دازو 3 اسابيع كاع لي فالقصر كانو مشغولين و مقلوبين بعرس أرسلان .. فهاد الثلاث اسابيع رجعو جميع الشباب لي سيفطوهم يقراو غير باش يحضرو للعرس و من بعد يرجعو لأمريكا .. ريماس على برا تشغلات فالاجرائات و التجهيزات ديال البلاصة لي غا تأسس فيها الشركة و غير كاترجع للقصر كاتلقا ريناد و أديرة و جوليانا كايتسناوها على ود الحوايج و المكياج و الديكور ديال العرس و الناس لي غاتعرضهم اما بالنسبة لأرسلان مابقاتش كاتشوفو بزاف فالفترة الاخيرة حدها كاتشوفو من ل5 و نص ديال الصباح ل7:00 موراها كايغبر نهار كامل بدون ماتعرف عليه حتى شي خبر حتى كاتشوفو لاغد ليه ولكن غير كاتشوفو كايزيد يحكر عليها فحوايجها و خصوصا فالفترة الاخيرة ملاحظاتو كترو على حوايجها لدرجة ولاو كل صباح كايتخاصمو عليهم ولكن فالاسبوع الاخير مابقاتش كاتتعصب و تغوت الشيئ لي خلا ارسلان يستغرب منها .. اما لأسوار و ايلينا كانت علاقتهم فتحسن ولا فوقما كاتبغي تصلي كايقاد لها الحجاب و ولا كايتجمع معها باش كايعلمها العربية بطلب منها حيت بغات تقرا القرأن كيفما هو ماشي مترجم .
♔ اليوم عندها الإفتتاح ديال الشركة من مور سير و اجي و ضور من هنا ضور من لهيه قدرات تحط حجر الساس و عاد زيد عليها البارح نهار كامل و هي كاتقلب على فستان يليق بالافتتاح مالقاتو الا بصعوبة .. صونات الساعة كالعادة مع ل5:00 ديال الصباح ما فاقت غير بزز حيت البارح عيات بزاف مع بدات كاتحل عينيها لقات دوك القراعي ديال الشراب لي جابتهم باش تستفز ارسلان كلهم مزلعين فالارض و مليوحين .. ناضت من بلاصتها و تخطاتهم بحالا ماكاينينش .. دخلات طرفات و لبسات سورفيط رياضية و توجهات لجناح أرسلان حلات لباب لقاتو ساهي فقنت واحد حتى انه مالاحظش ايمتا دخلات حتى جلسات قدامو .. عاود شاف اش لابسة
أرسلان : غانعاود معاك الكاسيطة.!!
ريماس : هادشي لي لقيت لبستو
أرسلان : كاتتبوهلي عليا دابا.؟
ريماس : علاش غانتبوهل عليك .. قلبات وجهها و ماتسرطاتش لها قضية يدخل للبيت و يرونو لها و يخليها بايتة وسط ريحة شراب .. هي فاش جابتو ماكانتش نيتها تشربو كانت نيتها حاجة خرا و كانت راسمة فبالها خطة خرا ولكن كانت اجلاتها .. هاد النهار ارسلان خدم معاها اساليب خرا ديال الاقناع لي كان من ضمنهم التهديد و كان كايبان مُصِر اكثر من الايام لي دازو فالاصل هاد الايام الاخيرة كان اصرارو كايزيد نهار على نهار ولكن اليوم ستخدم التهديد معها حتى فقد اعصابو بالبرودة لي ولات فيها
أرسلان : حرمت ديني يا ريماس و ماديري عقلك و ترجعي للطريق دمك نسفو منك و نتي حية
ريماس : دابا نرجع
أرسلان : ( بحدة ) ماتلعبيليش على اعصابي ماغايعجبوكش النتائج
ريماس : عادي نتا لي وليتي كاتتعصب بدون سبب .. كنت كانظن قضية الدين ماغاديش يكون عندك مشكل فيها
أرسلان : ريماس
ريماس : واش سالينا؟ .. ناض من تما بسخط و خرج من الجناح خرجات حتى هي و خرجو كالعادة يلعبو سبور و رجعو فطرو .. موراها ارسلان عاود خرج بينما ريماس يلاه بغات تطلع لبيتها شداتها اديرة
أديرة : ريماس فين غادا بلاتي
ريماس : وي خالتي أديرة .. غير اجلي هادشي حتى الليل حيت راه فعلا هاد النهار عندي عامر
أديرة : ماكاين ما نأجلو عرسكم بقات ليه 4 ايام كلشي واجد ما عدا الخواتم و الكسوة ديال العرس و حوايج ولدي ارسلان
ريماس : واش كلشي كلشي؟
أديرة : كلشي تكلفنا بيه .. ايمتا ناويين تشريو هادشي لي باقي
ريماس : اليوم غانهضر مع ارسلان
أديرة : بنتي راه مابقاش الوقت 4 ايام لي بقات ماخاص تكون حتى حاجة ناقصة
ريماس : غير تهناي ماغادي ينقص والو
أديرة : نتمنى .. طلعات ريماس لبيتها و خلات أديرة ماراضياش على الوضع حيت المفروض ريماس فهاد الاسبوع تكون مشغولة بعرسها ماشي بحاجة خرا ولكن مالقات ماتقول لها حيت عارفاها ماغاتسمعش ليها .. بدات كاتجهز راسها حيت الحفل كاين مع الظهيرة من هنا لداك الوقت يلاه تسالي .. دوشات و قادات شعرها سامبل جبدات الفستان لي كانت مخبعاه كان عبارة على فستان اسود طويل فيه فتحة الوسط واصلة حتى للركبة مي مابايناش بزاف و دراع كانو معريين و فرجليها لبسات صباط طالون حتى هو فالكحل .. حطات مكياج خفيف و رشات البارفان ديالها دارت لمساتها الاخيرة و خرجات من الغرفة فإتجاه باب القصر .. لقات الشيفور كايتسناها وصلها للميناء باش تركب فاليخت .. و ما هي الا ساعة كانت وصلات لميناء تل ابيب لقات ابراهام كايتسناها باللوطو باش يوصلها لمكان الشركة باش تفتاتحها حيت وصاه عليها ارسلان
ريماس : هدا نتا
أبراهام : الله يهدي ما خلق .. ركبو فاللوطو و ما هي الا ربع ساعة حتى كانو وصلو ...
دخلات مع الباب كانت الدنيا عامرة برجال الأعمال الصغار حيت كانت شارطة على أرسلان مايعرفها حد بلي هي خطيبتو و كانت مصرة على هاد الشرط حيت بغات تبذل مجهودها ماشي تطلع على ظهر ارسلان ولا غيرة و فعلا داكشي لي كان .. هادشي علاش حضرو غير رجال الاعمال الصغار و بيان سيغ ماشي غير هما لي حضرو بل حضرو حتى بعض افراد العائلة لي عرفو بلي ريماس غاتدخل لمجال الاعمال مافخبارهمش بلي هي اصلا كانت فهاد المجال لمدة عام .. عينيه كانو مراقبينها و هي داخلة للشركة .. دازت من حداه سلمات عليه و على سي ايتان بشكل عادي
ريماس : أرسلان ممكن نهضر معاك واحد الدقيقة .. فهم سي ايتان راسو و مشا
أرسلان : كانسمع
ريماس : نتا عارف ضروري النهار اللول غانتعرف على اشخاص مخلطين فهاد المجال كانتمنى ماديرش شي تصرف لي يضرب لي اتعابي كلها فالزيرو
أرسلان : حطي حدود مع عباد الله و ماغاتشوفي مني والو
ريماس : ارسلان راه مابغيتش حتى هنا يدخل العنف
أرسلان : تصرفاتك لي غاتحدد واش غايتفتح القبر لشي حد هاد النهار ولا لا
ريماس : ( بجدية ) ايلا مشا حتى مات شي واحد هاد النهار تيق بيا كمارتي ماغاتعاودش تشوفها بمرة واخا تقلب الارض سفاها على علاها ماغاتلقانيش و ماشي كانقول هضرة من فراغ و ماقادراش نديرها .. كانقول هضرة لي قادة بيها .. مشات و خلات سي ايتان لي كان مراقبهم مستغرب من طريقة هضرتها
سي ايتان : علاش مابقاتش واقفة حدانا؟
أرسلان : ( مراقبها بعينيه ) خليها .. ماهتمش لهضرة الاب ديالو كانو عينيه مركزين غير على ريماس و علامن كاتسلم و معامن كاتهضر
♔ريماس : وي سميتي ريماس بنجلون صدى صوتها رجعو لقبل 3 سنوات اول نهار شافها فيه و عرفات براسها على انها إيفا لكنتها العبرية لي بالرغم من انها متمكنة منها الا و انه كاين شي كلمات عندها كايتميزو بلكنة خاصة .. رجع للواقع و شافها كاتهضر مع واحد من الجنس الخشن .. يديه كانو غايجبدو السلاح كون ماتفكرش بلي تهديد ريماس بأنها ايلا مشات حتى غبرات راه مايلقاهاش واخا يقلب الارض سفاها على علاها و هادشي علاش؟ فقط على ود القتل لي ملاتو و ملات ديما يموت شي حد بسببها .. كيفما حتى هو تبدل حتى ريماس تبدلات .. تبدلات من ديك المرأة لي كانت عافية و اعصابها على سبة لمرأة كقطعة جليد لا .. جبل من الثلج فأعصابها .. من عاشر قوما 40 يوم اصبح منهم و نفس الشي وقع مع ريماس عاشرات أرسلان حتى ولاو اعصابها باردين .. ملامحها مابقاش يقدر شي حد يقراهم من غير ارسلان و نفس الشي مع ارسلان ملامحو بالرغم من انه كايكونو خاليين من التعابير الا ان ريماس كاتعرفو ايمتا كايكون معصب و ايمتا كاتكون راشقة ليه .. قرب لعندها هو و سي ايتان بخطوات ثابتة حط يدو على خصرها و اليد الثانية كان مخليها فالجيب .. ماهضرش على المكياج لي كان كايبان ليه بحالا راها غادة لعرس او سهرة ليلية ماشي حفلة افتتاح .. ماهضرش حتى على حوايجها فستانها لي زادها رونقا و جمال كايعتارف ان الأسود ماشي كايخبع لها فصالتها و انما كايزيدها اناقة على اناقة .. حتى انه ماهضرش على شعرها لي كايبان ناعم على غير العادة شحال من مرة هضر معاها عليه ماتطلقوش و ها هي رجعات لعادتها كايقولك الشيخة عمرها تنسا هزة الكتف و داكشي لي واقع مع ريماس مستحيل تتبدل للأحسن و دير ليه خاطرو .. هادشي كامل و الاطلالة لي بانت بيها فالحفلة كانت عادية و غير مبالغ فيها مكياجها عادي و فستانها يليق بهاد الحفلة ولكن هو بالنسبة ليه مايليقش و فلحظة من اللحظات دازت ليه صورة ريماس و هي حاطة الحجاب من قدام عينيه ولكن دغيا تمسحات .. عطرها تسلل بين انفاسو و نتاشر فالمكان .. رنة صوتها و هي كاتهضر مع اشخاص خرين دخلات بين مسامعو .. شعرها الأسود بحال الفحم سحرو كعادتو .. هادشي كامل مافيهش مشاكل بزاف المشكل هو عينيها الخضروتان لي كايغريو كل من شافهم شافها كاتسلم على واحد من الحضور .. بتاسم ابتسامة كاتخلق الريبة فالانفس لاحظها الأب ديالو لي حتى هو كان حاضر باش يشوف عروستو عرف بلي شي حاجة ماشي هي هاديك غاتوقع
أرسلان : مالكي
ريماس : ( رمقاتو بنظرة جليدية ) والو
أرسلان : عصبك شي حد
ريماس : ماعصبني حد .. كانت عارفة ممكن تكدب على اي راجل كون كان بلاصتو و تخبع على اي راجل اخر اضعف منو من حيث الشخصية و اي راجل اخر اقل قدرة منو على الملاحظة .. ملاحظة رنة صوتها لي كايعرفها ارسلان .. الوميض لي كايبان فوجهها فاش كاتبغي تكدب حيت هو اكثر واحد كايعرفها و كايفهمها سواء كانت مقلقة منو سواء لا
أرسلان : كاتكدبي عليا .. مشاو عينيها لواحد الشخص حتى هو من الحضور .. هز الكاس كنخب ليها ولكن ما ان شاف ارسلان واقف حداها و هو يقلب عينيه لجهة خرا .. حك ارسلان ذقنو و عاود خشا صبعانو فشعرو شافتو ريماس فين كايشوف لقاتو حاط على هداك لي هز النخب ليها هو نفسو لي نيت عصبها بضسارتو فاش كانت كاتعرف على راسها
عاودات شافت فأرسلان
ريماس : أرسلان ماكانضحكش .. ايلا قتلتيه ماغاتعاودش تشوف كمارتي ... خشا يدو فجيبو
أرسلان : ( ببرود ) ماغانقتلوش .. جبد طيلي ديالو سيفط ميساج و رجع خشاه فجيبو و شاف فيها بنظرة غريبة
ريماس : نتمنى .. طوال الحفل و ارسلان مافارقهاش لسببين حيت هاد النهار مهم بالنسبة ليها و ثاني حاجة على ود رجال لي كانو حاضرين .. داك الفستان مابغاش يتسرط لأرسلان نهائيا ولكن مابغاش يدير لها الشوهة فنهار بحال هدا عكس ريماس لي كان عاجبها بزاف و خصوصا انها شراتو بشهوتها و مالقاتو غير بصعوبة .. عاود جبد طيلي و الظاهر سيفط ميساج و رجعو لجيبو اما ريماس عينيها كانو غير على الساعة كاتشوف الحفلة وصلات للنص و الصحافة مزال ماجاو المفروض خاص يكونو من قبيلا هنا .. مشا ارسلان هز كاس ديال المشروب و قرب لريماس و هو راسم ابتسامة جانبية على وجهو
أرسلان : كاتسناي شي حد
ريماس : الصحافة المفروض يجيو من قبيلا ولكن لحد الساعة ماجاوش اش غاندير دابا
أرسلان : ( رتاشف من الكاس رشفة ) عادي كلشي كايتعطل .. زاد رتاشف من الكاس و ما هي الا ثواني حتى كان الكاس طاح للارض .. رجعات ريماس اللور بزربة و هي كاتحمد الله منين ماتخواش عليها الكاس كون راه دابا وحلات مع طبعة و عاد خاصها تنقرها بالما .. عرفاتو دارها بلعاني بتاسمات ليه ابتسامة خفيفة شافت فيه بنظرات انتصار حيت فنظرها مانجحش فمخططو .. عيطات على واحد النادل باش يعيط لشي حد يجمع داك زاج و رجعات وقفات عادي
ريماس : ( بنظرات ثقة ) من سوء حظك ماوصلتيش لداكشي لي باغي .. جات واحد المرا كادير الميناج باش تجمع زاج .. جمعاتو ولكن فاش كانت غادا خوات على الفستان ديال ريماس قرعة ديال الكلور ( الروح ديال جافيل ) .. الكلور و ما ادراكم ما الكلور ماعطلهاش فنفس الدقيقة تطبع الفستان ببقع بنية كبيييرة ولا حالتو حالة الشوهة الكحلة .. هز ارسلان كاس اخر
أرسلان : ( بهدوء ) من سوء حظك هادي ماشي طبعة تحيديها بالما ( حط الكاس و تم غادي ) فحالة كنتي باغا ترجعي للقصر غاتلقايني فاللوطو ... بقات كاتشوف فالفستان بتحسر مستحييل يدوز شي حاجة بلا مايطيحها فشي موقف لي يخليها عاقلة عليه حياتها كاملة كانت واخدة احتياطاتها و جايبة معاها مشوار صغير حيت كانت متوقعاه غادي يخوي عليها شي حاجة مثلا يعني غايكون ساهل حالها غير غاتمشي للطواليط تنقر شوية بزيف فازك و ها مريضنا ماعندو باس خصوصا ان الفستان كحل ماغاتبانش طبعة بزاف ولكن مزاال ماعرفات بلي ارسلان قبل ماكايدير اي حاجة كايفكر فيها .. عرف بلي اللون الكحل ماغاينفعش معاه المشروب و من الاصل هو ماكانش باغي داك الفستان يعاود يشوفو عندها داكشي لاش طيح الكاس عن قصد و سيفط ميساج لأبراهام باش يكلف مولات الميناج تخوي على ريماس جافيل باش ماتلقا كي دير تصلح الوضع و نيت باش يتهنا من داك الفستان لي طول الحفل و هو حارق ليه اعصابو .. عيات ماتشوف كي دير تغطي ديك الشوهة ولكن ماكانش كي دير ليه صافي هادي هي الشوهة پوان كوم .. عتاذرات من الحضور و نساحبات من الحفل ولكن فاش كانت خارجة بان لها ابراهام غايركب فواحد اللوطو ولكن ماكانش غير بوحدو .. كان معاه حتى داك الراجل لي شاف فيه ارسلان .. ياك قالها ماغايقتلوش .. وصلات اللوطو و ركبات حدا أرسلان ماهضراتش معاه و ماغوتاتش عليه كانت هااادئة .. شوية بانو لها 4 طوموبيلات ديال الصحافة يلاه جاو حتى مشات هي عاد جاو هما عرفات بلي حتى هادو من تصرفات ارسلان هي طلبات من جريدة وحدة لي تسيفط الصحافة ديالها ماشي طلبات من 4 جرائد يعني كلشي واضح .. بلعاني خلاهم يجيو معطلين باش مايصوروهاش .. كيفاش نسات هاد القضية ارسلان ماكايسكت الا ف2 حالات يا كايكون كايخطط لشي بلان يا كايكون ناوي على شي حاجة مافيهاش الخير .. ديمارا اللوطو فإتجاه اخر ماشي ديال الميناء
ريماس : قلتي ماغاتقتل حد علاش غاتقتل السيد و هو مادار والو
أرسلان : شفتيني قتلتو.!
ريماس : و ابراهام لي جرو من وسط الحفل
أرسلان : اهم حاجة ماشي انا لي غانقتلو .. يعني موتو ماشي على يدي
ريماس : ابراهام واحد من رجالك و ماكايمشيش الا بأوامرك
أرسلان : و فين المشكل
ريماس : نتا لي قلتي ليه باش يقتلو
أرسلان : عطيتك كلمة باش مانقتلش و ماتراجعتش عليها ولكن ماواعدتكش بلي ماغايتقلو حد ...
بقات كاتشوف فيه بإستغراب لا هدا مافيهاش باغي يحمقها .. اما عند ارسلان دابا عادتهنا من ناحية داك الفستان و حس بالراحة حيت مابقا لها كي تلبسو وقف حدا واحدالبوتيك بلاصا اللوطو
ريماس : علاش جينا لهنا؟
أرسلان : هبطي تبدلي هاد الحالة
ريماس : على اساس هاد الحالة خرجت بيها .. هبطات من اللوطو و بغات تسبقو للبوتيكولكن رجعها لعندو
أرسلان : بلاتي
ريماس : دابا خصرتيه خصرتيه و لي شافوه شافوه غا خليه .. حيد الفيستا لبسها لها وسدها باش ماتحسش بالاحراج قدام البنات لي تما .. دخلو لداخل و مشا نيشان لجهةالفساتين باش ماتمشيش تقلب فجهة السراول حيت عارفها ايلا مشات حاجة باينا ماغاتختارشسروال واسع .. دخل كايقلب بين الحوايج فجهة و هي كاتقلب فجهة حتى لقات الفستان ليبغات
أرسلان : اري نشوف
ريماس : طويل و بالكمام و عاجبني
أرسلان : يديه مشبكين شوفي شي واحد اخر
ريماس : اش بان لك نلبس كفن باش مايبقاش يبان حتى وجهي
أرسلان : الكفن غاتلبسيه ولكن ماشي دابا
ريماس : غانلبسوه بجوج غير تهنا من هاد الناحية .. بتاسمات ابتسامة عريضة وجمعاتها حيدات ليه الفستان من يديه و دخلات باش تلبسو كان فالكحل و مامزيرش بزافطويل و يديه مشبكين شوية جاها هو هداك .. لاحت الفستان لاخر و هزات الفيستا ديالارسلان .. خرجات لعندو
أرسلان : و مالك مالبستي بحال هدا من اللول
ريماس : هاني لبستو دابا شد الفيستا ديالك .. مرة مقطعو لي الى لحمي و مرة خاويعليه الكلور و المرة الجاية غاتشعل ليا فيه العافية ياك
أرسلان : هادشي كايتوقف على فعايلك عموما لبسي الفيستا غطي يديك
ريماس : راهم مشبكين ا ارسلان ماكايبان والو ( سبقاتو لاكيس باش تخلص ) شحال عندي
***** : ( بإبتسامة ) 250 شيكل ا مدام .. مد ارسلان الكارط بونكيغ ديالو
ريماس : شد الكارط ديالك واش شفتيني ماقادراش نخلص
أرسلان : قريب تولي مرتي و من مسؤوليتي ولفي
ريماس : ها نتا قلتيها قريب ولكن لحد الساعة مزال كاين بيناتنا غير وعد الزواجيعني ماشي من حقك تخلص عليا و لحد الساعة مزال ماجامعانا حتى شي حاجة رسمية ..عطات لمولات لاكيس باش تخلص و عاود حيد بطاقتها و عطا بطاقتو
أرسلان : الورقة غير باش تضمن بلي ماغاتتزوجيش من مورايا اما بخصوص أش بيناتنا ..بيناتنا بزاف .. نطرات الكارط ديالها من يدو و عطاتها لمولات لاكيس
ريماس : ( بنبرة ثقة ) المرا هي لي تعتامد على راسها و تشري لراسها .. مثلا فاشنحتاج لأولويز حاجة اكيدة ماغانجيش نطلبها منك و فحالة بغيت نشري لراجلي كادو حاجةاكيد غانبغي نشريه من فلوسي .. اما بالنسبة لأنك ماغاتخصصني من والو هادي حاجةعارفاها و متيقنة منها .. خلصات الفستان لي شرات و هزات كارط بونكيغ ديالو خشاتوليه فجيب ديال الفيستا و شدات ليه فيديه و خرجو .. ماتقلقش من هضرتها بالعكس عادمازادت بينات ليه بلي هي ماشي بحال كاع لي عرفهم كايتسناو الراجل يشري لهم .. ركبوفاللوطو و ديمارا
ريماس : فين غانمشيو
أرسلان : اري يدك
ريماس : علاش
أرسلان : اري نشوف .. مدات ليه يديها و شاف فبلاصة الخاتم
ريماس : ها هي
أرسلان : غانمشيو نختارو الخواتم
ريماس : خالتي اديرة هضرات لي عليهم هاد الصباح هما و الكسوة ديال العرس
أرسلان : غانمشيو نشوفو حتى الكسوة
ريماس : و الطقم لي غاتلبس
أرسلان : باقا شادة فهضرتك
ريماس : عارفني ماكاننساش
أرسلان : كاتعقلي غير على لي بغيتي ( شاف فشعرها ) ولكن مابقاش بزاف .. بقا صايكبيد و اليد الثانية كان شاد بيها يد ريماس لي حتى هي بدورها كانت شادة فيه ...يتبع