كان غادي شوية وقف و هضر معاه بلا مايضور
أرسلان : اخر مرة نلقاك كاتخرج المعلومات ديال التداريب لشي حد صبري عليك بدا كايتسالا ... مشا و خلاه زاد تعصب علاين يتفركع ... رجع للساحة ديال تدريب و جلس بلاصتو و كمل الباقي كالعادة لي غلط كايسيفطو بكري للقبر ديالو شوية بشوية حتى ولا عدد لي كايغلطو كايقلال و ولا العدد ديال لي كايموتو 2 من 100 ولا 3 و لي سالا تدريب كايمشي للمطعم يتغدا و يرجع للساحة اللولانية يتدرب بيهم اسوار على الحركات الرياضية لي زاد قصحها معاهم ... سالا اول نهار تدريب و مشات فيه ارواااح عدة ريماس نهار كامل و هي كاتتفادا دوز من حدا أرسلان طالع لها دم حيت فاش جات باش تعرف باش مجهزين دوك البذلات جا حرمها عليها ولكن هانيا غادي تحاول تعرف بأي طريقة .. مشات تعشات كالعادة مع القياد ماكانش معاهم ارسلان .. كان واحد صمت غريب الهضرة قليلة ... سالاو العشا و مشاو الجنود لغرفهم و ما هي الا دقائق حتى بدا كايتسمع دقان فالبيبان كانو الحراس لي كايدقو و يحطو لهم البذلات ديالهم ... خرجات هزات ديالها و ديال لي معاها فالغرفة حطات ديالها فالخزانة و هزات شي حوايج نقيية مع شامبوان و صابون و مشطة و فوطة و مشات للطواليط باش تتدوش بالما بارد كالعادة
..............
سي مصطفى : ( بنفاذ صبر ) قلت لك راها بيخير واش ا عباد الله هي اول وحدة نسيفطوها لتم؟؟؟ راه عالم ديال البشر سيفطناهم ماشي هي اللولة ولا اللخرة
سي راضي : واش كانبان لك مكلخ باش ضحك عليا بهاد 2 كلمات؟؟؟؟ دوك لي سيفطنا مارجعوش و انا من اللول قلت لك ايلا ماكانتش غا تتأمن لها الحماية بلاش مانسيفطوها ( بتهديد ) لاوقعات لها شي حاحة ماغاتلوم غير راسك
سي مصطفى : ( كايرطب معاه ) ريماس فران و قاد بحومة ماتخافش ماغايوقع لها والو
سي راضي : ها حنا غانشوفو . و جاد كاين شي خبار عليه؟؟
سي مصطفى : يلاه هضرت معاه راه هرب من المعسكر ديالهم و نجا بحياتو حيت كان غادي يتكشف بن المكلخ لاخور مانعرفت فين عقلو
سي راضي : ( بعصبية ) و حتى لدابا عاد قلتيها لي؟؟؟؟؟؟؟ فينو دابا؟؟؟؟
سي مصطفى : العلم الله ولكن راه باقي على تواصل دائم مع جهاد ريماس لي مرة مرة كاتتقطع خبارها دوييت معاها قبل ماتمشي سماعة ماتحيدهاش من ودنيها
سي راضي : ماسمعتيش اش قال جهاد واقيلا؟؟؟؟ ناس لي معاهم كايلاحظو ادق التفاصيل مادام لقاو الكتاب خاصها تغبر الاثر للمعدات لاخرين الحمد الله منين ماسيفطناش معاها معدات مفضوحة
سي مصطفى : و هادا اكبر غلط قتارفناه حيت غاتحتاج شحال من حاجة و ماغاتلقاهاش
سي راضي : و جهاد علاش سيفطناه لتم بالسالامة ايلا ماعطاهاش اش تحتاج؟
سي مصطفى : قال لي جهاد بلي اليوم بداو تداريب الحقيقية ولاد الكلاب صدقو اذكياء الحمد الله منين مادارتش ريماس بحال داك بن الحمار و تقولبات بالإختبارات
سي راضي : بنتي ريماس واخا عصبية الا انها مطورة انا خايف عليها غير حيت راها وسط ناس مايعرفوش رحمة ماعارفش حالها كي داير تما بعد المرات كايتنادم معايا الحال حيت سيفطتها لتما
سي مصطفى : دابا لي وقع وقع نطلبو السلامة و صافي ولكن المعلومات لي عطات لجهاد مزيانين واخا ماكافيينش
سي راضي : بشوية عليها راه مايمكنش تجيب كلشي فأسبوعين عندهم عام ديال تدريب ماعرفنا واش غايكونو تغييرات ولا لا
سي مصطفى : كانفكر نسيفط شي حد اخر للمعسكر لي راها فيه
سي راضي : لا لا لا واش نتا مسطي؟؟؟ حتى دخلو و بداو تداريب عاد غاتسيفط؟ كي درتي ليها؟؟؟
سي مصطفى : باش يبعدو عليها الأعين هادشي لي قصدت
سي راضي : عاد ماغانزيدو نثيرو الانتباه دابا فنظري احسن حاجة غانديروها هي نحبسو واحد المدة تا نشوفو اش غايوقع
سي مصطفى : ها حنا غانحبسو
...............
كانت طالقة الما فطواليط و سادة البيبان كالعادة .. عينيها مركزين على البيسي ودنيها مطلوقين باش تسمع لاكان شي صوت ديال الحركة كاتقلب هنا و هنا و تخربق حالة كتر من باج وحدة .. كاتخربق فهادي و تكتب فهادي و تلصق فهادي و اخيرا سالات ترسمات ابتسامة جانبية على شفتيها سالات من داكشي لي كانت كادير و فورماطات البيسي سداتو و ضوراتو و هزات طورنوفيس لي حتى هو جا مع الامانة لي خلا لها جهاد بدات كاتحل فالفيسات ديال البيسي بزربة حتى فصلاتو و شدات الخيوط لي وسطو قطعاتهم هزات الذاكرة الأساسية لي وسط منو هرساتها و لاحتها فطواليط خوات عليها الما .. خشات طورنوفيس و البيسي لي ولا كامل مفصل فبلاستيكة و هزات دوا لي جاب لها جهاد غطات داكشي بالحوايج لي كانت لابسة و خرجات من طواليط غادا و كاتحس بحالا شي واحد تابعها ماتلفتاتش نهائيا باش ماتزيدش تثير الشكوك حيت كايقولك لي فيه الفز كايقفز يعني لادارت شي رد فعل متوقع يديرو لي كايكون داير علاش غادي يشك فيها هادا لي تابعها و هي عارفة هادا لي تابعها يا غايكون ارسلان يا شي واحد من دوك 2 لي ماكايفارقوهش و حاليا ماشي من مصلاحتها ضور تحقق شكون بدات كاتزرب فخطواتها باغا غير توصل لغرفتها فأسرع وقت ... حتى وصلات للغرفة عاد تنفسات الصعداء دخلات سدات الباب و بدات كاطل بشوية باش تعرف شكون لي كان تابعها
ما بان لها حد ولكن هي عارفة و متأكدة بلي غاتكون مراقبة ... غاتكونو كاتسألو كي دارت حتى هزات ديك سخرة لي جابها لها جهاد ، من مور ماكانت مشات للطواليط باش تدوش دخلات و طلقات الما و سدات الما و تعلقات فسرجم ديال طواليط نقزات للجهة الثانية من مور ماتأكدات بلي ماكاين حد و قدرات تنجح باش توصل للجهة لي كانت محطوطة فيها سخرة لي كان فيها ( بيسي و 2 طورنوفيسات و دوا ديال نعاس و ميكرو صغير على اللول ) .. هزات داكشي و رجعات لطواليط بنفس طريقة باش مشات غايكون ضركم راسكم علاش بغات البيسي و علاش فورماطاتو و دارت فيه ديك الحالة كاملة غانخليكم تعرفو مع الاحداث الجاية ... تحركات لجهة الجنود لي معاها تتأكد واش ناعسين كان شخيرهم واصل لبرا ... بقات غادا كاتتمشا على أطراف صباعها حتى وصلات للخزانة ديال واحد من دراري لي معاها فالغرفة حلاتها و جبدات قبية كحلة باش حتى لاشافها شي حد مايعرفهاش من حوايجها ... دارت القب هزات داكشي فيديها و حلات سرجم طلات واش كاين شي واحد مالقات حد نقزات و خرجات فواحد الجزء لوراني من ساحة بقات غادا كاتزرب فخطواتها و كاتتلفت لايشوفها شي حد حتى قدرات توصل للبلاصة منين هزات داكشي بدون مايشوفا شي واحد ... هزات البلاستيكة بسنانها و بقات كاتتعلق فدوك 2 شجرات لي تما كانو عاليين و اخيرا تمارين التسلق فادوها بشي حاجة وصلات لقمة ديال شجرة ولكن مع ذلك كان سور مزال عالي
ريماس : بفففف مشكيلة هادي كي غاننقز لجهة تانية هاد الخرا لابقا فالمقر غادي نتفرش بسبابو فيوم تفتيش و انا مانقدرش نزيد نغامر براسي ... كروازات رجليها على شجرة باش تشد راسها عاد طلقات يديها من شجرة هزات البلاستيكة كاتقلب فيها و جبدات منها 2 طورنوفيسات عاودات رجعات شدات البلاستيكة بسنانها شدات كل طورنوفيس بيد و بدات كاتخشي كل طورنوفيس فجيه و كاتتأكد بلي مشدودين مزياااان خدات نفس عميق و طلقات رجليها من شجرة ولات معتامدة غير على طورنوفيسات كل مرة كاتخشي واحد فجهة و كاتزيد تتعلا شوية بشوية تقل ديال داتها هازينو طورنوفيسات لي كايتقبو الحيط و يديها و يدي و اخيرا وصلات للقمة ديال السور لقات عاوتاني دوك سلوكة ديال ضو دايزين على سور من الفوق نعلات زهر لي عندها
ريماس : بففففف كي وقع لي حتى نسيت هاد الخرا دابا وصلت وصلت لهنا ماعندي كي ندير نتراجع غانديرها فيد الله يا ربحة يا دبحة يا غانوصل و نخرج من المقر يا غادي يشد فيا ضو و يلوحني ... طلات بعدا واش كاين شي كلاب ولا حراس مالقات حد عاد لاحت ديك الميكة شدات طورنوفيسات بفمها و طولات الكمام ديال يديها غطاتهم بيه باش تتفادا صعقات الكهربائية خدات نفس عميق حسبات حد 3 عاد دازت من تحت دوك سلوكة ديال ضو واخا مغطية بالحوايج باقيين كايوصلو للحمها صعقات خفيفة ديال ضو بحال الهران ... و اخيرا دازت من تحتهم جبدات دوك طورنوفيسات و هبطات بنفس طريقة باش طلعات حيت لا يمكن تنقز من تما ... الا نقزات وحدة من 2 يا غاتكمل حياتها فالكروسة ماقلت سور عالي حتى كان عالي نيت بقات كاتقاتل باش تهبط و مايفلتش شي طورنوفيس و تصدق طايحة على عضم طيو و بعد صعوبات و اخيييرا وصلات لخارج المعسكر هزات ديك الميكة و شافت واش طريق مأمنة حسبات حد 3 و مشات كاتجري لجهة الغابة باش تدفن داك البيسي تم ... هاد المرة دخلت فمغامرة غامرت بحياتي عارفة بلي ممكن فأي لحظة نحصل و ممكن فأي لحظة داك الحقير ديال أرسلان يقلب عليا و عارفاه كايقلب منين يشدني ولكن معامن هو؟ ... كون خليت هادشي فالمعسكر ديك ساعة عاد كنت غانحصل بالمعقول و خصوصا منين عرفت بلي كايكونو دورات تفتيشية على غفلة يعني كون يلقاو هادشي عندي ديك ساعة ماغاتبقا عندي حتى حجة ندافع بيها على راسي داكشي لاش شفت انسب حل هو نخرج هادشي من المعسكر و نبعد عليا شبوهات .. مشات كاتجري وسط الغابة و غير صوت دياب لي كايتسمع مابغاتش تتغمق بزاف وصلات لحدا واحد شجرة و بدات كاتحفر فجهة جدور ديال شجرة خبعات داك البيسي لي ولا بيسي غير بسمية و عاودات ردماتو بتراب ... ساست يديها و بدات كاضور عينيها فالغابة كانت عاامرة شجر عالي و كثيف مضلمة و حتى ضو ديال القمر ماكايوصلش ليها رجعات ادراجها منين جات ولكن ماجات فين تخرج من تما حتى سمعات صوت رجولي كايهضر قدرات تميزو ديالمن و كيفاش ماغاتميزوش و داك صوت هو الوحيد لي كايزعزعها .. تسمرات بلاصتها مابقاتش قادرة تحرك ...
تجمدات بلاصتها و غمضات عينيها كاتفكر شنو غاتقوليه فالمبرر لي غاتعطيه باش غاتبرر علاش خرجات و كيفاش خرجات مافيقها من افكارها غير هضرتو تصدمات و فنفس الوقت فرحات بدات كاتستوعب و لأول مرة زهر يوقف معاها .. من زهرها ماكانش كايهضر معاها بل كان كايهضر مع شخص ولا نقدرو نقولو أشخاص هما
أرسلان : ناويين تخليوهم يدودو هنا؟! ريحة جيفة واصلة حتى لداخل
أبراهام : ميستر أرسلان كنت كانتسنا الأوامر منك واش نحرقوهم ولا نردموهم كلهم فحفرة وحدة حيت اخر مرة قلتي لي مانعاود ندير والو حتى نعلمك
أرسلان : حرقوهم
أبراهام : بالنسبة لداك الشخص لي وصيتيني عليه راه ديتو لقصر المعلوم
أرسلان : همم تهليتي فيه؟!
أبراهام : ( بإبتسامة شر ) بطبيعة الحال ا ميستر ارسلان و كالعادة راه باقي حي ... رتب ليه على كتافو و ضار لعند مالك
مالك : ميستر أرسلان سلاح لي وصيتي عليه على ود الحرب وصلات الدفعة اللولة
أرسلان : امم مزيان و شي لاخر!!
مالك : الباقي ماجبناهش حتى تشوفو واش هو هاداك
ارسلان : و نتا اش كادير باش ماتتحققش منو؟!
مالك : ( حاني راسو ) سمحلي
أرسلان : الكسوة ديال الحرب ايمتا ناويين يبداوها؟!
مالك : قالو لي باقي خاصهم يجمعو الأجزاء لي باقيين ناقصين و موراها غايسيفطو لينا رسم تصويري باش تشوف واش يزيدو عليها شي حاجة ولا ينقصو حاليا راه فيها ال.. ... تخبعات و بقات كاتسنط على هضرتهم ها همزة جات برجليها لعندها هما كايهضرو و هي كاتجمع المعلومات يلاه جا باش يقول الخاصيات لي فديك البذلة حتى قفزاتها يد شداتها من القرفادة ديالها
البوديكارد : سيدييي شوف اش لقييت هنا ... تلفت لجهة صوت قلبها تهز من بلاصتو بالخلعة ... دغيا ضرباتو للمنطقة الحساسة و مع ذلك مابغاش يطلق منها شاد فيها شدة العمى فضلمى بدون تفكير و بدون ماتشوف واش جاي لجهتهم خشات رجليها بين رجليه و ميلاتها شوية دفعاتو من صدرو بيديها و جرات رجليها شوية جا مخبوط فالأرض و حتى هي طاحت معاه كان على شوية القب يتحيد و تتكشف
أرسلان : ( بملامح ممحية ) شدوه و جيبوه لي .. جمعات الوقفة بزربة قلبها كايضرب فل180 علاين يسكت بالخلعة طلقات رجليها للريح و ماعاوداتش ضارت موراها أبراهام و مالك تابعينها شوية لحقو عليهم حتى رجال و الكلاب غادا و كاتتعكل فالأغصان ديال شجر صوت رصاص موراها كايخليها ماغاداش فطريق مستقيمة باش تتفادا القرطاس
أبراهام : ( بالغوات ) وقاااااااااف ماعندك فين تهرب اليوم يا غاياكلوك دياب يا غاياكلوك الكلاب ... تنفسها تزاد فالوتيرة و حتى القلب تزاد فوتيرة ضرباتو مالقات لي يعاونها فهاد اللحظة من غير رجليها لي حتى هما مرة مرة كايفشلو عليها بالخلعة زادت فالفيتاس حيت لابقات على هاد سرعة لا محالة غاتموت و لحمها غايكون عشاء فاخر للكلاب بعداات عليهم شوية بانت لها واحد شجرة محلولة مشات تخبعات فيها ماخافت لا يكون فيها لفاعي ولا عقارب .. فضلات تقتلها طبيعة و ماطيحش فيدين داك عديم رحمة ... سمعات صوت القرطاس و الهضرة ديال لي تابعينها كاتقرب و اهم حاجة ركزات عليها هي الكلاب لي غادي يكشفوها بسباب ريحة ديالها .. بدات كاتهز تراب و تفركو مع لحمها و لباسها و شعرها و وجهها باش تخفي الرائحة ديالها ... تكمشات لداخل و قطعات الحس كتمات انفاسها و كاطلب من الله تنجح هاد طريقة .. وصلو لحدا ديك شجرة كاتسناهم بفارغ صبر يمشيو و فعلا حتى هاد المرة زهر وقف معاها تجاوزوها و مشاو كايقلبو عليها و اخيييرا رتاحت عاد طلقات نفس تسنات شوية باش تتأكد بلي مشاو حتى سمعات الحس تقطع دارت القب ديالها عاد خرجات كاتحبو من تما وقفات كاتنفض يديها شوية كاتحس بشي حاجة قاصحة تحطات على راسها ... يتبع