سالا و رجع لعندها لقاها نعسات فبلاصتها .. عاود غبر دقائق و رجع هاز فيديه مانطة صغيرة غطاها من بعد ما طبع قبل فشفتيها .. عاد مشا جلس و هز البيسي باش يقابل شغالو .. دازو ساعات و ساعات و هما فالطيارة .. و اخييرا وصلو و هاد المرة ، تحطات الطيارة فالأراضي الفليسطينية حتى ترصات عاد ناض من بلاصتو .. طل على ريماس لقاها باقا ناعسة معذرها غاتنعس و هي منين صباح الحال و هي دور من هنا للهنا كانت ديك الساعة 4:00 ديال الصباح .. هزها بين يديه بالمانطة و نزلو .. كانت اللوطو كاتتسناهم و ابراهام فإنتظارو
أبراهام : على سلامتك ا ميستر أرسلان
أرسلان : فين مالك؟!
أبراهام : راه فالقصر ... مشا لجهة اللوطو حطها فيها و تحرك موراها تبعو ابراهام متوجهين للميناء ما هي الا نص ساعة حتى كانو وصلو للميناء .. يلاه جا بغا ينوضها لقاها فاقت
ريماس : صباح الخير
أرسلان : صباح النور
ريماس : شحال الساعة دابا؟
أرسلان : 4 ديال الصباح
ريماس : صافي وصلنا؟؟؟
أرسلان : باقي ساعة و ربع ديال الطريق .. توجهو لليخت و تبعهم ابراهام من مور ما وصا الرجال يديو الطوموبيلات لبلاصتهم .. عاودو شدو طريق .. و واخيرا ها هما قدام القصر مرة اخرى .. هاد المرة كانت خلافا على جميع المرات بالنسبة لريماس .. كاتحس براسها قد ما كايقربو للقصر قد ما كاتحس بإحساس زوين بحالا غاتشوف شي حد غالي عليها و هادشي لي مابغاش يتفهم لها .. شكون هاد الكمارة لي غاتفرح فاش غاتشوفها .. بعد دقائق وصلو لقدام الباب دخلانية ديال القصر .. وقفات اللوطو و يلاه بغات تخرج من طوموبيل وقفها ارسلان
أرسلان : ( عاقد حجبانو ) تسناي
ريماس : شنو غانتسنا؟ ... بدا كايقاد لها الفيستا و عاود هبط يديه لتحت كايرقع لها الكسوة من جهة الفخاض حيت كانت محلولة بدون قصد قاسو يديه فخاضها .. رجعات باللور بزربة
ريماس : جمع يديك عندك اش كادير
أرسلان : ( بإبتسامة جانبية ) مزال الحال على داكشي .. كل حاجة بوقتها ... خرج و بقا كايتسناها تخرج
ريماس : هاني
أرسلان : ردي البال لتصرفاتك مع العائلة حيت مانضمنش لك
ريماس : فهمت ا ميستر ارسلان شي اوامر خرا .. حط يديه من مور ضهرها
أرسلان : فالوقت الحالي ماكاينش .. دخلو لداخل و توجهو للفوق
ريماس : ماغانشوفوش عائلتك؟
أرسلان : ل5 ديال الصباح هادي .. نعسي حتى تفيقي
ريماس : و نتا ماغاتنعسش؟ .. احم المهم ماشغليش ... توجهات لبيتها بينما هو توجه لجناحو و هو مرتاح الراحة التااامة منين رجعها حداه .. دابا عاد غايجي وقت الحساب مع بعض الاشخاص .. هز طيلي دوز نمرة ابراهام
أبراهام : وي ميستر أرسلان
أرسلان : شد الطيارة للجزيرة لي عاد جيت منها
أبراهام : علاش ا ميستر ارسلان؟
أرسلان : كاينين تما 2 اشخاص ****** ... ****** .. عموما بلا ماتجيبهم تكلف بيهم نتا
أبراهام : ( بفرح ) واخا ا ميستر أرسلان .. قطع عليه و دخل يدوش و هو مرتاح البال اما بالنسبة لأسوار ففضل مايحطش فيه يديه اولا حيت بالرغم من كل شيئ خوه ثانيا ايلا عطبو غايبان فنظر ريماس هو لي ظالم واخا راه فالاصل فعينيها ظالم
♔ دخلات دوشات و لبسات بيجامة واسعة شوية .. دازت من فوقها ليزار بيض و مشات تصلي صلاتها .. سالات و بدلات البيجامة بسورفيط عبارة عن سروال فالكحل مزير و الفوقي ديالو فالأبيض .. نشفات شعرها و رجعات كاتسكتشف الغرفة واخا ماكانتش كاتحملها فاللول ولكن كايبقا واحد الحنين صغير ليها .. زغبها الشيطان و ما بان ليها غير تمشي طل على الشيبة العاصية واش فعلا باقي حي ولا مات .. حلات الباب بالشوية و طلات على الباب ديال ارسلان لقاتها مردودة .. بقات كاتتمشا على اطراف صبعانها حتى وصلات و حطات يديها على البواني ديال الباب يلاه جات تحلها
أرسلان : ( بصوت خشن ) اش وصلك لتما؟! ... حيدات يديها على الباب و ضارت عندو بالعرض البطيئ
ريماس : والو
أرسلان : غا نعاود نسولك اش وصلك لتما..!؟؟؟؟
ريماس : ( طلقاتها دقة وحدة ) بغيت غير نشوف واش باقي حي
أرسلان : بيتك
ريماس : نعم؟
أرسلان : ( بحدة ) بيتك و مانعاودش نشوفك وصلتي لهاد العتبة ولا روحك نخرجها من بلاصتها
ريماس : ( بغضب ) راه غير بغيت نشوف واش..
ارسلان : تحركيي
ريماس : ( بعصبية ) ماتغوتش عليا .. لي درتو فحقو راه قليييل هو لي قتل ليا خوتي عندوو الزهر منين ماغرستش فقلبو جنوي نرتاح منو و نشفي غليلي فيه .. واقف معاه حيت هو جدك يااااك و انا؟؟؟؟ ليك الله ا ريماس .. مشات من تما لبيتها و هي معصبة .. كون رجع الزمن اللور ماكانتش غادي تحرقو كانت غادي تهز جنوي و تشروط ليه القلب ديالو باش ضمن ليه توصيلة سريعة لعند عزرائيل
زدحات الباب موراها بينما ارسلان بقا حاضي معاها حتى دخلات عاد رجع للجناح ديالو باش يجهز راسو على ود الفطور .. لبس ملابس رسمية كعادتو و داز اول حاجة لعند جدو للجناح سلم عليه و بقا معاه شوية عاد مشا لعندها للبيت
أرسلان : لبسي باش تهبطي تفطري
ريماس : مافياش الجوع
أرسلان : نتي الخاسرة ماشي انا
ريماس : ماعندي مانخسر .. شاف فساعتو
أرسلان : 10 دقايق لي باقا عندك .. لبسي فيها كانتسناك
ريماس : اش وقع حتى مخليني نهبط نفطر؟؟ ياك موالف تخليني نفطر فالبيت
أرسلان : حتى دابا ماعنديش مشكل
ريماس : صافي واخا .. هاني لابسة .. طلعها و هبطها بنظراتو و اشار لها بيديه لجهة الماريو
ريماس : مالو؟؟
أرسلان : بان ليا نيتك تهبطي هاكا لا.!!
ريماس : و مالهم؟؟ راهم مغطييني
أرسلان : فداك الماريو كامل هادشي لي كاين؟!
ريماس : هادشي لي عطا الله .. مشا لجهة الماريو يشوف لقا تقريبا جميع الحوايج هكاك .. جبد بوليرو طويل و مدو لها
أرسلان : زيدي عليك هدا و حيدي منك الفعايل
ريماس : اينا فعايل درت؟؟؟
أرسلان : ماتعطليش .. حطو لها و خرج
ريماس : بناقص من شي فطور .. غانفطر بوحدي هنا ، ولكن ا بلااتي شكون قلتي لي كايتسناني؟؟؟ ... لبسات البوليرو و خرجات .. هبطو بجوج فالدروج و مشاو لجهة الطبلة ديال الفطور لي كانت مجموعة فيها العائلة كاملة ما عدا اصلان .. اول واحد شافها هو سي إيتان لي ملامح الغضب تجمعو فعينيه
سي إيتان : ( بغضب ) جاااات قليلة الحيا
أرون : الصمت ... مابقاش كايهضر عليها من نهار سيفطو أرسلان للسبيطار .. ضار إليان لجهتها و ماهتمش بزاف مدام زوجو ارسلان بحبيبتو شيرا مابقاش هامو تجي ولا ماتجيش .. بقاو كايدورو لجهتها واحد بواحد بقا اخر واحد هو اسوار لي غير شافها جاتو صدمة ثلاثية الأبعاد .. عااااد البارح خلاها فالجزيرة كي دارت حتى وصلات لهنا .. ريماس فهاد اللحظة دهشروها نظراتهم ليها لي باااينين انهم ماكرهوش يفرسوها حتى لواحد اللحظة حسات بالصدمة مخلطة بالفرحة إثر سماعها لواحد الصوت توحشاتو بزااااف
ريناد : ختي ريماس .. ناضت كاتجري لجهتها و تبعها فادي .. بقات مصدومة فيهم و مامستوعباش ياك داك القتال قتلهم؟؟؟ ياك أسوار شحال من مرة قالها بلي راه لقا قبرهم بعد جهد كبير و بلي راه كايزور قبرهم لااا و الأكثر انها من نيتها فداك العام كانت كاتوصيه يشوف شخص من فليسطين لي يبقا يترحم عليهم و يسقي لهم قبرهم .. هاد العام كامل كان كايكدب عليها؟؟؟ ولكن علاش غايكدب عليها؟؟؟ اش غايستفاد؟؟؟ .. فيقها من تفكيرها حضن ريناد و فادي ليها .. باش نزيد نعطيكم تذكير فالوقت الحالي ريناد ولات عندها 16 سنة و فادي 17 سنة
ريناد : ( بدموع ) ختي توحشتك بزاااف ... تخلطو عليها المشاعر ماعرفات تتصدم ماعرفات تتعصب ماعرفات تفرح كلشي تخلط عليها
ريماس : نتوما حيين .. فااادي ريناااد .. نتوما بصح حيين ، ( بدات كاضحك و تبوس فيهم بالصدمة و الفرحة ) توحشتكم .. توحششششتكم بزاااف علاش لي ماقال ليا حتى واحد راكم حيين علاش كدبوو عليا .. واش عدبوكم؟؟؟؟ هضرو جاوبوني؟؟؟؟
ريناد : لا ماوقع والو خايب .. عمي أرسلان تهلا فينا و عطانا بيتنا و كل نهار كايجيب لينا الاساتذة يقريونا و يعلمونا العبرية شفتي ا ختي وليت كانعرف نهضر بيها و دابا ولينا كانكملو قرايتنا فالمدارس عادي
فادي : و فاش كنا مراض ا ختي هو لي كان كايجي يغوت على الطبيب
ريناد : ختي فين كنتي؟؟؟؟ و علاش ماجيتيش لعندنا .. وقفات فبلاصتها و بقات كاتشوف فأسوار بحقد لي غير شافها كي كاتشوف فيه عرف راسو هاد المرة ما دار فيها ما يصلاح .. عاودات شافت فأرسلان .. ماكانتش ناوية نهائيا بلي غادي يوفي بكلمتو و غادي يجيب ليها خوتها لا بل هتم بيهم فغيابها و تكفل بكاع داكشي لي كايخصهم من دون ماتتأذى منهم شعرة .. فرحتها فهاد اللحظة كبيرة بزااف منين عرفات خوتها باقيين حيين .. واش لهاد الدرجة كايبغيها؟ لدرجة ينقذ 2 مسلمين ماشي من دينو غير على ودها؟؟
ريماس : شكرا
أرسلان : دوزي تفطري
ريماس : رنودتي فادي سيرو تفطرو ... مشاو يفطرو و يلاه بغات تمشي حتى هي ، شدها من دراعها رجعها لعندو و همس فودنيها
أرسلان : شنو دابا كاتغفليني و طلقيه
ريماس : تطلق بوحدو
أرسلان : الهضرة حتى نرجع ماشي دابا .. مزال هضرة طويلة بيناتنا .. جرها من يديها و مشاو لجهة طبلة .. ترأس الطبلة ديال الفطور كالعادة و بقات هي كاتشوف فين غا تكلس ماكان خاوي غير الكرسي لي على ليمن ديالو و هداك كان فالسابق الكرسي لي كايجلس فيه هو
أرسلان : جلسي
سي إيتان : ولكن هداك راه..
أرسلان : ماسمعتينيش؟! .. جلسي ... جلسات تحت صدماااات الحاضرين من تعاملو معاها و الأكثر هو البلاصة لي ماكان كايخلي حد يجلس فيها خلاها تجلس فيها .. فداك الفطور مافطرو غا بزز مابغاش يدوز لهم و علاش هادشي كامل؟ على كرسي ..
جلسات باش تفطر او بالأحرى باش تستكشف وجوه هاد القوم لي جالس فوق الطبلة .. ضايعة فيها ديك السمية .. كلهم مقابلينها بنظرات حقد من غير جوليانا لي مرة مرة فاش كايطلاقاو عينيهم كاتبتاسم ليها
أرسلان : ( بالعبرية ) فطري
ريماس : ( بالدارجة ) هاني كانفطر .. ماتسوقاتش لنظراتهم و فطرات فخاطرها ... بقات كاتفكر غير فهاد التصرف لي دار معاها .. ماكانتش متوقعة منو نهائيا غادي ينقد خوتها باغا تشكرو ولكن ماعارفاش كيفاش غاتشكرو على هاد التصرف حيت فالاول و الأخير هي ماشي ناكرة الجميل باش دير بحالا ماوقع والو حيت بفضلو مابقاتش مقطوعة من الشجرة كيف وهمها اسوار ... و بفضلو نقد خوتها لي على ودهم كانت دارت هادشي كامل .. شافت فيه و بتاسمات ابتسامة خفيفة عاد كملات ماكلتها
زوجة إيلام : ( بصوت خافت ) مابقيت فأرسلان والو
زوجة أرون : ماتزيديش عليا عافاك خليني غير نسرط هادشي لي كانشوف قدامي
زوجة إيلام : شوفي فين مخليها تجلس ... مافهمتش واش هادي سحرات ليه ولا اس وقع بالضبط .. سالا فطورو و شاف فيها
أرسلان : ساليتي؟
ريماس : وي ساليت
أرسلان : نوضي باغي نهضر معاك
ريماس : وي حتى انا بغيت نهضر معاك فشي حاجة ... ناضو بجوج و خلاو نظرات العائلة متبعاهم
إيلام : ( موجه كلامو لإيتان ) واش ماناويش تهضر مع ارسلان يحط واحد من العائلة خليفة ليه؟؟؟
سي إيتان : الخليفة ديالو غايكون ولدو و هادشي لي خاصو يكون
إيلام : و حنا غانبقاو كانتسناو حتى يكون عندو ولد ولا كيفاش؟؟؟ غاتبقا ديك البلاصة خاوية يجلس فيها نسا؟؟؟
سي إيتان : فاش غايشوف شي حد كايستاحق ديك البلاصة غايعطيها لو
أرون : الصمت
غابريال : مايمكنش تبقا خاوية خاص ضروري شي حل خاصنا نهضرو معاه
أرون : انا ولد خويا ماغانهضرش معاه .. هو عارف اش كاين
إيلام : ( بغضب ) واش ماشفتوش البلاصة تهانت يا ناس؟؟؟؟؟؟ جلسات فيها مرا مالكم ساكتين هضروو
غابريال : لا هادشي ماحبسش غير هنا .. هادشي تجاوز حدودو و ولا كايخليها تجلس معانا فطبلة وحدة لا هي لا دوك الحقراء ديال خوتها
إيلام : هادشي ماخاصناش نسكتو عليه هي كاتبقا غريبة علينا و ماشي من ديننا مايشرفنيش نشارك معاها طعام
أسوار : كيفما قال بابا هداك كايبقا شغلو .. نخليكم هاد الساعة ... ناض من تما و خلا عمامو و ولاد عمامو و عيالات عمامو ماراضيينش على الوضع
♚ حبسو قدام الجناح ديال اصلان شافت فيه بإستغراب
ريماس : اش جينا نديرو هنا؟
أرسلان : ماتسوليش بزاف .. جدي بغا يشوفك
ريماس : علاش بغا يشوفني؟؟؟
أرسلان : راقبي تصرفاتك و نتي معاه .. مانبغيش نسمع شي شكوى عليك و خاصة منو
ريماس : دابا انا لي كانجبد صداع ياك؟؟؟ .. حل الباب و دخلو .. لقاوه جالس فوق الناموسية و حاط نظاظرو و هاز كتاب فيديه .. غير شافهم حطو
أصلان : قربو لعندي .. زادو قربو لعندو
أرسلان : ها هي
أصلان : ( طلعها و هبطها ) و هي وافقات؟
أرسلان : وي وافقات
ريماس : علاياش وافقت؟؟؟؟
أصلان : على زواجك من حفيدي
ريماس : ( شافت فأرسلان ) ايمتا وافقت؟؟؟؟
أرسلان : اليوم
أصلان : ديما كاتتجاوب معاك بحال هاكا؟؟؟؟؟
ريماس : ( بإنفعال ) واش تسطيتو؟؟؟؟
أصلان : ( بصدمة ) كاتهز صوتها؟؟؟؟؟
أرسلان : واحد ل10 دقايق ا جدي ... جرها من يديها و خرجها للكولوار
ريماس : اش هادشي كايقول؟؟؟؟ واش انا وافقت على شي زواج؟؟؟؟ ياك هاد البارح هضرنا .. زير لها على دراعها و قصح معاها الهضرة
أرسلان : اش قلت لك قبل ماندخلو؟!!!! ... قلت لك راقبي هضرتك!!!!
ريماس : أرسلان طلق من دراعي .. واش نتوما كاتخططو لمستقبلي من ورا ضهري و..
أرسلان : ماغاترتاحي حتى نهدم لك سنانك ولا نقطع لك لسانك .. قبل ماندخلو نبهتك ماتغلطيش فالهضرة
ريماس : باغيين تزوجوني بزز و ماباغينيش نهضر؟؟؟؟
أرسلان : من ناحية الزواج ريحي بالك ما بقا ليه والو .. بزز ولا بالخاطر ماعنديش فرق
ريماس : نتا راك واحد مرييض و مسطي و باغي تسطيني معااااك اش بيني و بينك و اش كاتقربني؟؟؟؟؟ ... هز لها فكها بيديه و غرز صبعانو الخشنة فيه
أرسلان : كانقربك و بزاف ( شاف فعينيها ) ما خافيش عليا بلي كاتبغيني ماعندك علاش تخبي
ريماس : ماكانبغيكش
أرسلان : كاتبغيني
ريماس : ماكانبغيكش و كانكرهك اشد الكره
أرسلان : ماتكدبيش .. الكدوب كانقراه فعينيك قبل ماتوصل الرنة ديال صوتك لودني
ريماس : ( بإنفعال ) ماكانبغيكش ماكانبغيكش ماكانبغيكش
أرسلان : شوفي فيا و قوليها ... شافت فعينيه و ضغطات على الحروف
ريماس : ( بتحدي ) كـانـبـغـيك ... وساعو عينيها و بدات كاتسحب فهضرتها
أرسلان : ( بإبتسامة جانبية ) كاتعجبني صراحتك
ريماس : لا ماسمعتينيش مزيان .. قلت لك ماكانبغيكش سمعتيني راه ماكانبغيكش
أرسلان : ( طلق منها ) عموما هاد السيمانة غاتكون الخطبة ديالنا سمعتي.!! ...
بعدات منو
ريماس : نتا راك واحد مريض
أرسلان : قلتيها بفمك انا واحد مريض و مسطي .. المدة لي عرفتيني فيها غاتكوني عرفتي الهضرة لي كاتخرج من عندي كانطبقها
ريماس : أرسلان ماتزيدش تكرهني فيك راك.. ... رجع شدها من دراعها
أرسلان : علاش غاتزيدي تكرهي؟!!! ... درت لك الخاطر بالزايد و ما بقيتي تحتارمي لا كبير لا صغير .. ولكن ماشي مشكيل .. جا وقت الخلاص
ريماس : رااه مااايمكنش نتجمع تحت سسقف واحد انا و وااحد مـاشـي مـن ديـنـي
أرسلان : هدا كان اختياارك
ريماس : هدا كان اختيارك نتا لي ماراضيش حتى تقلب فدين الإسلام
أرسلان : عموما هاد الهضرة مابقاتش كاتنفع السيمانة الجاية غاتولي ديالي .. و قد ما ستوعبتي الموضوع و تقبلتي طبعي دغيا غايكون حسن لك حيت مصييرك الوحيد هو انا حتى واحد من غيري .. طلق من الفك ديالها و كمل
أرسلان : كان عليك تفكري فهادشي قبل ما تباني قدامي
ريماس : ( بجدية ) كون متأكد حتى ايلا كمالت هاد الخطبة .. نهار العرس غا نحرق القصر بيه و بلي فيه و بلاصة العرس غا تولي جنازة جماعية
أرسلان : تهديداتك حتافضي بيهم لنهار العرس باش نفكرك فيهم .. دخل لعند جدو و خلاها واقفة على برا و هي لي من نيتها كانت كاتفكر كي تشكرو على ود خوتها حتى صدق صادمها بخبار الزواج ... دخلات لبيتها و سدات الباب و ما هي الا دقائق حتى عاودات تحلات الباب .. دخل أسوار
أسوار : ريماس صافا
ريماس : باقي عندك الوجه لي تشوف بيه فيا؟؟؟ .. لاش جاي؟؟؟؟
أسوار : خليني غير نشرح لك علاش درت داكشي
ريماس : أسوار خرج و ماتعاودش توريني وجهك ماتخلينيش ندير شي تصرف ماغايعجبكش .. هضرت معاك خرج ... بقا كايقرب ليها شوية بشوية و هي كاتشوف فهاد خونا فالله اش باغي يصنع .. وقف قدامها و بقا كايشوف فيها بنظرات حب ... بينما هي كاتشوف قصوحية وجهو .. عام و هو كايكدب عليها و شايفها محروقة على خوتها و ماهتمش لهادشي لا بل الاكثر هو فاش كان كايقولها راني خليتهم يترحمو عليهم
أسوار : درت هكاك حيت كانبغيك .. عامين و زيادة من نهار شفتك مافارقتيش بالي .. جا ارسلان من مورايا و خداك مني ببرودة .. شافت فيه بإستغراب
ريماس : ايلا ساليتي خرج خليني نرتاح
أسوار : علاش كاتهضري معايا بهاد طريقة؟؟؟ لهاد درجة ماكاتحملينيش؟؟؟؟ عمرني عاملتك بالخايب .. بالعكس من ديما و انا مساندك
ريماس : درتيها زينة باش نحملك؟
أسوار : علاش نتي هاكا؟؟؟؟؟ واش ماكاتحسيش بيا؟؟؟؟ قلبك قاصح لهاد درجة؟؟؟؟؟؟ حلي عينيك ا ريماس حليهم
ريماس : أسوار خرج من هنا غير شوفتي ليك كاتعصبني
أسوار : ماخارج فين هنا غانبقا
ريماس : ( دفعاتو ) اوك بقا هنا انا لي غانخرج .. جات تخرج و شدها من دراعها ماعرف بالتصرفيقة منين نزلات عليه .. هزات صبعها فيه بتهديد
ريماس : ماتعاااودش تمسني .. عممممرني ننساها ليك و عممرني نسامحك كاتشوفني قدام عينيك محروقة عليهم و واخا داكشي كامل ماقلتيش لاا راه خاصني نقول لهاد المخلوقة خوتك عايشين ... لا راه خاصني نصارحها .. ماتعاودش تقوليا كاتبغيني .. بعد مني و ماتخلينيش نعاود نشوف وجهك ... خرجات من البيت
♚ أرسلان : غايكون عندنا اجتماع هاد الليلة مع عائلة روكفلير
أصلان : احسن ما درتي ا ولدي
أرسلان : عيطت على كبيرهم .. كانظن ماعندنا مانديرو بولادو ... بقا اصلان ساكت واحد المدة و نطق
أصلان : غير خليه يجي هو و مرتو و ولادو منها نيت نزيدو نوطدو علاقتنا بيهم
أرسلان : غاتهبط هاد الليلة؟!
أصلان : غا نكابر و نهبط باش نشوفهم
أرسلان : غانهضر مع اسوار يهضر معاهم
أصلان : واخا ا ولدي .. خرج ارسلان و مع الخرجة لقا اسوار خارج من بيت ريماس ...
أرسلان : اش كنتي كادير تما؟!
أسوار : الصمت ... مشا لعندو ارسلان بخطوات بطيئة وقف مقابل معاه .. خرج يد من جيبو و حطها من فوق كتف أسوار بقا كايدوز عليه و كايهضر بهدوء
أرسلان : زعمتي و زعامتك كانت خايبة
أسوار : ارسلان خليني نشرح لك
أرسلان : مخلي جدي كايموت و مهربها بلا شواري
أسوار : راه الموضوع ماشي كيفما كايسحابلك
أرسلان : عام و نتا مغبرها و عند بالك ماعارفش اش واقع من مور ضهري
أسوار : ارسلاان راها ماتصلاااحش لك
أرسلان : ( هز عينو فيه ) و الأخيرة حطيتي عينيك على مرت خوك
أسوار : كانبغيييها ... بغيييتها قبل منك و قبل ماتشووفها ... مع الجملة اللخرة ضربو بكروشية للعين و مباشرة عاود تبعها لو بكروشية خرا .. نزلو للأرض و بقا كايدخل ليه فالوجه وحدة مور وحدة .. عاود رجع لو اسوار ضربة لجهة الفم .. هز يديه قاس جهة فمو لقا شوية ديال الدم سايل .. هاد المرة نزل عليه بالضرب و مابقاش عطاه الفرصة باش يتململ .. كانت طالعة ريماس و جوليانا حتى شافتهم كايضاربو بجوج .. مشات ريماس كاتجري باش تفكهم و جوليانا هبطات كاتجري باش تعيط لشي حد يجي يفكهم ... وقف و هزو من الكول ديالو
أرسلان : ( بغضب ) عينيك نتقبهوم ليك لا عرفتهم تحطو عليها
ريماس : أرسلان طلق منو راك غاتقتلو
أرسلان : ( بحدة ) دخلي لبيتك ... هز اسوار يديه و عاود ضربو .. عاود شدو أرسلان و رجعها لو اضعاف ... طلع الاب ديالهم و غابريال و إيلام
سي إيتان : بعدي من حداهم ... مشات كاتجري تخشات من وسطهم كاتبعدهم على بعضياتهم
أرسلان : ريماس حيدي من قدامي
ريماس : فين غانحيد شوف كي رجعتي ليه وجهوو
أسوار : ( كايمسح دم من نيفو ) نتا ماكاتبغييهااااش نتاا باغي تردها وحدة من املاااكك .. انا لي كانبغييك ا ريماس ماشيي هو
سي إيتان : اسوار دوز تهبط لتحت يضمدو لك الجروح
أرسلان : رييماس حيدي من قدامي ماتخلينيش نغلط فيك
أسوار : اناااا لي قادر نتبرا منكم على قبلها ... ( كايضرب فقلبو ) انا لي كانبغيييها و قادر نبدل ديييني على قبلها .. واش نتا قااادر دير هادشي؟؟؟؟؟ جاوب ا الراااجل ... واش قااادر دير هادشي لي قادر نديرو انا ... حيدها من قدامو و بغا يرجع ليه .. بقا كايشدو ايتان و عمامو
سي إيتان : راااه خوووك هدا .. اش وقع لك؟؟؟؟؟؟؟؟
أسوار : بابا طلقو .. هادشي لي كايعرف .. كايعرف غير الضرب و القتيلة .. الحب ماشي هاااكا ... الحب هو دير عليها المستحيييلات .. الحب هو ضحي على قبلها و انا قااادر ندير هادشي ... واش يسحابلك هي غاتبغيك بهادشي لي كادير؟؟؟؟؟ نتا ماكاتعرفهااش حسن منيي ... عمرها غاااتبغيك و نتا ماقادرش حتى تبدل دينك .. انا عاارف بلي غايجي واحد الوقت لي غادي يتحلو عينيها و غادي تبغيني فييه .. ياك ا ريماس واعدتيني؟؟؟ ... واعدتيني غير نبحث فالدين ديال الاسلام و غاتهضري معايا و تبغيني .. شريت كتابكم و بديت كانقراه على قبلك ا ريماس .. بديت كانقلب فدين الاسلام على قبلك ا ريماس حيت كانبغيييك ... دفع باه و عمامو و رجع لعندو يخربق ليه الملامح لي باقيين
أرسلان : مانزييدش نشوفك كاطووف بساحتها ... كاتبغيها!!!! ... غانخليك تشوف البغو بالمعنى الحقيقي ديالو ... بقاو عمامو كايحيدوه عليه لايصدق قاتل خوه بيديه .. عاودات مشات كاتجري لجهتو باش تفكهم
ريماس : أرسلان طلق منو راك غاتقتلو .. دفعها سي إيتان
سي إيتان : كلشييي بسبابك يا راس المشاكل من نهار دخلتي لحياتنا و المشاكل تابعييننا
ريماس : فك ولدك من يدو راه غااا يقتلوو .. بعد منو من مور ما خلاه شرويطة
أرسلان : هادشي والو قدام داكشي لي كان كايتسناك .. شد ريماس من يديها و هبط
سي إيتان : ارسلان فين غادي رجع
إيلام : اسوار واش كاتسمعني؟؟؟
غابريال : اش هاد الحالة دار فخوه كلشي بسبب ديك الكافرة
أسوار : ( كايهضر بزز ) را ني بيخير .. فينها ريماس عنداك يدير لها شي حاجة
سي إيتان : باقي كاتجبد لي سميتها؟؟؟؟؟؟ عندك مراتك علاش تابعو فيها؟؟؟ .. خليه منو ليها يضبر راسو معاااها
أسوار : وا كانبغييها علاش مابغيتوش تفهموووني
سي إيتان : واش باغيين تحمقوني؟؟؟؟؟ وصلات بيك تفكر تبدل ديانتنا عليها؟؟؟؟؟؟ هي لي غادخلك للجنة؟؟؟؟؟
إيلام : فيق من هادشي لي راك فيه و ديها فمراتك
غابريال : داكشي لي بقا خاص .. غير يبدل ديننا على ود موسخة بحالها
أسوار : غادي نبدلو حيت بغييت
سي إيتان : عيطو للرجال يجيو يهزوه بان ليا ماواعيش بالهضرة لي كايخرجها
أسوار : وااعي و عارف اش كانقول
♔ ريماس : اش داكشي درتي فخوك؟؟؟؟
أرسلان : ( بالغوات ) قطعي الحس ... يتبع