♚ في مكان اخر ♚
كان واقف و قدامو الأب ديالو ميستر إيتان رجل فالخمسينات باقي شاد فصحتو تشوفو ماتعطيهش نهائيا 50 عام شعرو بدا كايطغا عليه شيب هو كايهضر و ارسلان كايتسنط و ملامحو كالعادة خالية من أي تعبير فيديه كاس ديال المشروب و مع كل كلمة كاينطقها سي إيتان كايزيد يزير على الكاس
سي إيتان : ا ولدي ارسلان هادو هما العادات و تقاليد ديال عائلتنا واش باغي تخرج لي من جنب
أرسلان : راك كاتحفي دماغك معايا هاد الهضرة طبقها على ولادك ماشي عليا
سي إيتان : ( بدا كايتعصب ) واش باغي تقطع سلالة روتشيلد ولا كيفاش
أرسلان : ( ببرود ) هادشي ماواقفش عليا شوف مع ولادك
سي ايتان : ( كايبرد طرح ) هانتا غير فهمني ماغاديش تتزوجهم دقة وحدو غاتبدا بوحدة تكون من عائلتنا و ديك ساعة نتا حر ... خشا صبعانو فشعرو الكحل عض على شنايفو و ضور راسو و بحركة غير متوقعة قلب طبلة بما فيها بقا لاخر غير مصدوم فولدو ... عاودو صبعانو تغلغلو فشعر قاد الكوستيم ديالو عادي كأن شيئ لم يكن وجه كلامو لأبراهام
أرسلان : هضر مع سي إيتان يدير عقلو باش مانديرش شي تصرف يندم عليه .. أبراهام حشم و ماعرف مايدير ايتان كايبقا الأب ديال ارسلان و كايحتارمو ولكن ارسلان كايبقا هو الكل فالكل و مايقدرش يخالف اوامر ارسلان .. خدا نفس عميق و طلب من سي ايتان يخرج معاه باش يهضرو
ابراهام : سي ايتان نتا عارف ميستر ارسلان و عارف طبعو ماكانش عليك تجبد ليه ديك سيرة نهائيا
ايتان : ابراهام ماتتدخلش بيني و بينو و خليك بعيد هاداك ولدي
ابراهام : كانهضر لمصلاحتكم و نتا عارف ميستر ارسلان ماكايتسنط لحد و ماكايحتارم حد من غير جدو
ايتان : ( بعصبية ) كاع رجال فعائلتنا كايتزوجو 3 ديال نسا شنو زعما هو مرفوع عليه القلم؟ هادشي راه لمصلحة العائلة باش تزيد تكبر و تطلق جذورها لا لا لا هادا باغي يحمقني ا
ابراهام : لي عليا درتو خليت لك راحة ا سي ايتان .. رجع للمكتب ديال ارسلان و عيط للخدامة باش تجمع ديك روينة بينما ارسلان خرج من تما ركب فلوطو ديالو من نوع لمبرغيني فينينو رودستر شد طريق للقصر ديال العائلة هما واخا لاباس عليهم و نفوذهم و اموالهم لا تعد ولا تحصى ولكن ساكنين فقصر واحد و هادو من اوامر جدهم لي كلمتو ماكاطيحش نهائيا و حتى من ارسلان ماكايطيحهاش و كذلك جدو ماكايقلقش ارسلان حيت هو اقرب واحد ليه فالعائلة كايتعتابر ارسلان فالمرتبة التانية فالقصر من مور جدو عاد كاتجي مرتبة اسوار عاد و هادشي بسبب انجازاتهم و الهيبة لي عندهم ... من مور نص ساعة وصل للميناء لقا اليخت ديالو واجد عطا لوطو لأبراهام و طلع فاليخت شد طريق فالبحر دازت ربع ساعة بدات كاتبان ليه واحد الجزيرة وصل لها و نزل من اليخت لقا لوطو خرا كاتسناه خرج شيفور حل ليه الباب و عاود طلع عاد ديمارا ..هز طيلي ديالو بقا كايخربق فيه و دازو دقائق معدودة وقفات لوطو حدا واحد الباب حديدية عرييضة فاللون الذهبي و مكتوب فيها بالكحل ( عائلة روتشيلد ) بيان سيغ بالعبرية مكتوبة .. تحلات البوابة ديال بقاو غاديين فواحد طريق كلها شجر كاتحس بحالا راك مزال فالجزيرة ماشي داخل القصر مي داكشي ماكانش مهمش بالعكس مقاد بعد مسافة وصلو و اخيرا قدام واحد المبنى كلمة قصر قليييلة فحقو كان عبارة على 3 قصورة 2 قصورة فجناب حادرين شوية فيهم 3 طبقات و القصر تالت كان هو لي الوسط و فيه 3 طبقات و طبقة رابعة فيها غير جناح جا شكل ديالهم روعة مشروكين واحد كايدخلك فواحد .. وقف قدام باب القصر الوسطاني بلا مايدق ولا يصوني حلات الخدامة الباب و دخل .. سكااااات و حس دبانة ماكاتزنزن كايتسمعو غير صوت خطوات صباطو العائلة كل واحد فين مخشي كايتجمعو غير فوقت الماكلة و المناسبات ولا كان شي اجتماع عائلي ، توجه للجناح ديالو لي كان فالطبقة الرابعة ...
دخل للجناح ديالو لي كان جناح ملاكي بإمتياز فاللون الأسود مفرش بأثاث نيو كلاسيك فاللون الرمادي دخل للدوش دوش و خرج بفوطة ملوية على النص تحتاني ديالو دخل للدريسنج جبد منها سروال سورفيط فالكحل من ماركة اندر ارمور و تيشورت بيض لاكوسط جاه لاصق على ضهرو حط ساعتو اليدوية و رش البارفان ديالو .. هبط للتحت كايقلب على جدو .. هاداك اول شخص كايشوفو فاش كايجي للقصر دق عاد دخل لعندو .. سي اصلان روتشيلد رجل فسن 98 عام ماغانقولش لكم ماباينش فيه العمر ديالو بالعكس باين فيه بتجاعيد وجهو شيب طاغي على دوك زغيبات لي فراسو ولكن مهلي فراسو من وجهو كايبان لك من اخبث خلق الله وجهو كايوحي غير بالشر المطلق كلمتو ماكاطيحش للأرض كلشي كايحتارمو عندو هيبة فجميع المجالس لي كايكون فيها ذكي بزااااف و كايعرف فاش يوظف ذكائو ... اقرب شخص ليه هو ارسلان و هادشي كايرجع لشخصية ارسلان لي هي نسخة طبق الاصل على اصلان و علاش لي ماغاتكونش؟ و هو لي مربي ارسلان على يديه منين كان مزال فشهورو اللولة و هو لي سماه .. و حتى ارسلان اقرب شخص ليه هو جدو و هو الشخص الوحيد لي ماكايطيحش ليه كلمتو و اي حاجة قلقاتو و لو غير شوية كايمحيها من الوجود شحال من مرة ضار فالأم و الأب ديالو على ود جدو
سي اصلان : ( بإبتسامة ) حفيدي ارسلان ... مشا باس ليه يديه و راسو
ارسلان : ( بإبتسامة ) جدي
سي اصلان : ماغانسولكش على صحتك كلشي باين عاود لي كي غادي مع داكشي؟
أرسلان : كلشي غادي كيما بغيتي مابقاش بزاف
سي اصلان : انا تايق فيك و لوكان ماكنت تايق فيك كون خليتهم يكلفو شي حد اخر
أرسلان : ماتفكرش بزاف فداكشي فكر غير فصحتك جا عندك طبيب اليوم؟!
سي اصلان : وي ولدي جا بغيت نهضر معاك فواحد الموضوع
أرسلان : ( مركز معاه ) وي كانسمع
سي أصلان : ولدي أرسلان نتا عارف عادات العائلة ديالنا
أرسلان : ( عرفو اش باغي يقول مي مابغاش يقاطعو )
سي أصلان : دابا كبرتي و حفادي كلهم كبرو و اغلبيتهم كايفكرو يتزوجو ولكن عارف علاش مانعهم؟
أرسلان : وي جدي عارف
سي أصلان : ( بجدية ) نتا عارف مابقاش ليا بزاف فهاد دنيا نهار غانموت نتا لي غاتشد بلاصتي ولكن شكون غايشد بلاصتك؟ حتى واحد فيهم مامعمر لي العين كلهم مضبعين من غير اسوار و شي وحدين قلاااااال داكشي لاش قررت الحفيد اللول لي غايتزاد من عند حفادي هو لي غايشد بلاصتك و داك لي غايشد بلاصتك بغيتو يكون ولدك حيت سبع ماكايولد غير سبع فهمتيني اش بغيت نقولك؟
أرسلان : وي فهمت
سي أصلان : انا ماقلتش لك غاتزوج 3 فمرة وحدة ... بدا باللولة بنات العائلة تا هما كبرو و ولاو شابات و موراها زيد 2 من اختيارك ولكن بغيت نشوف هادشي قبل مانموت و موراك ديريكت غايتزوج اسوار
أرسلان : ( بإبتسامة ) يكون خير
سي أصلان : غاتفوت الحرب غا نبداو نوجدو للعرس ديالك علمتك باش توجد راسك
أرسلان : لي درتيه انا معاك
سي اصلان : ( بإبتسامة ) نتا فخر بالنسبة ليا ماعرفتش داك باك لاش ماخرجش بحالك ولكن ماشي مشكيل
...........................
وصلو للكلينيك هزها فيديه و هي مرخية تا اللخر .. دخل كايجري و دكتور موراه غير شافوه فالكلينيك عرفوه شكون جاو كايتجاراو هزو ريماس دخلوها لغرفة العمليات
أسوار : علاش مدخلينها لغرفة العمليات؟؟؟؟
دكتور : خسرات بزاف ديال دم و الجرح تعفن لها ا سي اسوار .. دخل طبيب كايجري تا هو لغرفة العمليات بقا غير أسوار لي علب برا بقا غادي جاي كايتسناهم يخرجو خلاص داير يديه من مور راسو و كايلوم راسو ماكانش عليه يخليها تجهد راسها يديها يلاه زيراتها و كتفها يلاه داواتو و هو مشا بدا ليهم بالقاصح هز طيلي ديالو لقاه غايتفركع بلي زابيل من عند القياد و الأب ديالو اول حاجة دارها عاود صونا على الأب ديالو لي قاليه يجي للقصر على ود اجتماع عائلي عاود صونا على أديب باش يعرف اش كاين ...
اديب : اسوار فينك؟؟؟
اسوار : فالكلينيك علاش؟ واش وقعات شي حاجة
اديب : ديك القح*ة معاك؟؟؟؟
اسوار : ( بعصبية ) دابا هضر خلاص علاش كاتسول عليها؟؟؟؟
اديب : ( بعصبية ) دري راه رجع للوعي ديالو و قالينا مول الفعلة
أسوار : و شديتوه؟
اديب : كي غانديرو نشدوها و هي معاك؟ خمجات الكمارة ديال دري مابقا فيها مايتشاف ماخلات ليه لا سنان لا مناخر
أسوار : ( بعصبية ) كادوخ عليا دابا؟؟؟؟ البنت مضروبة ماقادرا حتى تهز اليد و كاتقوليا ضرباتو تسنا نجي نتفاهم معاه نشوف هاد البلان ديال الكدوب ديالو .. قطع الإتصال و عيط لواحد الفرملية كانت دايزا من تم بقات جايا و كاتقاد فشعرها و طابليتها زعما كاضور بالحالة
الفرملية : ( بدلع ) نعام ا سيدي اش حب الخاطر
اسوار : ( مخنزر فيها ) فاش تخرج المريضة لي فغرفة العمليات **** علمي دكتور **** يعيط لي فهمتيني؟
الفرملية : ( كاضور فشعرها ) وي بيان سيغ فهمتك كاين شي اوامر خرا ا ... خلا الهضرة معلقة ففمها و خرج من تما طاير ركب فاللوطو ديالو و كسيرا نيشان للمقر حلو ليه الباب و دخل ناوي على خزيت مشا نيشان لعند داك خونا ، حل الباب لقاه مجبد فواحد الباياص و ضايرين بيه القياد و معاه دكتور قرب لجهة داك خونا و ربع يديه كايطلع فيه و يهبط وجهو ولا قوس قزح فيه 3 ديال اللوان وجهو كامل زرق سنان القداميين طاحو و نيف مضورين لو عليه الفاصمة
اسوار : ( عاقد حجبانو ) شكون دار فيك هاد الحالة؟؟
***** : هي ا مون شاف ديك الحرايمية هي لي تلقات لي و دارت فيا هاد الحالة
اسوار : فين تلقات ليك؟
***** : فطواليط ا مون شاف
اسوار : و نتا اش داك للطواليط؟ ياك خليتك فساحة كاتتسلق الحيوط نتا و صحابك
***** : ( بان عليه التوتر ) مشيت حيت تزيرت ... هز يدو حتى للسما و نزل عليه للكمارة
اسوار : ( بالغوات ) خدييييييتي الإذن باش تمشي؟؟؟؟؟؟؟؟
***** : ( حنا راسو كايكمد الضربة ) سمح لي ا مون شاف ماقصدتش
اسوار : سمح لي ديرها فالخبز و كولها ماعندناش سيبة هنا تمشي فوقما بغيتي و تجي فوقما بغيتي علاش ضرباتك؟؟؟؟ و باش ضرباتك؟؟؟
***** : مادرت لها والو كنت داخل للطواليط و جات كاضرب فيا برجليها بدون مبرر ماعرفتش حتى شنو سبب ... نزلات عليه تصرفيقة خرا عوجات ليه الحنك و هزو من الكول ديالو
اسوار : كاتكدب عليا؟؟؟؟؟؟ و فوجهي؟؟؟؟؟؟؟ كانبان لك ولد عشر سنين انا؟؟؟ دوي يا بن الحمار شكون ضربك و يا وييييييلك تكذب نعلق ديلمك فالباب
***** : ماكانكدبش ا مون شاف كانحلف ليك هي لي ضرباتني فطواليطات حيت
اسوار : ( رماه بعنف فالباياص ) حيت اش ا بن الحمار؟؟؟؟؟ باغي تقوليا بنت مضروبة و كلها مشروطة دارت فيك هاد الحالة غير بيديها و نتا بقيتي كاتفرج بدون حركة؟؟؟؟ عم عليك الهدوء و السكون فجأة ياك؟؟؟؟
***** : كانحلف ليك هي لي دارت فيا هاد الحالة ماكانكدبش كانقول الحقيقة
اسوار : ماغاتقوش الحقيقة ياك؟؟؟؟؟ ... جبد الفردي ديالو و وجهو لداك خونا غير شافو بدا يشطح بالخلعة
***** : ( كايترعد ) انا انا نقولك الحقيقة غير ماتقتلنيش نبوس لك يديك ( بغا يبوس ليه يديه و نطرها )
اسوار : نطق دغيا كانسسسسمع
***** : ( كايهضر و مرعود ) م م ممشيت تعرضت لها فطواليطات ح ح حييت بسبابها تعاقبت و ض ضربتيني قدام صحابي
اسوار : ( مربع يديه ) زيد كمل
***** : و و كنت باغي ن ن نستافزها
اسوار : اشمن طريقة ديال الاستفزاز؟ ... مع كل كلمة كان كاينطقها لاخر اسوار كايزيد يتزير حتى فقد سيطرة على يديه
***** : ( حنا راسو ) حاولت نتعدا عليها ( عاود هز راسو ) ولكن كانقسم لك ماقصتهاش هي لي ضرباتن* ماجا فين يكملها حتى كان تيرا فيه
اديب : علاش قتلتيه؟؟؟؟؟
اسوار : هزوه من هنا ماعندناش دار دعارة و سيبة هنا اليوم حاول يتعدا عليها غدا يبغي يتعدا على جندية خرا
اديب : و ديك خيتي؟ ماغادير معاها حتى حل؟
اسوار : هاد تخربيق لي قال مادخلش ليا للراس حيت انا لي شايف حالة ايفا صبع ماكاتقدرش تحركو زيد عليها نهار كامل و هي تحت عيني
إسحاق : حتى انا مادخلاتش لي هاد الحريرة لراسي حيت ضرب لي مضروب ضرب راجل ماشي ضرب بنت و نتا عارف الجنديات لي عندنا كلهم مزال مامتدربات
أديم : متافق معاكم ... هزو داك خونا من تما شوية صونا طيلي ديال اسوار
اسوار : واش فاقت؟؟ ... يتبع