_
_
#عشق_في_بلاد_حروبها_لا_تنتهي2
#طرابلس_ياغارقة_في_الدم
البارت 20
.
.
في الحلقة السابقة
طلع محمد من شقته وهوا قعد ممبتسم علي تصرف رنا وعصبيتها معاه ، سكر الباب ونزل وهوا قعد شاد التليفون في يده وجي في ودنه صوت رعد لقال:حطوها في الاستراحة المستودع مكان مشبوه ومعروف
فاتح:اي قتله يرفعوها غادي طول اني بنسلم بضعة لولد ونمشيلهم
رفع رعد حاجبه:يا..... وقت بيع هوا تي انم رائد مشدود وقعد تفكر في بيع
فاتح:شن تبي من امي ندير نرخي بأم الراجل نمشي نسلمله بضعته ونمشيلهم
ونزل فاتح وخلا رعد يخبط علي الحديد الحماية متع الدروج ونزل ....
مسح محمد علي شعره وهوا يتلفت يضرب في الحيط برجله:يانعن فيتك ياصقر ينعن فيتك
قراءة ممتعة
#البارت_العشرون
ماضنيت فيك شر يادنيا ، شريتك وانتي بعتيني 💔
.
.
قلب لكلاشن وضربه بيه من التالي علي راسه بالقوة لين رائد طاح بالكرسي علي الارض ، شد جبته لقعدت تنزف بيده وبيد التانيه سند بيها روحه علي الارض وهوا يصيح:ياولد ال.......
طبسله الشاب وشده من شعره وضربه علي بطنه برجله بالقوة:يا...... كان ماربيتك قول وين خوتك لكلاب قول وين تسكن قول ......
ورخي شعر رائد وزاد ضربه علي بطنه بالقوة وتلفت وهوا يصيح:ارفعوه للغرفه التانيه وعلقوه من رجليه ال....... كان ماخليته يقر كل لعنده مانتسمه
قام رائد روحه شوي وهوا يكح في دم ليمسح فيه من علي فمه بكمه وحاس بدوخه من ضربت راسه ...
وقبل ماحتي ياخد نفس من الضرب لكلاه جو زوز شباب وشدوه من كتافه وقاموه وهنا يلكمو فيه من غير رحمه وهما يقولوله يوقف بس رائد ماقدرش يوقف من الضرب لكلاه وقعد راخي رجليه وجروه للغرفه التانيه وعلقوه من رجليه وخلوه رأسا علي عقب ، حاول رائد يعيط ويستنجد بس ماقدرش وهوا حاس بتعب وحاس براسه لصدع ولما حطوله سلسله في رقبته قعد يفتح في فمه وهوا يحاول يتنفس لانه خشمه قعد يصب في دم من الضرب ولما قلبوه قعد الدم في خشمه ومانزلش وشرق بيه ...
حسو بيه الشباب لعلقوه وهما يشبحو لبعض ، وواحد مهم قال....:كان خليناه هكي يموت ياراجل نزله فكنا من الصقر يطلع روحي وروحك
هز الشاب التاني راسه ونزلوه طول وحطوه علي الارض وهما يلكمو فيه باش يتأكدو انه صاحي ولما تأوه رائد ، طلعو وخلوه ملوح علي أرضية الغرفة ، كانت حالته متبهدله وجهه كله دم وجروح وضرب ، فتح عيونه لمغبشات وهوا يحاول يستاقط بس مش قادر رجع سكر عيونه وغمي عليه ........
.
.
.
.
__
طلع أحمد من المحل وهوا يرد علي امه:ها يمه اهو جاي
امنه:جيب قلمات لغالية قبل ماتطلع من المحل
أحمد:باهي
سكر أحمد ورجع للمحل وخدي قلمات وطلع وهوا يشبح لشكاير لساوي فيهم في يده واول ماقام راسه انخلع بالسيارة لجت قدامه بسرعة ودرست ، وخر وهوا يستني في حد ينزل من السيارة ، واول ماشاف محمد لفتح الباب ونزل وهوا يتلفت لأحمد ببتسامه ويحول في نظاراته ، تنهد احمد من وسط قلبه وقرب وقال:كيف عرفت مكاني ازح
محمد:مايخفي عني شي نا
احمد انفعل وعيط:تي سيبنا في حالنا وحده بوحده خوك قتل بوي وخونا ردها انتم لبديتو يامحمد خوك لعنة الله علي....
وقبل مايكملها احمد جاه بوكس علي وجهه من محمد لين طلق احمد الشكاير لي في يديه وهوا يشد في خشمه ويطبس لوطه من الألم ، قرب محمد وشده من ياقت سوريته وزاد ضربه وهوا يصيح:لعنة ربي عليكن انت وهلك يافرخ لحرام وربي تجيب سيرت خويا علي السانك ندفنك وانت عايش وربي ندفنك وانت عايش ياكلب
قربو شباب الشارع وفكو أحمد من محمد اللي غضبة وتعصيبه وغله من الصقر ومن خطف رائد ومن قصة خوه وحرقته عليها كلها في أحمد ، فك روحه من الشباب لبعدوه من أحمد وهوا يدف فيهم وشبح لأحمد لقعد طايح لوطه ورفع صبعة عليه وقال:وربي وراك وراك لين ناخد ثار خويا من عيونك وعيون خوك المجرم
وتلفت مشي ركب سيارته وتحرك وخلا أحمد يمسح في خده لنجرح وعينه لولت زرقة وهوا خايف من المستقبل مع محمد خايف لدرجه مش حاس بألم الضرب لكلاه منه .......
.
.
.
__
.
عندي وطن بنفارقه ، الخيال في البعد بس مصعبه ، عندي وطن مشدوده روحي بروحه ، ببعدي عنه بينكسر قلبي وبتنفتح جروحه 💔
.
.
.
سكرت نادين حزام الامان وغمظت عيونها وخدت نفس كبييير وطلعاته وهيا تفتح في عيونها وتلفتت لفارس ببتسامه لسكر تليفونه وحطه في جيبه وتكه براسه علي الكرسي..
بتسمت نادين وهيا حاسه بدقات قلبها يزيدو بس وهيا في عز مشاعرها ونظراتها لفارس لمعبيه حب وعشق ، خافت لما تحركت الطيارة وهيا تشد في يد فارس بالقوة:ياماماااا
تلفتلها فارس طول وهوا يحول في يدها من يده وقال بحده :ماتخافيش الطيارة بتقلع
ورجع شبح قدامه وتكه راسه علي الكرسي وغمط عيونه ..
زمطت نادين ريقها وقعدت تشبحله وفرحتها هدت من نبرة صوته الحاده ، اتكت علي الكرسي بهدوء وشبحت قدامها وهيا تفكر ، زعما بموافقتي عليه غلطت زعما حلمي بيه وبي حبه ح يقعد حلم بس حتي بعد ماتجوزته .......
#حرموني_منك_ياوطني
.
.
.
.
__
.
.
نفخت رنيم وهيا تحدف في تليفونها علي السرير وتتلفت لنور:يااسو ياسو من لبكي تواهو يضحك ويلعب وبالك حتي يكلم في بنت تانيه وانتي قعده تتبكي هني عليه
وتلفتت لخالتها لمقعمزه وحاطه رجل عليرجل ورافعة حاجبها بعصبيه وكملت:تي قولي كلمه ياخالتي
ميسون:شن تبيني نقول وانتم امشيين لميه من تحت رجليا وحاطييني زي الاطرش في الزفه هدا غير ماادسو عليا في شي
نفخت رنيم:واااك ياخالتي ماتبديش فيها
ميسون شبحت لنور وصيحت:ياااااسر بكي
نور قالت من بين بكاها:مش قادره قلبي مش مطمن عليه
نفخت رنيم وشبحت لخالتها ميسون لقالت:اشبح كيف شكله هاللي تبكي عليه ان شاءالله مايطلعش زي ماقالت رنيم لاهي في غيرك
نور مسحت دموعها وقالت:لالا والله سمعت صوت رصاص ياخالتي حاسه ابصر شن فيه والله قعده كيف فرحت بيه ياربي ماتخسرنيش فيه زي ماخسرتني في ماما
تنهدت رنيم وقعمزت جنب خالتها وهيا تشبح لنور:باهي خلاص بطلي ان شاءالله خيو تفائلي انتي بس
نور:باهي باللهي عليك زيدي حاولي مع رعد
تلفتت ميسون لرنيم وقالت:من رعد حتي هدا
رمشت رنيم رموشها لخالتها لحطت يداها علي راسها وقالت:ياربي وين كنت مدكوكه اني اخخخخخ صح لسانه لقال هم البنات للمامات.......
.
.
__
.
.
في الليل ....
ضيق بو آيات نور الدين عيونه وقال:وعلاش هدا وين تقولي
آيات:نحسابه لما مانعدلش عليه ح يبطل يلحقني وقولت في الاول لسهي بس ، بس بعد لداره يوم لخميس خفت وقلت لماما باش تقولك
تنهد نور الدين بتعصيب:المفروض من اول يوم قلتي عليه لبلاد ماعاش اطمن كان دارلك حاجه ولا لاسمح الله خطفك
سعاد:ماعاش تخلوها تمشي وتروح علي رجليها خلي نديرولها باص وخلاص
نورالدين:لالا حتي البصات يخوفو تو نرفعك ونجيبك اني ولما مش فاضي يرفعك خوك
بتسمت آيات براحة ووقفت:معناها غدوة انت بترفعني
نور الدين:اي بري ارقدي باش تنوضي بكري وماتعطلينيش علي الخدمه
آيات:حاضر تصبحو علي خير
خشت آيات لدار وهيا شاده تليفونها وتقرا في رسالة عمر ببتسامة(امتي بجي يوم التلات عادي نغشو ونقولو غدوة تلات)
ضحكت آيات ورفعت راسها لسهي لراقده في سريرها:غر من يضحك فيك
قعمزت آيات علي سريرها:حبيبي
رفعت سهي حاجبها:غر مش هكي
آيات ضحكت وفي اخر ضحكتها تنهدت وتلفتت شبحت لسهي:تعرفي قلبي مش مرتاح
سهي:علاش
آيات رفعت كتافها:مانعرفش حاسه روحي مضايقه
سهي:تعودي من الشطان تو يمشي الشعور هدا وبعدين فكري في يوم التلات تو تفرحي طول ههه
وحدفت علي آيات لمخده وكملت:ماتخيلتش يافصعونه بتنخطبي قبلي شكلي عنست يانهاري
ردت آيات عليها لمخده وهيا تضحك:هههه مش شكلك تي انتي عانس فعلا ههههههه
.
.
__
تاني يوم الصبح....
حطت غالية كتاباتها في الشنطه وتلفتت شبحت لامها:ماما حني وين بنمشو توا مش قلتي بنقعدو هني هلبا ايامات
تنهدت امنه:لقونا يابنتي الله لا تربحه لقانا
غالية:من هوا
امنه:لخوه قتل بوك لهجرنا من حوشنا ومن ناسنا
سكتت غالية شوي وهيا تشبح لأمها وبعدها قالت:ان شاءالله يموت باش نرتاحو منه ونولو لحوشنا ونولي لمدرستي وصاحباتي
امنه:ان شاءالله ربي ينتقم منهم يابنيتي ان شاءالله ، هي كملي ضمان كتباتك راك تنسي شي
هزة غالية راسها وكملت ضمان كتباتها
__
.
.
سعيت بك للإنتقام ، وسعيتي بي للنور 💛
.
.
حول السفاو اللصقه من علي فم مريم بالقوة لين عيطت بصياح وقالت من بين دموعها:من انتم شن تبو مني
حط السفاو التليفون في ودنه وهوا يسمع في صوت الصقر:ياكلب القصه بيني وبينك مادخلش اعراض الناس بينا
السفاو:كنت فكر في عرضها وشرفها قبل ماتخطف خوي
ضرب الصقر الحيط برجله وقال:يا....... وربي لما نقلبها علي راسك
السفاو:اني لبنقلبها علي راسك ياصقر وراس حبيبت القلب عندك ساعتين بس ماتجيبش خوي انسي لعندنا
وسكر الخط في وجه الصقر لحدف التليفون علي الحيط بكل قوة ......
.
.
.
تلفت السفاو لمريم لمغطين عيونها ومربطين يداها ورجليها اللي بدت تبكي بصمت اول مافهمت انه مخطوفة بسبب احمد(الصقر) ، شبح السفاو لفاتح وقال:سكرلها فمها وسكر عليها الدار
وتلفت مشي بيطلع بس قبل مايطلع من الدار رجع شبح لفاتح والشاب لمعاه وقال بتحدير:دير زي ماقتلك وطلع وماااحد يخشلها ولا يتعرضلها تمام
شبح الشاب لفاتح لقعد يشبح لسفاو لرد وقال:تمااام يافاتح
فاتح:اكيد تمام
.
.
__
.
.
شد الصقر دقن رائد ونزله وخلا وجهه مقابل وجهه:كان مقطعت راسك وبعته لخوك هديه مانتسمه يا.... يهددني اني يهددني كلب ولد الكلب
غمظ رائد عيونه بالقوة من الألم وجهه لتحت يدين الصقر وفتحهم ، وياريته مافتحهم وجو عيونه في عيون لضنه جار لضنه صديق لخششه خوه لشارعهم لرحب بيه وعطاه شقته لضحك معاه وبصر معه لخلاه يحس ان كل اهل الشرق رجاله وناس طيبه ، ياريت مافتحت عيونك يارائد وخاب طنك ياريت.....
قعد رائد متبت عيونه في محمد لقرب من الصقر لبعد من رائد وهوا يسب ويلعن فيه وتلفت لشاب لواقف جنبه:نبيك اطلع روحه ولد...... وصوره غر نفرح خوه كيف خلينا منظره
قطع محمد اتصال عيونه برائد وتلفت لصقر :خليه علي نا
شبحله الصقر:لا نبيك انت
محمد شبح لرائد بخطف ورجع شبح لصقر:نكمل منه ونجيك
الصقر تلفت وقال من غير اهتمام:تمام
وطلع وخلا محمد يشبح لشاب وقال:عدي وسكر الباب
طلع الشاب وسكر الباب وخلا محمد يزمط في ريقه وهوا مش قادر يشبح ل عيون رائد لقعد يشبحله وماحولش عيونه من محمد بكل كانو نظراته كلها خيبث أمل ومعبيه جرح وقهر منه حس انه خلاص الناس كلها بدت عدوة بعض حس ماعاش فيه صحبه ماعاش فيه رجوليه وقال بقهر:لهدرجه ياعقيد ماعاش فيه خير
رفع محمد عيونه فيه ورائد كمل:هكي تكافي لضيفوك في غربتك هكي تكافي السفاو لخششك بينا
محمد هز راسه وقال:نا نكافي فيكم علي لدرتوه في الناس لخليتن منها مدمنه
رائد صيح:انت مش ربي انت خصك في روحك انت خصك في اللي درناه معاك
محمد:كان كل واحد خصه في روحه ره الدنيا خربت يارائد
رائد غمظ عيونه وضحك بهزوة:واصلا هيا خاربه من امتك
سكت محمد وقعد يشبح لرائد لنتهت ضحكته بدمعة نزلت من عينه وهوا يفتح في عيونه الحمر ويشبح لمحمد وقال:اني خوهم دمهم لكن برئ من ليديرو فيه للناس وقسم بدين الله ماعمري بعت مخدر واحد وقتلت روح ماعمري شاركتهم في شي
محمد:انت مشارك يارائد كانك مش مشارك ره ماعديتش معاهن بيش يستلمو شاحنة مخدرات
رائد:وربي شاهد عليا اول مرة ، صدقني اول مرة في حياتي نمشي معاهم
وخدي نفس وهوا يشبح لوطه ودموعه بدو ينزلو من الم جسمه وقال:باللهي عليك اقتلوني اني عيت ، عيت من اتهامات الناس ونظراتهم ليا عيت كوني ولد وخو تجار مخدرات ، عيت من دنب اني مش صاحبه كرهت روحي وكرهت اللعنه لنولدة بيها وكرهتهم هما
ورفع راسه وشبح لمحمد وكمل:اقتلني يامحمد كمل عقاب جميلك وقتلني
قرب محمد وقعمز قدام رائد علي ركابه وقال:مش نا لقتلهن علي مكانكم ، واساسا نا ماكنش عندي خبر بالعملية هدي
رائد:مايهمنيش نبي نموت اني وبس نبي نموت لانه لو طلعت من هني بعد هدا كله ح نولي زيهم
محمد:انت مش كيفهم
هز رائد راسه:لا اصلي منهم حياتي حياتهم التفاحة الصالحة عمرها ماقعدت صالحة بين التفاح الخامر كان ماحد خداها من بينهم واني هكي اقتلوني دمرو خوتي بيا ورتحوني من لحياة لاني فيها
محمد شد وجهه رائد بين يديه وقال:نا نشيلك من بينهن وربي مانخليك بينهم ولاني مخليك هنا
رائد:لكن اني فرصتكم الوحيده باش اطيحو بخوتي وبوي
محمد بعد يده علي وجه رائد وطلع كلينكس من جيبه ومسح الدم لنازل من خشم رائد وقال:باتك وخوتك جايهن يوم يايدمرو فيه يايفطنو علي روحهم
وبتسم وكمل:لكن انت تستحق تعيش بعيد عنهن وتعيش الحياة لأنت تبيها
رائد:ياريتك جيتني قبل مانحصل هني
محمد:كل شي في وقته حلو............
.
.
ياليت نستطيع ان نصارع الموت قبل ان يأخد امواتنا ويكسر بوعودنا معهم 💔
.
.
#يتبع_للبارت_لبعده
________________________________
بداء كتــابة الرواية في تاريخ 2019 / أكتــ10ــوبر / 3
تم انهاء كتــابة الروايه في تاريخ 2020 / فبـــ2ـــراير / 3