انا عيناك وطني

25..24 ماقبل الاخييررر

.....البارت الرابع والعشرون....

سمعت  صوت اسد  وهو يكلي
....لازم وصلج المسج مالتي يامرت الغالي

بقيت ساكته وماحجيت
ومارديت شي ورجعت خطوه ليوره ونطخيت بقيس
وهو بسرعه حط يده على جتفي
واليد الثانيه  حطها بنطرونه
اسد كال لقيس

......اخر الاحزان ان شاء
....نشكرك
.....قيس محتاج شي
.....تعرفني احتاج شي يااسد
مجاوب اسد وسلم ودار وجه واجتي مرته وبيبيته ومرته اجتي وكفت كدامنه
وعيونها تاكلنه اكل وكالت
.....البقيه بحياتك قيس
مجاوبها
قرب وجه مني وباسني من راسي وكال
....حياتج الباقيه مرت الغالي

مشت بسرعه وطلعت بره
نزل قيس يده

وراح دخل جوه بدون مايحجي
شي
خالتي واكفه بعيد عد اشرتلي تعاي
رحت يمها وكفت وكالت

....هاي شنو هذا قيس يمه يخوف اليوم شبي

.....اي اليوم مكسور كلش هاي من يحزن هيج يتعامل
....راح تبقين يمه لولا
.....لا اروح شسوي باقيه هنا

....روحي حبيبتي ابقى يمه هوني عليه خطيه
....احسه ميريدني

....يريدج شلون ميريدج هسه محتاجج انتي موكلتي
بعدج مرته
....اي

.....روحي خاله خطيه تره مبين تعبان

....مااعرف شسوي خاله
.....شسوين تروحين دخلين لبيتج وتنتظري يجي
....لا خاله شلون اسوي هيج ماعندي كرامه

.....وتالي وياج تنين على كولت بيبيتج فضينه يله
تروحين لولا

التافيت وشفته طلع وكف يباوعلي
خالتي كالت

....باعي شلون ديباوعج دروحي تره يحقد عليج اذا مابقيتي هسه وياه هسه هو بحاجتج
مشيت ورحت وكفت يمه
.....تريدين تروحين

....تريد ابقى محتاجني
....بيش يعني احتاجج
...سئلتك الك

...لا مامحتاج شي
....لعد اروح اني

مجاوبني وبقى ساكت وعبالك موقيس الحزن كاسره
من جوه
والتعب مبين بعيونه

درت وجهي ومشيت وخالتي تاشرلي رجعي
وتغمني

رديت رجعت وكفت يمه
كتله
.....خاله تعبانه كلش راح ابقى يمها اليوم
مجاوبني ومشى وراح للبيت مالتنه
رحت بسرعه على خالتي
كتلها

....خاله راح ابقى بس انتي شلون
...هسه اخذ تكسي واروح
...شلون وحدج ودنيا ليل

....عود خلي يغتصبوني دروحي يمه شكو عليه
قابل اني بنت اليوم روحي روحي يله

مشيت ودخلت من الباب الي بالحديقه
ودخلت وسديت الباب الي بينه
ورحت دخلت جوه

وسديت باب البيت
ورايه مشيت للغرفه مجان قيس موجود

رحت للهول جان كاعد وديشرب جكاير
ويحرك برجله مثل الواحد  لمن يتوتر

رفع عينه عليه ورجع شرب من الجكاير وطفاها بالنفاضه
وكام وكف وكام يروح ويجي
رحت كمشت وكتله

.....راح ادوخ كافي انت مريض ليش هيج تسوي
....تعبان تعبان ياالله ليش ديصير هيج بيه
وكعد على التخم بسرعه

....لتسوي هيج كول الحمدلله
....مابيه صبر بعد مابيه مليت

اشعر بكتمه بداخلي وديضيق النفس بصدري
ودطير راحتي وسعادتي

الكل عبالهم اني سعيد ومرتاح
واني زين بس اني بداخلي يتوجع
احس عبالك دانهار من جوه

قربت  راسه وحطيته على صدري وبقيت العب بشعره
حسيت هدئ
ونفسه استقر

مجربه هذا الشعور من الانسان يحس انو الحزن يستعمر

قلبه
ونشكي ونبجي ونريد الله بس يجبر بخاطرنه
ونضحك ومن جوانه يصرخ

كامت دموعي  تنزل سكته

لان الي ديعشه قيس اني عشته من فقدت امي
وفقدت اختي وابويه

يلوموني ويكولولي صرتي بارده

ويلوموني من قبل ويكولولي عايشه دور الصعبه
وماسئلو نفسهم ليش هيج صرت

شنو الي انكسر جوايه وخلاني هيج
شنو الي موت الشعور بيه

وخلاني بارده

لو اسئل اي شخص واكله من ماتت امك
شنو حسيت يمكن مرح يعرف يجاوب

بس من راح اسئله واكله من ماتت امك واختك وابوك
شنو جان شعورك

ياترى شنو راح تكون ردت فعله

يلوموني الي وميفكرون بيه

لامني قيس بس اعتقد هسه ديحس بلي حسيته والي مازلت احسه كلمات انجمعت بداخلي وردت اكولها لقيس

....نادين

.....ليش بقيتي
....ماردتك تبقى وحدك ولان حسيت بلي دتعيشه
وهسه انت حسيت بلي اني عشته

حزني جان اضعاف حزنك
سكت

وشويه وخر من عندي وكال

....اريد انام تعبان وياريت انام وبعد مااكعد
كلشي حواليه ديوجعني

وباوعني وبنظرته عرفته يقصدني اني من ضمن الاشياء الحواليه الي دتوجعه
راح للغرفه وسد الباب

حسيت بأنو هذا تنازل مني ويمكن راح يحسس قيس بأنو هو مكسور

واني داقدمله يد العون مثل ماحس
من فقد نظره وحس بالظلام الي ملئ قلبه
قيس من الاشخاص الي تعزعليه نفسه

قيس انسان مامر عليه ولا راح يمر عليه واحد مثله

قيس مثل الشظايا الي تدخل لمكان خطر
اذا بقت مااثرت  في اغلب الاحيان واذا طلعنها منه كتلتنه
قيس اوصفه  بأنو هو رصاصه
تخترق كلشي

وماعرفت شنواسوي كعدت شويه وبعدها
رحت للمطبخ  وسويت كوبين حليب 

ورحت فتحت الباب مال غرفه على كيفي
ومثل متوقعت قيس منايم كاعد

من سمع صوت الباب التاف عليه وشاف بيدي
الكوابه  ورد اندار

رحت يمه وانطيته الكوب
اخذه مني وحطه على الكومدي
الي يم راسه

ونزل رجله من الجربايه
وبقى صافن

رحت جريت الطبله الصغيره وكعدت عليها وصرت كدامه

وكمت اشرب الحليب على كيفي وبدون صوت
برغم حرارته بس حسيت مداحس بالحراره
وعيوني مصوبه على قيس واني داحس اكو نار بداخله
وكل هذا وهو ديكتم
شعور العجز الي ديتملكه

داحس بهاي الحظه انو قيس عاجز حتى على انو يشرح هو شنو بي
وليش عاجز وشنو مشكلته
قيس مديعرف حتى يعبر عن حزنه
وهذا الشيء مؤذي

اني عبرت عن حزني بنومي وبأني طلعت من العالم كله
وماعدت افرق بين احد لحد ماسترديت نفسي
بس قيس ديعبر عن حزنه بقوته

وتذكرت ابو قيس من كال اني مطمن على ام قيس
واخوان قيس اذا متت لان قيس موجود
واظاهر هو ميريد اخوانه يشوفو ضعيف
يريد يبقى هو السند والظهر الهم

صحته بصوت ناصي
...قيس اشرب حليبك برد

هز راسه واخذه وشرب منه شويه ورجعه بمكانه
....نادين
...نعم

....ماكو داعي تبقين وضغطين على نفسج

....ومنو كلك داضغط على نفسي  انت وكفت ويايه من جنت محتاجتك معقوله مااكون وياك من هسه انت بهذا الوضع

.....ها يعني مثل الخدمات المتبادله
...لا بس داكلك انو انت سويتلي اشياء هوايه
قبل واني هسه اجيت لانك كنت واكف لجانبي
....ها

وكف ونزع بنطرونه ولبس شورت كصير
وبقى بالفانيله
وجر الغطه من الجربايه
ونام على الجربايه وتغطه
ودار وجه عني

بقيت اباوعه وراها كمت لملمت ملابسه

واخذت الكوابه مال حليب للمطبخ ودخلت للحمام
غسلت وهدومي جانت وصخه
وعندي هدوم هنا

رحت من الكنتور اخذتلي
بجامه ورحت بدلتها بالحمام

ودك تلفوني وخابرتني بيبيتي وطلعت للمطبخ احجي وياها
وظلت تعدلي وصفلي

شلون بقيتي انتي شنو  هسه يكولون هاي محد كامشها
حاولت احجي وياها بس منطتني مجال
عد كتلها باجر اجي الصبح ونحجي عود

وبطلعتي من المطبخ جان واكف قيس اظاهر جان ديسمع الكلام بس من باوعته مباوعني
ولااهتم دخل للمطبخ اخذ كلاص مي وشرب ادويه جانت على الكاونتر
ورد طلع

راح للغرفه وسد الباب

واني رحت للهول نمت على القنفه وماخذتني النومه
ماحسيت الاالصبح
جوه راسي مخده ومتغطيه بطانيه

كمت كعدت ورتبت الفراش ورحت للغرفه  وشفت قيس ماكو باوعت الساعه جانت ساعه باال8
كلت اكيد طالع اليوم الثالث

رحت طلعتلي نفنوف طويل اسود وردانه طويله
ولفيت الشال

   وداروح لبيت اهل قيس بس بطلعتي

باوعت كومه رياجيل  بالحديقه وجدوره كبار مال طبخ
كلت هاي شلون راح ادخل بنصهم
كمت طلعت من الباب مال شارع
ومن داطلع صار قيس بوجهي

بسرعه اجى عليه

....شكو
....داروح لبيت اهلك
....موامه الاسلام واكفه عدلي الربطه مالتج

ونزلي عينج بالكاع لان هذوله اصدقائي بالدوام

كمش يدي وسد الباب ومشاني دخلني بيت اهله وراح
رحت كعدت يم ام قيس وبقت تحجي وتدعي
واني ابجي هي تحزن على رجلها واني حزني على هوايه
لان هوايه نامولي جوه التراب
هوايه اعزاز  راحولي

واليوم جانو النسوان هوايه

كمت ويالنسوان اساعد واشيل واخلي واخوان قيس كل شويه رايدين شي
وصارو ولد يدخلون للمطبخ
شوف شيحتاجون
وقيس اجى

شاف ابن خالته بالمطبخ يمنه يشرب جاي
باوع وراح بس حسيته ضاج

ورجعت رحت كعدت يم النسوان
وجان اشوف صباح عيونها مورمه وبلا مكياج ماتتباوع اثاري المكياج ساتر عليها
باوعتني وجان تصيحني
.....نادين

وحده من الكاعدين كالت للي كاعده بصفها هذني ضراير
هذيج الجبيره على صباح
حسيت كل الموجودين ديباوعلي بنطرات محلوة

كمت رحت للغرفه الي جوه ولحكتني
صباح

....خير شكو
....شكو باقيه هنا
....انتي شعليج

.......شوكت اخلص من وجهج الفكر
....استغفرالله تره داسكتلج هوايه لتخليني اخلي عقلي وياج
....مدكدرين

....صباح احترمي نفسج وعوفيني بحالي روحي منا
....اني ماريدج هنا سمعتي اكرهج مااريد اشوفج
.....واني ميته على شوفتج على الاساس

.....تروحين لولا

.....اي اروح من يكلي قيس.روحي
فروحي كوليله. اريد نادين تروح من البيت اذا قبل
عود اروح زين

وتركتها وطلعت من الغرفه

وبقيت افتر منا ومنا واشيل واحط واسلم على فلان وام قيس كل شويه صايحتني وكايله تعاي
ويسئلوها هاي منو

دكللهم مرت قيس وصباح تغلي
اخر شي اجتي بيبيتها

ام ابوها وكامن يشمرن بالحجي وام قيس
تباوع
اخر شي طكت روحي
كمت رحت
كعدت بالمطبخ وبقيت احجي وياه
مرت اخو قيس وكتلها على صباح وتخبلت
عد لمن دخل قيس راحت كلتله
محجى شي بس بقى

يهز براسه

وخلص هذا اليوم هو مليان تعب  وحزن وحجي
فارغ وناس   عبالك نحسهم شمتانين حتى بالميت
وناس كأنما اجايه سفره مو فاتحه

وناس قلبها ملجوم

واليوم اغلب الي جانو موجودين راحو

بس الي استغربت منه انو عمته لقيس الي استضافتنا بيتها
مااجتي ومااعرف شنو السببب
واني ماكدرت اسئل

ويااخر ناس راحو وطلعو من الباب
صاحني قيس
رحتله

....ها قيس
....شكو شصار
....مصار شي
....لعد شبيها صباح
...ماكوشي

صراحه ماردت ازيدها عليه
خطيه وهو هم جان يحجي ويايه من ورا خشمه
ومتنك

عد دخل للمطبخ وصاح مرت اخو
سئلها
كالتله هيج وهيج كاعده تحجي كدام النسوان وصباح خزتنه مابقتلنه مي وجه

....وينها الغضب الي حل على راسي صيحوها
صاحتها مرت اخو واجتي

ودقايق وجتي صباح وياها بيبيتها
اتجتف قيس
وكال

.....من شوكت احنا نحجي اسرار بيتنا كدام الناس
ها

....ماحجيت شي والي وصلك الكلام كذاب وكامت تباوع عليه
...والله محد غيرج كذاب هنا ومنافق وحقير كل هاي الصفات بيج انتي
وهسه راح تروحين ويابيبيتج
وابن اخويه يبقى هنا
انتي موام براسها حظ

حتى نأمنج على طفل انسانه
مريضه ولسانج قذر قبل جنت احترمج واسكت عن سخافتج لخاطر اخويه
وبعدها لخاطر ابويه وهسه بعد

ماكو شي يجبرني اتحمل هاي السخافه اخذي بيبيتج بيدج وطلعي
واياج

اشوفج هنا وابنج تشوفي كلما اني اقرر
ولحد يوصل لباب بيتي لامن قريب ولامن عرف
....قيس اسمعني الله يخليك

....كلمه وحده مااسمع ولج اني ابويه ميت وحلكي مليان دم
وكاعده تنهشين بلحمي كدام الناس
ماعندج اخلاق ماتستحين

....اسمعني اني ماجبت طاريك حجيت على هاي
واشرت عليه

...وبااي حق تحجين عليها ولج انتي منو فد طنطانه
فد ذبانه كاعده تتمندلين بالبيت ومسويتلي روحج رجال
على نسوان البيت شنو
كمشت يده

...اخذ ابني ويايه
...ابد
....فدوة الله يخليك
...انتهى الكلام

وتركها وراح دخل جوه
صراحه انقهرت عليها لان الي مثلها مخبله متعرف تصرف

ومرات الحب يعمي الانسان
واذا هي فعلا تحب قيس فمعناتها

كل تصرفاتها تكون تحت مبدأ احبك وانت الي
لهذا السبب حزنت عليها ودرت وجهي
ودخلت جوه وقيس كاعد جان يم امه ويدخن
ويحجي بعصبيه وامه ساكته
ومجاوب

وباوعت عليه واني رحت كعدت على الدرج
واباوعه شلون يحجي

كلت هسه راح يصير بي شي
لان وجه صار احمر
ويده كامت ترجف

ويكللها لاامه كافي اضغطون عليه حسو بيه
حسو بيه الله يخليكم
شمر الجكاره وكام طلع

لحكته وهو دخل للبيت

اول مشافني جان يجر السويج مال السياره
وكال
....يله امشي اوصلج
ماكلتله لا

طلعت وياه وصعدت بالسياره
وصلني لحد بيت بيبيتي
وبدون اي كلمه نزلت

ومن دخلت بيبيتي
استلمتني خوش استلام
واني تركتها تحجي ورحت نمت

وثاني يوم ردت اخابر المحاميه بس ماكدرت اكو شي منعني
من انو اخابر

وبقيت كم يوم مااعرف شي عن قيس بس تفكيري بسالفته هو واسد دمرني

وردت اعرف شنو بينهم
بس ماعرف شنو الخطوه الي لازم اخطيها وخايفه كلش
من الي راح يصدمني
....نادين

....ها خاله
...ها خاله
....تعاي اكلي
....مااشتهي

....تعاي على الواهس ناكل

رحت كعدت واكلت شويه وسحبت نفسي بعيد
بيبيتي اليوم جانت ماموجوده طالعه

....شبيج نادين
....ميت فكره براسي خاله وضايجه
...علمود قيس
...اي

،....تعرفين متغير عن هذيج الفتره
...اي خاله هاي من سافرت اني وصار وياه الحادث
هيج صار

....بس يولي حلو يخبل ههههه
......ميله ههههه

....يمه منج من هذا عيونج تاكله اكل
..اني
...لاابويه لعد
...هههه

...ضحكي يمه يستاهل قيوس
...شسوي خاله من ضيمي

....اي ولج صدك غبره  انتي اكوم والبس واخابره
واجيبه واحرك دمه
....وشكله من يجي

...انتو مو تريدون تطلكون كوليله شوكت نخلص الاجراءات
اني اريد اسافر لان

...لا
....لعد ظلي هيج كاعده تندبين بحظج
.....مادري خاف يكولي اي

...شوفي اذا كلج اي معناته هذا بايع السالفه واني اكلج ميفيدج

خلي يروح لحاله وانتي هم روحي لحال سبيلج وفضت راحت
....يعني شسوي هسه

....يبووو على راسي خابري وكوليله اريد احجي وياك
كمت جبت تلفوني واجيت كعدت بصف خالتي
وخابرت  بقى يدك وين يله جاوب

..الو
من سمعت صوته كلبي نفض
...الوو
..هلا
..هلو قيس
....هلا
....اني اريد احجي وياك بموضوع
....بخصوص

خالتي اشرتلي يعني كوليله اشوفك
...وينج
...وياك
....افضل نتشاوف ونحجي
....اوكي
...شوكت
....بكيفج

...اليوم
....بكيفج
...شوكت

....بكيفج
....فد بالسته تجيلي انت بالبيت لو شنو
...بكيفج

....استغفرالله يله اني راح اتحضر
وانت فد بالسته تعال تمام
...زين

وسد التلفون خالتي كامت تضحك واني كلش ضجت

....شفتي خاله اشو هذا كظاها يكلي بكيفج بكيفج بكيفج
شنو السالفه
....ديبيع ثكل عليج

....خاله عفيه تره اني داتنازل هوايه 

....انتي تنازلتي شوكت من رحتيله وابو ميت وهو باامس الحاجه الج

لو من تركتي ورحتي سافرتي

هو الي هوايه تنازل الج بس انتي غبيه ماعرفتي تستغلين
الفرص وتخلي
يمج ومايكدر يغمض عينه دقيقه خاف مايشوفج
....هسه شسوي

....انتي هم مثله هو لطش بكيفج بكيفج
وانتي لطشتي شسوي شسوي
دروحي لج اروح انام

وانتي شوفي شسوين موراح يجيج بالسته
روحي شويه لعبي بجهرتج
.
وتركتني وراحت نامت واني بقيت كاعده اكلب بالتلفون
ودخلت على بيج مال ملابس شفت ملابس عجبتني

دخلت حجيت وياهم وكالو عدنه توصيل

كتلهم دكدرون هسه اجيبون الملابس

كالو اي ماكو مشكله منا لساعه الملابس توصلج
فرحت لان ملابسي كلها بالبيت ومجايبه غير كم قطعه
واني اختاريت فستان طويل اسود

وفوكاه ليلك يصير جلد وبي  كلاو
وبي فصوص ناعمه بلااطراف
لونه جوزي طوخ

بقيت مثل الجهال الي ديشترون ملابس مال عيد بقيت
كاعده انتظر الملابس وصدك والله ورا ساعه خابروني
ودليتهم البيت
وصلو للبيت

طلعت انطيتهم

الفلوس وماقبل السايق ينتظرني اكدر الملابس
اخذتهن وكلت هنا لو مشمورات لو ملبوسات
دخلت جوه ورحت غسلت ونشفت شعري

وخليت  مكياج
ومن طبعي مااحب المكياج الطوخ
بس احب ارسم عيوني بس اكيد مومثل ام فجوج
يعني احب الشي الحلو والطبيعي
نفس الوقت
وحطيت حمره طوخ ماعرف ليش عجبني

صراحه مو علمود قيس مثل مكالت خالتي بس كلما اوكف كدام المرايه

احس الاهتمام بشكلي
ينطيني ثقه بالنفس يخلي عندي شعور حلو
لهذا السبب حبيت اعتني بنفسي

لان باقي الايام مكانت اكو طلعه او شي

بس اليوم راح اطلع وحبيت اضيف لنفسي لمسه
مختلفه
بعد ماكملت مكياجي
لبست الملابس الي اشتريتهن

حسيت شويه النفوف ضيق مو كلش شويه بس كلش حلو ولبست ويا حذاء عالي كالعاده
لان اني موكلش طويله

واحب الكعب العالي احسه يضيف اناقه للمراة
كملت ورحت على خالتي
خالتي فتحت حلكها

....الرحمن يحفظج اويلي عليك قيس هي تك عين
شيباوع بيها ولا شيباوع هههه
...خوما عيب

...ليش عيب
...يعني علمود وفاة ابو

...صارله كم يوم من مات الرجال والله يرحمه وملابسه الوان انتي اسود وجوزي طوخ

....يله شسوي شيصير. خلي يصير
...اي يمعوده دذبيها على الساطور
...هههه من زمان ذابتها اني

بقيت اسولف وياخالتي لحد ماسمعت هورن
كمت و سلمت على خالتي وشلت الجنطه مالتي
وطلعت فتحت الباب وطلعت بسرعه وصعدت بصفه
...هلو قيس

باوعته وجه مبهوت ومجاوب
....هاي شنو
...شكو

...اشتعل جدج على هاي الدكه
....شكو

....هاي شنو عيني ماشفتي الخلفيه الحضاريه
لولا
...ياخلفيه
....مال جدي غير
....نزلي

...ماانزل
...كتلج نزلي بدلي ملابسج
....انزل بس ماابدل ملابسي
....اللهم مطولج ياروح
شغل السياره وكام يسوق سريع وشفته ديسوق بااتجاه بيت اهله

...هاي وين للبيت
...ليش
...لعد وين تريدين تروحين
...لااي مكان
....اي هيج

...شبيه هيج اني طول عمري هذا لبسي
....اي عيني عند اهلج موعندي
...اها

...اي
سكتت و تندمت  لان
سمعت كلام خالتي لو مامقلله
من نفسي هيج  وكاعده ومحترمه نفسي احسن
وصل للبيت ودخل السياره للكراج
ونزل ودخل جوه قبلي واني مانزلت
بقيت كاعده

رجع طلع
واجى فتح الباب
...شدتنتظرين

...اريد ارجع
...نزلي نادين
...ماانزل
...نزلي نادين
....كتلك ماانزل
...زين لعد

كمشني من يدي وجرني حيل ودخلني جوه
....عوفني شدسوي  شو انت متوحش

... متوحش فعلا اني متوحش وراح اشوفج
شلون حركتي الوحش الساكن بيه
نزع بنطرونه وقميصه

وشمرهن واني ركضت وكفت يم الشباك مال الغرفه
وامشي واحجي على خالتي
كومه غلطت عليها

صعد على الجربايه
وكمز ونزل وكف كدامي

....لعد ليش لابسه هيج غير تريدين ثيريني
تريد تخبليني تريد اطيرين برج من راسي
انتي بعرسج ماتمكيجتي هذا المكياج

خالتلي حمره وشفايفج ماخذه وضعيه بوسني
وتريدني اطلعج ويتفرجون عليج

واني شنو رجال رويح عود
افرج مرتي للناس

...اني مااحب هاي غيرتك انت تخنك

...يايمه خنكتج هو انتي شيكمشج عيارج فالت
خنكتني

كظيتها ملعبتني الفار والبزون

ولج اتعوذت من الشيطان وعفتج
مخابرتني انتي

والله تعال اريد احجي

وياك ولابسه هيج ماشفتي شلون ضيق عليج
والشعر طولان

والعيون مجروره
والحمره لاحول ولاقوه الابالل
وتريدني شنو اعقل

لج خبلتيني موتيني
قحط نسوان بس شسوي
هذا كلبي قافل عليج
ضحكت
....اشتعلو شوف شلون تضحك داهرني واني دمي محترك
تعبت خلي اكعد

وراح كعد
....اي كوليلي شتريدين تحجين
...شوكت نطلك

...مواكلج متصيرلج جاره
...انت ردت

...وهسه تراجعت
....يعني
....يعني هسه مو وكته يعني حسي بيه يعني اني يمج بس ارتاح يعني اني كلبي ينزف يمج
ويصخر يم غيرج

اني تعبان والدنيا طالعه من عيني
اريد اهج من الدنيا كلها
بس اريدج انتي

...قيس اريد اسئلك شي وصير ويايه صريح
....شنو

.....شنو الي بينك وبين اسد
...هم رجعنه

وكام راح اخد باكيت الجكاير
واخذ منه جكاره وشعلها وكام يدخن
...قيس كلي

...الي بيني وبينه جبير

....شلون تكرها بس اجامله وتحجي وياه
...تعرفين منو الي كمز على بيتج
....منو
....ضرغام تذكري الي اجى للبيت عليه وسحبت عليه سلاح وهو هم

اذكرته واذكرت اسد من كلي وصلج المسج بس ماكلت لقيس

رد كال
....تعرفين وينه هسه ضرغام
....وينه

...سجنته محتاجيت اكثر من كم تلفون
والي مساعدته

مرت ابوج ابتهال لان اسد قبل فتره كام يحاول ويا مرت ابوج. لحد ماصارت بيهن علاقه طبعا عرف هي الرابط الي بينكم

لهذا السبب كام يصرف عليها ويطلع وياها
وشسوه سوه وياها علاقه وصورها فيديو
وهذا الفيديو دزه لاابوج
بس مخال نفسه يبين بي

حطيت يدي على كلبي واذكرت ابويه شلون جان يحجي عليها اخر مره وشون جان كال ماادري شلون اخلص منها
بس شنو الي خله ابويه ميطلكها بساعتها

... شمدريك بالفيديو
ضحك وكال
...قابل اني العب

كعدت على الجربايه وكتله
....يعني اسد هو دزه
...اي هو

...وانت
...... اني كلشي اعرف بس الي مثل اسد صعب يوكع ومااريد ابين اله
انو اني اريد أذي حتى ليحذر مني اسد كل ظنا

انو اني اخاف منه لان اسد مو بس ابن شيخ اسد عنده فلوس وعلاقات

وعنده اشخاص يفدو بدمهم

ويمكن اني بفترة من الفترات جنت مستعد اقتل وانقتل لخاطره

وفتره راد يزوجني اخته بس اني اجنبت الموضوع ماردت اخرب علاقتي بي
واسد حماني من الموت

لهذا السبب جنت صابر عليه هوايه
والي غيره معرفته بعلاقتي بمرته سابقا طبعا
بس اسد طلع نذل كام يفتر من ورا ظهري

ويسوي افلام
انتظرته يجي يواجهني بس هو ماواجهني

وهوايه سوالي مشاكل اسد انسان انتقامي بشكل مرات يكون مخيف جدا

...واني شنو دخلي بهذا كله
...انتي بالنسبه  لشخص مثل اسد

.....................................
مشاعري أنا
كالجنح المكسور كالطير
المذبوح كالصوت المبحوح

كالوطن المغدور

كالمرأة الخائنة وكالرجل

المكسور  وهو
زجاجي المحطم

ونافذتي المطله
على ضفاف نهري

هو دجلتي وفراتي
وهو قوتي وقت
انكسار ذاتي

يتبع...

#الكاتبه #روجمان

اذا كدرت اختم القصه بعد بارتين
تحياتي

.....البارت الخامس والعشرون....

واني شنو دخلي بهذا كله
...انتي بالنسبه  لشخص مثل اسد

شي نظيف وشي مختلف من كثرت القذارة الي شافها
بحياته  لهذا يريدج وخلاج هدف

....يعني شنو تقصد

....يصعب عليه اكلج هو عينه منج وديحاول بكل الطرق يبعدني
عنج وعرف انتي نقطه ضعفي وديحاول يوصلج
حتى لوكانت هاي الطريقه مؤذيه

....شلون يعني

....يعني هسه هوايه حجيتي بهاي الحمره الي حاطتها بحلكج

...شنو الي غثك  بالحمره وشي ثاني احنا مو دنحجي بغير شي
وداحجي بشي مهم

...شوفي اول

شي اني الي يباوعلج بنظره وحده ماحلوه  اكسر
راسه ومايكفيني بي دمه

بس اذا دتردين واسئلين سبب سكوتي عن تصرفات اسد
فراح يكون جوابي انو

اني ماساكت الا ومابقى شي وينتهي شي اسمه اسد
ويمكن لو احجيلج على اسد والاشياء الي بينه
راح تعبين هوايه  وراح تفكيرين هوايه هم واني ماريدج تقلقين

بس راح اكلج لتشيلين هم شي ولتفكرين زايد اني اريدج اضحكين اريدج تحبيني وبس وباقي الامور اني احلها
مهما كانت

.....مااحسك عنيف ليش دتبينلي هيج
ابتسم ومد يده

وجرني يمه
.....اني عنيف ومو عنيف
...هاي شنو

....باعي قبل ماادخل الكليه العسكريه جنت كلش خواف
بحيث اخاف اطلع وحدي

وعندي صديق واحد

لو اطلع احجي وياه شويه لو اصلا مااطلع

الكل كالولي ميصير هيج انت كبرت
عيب بس اني ماكدرت اكسر الحاجز النفسي الا من دخلت كليه عسكرية

لان الكليه العسكريه شي كلش متعب وصعب

ومتعرفين شلون جانو يدربونه مرات يجي المسؤول عنه يذب علينه مي احنا نايمين

لو اذا يريدون يكعدونه يكومون يضربون طلقات
واحنا نكوم نطافر

وعدنه وقت لازم نرتب فراشنه ونزين لحيتنا

ونلبس ولازم نستعد وتدريبنا

كلش متعب منشوف اهلنه كلش قليل
وجانو هوايه يسولنه اشياء ماتنحجي
هنا اني تحولت وصرت قيس الذيب
كامو يصيحوني اصدقائي

الذيب  كمت مااخاف وكلبي مات ومايهمني شي

ومن بعد ماتخرجت بدأت  مسيرتي
مابقت محافظه بالعراق مارحتها
وبكل محافظه تعرفتلي

على اشخاص اسد تعرفت عليه
من جان بالانبار
وبالبدايه حبني

فعلا واني هم حبيته بس كلشي تغير من قبل ماتظهرين انتي
بكم يوم ومن ظهرتي انتي اسد تخبل
وصار تحدي بينه بالنظرات

بلا كلام أما ظهورج بحياتي خربطلي كلشي
حتى صباح صح ماكانت تربطني بيها علاقه

زوجيه بس جنت راضي بقائها على حالها بس

علمودج انتي كمت اكره اباوع بوجهها لان احس انتي راح ترفضين كلشي بسببها

وضميت عليج موضوع زواجي منها والي ساعد
اكثر
انو زواجنا مجان طبيعي جانت ظروفج متسمحلج
انو دققين بشي
جنتي بدنيا ثانيه

واني اعترف انو استغليت هذا الوضع

.....ليش هيج سويت وتحديتني
....بشنو
....من البدايه كلتلي حتى لو اخطبج واعوفج والا
اخليج تحبيني

وكل هاي الامور خلتني اصدك انو اني  فعلا رهان
بين صديقين

......شوفي اول ماشفتج بالحفله نعجبت بيج
حسيتج مميزه

حبيت اتعرف عليج بس جان مبين عليج انتي
كلش خشمج عالي ومتتحجين

بس اني خليتج بالي بعد
اما موضوع السبحه اني كتلج عليه سابقا السبحه كانت يمي

وكعت من ساعدتج
بس هي صارت بوقتها مثل الحرشه

واني بوقتها سولفت لااسد عنج لان هو كان صديقي
وكلتله بنيه عجبتني

بالحفله وبقت سبحتك يمها
بوقتها ضحك

يس هو استغل هذا الموقف لصالحه بسبب معرفته بهذا الامر من البدايه

وحطله خطه وكام يمشي عليها
وحب يضرب عصفورين بحجر

ينتقم من مرته  اول شي
....من مرته

....اي اكيد
لان لاعبالج يحبها لان لو يحبها بكد الشعرايه ميخليها تحجي وياج هيج

ولاكان هي كدرت تحجي
لان جان خافت بس هو منطيها الضوه الاخضر
وعلى هذا الاساس هي تصرفت

والشي الثاني ينتقم مني وياخذج انتي فوك البيعه
واحد  نذل وتفكيره قذر
ومتعرفين كم شغله بشغله سوالي وكم مشكله واني جنت انطي فرص

.....يعني هذا عنده استعداد كلشي يسوي
....كلشي يسوي وكلشي اتوقعي
منه لهذا السبب اني اتعامل وياه بحذر

....هذا شنو
...لعد شعبالج الناس مومثل متبين
هوايه من الناس صارت وجوهم خداعه
وجوهم اقنعه
يعني قناع تحت قناع
....وشراح يصير

.....اني راح اغيب فتره
....وين تروح
....عندي شغل
....يخص منو

....لدوخين نفسج هي تخلص

....شلون ماادوخ نفسي واني تعرضت للخطر بسبب واحد مثل اسد

...اعرف واني راح احل كلشي واضملج انو محد بعد يتعرضلج
....زين

كمت وكفت
.....وين تروحين
....رجعني لبيت بيبيتي

....لج شوكت تبطلين العناد

....اني ابطل العناد لو انت الي موصريح
....ههههه لالا لهنا واوكفي اني مو صريح
لج انتي منا لهنا تكذبين
،....اني موكذابه
....لاكذابه ونص

....اني اذا مااحجي مومعناتها كذابه
.....لعد معناتها شنو من متحجين الحقيقه

نادين اني اريدج تكونين صريحه تحت اي ظرف بالذات بالامور
الي اول وتالي تنعرف

انتي بشنو اسئلج تكذبين بي وكل شويه واكتشف شغله جديده تخبلت

صعب على الرجال من مايعرف مرته
زين ويكتشف عنها اشياء هذا الي جان يصير ويايه
....جنت اخاف اكلك

....انتي متخافين نادين انتي قويه وعندج جرأة
وهذا الي حبيته بيج

بس انتي تكذبين وهذا الشي محلو
اني اخاف اذا هسه سامحتج
ارد واكتشف شي ثاني عنج

...ماعندي شي مضموم بعد سراج  وكتلك عنه وفيديو اختي وشفته
...اي عفيه عليج انتي شسويتي من شفتي الفيديو
....خابرت اسد
فتح عيونه
....اي
...وحجيت وياه
...وشكال

...كال لو انتي لو اختج
.....ليش ماخابرتيني
....خابرتك بس انت مسمعت مني
....طبعا من ورا سوالفج  تعرفين شكلي اسد
ولامااكلج احسن

....اوف كافي اني ماعندي شي ضامته عنك

وكافي عد
انت حجيت واني حجيت بس اني وياك  مانرهم واحد على الثاني
انت مختلف عني بكلشي
...اها مختلف

....اي مختلف وانسان متعجرف وقاسي والدليل
منطيتني مجال احجي وياك ورحت للمحكمه
ورفعت عليه قضيه

....لواريد اطلكج مااباوع بوجهج مره ثانيه
واهتملج

ولو مفكر للحظه انج راح اطلعين خلص من حياتي تعتقدين
راح اجي احجي وياج واكلج عن مشاعري
جان طلعتج من حياتي بدقايق

اني ردت اسويلج درس

بسالفه الطلاك والمحكمه

ردت اشوفج انو لمن تحبين شي شكد صعب تفقدي
واذا انفقد شنو مقدار الألم الي تحسي

بس انتي تروحين وترجعين وتغلطين
ومتعرفين تصرفين

وانطيج فرصه وهم  تردين تغلطين
...شوف منتوالم

...سكتي عد شكد تتفيكين
....اريد اروح
كام وكف

وتفرب مني واخذ الجنطه مالتي
وشمرها على الجربايه

...وجايتني هيجي وتريديني اعوفج
....اي تعوفني طبعا
....لازم تخبلت
...قيس
.....اشتعل قيس
....ههههه

....ول يابه اليوم تضحك
...سوالفك اضحك
...اكلج هسه تراضينه
....لا
....وجعا لويش
....هيج

.....مواعرفج حقيره وغبيه

.....ليش هيج تحجي والله عيب
....حقيره لان ضوجيني وتفورين دمي
وغبيه لان اني احبج وانتي مويمج الموضوع
وتشوفيني اشتعل واطفى بنار حبج
وانتي الموضوع ولا هامج
....اي خطيه

....ههههه عابت تدلل هم
.....اريد اروح يم بيبيتي

عض شفته
....ليش البيبي دفيج بله مدكوليلي شتنطيج
.....وانت شتنطيني

....كلش انطيج بس أمري
وغمزلي وضحك

....قيس
...والله حركتي لقيس دحجي وفضيني
....ليش ماطلعتني وجبتني ها
.....اكو مكان احلى من غرفه النوم
قصدي البيت
ابتسمت
....اي اكو

.....كطنه وطلعيها من اذانج انو اطلعج افرج وانتي هيج
زين لو لا

اني مو ماعندي غيره
حتى هيج تلبسين واني اسكت ومااحجي
.....وشنو دخلها بالغيره

....كلمه وانتهى لا يعني لا
...شنو لا

....يعني صيري حساسه و رومانسيه
وتعاي يمي احجي ويايه
شويه تحركي لخاطر الله
....مااتحرك

...ولايهمك ياحلو اني احركج

ياأرض تهدي

وكف وقرب شفايفه مني وهو ديتقرب اكثر ندكت باب
البيت

بقى على نفس وضعيته
وكال بعصبيه

...اويلي على حظي الاكشر
...روح شوف منو
...عوفيهم يدكون

وفعلا ندكت الباب مره ثانيه
....دروح شوف منو وتعال
جر البجامه مالته جانت على الجربايه
ولبسها
وراح فتح الباب

طلع اخو شفته تقرب من قيس وكام يحجي وياه
وراح رجع قيس مو على بعضه

صح رجع كعد يمي بس عبالك اخو كله شي
......خير
...ماكوشي لاتشغلين بالج
....شنو الي صار

....ماصار شي
....بس عبالك ضجت
...امي
...شبيها خاله

....طالعه من البيت علمود صباح
....شنو علمود صباح

...دكول اذا صباح ماترجع للبيت اني ماابقى

....زين هو مو الولد يمها ليش مهتمه هالكد لصباح
....موديبجي على امه وامي تعبت وياه هوايه
...ليش متنطي لاامه هم خطيه هي

....خلي تروح هي هاي هم واحد يعتمد عليها
....اول وتالي مرجعه لاامه قيس
....احنا عمامه موجودين

....بس هذا الشي موصح اني داحط نفسي بمكانها وتجي تاخذ ابني مني

والله اكل لحمك انت صاحي
....يمه تخوفين

.....اي لعد شنو

....باع الفطيره دكلي لعد شنو تعاي اكلي لحمي
هسه غير تجي الااخذ ابنج يله تاكليني
افترسيني بدون سبب اني اقبل وعيونج بس افترسيني

.... قيس ههههه
.....قيس دينشوي وداعتج
.....خطيه يحرام
.....العب ياحلو تعاي

وجان تندك الباب مره ثانيه
جان يصيح

....صدك جذب شبيهم متفقين عليه اليوم
.....روح
...انتي كل شويه وكوليلي روح
بس تريدين تخلصين مني
راح مره ثانيه وهالمره مرت اخو واخو
وكاللهم اتفضلو

اخ. سلم عليه من بعيد ومرت اخو اجتي بوستني وسلمت عليه
وراحت
تحجي ويا قيس

بقيت اباوعهم وهما طولو بالكلام
والحذاء مالي وجع رجلي
نزعته وحطيته على صفحه
ورحت كعدت على الجربايه

عد شفت اخو ومرته راحو وهو سد وراهم الباب
ورجع من شافني على الجربايه بسرعه اجى وكمشني
من يدي حتى لااكوم
وكال

....اي هيج الكعده تمام
...شكو
....دعوفيهم والله هسه لو يهجمون الباب بعد ماافتحها
خلي الدنيا تضرب تكلب
وخليج انتي بالكلب

وكامت يتقرب مني
وباسني من حلكي قوي وباس خدي
عد اني سحبت نفسي وكمت
.....ها طكت خبالاتج
...ماكوشي بس
....بس شنو

....بس تعبانه اليوم
...ليش جنتي تشتغلين عماله حتى تعبانه
تعاي نادين لضوجيني
....ماريد
.
....لج بابه شبيج مدكوليلي
.....مابيه شي
...موعلى كيفج دخول الحمام مو مثل طلعته
...قيس عوفني
...لا

وتقرب مني وكام يبوس كل جزء بيه
وخله كل ذره بيه تريده
لمساته جانت حنينه

ويده جانت ترسم خطوط تمثل الحياه على جسدي
كل لهفه منه وكل كلمه واني بحضنه
تعيشني بدنيا غير الدنيا
سبحان الله الي يوالف الكلوب

والي يخلي المرأة مسكن وراحه للرجل
والعكس
شكد حلوه المسه النظيفه
وشكد طعمها يفرق

ولمسه قيس بيها جمال الدنيا كلها
واني بحضنه احس

كل المشاعر منجمعه بيه
وهو يبوسني لو يحضني

احس طيور كلبي ترفر
بعيد عني شكد بعدت عنه

وحاولت انهزم من سجن حبه

بس هسه لمت نفسي ميت مره على كل لحظه جفة
مني وعلى كل لحظه بيها فراك وحزن
.....حبيبي

....ها
... فديت الها وفديت الابتسامه
خجلت وضميت راسي بصدره
....لتخجلني

....تخجلين مني واني ملكت كل شي بيج
....متأكد
..اي متأكد
....ههههه

....وي وي وي باع الصوت والضحكه الي بيها عافيتي
.....هسه تكلب عليه
....هذا الشي يعتمد عليج
....شلون

.... يعني ماريدج تكذبين عليه ولااريدج تعذبين كلبي

وماريدج تروحين ابدا وتركيني حتى لو اقسى عليج شويه
تحمليني لان احتياجي الوحيد هو انتي

هو حضنج هو صوتج هو همسج هو صوت آهاتج
وانتي بين يدي

حسيت  كلبي ماع واني داسمع كلامه وجه الهادئ
...قيسس

....لدكولين قيس
ابتسمت وكتله
....لعد
.....كولي الي تحسي

...بس
وحط يده على حلكي

....لدكولين ولا كلمه  خلينه عايشين الحظه
.....بس من اني بحضنك انت هيج تصير زين

ضربني على راسي
...كتلج سكتي شكد تلغين

.....هاي شنوووو
...شكد تحجين عوفيني مستمتع الا تحجين وضوجيني
ضحكت

....تعرف اني مااحب احد هيج يعاملني ولااحب احد يقيد حريتي
او يحاسبني او يشكك بكلامي بس وياك
كلشي مختلف

....حقيره شسويتي بيه خليتني انام واكعد واني احلم بيج
وحضني حيل وصاح

....اخ شدسوين بيه اخ منج مداكدر اقاومج
.....ههههه
ودك تلفوني
.....هذا تلفونج
....اي

دنك وجر جنطتي من الكاع وانطانياها
كمت كعدت وعدلت نفسي وفتحت الجنطه
وهو يضحك عليه
طلعت التلفون وطلعت بيبيتي دتخابر

فتحت الخط
...الووو
....ولج وينج
....ويا قيس

....بله واحد شيحجي وياج بس صوج هاي خالتج الي متخجل
شلون عافتج تطلعين
....بيبي غير هو
....سكتي

عد قيس اخذ التلفون من يدي وكال
...الوووو.
هلا بالحجيه شونج
وسكت يسمع

...على كيفج حجيه غير رجلها اني ومن حقي
متذكرين باايام شبابج وسوالفج وياالحجي
ههههههه
ضربته على جتفه

بس اسمع بيبيتي تضحك

....ها يعني عازمتني على العشه موفايت وكت
باجر اجى اتريك يمج
لالا رح تبقى يمي
يابه مرتي شبيج

مامطلكها اني
اي وداعت الحجي

هو يحجي واني خربانه من الضحك عليه
سد التلفون وحطه على الكومدي
وكال

...بيبيتج من كل عقلها  عبالها اتركج
هاي الليله
....هسه دكوم تحجي

....ولج منو الا سلطه عليج غيري

اني غير انتي مرتي وتكونين وين مااني اكون

تعاي تقربت منه وهو كام كعد وانتجه على الجربايه
واني حطيت راسي على جتفه

وغمضت عيني وعبالك جنت بكابوس وهسه صحيت
على هذا الحلم الهادئ الي كله
حب

...ما اريد اكطع هاي اللحظات الرومانسيه بس اني من اشوفج اجوع مادري ليش

اظاهر عندي غايه انو اكلج
....ههههه
....اي والله

....يعني انت هسه جوعان
....اي بشرفي ميت من الجوع
....اسويلك اكل

...اي بالله ياريت من يدج الطيبه الكريمه
....هههه اوكي خلي البس واكوم اسويلك

كمت لبست دشداشه كصيره
ورحت للمطبخ ويقيت ادور

شنو الي يصير اكل بس مجان اكو مسواك بس كم حاجه
طلعتهن وبديت اسوي واجاني قيس
وحضني من وره

.....ليش مااكلج الج وخلص
.....ههههه
....والله تخبلين بس بسرعه يصعد السكر واتوكل للعزيز الجليل
.....هههه
....حبيبي
....ها
....فرحانه
هزيت راسي

وباسني من خدي وراح
فتح التلفزيون و صوته جان عالي

كملت الاكل ورحت وديت الاكل وكال تعاي
نكعد بالكاع اريد اباوع فلم

كعدت بصفه وكمت اكل وياه وهو يضحكني
وبعدها كعدته نباوع فلم مصري

قديم بس غثني لان البطله تحب البطل واهلها ميقبلون يزوجون
وبعدها تزوج غيره وتسافر

وبعدها تعوف زوجها وترجع تزوج الي تحبه

بس يطلع بيها مرض خبيث وتموت
بحيث حتى قيس ضاج

كال غثني هذا الفلم لوادري مشايفه
كتله
....حياتي
...هاحبيبي
....اي هيج فرحي قلبي المسكين
....تدلل وغمزتله

...وي وي صايره تغمز هم ولج دربالج خاف ادخلين لمرحله خطره هدوره ومااكدر اسيطر عليج
...ههههه لالتخاف

.....طمنتيني اكلج اطلعين بالحديقه
...اوكي

.....روحي لبسي شي مستر وتعاي
....وانت تطلع هيج

....خايفه العالم يباوعون  على مفاتني ولج غير رجال اني واذا لابس شورت
.....اوكي بكيفك

طلع واني لبست دشداشه طويله وشلت شعري وطلعت ورا بس ومن وصلت لباب البيت دك تلفون

قيس ردت اعوفه بس بعدها كلت خاف شي مهم
ورجعت جبته واجيت

وجان رقم غريب وصلت يم قيس وهو دك مره ثانيه انطيته لقيس

وقيس فتح الخط وبقى بس يكول اي
اي اي وراها سده
....هاي منو
....شغل
...هسه
....اي هسه عادي شنو المشكله

مارتاحيت للتلفون بس سكتت وماحجيت
ماشكيت انو الموضوع بي نسوان لا

لان سمعت صوت رجال يحجي بس خفت
خاف اكو شي
....اي ياذيب
ضحك
....اي شتريد مرت الذيب شديفتر براسها
...مديفتر شي
...ها
....اي
....اي
.....حبي ليش بيت اهلك اظلم

...موكتلج امي طالعه واخويه راح لبيت اهل مرته واخويه الثاني بيته

.....لعد ليش مارحت على امك خطيه
....اني عندي امي وابويه الله يرحمه خط احمر ابدا مافديوم كسرت كلمه بالذات  كلام ابويه
وعاش ومات وهو راضي عني

وامي همين بس امي لازم تعرف انو اني مداتحمل وجود صباح بحياتي
وتأذيني موبس لخاطرج بس
اني مااريد اشوفها

لهذا السبب اريدها تفهم هذا الشي
وبعدها اروحلها ونقرر

....ماعرف شنو سالفه هاي صباح عدها سوالف موحلوه
بس همين خطيه
...تعرفين شنو الي احبه بيج
....شنو

....كلبج طيب تنفعلين وتصيرين عصبيه بس موحقوده
...بس اني اغار عليك وماريد صباح يمك
....واني ماكلتلج هذا الشي مومن حقج

....اي زين فهمت انو هذا الشي من حقي
....تعرفين ليش فهمت هذا الشعور

....ليش
...لان اني احبج واغار عليج حتى من نفسج اغار عليج من خيالج
من اخوج من ابوج من الدنيا كلها
اغار عليج بشكل مدكدرين تتخيلي

ومن ابتعد عنج ادوس على كلبي الف مره
واصبر نفسي بكوه

لهذا السبب حسيت بيج لان جربت شعور الغيره
وحاولي تفهمين غيرتي

غيرتي موشك اني مااشك بيج بس اخاف عليج لان هوايه من الناس
صارت كلوبهم مونظيفه

سحب الباكيت مال الجكاير وطلع وحده وشعلها ودخن وجان مشغول باله  بشي
بس ماحجى
كتله

...شراح نسوي بعد
...راح ترجعين لبيتج وراح نبدي بدايه جديده
بس موهسه
....لعد

....اني كتلج راح اغيب فتره وارجع ومن ارجع كلشي متغير
بس اريد اوصيج على شي
...شنو

....سفرتي على كد عشر ايام اسبوعين اذا الله سهل
بس اذا صار شي بيه

مااريدج تبقين بالعراق ولادقيقه وحده بيوم الي

تسمعين انو اني متت بنفس اليوم اتركين العراق
وحاولي تبعدين عن الانظار فتره
ولترجعين للعراق ابدا

....اسم الله شنو هالحجي
...سمعي كلامي وحفظي

...لتخوفني قيس شنو الموضوع وين دتروح

....عندي شغل لازم اكضي حتى بعدها اني وياج نكدر تعيش بس حبيت انبهج
واكلج شسوين بهاي الحاله

دربالج تفكرين تسوين غير هذا الشي
سمعتي
...لتحجي عفيه كربت كلبي

....سلامتج حبي بس مابيها شي الانسان لازم ياخذ احتياطاته

.....هو هذا حجي قيس
....لضوج ياحلو

...موضجت انما اختنكت
...هيجي تخافين عليه
....اي طبعا
...حقيره لعدليش مرمرتي كلبي

،...لان احبك لو مااحبك جان من زمان بعدت عنك وبعد ماشفتني
ابتسم وكام يتمشى وجابلي وردة من الحديقه
وحطها بشعري

...هاي الورده الوحيده الي بقت من بعد مامات ابويه
وهاي اول مره اكعد بالحديقه

لان احسها تخنكني وهي بيها ريحه ابويه
بس ريحتج وريحه ابويه نفس الشي

وحبج بكلبي يغطي على كلشي وينسيني كلشي
راح اسامحج على كلشي

وراح نبدي حياه بس اني وياج
واذا حياتج انتهت بدوني كمليها وعيشي
بس لاتنسيني فديوم
وخليني ابقى اني الوطن بالنسبه الج ومهما بعدتي
تحنيله
...اني عينك وكلبك وطنك
...احبج

....اني هم احبك
...كومي ندخل جوه كافي حبيات هسه ناكل كرزات وحلويات
وكام يضحك بصوت عالي

دخلت جوه ودخلنه للغرفه ودخلنه بعالمنه الخاص
وكعدت الصبح علي صوت المي
ولمن كمت جان قيس بالحمام

ديغسل رحت سويت ريوك وغسلت وجهي بالمطبخ
ورجعت كعدت بالغرفه وقيس
بعده

بالحمام وين يله طلع
اول مشافني اجى باسني وكال
....صحي النوم عروسه

...هو اني العروسه لو انت العريس
صارلك ساعه بالحمام

....وشعليج ولج قابل  داغسل بحمام ابوج
شلون كاعدتلي

...اوف تعال تريك

ضحك وراح للمرايه مشط شعره وطلعتله ملابس
لبس وحط ريحه
وراح كعد ياكل
....نادين تحضري

...وين
...داوديج لبيت بيبيتج
...يانسيت بيبيتي كالت تعالو تريكو يمي

...اول وتالي اني.داريد اروح لان عندي شغل
وكتلج البارحه

....يعني اليوم تروح

....اي حبيبي اليوم اروح وكم يوم وارجع ان شاء الله
....ممطمنه لروحتك
...حبيبتي شغل

....داحس هذا الشي يخص اسد
....لتفكرين زايد بعدين توصلج الاخبار

....بس انت كلت هذا عنده ناس تفدي بدمهم
..اي

....قيس عوفه الله يخليك وخلي نروح نسافر

...اني مااطلع من العراق مااكدر اهلي وشغلي هنا
ومااكدر اعيش بره العراق
.....هو شكو بالعراق

...بي انتي وامي واخوتي وابويه وكل ذكرى منه
وبي ترابه الي من اشتاقله اروحله
بي اصدقائي بي شغل

...شحصلت من شغلك

.....هوايه اشياء منها الحلو ومنها المر
....خايفه كلش
....لتخافين الاعمار بيدالله

دخلت للغرفه لبست ملابس غير الي اجيت بيها
البارحه وطلعت
شفت قيس واكف يشرب الجاي ويدخن
شلت الماعين وغسلتهن ولملمت البيت

وكفت يمه وجان شعور بالخوف متملكني كلش
حطيت راسي على ظهره وكمشته حيل
وهو حط يده على يدي وبعدها ندار عليه
وباسني من كصتي

...شكد احب اهتمامج
ورفع يديناتي وباس هاي وبعدها باس
الثانيه
...عاجبني يربطني بيج شي اكبر
ورد باسني من كصتي
وكال
....يله حبي

طلع كدامي وشغل سيارته وفتح الباب الخارجيه
واني دخلت اجيب الجنطه مالتي والتلفون
ولمن رجعت  شفت قيس ماكو
وسيارته مفتوحه ومشغله

والمفاتيح مالته بالكاع
طلعت بالباب مجان اكو اثر

صحت قيس محد جاوب

فتحت الباب الي بين بيت اهله وبيتنه
ودخلت
مجان اكو احد دخلت شويه للحديقه
وصحت
...قيس وينك

طلعت تلفوني وخابرت عليه تلفونه يدك

رجعت للكراج مالتي وهم دكيت مره ثانيه سمعت الصوت مال تلفونه
صعدت بالسياره وشفت تلفونه ديدك بالسياره
طفيت السياره

وكلبي وجعني وكمت اصيح
...قيس وينك قيس

دنكت اخذت مفتاح الباب الي بالكاع
وهي دقايق دخلت للغرفه وين راح وماسمعت اني  صوت
شي

ورديت اصيح بدموع تنزل من عيني

....قيس وينك الله يخليك جاوب
...قيس

.......
لاتبتعد عني يامن تروي عطشي
لاتبتعد عني يامن أشعر بك
بداخلي
بركان لاتبتعد عني ياروح تنشق
من داخلي  روح
لاتجعل خطواتك ترهق قلبي
وتقتل روحي المعذبه
لاتغيب عني وتسرق دفء
شمسك مني
يتبع....

#الكاتبه#روجمان

بعد باجر موعدنه معا البارت الاخير من قصه
أنا عيناك ياوطني