سي راضي : كلي أمل فالله
الطبيب : و النعم بالله ... مشا هو و خوتها .. دخلو لعندها للغرفة باقا فنفس الحالة فنفس البوزيسيون .. قرب خوتها لعندها
سي راضي : قربو لعندها ماتخافوش منها
ريناد : عمو شكون هاد البنت
فادي : عمي واش مريضة بزاف ... قرب سي راضي لعند ريماس و شد يدين ريناد و فادي و بدا كايقربهم لعند ريماس حطهم لها فيديها
سي راضي : بنتي ريماس ها خوتك جاو يشوفوك ماغاتنوضيش تشوفيهم؟؟
ريناد : ( بحزن ) سميتها بحال سمية ختي الكبيرة لي ماتت
سي راضي : ختكم ماماتش ا وليداتي ختكم باقا حية
فادي : لا ختنا ماتت قالها لينا عمي سمير و مراتو ختنا ماتت فاش ماتو واليدينا ... تنهد سي راضي كي غايدير يشرح لهم بلي هي باقا حية و كي غايقنعهم بلي هادي ختهم و الملامح مبدلين اطفال عندهم 15 العام مابقا لهم والو و يدخلو لسن المراهقة اكيد غايكونو كايفهمو ولكن خاص يعطيهم دليل على كلامو و هادشي تقدر ديرو غير ريماس
سي راضي : ختكم ماماتتش ا ولدي ختكم كانت مريضة بزااااف
فادي : منين ما ماتتش علاش مزال ماجات لعندنا ا عمي علاش مزال ما جات تشوفنا
سي راضي : كانو عندها ضروف ا ولدي ولكن دابا ها هي قدامكم
فادي : لا نتا كاتكدب علينا هادي ماكاتشبهش لختي ريماس رجعنا لعند عمي مابقيتش باغي نبقا مع كداب
سي راضي : ولدي ماكانكدبش عليك هادي بصح ختك ريماس ولكن وجهها تبدل بسبب الحادث المأسوي لي وقع لواليديكم ملامح ختكم تشوهات من مور ما وقع داك الانفجار
فادي : ماغانتيقش بيك ختنا ماتت و عمي ماغايكدبش علينا بغيت نرجع دابا لدارنا مابقيتش باغي نبقا هنا
سي راضي : ولدي تهدن ماعندك علاش تتعصب .. بينما هو كان ملهي مع فادي كانت ريناد كاتلمس حناك ريماس و كادوز يديها على شعرها و عينيها بقات كاتقلب فودنيها و بدون شعور نطقات بكلمة لفتات انتباه سي راضي
ريناد : ختي ... تحنات لعندها باستها فحنكها و هبطات لها دمعة من عينيها
فادي : ريناد هاديك ماشي ختنا بعدي منها هادو كدابا كايكدبو علينا ... لاحت يديداتها على ريماس و عنقاتها
ريناد : هادي ختي ريماس ا فادي ختنا باقا حية ... بدات كاتبكي و معنقة ختها ... مشا عندها فادي كايجرها من يديها
فادي : هاديك ماشي ختنا بعدي منها
ريناد : هادي ختنا ا فادي ختنا ريماس .. شوف ودنيها فيها بحال العلامة لي كانت عند ختي ريماس ... بدات كاتوريه بيديها العلامة الصغيرة لي كاينا وسط ودنيها ... شوية بدات كاتوريه فودنيها حيت حتى هي عندها نفس توحيمة بحالها بحال ريماس ... بقا كايقرب يديه بشوية بشوية لجهة ريماس و بدون سابق انذار تلاح عليها تا هو عنقها
فادي : ( كايبكي ) ختي ريماس ريناد ختنا باقا حية ... ضار لعند سي راضي و بدا كايجرو من الكوستيم ديالو
فادي : ( بعيون دامعتين ) علاش ختي ماكاتجاوبناش اهئ اهئ علاش مابغاتش تفيق ... مسح ليه دموعو
سي راضي : ختكم مريضة شوية دابا تفيق ا ولدي ... بقات ريناد معنقة ريماس و تبعها حتى فادي عنق ريماس بداو كايبكيو من فوقها حيت بالنسبة ليهم ريماس هي الصدر الحنين لي بقا لهم من مور واليديهم فرحو واحد الفرحة لا توصف منين عرفوها ختهم ولكن فنفس الوقت كان واحد شوية ديال الحزن حيت مافاقتش
سي راضي : يلاه نديكم للدار خليو ختكم ترتاح غدا و نجيبكم تعاودو تشوفوها
ريناد : ( زيرات على يد ريماس ) لاء مابغيتش نبعد من ختي مابغيتش نرجع لدار عمي سمير مابقيتش باغا نرجع لها
فادي : حتى انا ماغانمشيش غانبقا مع ختي حتى تفيق مابقيتش باغي نرجع لدارو
سي راضي : ماغاديش نديكم لدارو غانديكم لداري ا وليداتي و غدا غير يصبح الحال نعاود نجيبكم لعند ختكم ... بعد محاولات و محاولات و محاولات قدر يقنعهم غير بزز .. قصوحية الراس دايزا لهم فالدم ... ودعوها و خرجو من تما .. و ما هي الا دقائق حتى بدات كاتحرك صبعانها بتثاقل صبع مور صبع بقات هاكاك دقائق و اخيييرا و بعد شهراين قدرات تنطق من جديد
ريماس : ( بصوت خافت ) ل لما ... ب ب بغيت ل لما ... تحلات القرعة ديال الما و تخوا منها كاس و تمد لجهتها بدا كايخويه لها ففمها و هي ناعسة بدون ماينوض لها راسها باش تقدر تشرب حتى تخنقات و بدات كاتكحب بداو عينيها كايتحلو شوية بشوية كايبان لها غير ضلام ... تشعل ضوء خافت و النظر بدا كايوضاح لها شوية بشوية و يا ريتو ما وضاح .. مع الفيقة لي فاقت كان وجهو اول وجه غاتشوفو ... يتبع
كاتسولوني كي دار حتى فهم بلي بغات الما ... نفس الطريقة لي كان كايفهم بيها هو و أبراهام الهضرة لي ضايرة فالمقر ديال المغرب قبل مايسيفطو لهم ريماس كجسوسة و الوقت لي كانو كايسيفطو لهم فيه الجواسيس .. ستخفيتو بذكاء ارسلان 😂 ... ولكن خاصكم تعرفو واحد الحاجة .. بالنسبة ليه مايمكنش يكون كايوجد حرب ضد شي دولة و مايتعلمش لغتها على ود ادوات التجسس لي كايغرسوهم عند العدو ديالهم و بما ان أبراهام و مالك دراعو ليمن و ليسر يعني كايكون ملزم عليهم يتعلمو لنفس اللغات باش يقدرو يفهمو العدو ... و واخا أرسلان عارف عدة لغات ولكن لغتو الأصلية العبرية ماكايبدلهاش و غاتكونو عاقلين على داك الاجتماع لي كان دار مع رؤساء الدول ... دوك الكلمات القلال لي قالهم هضر فالعبرية بلغتو الأصلية و خلاهم لي بغا يفهم يفهم على عكس الرؤساء لاخرين لي كتنو مضطرين يهضرو بالعبرية .. بغات تنوض كاتحس براسها فشلااانة ... حط الكاس و عاود خشا يدو فجيبو و اليد التانية بدا كايدوزها على شعرها المتناثر .. مزال كاتحاول تنوض ولكن فشلانة بسبب هاد الغيبوبة لي بقات فيها شهراين ماعارفاش راسها واش كاتحلم ولا فايقة .. ماعارفاش راسها فين هي دابا ... كي دارت حتى وصلات لهنا؟؟؟ عاد كانت كاتسمع صوت خوتها .. حسات بيهم و بدموعهم عليها كيفاش واش هادشي كان مجرد حلم؟؟؟ تفكرات العذاب لي دازت فيه واخا تكون كاافرة و مايدوزوش عليها داك العذاب كامل .. كاتشوف قدامها شيطان فهيئة إنسان مزال متعجبة واش هي فعلا باقا حية ولا هو تابعها حتى للقبر
أرسلان : ( بهدوء ) كالعادة باقا حية
ريماس : الصمت ... كاتشوف فيه بحقد و بكره .. بقات كاتكابر باش تنوض من بلاصتها عارفاه غايبغي يستغل ضعفها فهاد الحالة
أرسلان : ماتوحشتينيش!! .. قرب يديه دوزهم على حناكها تنطرات منو بتقزز و بعد عدة محاولات و اخيرا قدرات تجلس و ماتبقاش ناعسة بدات كاتحرك فرجليها تتأكد ياكما دارو لها شي موصيبة كلشي فيها ماناقصها والو ولكن اش جابها للسبيطار هادا هو السؤال المطروح لي كان عندها
ريماس : فين انا؟؟؟؟؟ علاش انا فالسبيطار؟؟؟؟؟؟؟
أرسلان : ماتوحشتيش بلادك!!
ريماس : اش كاتخربق نتا؟؟؟؟ ... شدها من الفك ديالها و قرب وجهو لعندها عينيه فعينيها واخا هاد شهراين كاملة لي كانت مغيبة فيها ولكن البريق لي موالف يشوفو فعينيها باقي نفسو ماتبدلش .. هضر بصوت خافت كفحيح الأفعى
أرسلان : فنفس الشهر فنفس النهار نفس الساعة و نفس البلاصة فالعام الجاي غادي تعرفي اش كانخربق .. هبط عينيه لشفايفها و بتاسم بإبتسامة جانبية ولكن لا .. هاد المرة مادارهاش ، دفعاتو ريماس بكاع الجهد لي عندها رجع اللور و بقا كايشوف فيها بنظرات مختالفين على جميع النظرات كان كايشوفهم بيها
ريماس : ( بنظرات كالسيف ) ماتحاولش عنداااك تعاود تبغي دير معايا هاد التصرف حيت المرة الجاية لي غاديرها ماغانترددش باش نقتلك كيف درت فاللول
أرسلان : مزال ليام غاتلاقينا ا إيفا ... طفا الضو و بقا راجع باللور حتى ختافا على انظارها .. هزات القرعة ديال الما لي كانت حداها هبطات عليها عاد ردات النفس بقات كاضور فعينيها فالبلاصة لي هي فيها و فعقلها الف سؤال و سؤال فاقت بحال دوك لي كاينعسو من مور العصر و كاينوضو مقلوبين ماعارفين واش باقي الليل ولا صباح الصباح ... اخر حاجة بقات عاقلة عليها هي فاش كانو رابطينها و قدامها اطباء و ابراهام من موراها مابقات عاقلة على والو .. كاتحس براسها نعسات بزاااف هاد البلاصة لي هي فيها حسن من البلاصة لي كانو حاطينها فيها زعما يكون بصح رجعوها للمغرب هههه اكيد لا مايمكنش يطلقوها بهاد السهولة ولكن بلاتي بلاتي كيفاش شعرها طوال؟؟؟ و رجع اللون الاصلي ديالو لي هو الكحل .. هي عاقلة بلي كان قصير و زعر بقات كاتتحسس فيه بصدمة وتجبد فيه واش فعلا شعرها ولا لا زادت تخربقات بزااف و مابقات فاهمة والو كاتحس براسها فمتاهة و خاصها تلقا لي يخرجها منها ... قررات باش تقطع تساؤلاتها و تلقا لهم جواب حيت عقلها تخربق بالفري هاد المرة ... شعلات الضو لي كان حداها و حيدات ليزار عليها نطرات دوك الخيوط من يديها و بغات تنوض من تما .. حطات رجليها فالأرض و بدات كاتكالي راسها مع الحيط باش ماطيحش كاتحس براسها كايدور عليها بدات كاتتمشا بتثاقل باش ماطيحش .. حلات الباب كايبان لها الكولوار ديال الطبيب خاوي و سهااات فيه ماكايشبهش لداك البلاصة لي كانت فيها .. بقات غادا مكاليا مع الحيط لابسا لباس المرضى و شعرها منسدل موراها باغا غير تلقا شي حد تسولو على البلاصة لي هي فيها ماخرجات غير فالطبيب المشرف على حالتها ...
مشا كايجري لعندها باش يعاونها توقف و الصدمة باقا باينا عليه واش البنت عاد كانت فغيبوبة و دابا نايضا من بلاصتها .. بغا يعاونها و دفعاتو بيد باش تبعدو عليها
ريماس : شكون نتا؟؟؟؟ و فين انا؟؟؟
الدكتور : انسة ريماس خليني نعاونك
ريماس : ماتعاوني مانعاونك قوليا فين انا؟؟؟؟؟
الدكتور : نتي فالكلينيك دابا
ريماس : المدينة؟؟؟؟ الدولة؟؟؟؟
الدكتور : فالمغرب كازا خليني نعاونك راك باقا عيانة
ريماس : قادرا نعاون راسي باقا قادرا نتمشا على رجلي ... ضارت و بقات مكالية مع الحيط رجعات لبلاصتها و بدا كايفحص فيها
الدكتور : ماكايضرك والو
ريماس : شنو غايضرني؟؟؟
الدكتور : ماكاتحسيس بالألم فراسك
ريماس : لا علاش غانحس بيه؟؟
الدكتور : و فصدرك؟ ماكاتحسي بوالو
ريماس : ( مخنزرة ) شفتك تجاوزتي حدودك
الدكتور : ماتفهمينيش غلط انسة ريماس ولكن هادي مدة كنتي تعرضتي لرصاصة داكشي لاش سولتك
ريماس : ماكانحسش
الدكتور : شنو اخر حاجة عاقلة عليها؟
ريماس : و نتا فاش كايهمك هادشي؟ فين سي راضي؟؟
الدكتور : غدا فالصباح غاتلقايه جا ماشي بزاف باش جا
ريماس : علاش انا فالسبيطار؟؟؟ و شكون جابني لهنا؟؟؟
الدكتور : جاتك ضربة قوية فالراس
ريماس : شكون جابني لهنا؟؟؟ كي درت حتى وصلت للمغرب؟؟؟
الدكتور : هادشي ماعنديش ليه جواب
ريماس : شحال و انا هنا؟؟؟؟
الدكتور : رتاحي راك باقا عيانة
ريماس : واش باغي تحمقني؟؟؟ كانسولك فجهة و تجاوبني فجهة كانحس براسي نعست نومة اهل الكهف و كاطلب مني باش نزيد ننعس هاد المرة لقيت راسي فسبيطار و المرة الجاية غانلقا راسي فالقبر ياك هادشي لي بغيتو؟؟؟؟؟؟ ... خرج و خلاها غاتحماق مابقات فاهمة والو فهادشي كامل شعرها لي طوال ... مجيئها للمغرب ... أرسلان لي جا لعندها ... اصوات خوتها لي سمعاتهم و حسات بيهم ... الضربة لي فالراس و الصدر تخربقات بالمزيان الليل كامل و هي سهرانة ماقدراتش ترجع تنعس كيفاش غاترجع تنعس و هي ولات فوقما تغمض عينيها كاتفيق و تلقا راسها فقنت اخر .. بدا الصباح كايصبح و اذان الفجر كايوذن توحشات تسمع هاد الصوت مدة طوييلة ماسمعاتو ناضت طرفات و رجعات لبلاصتها تجبدات و بقات كاتشوف فالسقف كاتحس براسها فمتاهة و يقدر يخرجها من شخص واحد و هو سي راضي دازو ساعتين سمعات الباب تحلات تلفتات تشوف شكون لقاتها غير الممرضة كانت هازة فيديها بلاطو فيه الفطور
الممرضة : صباح الخير انسة ريماس
ريماس : صباح الخير
الممرضة : كي كاتحسي براسك؟؟
ريماس : مزيان
الممرضة : ماكايضرك والو؟؟
ريماس : والو ... بقات كاتجاوبها بكلمة حتى خرجات الممرضة .. طاحت فداك الفطور عمية بحالا ماكلات هادي عام
_ فجهة خرا فنفس الكلينيك
كان داخل سي راضي و فيديه ريناد و فادي متوجهين لغرفة ريماس حتى وقفهم الدكتور
الدكتور : ( بإبتسامة ) صباح الخير سي راضي
سي راضي : صباح النور
الدكتور : عندي خبار غاتفرحكم
سي راضي : ( بلهفة ) شي تحسن فحالة بنتي ريماس؟؟؟؟؟
الدكتور : المريضة رجعات للوعي ديالها البارح من مور ماخرجتو كاين تحسن كبير فحالتها ا سي راضي و فكرتك نجحات ... بدا كايشرح لو الطبيب حالتها و اش كاين و سي راضي ماقاداه فرحة
♔ رجعات البلاطو لبلاصتو و بقات جالسة فبلاصتها كاتفكر فهاد الحريرة المحرحرة لي فدماغها بقات هاكاك مدة ساعات حتى تحلات الباب و مع ذلك ماتلفتاتش حتى سمعات واحد الصوت ماغريبش عليها .. رجع لها احساس قدييم .. ناضت من بلاصتها بالزربة و جلسات
ريناد : ختيي .. بقات ريماس كاتشوف فيهم بصدمة كأنها مزال مامستوعبة هادشي لي واقع .. طلقو من يد سي راضي و مشاو كايجريو لجهتها تلاحو عليها عنقوها بادلاتهم العناق بحرااارة زيرات عليهم و بدات كاتبوس فيهم عينيها تغرغرو بالدموع بالفرحة و سعادة عارمة دخلات لقلبها منين شافت خوتها
فادي : ختي توحشتك بزاف ... بدات كاتبوس فيهم
ريماس : توحشتكم بزااف ريناااد فاديي ... بقاو على داك الحال شي نص ساعة كايبردو شوقهم لبعضياتهم حتى قاطعهم صوت سي راضي
سي راضي : خليو ختكم ترتاح
ريماس : عمي راضي .. ناضت كاتجري لعندو عنقاتو و بادلها العناق زير عليها و عينيه غرغرو منين شافها واقفة قدامو و كاتهضر شحال و هو كايتسنا تفيق ماكانش فاقد الأمل فيها كان عارف غايجي شي نهار لي تفيق ليه و ها هو جا ... يتبع