( لمعلوماتكم فقط : الأسماء لي حطيتهم فري شوية غراب مي راهم اسرائيليين .. كانحاول نحط داكشي مقاد ماشي ندير سميات عربية لإسرائيليين 😂 )
أسوار : ( عاقدهم ) سير كمل شغالك انا لي غانفتشها .. بقات كاتشوف فيه ريماس بإستغراب ، شنو زعما يكون شك فشي حاجة؟ هه نو ماكانظنش اصلا كانو تصرفاتي عاديين حتى داك الحقير ديال جاد لي غادي يعتق الموقف ماكاينش هنا اوف على زهر
أسوار : هزي يديك لفوق .. هزاتهم و بدا كايفتشها تفتيش عادي شوية حبس من تفتيش ماكملش لسبب مجهول .. بدا كايشوف فيها بنظرات ريبة مشا نيشان حل صاك ديالها بدا كايجبد اش فيه كانو من الفوق حوايجها و حوايج داخلية لي جبدها كايبدا يقلب فيها من جميع القنات حتى من سوتيانات مافلتوش شوية جبد من تما 4 ديال الكارطوشات ديال الكارو من حسن حظها ماكانوش من المغرب بل شراتهم فالبرازيل اما كون فرشات راسها غير بيه .. بدا كايشوف فيها بنظرات فشكل
أسوار : ( بنظرات مرعبة ) كاتكمي؟
ريماس : مون شاف كانظن هادشي ماداخلش فتدريب ولا لا؟ و زايدون هادي كاتبقا حياتي شخصية ... ما جات فين تكملها حتى لقات حنكها عواج كاتحس بيه تشلل كلشي ضار كايشوف فيها اما هي تعصبات ماكرهاتش تنوض تقتلو ، صبري ا ريماس صبري ماتتهوريش .. بقات كاتهدن فراسها
أسوار : ثالث غلط من نهار اللول بغيتي تكمي ياك؟ .. جبد بريكة شعل كارو واحد و هي كاتشوف فيه اش باغي يدير .. خلاه حتى شعل مزيان جر لها يديها لعندو و هي كاتتعافر معاه باش تجبدها لعندها مي هو كان حاكمها بحال اللقاط طفا داك الكارو وسط صبع السبابة و صبع الوسطاني لي كاتشد بيهم الكارو غمضات عينيها و زيرات عليهم بجهد كانت كاتحاول تصبر راسها باش ماتتهورش مي ماقدراتش تزيد تحبس راسها قمشاتو بيديها تانية حتى بقاو لاطراس ديال ضفرانها فيديه
أسوار : هادي دازت بك المرة جاية لي نشوفك كاتكمي فيها يديك غانقطعهم لك .. نهار ترجعي لبلادك و كمي و شربي و تقحبني ولكن هنا فإسرائيل ماعندناش العيالات لي كايكميو ( بالغوات ) فهمتييييي جمعي خراك و تحركي لهيه حدا صحابك .. بقات كاتشوف فيه بحقد و كره زادت حقدات على جنس اسرائيل و واخا ديك الكوية لي فيديها عاودات هزات الكارو دارتو فصاك بحالا كاتتحداه .. مشات لجهة فين كاينين لاخرين و كلشي كايشوف فيها و هي مامسوقاش لهم مزال ماتسرطات لها فعلتو و ماغاديش تدوزها ليه اما أسوار جاه اتصال و مشا .. سالاو تفتيش و عاودو رجعو لنفس ترتيب لي كانو فيه فصفوف
القائد إسحاق : ( بجدية ) كانظن كلشي عاارف القوانين و غانعاود نفكركم و اي واحد خالفهم غادي يتعاقب بدون رحمة
× ممنووع الكارو و المخدرات و شراب
× ممنوع نلقا شي حد كايتسلكط هنا ولا شي وحدة كاتسلكط
× ممنوع شكوى و تدرييات و اي حاجة كاتوقع هنا
× ممنووع منعا كليا تخرج من هنا ولا عرفنا بلي خرج ولو حرف المصير غايكون الحرق حتى للموت
× ممنوع تتطاول على القياد ( خنزر فريماس )
× بلاصتكم فصفوف تبقاو عاقلين عليها و كل صباح مع ل5 نلقا كلشي فساحة
× الزي ديالكم ديما يكون نقي و مانبغيش شي نهار نشوف شي واحد فيكم مالابسوش
× ممنوع يخرج شي واحد من مور 12 ديال الليل من غرفتو
× ممنووع يخرج شي واحد خارج هاد المقر
× ممنوع نلقا عند شي واحد فيكم شي تيليفون ولا اي وسيلة للتواصل
× شعر ممنووع يطوال لا للدراري لا للبنات
واش كلشي مفهووووووم؟
الكل : ياااس مون شاف
اسحاق : الغرف ديالكم غايكونو مختالطيين بحال البنات بحال دراري و من غدا غادي يجي لي يتكلف بالحلاقة موراها كل مجموعة غاتعرف القائد لي غايدربها و غدا كلشي يكون هنا مع ل5 نلقا شي حد تعطل مايلوم غير راسو الفطور غا يكون مع 8:00 و الغدا مع 2:00 و العشا مع 9:00 فكل وجبة عندكم 10 دقايق
دانيال : باقي عندكم شي سؤال؟
الكل : لا مون شاف
دانيال : يلاه تحركو لغرفكم
تفرقات جقلة و مشاو القياد و كل واحد مشا مع لصحاب لي تعرف عليهم باش يشاركو الغرفة اما ريماس بقات واقفة فبلاصتها دمها كايغلي على أسوار كيفاش صرفقها و حرقها و حتاقرها قدام كلشي مي ماشي هي لي تسكت على حقها غادي ترجعها ليه مي فالوقت المناسب ، بدات كاتقلب بعينيها على جاد ولا جهاد كلشي غابر لو الأثار .. شافت شحال من بنت كاينين تما .. ماكانش بزاف كانو 2 و هي تالتة هزات صاكها و توجهات لأول غرفة بانت لها .. كانت غرفة كبيرة على ديك لي كانت فيها فالمغرب و مختالفة ... فيها شرجم منين يذخل الهوا و 2 اسرة فيهم و كل واحد كايتكون من 3 طوابق و 3 خزانات كل وحدة مقسومة على 2 .. ختارت السرير لي جهة شرجم رتبات حوايجها فالخزانة عندها زهر كايهرس الحجر منين مازادش قلب فصاك حيت كون زاد قلب ماكانش غايتردد باش يوبخها .. رجعات سدات الباب حيدات سمطة ديال سروال لي كانت مخيطة معاها توب ديال جلد من لور على شكل جيب مسدود بدات كاتحيد الخياطة بزربة و جبدات الميكرو لي غاتبقا تتواصل بيه مع جهاد و بعض المعدات وحداخرين خبعاتهت فمكان أمن عاودات هزات صاك ديالها حيدات ليه جلدة تحتانية و الكاميرا لي على شكل كتاب و مقص حاد و الامبي طروا ديالها .. خبعاتهم حتى هما و خبعات الكارو و البريكة فخزانتها شوية سمعات دقان فالباب ناضت حلاتها و رجعات لبلاصتها كانو 6 ديال دراري ماستغرباتش حيت عارفا الغرف مخلطين ولا مشا شي واحد تطاول اكيد ماغاديش دوز ليه على خير
***** : أوو شوف شكون هنا
***** 2 : هههههه ماعرفتش فين كان عقل واليديها فاش سيفطوها
***** 3 : ( مشا وقف عليها ) نوضي نوضي الكتكوتة سيري للغرفة لي فيها صحاباتك ... شافت فيه و كملات اش كانت كادير
***** : لا حشومة خليها تونسنا .. شافت فيه بحدة خنزرات فيه شي تخنزيرات يا حفيض يا ستار
***** 4 : ايوا ماكرهناش مي الغرفة كاتهز غير 6
***** : وينو وينو المشيشة تعصبات
***** 2 : تكعدي من تم شوفي شي غرفة خرا
ريماس : ياكما هادي مكتوبة على سميتك و ماعندي خبار؟؟
***** : مابغيتيش تمشي ماعنديش مشكيل نشارك معاك سرير .. ماجا فين يكملها حتى لقاها ناضت من بلاصتها و شنقات عليه
ريماس : ( من تحت سنانها ) تزييد كلمة نخليك تحسب سنانك .. شنق عليها حتى هو و لوا لها يديها مع ديك تلوية ديال اليد دخل أسوار
أسوار : ( بالغوات ) اش وااااقع هنا ... طلق لها من يديها و بغا ينطق حتى جرو أسوار من الكول ديالو
أسوار : ( بحدة ) عندنا زريييبة هنا؟؟؟ واقيلا راه هضرنا قلنا ممنوع نلقا شي واحد حاكر على لاخر ( صرفقو ) هضرتنا زايدة ناقصة ياك؟ ( عاود صرفقو ) درتيها درتيها نديرو الافتتاح بيك تبعيني نتي .. جر هاداك فيدو اما ريماس تبسمات بخبث خلاتو حتى سبقها و ضارت لعند لاخرين
ريماس : ها واحد منكم مشا زيدو غلط واااحد معايا و غاتشوفو اش غايوقع مشات تبعاتو و هي مستغربة علاش طلبها
***** 2 : صدقات مطورة بنت الحرام
***** 3 : ماغاتبقاش فيها غير بلاتي لاماخليتهمش يطيروها من هنا
♚ في مكان اخر ♚
أرسلان : ( كايلعب بالخاتم فيديه ) كانسمع
أبراهام : الأخبار تقطعات من نهار قتلت ديك الجاسوسة كيف قلت لك شكي كان فمحلو ديك الجاسوسة كانت نفسها عميلة سرية
أرسلان : ( بهدوء تام ) يعني؟!
أبراهام : ( بتوتر ) يعني العميلة سرية لي قتلناها هي نفسها لي كان الميكرو فداخل ديالها ( عاقلين على الميكرو لي قلت لكم مغلف و داير بحال حبة روز؟ هو هاداك لي كان داخل سهام بدون ماتحس )
أرسلان : ( بهدوء ) عارف كانكره الغلط ياك؟
ابراهام : وي ميستر ارسلان ولكن ماكاين حتى غلط
أرسلان : دير خدمتك
أبراهام : ولكن كاينا شي حاجة مامفهوماش فالموضوع .. كيفاش العميلة نفسها هي الجاسوسة و هما فداك الوقت كانو كايهضرو على جاسوس اخر
أرسلان : كاتسولني على خدمتك؟!
أبراهام : حاشا ا سيدي
أرسلان : غدا نلقا الأمور رجعات لبلاصتها و الميكرو فبلاصتو .. قطع عليه
مالك : اش واقع؟؟؟
أبراهام : تخربقت مابقيت فاهم والو كيفاش ديك العاهرة هي نفسها الجاسوسة
مالك : ( رتب ليه على كتفو ) غير شوف كي تحل المشكل ، ماقلتيش ليا ماقالكش ميستر ارسلان فين هو دابا؟
أبراهام : راك عارفو كتر مني ماكايعلمش فين كايمشي و شنو كايدير المهم تهلا باقي عندي مايدار ...
---ها واحد اللغز تحل ماكانش نهائيا الجاسوس غير ظلمتو جاد و سي مصطفى .. عطيتكم تلميح مرة وحدة فالمعدات لي ذكرتها مي ركزتو على الجاسوس و نسيتو قضية الميكرو 😂 ---
صبح صباح جديد فاقت على إيقاعات دقان فالباب بجهد كاينوض الميت من القبر عاساك لي نعاسو خفيف بحال ريماس لي من اول دقة ناضت و بقات جالسة مدة فبلاصتها اصلا هي مانعساتش مزيان كي غادير تنعس و هي ناعسة فجحر ديال الأفاعي وسط ناس كانو سبابها فكلشي و وسط 5 ديال دراري لي اكيد غادي يكونو حاقدين عليها من مور ماتسببات فتبهدلة ولا اروع لصاحبهم و بسبتها فرقو اسوار عليهم ، حتى هي بهدلها مزيااان مي الفرق لي كاين هي بهدلها و ماكاين حد من غيرها و داك خونا لي كان باغي يتفرعن عليها و داك خونا تبهدل قدام صحابو كاملين .. شافت فساعة لي فالحيط كانت 4:40 تهزات من بلاصتها حلات الخزانة هزات فوطة و البذلة ديال تدريب لي عطاوهم البارح ، مشابهة شوية للبذلة لي كانت كاتلبس فالمغرب غير هادي فمقاس ريماس كانت عبارة على سروال زيتي و الفوقي ديالو حتى هو زيتي و بروطكال كحل و كاسكيط فزيتي .. هزات معاهم ديباردو نسائي فالبيض و ملابس داخلية مشات زربانة للطواليطات باش ماتلقاهمش عامرين تاني دوشات و لبساتهم خشات سروال فالبروطكال طوات اليدين ديال القميجة و خلاتها محلولة باين غير ديباردو لي لداخل كان مبين الانتاج الفائض لي عندها مي ماشي بطريقة معيقة جمعات شعرها شفنجة و دارت الكاسكيط كاتفكر غير فشنو دير مايمكنش تخليهم يقطعو لها شعرها تمووت و ماتقطعوش حيت هو ذكرى الوحيدة لي بقات لها من مها كاتتفكرها بيه و كيفاش كانت كاتعتاني ليها بيه و ضفرو لها .. خرجات من تما و رجعات للغرفة تحط حوايج الوسخ مالقات حد تما مشات لجهة شرجم شعلات كارو بالخف تكيفات على خاطرها شافت ساعة لقاتها 4:55 رمات الكارو و مشات للمطعم دخلات و هي مامسوقة لحد و كذلك حتى لي كانو تما كانو مشغولين بفطورهم ماعندهمش الوقت بزاف .. شربات كاس ديال القهوة بالواقفية و خرجات من تما قبل من كلشي مشات لبلاصتها فساحة لي ماكان فيها حد شوية بشوية بداو كايجيو واحد بواحد وصلات ل5:00 كان كلشي شاد بلاصتو لابسين لبسة موحدة جاو القياد وقفو فبلاصتهم المعتادة بداو اول حاجة بالنشيد الوطني الإسرائيلي بداو القياد هما اللولين عاد الجنود حيت ماحافضينوش .. بيان سيغ كان بالعبرية غير انا حطيتو لكم مترجم ، سالاو ضباط و بقاو الجنود موراهم كايعاودوه و حتى ريماس معاهم
طالما في القلب عمق
نفس يهودية تتوق
نحو الامام الى الشرق
عين الى صهيون تروق
لم يُفقد بعد الامل
امل الالفي عام
في العيش شعب حر
في ارض صهيون ويروشلايم
سالاو و بقاو كايترقبو بعينيهم واش شي واحد مالابس اللبسة ديالو ولا داير شي .. تحركو من بلايصهم و بقاو كايضورو بين صفوفة و حجبانهم 111 واحد من الجنود ماحس براسو حتى نزلات ليه ضربة نيشان للقرفادة تلفاتو
دانيال : ( بالغوات ) تقاد الكاسكيطة ولا نقاد لمك العنق؟
أديب : ( بإبتسامة ) هاي هاي على ست الحسن و شعورات مطلوقة لا لا مزيااان ا لالة جايا ديري عروض الازياء هنا؟ ( بالغوات ) و شدها من شعرها ..
أديب : ارا داك المقص غانفتتاح بيها نيت عاد نكمل بالباقي .. بقات كاتبكي و ترغب و تزاوك باش مايقطعش لها شعرها ماتسوقش لها نهائيا بل جمعو بيد و قطعو لها و لاحو قدامها ماشي ولات قرعة مي وصلو لها لحد الودنين طاحت منهارة و كاتبكي تحنا عندها شوية
أديب : جمعي خناينك و هاد زبل بغيتي رحمة كون بقيتي فداركم ... بقاو مكملين و تعاليق ماتسالاوش ها لي كايلقاوها محيدة القاميجة و عاقداها ها لي كايلقاوه محيدها من الاصل ها لي معوج الوقفة مهم اليوم كلشي كلا دق ريماس من هادشي كامل ماتسوقات لحد حتى حسات بشي حد جرها هز الكول ديالها
أسوار : لا حيديها نتي و هني راسك ا لالة ايفا ( بالغوات ) سدي هاد القلاوي و اخر مرة نلقاك حالاها ( ماتمشيوش غالطين و تحسبوه غار عليها حيت هادوك قوانين المقر القاميجة خاصها تتسد .. نطرات الكول من يديه
ريماس : ( بإبتسامة استهزاء ) ها هي غاتسدها .. بقا كايشوف فيها مدة و مشا يكمل شغلو .. سالاو و عاودو ذكروهم بالقوانين و دابا جا الوقت الحاسم كانو 2 صحاح هازين معدات الحلاقة عطاوهم للقياد و بقاو حتى هما هازين 2 ماكينات بداو من صف لول كلشي حيدو لو شعر ماشي قرعوه مي دارو لهم تحسينة رجالية تفرقو على صفوف و اسوار شد 2 صفوفة .. الصف اللول قرب يتسالا و نوبة ديال ريماس غادا و كاتقرب بقاو 2 دراري و بنت و غاتجي نوبتها كرشها ضراتها بقوة لي فكرات فشعرها لي غادي تترزا فيه تا هو بسبابهم .. دازو دوك 2 دراري و بقات غير بنت ، حط الماكينة و هز المقص شد لها شعرها بيد و يد كايقطع لها بيها شعر ماكملش دقائق حتى كان سالا و ها هي اللحظة الحاسمة جات نوبة ريماس شاف فيها بشوفات شرانية و عيط لها
اسوار : إيفا ماغاتجيش؟ .. شافت فيه و غمضات عينيها و زيرات على يديها ... يتبع