ريماس : ( فنفسها ) مشكيييييلة هادي كي غاندير دابا و الوقت ماكافيش
أرسلان : جمعي حوايجك
ريماس : لا محتاجة شي حوايج نشريهم من السوق ديك المرة عجبوني و كنت أجلتهم
أرسلان : مالك غايجيبهم لك
ريماس : لاا .. مالك لا ... كان غادي لجهة الفاليزات حتى سمع رفضها و عاود لتافت لعندها شاف فيها
أرسلان : ( بنظرات شك ) اش عندك مع مالك؟!
ريماس : والو ... شاف فيها بنظرات شك و لي زاد شكو هو صوت الميساج لي وصل للطيلي ديالها و هزاتو بالزربة
أرسلان : ( مد يديه ) اري داك تيليفونك
ريماس : لا
أرسلان : ريماس اريه لهنا
ريماس : لا ماغاتشدوش ... مازادش معاها الهضرة مشا لجهتها باش يحيدو لها و يشوف هاد الميساجات لي على الصباح .. مشات كاتجري للدوش سدات عليها قبل مايوصل لها و عاود تبعها كايدق فالباب
أرسلان : حلي الباب
ريماس : الصمت ... كانت كاتقرا الميساج بالزربة .. جاوبات بالزربة بميساج لخصات فيه كلشي "" حاول تقضي الغرض بالزربة ماعنديش الوقت و ماتزيدش تسيفط حتى ميساج باش مايشكش ""
أرسلان : ريماس خرجي لهنا نهضر معاك
ريماس : بلاتي نسالي .. وصلها ميساج الموافقة و مسحات الرسائل عاد خرجات .. مع الخرجة شدها من دراعها
أرسلان : اش مسحتي
ريماس : و شكون قالك انا مسحت و نتا مزال ماشفتي طيلي
أرسلان : ( بخشونة ) ماتحمقينيش و جاوبي اش مسحتي .. معامن كنتي كاتهضري
ريماس : مع حتى واحد غير مع ريناد علمتها بلي غانجيو اليوم ... ضور وجهو للجهة الثانية و دوز يديه على ذقنو ماكرهش يخلط لها الملامح فهاد اللحظة .. حاجة باينا مادام هربات للدوش الا و راه هربات باش تمسح شي حاجة و بكل استفزاز كاتجاوب بالكدوب بحالا ماعارفاش بلي كايعرفها كاتكدب
أرسلان : ريـمااس
ريماس : دابا مالك؟
أرسلان : بغيتي تعرفي مالي! ( حيد لها طيلي و لاحو للارض زطم عليه برجليه حتى ولات حالتو بحالا داز عليه طراكس ) ها مالي ... ( بحدة ) من اليوم باقي نشوف عندك شي تيليفون ضلوعك نهرسهم لك
ريماس : دابا اش ستافدتي؟؟؟ ها نتا هرستيه تهنيتي دابا صافي
أرسلان : هادشي ماغايدوزش لك بارد .. قبل مايطيح الليل غانعرف معامن كنتي كاتهضري من الصباح ( بنبرة تهديدية ) حرمت ديني ا ريماس و نعرفك كنتي كاتهضري مع شي ذكر غا نسف دمك
ريماس : ( بهدوء ) ديرها
أرسلان : طلبي من ربك مانطيحش فيه ... حيت ايلا طحت فيه غانديرها و ندير ما كتر منها فيك .. طلق منها و مشا لبس حوايجو و خرج من الجناح .. مع خرج مشات بالزربة هزات الكارط لي وسط طيلي لي تشخشخ .. لبسات حوايجها و هزات الفلوس .. جبدات الطيلي الثاني لي عندها طلقات فيه الموسيقى و دخلاتو للدوش جهدات ليها .. سدات الباب ديال الدوش بواحد الساروت كان لاصق فيه باش ايلا جا قبل منها يسحابلو راها فالدوش و خرجات كاتجري من الجناح .. خارجة و رادة البال لاتخرج فيه .. شدات طاكسي عطاتو الوجهة لي بغات تمشي ليها و ديمارا
♚ خرج و هو ساخط باش مايصدقش متيري فيها .. فهاد اللحظة باغي غير يلقا مالك .. مع شعل الطيلي وصلوه مكالمات و ميساجات بالعرارم كلشي كايسول فين غابر و علاش طافي تيليفون .. دخل لميساجات أبراهام جاوبو باش يعلمهم بلي اليوم غايرجعو و عاود دوز نمرة مالك .. بقا شحال كايصوني و حتى واحد ماكايجاوب .. سول عليه الكارد حتى واحد ماعرفو فين غبر فجأة ...
♚ رجع للجناح ضور عينيه باش يهضر معها توجد راسها ولكن لقا الجناح خاوي .. سمع صوت الموسيقى فالدوش يسحابلو راه فري دخلات تدوش باش توجد راسها .. و عاود خرج و نزل لتحت باش يكلف الكارد يطلعو يهزو الفاليزات .. فالوقت لي كان هو خارج من الاسانسور كانت ريماس داخلة من الباب ديال الاوطيل .. مع هزات عينيها لقاتو نازل و باين فيه ماراشقاش ليه .. مشات تخبعات بالزربة فواحد الدخيلة بانت ليها كاتتسناه يدوز و يخرج باش تطلع قبل مايعيق بغيابها لي دام ساعة .. غير شافتو فاتها شوية و هي ضربها بجرية للاسانسور اما ارسلان كان غادي عادي حتى لواحد اللحظة دازت ليه ريحة البارفان لي كاتحط ريماس من حدا نيفو .. ستغرب حيت هو عارف بلي هاد البارفان مصنوع لها خصوصي و فاش كان داخل ما شموش ولكن دابا فاش خارج شمو .. ربط غياب مالك بالبارفان لي شم دابا و تم غادي لجهة الاسانسور بغا يطلع و لقاه عامر بقا كايتسناه بأحر من الجمر و ما هي الا لحظات حتى تحل و طلع فيه مع وصل للطابق الفوقاني .. خرج و توجه بخطوات سريعة فإتجاه الجناح و نار الغضب بدات كاتشعل فيه ايلا مالقاهاش و عرف بلي راها كاينا مع مالك هاد اللحظة .. غايكون عند مالك هدا اخر نهار فحياتو .. وصل لقدام الباب ديال الجناح .. و مع حلها لقا ريماس خرجات من الدوش لابسا بينوار و شعرها فازك
أرسلان : فين كنتي؟
ريماس : فين غانكون .. فين خليتيني فين لقيتيني
أرسلان : سربي دغيا باقي تابعانا الطريق
ريماس : لي زربو ماتو
أرسلان : غايكون فمصلحتك ماتزيديش تتجاوبي معايا هاد النهار حيت مانضمنش لك اش غاندير فيك ... مابقا والو و نعرف هاد الكلب لي كنتي كاتهضري معاه
ريماس : ها حنا غانشوفو هاد الشك ديالك .. اش عرفك كنت كانهضر مع راجل؟ ماكاينينش غير الرجال فالدنيا .. بدا كايقلب بعينيه فالارض
أرسلان : فين الكارطة لي كانت فتيليفونك
ريماس : قبل ماتهرسو لحتها فالطواليط .. هز طيلي ديالو و دوز نمرتها و فعلا كيما توقع ركباتها فالتيليفون الثاني
أرسلان : ( بنبرة هادئة ) بلا ماندير فيك يدي .. جبدي داك تيليفون ... حسات بالفيبرور فطيلي عرفات بلي الميساج لي كانت كاتتسناه هو لي جا
ريماس : اوك ها هو .. مد يدو باش يشدو ولكن ماعطاتوش ليه ليديه .. شيرات بيه جهة لاطيراس جابتو على برا
ريماس : نهار تولي تيق فيا غانولي نعطيه لك ليديك ... رجع شدها من دراعها عصر لها الدم فيها و صبعانو تغرزو فيها بحال اللقاط و هضر معها بنبرة لي فالعادة كاتخلق الرعب فبنادم لي قدامو ولا لي كايسمعو .. نبرة خالية من الزيادات
أرسلان : القصر راجعين لو اليوم .. تما غانتفاهمو مزيان على الثقة و التخلويض لي ولا فيك و طولة اللسان .. كان متعمد يشدها بقبضة بحال لي كايشد بيها راجل ماشي مرا .. ماهتماتش لا للشدة لا والو بالها كان مع حاجة خرا
ريماس : و انا كانتسنا .. طلق منها خلاها تلبس حتى قادات فولارها عاد جاو الكارد يهزو الفاليزات .. جاو يهزو واحد الفاليزا و منعاتهم بإصرار حيت غرضها كاين فيها .. ركبو فاللوطو و تاجهو لفين كاينا الطيارة ماهضرش معاها .. راسو فيه 1000 مطرقة و مطرقة و جات ريماس كملات ل1001 ولكن ماشي بمطرقة بشاقور .. حتى ريماس ماهضراتش معاه كانت غير شادة الفاليزا الصغيرة فيديها حتى دخلات ليه الشك فيها .. دازت ربع ساعة و وصلو للطيارة .. بقا كايقلب بعينيه على مالك مالقاهش ولكت طوموبيلتو كاينا عرفو غايكون لداخل
أرسلان : طلعي .. دخلات و خلاتو كايصوني لمالك باش يخرج لعندو ولكن حتى مالك صدق من الفاهمين ماخرجش لعندو او بالاحرى كان ملهي مع شخص اخر .. طلع للطيارة و هو ناوي على خزيت .. مع دخل للجهة لي فيها ريماس و هو يتصدم
ريماس : ( بنظرات حب ) عيد ميلاد سعيد أرسلاني
•• ••
ريماس : عيد ميلاد سعيد ارسلاني العقبة ل1000 سنة مع بعضياتنا ... تخربق كان ناسي عيد ميلادو ل34 و خرج لو من بالو هو فالاصل ماكايحتافلش بيه باش يبقا عاقل عليه حيت ماعندوش مع هاد تضياع الوقت كيف كايسميه هو ولكن مفاجأة ريماس كانت مختلفة بالنسبة ليه و خصوصا حيت عارفة فوقاش تزاد دابا السؤال هو واش هي من الصباح دارت هادشي بلعاني؟
أرسلان : تقليقة ديال الصباح و الميساجات و غبور مالك داخل فهادشي.! ... قربات ليه و خشات يدها فدراعو جراتو باش يجلسو
ريماس : كون ماتقلقتش ماكنتيش غادي تخلينا نرجعو اليوم و كون ماخليتيناش نرجعو كنا غانبقاو فداك الجناح و المفاجأة غاضيع .. اما بالنسبة لخويا مالك تيقني ماطلاقيتش معاه و ماهضرتش معاه حتى ابيل .. حدي كنت كانكتب ليه الميساجات و قلت لو يتكلف بتجهيز المفاجأة بلا مايخليك تعرف هادشي علاش غبر و ايلا ماتقتيش هضر معاه يعطيك طيلي ديالو و قرا الميساجات .. ضور عينيه كايقلب عليه حتى تم جاي
أرسلان : اجي لهنا
مالك : وي ميستر ارسلان
أرسلان : ارا تيليفونك ... عطاه لو و بدا كايقرا الميساجات لي بيناتهم ماشي ماتاقش بيها ولكن بغا يشوف الاسلوب باش هضرات مع مالك و الاسلوب باش هضر مالك معها .. هي فكل ميساج كانت كاتكتب ليه خويا و مالك فكل ميساج كايكتب لها غير مدام روتشيلد حتى سميتها ماكتبهاش .. دابا عاد حس بدمو برد رجع طيلي لمالك و ضار لعند ريماس جرها لعندو حاوط خصرها بيديه
أرسلان : و هاد المراوغة علاش .. ماخفتيش ندفنك نتي وياه
ريماس : ماكانخافش من أرسلاني .. تسنا دقيقة هاني جايا ... مشات للمطبخ هزات واحد طارط كانت تما و عاودات رجعات و هي شادة الضحكة من ردة فعل ارسلان لي ممكن يديرها فاش يشوف الشمعة فوق طارط .. حطاتها قدامو و جابت العصير بدل من النبيذ ... شاف فالطارطة و شاف الشمعة و عاود هز عينو فيها
أرسلان : الشمعة علاش
ريماس : طفيها بحال لي كايدير كلشي
أرسلان : كاتحسي براسك مزيانا!
ريماس : و مالك شنو فيها راه عادي كلشي كايطفيها
أرسلان : ماشي صغير باش نطفيها
ريماس : و مالك شرفتي؟ راه يلاه كملتي 34 مزال شباب كون انا بلاصتك نطفيها ... جرها و جلسها فوق ركابيه
أرسلان : لبؤتي نتي باقي عندك 22 سنة .. طفا الشمعة بصبعانو
ريماس : واخا وا ماتقولش ليا ماغاتحتافلش
أرسلان : غانحتافل مع مراتي ... كانت اغرب حاجة غايشوف ريماس دارتها هههه عيد الميلاد فوق السحاب ولكن مفاجئتها عجباتو بزاف يكفي انها تفكراتو و يكفي ماتقلقاتش من شكو ليها .. قطع من الطارط و وكلها و حتى هي دارت نفس الشي .. ناضت من تما بحالا تفكرات شي حاجة غبرات للحظات و عاودات رجعات و فيديها شي حاجة مغلفة و الظاهر انها كتاب .. مداتو ليه و هي متشوقة تشوف رد الفعل ديالو
ريماس : ها الكادو ديالك .. عارفة ماشي شي حاجة غالية بزاف مي تقدر تعجبك .. عاود شدها من يديها و قربها لعندو
ارسلان : الكادو ديالي راه بين يدي .. ماكنتيش تحتاجي تزيدي وحداخر
ريماس : وا حل و شوف .. شدو و بدا كايفتحو ما ان شافو حتى ترسمات ابتسامة صغيرة على محياه
أرسلان : ( بإبتسامة صغيرة ) Machiavelli
ريماس : كانظن يقدر يعاونك
أرسلان : قريتيه؟
ريماس : وي داكشي لاش ختاريتو هو بالضبط .. غاينفعك فتسيير الشؤون ... حطو فوق الطبيلة
أرسلان : غانقراه ا لبؤتي
ريماس : واش مقلق حيت غانرجعو اليوم؟
أرسلان : ماعنديش مشكل .. بحال اليونان بحال إسرائيل
ريماس : خاصني نشري طيلي فاش نوصلو
أرسلان : ماتشريهش .. دابا يوصلك
ريماس : نو راه وصيت عليه
أرسلان : صافي هضرنا
حطات الطيارة هاد المرة فالجزيرة .. كان ارسلان شاد البيسي فيديه كايقاد امورو و ريماس حاطة راسها على ركابيه و شادة طيلي ديالو .. حتى حسو براسهم وصلو للأرض عاد ناضو ... شدات فيديها و نزلو .. ركبو فاللوطو و تاجهو للقصر
ريماس : اليوم غاتقوليا شنو كاين ياك؟؟
أرسلان : غاتعرفي اش بغيتي اليوم
ريماس : و غانواجهو المشكيل انا وياك
أرسلان : ماشي وقتو
ريماس : ( عقدات حجبانها شوية ) غير ماتقولياش غانبقا كانتفرج من بعيد
أرسلان : تيليفون ماتشريهش .. سيفطتهم يجيبو لك واحد
ريماس : خاصني جوج صافي ماشي مشكل الثاني غانشريه انا
أرسلان : واحد باش غاتخدمي
ريماس : لا واحد غانديرو للخدمة و الثاني للعائلة
أرسلان : و نتي علاش غاتعطي نمرتك للعائلة.!
ريماس : ماشي العائلة كاملة غير خويا و ختي حماتي و حمايا و جوليانا .. بقاو كايتناقشو عليه و فالاخير كان اخر قرار تخدم بتيليفون واحد ... وصلو لباب القصر و مع وصلو دغيا وصلات الخبار للعائلة بلي راهم رجعو .. مع دخلو للداخل لقاو العائلة كلها كاتسناهم باش تستقبلهم
سي ايتان : على سلامتك ا ولدي ارسلان .. كون عرفنا اليوم غاتجيو كون درنا حفلة استقبال لولدي و مرت ولدي .. ماكانش بيناتهم شي سلااااام و هادي حاجة موالفينها منو و من اصلان غير الفرق اصلان كانو كايبوسو ليه يديه و ارسلان حاط لهك الحدود .. عكس ريماس لي فاش وصلات طلقات منو و عنقات ختها و اديرة و جوليانا
فادي : ( حل يديه بفرحة ) ختي رييماس .. جات تعنقو و هي تحس بيد رجعاتها اللور .. كانت يدو و شكون من غيرو .. رجعها اللور و جر عندو فادي بقوة دار ليه عناق رجولي قااااسي ... شي ضربات عطاه للضهر بحالا مغدد عليه تحت قناع السلام الحار و نيت هاكا كان مزيان باش مايحطوش فموقف محرج .. اديرة شافتو اش دار فهمات البلان
ريناد : ختي اجي معايا بغيت نقولك شي حاجة و نيت ورينا تصاور ديال اليونان يااااي كنت كانتمنى نزورها
سي ايتان : خاصا نهضرو فواحد الموضوع مهم ... اشار لهم باش يسبقوه ، شاف فريماس بتاسمات ليه بمعنى حتى يسالي و يهضرو .. سبقهم و تبعوه رجال العائلة .. غير مشاو و هما يضورو بيها العيالات و اولهم اديرة لي كانت فرحانة بمرات ولدها و كاتسنا شي خبار لي تفرحها عكس ريماس لي ماكانتش كاتبان فيها الفرحة كانت متبعة ارسلان بعينيها و باين عليها علامات القلق هي متأكدة غايقول غير لي بغا و يخبع لي بغا بحال ديما باش مايتسماش كايكدب و متأكدة غايستخدم معها اسلوب المراوغة مرة خرا .. مشات مع النسا للجهة لي كايجلسو فيها غير بزز بسبب اصرار اديرة و ريناد و جوليانا اما فادي مشا مع ابراهام حيت مامسموحش ليه يحضر لإجتماعات العائلة
ريناد : ختي عاودي ليا .. واش تساريتو فاليونان كاملة ياك
جوليانا : دوزتو شهر عسل زويين باينا
زوجة داوود : ايوا راه باينا غير منين طفاو تيليفوناتهم ما قالو غانتشوشو عليهم ما قالو غانحتاجوهم ... كانت اصلا غير على نغزة مع هضرات مرت داوود جاوباتها فالبلاصة
ريماس : كيفاش علاش طافيين تيليفوناتنا؟ واقيلا كنا فشهر عسل و من هادشي علاش غاتحتاجينا؟؟ تخالطنا لك مع الخدامات ديال القصر واقيلا لا؟؟
زوجة داوود : ايوا غير تشوشنا عليكم
ريماس : تشوي.. ... قاطعات اديرة حديثهم باش مايوقعوش مشادات
أديرة : بنتي كاتحسي براسك هي هاديك؟؟ ماتشهيتي والو؟؟ ... يتبع