سي راضي : ( بفرحة ) على سلامتك ا بنتي ريماس منين فقتي الحمد الله هدا من فضل ربي
ريماس : مافهمتش اش وقع لي و كي درت حتى وصلت لهنا؟؟ ... رجعات جلسات حدا خوتها
فادي : ختي توحشتك بزاف ماتعاوديش تخلينا
ريماس : ماغانعاودش نخليكم الحبيب ديالي غانعيشو كاملين
سي راضي : فادي .. ريناد اجيو معايا
ريماس : فين غادي بيهم؟؟؟
سي راضي : شوية و نرجع ا بنتي ... خرجو معاه خلاهم مع واحد الممرضة تبقا معاها و عاود رجع لعند ريماس
ريماس : مابقيتش فاهمة اش وقع لي كانحس براسي نعست مدة و فقت
سي راضي : حاولي تكالماي و سمعي لي حتى نسالي هادشي لي غانعاود لك تقدري ماتتحمليهش
ريماس : شنو وقع؟؟؟؟
سي راضي : نهار كنتو كاتتهربو القنابل النووية و تشديتو اش وقع لك مور هادشي؟؟؟
ريماس : شدوني و داوني بلاصة خرا ... رجعات بيها الذاكرة اللور و بدات كاتعاود ليه شنو دوزو عليها بالتفاصيل ماكانش متوقعهم غايكونو بهاد الوحشية كاملة و الاهم فهادشي واخا دوزو عليها داك العذاب كامل بقات حية
سي راضي : مابقيتيش عاقلة على شي حاجة خرا؟
ريماس : لا اخر حاجة عاقلة عليها هي دوك الأطباء حتى فقت دابا و لقيت راسي هنا
سي راضي : دابا سمعيني و تهدني
ريماس : هاني مهدنة
سي راضي : منين مابقيتي عاقلة على والو من مور دوك الأطباء يعني الرقاقة تزرعات لك فالدماغ فداك الوقت
ريماس : اينا رقاقة؟؟؟
سي راضي : زرعو لك رقاقة فالدماغ
ريماس : رقاقة؟؟؟؟
سي راضي : وي رقاقة باش يخليوك فصفهم و فعلا خلاوك فصفهم و خلاوك تعتاقدي بلي أصلك إسرائيلي و تكرهي بلادك و الاكثر من هادشي كنتي غادي تحاربي ضد المغرب بقات الرقاقة وسط دماغك لمدة 7 شهور
ريماس : كيفاش 7 شهور؟؟؟ .. 7 شهور و انا تما؟؟؟؟؟ و بشخصية خرا و ماعاقلة على والو من الفوق.؟؟؟
سي راضي : تسناي نكمل لك ولكن واعديني غاتتهدني
ريماس : لحد الساعة ماكايناش شي حاجة معصباني
سي راضي : فهاد 7 شهور كاملة كنتي كاتدربي الجيش الإسرائيلي و كاتخططي معاهم ضد المغرب و وصلات وقت وليتي فيها اليد اليمنى ديال واحد من افراد عائلة روتشيلد ... طاح عليها هاد الخبر كالصاعقة
ريماس : ( مزال ماستوعبات الموضوع ) بلاتي بلاتي كيفاش 7 شهور واش متأكد هادشي وقع معايا انا؟؟؟ هههههههه اكيد كاضحك معايا ياك؟؟؟ انا نكون فصف إسرائيل؟؟؟؟ و الدراع اليمنى لداك الحقير؟؟؟؟؟ ههههههه لا لا انا دابا تأكدت بلي كاضحك معايا
سي راضي : الصمت
ريماس : ( جمعات الضحكة ) قوليا كاتضحك معايا
سي راضي : الصمت
ريماس : قوليا كاتكدب عليا ... قوليا هادشي كدووووب ( بدات كاتغوت ) علااااااش ساكت هضرررر قوليا هادشي كدووووب قوووليا ماتضامنتش مع الشعب لي قتل لي واااااليديا ماتسككككككتش بحال هاكا ... ناض سي راضي و بدا كايكالمي فيها
سي راضي : ريماس تهدني ا بنتي تهدني راك مزال عاد فقتي من الغيبوبة
ريماس : ( عاودات شافت فيه بصدمة ) غيبوبة؟؟؟؟؟؟
سي راضي : بلاتي نشرح لك ا بنتي ... بدات كاتفيبري برجليها و شادة راسها بين يديها
ريماس : عاود لي كلشي بالتفصيييل
سي راضي : خلي تا ترتاحي و نكملو هضرتنا فهاد الموضوع
ريماس : دااااااااااابا غاتعاود لي بغيييت نعرف اش وقع ليييي
سي راضي : ( تنهد ) قادرا تزيدي تصبري؟
ريماس : علاش واش باقا شي حاجة كتر من انني نكون فصف العدو و ندربو؟؟؟ قادرا نصبرر
سي راضي : كملتي معاهم الفترة التدريبية و كان وقع شي مشكل بينك و بين عائلة روتشيلد و تيرا واحد فيهم فيك و الظاهر كان ناوي يقتلك ولكن نجيتي منها
ريماس : منين عارفين هادشي كااامل علاش ماجيتوش قلبتو عليا؟؟؟؟ لحتوني و ماعاودتوش سولتو فيا .. غير وصلوكم المعلومات كاملين مابقاتش بانت لكم ريماس ياك؟؟؟ صافي خديتو اش بغيتو و ريماس لهلااااا يكلب خليها تمووووت
سي راضي : بنتي تهدني الغلط ماشي منا .. الغلط من مصطفى و مراد
ريماس : اش دخل مصطفى و مراد فهادشي؟؟؟؟
مراد : ماكانش قاليا بلي راك باقا حية حيت كان قالها لمصطفى هو اللول و مصطفى هددو باش مايقولش ليا راك باقا حية و بقا مدة كايقنعنا بلي راك توفيتي
ريماس : حقييير كلااااب
سي راضي : داك الغدار ديال مصطفى كان اناني و همو الوحيد هو نربحو بلا مايفكر فحياتك لي كانت على المحك وصلات بيه حقارتو لدرجة التسجيلات ديال الميكروات و الكاميرات لي كنتي مخلية فالمعسكر كان مخبعهم علينا و ماقالش لينا بلي الكاميرات و الميكروات باقيين خدامين تما باش مانقدروش نعرفو بلي راك باقا حية و فنفس الوقت باش يسرق مجهوداتك حتى خلانا كلنا نظنو بلي راه هادوك كانو توقعاتو و افكارو هو ولكن كان العكس .. كان كايعطينا غير المعلومات لي بغا و يخبع داكشي لي بغا حتى لنهار الحرب لي جابك مراد .. فاش سولتو بدا كايدخل و يخرج فالهضرة داكشي باش دخلني الشك و بديت كانبحت موراهم حتى وصلت للحقيقة
ريماس : و فين مصطفى دابا؟؟؟
سي راضي : راه فالحبس حيت تسما بحالا كايضحك على الدولة لمصالحو الشخصية
ريماس : الكللللب .. و مراد؟؟
سي راضي : مراد عطيتو انذار و خليتو فخدمتو حيت فاللخر عتارف بغلطو
ريماس : و كي دار هو حتى لقاني و انا كنت فإسرائيل
سي راضي : غانكمل لك منين حبست ولكن واعديني تتهدني
ريماس : شنو وقع؟؟؟؟؟؟
سي راضي : واعديني فاللول
ريماس : مانقدرش نواعدك بشي حاجة انا ماعارفاش كي غاتكون ردة فعلي فيها لي نطلب منك غير ماتزيدش تصدمني
سي راضي : ( تنهد ) فديك الفترة بقيتي معاهم حتى وصلات الحرب و بداو فإستعداداتهم و فاش جاو للمغرب جيتي معاهم على اساس قائدة إسرائيلية حاربتي معاهم شي يامات حتى جاتك الضربة لراسك لي تسببات فالخلل ديال الرقاقة ديك الساعة فاش جابك مراد و حيدو لك الرقاقة بقيتي فغيبوبة شهراين عياو الأطباء يديرو فمجهوداتهم ولكن ماكانت حتى شي استجابة حتى لبارح ... بقات ساكتة مدة و مبلوكية فبلاصتها .. سي راضي خلعاتو ردة الفعل ديالها ماشي خاف منها ولكن خاف عليها حيت شوف غير فاش عرفات بلي كانت كاتدرب جنود العدو باش يحاربو المغرب و شوف كي كانت ردة الفعل ديالها اما دابا فاش عرفات بلي هي بنفسها حاربات بلادها مانعرفت كي غاتكون ردة الفعل ديالها ... جالسة و راسها بين يديها بداو يديها كايزيرو على شعرها شوية بشوية و سي راضي لاحظ هادشي .. ما أن حاول يحيد لها يديها من راسها حتى نفاجرات بالأعصاب و بدات كاتنتف فراسها و تغوت
ريماس : ( كاتغوت ) حااااااربت بلااااااااادي ... قتلت ولاد بلاااااادي ... ااااااااااااااه يا الله رحمنييي .. بهااااد اليديين سفكت دماااااء بلادي بهاد اليديييين قتلتهم و مشيت فصف العديان ... علاااااااااش هادشي كايوقع معااايا علاااااااش .. مشيت فصف ليهود و بلاااصة مانعاون بلادي ضد لي قتلو واليديا عااااونت لي خلااااوني يتييييييمة مشيييييت كانعاون فيهم باش يخليو اليتااااامى فبلادي ... مشييييت نعاونهم باش نخلي الأرملااااات فبلادي ... مشييييت نعاونهم باش يدمرو بلاااااادي اااااااااااااااااااااااااه يا الله صبرنيييي ... بدات كاتنتف فراسها و سي راضي كايحاول يهدنها الممرضات سمعو غواتها من برا جاو كايجريو كايحاولو يشدوها ولكن وااالو حتى دكو ليها المخدر بدات كاتتكالما و حركاتها كايتثاقلو حتى طاحت على ركابيها ... صوتها بدا كايتخف و فثغرها جملة وحدة " كنت فصف لي خلاوني يتيمة " ... بداو عينيها كايتغمضو شيئا فشيئا حتى غابت ... سي راضي قطعات لو فقلبو و بقا كايتحسر على حالتها عرفها باش غاتكون كاتحس دابا ماعرف مايدير .. خلا الممرضات معاها و خرج لعند خوتها ...
♚ فقصر العائلة الملكية ♚
كاع رجال العائلة مجموعين من صغيرهم لكبيرهم فالصالة .. سي أصلان جالس فالفوطوي لي موالف يجلس فيه و فجنبو جالسين أرسلان و اسوار ... أرسلان جالس و شاد فيديه كاس ديال القهوة و كايتسنا اش غايقول جدو
سي أصلان : ( بصرامة ) جمعتكم حيت باغي نقولكم شي هضرة
داوود : كانسمعو
سي أصلان : قبل من هادشي عندي ليكم خبر
أسوار : وي جدي كانسمعو
سي أصلان : فديك المدة لي كنت غايب فيها على القصر و وصلاتكم خبار بلي مشيت مع حفيدي للمغرب ماكنتش فالمغرب
سي إيتان : ( بإستغراب ) ماكنتيش فالمغرب؟؟
سي أصلان : ماتقاطعنيش فاش نكون كانهضر .. الحقيقة هي كنت مشيت ندير عملية نقل القلب و بفضل حفيدي أرسلان لي لقيت فيه الخير كتر من ولادي و كايفكر فيا كتر من هاد زين الولاد لي ولدت و عولت عليهم بكري يفكرو فصحتي ... قدرات العملية تنجح من مور مالقا لي قلب ديال متبرع و بقا واقف على العملية حتى نجحات هاني رجعت أصلان القديم
سي إيتان : درتي عملية نقل القلب؟؟؟؟؟؟
داوود : ياك قالينا الطبيب بلي مستحيل تنجح بسبب عمرك؟؟؟؟
سي أصلان : ( مخنزر فيه ) شفتك كاتعاير فيا لا؟؟
داوود : لا ماقصدتش هادشي ولكن
سي أصلان : ماكاين ما ولكن و من اليوم أصلان القديم رجع .. و كلشي غايولي يدوز من تحت عيني
غابريال : ولكن علاش ماقلتيش لينا غادير العملية؟؟ كنا على الأقل نكونو واقفين معاك فهادشي
سي أصلان : نقولها لكم؟ باش ديرو شي عملية إنقلاب و تحاولو تقتلوني و انا وسط العملية داوود عنداك يسحابلك راني ناعس على ودني و ماجايب خبار لداكشي لي كادير مور ضهري كنت كانتسنا غير حفيدي يرجع من الحرب باش نوضحو الأمور مزياااان ... كان مرجع راسو اللور و كايتسنط حتى سمع اش قال جدو و هو يتقاد فالجلسة و بدا كايشوف فداوود
أرسلان : اش درتي!!
داوود : ( بضحكة صفرا ) هه والو ا ولد خويا تهدن خلي الواليد يشرح اش كايم
أرسلان : جدي اش وقع؟؟
سي أصلان : سيدهم داوود كان كايستخدم توقيعي فشلاااا حوايج و يزور فالوراق و عند بالو ماعايقش بيه كان كايتسناني غير نموت حتى من الوصية ديالي لقيتو كاتبها و حاط عليها توقيعي ... عاود قلب وجهو لجهة داوود لي عينيه غير مع أرسلان ... يلاه جا ينوض ليه حتى شداتو يد سي أصلان
أرسلان : جدي غير غانهضر معاه
داوود : ( بنكران ) مادرتش هادشي ... هادشي كدوووب
أرسلان : كاتكدب كلام جدي؟؟؟ كاتقصد بكلامك جدي كايكدب!!
سي أصلان : جلس مزال ماساليت هضرتي ... رجع لبلاصتو و عينيه غير فداوود لي كان بدا كايحفر من مور سي أصلان حيت يسحابلو قريب يموت
سي أصلان : اول حاجة باغي نعلمكم بيها كاتخص العائلة
أسوار : وي جدي كانسمعو
سي أصلان : داوود غادي يتحرم من الإرث بشكل دائم و بسبب خيانة ولدي لي من لحمي و دمي ليا ... قررت نكتب وصية من دابا
أرسلان : و غادي دوز ليه هاد الخيانة بالساهل؟؟؟
سي أصلان : كانظن الحرمان من الإرث حاجة كافية ليه .. ندوزو للوصية فحالة وقعات لي شي حاجة النص من ثروة العائلة غادي تتحول لسمية حفيدي الغالي لي هو نفسو خليفتي أرسلان و النصف الثاني غادي يتوزع عليكم بالتساوي من الأبناء حتى للأحفاد من غير سيدهم داوود لي ماغايشدش ريال لصفر ولكن ولادو لي هما حفادي ماغانحرمهمش من الارث و ايلا طرات لي شي حاجة حفيدي أرسلان هو لي غايشد بلاصتي ... بقاو كلهم مصدومين وي كانو متوقعين انه غادي يكون ارسلان فبلاصة سي اصلان ايلا مات ولكن باش يكتب ليه النص من ثروتو؟؟؟ لي ماشي اي ثروة بل البلاييير و عاد زيد عليها أرسلان اصلا عندو ثروتو الخاصة ماقدروش يتقبلو هادشي .. بلاصة مايكتبها لواحد من ولادو كتبها لحفيدو
أرسلان : جدي مزال الحال على هادشي راك باقي غاتعيش معانا
داوود : ولكن
سي أصلان : نتا بعدا ماتعاودش توريني وجهك
داوود : ( بعصبية ) كيفاش هو غاتعطيه نص ثروتك و هو السبب باش خسرنا ضد دوك الكلاب.؟؟؟؟
أرسلان : ماسمعتيهش؟ باغيني نوض نوضح لك اش قال!! ... خرج من تما و هو طالع لو الدم
سي أصلان : و بغيت نوضح لكم حاجة خرا ... خسارة دولتنا إسرائيل ضد المغرب ماغاديش تأثر بعلاقتي بحفيدي باش نكونو متافقين .. فكل دولة و كل بلاصة كاينين الجواسيس و حربنا خسرناها ماشي بسبب حفيدي حيت لا يمكن نشك فقدراتو و ذكائو
غابريال : و شنو لي خلانا نخسرو؟؟؟
سي أصلان : الجواسيس لي قدرو ينقلو الاخبار و المعلومات لأعدائنا .. ندوزو للقرار الثالث
أرون : كلنا أذان صاغية
سي أصلان : بما ان الخطبة ماكتاملاتش ... غادي نضطرو نديرو خطبة خرا لحفيدي أرسلان فأسرع وقت و فنفس الوقت غانديرو خطبة لحفيدي أسوار
أرون : خطبة مشتركة؟؟؟ ... بقا أسوار مصدوم فالقرار ديال جدو علاش باغي يزوجو بهاد السرعة؟؟؟؟ اكيد هاد القرار ماجاش من فراغ ... يتبع