القفل وبسرعه طلعت بره من الحديقه الخارجيه
للباب الرئيسي
اول مطلعت شفت ساره صديقتي دتلعب
شافتني وفزت واجت ركض واني هم رحت حضنتهه
ساره..شلونج ريم
..زينه انتي شلونج
ساره..اني هم زينه بابا اشترالي لعابه باربي بالبيت مالتنا تعاي وياي حته اشوفج العابه
هزيت راسي ورحت وراهه بس متردد اخاف ماما تعرف بيه طالعه والله تضربني بس كلت شوي وارجع للبيت
دخلت للبيت مالتها جان كولللش جبير وحلوووو دائما اخويه ابراهيم يكولي هذول طاكين يعني اغنياء هههه
دخلت وشافتني امها لساره بس شو خزرتني وراحت وصاحت على ساره
ساره راحت وراهه واني بقيت انتظرهه يم الباب اباوع شكد حلو بيتهم الله لو عدنا احنه هم هيج بيت
سمعت صوت صياح امهه تكولهه
- شكو ادخلين هل مسيحيه هاااي كم مره اكلج صادقي بنات مسلمات هاي كافره ونوب جايبتهه للبيت هسه اطلعيهه وروحي صادقي شمس احسلج ابوج ميقبل تمشين ويا هيج بنات
بس سمعتها هيج حجت طلعت من البيت اركض بس انضربت بجسم واحد طويل
رفعت راسي شفت اخوه ساره ابتسم الي ودنك لمستواي
- انتي ريم مووو
هزيت راسي بأي
- شكو طالعه تركضين ليش مدخلين للبيت يم ساره
- عمو امك متريدني اتكول لساره لدخلين هاي الكافره للبيت هو شنو كافره يعني
ابتسم ورفع ايده لزمني من رجلي
اني بسرعه كمزت ورجعت ليوره
- شبيج عمو ما اسويلج شي بس تعاي
رحت يمهه وهو باسني من خدودي وطلع فلوس من جيبه وانطاني
فتحت عيني فرحانه اخذت الفلوس
..هاي الي الفلوس
جاوبني اي الج وحضني بس ضل يلزم برجلي ويرفع الثوب مالتي ضجت منه ليش يلزم رجلي دفعته
وركضت طلعت من البيت
وشفت ابراهيم واكف يم الباب مالتنا
بس شافني صار عصبي واجه علي جرني من شعري للبيت دخلني وهو يعيط علي
..شلوووووون وياج كم مره نكلج لطلعين امج رادت تموت من شافتج ماكو بالبيت وين جنتي
..اخخخخ ابراهيم جنت يم ساره عوف شعري دتأذيني
دخلني للبيت وشمرني على ماما
..هاي بنتج جانت عند بيت ساره
اخذتني ماما رزايل يوم كامل وبس تشوفني تحجي علي وحته لبابا كالت وبابا زعل مني
بس همزين مشافو الفلوس ضميتهم بالثوب
ثاني يوم بليل بابا اجه للبيت فرحان كولش
كال لماما من اخذت جماعتي وشهود على الفلوس النطيتهم اله قبل ينطيني الفلوس باجر راح استلمهم
و ماما فرحت هم كولش
حته اني فرحت كلت حينطون لبابا فلوس ونصير نفس بيت ساره اغنياء نفس ابراهيم ميكول طاكين
جنه كاعدين بالاستقبال و بابا و ابراهيم يحجون على وضع العراق و ماما تخيط فستان الي
جنت كاعده يمها وصافنه و فرحانه منتظره يخلص الفستان حته البسهه
ام ريم..ماما ريمه روحي نامي مو زين عليج تسهرين
..لا ماما و الفستان مو كلتي اليوم تخلصي
ام ريم..اي ماما اخلصهه اليوم بس شوي تتأخر روحي نامي حته الباجر اتكعدين وتشوفين الفستان و تلبسي
..ماشي حروح انام بس من تخلصين خلي الفستان يمي حته من اكعد بسرعه البسه
ام ريم..هههههههه حاضر
كمت وبست بابا كتله تصبح على خير وهو هم ضل يبوس بيه ويدغدغ يلا عافني
ابراهيم..ماكو الي هم بوسه
طلعت لساني بغيض وكتله
..لا لان هذيج المره ضربتني ما انطيك بوسه
ضل يضحك واني عفتهم و دخلت لغرفه بابا و ماما
لان انام يمهم على الكاع
حطيت راسي على المخده واني اضحك
طلعت الفلوس وشفتهم ابتسمت باجر اروح اشتري بيهم حلويات حطيتهم جوه المخده
ضليت اتكلب بالفراش يلا نعست وداغمض عيني اريد انام بس سمعت صوت من جوه مال طكطه
بعدين وره دقايق سمعت صوت عياط ماما جان صوتها كولللللللللش عالي وهيه تصيح
..ابراااااااااااااااااهييييم
وراهه صوت بابا و هو سكول منوووو انتو
اني بسرعه فزيت ورحت فتحت الباب على كيف
ورجلي و ايدي ترجف مديت راسي
شفت اكثر من اربع ولد لابسين ملابس سود يفترون بالبيت وماما تعيط بصوت عالي من الاستقبال
وهذول شكلهم يخوف كلش
ام ريم..عوفوني عوووووووفوني عووووفوني لاااااا لاااا
سمعت صوت ماما هيج تعيط بسرعه
رجعت للغرفه ركض وسديت الباب على كيف
ورحت ختلت وره الباب بالزاويه لميت رجلي لحضني
وكمت اطكطك من الخوووف وعياااااط ماما بأذني
كمت ابجي والدموع تنزل منو هذول بابا وينك ماما كاعد تعيط منووو هذول
ضليت ابجي وصوت ماما اختفى مضلت تعيط ضليت بالساعه هيج اني خاتله وابجي
بس اسمع صوت رجلين وصوت ولد يحجون
واحد منهم يكلهه يلا ليحسون الجيران خلينا نطلع
والثاني يكله ماكو ذهب او فلوس
بس هذاك كله عوف كلشي من وره صياح المره راح يجون الجيران خلينا نطلع من وره
بعدين صارت صوت مشي قريب كلش يمي
انفتح الباب واني حطيت ايدي على حلكي
بس بسرعه انسد و ضليت هيج اكثر من نص ساعه
بس صوت الولد ماكو حته صوت مشي راااح و ماما هم راح صوتهه
وكفت على حيلي و فتحت الباب على كيف
مديت راسي شفت محد اكو كمت امشي على كيف بس ماكو اي احد رحت للأستقبال اريد اشوف ماما و بابا
دخلت ولكيت ابراهيم و بابا من ركبتهم اكو دم طالع هووواي
و ماما جانت ملابسهه كلها مشككه ودم من بطنهه
كامت ايدي ترجف طلعت من الاستقبال ركض
رحت طلعت من الباب مال بيتنا واحس مي ينزل من رجلي مهتميت كمت اركض بالشارع واني ابجي
واعيط
..ماما مجروحه وبابا واخويه هم تعالو حبابين تعالو
ابجي واعيط و اركض و الهوى يضرب بوجهي
لحد موصلت يم بيت خالتي جانت بالشارع الورانه بيتهم ضليت ادك على الباب حيل وابجي ادك واحجي
..خااااله افتحي خاااااله بابا طالع منه دم خااااله خاله افتحي حبابه خااااله
جانت دنيا ليل ومحد بالشارع ولا ضوه اكو والدنيا بارده بس احس بروحي صايره نار من الحراره
ضليت ادك حيل وبعصبيه واعيط بكل صوت
..خاااااااااله فتتتتتتتحي الباااب حبابه
لحد مسمعت صوت خالتي تعيط
..منووو
..اني اني اني خاله اني ريم
بس حجيت هيج انفتح الباب وجانت خالتي مبين عليها النوم عيونها بلكوه فاتحتهم
مريم..ولج ريم شسوين بنص الليل شكو
..خاله ماما و بابا بالبيت ابجي واشهك بلكوه احجي وتطلع مني الكلمات
طالع من جسمهم دم كلهم دم طالع منهم
فتحت عينها خالتي وجرتني للبيت وضلت تباوع على شكلي وعلى رجلي لان جنت مسويتهه عليه واني مادري
محجت اي شي بس طبت للبيت اخذت يوسف ابنها بكد اخويه ابراهيم واخذوني ورحنا للبيت
جان يوسف لازم ايدي و خالتي تركض كدامي
من دخلو للبيت اني بقيت بره ماريد ادخل اشوف الدم
سمعت صوت عياط خالتي وهيه تبجي وتكول ليوسف ذابحين يمه اختي يمه ذابحيهم ولك يوسف شوف ابوك وينه خل يجي ولك خابر الشرطه يمه يمه يمه
سديت اذني بأيدي ورحت كعدت على الكاع ولميت رجلي لحضني وكمت ارجف وسنوني اطكطك
اجه يوسف بس شافني هيج شالني وضل يهز بيه يريدني احجي بس ماكو احس فقدت واسمع صوت خالتي تبجي وتعيط ولكم ماتو و ماتو
حسيت بيومها هاهيه حموت وراهم ضليت هيج ويوسف يهز بيه بس بلحضه غمضت عيني وبعد ماعرف شصار!!!
ريم..فتحت عيني شفت حايط ابيض
عكدت حواجبي وضليت اون اريد اعرف وين اني
بدت الصوره تتوضع عندي شوي شوي
درت وجهي شفت يمي دكتوره تضرب ابره بأيدي
..ماما ماما
الدكتوره..حبيبتي اششش ارتاحي هسه اكول لاهلج كعدتي
ابتسمت بس حجت هيج الدكتوره اهلي اهلي عايشين يعني اني جنت احلم اي اي يعني مطالع منهم دم موو
دخلت خالتي عليه وهيه تبجي اول مشافتني ركضت حضنتني
عكدت حاجبي اباوع وراهه دخل يوسف و عمو زوج خالتي وخرت من خالتي وحجيت بتعب
..خاله وين ماما بابا وين ابراهيم ليش مأجه
مجاوبتني بس حطت ايدههه على حلكهه وضلت تبجي ودارت وجهه تباوع على يوسف
يوسف ابتسم ولزم ايدي
يوسف..ريمه انتي هسه ارتاحي ومن اتصيرين زينه نحجي ماشي
كمت اهز براسي واعيط و دموعي تنزل على خدي
..لا لا لا ما ما اريد بابا اريد ماما هسه تكولولي وينهم ماما كلتلي اتكعدين اتلبسين الفستان السوته وين الفستان يلا خاله وديني يلا يلا عمو عمو وديني لماما حباب عمو والرب اصير عاقله وماطلع من البيت يلا عمو وديني
اجه عمو وحضني ويمسح على راسي
وخالتي ادك على رجلهه وتبجي مسكتت من البجي
و يوسف جانت نضراتهه كلها خوف و حزن عليه
بيومها عرفت مو بس يوسف راح يباوع علي هيج لا كل الناس حيباعون هيج عليه لان بدون اهل
اي بدون اهل اني طفله من عمري ٩ سنوات اتيتمت
يتيمه الاب و الام وحته الاخوان!
مرت الايام و الايام اجر شهر و الشهر يجر سنه
واني مبتعده عن الحياه التعيشه اي طفله نفسي
من يوم ما ماتو اهلي علقت على نفسي
طبعا عشت ويا خالتي لان بابا ماعنده اهل كلهم ميتين بس اخ و مسافر بس ماما عدهه اخت الي هيه خالتي مريم و اخ بس عايش بالموصل
خالتي صارت بمكان امي ابد محسستني بيوم اني بت اختهه و تحاول بكل الاشكال اطلعني من الحزن الاني بي بس ضليت سنتين قليل احجي قليل اكل قليل اضحك قليل انام قليل اتنفس؟! اي حته النفس احسه قل من اهلي عافوني
صعبه!؟ اي كووولش صعبه صعبه من اغمض عيني تجيني صوره بابا واخوي من مذبوحين!
صعبه من اتصير ضلمه اشوف ماما كدامي بدون ملابس والدم مالي بطنهه جنت ادعي دائما للرب ينور اهلي ويخليهم بالجنه بس من عرفت ماما مغتصبيها قبل ليكتلوها ضليت ادعي الرب ينتقم من الكتلوهم
اتمنيت اعرف ليش كتلوهم بس ناس تكول حراميه و ناس تكول السكير الجان بابا متفق ويا علمود الفلوس و ناس تكول عداوه عدهم ويا ناس وكتلوهم او مسوين شي وكاتليهم
جنت ما اصدك اهلي مأذين احد لان بعمرهم مجرحو احد وجان بابا كولش مسالم ومثقف
زادت الاوضاع بالعراق للأسوء وخاصه بدايه سنه ٢٠٠٧
الانفجارات و الطائفية انتشرت صار السني يقتل بالشيعي و الشيعي يقتل بالسني صارو ناس حته يخافون يكولون اني هيج واني هيج
وكل منطقه صار بيها سكانهه منطقه شيعيه و منطقه سنيه واذا واحد شيعي عايش بمنطقه سنيه يجي بسرعه تهديد
اما احنه المسيح هم ادهورت اوضاعنه هواي هاجرو خارج العراق و اكو قسم بقه جان يوسف يدرس مهنه الطيران ودائما يكول لخالتي خلينا نطلع من العراق
بس متقبل خالتي ابد و عمو هم ميقبل لان يشتغل كاهن بكنيسه وميقبل يعوف لا شغله ولا العراق
جانت عيون عمو دائما مدمعه من يشوف الاوضاع
وياخذني ويا للكنيسه ندعي للشعب العراقي تخلص هل طائفه والعراق يرجع بخير
يوم من الايام جانت خالتي ويا عمو بالكنيسه
ويوسف بره البيت واني لوحدي ودائما من ابقه لوحدي افكر بماما و بابا وتجيني تخيلات كلها تخوف
اختنكت وكفت على حيلي ولبست حذائي وفتحت القفل وطلعت من البيت للشارع
شفت السيارات و الاطفال و المحلات والشمس تصطر
ضليت امشي والتفت وراي لا احد يشوفني
وصلت لراس شارعنا واحس كلبي يدك يريد يطلع من مكانه بلعت ريكي وكمت امشي واباوع على البيت النولدت بي اباوع على البيت الجانت بي ضحكتي الجانت بي احلا ايامي
وصلت كدام الباب خايفه افتحه متردده
بس بالاخير فتحته و دخلت شفت الباب الرئيسي مقفول رحت افتريت وره البيت كمت افتح بالقفل الوره بسرعه ينفتح بدون مفتاح لان مكسور
دخلت للمطبخ بسرعه اجت عيني على الطباخ اي جانت هنا ماما توكف و تطبخ
نزلن دموعي مشيت ورحت وكفت كدام الاستقبال ايدي ترجف بلكوه فتحت الباب
واول مشفت الكاع نظيفه حطيت ايدي على حلكي كمت ابجي اي هنااا الدم جان هنااا
رحت بمكان ماما الجانت ميته بي حطيت ايدي على الكاع ابجي والدموع تنزل على المكان
..ماما هنا عفتيني ماما انتي من وراي متي موو لان اني خليتج تبقين تسوين الفستان ماما بس رجعي والرب ما اكلج اريد فستان ماما بس ارجعي حبابه ماما ارجعي
وماطلع من البيت بدون علمج ماما حبابه
وكفت رحت بزاويه كعدت ولميت رجلي لحضني واباوع كدامي اذكرهم وهم ميتين والدم مليان
ضليت ابجي بالساعه و اكثر حته صوت ماما من تعيط وتكول عووفوني يرن بأذني
فزيت على صوت الباب من ينفتح بسرعه وكفت مخترعه منو ديفتح الباب غمضت عيني بقوه عبالي هم حيجون ويكتلوني نفس ماما بس سمعت صوت خالتي
وهيه تحجي
مريم..يمه هنا انتي ولج كلبي راح واني ادور عليج ليش هيج ريمه ليش
اجت وحضنتني واخذتني وطلعتني من البيت وقفلته
باوعت علي و ضلت تمسح بدموعي واحس بنضراته اكو خوف بعدين دنكت لمستواي ولزمت ايدي
مريم..انتي الظاهر جرحج مراح يطيب بهيج دنيا
باوعت عليها وكلت واني اشهك
..خااااله لو اموت نفس ماما احسن
حطت ايدهه على حلكي وسكتتني
مريم..لا بنيتي لتحجين هل حجي تردين ترتاحين تردين تعيشين حياه بعيده عن هل ناس وهل ظلم
هزيت راسي بأي
مريم..لعد امشي اخذج للدير وراح افهمج كولشي بعدين تعاي وياي المكان الاخذج بي راح اضلين طول عمرج تدعين لاهلج وراح يرضون عليج يلا تعاي
ريم..غمضت عيني ونزلت دمعتي بعدين مسحت خدودي من البجي
ضميت الصليب جوه ملابسي
خالتي جانت واكفه وتنتظرني الزم ايدها
مشيت وصرت يمها واكفه كمت ارمش بعيني واباوع عليها و هيه مبتسمه بوجهي حجيت على كيف واني مبرطمه
..خاله مريم يعني وين حنروح هسه
مريم..نروح نعيش بأحلا مكان بس لزمي ايدي
..المكان الراح نروح بي اشوف بي بابا و ماما و اخويه
دنكت خالتي لمستواي و لزمت خدي وابتسمت
..امج و ابوج و اخوج فوك بالسما ميحتاج ترحين لمكان وتشوفيهم بس رفعي راسج للسما هسه تشوفيهم
رفعت راسي وشفت السما مغيمه
..بس مداشوف شكلهم
مريم..اي انتي متشوفين بس همه يشوفوج
وهسه تردين ترحين وياااي
ابتسمت وهزيت راسي
..اي اروح اضل اصلي للرب واكوله اريد اصعد فوك يم امي و بابا
مجاوبتني بس باوعت علي بنضره معرفت شلون افسرهه اخذتني وطلعنا من البيت شفت ساره راجعه من الدوام لان الجنطه وراهه صارلي سنتين مشايفتهه
بس شافتني فتحت عينهه واجت علي ركض بس خالتي مخلتني اسلم عليها جرتي بسرعه ضلت تمشي وساره تعيط علي بصوت عالي
..ريييييييم وين رييييييم
كمت اباوع على ساره وعلى خالتي الجارتني وتمشي
..خاله ليش دنمشي على السريع ايدي اخخخ اريد اسلم على ساره
مريم..ماكو بعد ساره هذول انسيهم بعد
ضجت ليش انساهم وين راح تاخذني يعني معقوله راح اموت لان تكولي تنسيهم
يتبع....
هذا البارت الاول بعدهه ممبينه بي الاحداث من البارتات التجي راح اتصير احلا و احلا الاحداث ويظهر البطل ❤
اريد تفاعلكم على القصه❤
تحياتي كاتبتكم زهراء البياتي