أرسلان : اش كانبان لك؟!
ريماس : اش كاتقصد؟؟
أرسلان : لعبة انا؟!!!!
ريماس : مافهمتش فين باغي توصل بهاد الأسئلة
أرسلان : هضرت معاك ماتدخلينيش من سوق العيالات ولا لا؟!!!
ريماس : اينا سوق لي دخلتك ليه؟؟؟؟؟
أرسلان : راجعي تصرفاتك
ريماس : تصرفاتي مراجعاهم نتا لي خاصك تراجع تصرفاتك لي تبدلو .. أرسلان دير فبالك واحد الحاجة روحي و مامربياش عليها الكبدة فما بالك بالناس لي ضايرين بيا .. راه نفضل نقطع راسي بيدي و مانذلش راسي على ود شي حد .. تصرفاتك تبدلو غير مؤخرا فاش بديت نبدل فراسي ولكن لحد الساااعة راني قادرة نسحب راسي بهدوء و نرفض هاد زواج من أصلو
أرسلان : و غانعاود نقولك مامحتاجش لموافقتك .. شافت فيه و ناضت من بلاصتها متوجهة للباب
ريماس : ( بشبه إبتسامة ) على هاد الحساب شد خاتمك عندك ماموافقاش نكون مرتك .. الحاجة المشروكة ماكانحملهاش و كاننفر منها .. حاجة خرا السباق مابقيتش غانكمل فيه على ودك .. غانكمل فيه باش نحنتها و نمرمد كرامتها و بالنسبة لفاش قلتي بلي واش انا معتابراك لعبة .. التحدي و نغامر براسي ماكانش لعبة و نتا ماكنتيش جائزة ماتبقاش تترجم افعالي لمفاهيمك الخاصة ... نزلات للجردة و خلاتو فالبيت كايستوعب هاد التغيير لي كاتتغير بالزربة ... هو ماتقبلش انه يكون جائزة فسباق بين 2 بنات و هي ماتقبلاتش تكون وحدة من نسائو لي ماعارفاش شحال غايكون العدد ديالهم .. هو فنظرو هي لي غالطة و هي فنظرها هو لي غالط .. حتى واحد فيهم ما تصالح مع لاخر .. هز الخاتم و رجع للجناح تما عندها هي .. بقات فالجردة ساهية فالسما و عقلها خدام فبزاف ديال الحوايج .. بقات تما حتى بدا كايصباح الحال و طلع معاها البرد .. فاقت و رجعات لبيتها توضات و صلات و رجعات تخشات فالمانطة تنعس غير مبالية بشنو واقع و شنو ممكن يوقع غدا
°• صبح صباح جديد مليئ بأحداث جديدة .. دخلات دوشات و طوال الوقت لي كانت كاتدوش فيه قررات قرار غايخلي طابع تغيير فشخصيتها باش تتهنا .. خرجات لاوية الفوطة كاتقلب على ماتلبس .. رجعات لأيام أناقتها فالمغرب .. تأنقات بالزايد هاد النهار فلبساها .. ضفرات شعرها رجعاتو للجنب و رشات البارفان و خرجات متوجهة لطبلة ديال الفطور .. كان كلشي جالس ما عداها هي و أرسلان .. مشات سلمات على اديرة و خوتها و جوليانا شافت فالكرسي لي كان المفروض تجلس فيه لقاتو عامر
ريماس : ( بإبتسامة خفييييفة ) صحة فطوركم
أسوار : فين غادا؟؟ ماغاتفطريش؟؟
ريماس : غانفطر فجردة
سي أصلان : من قوااعد القصر كلشي يتجمع فطبلة
ريماس : نهار نولي وحدة من القصر ا سي أصلان ديك الساعة غايكون من حقك تقوليا واش نتبع القواعد ولا لا
غابريال : لزمي حدووووودك
ريماس : فالوقت الحالي لازماهم ... خلاتهم و مشات للكوزينة لقات الخدامات مجموعين غير شافوها ضارو لعندها بزربة
الخدامة : مدام علاش عدبتي راسك كون عيطتي لي انا نجي لعندك
ريماس : مادموزيل ماشي مدام ... المهم فطوري جيبيه لي للجردة اللورانية
الخدامة : هي لي ماتعاودش ا مادموزيل ريماس
الخدامة 2 : كاينا شي حاجة محددة تبغي تفطري بيها ا مادموزيل ريماس
ريماس : العصير ديال الليمون بغيتو طبيعي ماتزيدوش السكر
الخدامة 2 : واخا ا مادموزيل .. مشات لجهة الجردة و جلسات كاتشمش فشميشة ديال الصباح و كاتتسنا الفطور عينيها فلابيسين و عقلها فشنو كايخطط أصلان
♚ جلس فالطبلة ديال الفطور و عينيه كايقلبو عليها مالقاهاش جالسة .. عيط للوحدة من الخدامات
أرسلان : اجي نتي
الخدامة : ( حادرة راسها ) وي سيدي
أرسلان : مزال ما فاقت ريماس؟!
الخدامة : راها فاقت قبيلا ا سيدي
أرسلان : و فينها؟
الخدامة : كاتفطر فالجردة بوحدها ا سيدي .. عطاها الاشارة بيديه باش تمشي
سي أصلان : مابقاتش كاتحشم و مابقات تلتازم لا بقواعد لا والو
غابريال : خاصك تهضر معاها تهبط راسها شوية راها بحالها بحال عيالاتنا اش زايد فيها
إيلام : بقا لها شوية و تجي ضربنا
سي أصلان : وقاحتها زادت عن حدها
أرسلان : فطرو .. كمل فطورو غير مبالي لأنها ماجاتش تفطر قدام عينيه
سي أصلان : اليوم عندك الاجتماع ا حفيدي
أرسلان : تأجل
سي أصلان : علاش؟؟؟؟
أرسلان : روكفلر ماغايحضرش اليوم
سي أصلان : و شنو السبب؟؟؟
أرسلان : ( ببرود ) سيفطت ليه دعوة باش يحضر السباق ديال بنتو لي كايفتاخر بيها
سي أصلان : واش السباق اهم من الاجتماع؟؟
أرسلان : ماعنديش مشكل نعقد الاجتماع ولكن ماتنساش ا جدي اي اجتماع كايكون غايب منو فرد من افراد المنظمة كايكون مامقبولش
سي أصلان : بغيت نطلع لجناحي
أرسلان : جدي كمل فطورك
سي أصلان : كملتو .. عيط لدوك جوج رجال طلعوه و هو معصب اول حاجة دارها هي عيط لواحد الرقم
سي أصلان : باغيك فأمر ضروري ... اليوم قبل غدا ... ****************** و ما نبغي حتى شي غلط ... تما بالضبط .. قطع عليه و عاود تاصل بفيوليت باش يشوف الوضع فين وصل شوية سمع الحس حدا الباب و قطع الاتصال سيفط دوك 2 لي كايكونو معاه باش يشوفو شكون ولكن مالقاو حد
♔ وصلات العشية و بدات كاتجهز فراسها .. لبسات سروال تجينز تقاطع واسع مع ضوني قصير و من الفوق قبية مفتوحة ديال الپارا مع إيرفوكس فنفس الشكل ديال الفوقاني لي لابسة ... رجعات ضفرات شعرها و رجعاتو القدام شافت فالساعة لقات مابقا والو ، هبطات لتحت بدون ماتتسنا شي حد دايرا فبالها غير غاتخرج غاتلقا اللوطو كاتتسناها و فعلا لقات اللوطو لي ختارت و لقات حداها أبراهام و مالك
أبراهام : فين غادا؟؟؟؟
ريماس : بان ليا نسيتي بلاصتك و وليتي كاتتدخل فسيادك .. بقا كايشوف فيها بصدمة من الطريقة لي هضرات بيه معاها عادة كانت كاتتجابد معاه فالهضرة ولكن اليوم ضارت فيه ضورة خايبة خلاتو يتحرج قدام مالك و الرجال لي واقفين تما .. لقات السوارت فاللوطو ركبات و ديمارات
مالك : خاصنا نتبعوها انا متأكد الوضع خطير عليها على برا
أبراهام : انا ديك خيتي ماباقيش غاندور بساحتها غير فوتني عليك
مالك : تقلقتي منها؟؟؟؟ وا صاحبي راك عارفها حال و احوال غاتكون غير مدابزة مع ميستر أرسلان ولا شي حد قلقها بشي هضرة
أبراهام : فوتني عليك هاد الساعة
مالك : انا غانتبعها بغيتي تبقا بقا ... مشا ركب فلوطو خرا و يلاه بغا يديماري ركب حداه أبراهام
أبراهام : غير على ود ميستر أرسلان
مالك : حتى ريماس راه بحال ختي
أبراهام : بحال ختك حتى نكون ماعارفش اش كايدور لك فداك المخ
مالك : ماتفهمهاش عوجة
♔ وصلات للبلاصة لي غايتقام فيها السباق كانت متوقعة غاتكون غير فيوليت ولكن كان العكس .. عائلة روكفلر كلها حضرات و الصحافة و شي وجوه عمرها عرفاتهم ... منهم الطبقة الغنية و منها الطبقة الفقيرة .. الخلاصة جمهور كامل كان حاضر .. غير شافوها شي وحدين جايا من بعيد تعرضو لها كانو الفريق ديال الصيانة غايتكلفو باللوطو على ود روايض و المازوط و الموطور...الخ ... دازت مدة قصيرة بان ليها أسوار جا
أسوار : حظ موفق
ريماس : الحظ ديما معايا
أسوار : ماتخليهاش تفوز راني تايق فيك
ريماس : و انا تايقة فراسي ... وصل أبراهام و مالك و مشا لجهتها
مالك : ريماس واش متأكدة باغا تشاركي بهادي؟؟؟
ريماس : ( بهدوء ) متأكدة
مالك : شوفي بنت روكفلر باش مشاركة .. راه باقي عندك الوقت باش تبدلي
ريماس : ختاريت و ساليت ... جات لعندهم فيوليت
فيوليت : ريماس بنجلون هنا .. ماتعطلتيش
ريماس : بان ليا درتي بحث مكثف عليا
فيوليت : بطبيعة الحال باش نعرف الخصم ديالي
ريماس : ماعندك زهر المعلومات لي طلعو لك .. طلعو ناقصين
فيوليت : كان عليك حتى نتي تبحثي عليا باش تعرفي الخصم ديالك
ريماس : كلشي غايبان فالسباق
فيوليت : ولا نقدرو نقولو كلشي غايسالي فالسباق .. قربات عندها ريماس بخطوات و شافت فعينيها لعينيها و نطقات
ريماس : كوني متأكدة ايلا كنت غادا للقبر اليوم غانجرك معايا
فيوليت : 7:00 وصلات و وقت السباق وصل
أسوار : ريماس عندها موهبة فجميع النواحي ماتتخدعيش فيها ( بدا كايضحك ) خاصك تجربي اللكمة ديالها كي دايرا
بنجامين : و ماتنساوش بنتي لي شحال من مرة شاركات فسباقات عالمية و ربحات لمدة ثلاث اعوام متتالية هادشي بلا مانحتاج نفكركم بالسباقات الغير قانونية
فيوليت : خاصني نشوف بعيني ماشي نسمع
ريماس : السباق غايكون طويل ... خلاتها و مشات تركب فاللوطو باس توصلها لخط الإنطلاق
جا واحد قدامهم و عطاهم الطريق لي غايدوزو منها و غمز فيوليت .. بدا العد العكسي و ما الا ثواني حتى بدا السباق .. بدات كاتتحرك طوموبيل ديال ريماس بشوية و بهدوء بينما اللوطو ديال فيوليت بدات طياااارة و صدعات عباد الله بصوت الموطور .. كانت ريماس غير مبالية ليها .. هاد الطريق لي غايدوزو منها عارفاها مزياااان حيت مادوزاتش فيها قليل .. كيفاش غاتنساها و هي نفسها الطريق لي حاولات تهرب منها هادي قريب 3 سنين من أرسلان .. غايبقاو غاديين فواحد الطريق و من موراها غايدخلو فواحد الغابة نفس الغابة لي كانت هربات منها
♔ بقات ريماس غادا على راحتها و عقلها كايفصل و يخيط بينما فيوليت سبقاتها .. بدات كاتحس براسها كاتتهز بسبب الحجر لي كاين فالطريق لي دازت منها اما ريماس فالله و اعلم اشمن جريحة سلكات ... دازت ساعتين تسمع صوت شي طيلي كايصوني فاللوطو هزاتو و جاوبات
أرسلان : ريماس رجعي دابا
ريماس : ( بهدوء ) ماعندي فين نرجع
أرسلان : رجعييي و ماتكمليش من ديك الطريق
ريماس : علاش واش خايفني نموت؟
أرسلان : ريماس رجعيي
ريماس : فات الفوت
أرسلان : فينك دابا؟!!!!
ريماس : ماكايهمكش
أرسلان : ماتزيديش تنيرڤيني فينك؟!!!!
ريماس : كاناخد إستراحة فالمنعطف الشمالي ديال الغابة
أرسلان : أجي لهنا كانتسناك
ريماس : ماجاياش و غانبقا هنا
أرسلان : اش وصلك لتما؟؟؟؟
ريماس : ماسوقكش
أرسلان : شحال باقي باش توصلي؟!!!
ريماس : ماتخافش باقي لها 10 دقايق عاد توصلني .. مانيش مسطية ندوز من طريق عامرة حجر
أرسلان : يعني فين نتي؟!!
ريماس : ( بنبرة هادئة ) بعيدة على خط النهاية بجوج دقايق ... حول نظرو لجهة خط النهاية لقا واحد اللوطو جايا .. نفسها اللوطو ديال ريماس .. وصلات لخط النهاية و تسمعو التصفيقات من عند الجميع .. خرجات من اللوطو لقات أرسلان كايتسناها جرها لعندو عنقها و زير عليها بجهدو بينما هي هاد المرة مابادلاتوش العناق .. بقا كايتفحصها بعينيه واش وقعات لها شي حاجة
أرسلان : فاش كانهضر معاك علاش ماكاتجاوبيش؟!!!
ريماس : ماكانبغيش نخالف قوانين السير
أرسلان : ماكانتفلاش معاك .. فاش هضرت معاك ترجعي علاش مارجعتيش؟!!!!
فيوليت : ( بعصبية ) هدااااا غشششش مايمكنش تسلكي طريق ماداخلش فالمنطقة المحددة لي عطاااااونا
بنجامين : بنتي اش وقع؟؟؟؟
ريماس : ( بنبرة هادئة ) قلت لك غانربح و ماكانعرفش الخسارة
فيوليت : علاش مادزتيش من الطريق المحددة؟؟؟؟؟
ريماس : حيت ببساطة حتى نتي مادزتيش منها
فيوليت : و نتي اش عرفك؟؟؟؟
ريماس : كاين شي واحد غايدوز من الفخ لي نصب هو ولا نقولو لي كانت عندو يد فيه؟
فيوليت : سمعيني .. غانعاودو السباق هاد المرة و غاندوزو من نفس البلاصة لمدة 15 دقيقة و ماكايهمنيش واش نربح ولا لا المهم نحاول و سواء ربحت ولا لا اتفاقنا غا يكون لصالحك .. بقات ريماس كاتشوف فيها بشك حيت كيفاش هي باغا تعاود تسابقها و هاد المرة ايلا ربحات ولا خسرات ارسلان غايبقا لريماس
أرسلان : لا
ريماس : ركبي فطوموبيلتك .. مشات فيوليت بينما أرسلان جر ريماس من يديها و تبعوهم اسوار و ابراهام و مالك
أرسلان : ساليتي .. تحركي قدامي ... نطرات يديه و ماجاوباتوش رجعات لجهة اللوطو ديالها و بقات كاتشوف فيها بشك .. بدات كاتتفحصها و مشات لجهة الخزان بقات كاتخويه من المازوط و خلات فيه غير الكمية لي غاتحتاجها للمسافة لي غادي ضربها .. ركبات و بقات كاتراقب فيوليت بعينيها .. هاد السباق الثاني قبلات فيه فقط باش تزيد تحطمها ولكن مايخفاش عليها بلي فيوليت اكيد كاتخطط لمخطط اخر من مور المخطط الأول
أرسلان غبر من تما اما اسوار و ابراهام و مالك مافهموش اش واقع و علاش السباق غايتعاود و على اينا غش كانت كاتهضر عليه فيوليت ... بدا السباق و هاد المرة ريماس كسيراااات .. عاود صونا عليها طيلي
أرسلان : كاديري غير لي فراسك؟!!!
ريماس : كيفما كادير حتى نتا غير لي فراسك
أرسلان : منين ساخية بروحك كون جيتي لعندي نسهل عليك الطريق
ريماس : فخبارك واحد الحاجة ا أرسلان
أرسلان : كانسمع
ريماس : ( بنبرة هادئة ) الفرانات ديال طوموبيل مقطوعين
أرسلان : ( بهدوء ) نطلاقاو فالأخرة .. قطع عليها بينما هي حولات نظرها لجهة المرايا ديال طوموبيل لقات فيوليت غبرات .. عاود صونا طيلي و هاد المرة كان أبراهام
أبراهام : ريماس فينك؟؟؟؟
ريماس : كانتسارا
أبراهام : الفرانات راهم مقطووووعين
ريماس : عارفة
أبراهام : عارفة و راكبة فيها؟؟؟؟؟
ريماس : مرة مرة بنادم خاصو يغامر
أبراهام : اش غاديري دابا؟؟؟؟؟ فينك
ريماس : غانبقا كانصوك حتى يتسالا المازوط
أبراهام : واش عندك شي عقل ولا لا؟؟؟؟؟ ايمتا غايتسالا المازوط و هو كان مپلاني
ريماس : ماتخافش حيت راني نقصت منو و ماخليتش بزاف .. فواحد اللحظة بانت لها طوموبيل غاديا لواحد الجرف نفس الجرف لي كان كايقلب عليها اسوار فيه المشكل ماشي هنا .. المشكل هو طوموبيل مابغاتش تبدل الإتجاه .. صااافي هنا عرفات راسها غاتموت ملاوحة .. المازوط مزال مابغا يتسالا واخا قللات بزاااف باش طوموبيل تحبس غير بوحدها ... شافت فالماكانة ديال يديها و غمضات عينيها كاتتسناه يتسالا بدات كاتخفاف السرعة شوية بشوية الفكرة لي طبقات نجحات ولكن الحظ ماوقفش معها حيت الكمية ديال المازوط لي كان عندها زايد .. يلاه بغات تحل الباب باش تنقز ما هي الى لحظات حتى حسات بالطوموبيل تزدحات من الجنب بشي طوموبيل خرا زدحة مجهدة خلات طوموبيل ديال ريماس تبدل الاتجاه و تسكت مابقاتش تحركات .. تحلات الباب ديال طوموبيل لي زدحات اللوطو لي كانت راكبة فيها ريماس خرج و وقف الوسط .. دازو ثواني خرجات حتى هي من اللوطو مجروحة من جبهتها باش تعرف اش واقع .. ما ان خرجات حتى لقاتو واقف الوسط كايشوف في وشها بملامح خالية من التعابير .. اللوطو لي كان راكب فيها تفرشخات من القدام و اللوطو لي كنت راكبة فيها هي تفرشخات من الجنب .. بقا كايشوف فيها بنظرات ماعرفاتش اش كايعني بيهم .. ترسمات إبتسامة جانبية على وجهو
أرسلان : ( بإبتسامة جانبية ) عرفتي دابا علاش ختاريتك من بينهم .. جبد يدو من جيبو و دوزها على الجرحة لي فجبينها .. بعدات عليه و رجعات اللور
ريماس : ماشي على قبلك عاودت السباق قبلتو حيت عزيز عليا نمرمد كرامة بحال ديك الماركة
أرسلان : عرفتي شحال من مرة كنتي غاتموتي هادي النهار؟!
ريماس : غير تهنا من هاد الناحية قاادة براسي و عارفة اش كان غايوقع هاد النهار .. ماتستخفش بيا ماشي حيت ماكانهضرش هادشي كايعني ماعارفاش اش واقع .. عارفة بلي ماكايجيش بنادم و يعرض السباق غير هكاك من دون سبب و عارفة بلي الطريق لي بغاتني ندوز منها فيوليت فالسباق اللول كانت مفخخة بالقنابل ( ضحكات بإستهزاء و كملات ) .. يسحابلك غير جيت و بدلت الطريق غير هكاك بدون سبب .. الخطة ديال جدك و ديالها سمعتها كااااملة هاد الصباح و سمعتو فاش كان كايوصي الكلاب ديالو عليا ... منين مانجحاتش لهم الخطة قطعو لي الفران زعما باش يتهناو مني .. ( قربات منو ) نساو واحد الحاجة .. ماغانتخشا فقبري حتى نجر كلشي معايا ... يتبع
أرسلان : ماغاتمشي حتى نمشي انا وياك .. يا تعيشي معايا يا تموتي معايا
ريماس : حتى القبر غاتشاركني فيه؟؟؟؟؟
أرسلان : قربي لعندي
ريماس : لا ماغانقربش ... جرها لعندو و خشاها فصدرو
أرسلان : هادي هي مرت الأرسلان
ريماس : و شنو سمية مرتو
أرسلان : اللبؤة ديالي .. بعدات عليه و عقدات حجبانها
ريماس : علاش دابا راك معايا؟؟؟؟ سير عند فيوليت راها تكون ربحات
أرسلان : ما ربحاتش
ريماس : الغشاشة لاخرا علاش لي ماهضرتيش معاهم؟؟؟؟؟ كاتقول كاتبغيني و كاتقول انا مرتك علاش لي ماقتلتيهاش هي بعدا هاه؟؟؟؟؟ ولا لا هي ماتصلاحش تموت من نهار عرفتك و نتا كاتقتل غير الرجال زعما العيالات مرفوع عليهم القلم ياك؟؟؟؟ ... العيالات حالة خااااااصة نقول جدك ماتقدرش تقتلو حيت هو لي رباك ايوا و فيوليت؟؟؟؟ اش كاتجيك منين ماقتلتيهاش علاش باقي مخليها حي
أرسلان : ( شاف فساعتو ) تعطلنا
ريماس : ماتعطلناش .. نتا لي تعطلتي انا هنا غا نبقا و داك القصر ماغانرجعش ليه يا نكون بوحدي تما يا بلاااش
أرسلان : أخر هضرة؟!
ريماس : ( عطاتو بالضهر ) وي أخر هضرة و ماغانتراجعش فيها .. حاوط يديه على خصرها و حط راسو فوق كتفها و همس لها فودنيها حتى تبورشات
أرسلان : ماغايشركك حد فبلاصتك
ريماس : و فيوليت؟؟
أرسلان : راني هضرت
ريماس : بغيت نسمعها ماتقولياش هضرتي
أرسلان : مامزيانش تهضري فالأموات بالخايب
ريماس : ( توسعو عينيها ) مااااتت؟؟؟؟؟
أرسلان : غانبقا نعاود فالهضرة
ريماس : و علاش قتلتيها؟؟؟؟؟؟ كون غير عطبتيها باراكا عليها .. بعد منها شوية و توجه للطوموبيل .. مشات حتى هي للجهة لاخرا و ركبات .. رجع بالطوموبيل اللور و قلب الطريق شد طريق الميناء
• كان جالس اصلان فالجناح و معاه الطبيب كايقيس الضغط ديالو
الدكتور : سي أصلان حاول تبعد على المشاكل و الصداعات فهاد العمر الضغط كايطلع بالزربة .. شرب دواك فالوقت و ماتهملوش .. خرج الدكتور من عندو و خلاه شاد الفراش .. غير سمع بلي ريماس نجات من الطريق لي كان متوقع دوز منها طلع لو الضغط ... وصلو للقصر دخلو بجوج ولكن ريماس دارت بحالا ماكاتعرفوش تسيفات عليه
أرسلان : مالك!!
ريماس : والو
أرسلان : سولتك مالك؟!
ريماس : اوسي قلت لك والو .. جبد الخاتم من جيبو و عاود شد يديها و ركبو لها
أرسلان : حذاري تحيديه من صباعك المرة الجاية .. نقطعهم لك
ريماس : شكون عرف .. هادشي غايكون على حسب الظروف ... بغات تطلع و شدها من يديها
أرسلان : غانسافر غدا .. غانغيب 24 ساعة و مانبغيش نلقا شي مشاكل
ريماس : المشاكل ماشي انا لي كانديرهم جدك لي كايديرهم شايفو بعيينيك كان غايقتلني جوووج مرات فنفس النهار و ماهضرتيش كاع .. طلعات و خلاتو كايمسح فوجهو بالأعصاب كيفاش باغاه يغوت على جدو و هو كايقتل كل من قلق جدو بشي كلمة او تصرف ... طلعات دوشات و صلات صلاتها و نعسات
° صبح صباح جديد .. فاقت ريماس و اسوار و جوليانا و ابراهام و مالك هما اول وحدين فالقصر صلاو الفجر و كل واحد اش مشا يدير ... وصل وقت الفطور و تجمع كلشي فالطبلة من غير اصلان لي عاود طاح فالفراش بسبب الضغط داكشي لاش ريماس جلسات فبلاصتو .. من الوقيتة لي جلسات و عقلها كايخطط شيطانها فاق من نعاسو و بدا يخطط من جديد و يفصل و يخيط لشخص واحد و شكون من غيرو أصلان ... طاحت فبالها فكرة مزياانا و قررات تنفدها من مور مايمشي ارسلان بدات كاتفصل فيها حتى فيقها اسوار من افكارها
أسوار : الصراحة ماخليتي ليا مانقول لك براااااااافو عليك ( شاف فيه ارسلان ) ا ختي ريماس
ريماس : عادي كان خاصك تتوقعها ا خويا أسوار
أسوار : ( كايشوف فأرسلان ) توقعتها ا ختي ريماس
أرسلان : ( كايشرب قهوتو الصباحية و كايهضر ) غانغيب 24 ساعة حذاري نشوف شي حاجة ماتعجبنيش سمعتيني ا أسوار
ريماس : و فين غاتمشي؟؟ ... شاف فيها أرسلان مطولا بقاو العائلة مترقبين و منتظرين القمعة لي غايقمعها باش يتشفاو حيت هو كي ذكرت سااابقا ماكايقول لحد فين غادي ولا فين جاي من غير جدو ولكن مؤخرا مابقاش كايقول
أرسلان : عندي اجتماع
ريماس : بالتوفيق
أرسلان : ديري عقلك مابغيتش شكاوي
ريماس : راني دايراه غير بنادم لي بوحاطي
أرسلان : وي حيت ماكانعرفكش باش تكدبي فوجهي
ريماس : و مالي كدبت عليك راه بنادم لي كايتشكا بزاف مالي انا ماكانتشكاش بزاف
أرسلان : راني هضرت ا ريماس ديري عقلك و خلي عليك داكشي لي فبالك
ريماس : شنو فبالي؟؟
أرسلان : شوفي نتي ... يتبع