سالا جلالة الملك الخطاب و جا وقت توزيع الأوسمة ... عطا لكل شخص دافع على بلادو و ساعدها فهاد الحرب وسام ملكي ( يا ريت كون كان نيت كايتعطا لهادو الوسام بلاصة ماتشدو لبنى ابيضار و سعد المكرد و مشتقاتهم ) ... و بالنسبة للأشخاص لي ماتو شهداء عطاو الأوسمة ديالهم لعائلاتهم و بيان سيغ هادشي كامل كان تحت عدسات كاميرات الصحافة و تحت تصفيقات جميع الحضور ... سالا حفل التكريم و بداو كايتفرقو .. ركب لؤي و ختو فلوطو و سي راضي و ريماس و خوتها فلوطو خرا من مور ماتوادعات ريماس مع لؤي و ختو
ريناد : ختي نشوف الوسام ديالك
ريماس : ( بإبتسامة ) هاكي ا حبيبتي
سي راضي : نتي فخر للمغرب ا بنتي داكشي لي درتيه مايديروهش رجال
ريماس : مايديروهش ذكورا ا عمي راضي ولكن الرجال يديروه و يفوتوه
سي راضي : صافي دابا غاتخويو علينا الدار مرة خرا
ريماس : ضروري ا عمي راضي .. باقي عندي بزاف ما يدار
سي راضي : خليوكم معانا فالفيلا و من تما تقدري تقابلي شغالك
ريماس : كانحتارم عرضك ولكن كانفضل نمشي للدار لي تربيت فيها و عشت فيها مع واليديا ماتفهمنيش غلط
سي راضي : كانحتارم رأيك ا بنتي و من حقك ولكن شكون غايعاونك فالشركة و المحلات؟
ريماس : ماتخافش عليا فحاجة مادام راني دارسا إدارة الأعمال ماغايكونش صعيب عليا نتكلف بالشركة و المحلات و ناخد بلاصة واليديا بفففف ماعرفتش اش دار فيهم داك الكلب ديال سمير فالشركة
سي راضي : 100% غايكون فتح شركة جديدة ليه
ريماس : داكشي فاش شكيت باش فاش يكبرو خوتي و يطالبو بحقهم يقولهم ماكاين والو
سي راضي : تماما .. صافي ا بنتي وصلنا
ريماس : غانعاود نشكرك على وقفتك معايا
سي راضي : مانعاودش نسمعها منك ايلا كنتي فعلا كاتعتابريني واحد من العائلة
ريماس : ( بإبتسامة ) ههه واخا ا عمي راضي
سي راضي : ماتغبريش ا بنتي تبقاي تجي مرة مرة تزورينا
ريماس : تا نتا تقدر تجي فأي وقت و سلم لي على لؤي و مريم
سي راضي : مبلغ ا بنتي ... ديمارا اللوطو عاد تحركات ريماس من تما .. حلات الباب و دخلات .. ضورات عينيها فالجردة ديال الفيلا دورة خفيفة لقاتها نقية على البارح و زرعو ورود جديدة و نقاوها شافها العساس جا كايجري لعندها
العساس : السلام عليكم ا لالة
ريماس : وعليكم السلام .. نتا العساس؟
العساس : اه ا لالة انا العساس نتي انسة ريماس؟
ريماس : وي .. دخل عيط لي على كاع الخداما لي فالفيلا
العساس : هي اللولة ا لالة .. مشا كايجري باش يعيط لهم و ما هي إلا دقائق حتى تمو جايين 2 بنات و شاب و راجل كبير
الكل : مرحبا ا لالة
ريماس : ميرسي .. المهم بلا مقدمات ماعنديش معاهم كل واحد فيكم يقوليا باش مكلف و يعطيني تعريف على راسو
الجارديني : انا عبد القادر جارديني ا لالة
العساس : انا عبد السلام العساس ا لالة
سمية : و انا سمية لي مكلفة بالطياب ا لالة
شيماء : انا شيماء لي مكلفة بالنظافة ديال الفيلا ا لالة
نبيل : انا نبيل الشيفور ديال حضرتكم ا مادموزيل
ريماس : مزيان .. الفيلا تنظفات ولا باقي؟
شيماء : تنظفات ا لالة
ريماس : اللوطو واجدة؟
نبيل : واجدة ا مادموزيل
ريماس : مزيا تقدرو ترجعو لشغلكم .. ستأذنو و مشاو
فادي : جردة ولات ا ختي حسن من البارح شوفي هاد الورود كاع ما كانو البارح
ريناد : حتى لابيسين ا ختيتو ولا نقي بزاف ياااي غانبقاو نعومو فيه مجموعين بحال شحال هادي
ريماس : ان شاء الله ا فريزتي ... دخلو للفيلا لداخل زليج كان كايبري بالنقاوة و ريحة المعطر مالية الفيلا ولات شهوة منها جا طلعات ريناد و فادي كايجريو يشوفو بيوتهم
ريماس : بشوية عليكم دابا طيحو
فادي : وا راني كبرت ا ختي عندي 15 دابا اوووف ها هي سبقاتني .. بقات كاضحك و تمات طالعة
طلعات للبيت ديالها لقات الحوايج مستفين فبلاصتهم و كلشي نقي كلشي باقي فبلاصتو بحال اخر نهار خرجات منو كانت غرفة مصبوغة بالبيض و أثاثها فالأحمر ... دازت لبيت واليديها ضورات البواني و دخلات بقات كاضور عينيها فيه .. طاحت عينيها على واحد الصورة ديالهم مشات بخطوات بطيئة هزاتها و بقات كادوز يديها عليها و باستها .. مشات لخزانة الملابس حلاتها كانو حوايج واليديها باقيين تما شافتهم و قلبها ضرها .. هما مشاو ولكن ريحتهم صورهم حوايجهم اشيائهم كلها باقا هنا و كلها باقا فبلاصتها كاتحس بيهم بحالا باقيين عايشين فالفيلا كل قنت كايفكرها بيهم ، رجعات اللور جلسات فوق الناموسية دازو دقائق و عاودات ناضت رجعات لبيتها حلات خزانتها كانو تما حتى الحوايج الجداد لي شرات بدات كاتنقل فالحوايج للبيت واليديها حتى سالات .. حطاتهم فالناموسية و مشات جبدات فاليزات جمعات فيهم حوايج واليديها كاملين و بدات ترتب حوايجها بلاصتهم سالات و دخلات دوشات لبسات سورفيط خفيفة و مشات طل على خوتها فبيوتهم كانو ناعسين بقوة العيا .. هبطات لتحت كاتقلب على العساس
ريماس : عبد السلام
العساس : ( جا كايجري ) نعام الالة
ريماس : غتلقا الفوق 2 فاليزات ديال الحوايج هبطهم و عطيهم لشي حد محتاجهم
العساس : هي اللولة ا لالة ... فضلات تعطيهم المهم ماتبقاش تشوفهم و تتعدب
سمية : نحطو لك الغدا دابا ا لالة؟
ريماس : اوك وجدو طبلة .. مشات لصالة مونجي جابو لها الغدا بدات كاتتغدا و عقلها غير مع الشركة و المحلات كي دايرا فيهم الخدمة دابا .. قررات باش تمشي لاغد ليه تتحقق بنفسها و نيت يعرفو المالكة الجديدة لأملاك بنجلون
♚ في قصر روتشيلد
الأجواء كانت كاتدل بلي كاين حفلة و ماشي اي حفلة بل حفل زفاف ضخم .. القصر كلو مزين و فالخارج الجردة عامرة بالناس سربايا داخلين خارجين و أديرا واقفة كاتحاول باش مايكون حتى شي خطأ و خصوصا ان هذا ماشي اي حفل عادي ... العرس ديال ولادها بزوج .. سي أصلان واقف بكل تكبر و العكاز فيديه كايهضر مع الحلفاء ديالو بكل تكبر كلشي كايشوف هاد الشارف لي دابا فعمرو 102 عام و باقي حي مازال مابغا يموت اما دابا فاش دار العملية صافي كمااااالت السيد باقي ناوي يبقا حي رجع لشموخه و جبروته ديال زمان كلشي داير لو الإعتبار .. فالجهة الثانية واقف اسوار لابس كوستار كان انيق بكل معنى الكلمة و فجنبو شابة جميلة بحالها بحال بنات عائلة روتشيلد واقف و ماحاملش راسو على عكسها هي لي غاطير بالفرحة و فالجهة الثانية واقفين عائلة عروسة ارسلان و حتى عروسة أرسلان لي كانت لابسة الفستان الأبيض لي هي براسها ماحاملاش هاد العرس و ما فيه ... كانت كاتتمنا مايكملش ولكن فاش كايقول أصلان شي حاجة فمستحيل يتراجع عليها واخا طابق السما مع الارض ماتهنا حتى زوجهم .. سي إيتان واقف مع غابريال و ارون و داوود و الأخ الاخر ديالهم مرة كايشوفو فأسوار و مرة كايشوفو فأرسلان لي كان مشغول مع أبراهام و مالك كايهضرو و كايوريه شي حاجة فواحد طيلي ... أديرا واقفة مع زوجة داوود كايشوفو واش كلشي هو هاداك ... و باقي العائلة كل واحد فين شادها
مورغان : ايوا مبروك ما درتو بان ليا جمعتو كلشي فخطوبة وحدة
سي أصلان : بغيت نفرح بحفادي
مورغان : واحد سي أرسلان مدة مابقا بان ليا ياكما شاغلاه شي حاجة
سي أصلان : حاجة عادية ماتشوفوش حفيدي الغالي مشغول بمصالح إمبراطوريتنا
مورغان : وي شفت اش كاين ايوا ا سي أصلان مزال ماناويين تحيدو من الواجهة و تخليونا نبانو
أرسلان : طلب غبي بحال مولاه .. إمبراطورية روتشيلد من ديما نامبر وان ماكانقبلش برقم اخر
سي أصلان : ها السبع ديالنا جا
مورغان : اوو سي أرسلان شغلوك علينا
أرسلان : ماغانخليش الأهم و نجي نسمع حاجة لي ماغاتزيدني ماغاتنقصني
سي أصلان : كانظن داك المشكل جا الوقت لي خاص يتسد فيه
مورغان : بطبيعة الحال ا سي أصلان ... ايوا كاين شي خبار على المغرب؟ ماعاودتيش رجعتي ليه من عام اللول؟
♔ في مكتب واسع ابيض حيطانو فاللون الأبيض بحال قلب مولاتو و أثاثو فالبرتقالي لون الخريف و هو نفسو الفصل الغامض بين اربعة فصول ... جالسة مخشية فالوراق حاطة نظاراتها و كاتدقق فالملفات شافت فالساعة لي فيديها لقاتها 6:00 تعطل الوقت بزاف اكيد الشركة غاتكون خاوية دابا بيان سيغ غاتكون خاوية حيت الموظفين كايخرجو الساعة 5:00 دغيا داز الوقت و كاع ما حسات بالوقت من نهار شدات زمام الأمور ديال الشركة و هي غير مخشية مخشية فالوراق و الملفات كاتحاول ترجع توقف الشركة على رجليها من مور مالقات الشركة فحالة يرثى لها و هادشي كان بالطبع عن قصد حيت عمها كان متقصد يسبب إفلاس لهاد الشركة ولكن فاش رجعات هي تبدل كلشي باقي 3 ايام و تكمل عام على ترأسها للشركة و فهاد العام كانت مرا ب10 رجال قدرات ترجع الشركة للمستوى ديالها لا بالأحرى رجعاتها حسن من اللول و فرضات وجودها كأصغر سيدة اعمال في سن ل21 سنة
وقفات لوطو فالأبيض قدام الشركة نزل الشيفور باش يحل لها الباب
الشيفور : انسة ريماس واش نبقا كانتسنا ولا نرجع للفيلا
ريماس : رجع و هضر مع الخدامات يردو البال لفادي و ريناد
الشيفور : معايا في نرجع ا انسة ريماس
ريماس : تا نعيط لك ... خلاتو و توجهات نحو الباب ديال الشركة شافها العساس لي كان واقف قدام باب الشركة مامنعهاش حيت اصلا شافها فاش بانت فالجورنال .. فاش سيفطات عمها للحبس .. لقا عليها التحية رجعاتها ليه و دخلات .. داخلة و كاتسمع صداع بزاااف و الهضرة وقفات و بقات كاضور عينيها فالشركة تبدلات بزااااف ولات فوضوية كتر من القياس كلشي داير لي عاجبو لدرجة كاع مالاحظو حضورها
ريماس : ( بالغوات ) سكاااااااااات .. تقطع الحس و كلشي ضار يشوف شكون هادي لي غوتات بقاو كايطلعو فيها من لتحت تال الفوق كاين لي حشم و جمع عينيه حيت شاف صورتها فالجورنال و كاين لي مقلوبة عليه القفة .. كانت واقفة واحد خيتي طاليا كيلو ديال المكياج
***** : و شكون نتي حتى تقولي لينا واش نهضرو ولا نسكتو؟ ... بقات ريماس كاتشوف فيها ربعات يديها و نطقات
ريماس : شنو سميتك؟
سهام : سهام علاش كاتسولي؟
ريماس : ( بإبتسامة ) مطرودة و دابا نيت غاتجمعي قشاوشك و دوزي عند المحاسب يعطيك خلاصك ... بقات كاضور فيها عينيها و كاتشوف فلاخرين لي كايتهامسو بيناتهم و من بين الهضرة لي كانو كايقولو قدرات تسمع بلي ريماس هي المالكة الأصلية ديال الشركة ماكاين لا سمير لا هم يحزنون
سهام : نقدر نهضر مع سي سمير فهاد الموضوع ا انسة هو لي خدمني هنا و هو لي من حقو يطردني
ريماس : ا بون باقا زايدة فيه؟ سيدك سمير راه غارق فالحباسات
***** : انسة بنجلون سهام هي المحاسبة
ريماس : مزيان على هاد الحساب تبعيني للمكتب ( خطات خطوات و عاودات وقفات ضارت لعندهم )
ريماس : من هنا ساعة كلشي نلقاه فغرفة الاجتماعات عندنا بزاااف ماناقشوه ماتنساوش كل واحد يجيب سيفي ديالو فيديه و لي عندو فالدار راه عندو سلعة كاملة باش يمشي يجيبو .. مشات للمكتب ديال الاب ديالها لي كان ديكورو تغير تماما بقات كاتشوف فيه مدة جاب ليها الاشمئزاز من هاد الألوان لي ولاو فيه اكيد هدا الذوق العوج ديال عمها .. جلسات فالكرسي بينما المحاسبة بقات واقفة
سهام : انسة راه ما منحقكش تجري عليا انا وقعت كونطرا مع سي سمير ماشي معاك
ريماس : ( جمعات يديها قدامها ) بان ليا ماقارياش مزيان ياك .. مافخباركش بلي سيدك سمير دخل الحبس بتهمة تزوير يعني اي عقد وقعو مع اي شخص كايتعتابر ملغي طالما ماشي سي سمير هو المالك الأصلي دابا غادردبي لمكتبك و تجيبي لي جميع سجلات الحسابات ديال هاد العام ... شحال دخلتو و شحال خرجتو
سهام : واخا ا ريماس
ريماس : قرينتك انا باش تعيطي لي ريماس حرفية؟ .. انسة ريماس شنو قلت انا؟
سهام : ( بغيظ ) انسة ريماس
ريماس : تحركي .. مشات المحاسبة و هي ساخطة بينما ريماس هزات طيلي ديالها
سي راضي : صباح الورد بنتي ريماس
ريماس : عمي راضي كي صبحتي؟
سي راضي : بيخير ا بنتي و نتي؟
ريماس : بيخير .. نقدر نطلب منك طلب؟
سي راضي : مرحبا ا بنتي
ريماس : تقدر تعقد لي مؤتمر صحافي من هنا للعشية؟
سي راضي : كنت نيت غانقتارحها عليك البارح ولكن فضلت نخليك تا ترتاحي مهم ا بنتي 4:00 مزيانا؟
ريماس : وي عمي راضي مزيانا مهم نخليك دابا باقي عندي شي حوايج
سي راضي : بالتوفيق مانخافش عليك .. قطعات الاتصال
ريماس : اري دوك الملفات لهنا ... بدات كاتحقق منهم واش كاملين
سهام : نقدر نمشي؟
ريماس : السجل ديال هاد الشهر فينو؟
سهام : ماعرفتش
ريماس : و شنو خدمتك لاكنتي ماغاتعرفيش؟ عندك من هنا للإجتماع .. جبديه ولا ولديه ولا صنعيه ماشي شغلي هادشي ولكن فاش مانلقاهش من هنا ساعة عرفي بلاصتك كاتسناك حدا سيدك سمير .. اه و ماتنسايش تجيبي لي سيفي ديالك باش نعرف شكون كان مقابل شركتي تقدري تمشي دابا ... يتبع