كانت 8:00 ديال العشية شاعلين الجو عادي ماسخونش بزاف ولكن الدنيا عامرة بيان سيغ حيت هادي هي الوقيتة ديال الخروج ... بقاو غاديين فشوارع تنجداد هو وياها .. هي معنقة ضهرو بيد و هو محاوط خصرها و من موراهم تابعينهم الكارد باللوطو من موراهم ولكن بعاد عليهم و كايتمشاو بسرعة بطيئة باش يبقاو بعاد عليهم .. دازو للبنكة تيراو الفلوس من برا واخا ارسلان منع ريماس ولكن لي فراسها فراسها تيرات حتى هي .. كملو طريقهم و بقاو غاديين و كل مرة كايوقفو فشي محل مختلف و ارسلان مساير ريماس منها كايستغل الوقت لي مع ريماس دقيقة بدقيقة و منها كايزيد يتعرف على المنطقة
ريماس : بلاتي بلاتي بلاتي
أرسلان : مالك.!! .. جراتو من يديه و مشات لواحد المحل ديال النقرة و هادشي باش معروفة الصحرا بالنقرة .. دخلو كان محل بسيط فيه مرا من حسن الحظ
مولات النقرة : مرحبا بيكم اش حب الخاطر ا لالة
ريماس : جبدي لي ديك الكورميط لي الفيترينا الله يحفضك
مولات النقرة : اينا وحدة فيهم .. نعتات لها فينها و جبداتها لها لتافتات عند ارسلان و بتاسمات ليه
ريماس : ارسلاني شوف هاد الكورميط
مولات النقرة : راه يلاه وصلاتنا هاد السلعة ا لالة نقرة حرة و صافية و حاجة جديدة
أرسلان : ( بالعبرية ) عجباتك.!
ريماس : وا ارا يدك نقيسها .. مد لها الكوع ديالو و بدات كاتركب لو الكورميط لي كان سامپل و رجولي و الأهم عصري .. بقات كاتشوف فيه مترقبة واش غايعجبو و خصوصا انه اول كادو مغربي غادي تشريه ليه
أرسلان : ايلا عجبك غايعجبني ا مرتي
ريماس : ماتحيدوش من يدك راه ماكايعجبنيش نشوف شي حاجة عطيتها لك و هملتيها
أرسلان : غاتحيد فحالة وحدة
ريماس : ( بإبتسامة رضى ) حتى تموت
أرسلان : لا ... فحالة تقطعات يدي
ريماس : ( عقدات حجبانها ) الله ينجيك ... ضروري ماتجبد بحال هاد المواضيع .. تسنا نشوف شي حاجة خرا
أرسلان : ليك
ريماس : لا ماشي ليا ( شافت فواحد السلسلة ) .. بغيتهم للعائلة مايمكنش نرجعو بلا مانديو لهم والو ( بعدات من الفيترينا ) ولكن بان ليا هادشي ماغايكفيش ليهم .. المهم هانتا شوف غانديو لهم داكشي مختلف اش بان لك؟ ... خلاها كاتقلب و كاتشوف فالسلاسل فحين هو بقا كايختار شي حاجة ليها و تناسبها .. ماعجبو والو اما هي ما خلات فداك المحل غير ديشي .. كاع داكشي لي زوين خداتو و عطاتو للسيدة تقادو لها
أرسلان : ألماستي ساليتي.!
ريماس : ( بتأفأف ) ماساليتش راه يلاه خديت 3 سلاسل ديال النقرة و 2 خواتم .. بغيت نبدل مانديش لهم كلهم النقرة .. جا لموراها و لاح يديه على دراعها و جمعهم
أرسلان : باقي سيمانة و نص و شري اش بغيتي ا مراتي مزال الحال ... شافتهم مول المحل و بتاسمات طولات فيهم الشوفة حتى لمحاتها ريماس كاتشوف فيهم و مشا بالها لأنها كاتشوف فأرسلان .. هزات يديها شدات بيهم يدين ارسلان لي مليوحين عليها و شافت فمولات النقرة بنظرات حادة
ريماس : ساليتي؟
مولات النقرة : الله يخليكم لبعضياتكم بان ليا راجلك كايبغيك بزاف الصراحة واتاك
ريماس : ا لالة بلاصة ماتبقاي حاضياه واش واتاني ولا ماواتانيش قادي ليا مسائلي خلينا نمشيو فحالنا
أرسلان : ( بالعبرية ) قباحيتي
ريماس : غير ماتهضرش معايا ... كاتقوليا الحجاب الحجاب و مال الحجاب واش تكتب غير علينا .. اري ا ختي ديك السخرة لهنا .. بغات تخلصها شد لها يديها و رجعها من موراه ماهضرش مع السيدة عطاها الخلاص بالزايد بيان سيغ و بدون مايعرف لا بشحال لا والو و خرج و هو معنق ريماس من مور ماهزات سخرتها
مولات النقرة : ا شريف .. صرفك ا سيدي راك نسيتيه .. هز يديه دار لها اشارة بمعنى خليه عندك و كملو المسارية ديالهم
ريماس : باش كانقولك ماتبقاش تكتر من ديك البارفان
أرسلان : ماعجباتكش.!
ريماس : ماعجباتنيش و خايبة و ماباقيش تحطها
أرسلان : ماشي مشكل ا لبؤتي غانبدلها .. حرك يديه فدراعها و كملو طريقهم و هاكا كملات عندهم العشية ايلا كان فالمحل راجل أرسلان ماكايبغيش يدخل للمحل و ايلا كانت مرا ريماس مابقاتش كاتخلي أرسلان يدخل للمحلات لي فيهم العيالات من غير ايلا كان فالمحل مرا و راجل عاد كايدخلو بجوج ... ولكن واخا هادشي كامل دوزو عشية زوينة مع بعضياتهم .. شرات فيهم ريماس تذكارات لأرسلان و أرسلان نفس الشي و بيان سيغ مانساوش كادوات العائلة السعيدة ...
ريماس : هادشي راه ماكافيش
أرسلان : خلي الباقي لمن بعد ( شاف فساعتو ) كانظن خاصك ترتاحي باقي تابعك نهار طويل
ريماس : هاد نهار طويل 2 مرات كانت غاتزهق فيها روحي .. اش باقي؟؟
أرسلان : دابا تعرفي
ريماس : ( شافت فيه بنظرة شك ) راجلي العزيز هاد البلان ديال هاد المرة مابانش ليا فيه .. عيط لمالك باش يهز داكشي لي شراو حتى خوات يديها عاد شدات فأرسلان بقاو كايتسناو يجيبو لهم اللوطو و ما هي الا دقائق حتى جا الكارد وصلها لهم و خرج رجع عند مالك .. ركبو و ديمارا
ريماس : فين غانمشيو دابا
أرسلان : ماجاكش الجوع
ريماس : جاني الجوع و الصلاة تجمعات عليا و العيا ماعييتوش و نتا ا أرسلاني
أرسلان : ( بنظرات خبث ) جاني جوع من نوع خاص
ريماس : صحتي كاضرني و لحمي كايضرني و انا مريضة
أرسلان : ماعنديش أدنى مشكل ... بقات 3 ايام و النهار التالت بدينا فيه
ريماس : حسبت لها ا أرسلاني ( شافت فالطريق ) مزال ماوصلنا
أرسلان : مزال الطريق طويلة ... حد يديه على الشرجم ديال اللوطو و عينيه كانت فالمرايا ديال اللوطو مراقب اللوطو ديال مالك لي كانت غبرات فواحد اللحظة لمدة نص ساعة عاد عاودات بانت .. شوية صونا الطيلي و جاوب ، شاف فريماس واش مركزة معاه لقاها شادة الطيلي ديالها يعني ملهية
أرسلان : شفتيه
مالك : وي ميستر ارسلان طلاقيت بيه و هضرت معاه ها هو دابا معايا و كيفما عاودو لي عليه .. فعلا راه شخص داهية و على مابان لي ماغايخيبوش توقعاتنا فيه
أرسلان : مزيان
مالك : ميستر أرسلان واش تهضر معاه ولا نوصل لو شي رسالة محددة
أرسلان : قاد لو وراقو فهاد الأسبوع
مالك : شي اوامر خرا ا ميستر ارسلان
أرسلان : لا ... قطع عليه و عاود شاف فريماس لي حتى هي فاش سالا خبعات طيلي عندها و عاودات رسمات الابتسامة فوجهها
ريماس : شحال باقي باش نوصلو
أرسلان : ساعة و نوصلو ا لبؤتي قنطتي
ريماس : ماكانقنطش فاش كانكون مع أرسلاني ولكن بغيت نعرف فين غاديين
أرسلان : راجعين لمرزوكا
ريماس : ( بتساؤل ) علاش جينا حتى لهنا و غانعاودو نرجعو و حنا كنا قادرين نوقفو فمرزوكا و نوفرو 3 ديال سوايع ديال الطريق
أرسلان : كان عندي غرض ا ألماستي و قضيتو
ريماس : امم ... كملو الطريق و الطريق كاملة كانت ريماس كاتتصرف بشكل عادي كاتشارك ارسلان فمواضيع ولكن فوقما كاتبغي تجبد موضوع المنظمة كاتلقا ارسلان خرج من داك الحوار بسلاسة بدون مايناقشها فيه .. بعد ساعة و نص ديال الطريق وصلو لمرزوكة للوجه لي بغاو و بالضبط بلاصة الرمال كان الضلام ولكن كاينين الخيام للسياح لي كانو باقيين فايقين و خيام خرا مختلفة
ريماس : غانباتو وسط الخيمة اليوم ياك
أرسلان : نبدلو الجو
ريماس : راه الخيام فين خليناهم فين غانزيدو ندخلو؟؟
أرسلان : نتفاداو يموت شي حد فهاد الاسابيع ديالنا
ريماس : عاوتاني ... بقا غادي و تابعاه اللوطو ديال مالك من اللور حتى بعدو على البشر كانو 3 خيمات .. بلاصاو اللوطو و خرجو .. خلا الفاليزات فاللوطو .. عطا اشارة لمالك باش يجيب لهم سخرتهم .. جاب ليهم ثليليجة من دوك لي كايتهزو كان فيها الما و الماكلة بينما ريماس دخلات للخيم باش تعرف فإينا وحدة غايبقاو .. كانت تما وحدة ليهم و وحدة لمالك و الكارد بعيدة عليهم شوية و الثالثة كان فيها الما و شي حوايج غايحتاجوهم ... دخلو لديالهم و حطو ترحالهم موراها توضاو و صلاو عاد جلسو يتعشاو تحت اسئلة ريماس لي ماكايتسالاوش و غزل ارسلان ليها ماطولوش بزاف من مور العشا و نعسو و هما معانقين
•• بداية يوم جديد ••
♔ بدات كاتحل عينيها بسبب اللمسات لي كانو فعنقها و ماخلاوهاش تزيد تنعس .. ما هي الا ثواني حتى حلات عينيها بشكل كامل باش تتفاجئ بأشعة الشمس الحارقة لي ضاربا فيها ستغربات فين هي و اش وصلها لهنا .. مع ضارت باش تستفسر من ارسلان اش هادشي و هي تلقا أفعى و ماشي اي أفعى عادية .. أفعى الأناكوندا .. و دوك اللمسات ماكانوش فالأصل لمسات ... هادوك كانو بسبب تحرك الأفعى لي موراها تصدمات و ناضت طايرة من تما .. ضورات عينيها فالبلاصة لي هي فيها ، لقات العقارب و اللفاعي انواع و اشكال الكارثة الكبرى فينما ضارت كاتلقاهم و البلاصة لي هي فيها عااامرة بيهم جابو لها التبويعة حيت هي من الاشخاص لي كايعيفهم بزااف اما الطامة الكبرى هي انها فواحد البلاصة لي مافيها لا بيبان لا شراجم اشبه بغرفة مصنوعة من تراب مافيهاش الضالة و عااالية .. بقاو كايقربو منها و هي كاتبعد اللور بحذر عارفة مزياان بلي عضة وحدة منهم كافية باش تقتلها فدقائق معدودة .. هاد المرة سخطات بالمعقول ... متأكدة هادو من فعايل ارسلان ولكن ماشي من حقو يدير هادشي حيت هاد المرة حطها ماشي قدام خطر واحد و ماشي قدام حاجة وحدة .. قدام العشرااات من اكثر حاجة ماكاتحملهاش و من اكثر الحوايج الخطيرين .. ضورات عينيها فالبلاصة باش تشوف شي حاجة تفك بيها راسها ولا تخرج بيها من هاد البلاصة .. لقاتو حاط لها فاليزا صغيرة .. ضورات راسها للجهة لاخرة و تأفأفات بغيظ
ريماس : بففف غاااا نقتلك ا أرسلان على هاد الفعايل ديال الغفلة ... مشات كاتجري لجهة الفاليزا حلاتها بالزربة لقات فيها 2 فرادة صغار بذخيرتهم ايوا هااا المشكل هي عندها مشكل صغير فاليد ليسرية ماكاتضبطش فيها الشدة ديال الفردي مزيان و فهاد اللحظة الحاجة لي تقدر تعاونها و تفكها هي تستعمل اليدين بجوج باش تقدر تفضي مع هاد الكم ديال الافاعي لي تحطات بيناتهم ... هزات الفرادة بجوج و ستعدات و بدات كاتيري فيهم و كيفما كانت متوقعة تماما .. اليد اليمنى اي قرطاسة كاتخرجها .. كاتيري بدقة ولكن اليد اليسرى من مور ماوقع لها شحال من حادث فيها ولات الضربة عندها مامضبوطاش و القرطاسة مرة كاضربها فالخوا مرة كاتجيبها فيهم .. لتافتات بالزربة لجهة الفاليزا لقات القرطاس لي عندها بعدد محدود يعني خاصها ضرب و تقيس .. هادشي مامسلكهاش و ضياع القرطاس بلا فايدة ماغايجيب لها حتى شي نتيجة .. زيرات على اليد لي عندها فيها المشكل و ولات كاتركز فضرباتها فحين اليد اليمنى خدامة بيها بأريحية ... المرة اللولة جابتها نيشان .. المرة الثانية كذلك .. المرة الثالثة كذلك جابتها نيشان شوية بشوية ولات كاتسترجع موهبتها و ولات كاتزرب ... بدا عدد الافاعي و العقارب كايقل .. مع انه حجمهم صغير الا و انها ماخلاتهمش يقربو منها .. بقات عليهم وحدة من مور وحدة حتى فضاتها ليهم كاملين عاد جلسات فالارض .. ضورات عينيها للفاليزة لقات مابقات حتى قرطاسة .. عاودات ضورات عينيها لجهة ديك المجزرة روعو لها قلبها رجعات راسها اللور و غمضات عينيها
ريماس : ( بصوت عالي ) وا خرجوني من هاد المطمورة باراكا من هاد الضحك الباسل .. أرسلااان .. مااالك .. ماجاوبها حد ناضت نفضات حوايجها و ضارت لجهة الحيط كاتقلب على شي مخرج .. لي ضرها فراسها هو كيفاش دخلها للهنا؟ و كيفاش ماحساتش فاش جابوها يعني كاين احتمال واحد دار لها منوم فالعشا .. شهر عسل زيين هدا .. هزات الفردي و شداتو من الراس ديالو ضرباتو مع الحيط كتجربة و فعلا تخشا حيت ديك المطمورة كيف سماتها هي .. كانت من التراب .. احسن حل عندها هو تتسلق باش تخرج من هنا .. خشات الفردي اللول و تبعاتو التاني سيات واش يهزو ثقلها عاد بدات كاتتسلق .. رجليها كاتحطها فالحفاري لي كايخليوهم الفرادة من مور ماكاطلع و يديها كاتشد بيها الفرادة لي دارتهم كأداة تسلق .. راه قالوها .. الحاجة أم الإختراع .. و اخييرا وصلات للفوق .. ضربات طليلة و هو يبان لها أرسلان متكي على اللوطو ديالو و حاضي الساعة .. طلع عينيه للفوق بانت ليه جالسة و موجهة ليه نظرات بحال القرطاس بتاسم لها بجانبية و دار لها اشارة باش تهبط .. عاودات هبطات بنفس الطريقة باش طلعات .. تمشات لجهتو و باااين فيها ساخطة على الوضعية ...
وصلات لعندو و ناوية تنوضها معاه حتى تفكرات واحد الحاجة وقعات لها فاش كانت فديك المطمورة .. خشات فردي من موراها و الثاني بقات كاتلعب بيه فيديها
ريماس : الافاعي كنتي محيد لهم السم ياك ... حيد لها السلاح و دوز يدو على شعرها
أرسلان : و انا نقدر نحط لبؤتي قدام الموت.!
ريماس : ( دفعات يديه ) ماتبقاش تحطني قدام الامر الواقع بلا ماتعلمني
أرسلان : لمصلحتك ا لبؤتي
ريماس : و مابانو لك غير اللفعاي و العقارب؟؟؟ انا راااه لدابا مافهمتش واش كاتلعب بيا ولا كيفاش؟؟ .. حط يدو من فوق كتفها
أرسلان : ( ببرود ) شاكة فيا حاولت نأذيك.! ... شدات راسها بيديها
ريماس : هادشي لي مافهمتش ... علاش كادير هاكا؟؟؟ واش جايا شي حاجة فالطريق و انا ماعارفهاش؟
أرسلان : كاتيقي فيا
ريماس : كون ماكنتش كانتيق فيك كون قلت بلي باغي تقتلني .. هاد الاحتمال مبعداه حيت عارفاه ماكاينش ولكن هادشي لي وليتي دير مؤخرا جاني بحال تداريب و هادشي مايخفاش عليا راني ماشي مكلخة ( بإصرار ) فهمني شنو واقع؟
أرسلان : باغا تعرفي اش واقع
ريماس : وي بغيت نعرف و دااابا .. شدها من دراعها
أرسلان : ( بحدة ) لي واقع خايف عليك .. خايف طيحي فمشكل و مانكونش فيه معاه .. ماباغيش نخسرك من بين يدي
ريماس : علاش غاتخاف عليا؟؟؟ شنو واقع شرح لي ماشي تخليني مافاهما والو
أرسلان : الموضوع كبير عليك
ريماس : الموضوع كبير عليا؟ لهاد الدرجة ماتايقش فيا؟؟؟ و ماتايقش فواش نقدر نواجهو ولا لا
أرسلان : الموضوع ماكايخصكش .. كايخصني
ريماس : اي حاجة كاتخصك كاتخصني و اي مشكل عندك راه عندي .. ماتستغبينيش و تبدا تلاعب لي بالهضرة .. اينا مشكل كاين؟؟؟ ( بإنفعال ) علاش ماباغينيش نعرف؟؟؟؟؟؟
أرسلان : أعداء قدام
ريماس : ( بعدات عليه و هي كاضور فراسها ) شفتي هاد الكدبة دوزها على شي حد اخر ماشي عليا .. انا عارفة مزيااان بلي ماكاتخشى حتى شي واحد و متأكدة حتى دابا ماخايفش و ماعندكش و لو نقطة ديال الخوف ... ولكن نتا خايف عليا حيت ببساطة ( كملات بنبرة سخرية ) معتابرني نقطة الضعف ديالك .. معتابرني وحدة لي ماتقدرش تواجه معاك الظروف ببساطة معتابرني وحدة ماعندها حتى شي فائدة ( سكتات للحظة عاد كملات ولكن كملات بنبرة عادية ) أرسلان رجعني للقصر اليوم .. بغات تمشي للطوموبيل و وقفها بيديه
أرسلان : ساليتي هضرتك.! .. سمعي هضرتي ( رجعها قبالتو ) عمرك كنتي نقطة ضعف .. لبؤتي هي نقطة القوة ديالي .. ايلا وقعات لك شي حاجة ماغانضمنش لك اش ندير .. الخضر و اليابس غايتحرق .. عمرني باقي نسمع كلمة ماعندك فائدة ( سكت عاد كمل هضرتو ) ريماس مابغيتش نخاطر بيك
ريماس : أرسلان منين ماباغيش تخاطر بيا علمني بشنو واقع .. شنو مخبع؟
أرسلان : فاش نرجعو للقصر غاتعرفي اش واقع
ريماس : عاطيني كلمتك؟
أرسلان : عاطيها لك ... عنقاتو و زيرات عليه
ريماس : تيقني ... قادرة نواجه معاك المخاطر كيفما كانو ... و كيما واجهنا الصعوبات لي دازو قبل غانواجهو حتى هادو انا وياك ( بعدات عليه و شافت فيه ) حيت السبع فوقت الصعاب كايلقا فجنبو غير لبؤتو ولا لا .. ماجاوبهاش بالكلام .. جاوبها بقبلة ندامجات فيها هي وياه غير مباليين بديك الشمس لي كاتشوط فيهم .. حتى قطعاتها ريماس فاش شافتو غايرجع لفعايلو تاني
أرسلان : ماتبقايش تعاوديها .. المرة الجاية غانطيرهم لك
ريماس : واخا ا أرسلاني .. عندي سؤال
أرسلان : مابقاوش التدارب
ريماس : و شنو الوجهة المقبلة لي عندنا؟
أرسلان : ( حط يدو على ذقنها ) اليونان ... يتبع