ناضت ريماس تبعاتهم حيت هي لي عارفة اش واقع و هي لي عارفة لاش طلبهم ب3 .. مشات لمكتبو لقات مالك قدام الباب واقف
ريماس : واش ابراهام وجوليانا لداخل؟
مالك : وي راهم لداخل .. ميستر ارسلان بغا يهضر معاهم بزوج
ريماس : و نتا؟
مالك : واقيلا حتى يخرجو عاد ندخل انا .. بقات ريماس كاتشوف فالباب و فمالك حتى تسمع صوت القرطاس لداخل .. دفعات الباب و دخلات كاتجري لقات ارسلان هاز السلاح ناحية أبراهام و جوليانا من مور ما ضرب أبراهام لرجليه .. وقفات بينو و بينهم
ريماس : واش حماقيتي؟ .. هادي راها ختك و هدا اكثر واحد كان وفي ليك
أرسلان : ريماس حيدي من قدامي
أبراهام : ( كايحاول يوقف ) مادرت حتى حاجة لي كاتغضب الله ولا شي حاجة عيب ا ميستر ارسلان و ماضحكتش على جوليانا .. انا تزوجت بيها و ولات مرتي فالحلال .. ضارت لعند ابراهام شافت فيه بصدمة و عاودات شافت فأرسلان كانت عارفاهم كايبغيو بعضياتهم مي ماشي تزوجو
أرسلان : 1
ريماس : علاش غاتيري فيهم؟؟ حيت تزوجو بلا خبارك؟؟ ياك نتا اصلا ماكنتيش مسوق لختك ولا عائلتك اش جاك دابا؟؟؟؟ ضروري تبغي تحرم عليهم اي حاجة بغاوها؟؟ ياك حتى نتا بغيتي تتزوج بيا واخا بيناتنا فرق كبير
أرسلان : 2
ريماس : ماغانخليكش توصلهم الا على جثتي الزواج فالحلال ماشي ذنب .. الذنب هو كون عاشرها بلا مايتزوج بيها الذنب هو كون لعب بيها
أرسلان : حيدي و خليني نصفي حسابي معاهم ولا كوني اكيدة ماغاديش نتردد نخلطك نتي وياهم
أبراهام : مدام ريماس غير حيدي و خرجي من الموضوع ايلا بغات تجي الموت مرحبا بيها .. انا ماتزوجت بجوليانا حتى كنت نيت كانبغيها و قادر نموت فسبيل تعيش هي .. ماغانخافش و عمرني غانخاف ( شاف فأرسلان ) و ايلا كان الحب ذنب و عار فنظرك ا ميستر ارسلان تقدر تقتلني ولكن تأكد بلي ماغانخليكش تأذي جوليانا إلا على جثتي ولكن قبل من هادشي كامل بغيتك تعرف حاجة وحدة واخا تزوجت بجوليانا ولكن عمرني قستها و مابغيت نقيسها حتى نعتارف بزواجنا قدامكم .. قربات جوليانا و شدات فيد ابراهام
جوليانا : ايلا كنتي غاتقتلنا ا خويا قتلني انا اللولة .. رجعها ابراهام من مور ظهرو
أبراهام : ماغايوقع لك والو مادام انا باقي حي .. واخا نعرف نفديك بدمي و روحي
ريماس : صافي لهاد الدرجة وصلات بيك ا أرسلان؟؟ .. علاش باغي تقتلهم؟؟ حيت تزوجو و لحد الساعة مزال ماحط يدو عليها غي حيت كايحتارمك و مابغاش يتسما كايلعب من مور ضهرك؟؟ كون عاشرها و نعس معاها ديك الساعة عاد غاترتاح؟؟ ديك الساعة عاد غاتتقبل زواجهم ياك
أرسلان : اخر انذار عندك خرجي من الموضوع
ريماس : ريماس بعدي .. ريماس ماديريش .. ريماس ماتفعليش ريماس ريماس ريماس ... واش ماكاتعياش؟؟ .. ( وسعات يديها كحماية لأبراهام و جوليانا ) هاد الموضوع بالذات ماغاديش نخليك تطبق فيه همجيتك و ماغانخليش يمشيو ضحيتو ختك و راجلها بغيتي تقتل شي حد؟؟ قتلني اش كاتتسنا تيري فيا .. مع كملاتها ضرب بقرطاسة دازت من حدا ودنيها حسات بالريح دازت من حداها ماتزعزعاتش و بقات بنفس الوقفة بنفس الشموخ بنفس نظرة القوة لي فعينيها .. ماباغاهش يندم من بعد فاش يقتل ختو و ابراهام و ماباغاش جوليانا تموت حت عزيزة عليها و ماباغاش ابراهام يموت حيت عارفاه واخا كايظهر ليها بلي ماحاملهاش الا و انها عزيزة عليه و متى هو عزيز عليها بالرغم من المشادات لي بيناتهم لي اغلبهم كايكونو بسبب اوامر ارسلان .. مشا لجهتها و بغا يجرها تنطرات منو و رجعات وقفات قدام ابراهام و جوليانا .. عاود جرها و هاد المرة بقوة حتى خرجها من المكتب و سد الباب .. بدات كاضرب فالباب باش يحلها و كاتغوت .. كايجي مالك يشدها و كادفعو
ريماس : ( بالغوات ) هادي هي حقيقتك شحال ما حاولتي تزيد من الألوان فاللون الكحل .. كايبقا فنفس لونو و هادشي لي واقع معاك ا ارسلااااااان .. تيق بيا ايلا قتلتيهم عمممرك تحلم نقبلك نكون مرتك .. طلق منييي نتا ماتشدنيش أرسلااااان حل الباااب .. تسمع صوت جوليانا كاتبكي لداخل و موراها مباشرة عاود تسمع صوت قرطاسة و ما هي الا ثواني عاودات تسمعات صوت قرطاسة خرا و تقطع الحس الشيئ لي خلا ريماس تحس بالقلق عليهم .. بقات كادفع و تركل فالباب باش تتحل و مالك كايجرها كادفعو و ترجع للباب و والو مابغاش يتحل الباب بقات كاضور عينيها بحالا كاتقلب على شي حاجة حتى شافت السلاح ديال مالك طيراتو ليه بخفة و مع بغا يحيدو لها هزاتو فوجهو
ريماس : بعد لهيه ا مالك .. ايلا مابغيتيش نتا تعاونهم و توقف معاهم انا ماغانكونش بحالك
مالك : ريماس نزلي السلاح راه
ريماس : قلت لك بعد لهييييه .. بقا كايبعد كايبعد حتى بعد بمسافة كافية و تيرات جهة الساروت ديال الباب بجوج قرطاسات وحدة من مور وحدة حتى تحل الباب ديال المكتب ...
دخلات مخلوعة عليهم .. لقات ابراهام جالس فالكرسي و حداه جوليانا شادة فيديه و قدامو أرسلان لي كان حاط صبعانو بجوج مابين عينيه
أرسلان : ساليتي.!!
ريماس : ماقتلتيهمش؟؟ جوليانا راك بيخير؟؟
أرسلان : خرجي
جوليانا : راني بيخير ا ختي ريماس ماتخافيش عليا
من مور ما سد على ريماس الباب رجع وقف قدام أبراهام و جوليانا و هز السلاح عليهم ضغط الى زر الامان باش يتيري فأبراهام متجاهل الضرب لي فالباب و غوات و هضرة ريماس من غير جملة وحدة لي تسللات لمسامعو و هي " شحال ما حاولتي تزيد من الألوان فاللون الأسود .. كايبقا فنفس لونو و هادشي لي واقع معاك " هاد الجملة نفسها كانت قالتها لجدو بهمس نهار خرجاتو لحدا لابيسين و كان كايسحابلها ارسلان ماسمعهاش ولكن هو سمعها و كان عارفها كاتكره جدو كره شديد .. فاش سمع نفس الجملة هاد المرة و لأول مرة جاتو واحد الرهبة فأنها تكرهو بحال لي كانت كاتكره جدو .. وي أرسلان لي كان كايقولها ماكايهمنيش ايلا كنتي كاتبغيني مدام نتي ماغاتبغي حد .. وي ارسلان لي ماكانش مهتم بأنها تبغيه يكفي انه كان باغيها تبقا ليه .. هو نفسو دابا لي ماباغيش يفقد المشاعر ل ولات كاتحس بيهم من جهتو حيت هاد المشاعر هما لي مخليينها تحن عليه و تبغي ليه الخير و تبادلو العناقات .. عشقو ليها فشكل بقدر ماكايعشقها الا و انه ماعندوش مع كثرة كلام الغزل لي ماعندوش فايدة .. بالنسبة ليه الحب هو التطبيق يعني يطبق عشقو و هوسو ليها ماشي غير يبقا داوي و كل دقيقة يتغزل فيها .. خرج من دوك الافكار و رجع للواقع
أرسلان : أمنية اخيرة؟!
أبراهام : أمنيتي من الله هي يجمعنا ربي فجنته .. ايلا ماكانش مكتاب ليا نتجمع معاها فالدنيا باغي نتجمع معاها فالأخرة اما طلبي ليك ا ميستر أرسلان .. ما تأذيهاش حيت جوليانا جوهرة نادرة ماكاينش بحالها .. انا فعلا بغيتها من قلبي قلبي غدرني
جوليانا : ( زيرات على يديه ) ايلا كنتي غاتقتلو ا خويا قتلني معاه
أرسلان : عزيز عليا نلبي الطلبات .. بتاسم ابتسامة غريبة و وجه سلاحو لجهة أبراهام .. ضغط على الزناد ضغطة خفيفة كان ممكن بسبب ديك الضغطة يموت ابراهام ولكن القرطاسة دازت من فوق راسو على بعد ملمترات قليييلة حس بحال ريح خفيفة حركات ليه زغب راسو ولكن ماتزعزعش من بلاصتو .. بدات جوليانا كاتبكي
جوليانا : اهئ اهئ لاااا ا خويا ايلا كنتي غاتقتلو قتلني قبل منو اهئ اهئ عااافاك ماتقتلوش قداميي .. ماجاوبهاش و عاود تيرا فنفس البلاصة ولكن نفس الشي ابراهام ماتزعزعش .. رجع السلاح لبلاصتو
أرسلان : تحركو لهيه .. مشا ابراهام و جوليانا جلسو فالكرسي و تقابل معاهم ارسلان .. شوية تسمع صوت القرطاس و تفرعات الباب
ريماس : واش كاتلعب بيا؟ بلعاني درتيها ياك؟
أرسلان : ماغاتخرجيش؟!
ريماس : ماخارجاش اش ضمن لي ماغادير لهم والو
أرسلان : كون بغيت نقتلهم ماكنتيش غاتشوفيهم باقيين قدامك و نتي عارفاني ماكانتعطلش فبحال هاد الأمور
ريماس : على هاد الحساب ماغانخرج من هنا حتى يخرجو هما ... جابت كرسي قلباتو و جلسات حداهم و الفردي باقي فيديها .. حيدو لها ارسلان من يديها و حطو فوق البيرو عاد بدا هضرتو و هو كايشوف فالجوج لي قدامو
أرسلان : ( بهدوء ) عرسكم من مور شهراين ( شاف فأبراهام ) من هنا لداك الوقت بقا بعيد عليها حيت ايلا لقيتك معاها ماغانسولكش على امنيتك قبل الموت .. غانخليك تتمنى الموت و ماتلقاهاش .. شافت فيه جوليانا و ابراهام بصدمة ماكانوش متوقعينو غادي يتقبل زواجهم بل كانو متأكدين هو اول شخص غايرفض اولا بسبب اختلاف المكانات الاجتماعية ثانيا حيت سلمو بجوج بلا مايقولوها لو لي ماعارفينوش هو ان ارسلان تبدل و مابقاش كايهتم بالطبقات الاجتماعية و كرهو للإسلام تبخر من مور ماعشق ريماس .. شافت فيه ريماس بنظرات كايدلو على انه عجبها تصرفو حيت باغي يزوجهم قدام العائلة .. اكيد كون كان باقي ارسلان القديم كان غادي يقتلهم بجوج ولكن لا .. هو دابا مادارهاش فقط حيت مابغاش يفقد ريماس .. اشار لهم للباب باش يخرجو و خرجو من تما و هما فرحانين و الدنيا ماسايعاهمش كون كان عندهم جناح كون طارو
أرسلان : خرجي باقي باغي نهضر مع مالك .. قربات لعندو و شدات يديه فيديها
ريماس : ( بإبتسامة ) احسن قرار خديتي هو هدا .. تيقني ماغاديش تلقا جوليانا شي حد يحميها و يصونها و يبغيها بحال أبراهام
أرسلان : ريماس
ريماس : خوويا ابراهام .. ناضت من تما و خرجات خلات مالك يدخل يشوف ارسلان ...
طلعات للشومبر ديالها دوشات و نشفات شعرها و بدلات و عاودات هبطات كاتتسارا فالقصر غير مبالية بقواعد القصر لي اصلا ماعمرها طبقات شي وحدة فيهم من نهار دخلات .. البلاصة لي ممنوع تجلس فيها كاتلقاها جالسة فيها و الحاجة لي المفروض ماديرهاش كاتلقاها هي اول حاجة كاديرها شوية تفكرات مالك .. حتى هو سلم ياكما غايدير ليه ارسلان شي حاجة بسبب هادشي .. بدات كاتزرب فخطواتها فإتجاه مكتب أرسلان ولكن ما ان وصلات لقات أرسلان خارج من المكتب و تابعو مالك مامعطوب ما والو .. صحة سلام ، شاف فيها أرسلان و عطا الاشارة لمالك باش يسبقو فحين هو بقا واقف مع ريماس طلعها و هبطها و رجعات صورة إيليانا لبالو هو ماموالفش يقارن ريماس بحتى وحدة و حتى دابا ماقارنهاش ولكن هاد النقطة لفتاتو و بقات مرسخة فبالو من الفطور كيفاش إيليانا لي يلاه عندها نهار فالاسلام ولات كاتستر و ريماس طول حياتها كانت مسلمة و عمرو شافها بداك اللبس
أرسلان : طلعي لبسي الفوقاني
ريماس : ماعجبنيش الفوقاني ديالها و اصلا هاكا عاجباني
أرسلان : كون حيدتيها غايكون حسن
ريماس : كنت فكرت فيها ولكن أجلتها لمرة خرا
أرسلان : تعقلي و ديري عقلك ا ريماس
ريماس : مافهمتش علاش وليتي كاتعلق على حوايجي بزاف مؤخرا
أرسلان : بالليل غانرجع باقي عندي معاك نقاش طويل على هاد القضية
ريماس : حتى الليل .. جبد يدو من جيبو رجع لها واحد الخصلة ديال الشعر من مور ودنيها و مشا للوطو ديالو لي كان كايتسناه فيها مالك
مالك : ميستر أرسلان هضرت مع السيد و قال بلي غايكون ف***** دابا
أرسلان : مزيان .. خرجو من القصر و شدو الطريق للوجهة ديالهم
•• في مكان اخر ••
كانت إيليانا كاتلبس فواحد الخيمار و أسوار مراقبها بعينيه مقاتلة معاه حيت لحد الساعة ماكاتعرفش تلبسو حتى جا وقف قدامها و بدا كايدخل لها الجناب فواحد اللحظة سهى فوجهها و بقا كايقرب لها شيئا فشيئا حسات بالفرحة حيت و اخيرا قدرات تأثر عليه حتى غمضات عينيها كإستعداد شوية بعد عليها و عطاها بالضهر بغا يخرج ولكن شداتو من يديه
إيليانا : تقدر تعلمني نصلي حيت مزال ماكانعرف .. وقف و بقا ساكت لثواني عاد جاوبها
أسوار : واخا
هاكا داز النهار فالقصر إيلينا كاتحاول تتقرب من اسوار بجميع الطرق الممكنة و عند ابراهام و جوليانا من الوقت لي قالهم ارسلان غايتزوجو مي مايبقاوش يطلاقاو و هما الفرحة ماسايعاهمش ولكن بيان السيغ التواصل فطيلي ماتقطعش بيناتهم هاد النهار حيت كانت جوليانا كل شوية كاتتاصل بيه باش توصف ليه شحال هي فرحانة .. ارسلان و ابراهام نهار كامل و هما غابرين اما ريماس كانت كاتحاول تستكشف باقي القصر ولكن كانو شي بلايص ماكاتوصلش لهم حيت كايبانو لها ممرات طوال بزااف و كلهم بيوت داكشي لاش خرجات كاتستكشف جرادي لي فالخارج باش تختار وحدة تبقا تفطر فيها حيت هي ماعزيزش عليها الفطور لداخل .. بقات هاكا حتى ضلام الليل و وصل وقت العشا .. كلشي تجمع فالطبلة ديال العشا حتى من ارسلان جا الا هي كانت مزال كادور حتى عيطات لها الخدامة عاد دخلات لقات كلشي مجموع .. جلسات فبلاصتها تحت نظرات ارسلان من نهار برات و هي غير كادور من هنا لهنا فاش كانت مريضة كانت بعدا بعدا كادور و ترجع للشومبر .. تعشاو فصمت سالاو و كل واحد فين مشا .. ارسلان عيط لمالك يتبعو للمكتب و ريماس طلعات للشومبر كاتقاد بلاصتها باش تنعس .. دخلات غسلات سنانها و لبسات حوايج النعاس لي كانو عبارة على بيجامة بيضة شورط قصير فوق الفخاض و سوفيطمة سماطي قصيرة .. مشطات شعرها سرحاتو و تجهزات باش تنعس .. يلاه بغات تنعس و هو يتحل الباب
ريماس : غير خلي نقاشنا لغدا حيت راه فري عييت هاد النهار .. بقا كايقرب لعندها و عينيه كايتفحصوها من راسها حتى لصباع رجليها
أرسلان : مامستغربش حيت عييتي .. منين صباح الحال مارصيتي
ريماس : ماعنديش سبب علاش نرصى مابقيتش مريضة .. قرب لعندها و حاوط خصرها بيديه و جرها لعندو ...
جرها لعندو حتى تقابلو عينيها الخضروتان بعينيه السودوتان لي كاتحيطهم هالة سوداء ماشي دوك الهالات ديال قلة النعاس بل نفس الهالة لي خلاتها ماترتاحش ليه نهار اللول هالة الشر و الخبث لي فعينيه .. الهالة لي ماكاتخلي حد يرتاح ليه و هو كاين ما عدا هي لي والفاتها و والفاتو بل ماشي غير والفاتو راها كاتبغيه .. قربها لعندو حتى ولات كاتحس بحرارة جسدو لي كانت زايد على غير العادة .. القرب ديال وجهو لعنقها خلاها تحس ببرودة انفاسو لي كاتصقع بحال البرد .. فعلا اي حاجة فيه متناقضة حتى من حرارة جسمو كانت متناقضة مع برودة انفاسو .. ماعارفاش بلي ديك الحرارة كانت بسبابها حيت نهار على نهار غرائزو اتجاهها كايتضاعفو و لو كان ماكانش كايضبط نفسو و ماكايخليش غرائزو و شهواتو تتحكم فيه كان ممكن .. تنهدات تنهيدة خفيفة لي بإثرها طلع صدرها و هبط
ريماس : غانوض ننعس هدا هو الوقت .. قربها لعندو كتر
أرسلان : ( بصوت خشن ) مزال ماغاتمشي ا مرتي باقي عندنا نقاش طويل
ريماس : لا ماشي دابا .. ماغانناقش والو حتى لغد مشا الحال دابا و قلت لك راني عيانة
أرسلان : ماغانتسناش
ريماس : واخا بعد و خلينا نجلسو و نتناقشو
أرسلان : لا
ريماس : غانبداو نتخاصمو حتى فهاد الوقت؟ مافيااش
أرسلان : ولكن انا فيا
ريماس : اوك منين فيك .. خلي حتى لغدا و نتخاصمو
أرسلان : سمعتيني قلت فيا مانتخاصم!
ريماس : ارسلان خرج خليني ننعس
أرسلان : قلت عندنا نقاش ناقشوه .. شافتو مابعدش و مزال شاد نفس الشدة الهضرة نهائيا ماكاتنفعش معاه بتاسمات ابتسامة عريضة صفرا و هي سادة فمها ماعرفهاش علاش بتاسمات حتى هزات ركبتها و غفلاتو بركلة قوية للمنطقة الحساسة ماقدرات تخليه الا يدفعها مع الحيط و يغمض عينيه و يزير عليهم بسبب ديك الضربة حيت واخا يكون الراجل كيفما بغا يكون ديك الضربة مستحيل ماتشدش فيه و خصوصا ايلا كانت من عند شخص رياضي .. حاصرها فالحيط و زير على عينيه و عاود حلهم بدا كايطردق فعنقو .. كانت القبضة ديالو قوية و صعب يتفك منها بنادم
أرسلان : ( بصوت خشن ) تعقلي و ديري عقلك ا ريماس
ريماس : واش انا لي خاصني نتعقل؟ ياك كنت غانوض ننعس حتى جيتي
أرسلان : ( تنهد تنهيدة طويلة ) اش درتي فيا
ريماس : لحد الساعة مادرت والو .. هز يديه و رجع خصلة ديال شعرها اللور و زاد لصق فيها و هضر بصوت خافت مخلط ببحة رجولية
أرسلان : سحرتيني .. طلع سوفيطمة بيديه و خلا يديه محطوطة على لحم خصرها بدون حاجز الثوب
ريماس : أرسلان عرسنا مابقا ليه والو .. قرب لحدا ودنيها
أرسلان : هسس ماغاندير والو .. مازربانش عارف ليلتنا مابقاش ليها بزاف .. حسات بمصارن كرشها تلواو .. لحد الساعة جربات غير قبلاتو و نحيدو ديك " غير " حيت دوك القبلات ماكانوش كأي قبلات عاديين ماكان كايطلق من شنايفها حتى كايحس بالدم دايز بينهم فما بالك بالليلة لي مابين كل فترة و فترة كايفكرها فيها شنو زعما داك الطاقم الطبي يكون جابو على ود ديك الليلة زعما ولا كيفاش .. خرجات من تفكيرها
ريماس : هانتا قلتيها مازربانش وا سير للسويت ديالك خليني ننعس غدا فايقة بكري .. هز صبعو و دوزو على شفايفها
أرسلان : مابقاش بزاف و يولي الجناح ديالنا
ريماس : هدا هو الموضوع لي كنتي باغي تتناقش معايا فيه؟؟ .. بعد وجهو عليها و بقا كايشوف فيها بحالا كايحاول يتفكر شي حاجة
أرسلان : خرج من بالي ولكن غالبا غايكون على شي حاجة درتيها ماعجباتنيش
ريماس : يعني صافي غير نوض ننعس و تمشي حتى نتا لجناحك
أرسلان : هاد الليلة غير
ريماس : غير؟
أرسلان : غاننعس هنا .. بعداتو بيديها
ريماس : ماعندك فين تنعس .. مزال ماكاين بيناتنا والو
أرسلان : كانظن ماعندكش قيود لي يمنعوك
ريماس : عندي مبادئ لي مانقدرش نتخلا عليهم .. دابا سير للجناح ديالك و غد مع ل5:30 غانكون فجناحك باش نكملو بونوي
أرسلان : بونوي.!!
ريماس : احلام سعيدة هادشي لي كنتي كاتتسنا؟ .. جرها لعندو و غفلها ببوسة شرك لها فيها شفايفها بجوج حتى تقطعات فيها النفس عاد حبس و ختمها بعضة خفيفة
أرسلان : دابا تقدري تنعسي
ريماس : ماتعاااودش ديرها .. ديما غافلني و قاطع لي النفس
أرسلان : ( بإبتسامة جانبية ) دابا نولي نعلمك قبل مانديرها ( عاود شاف فحوايجها ) ولكن ايلا كنت غانولي نشوفك بهاد اللبس كل ليلة خاصك تولفيها غير قبل العرس حيت من مور العرس خاص تولفي ما كتر .. خرج من تما و مشا ديريكت للدوش باش يدوش تحمد الله منين ماغتاصبهاش ... يتبع