دازت العشية عادية فالقصر .. أرسلان ماعاودش هضر مع ريماس و ريماس نفس الشي .. ولكن واخا بجوجهم مقلقين ماخلاهاش تصلي بوحدها .. من غير هادشي ماهضرش معاها حتى وصل الوقت ديال السفر و مشات باش توجد راسها .. ختارت لبسة من الحوايج لي جاب لها ارسلان ديال المحجبات .. و بدات كاتقاد الشال .. سالات و هزات ساكادو خفيف حطات فيه طيلي ديالها و داكشي لي كاتحتاج مع بغات تخرج لقات ارسلان داخل .. تفحص حوايجها و الحجاب لي دارت بلا ماتتعكس ولا تعارض كيف كانت كادير و بانو على وجهو علامات الرضى دابا عاد تهنا من جهة ريماس واخا ماشي 100% حيت باقي وجهها كايبان و باقا كادير البارفان لي هو ولا مدمن على ريحتها .. و باقي يديها كايبانو ولكن دابا على الاقل مابقاش غايحرق دمو معاها على الشعر و على الحوايج و بالرغم من هادشي الا و ان الغيرة ماتبدلاتش نهائيا حيت الحجاب زادها جمال على جمال باغي بشدة يهضر معاها دير النقاب باش يتهنا ولكن عارفها غاتحس راسها مخنوقة و زيد و زيد
ريماس : صافي ساليت نقدرو نمشيو دابا .. هز يديه دخل لها واحد الخصلة صغيييرة ديال الشعر كانت خارجة من الشعر .. شد وجهها بين يديه و خلا عينيه يرسمو صورتها فذاكرتو
أرسلان : ( تنهد تنهيدة خفيفة ) ماعرفتش اش ندير معاك
ريماس : فاش؟
أرسلان : ايلا ماغطيتيش شعرك كاتسحريني .. و ايلا تحجبتي كاتأسريني ( سكت شوية عاد كمل ) مابقيت باغي حتى حد يشوف الألماسة ديالي
ريماس : علاش ايمتا كنتي باغي
أرسلان : كانظن كان غايكون حسن تتنقبي .. بعدات عليه
ريماس : لاا راني تحجبت و هادشي كافيني
أرسلان : ماباغيش نأذي ألماستي فالمستقبل .. فكري مزيان
ريماس : فكرت مزيان ماغاننتنقبش .. بقا ساهي فيها كايتأملها بالحجاب لطالما كان باغي يشوفها لابساه و ها هي دابا لابساه ولكن كايشوف راسو و لأول مرة انه تسرع و جاب لها حوايج حجابيين بلاصة مايجيب لها النقاب واخا هو عارفها ماغاتبغيش تلبسو .. شدها من يديها و خرجو مم الجناح .. دخل ابراهام و مالك هزو الفاليزات عطاوهم للكارد باش يهبطوهم
ريماس : ماقلتيش ليا فين غانسافرو
أرسلان : فاش نوصلو غاتعرفي .. نزلو لتحت لقاو العائلة كاتتسناهم باش تودعهم ولكن غير شافو ريماس لابسة الحجاب ستغربو او بالاحرى تصدمو و خصوصا اسوار حيت كان كايسحابليه ولات ملحدة هو و سي ايتان
سي ايتان : ايمتا غاتجيو
أرسلان : فاش غانجي غاتشوفني .. مشات ريماس سلمات على ختها و اديرة و شيرا و ايلينا جات نوبة اديرة جراتها باش تعنقها و همسات لها فودنيها
أديرة : غاتمشيو و نتوما جوج ولكن فاش ترجعو حاولي ترجعو و نتوما 3 ا عروسة ولدي
ريماس : ( باش دير لها خاطرها ) ان شاء الله
أسوار : ( كايشوف فريماس و ارسلان ) مبروك بان ليا ريماس رجعات لدين الاسلام
أرسلان : عارف طبعي ماكايلائمنيش نخلي الغير يشوف فحاجة كاتخصني و خاصة لاكانت مرتي
أسوار : ( بقلق ) أرسلان حافض عليها .. شاف فيها اخر شوفة و مشا و تبعاتو إيلينا
فادي : ختي الله يوصلكم على خير .. سلمو عليهم و خرجو من القصر لقاو اللوطو كاتتسناهم و ركبو
أرسلان : حاولي تقللي الهضرة مع الذكورة
ريماس : معامن هضرت باش غانقلل؟؟ حدي كانهضر مع خويا و الاب ديالك
أرسلان : ماحددتش لك معامن غاتهضري و معامن لا .. من اللول كنت واضح ماتهضري مع حد .. خوك .. عمك .. حماك .. حتى واحد بصفة عامة
ريماس : ايوا و الخدمة .. نتا عارف مزيان راه مايمكنش مانتعامل حتى مع شي واحد
أرسلان : غاتولي ديريها
ريماس : مايمكنش
أرسلان : يمكن
ريماس : ماكاينش الحل
أرسلان : كاين ...
كانت جالسة فواحد البيت فالطيارة و معصبة على البلان لي قالها ارسلان غايديرو فاش كانو فاللوطو .. من تما و هي قاطعة معاه الهضرة
ريماس : كيفاش؟ .. و معامن غانتعامل ايلا ماكانوش عندي شركاء رجال معامن غانخدم
أرسلان : هاد الهضرة كانظن شرطتها عليك نهار اللول .. ماشي حاجة جديدة
ريماس : داك النهار يسحابلي غير كاضحك داكشي علاش مازدتش سولت
أرسلان : ريماس ماتبقايش تناقشيني فحاجة جوابها فراسك
ريماس : راه بزااف هادشي .. هادشي لي باغي ديرو ماكايتقبلوش العقل
أرسلان : غاتتقبليه مع الوقت
ريماس : دابا بلعاني كادير ليا هاكا باش نتراجع و نقولك بناقص ياك
أرسلان : فاش كانبغي ندير شي حاجة ماكانحتاجش نضرب هاد الدورات باش نوصل لها
ريماس : بناقص من هاد الخدمة كاع ايلا كانت هاكا .. كيفاش غاننجح و نتا داير لي هاد القيود كاملين
أرسلان : نجاحك ماكايعتامدش على الراجل .. هادي كانت هضرت لا.!! ... ( ضار لعندها باش يتقابل معاها مزيان ) فين باغا توصلي بهاد التصرفات لي وليتي ديري؟! .. جوج هضرات ا ريماس ديري عقلك
ريماس : عقلي دايراه من شحال و فعلا نجاحي ماكايعتامدش على الراجل ولكن خاصك دير فبالك المنافسين ضروري كايكون منهم الرجال بكثرة
أرسلان : ماكاينش لي غاينافسك
ريماس : كيفاش ماكاينش لي غاينافسني .. صافي منين ا سيدي غادي يخافو ينافسوني بسببك و منين غانولي نتعامل غير مع العيالات خليني نمشي نأسس شي مجمع ديال النسا و نقلبوها لكتب الطبخ
أرسلان : حل مقبول
ريماس : أرسلاااان واش باغي طير لي العقل لي باقي
أرسلان : ( بهدوء كايخلع ) ريماس المرة الجاية لي غاتهضري بهاد النبرة معايا ماغانهددكش و ماغاننبهكش .. غاتلقاي لسانك حدا رجليك ... قلبات وجهها لجهة الزاج باش ماتزيدش تزايد فالهضرن
ريماس : الصمت
أرسلان : انا ماشي ديوثي نخلي مرتي تمد يدها للرجال .. توري وجهها للرجال .. تضحك فوجه الرجال .. تتعامل مع الرجال بصفة عامة .. تزوجتك ليا ماشي باش نحطك لوحة فنية قدامهم .. فهمتيني مزيان ياك.؟
ريماس : الصمت
أرسلان : بغيتي المنافسين و تخدمي مع الذكورة فداك الميدان.!! ... ندير لمرتي خاطرها ولكن تحملي مسؤولية موت اي واحد نلقاه هز فيك عينو و لو بالغلط .. تيقي بيا غايموت فنفس الدقيقة و قدام عينيك .. موافقة.! ... شافت فيه مطولا و ماجاوباتوش .. باقي هو هو واخا سلم باقي القتل عندو كايجري فالدم ، عرف هاد المرة كيفاش يخليها تبدل رأيها مابززش عليها ولكن حطها قدام 2 اختيارات يا تقبل تخدم غير مع النسا يا تخدم معامن والا ولكن لي هز عينيه يتيري فيه و هادشي عارفاه هي غادي يوقع لا محالة حيت ارسلان ماكايفكرش جوج مرات قبل مايصفيها لشي واحد و خاصة ايلا كان على ود ريماس
ريماس : ياك وليتي مسلم علاش باقي كاتقتل؟؟
أرسلان : ألماستي ماتبقايش تشدي الدين من الجهة لي كاتشوفيها مناسباك
ريماس : شنو كاتقصد
أرسلان : فالدين الإسلامي محرم عليك تتعاملي مع الذكورة من غير راجلك و خوك و باك .. فين باغا توصلي بهاد الفعايل و نتي عارفة الحلال من الحرام .. بغات تجاولو و تقوليه على الوشام ولكن عارفاه ماغايزكلش الفرصة فأنه يهضر لها على البارفان لي حرام تخرج بيه و التبرج واخا قليل بزاااااف الا ان ارسلان ماغايقولش راه قليل .. قطعات معاه الهضرة و بالها باقي مشغول غير بالخدمة و هاد البلانات ديال ارسلان حتى وصلو لفين كاينا طيارة ديال ارسلان و طلعو قبل من الكارد لي طلعو لهم الشوانط ديالهم .. دخلات ريماس كاتقلب غير على فين ترتاح حيت عطات لراسها الجهد واخا مدكدكة .
فكرات حتى عيات لقات راسها هي مامستعداش يزيد يموت شي حد بسببها داكشي علاش قررات تخدم غير مع النسا و اصلا ماشي مهم الرجال باش تثبت راسها غير هي كانت باغا منافسيها يكونو رجال باش تزييد دير بلاصتها و ترضي غرورها و كبريائها فأنها واخا كيفما كايقولو غيير وحدة من بنات حواء .. الا و انها قدرات دير بلاصتها من بين رجال الاعمالو تعتابر انجح بيزنس وومن ولكن تجري الرياح بما لا تشتهي السفن .. أرسلان مادفنهاش فالقصر كي دار جدو و لي قبل منو لعيالاتهم بسبب غيرتهم على زوجاتهم ولكن هو بعدها على اي حاجة ممكن تخليها قريبة للرجال .. تكات و غمضات عينيها باش تعطي لراسها سويعات ديال الراحة علاما يوصلو للوجهة المجهولة ...
فاقت على قبلات خفيفة موزعة فجميع انحاء الوجه ديالها .. حلات عينيها و بعد وجهو عليها .. دوز يديه على شعرها ببطئ
أرسلان : لبؤتي باقا عيانة!!
ريماس : ( كاتتكسل ) شوية و صافي .. ( ناضت و ماشافتش فأرسلان ) واش مزال ماوصلنا
أرسلان : ( ببرود ) وصلنا
ريماس : شحال و انا ناعسة و شحال الساعة دابا .. ماجاوبهاش و خرج عرفاتو مقلق من البرود لي كاتعاملو بيه ولكن مزال باغا تعلمو درس باش تضمن مايتعاودش .. حطات شالها و خرجات لقاتو واقف و شاد طيلي فيديه كايهضر
ريماس : فين حنا دابا؟؟ .. لتافت شافها اش لابسة .. هز مونطو و شال و ليكات كان حاطهم حداه و عطاهم لها
أرسلان : زيدي لبسي عليك غاتمرضي ... حطهم حداها و كمل المكالمة ديالو ديالو .. كان لابس غير قاميجة كحلة و محلولين صدافيها من جهة صدر و طاوي كمامها شوية و خلاص سروال و صباط .. شافت فيه ريماس و عاودات شافت حداه واش حاط شي حاجة باش يلبسها على البرد لقاتو جاب ليها هي و نسا راسو .. دخلات لداخل لمدة دقائق و خرجات فيديها تريكو سخون و مونطو رجالي و شال
ريماس : ( ببرود ) شد لبسهم راك مالابس والو
أرسلان : مامحتاجهمش
ريماس : اوك على راحتك .. لبسات الحوايج لي جاب و بقات مراقباه حتى سالا
أرسلان : مشينا
ريماس : لبس عليك راه البرد راني شفت الشتا على برا
أرسلان : من بعد ... عرفاتو ماغايلبسش مشات هزات تريكو و وقفات قدامو باش تلبسو لو هي .. بقا كايشوف فيها بنظرات تساؤل و استغراب .. كاتتبدل دغيا مرة كاتكون حنينة و كاتخاف عليه و كاتبين ليه حبها ليه و غيرتها عليه و مرة كايكون كلامها كي السم و لي يشوفها فاش كاتزايد معاه فالهضرة يحلف عليها عدوتو .. لبسات ليه الحوايج و لوات ليه الشال فعنقو تحت نظرات عشق ارسلان ليها .. بغات تمشي و عاود جرها ليه .. بتصرف بسيط بحال هدا نسا البرود لي ولات كاتعامل بيه معاه .. لوا يدو على خصرها و خشاهم فالجيب ديال مونطوها لي من الجهة الثانية
ريماس : اش كادير
أرسلان : ( بإبتسامة جانبية ) راجلك يديه بردو .. نزلو و لقاو لوطو كاتسناهم و فعلا شتا كاطيح
ريماس : ماقلتيش ليا فين حنا؟؟
أرسلان : هاد الجو كانظن ماغريبش عليك
ريماس : عرفتو ماغريبش عليا راه فينما مشيت كانلقاه ولكن فين حنا
أرسلان : دابا تعرفي .. عطاه الكارد السوار و ركب فاللوطو و ديمارا .. تبعوهم الكارد من اللور
ريماس : البلاصة لي كانت واقفة فيها الطيارة .. عاقلة بلي فايتا شفتها و بحالا فايتا كنت فيها ولكن ماعقلتش بالضبط فين
أرسلان : مابقاش بزاف .. بداو غاديين فديك الطريق و ريماس مقابلة غير البلايك لي كايكونو فالطريق ولكن و تقوول واش بانت شي وحدة .. بداو كايخرجو من تما و كايقربو للمدينة و شوية بشوية ريماس بدات كاتلاحظ جنانات فيهم شجر زيتون ولكن كاتقول ممكن يكون عادي .. بقا صايك لمدة حتى لواحد اللحظة وقف و عطاها الثوب على شكل شال و هو فالكحل
ريماس : اش ندير بيه؟؟
أرسلان : غمضي عينيك
ريماس : علاش؟؟
أرسلان : غمضيهم و غاتعرفي .. عقداتو على عينيها و هي متحمسة فين غايمشيو .. ديمارا و بقا صايك لمدة من الوقت حتى لواحد اللحظة حبس اللوطو
ريماس : واش وصلنا
أرسلان : تسناي .. خرج من اللوطو و مشا لجهتها حل الباب
ريماس : فين حنا
أرسلان : اري يدك
ريماس : وا قول فين
أرسلان : ماكاتيقيش فيا.!!
ريماس : كانتيق فيك .. مدات ليه يديها و خرجها .. تمشاو خطوات معدودة و عاودو وقفو
ريماس : واش وصلنا
أرسلان : حلي عينيك .. حيدات الثوب من عينيها ببطئ و شافت فأرسلان لي كان قدامها .. بعد شوية و خلاها تشوف اش موراه
ريماس : ( بصدمة ) هادي كاتشبه للفيلا ديالنا .. بلاتي بلاتي هادي راه الفيلا ديالنا نييت ... تخلطات عليها الصدمة مع الفرحة تفاجئات و فرحات بزااااف حيت توحشات الدار لي تربات فيها ...
بدون سابق انذار عنقات ارسلان بالجهد كتعبير على فرحتها و شكرها على المفاجأة لي دار لها .. كانت كاتقول غاتخلي ارسلان حتى يسافر و يتلها و تجي للمغرب طل على الفيلا .. و لكن ها هو جابها ليها بدون ماتحتاج تسلت
ريماس : ( بعيون لامعة ) شكرا بزاف .. ماعارفش هاد التصرف لي درتي شحال فرحني اليوم .. عنقها بيد و اليد الثانية كان خاشيها فجيبو
أرسلان : غانبقاو هنا 3 سيمانات و نرجعو لإسرائيل
ريماس : خلينا نزيدو سيمانة خرا ياك خليتي اسوار مراقب الامور .. زفر و هو قالب وجهو
أرسلان : هضرت معاك ماتبقايش تنطقي سمية راجل اخر من غيري
ريماس : خويا أسوار
أرسلان : خوك .. بلاش ديك أسوار
ريماس : ( تأفأفات ) .. جبد يدو من جيبو و حاوطها بيهم شاف فعينيها و كانت راشقة ليه
أرسلان : ( بإبتسامة ترسمات على ثغريه ) 3 سيمانات غانكون فيها غير انا و لبؤتي الراس فالراس
ريماس : و الخدامات؟
أرسلان : ( هز حاجب ) ضروريين.!
ريماس : لا ماشي ضروريين
أرسلان : طلعي رتاحي مزال الحال
ريماس : و نتا ماغاطلعش؟
أرسلان : ( بنظرات خبيثة ) ايلا طلعت معاك ماغانهبطش .. حيدات يدو عليها بحالا فكرها فالموضوع و بغات طلع
ريماس : هاني طالعة ننعس .. طلعات للبيت ديالها لي هو نفسو لي كان ديال واليديها .. لقاتو نقي و منظف ماعدباتش راسها عاد تسول كي دار حتى دخل ولا منين جاب الساروت حيت هادي حاجة ماصعيباش عليه .. ستنشقات ريحة البيت كأنها كاتستنشق رائحة واليديها .. تلاحت فوق الناموسية بحوايجها و سباطها حيدات غير الشال من فوق راسها و ما هي الا لحظات حتى غرقات فالنعاس
••• فالقصر •••
جوليانا : ايمتا سلمتي؟
شيرا : ( سدات لها فمها ) شششش غايسمعوك
جوليانا : ( بقلق ) خايفة عليك حيت ايلا عرفو ماغاديش يعجبهم الحال راك عارفاهم دابا ولاو شادين الضد مع خويا اسوار و إيلينا حتى هي منين عرفوها سلمات .. ايلا عرفو بلي حتى نتي سلمتي ممكن تكون ردة الفعل ديالهم خايبة بزاف
شيرا : حتى نتي سلمتي و خاصك تولي تردي البال كتر باش مايعرفوكش سلمتي
جوليانا : ( بصدمة ) باش عرفتي
شيرا : ديك المرة سمعت ابراهام كايقولها لمالك
جوليانا : و شنو سمعتي اخر؟؟
شيرا : سمعت بلي حتى هما سلمو .. مابغيتش نتخيل اش غايدير فيهم خوك فاش يعرفهم سلمو
جوليانا : و ماقلتيش ليا شكون دخلك للإسلام
شيرا : ماشي غير انا لي دخلت
جوليانا : و شكون اخر؟؟ ماتقوليش ليا حتى إيلان؟
شيرا : وي حتى هو دخل و هادشي بفضل ولد عمي أسوار هو لي حل لينا عينينا على شحال من حاجة
جوليانا : ههههه عاقلة قوانين القصر لي كانت
شيرا : ( بإبتسامة ) كان ممنوع يحطو المسلمين رجليهم فالقصر
جوليانا : و دابا عائلتنا بدات كاتسلم واحد بواحد
شيرا : ولكن ارسلان و عمامنا مستحيل يبدلو دينهم
جوليانا : عندك الحق و خاصة خويا
♔ بدات كاتحل عينيها لقات شومبر مظلمة و الصباط محيد لها من رجليها هو و الشال لي كان فعنقها و ليكات .. و مغطية بمانطة عرفاتو هو لي غايكون دارها .. لفتها صوت الشتا لي كان كايتسمع مجهد ماسخاتش تنوض ولكن واخا هكاك نفضات العكز و حلات شرجم و سدات زاج .. شافت فلجهة الثانية فالشومبر كانو محطوطين الفاليزات ديالها و ديال أرسلان .. هزات ديالها جبدات منها بيجامة سخونة و مريحة و بدلات حوايجها عاد هبطات لتحت باش توجد ماتاكل .. ضورات عينيها فالأرجاء كاع مابان لها .. دخلات للكوزينة قلبات التلاجة لقاتها عامرة وجدات 2 سوندويش خفاف مع عصير الليمون خلات واحد لأرسلان و كلات التاني غير فالكوزينة .. عاودات وجدات لراسها كاس ديال القهوة حطاتو حدا واحد الكنابية كاينا حدا شرجم كبير كايطل على جردة .. طلعات للبيت بقات شحال كاتقلب على البيسي حتى لقاتو كان مديشارجي داكشي لاش هزاتو بخيوطو هو و طيلي و هبطات لتحت جلسات .. بغات تقلب فأخر الاخبار و تفكرات الويفي .. لقات ارسلان جهز كلشي و ضرب الحساب لكلشي .. بقات طالعة هابطة كاتقلب فالاخبار حتى تحل الباب ...
دخل أرسلان و فيديه ساشيات جاب فيهم الغدا .. بقا كايقلب على ريماس بعينيه لقاها جالسة و غارقة فالبيسي مالاحظاتش وجودو حطهم و مشا للصالة لي جالسة فيها عاد شافت بلي جا .. هزات عينيها فيه لقاتو فازك بالشتا ناضت بالزربة لعندو و هي مستغربة
ريماس : فين كنتي و مالك فازك هاكا؟؟ .. بفففف تسنا هاني جايا دابا .. مشات كاتجري جابت فوطة و رجعات
أرسلان : نعستي مزيان؟
ريماس : باقي لابس المونطو .. حيدو راه فازك عليك شوف حوايج كي ولاو فازكين ( بدات كاتحيد ليه المونطو و كاتعاتبو ) مافهمتش واش ماكاينش المظل واش ماكايناش اللوطو باش تخرج ( هزات الفوطة و عطاتها ليه باش يمسح شعرو )
أرسلان : كاتخافي عليا
ريماس : البرد مامعاهش اللعب غايمرضك و زايدون علاش خارج فهاد الشتا .. ايلا حتاجيتي شي حاجة كنتي تقدر تسيفط غير شي واحد يجيب اش باغي .. هز الفوطة كايمسح راسو و عينيه مشاو ديريكت للبيسي لي باقي محلول
أرسلان : اش كنتي كاديري.!!
ريماس : اش غانكون كاندير كاندوز الوقت
أرسلان : تغديتي.!
ريماس : كليت سوندويش و خليت واحد ليك مي ماكانظنش يعجبك
أرسلان : وجدتيه بيدك.!!
ريماس : بطبيعة الحال
أرسلان : جيبيه لي
ريماس : ها لي قلنا ها العيا بدا كايرجع عليك بففف تسنا هاني جاية .. مشات للكوزينة حطات سوندويش يسخن و حطات داكشي لي جاب ارسلان فطباسل ليها و ليه حتى كانت غاتدي داكشي و هي تتفكر عاد دخل من الشتا غايخصو شي حاجة سخونة يشربها .. قادات القهوة فالعصارة و بقات كاتتسناها اما فالجهة الثانية عند ارسلان .. صدر ريماس بلعاني باش يشوف اش كادير فالبيسي واخا كان قادر يشوف و هي كاينة ولكن عارف بلي غاينوضو خصامات بيناتهم .. ضرب طليلة لقاها كاتقلب فمعلومات بعض الشركات الكبار فإسرائيل لي كانو اصحابهم كلهم نساء .. ترسمات على وجهو ابتسامة غير مفسرة .. بقا كايرجع باللور حتى لقا علاياش كايقلب و شكو كان فمحلو .. عارف ريماس ماغاتقتانعش بهاد الزربة و قبل مايجي ارسلان كانت كاتقلب فمعلومات اكبر الشركات فإسرائيل .. يعني باغا دير لي قالها راسها و تهديدو مانفعش معاها .. رجع البيسي لبلاصتو و وقف قدام الباب الزجاجي لي كايطل على الجردة .. شم ريحة البارفان ديالها حداه
ريماس : شد القهوة و طلع تبدل عليك غايضربك البرد .. ضار لعندها هضر معاها بحالا ماواقع والو و ما شاف والو
أرسلان : لبؤتي كاتحسي براسك مزيان دابا
ريماس : وا ارسلان طلع تبدل عليك راه غايضربك البرد
أرسلان : ( شد من عندها القهوة ) عجيب .. مرتي كاتهتم بيا
ريماس : حيت فالقصر كانو الخدامات و الكارد اما هنا كاين غي الكارد و مايمكنش هما لي يوجدو لينا
أرسلان : ( كايرتاشف قهوتو ) ماكاين حد .. لا كارد لا خداما
ريماس : احسن حاجة حيت كايخنقوني
أرسلان : همم ماكنتش عارف قهوتك لذيذة .. ولكن حاجة متوقعة العسل كايصنع غير العسل
ريماس : ( بإبتسامة باهتة ) نفس الهضرة كان كايقول ليا بابا الله يرحمو فاش كانقاد ليه القهوة .. العسل كايصنع غير العسل
أرسلان : ( حاوطها بيد ) كنت باغي نكون اول واحد يشرب قهوتك ولكن ماشي مشكل من دابا للفوق ماغانبقاش نشرب من غيرها
ريماس : بشرط
أرسلان : كانسمع
ريماس : غاتبعد من الشراب و الكارو
أرسلان : ماكانشربش
ريماس : و داك البار لي كاين فالسويت؟
أرسلان : ماشي ديما
ريماس : المهم ياك كاتشرب ..حيد يدو من خصرها و جرها من يديها لجهة الفوطوي فين كانت جالسة حط الكاس و تكا فيه حط يد من مور راسو و اليد الثانية بقا كايلعب بيها فالرحا ديال يدها فحين ريماس بقات جالسة
أرسلان : هضري لي على علاقتك بواليديك
ريماس : دابا ماتو الله يرحمهم كانظن بلاش
أرسلان : علاقتك بيهم فاش كانو عايشين ... يتبع