ريماس : مافهمتش مزيان .. كيفاش غانشد بلاصتك
أرسلان : غاتولي دراعي ليمن
ريماس : بلاتي بلاتي نفهم مزيان .. دابا باغي تقول نولي دراعك ليمن فالمنظمة و ماشي اي منظمة .. منظمة الماسونية؟ .. واش انا باغا نوقف معاك باش نتفكو منها و نتا باغي تغرقني فيها معاك؟؟؟؟؟
أرسلان : دويت على المنظمة.!؟
ريماس : و شنو كاتقصد بدراعك ليمن؟؟ .. جبد بواطة فاااخرة و تقليدية من المجر و حطها قدامها
أرسلان : من اليوم هاد الخاتم مايفارقكش .. حلات البواطة لقاتو الخاتم ديال جدو .. الخاتم لي منو جوج فالعائلة كاملة و نفس الخاتم لي سرقاتو
ريماس : هاد الخاتم ماغايدخل فصبعي حتى نعرف اش كاتقصد بدراعك ليمن؟ ... بقا كايشرح لها السلطة لي غاتكون عندها بحال مثلا تحضر للإجتماعات ديال رجال العائلة بشرط مهم و ضروري و هو حتى يكون ارسلان حاضر ... يعني فحالة رجال العائلة بغاو يديرو شي اجتماع و ارسلان ماحاضرش عندها الحق تمنعهم .. فحالة شافت شي حاجة كاتخالف قوانين القصر غايخصها تشاورو عاد توقفهم على حدهم .. غاتولي تمشي معاه فينما مشا .. يعني بلاصتها فالقصر من اليوم فصاعدا غادي تولي بحالها بحال ديال ارسلان .. عندها ميزات بزااف لي عجبوها ولكن فنفس الوقت دار لها قواعد لي ماخاصش تكسرهم .. اولهم ماشي حيت ولات الدراع ليمن يعني من حقها تشد الحديث مع الرجال .. يعني اول شرط كان هو تخلي حدود بينها و بينهم بحال الحدود لي بين السما و الما و ثاني شرط ماديرش شي حاجة من راسها .. شرح لها بطريقة واخا كانت مختصرة الا و راها وصلات لها داكشي لي بغا يقولها
ريماس : موافقة ولكن بشرط
أرسلان : تشرطي
ريماس : ايلا كان عندك شي مشكل غاتقولو لي و نحلوه مدام مابقيتش غير مراتك موافق؟
أرسلان : على حسب
ريماس : لا بغيت الكلمة
أرسلان : لبسي الخاتم
ريماس : اخر مرة حطيتو فيدي كان كبير
ارسلان : نقصت لك منو
ريماس : ايوا و فاش يتزاد عندنا ولد غاتعاود تقادو؟
أرسلان : غاتولدي بنت
ريماس : قلت ايلاا ... ( هزات الخاتم و لبساتو فصبعها بقات كاتشوف فيه و كاتهضر ) غاتمشي لمدة شهر و ماغانشوفك على شهر
أرسلان : الضرورة
ريماس : علاش غاتمشي بالضبط
أرسلان : نقاد الامور
ريماس : غاتنساحب من المنظمة؟
أرسلان : لا
ريماس : و شنو غادير؟؟؟
أرسلان : ( شاف فساعتو ) وقت العشا هو هدا
ريماس : كالعادة كاتتهرب .. ناضت من تما و بغات تخرج ولكن وقفها من دراعها جرها لعندو
أرسلان : فاش غانرجع غاتفهمي
ريماس : ( عنقاتو و زيرات عليه ) هاد المشية ما مرتاحاش ليها
أرسلان : وليتي حساسة مؤخرا
ريماس : ماشي حساسة ولكن كانحس بإحساس غريب تقدر توقع شي حاجة
أرسلان : مراتي خايفة عليا؟
ريماس : ( اومأت براسها )
أرسلان : ( بخبث ) طلعي معايا للجناح باش نحيد لك الخوف ... خنزرات فيه .. هي من نيتها كاتهضر حيت فري حاسة بشي حاجة غاتوقع يسحابلها ارسلان كايطنز عليها ولكن هو فالواقع كايدير لها هاكا باش تخوي بالها من دوك الافكار و مايبقاش المورال هابط لها
ريماس : خلينا نمشيو انا وياك و يبقا ابراهام هنا يرد البال بحال فاش كنا فشهر العسل
أرسلان : كون كان مؤهل ماكنتش غانحط مراتي فداك المنصب
ريماس : دابا شنو بقا فيك الحال حيت حطيتيني ولا كيفاش؟؟؟ صافي تا دابا مزال الحال خلي خوك اسوار يكون بلاصتي .. قربها ليه و حط جبهتو على جبهتها شاف فخضروتيها
أرسلان : هنا فين كاين المشكل .. حاليا نتي لي مؤهلة لهاد المنصب ( سكت شوية و كمل ) ماعنديش التقة فشي حد من غيرك ... كلماتو فرحوها و خاصة منين عرفات بلي هو كايتيق فيها غير هي و هي عارفة مزيااان هو ماكان كايتيق فحد من غير جدو و دابا جدو مات و بقات هي
ريماس : ماغانخيبش امالك فيا ( شدات فيديه ) يلاه تتعشا .. غدا باقي عندك تمارة بزاف و عرس جوليانا و السفر ...
ملاحظة : كانذكر الفطور و العشا فقط فالقصر حيت فالقصر كايتجمعو ف2 وجبات .. الصباح فاش كايفيقو و الليل فاش كايتجمعو
♚ جلسو فالطبلة و رجال العائلة كايشوفو فريماس غير من تحت الدف بنظرات يعلوها الحقد و الكراهية و الغضب غافلين على ارسلان لي مراقب الوضع كان سكات و غير صوت الموس و الفورشيط لي كايتسمع حتى قاطع ارسلان هاد الصمت بدون مايهز عينيه فيهم
أرسلان : الحفلة ديال دراعي ليمن ماديروهاش حتى نجي
اسوار : واش صافي قررتي قرار اخير على شكون غاتختار
أرسلان : عندك شي شك فقراراتي.!!
أرسلان : لا بالعكس بالنسبة ليا هداك احسن قرار و ماغانلقاوش ماحسن منها
سي ايتان : ارسلان كانظن باقي خاص نتناقشو فهادشي .. المنصب ماشي ساهل و مرتك باقا صغيرة عليه و ماعندها خبرة
اسوار : انا نتكلف و نعلمها
أرسلان : على جثتي .. ماكانظنش غاتحتاج شي حد فيكم
ريماس : ( تدخلات ) فحالة بغيت ناخد الخبرة غاناخدها من ارسلان علاما كانشوف هو اكثر واحد عندو الخبرة هنا و الا ماكانش غايخليه جدو خليفتو
غابريال : ( تحت نيفو ) الوقحة .. كاتهيننا قدامنا
ارسلان : غانسافر لمدة 30 يوم و غاتبقا ريماس بلاصتي ( شاف فداوود ) خبار القصر غاتولي توصلني بالتفصيل
سي ايتان : و ايلا كان شي موضوع مهم؟؟؟
اسوار : غانقولوه لريماس و هي تتناقش فيه مع ارسلان بحكم هي مزال ماعندها خبرة
أرسلان : ( ببرود ) كاين شي اعتراض.! .. حتى واحد مامعارض! .. مزيان تقدرو تكملو عشاكم
سي ايتان : ليلة سعيدة .. ناض من تما بسخط و هو ماعاجبو حال حيت كايشوف ريماس غاتخربق لهم كلشي .. اما فوق الطبلة موالفين كانشوفو النساء لي كايشوفو فمرا بحالهم و خدات بلاصة كبييرة كايبقاو يشوفو فيها بغيرة و حقد ولكن هاد المرة ريماس توجهو لها النظرات من الجهتين .. عيالات و رجال ماحملوهاش و ماتقبلوش اش وقع .. العيالات كايقولو هادي ماشي بلاصتها و كبر لها الشان بزاف حيت هي وظيفتها ترضيه فالفراش و تربي الولاد و تتزين و الرجال ماكانوش اقل منهم حيت هما لي زرعو فعقولهم هاد الافكار الإستحمارية .. فنظرهم ريماس حيت هي مرا غادي تكون مكلخة داكشي علاش من دابا بداو فالتخطيطات و البلانات على ود المستقبل .. كملو داك العشا غا بزز ... هاد النهار كان عامر صدمات بالنسبة ليهم حيت ارسلان صدمهم بصدمة من مور صدمة لي ماقدرو يستوعبو حتى وحدة فيهم .. كاع لي فالقصر ماعرفوش النعاس ديك الليلة من غير ارسلان و ريماس لي نعسو مرتاحين و حاضنين بعضياتهم .. ابراهام و جوليانا لي كانو فرحانين على ود العرس ديالهم لي غايكون غدا .. ريناد واسوار و مالك و فادي لي كانو فرحانين لريماس
•• صبح صباح جديد و بداو التجهيزات لعرس جوليانا .. داز النهار بالزربة فالتجهيزات لي تكلفو بيها الخدم و تجهيز جوليانا لي تكلفات بيه اديرة و عماماتها اما ريماس كانت جالسة فوق الكرسي ديال مكتب ارسلان بينما هو داير نص جلسة فوق البيرو و موراه واقف مالك و ابراهام و شخص اخر هدا نفس الشخص لي كانت شافتو فاليونان معاهم
ريماس : دابا بغيتي تقوليا ابراهام و هاد خونا لي ماعرفتش علاش جبتيه غايبقا حاضيني؟؟ واش انا محتاجة للحضية؟؟؟؟
أرسلان : غاتحضي راسك .. ابراهام و المغربي غايتدخلو فالضرورة
ريماس : بحالاش هاد الضرورة
ارسلان : وقت الخطر
ريماس : وقت الخطر قادة براسي
ارسلان : ماتناقشيش معايا فهاد الموضوع
ريماس : مامحتاجا لحد قادا نحمي راسي براسي و نتا عارف هادشي مزيان .. شد وجهها بيديه
ارسلان : ماباغيش نخاطر بيك .. ( باس لها جبهتها و ناض ) مانحتاجش نوصيك ا لبؤتي .. ماتكتريش البارفان و المكياج فالعرس
ريماس : على هاد الحساب ماديرش البارفان حتى نتا .. بتاسم ابتسامة صغيرة و اشار لأبراهام و داك السيد باش يتبعوه .. خرجو بعدو من تما عاد وقفو
ارسلان : وصيتيه.!
أبرهام : وي ميستر ارسلان وصيت خالد باش ماغايقربش لمدام ريماس و ماغايهضرش معاها .. غايتكلف بحمايتها من بعيد و يبقا راد لها البال و فحالة وقعات شي حاجة عطيتو الرقم ديالك باش يعيط لك
أرسلان : مزيان ... اشار لخالد لي هو الشخص لي جابوه من المغرب باش يمشي و يخليهم بوحدهم
ابراهام : ميستر ارسلان درت داكشي لي طلبتي مني
ارسلان : تأكدتي واش خدم
ابراهام : وي راه خدام و اي مكالمة غاتوصل لتيليفونها غاتوصلك فنفس اللحظة بدون ماتعيق بحتى شي حاجة
♔ ريماس : واش متأكد خدامة؟؟
فادي : وي ختي راه خدامة ( مد لها الكارط سيم ) اي مكالمة وصلات لنسيبي غاتوصلك حتى نتي و تقدري تجربي باش تتأكدي
ريماس : ياك ماشافك حد؟
فادي : لا ماتخافيش راني درت كيفما وصيتيني
ريماس : عنداك تقول هاد الهضرة لشي حد خليها بيناتنا ( شافت من موراه بنص عين و خبعات يديها فجيبها ) ( بإبتسامة ) ايوا ا خويا فوقاش غاتعرفني على هادي لي خدات عقل خويا ... بقا كايشوف فيها بإستغراب
فادي : شك.. ... قبل مايهضر حطات يديه على كتفو قرصاتو قرصة صغيرة
ريماس : عادي ككماتحشمش مني كانبقا ختك الكبيرة ماتنساش .. ارسلان نتا هنا ( بإبتسامة ) سمعتي اخر الاخبار
أرسلان : اجي واحد الدقيقة
ريماس : واخا شوية و نجي
أرسلان : دابا
ريماس : تسنا ا خويا فادي دابا نرجع ... مشات لجهة ارسلان باش تشوف اش بغا عااد فهم فادي علاش بدلات الموضوع .. غي خرجات شدها من المعصم ديالها
♚ أرسلان : اش كاديري مع خوك بوحدكم
ريماس : كان كايعاود لي على شي حاجة
أرسلان : ( بهدوء ) باغي نعرف ... شافتو برد عرفات بلي ايلا كدبات فهاد الساعة غايعيق بيها
ريماس : ( بإنفعال مصطنع ) علاش لابس هاد اللون .. دابا كلشي غايبقا يشوف فيك فالعرس .. علاش مالبستيش البلو ماغي ولا الرمادي .. ترسمات ابتسامة صغيرة على ثغريه .. دوز الابهام ديالو على ذقنو من مور ما ميل راسو و قرب لعندها بخطوتين
أرسلان : كاتلعبي معايا؟!
ريماس : علاش غانلعب؟؟
أرسلان : فاش كنتي كاتهضري مع خوك
ريماس : دابا كاتبدل الموضوع ياك
أرسلان : كاتواجهيني بحاجة نتي لي كاديريها.
ريماس : صافي على راحتك خليك فهاد الكوسيتيم الكحل ... مشات من تما متهربة من الجواب عرفاتو عاق بيها حتى هي مخبية شي حاجة ... دازو دقائق و تحرك حتى هو من تما ... وصل وقت عرس جوليانا و ابراهام .. ماغانقولش كان كلشي فرحان حيت اب جوليانا ماكانش راضي على زواج جوليانا بأبراهام و كون ماكان قرار ارسلان كون ماخلاهاش تتزوج بيه حيت هو كان باغي يزوجها بواحد من العائلة حتى خرج لو قرار ارسلان من الجنب فما كان عليه غير يوافق عليه .. داز العرس بسلام و مافيه حتى مشاكل و الفضل راجع لأرسلان لي ماكانش مفارق ريماس طول الحفل باش ماتسلم على حد ... وصل الليل لي هو الوقت فاش غايسافر ارسلان .. كانت ريماس كاتتأكد من حوايجو و وراقو باش ماينسا والو و فنفس الوقت كاتهضر
ريماس : مافهمتش علاش ماباغيش ابراهام يمشي معاك
أرسلان : غايبقا حارسك
ريماس : كون جبتي لي شي دوبير مان حسن بلاصة ماتخليه حاضيني هو و نتا عارفني ماعنديش معاه
أرسلان : على هادشي خليتو يحضيك ... سالات الفاليزات و قربات لعندو باش تقاد ليه الكرافاطة لي كانت مامقاداش
ريماس : على هاد الحساب عول تجي تلقا واحد فينا ميت ... هز يديه و دوزها على خدها
أرسلان : غايبقا بعيد على ا لبؤتي
ريماس : ( عقدات حجبانها ) كون غير اجلتي السفرة ديالك
أرسلان : ماكاينش سبب لي يخليك تخافي
ريماس : ( سكتات لمدة عاد نطقات ) ماقادراش نتخيل فكرة توقع لك شي حاجة
أرسلان : ششش
ريماس : ( بغضب مصطنع ) ايوا و ايلا قتلوني انا نتا كاع ماغاتكون هنا
أرسلان : ماخافيش عليا مراتي ماكاتخافش من الموت .. شدات فيديه بجوج
ريماس : رد البال لراسك
أرسلان : بعدي من المشاكل
ريماس : ( بإبتسامة خفيفة ) الوصية الوحيدة لي كاتقول ليا ديما قبل ماتسافر
أرسلان : و ماكاديريش بيها
ريماس : اش ندير ايلا كانو المشاكل هما لي كايقلبو عليا
أرسلان : ( بجدية ) مانغيش توصلني شي خبار عليك ماتعجبنيش
ريماس : واااخا ا ميستر ارسلان شي أوامر خرا؟ ... جرها من ضهرها و قرب وجهو ليها
أرسلان : ماشي اوامر .. هادشي لمصلحتك ا لبؤتي
ريماس : و نتا واش تقدر تبعد من المشاكل؟ ... بتاسم ابتسامة غريبة على هضرتها ... كاتطلب من المشكل شخصيا باش يبعد من المشاكل كي دارت لها؟ ... جا وقت الوداع .. عطاها وداع خاااص لي كانت نتيجتو جرح فشفايفها عاد خرج من تما من مور ماوصاها باش تخلي تيليفونها ديما خدام و ماتحيدش الخاتم .. هزو الكارد الفاليزات لي كانو حدا الباب و هبط فالدروج ...
حسات بالفراغ منين مشا و هي عارفاه غايغيب شهر على قدو .. ماجاهاش النعاس و هادشي واقع غير فأول ليلة غاب فيها يعني باقي 29 ليلة و 29 نهار غادوزهم بلا بيه .. ناضت هزات البيسي و مشات للاطيراس بدات كاتخربق فيه حتى وصلها ميساج فطيلي من عندو
💭 ♚ طفي الضو و سيري تنعسي ... بقات مستغربة واش بهاد السرعة وصلو ليه بلي مزال شاعل الضو فالبيت .. بدات كاطل من لاطيراس مالقات حد
♔ صحاب الحسنات دغيا كايوصلوها لك
♚ توحشتك
♔ كون توحشتيني كنتي غاتخليني نمشي معاك ماشي تخليني هنا
♚ و نتي ماتوحشتينيش
♔ غانوض ننعس تصبح على خير .. سيفطات الميساج و حطات طيلي فالجنب .. تكات على الفوطوي و رجعات راسها اللور كاتشوف راسها قدام تحدي كبير .. خاصها تروض عائلة على قدها باش يبقاو يديرو لها اعتبار و مايلقاوش السيبة و باش تثبت راسها ليهم و لأرسلان و تفرض راسها و وجودها و و و ... الخلاصة عندها تحديات كبيرة غادخل فيهم خاصها ترد البال و تكون اكثر حذر باش مايلعبوش عليها .. هزات يديها كاتشوف فيهم .. كان الخاتم ديال ال روتشيلد حدا خاتم زواجها ، هاد جوج حوايج بالضبط خاصها تحافض عليهم و توفق بيناتهم بجوج .. بقات على داك الحال مانعساتش حتى صونات الساعة كاتعلمها بأذان الفجر .. ناضت توضات و صلات عاد مشات تنعس هاد سويعات لي بقاو قبل مايوصل وقت الفطور .. طاحت نعسات ماعقلات على راسها حتى بدات كاتصوني شافت فطيلي لقات راسها نعسات غير ساعتين .. ناضت عاودات طرفات و بدات كاتختار فحوايجها باش .. ختارت لبسة حجابية انيقة و فنفس الوقت عملية ... حيت هدا اول نهار ليها كدراع ليمن ديال ارسلان و كذلك اول نهار ليها فالشركة ديالها .. دارت اخر اللمسات ديالها و رشات البارفان ديالها هزات وراقها يلاه بغات تخرج و هو يصوني لها ارسلان فيديو
ارسلان : لبؤتي
ريماس : ( بإبتسامة حب ) صباح الخير ارسلاني
ارسلان : بعدي الكاميرا عليك
ريماس : علاش؟
أرسلان : بعدي نشوف اش لابسة
ريماس : لابسة داكشي مستور غيير تهنا كانوفي بوعودي
أرسلان : ماكانسولش على المستور .. بعدي الكاميرا خليني نشوف
ريماس : ( بعدات طيلي عليها شوية ) هااه تهنيتي؟
أرسلان : منين جاوك حوايج فالكولور البيض؟
ريماس : كنت وصيت ريناد تشريهم لي
أرسلان : ( بهدوء ) رجعي للدريسينغ ... خرجات من الجناح و كملات طريقها للتحت و هي كاتهضر معاه
ريماس : وريني نشوف اش لابس حتى نتا
أرسلان : ريماس
ريماس : وا ورييني ( قربات توصل للطبلة ) ارسلاني غانخليك دابا حتى لمن بعد
ارسلان : ريماس ماتقطعيش
ريماس : حتى انا كانبغيك .. قطعات و خبعات طيلي توجهات لجهة الطبلة من مور ماتحولو تعابير وجهها للصرامة ... كان كلشي جالس و بداااو الفطور بلا مايتسناوها .. بغات تجلس فالكرسي لي مترأس الطبلة و هو يحبسها سي ايتان
سي ايتان : اش كاديري؟؟؟؟
ريماس : كانجلس باش نفطر ا حمايا
غابريال : ( ضرب فالطبلة ) صافي هادشي لي بقااا خاص ... برهوشة تترأس الطبلة فأخر يااامي نشوف برهوشة صغر من ولادي كاتترأس بلاصة سيادها
ريماس : ( اشارت ليه بيديها و هضرات بجمود ) ايلا ساليتي ا سي غابريال جلس فبلاصتك
غابريال : اش هاد الوقاحة؟؟؟
ريماس : واقيلا ماسمعتينيش؟
غابريال : ماغانزيدش دقيقة فهاد الطبلة و انا كانشوف الغلط قدامي ... ناض من فوق الطبلة و مشا .. عاود تبعو ايلام و ارون و ايتان و داوود .. حطات يديها بجوج على الطبلة و شافت فيهم
ريماس : باقي شي حد باغي يتبعهم؟ .. ماكاينش؟ مزيان على هاد الحساب باغاكم تعرفو واحد الحاجة .. قوانين القصر غايبقاو هما هما و الفطور مايتفطر حتى يتجمع كلشي ... جلسات و كملات ماكلتها فهدوء .. حتى واحد ماتدخل بينها و بين العائلة .. لا خوها لا ختها لا اسوار لا ابراهام لي كان واقف موراها و بعيد عليها شوية حيت عارفين مزياان بلي هادشي خاصها تواجهو هي ماشي يعاونوها فيه ... يتبع