CHAPTER TWO
MULA sa VIP area ng parking lot ng Hishima Hotel and Casino kung saan nakaparada ang sasakyan ni Hisoka ay matamang sinundan niya ng tingin ang papalayong taxi na sinakyan ni Charie Veil. Naglabas siya ng sigarilyo mula sa inner pocket ng suot niyang coat. Sinindihan niya iyon, saka humithit.
Ilang araw na ang nakalilipas mula nang matanggap niya ang distressed call ng Lola Dorinda niya at sinabi ang tungkol sa isang sakim na babaeng gustong akitin at manipulahin ang lolo niya. And that woman was the one who just left wearing an awful disguise.
Charie Veil. Ang baguhang novelty singer na ayon sa bad publicity tungkol dito ay sumikat lang dahil sa paggamit ng katawan nito. Ngunit ayon naman sa good publicity na ikinakalat ng kampo nito, hindi lang daw ito magaling na mang-aawit kundi isang maganda at matalinong babae rin. Iyon diumano ang tunay na dahilan kaya ito sumikat.
Subalit para sa kanya, wala siyang maramdaman ni katiting na paghanga sa hindi maikakailang sexy ngang singer. Hindi ito kundi ang obsessed dito na lolo niya na nasa dapit-hapon na ang edad ang nakikita niya habang nagkatitig dito. Sa unang pasada pa lang niya ng tingin dito nang makita niya ito sa lobby ng hotel niya nang nagdaang araw, mabilis niyang naunawaan kung ano ang kahali-halina rito kaya ganoon na lamang ang pagkaloko diumano rito ni Lolo Nemo.
Kakaiba ang ganda ni Charie Veil. Bilang lalaki, masasabi niyang sapat na ang taglay nitong pigura para ihilera ito sa klasikong magaganda at kaakit-akit na babae sa kasaysayan ng mundo. She had the face of an angel and the body of a goddess. Mahusay rin itong magdala ng damit at deretso ang tindig kaya agaw-pansin ito.
Ngunit sa isang tulad niya na sanay nang makasalamuha ng mga babaeng katulad nito, ordinaryo na lang ang dating sa kanya ng hitsura nito. Kaya nga nang unang beses niyang makilala ito tatlong taon na ang nakararaan ay hindi niya ito gaanong pinagtuunan ng pansin. Hindi niya tipo ang babaeng tila ang kalahati ng araw ay ginugugol sa pagpapaganda sa sarili, which she probably does. Kahit medyo pangahan ang mukha nito, hindi ito nagmumukhang bakla o amasona dahil sa extra time and effort na ibinibigay nito para takpan ng makeup at palambutin ang matitigas na anggulo ng mukha nito.
Malaki ang mga mata nito na kakulay ng dark chocolate. Animo mga mata ng manyika ang mga iyon, iyong tipong hindi kumukurap. Kung sa ibang babae iyon napunta, malamang nagmukha na iyong palakang luwa ang mga mata. But on her, they looked perfect. Medyo nasobrahan lang ang tangos ng ilong nito na hindi niya alam kung natural o dahil sa siyensiya. And he would bet a million bucks that her pouty red lips were not natural but collagen-enhanced.
Kompara sa simple at mayuming kagandahan ni Lola Salome noong kabataan ng namayapa nang abuela niya, walang laban si Charie Veil. She may look gorgeous and hot but he knew that most of it came out of a bottle or from a series of cosmetic procedures. Hindi tulad ni Lola Salome na likas ang taglay na ganda.
Kaya hindi niya maunawaan kung paano naakit ni Charie Veil si Lolo Nemo. Ang matanda ang huling lalaki sa mundo na pag-iisipan niyang posibleng maging "dirty old man."
He rarely saw eye to eye with his eccentric billionaire grandfather. In truth, he seldom saw the old man at all because every time he did, the bitterness and hate he felt for the old man because of how he had abandoned and neglected him for so many years rose of inside of him.
Sa kabila him niyon, batid niyang maprinsipyong tao ang lolo niya. Batid din niyang ang puso nito ay kasamang nalibing nang pumanaw si Lola Salome. Kaya hindi siya makapaniwala nang tawagan siya ng kapatid nitong si Lola Dorinda upang magsumbong tungkol sa babaeng singer na biglang sumikat three years ago dahil sa double meaning na mga kanta nito at husay sa paggiling.
Balak na raw ng lolo niya na ibahay sa isang mamahaling condominium unit sa Makati ang babae. Binibilhan din daw ito ng lolo niya ng kung ano-anong mamahaling gamit at alahas. At ayon sa huling narinig ni Lola Dorinda sa lolo niya, tila binabalak na rin ng matanda na alukin ng kasal ang babae. Dahil sa kabila raw ng pagtanggap ng mga regalo ng lolo niya at lantarang panghuhuthot dito ng dalaga, tila hindi pa rin ibinibigay ni Charie Veil ang "oo" nito sa lolo niya. In other words, she was still keeping the old man dangling at the end of her finger. Patunay na tuso at matalino talaga ito.
Malamang ay iniisip nitong kapag bumigay agad ito sa panunuyo ng lolo niya rito ay mawawalan na ng interes dito ang matanda. Kaya nagpapakipot muna ito, umaastang matimtimang birhen.
Anim na buwan pa lang diumano ang nakalilipas mula nang makilala ng lolo niya ang babae; noong kaarawan ng matanda at isa sa mga guest performer si Charie Veil. Hindi siya nakadalo sa pagdiriwang na iyon dahil sadyang itinapat niya sa kaarawan ng matanda ang pagbisita niya sa ibang hotels niya sa Europe.
Kakilala niya ang TV director at producer na si Rosauro Chingson at ang asawa nitong si Violy na siyang manager ni Charie, ngunit hindi naman niya itinuturing na mga kaibigan ang mag-asawa. At kahit madalas sa Hishima Hotel and Casino niya ang mag-asawa na kung umasta ay tila malapit na kaibigan siya, hindi niya gusto ang mga ito. Rosauro was a cheat, not only in gambling but in all his dealings, too. Hindi lang ito makapandaya sa casino niya dahil takot ito sa kanya. Subalit alam niya ang ginagawa nito kapag nagsusugal ito sa ibang lugar.
Underpaid din ang karamihan sa mga tauhan at artista nito tuwing gumagawa ito ng pelikula. Mahilig pa itong magwala kapag nalalasing, kahit pa sa public places. Iyon ang dahilan kaya binalaan agad niya ito noong unang beses pa lang itong tumapak sa teritoryo niya na hindi niya ito-tolerate ang ganoong asta nito. Hindi miminsan ding naireklamo ito ng sexual harassment ng mga babaeng empleyado nito.
Ang asawa nitong si Violy ay kilala naman sa pagiging taklesa, mapanlait, sinungaling, at gastadora. Ilang baguhang artista na ang pinabagsak ng walang prenong bibig nito para lang maisulong ang career ng mga alaga nito. At kadalasan, ang ginagasta nito ay hindi nito pera mismo kundi pera ng mga artistang mina-manage nito.
At ngayon, may dagdag na siyang rason upang kayamutan ang dalawa. May kutob siyang may basbas ni Violy Chingson ang panggagamit ng alaga nito sa lolo niya.
Ayon kay Lola Dorinda, si Violy ang talagang humila sa alaga nitong singer upang ipakilala sa lolo niya pagkatapos niyong umawit noong gabi ng kaarawan ng lolo niya. Ang hula nga ni Lola Dorinda, mismong si Violy ang may ideyang huthutan nang huthutan ni Charie Veil ang lolo niya.
A week after the party, nagsimula ang panunuyo ni Lolo Nemo kay Charie Veil. Noong una, inakala ni Lola Dorinda na natutuwa lang ang lolo niya sa dalaga. Na nakikita rito ng lolo niya ang isa sa mga pinsan niyang babae. Halos kasing-edad kasi si Charie Veil ng ilang pinsan niya.
Subalit hindi nagtagal ay kinakitaan na ni Lola Dorinda ang lolo niya ng pag-iiba sa kilos at pananalita patungkol sa sexy singer. Hanggang sa umamin na mismo si Lolo Nemo na nililigawan nito ang dalaga, bagay na labis na ikinagimbal ni Lola Dorinda kaya agad nitong pinaimbestigahan si Charie Veil.
"That was Charie Veil, huh? Interesting. Very interesting," aniya nang sulyapan ang executive assistant niyang si Antonio.
"Yes, Sir. Siya nga iyon," anito. Binuklat uli nito ang folder na hawak para muling ikompara ang babaeng nakasabay nila sa elevator kanina sa litratong kalakip ng report na ibinigay sa kanya ng imbestigador na inupahan ni Lola Dorinda upang imbestigahan ang babae. "Charie Veil" or "Charivel Maranga" in real life. Twenty-six years old. She never attended college though she finished high school. Wala na siyang pamilya o malapit na kamag-anak. She used to sing in comedy bars and lived in Cavite before Mother Violy discovered her and turned her into Charie Veil, the sensual siren.
She now lived in Makati and had already been involved in two scandals concerning two rich older men. One was a TV producer, the other an executive in one of the big television networks in the country. Pero pagkatapos niyang makuha ang gusto niya sa mga ito, bigla na lang niyang iniwan ang mga ito tangay lahat ng pera at regalong ibinigay sa kanya sa panahon ng relasyon niya sa mga ito. Siya nga ang tinutukoy ni Lola Dorinda na babaeng kinalolokohan ni Lolo Nemo ngayon, Sir," lahad ni Antonio sa report na halos kabisado na rin naman niya.
Tumango-tango siya. Anuman ang gawin niya sa babae para matiyak na mailalayo niya ito sa lolo niya ay karapat-dapat lang na matamo nito.
Sa totoo lang, wala siyang pakialam kahit ano ang gustong gawin ni Lolo Nemo sa buhay nito. Matanda na ito. Dapat alam na nito na imposible nang may babae pang sumeryoso rito at hindi maghahabol dito dahil sa pera nito.
Wala siyang balak makialam nang unang isumbong ni Lola Dorinda sa kanya ang pinagga-gagawa ng lolo niya. Hangga't hindi siya direktang naaapektuhan ng mga ginagawa nito, wala siyang pakialam. Kung gusto nitong magpaloko sa isang babaeng mas bata pa sa kanya, magpaloko ito. Buhay nito iyon.
But there was one thing he could not easily ignore. At iyon ay ang kaalamang labis na nag-aalala at nasasaktan si Lola Dorinda habang nasasaksihan ang pagkaloko ng kapatid nito kay Charie Veil. Nag-aalala rin si Lola Dorinda sa balak daw ni Lolo Nemo na baguhin ang testamento nito. Nais daw ng lolo niya na alisin silang pamilya nito sa testamento at ipamana ang lahat ng kayamanan nito sa babaeng kinalolokohan nito.
Kung siya lang, walang kaso iyon sa kanya. Hindi niya kailangan ni isang kusing mula sa lolo niya. Subalit iba ang kaso kay Lola Dorinda at sa iba pang kaanak nila. Ang malaking bahagi ng mga ari-arian ng mga Aseron ay kay Lolo Nemo pa rin nakapangalan. Malaki rin ang shares nito sa kompanyang pag-aari ni Lola Dorinda, ang Circe Cosmetics Company. At kung totoong binabalak ng lolo niya na alisin ang mga kaanak nito sa testamento upang paboran ang Charie Veil na iyon, nangangahulugang ang babae lang ang magpapakasasa sa kayamanang pinaghirapan din ng mga Aseron ng ilang henerasyon.
Hindi niya mapapayagan iyon. Hindi ibang tao ang makikinabang sa pangalan, kayamanan ng mga Aseron. Lalo na ang isang malabuwitreng babae na ginagamit ang katawan nito upang manipulahin ang isang matandang lalaki.
"Sir, susundan ba natin siya o ipapaalam natin kay Mother Violy ang pagtakas niya?" untag ni Antonio sa kanya.
"Yes. Call Violy. Sabihin mong pumunta siya sa opisina ko mamayang alas-singko. Kakausapin ko siya tungkol sa alaga niya. I don't think you need to tell her we saw the woman. I'm sure she knows by now that her golden goose has flown the coop," tugon niya.
"Yes, Sir."
Kinuha nito ang cell phone nito at ginawa ang iniutos niya. Base sa hysterical na boses na nauulinigan niya mula sa kausap nito sa kabilang linya, galit na nagwawala na si Violy at minumura ang kung sinumang kaharap nito. Tama ang hula niya. Natuklasan na nga nitong tumakas ang alaga nito.
"Let the chase begin," sambit niya kasabay ng pagsilay ng tusong ngiti sa mga labi niya.
"Iku," aniya sa kanyang assistant at tinungo na ang sasakyan niya. Pumuwesto siya sa driver's seat. Bagaman may driver siya, bibihira siyang magpa-drive dito. Lulan ito ng sasakyang nasa likuran ng silver Porsche niya kasama ng dalawang bodyguards niya. Kapag pagod siya o may gagawin siyang trabaho, saka lang niya ipinapasa sa driver ang manibela.
"Pumayag na si Mother Violy na makipag-usap sa inyo tungkol kay Charie Veil mamayang alas-singko, Sir. At sa tono niya, mukhang alam na niya ang sasabihin mo sa kanya."
Umarko ang mga kilay niya. "Does she, really?" aniya at saka pinaharurot ang sasakyan pasunod sa taxi na sinasakyan ni Charie Veil.
Minsan na siyang nakakilala ng isang babaeng kapareho nito ang likaw ng bituka. A gold digger who would lie, scheme, cheat, and even kill for money. Tinangka noon ni Nikita na paslangin sila ng kanyang ina. Ginawa nito iyon dahil nabigo itong makumbinsi ang kanyang ama tungkol sa diumano ay naging anak ng kanyang ama rito na mas bata pa sa kanya. Nabigo ito sa balak nitong panghuhuthot sa kanyang ama kapalit ng pananahimik nito tungkol sa kataksilan diumano ng kanyang ama sa kanyang ina. At ang pagtatangka nito sa buhay nila ng kanyang ina ang ganti nito. Thus, setting in motion a chain of tragedies that destroyed his happy childhood.
Hindi man ito ang kumalabit sa gatilyo ng baril na pumatay sa kanyang ama, ito pa rin ang maituturing na punong-dahilan sa trahedya ng pagkamatay ng kanyang ama. Dahil sa pagkaganid nito, ninakaw nito ang masayang buhay niya sa piling ng kanyang mga magulang. Winasak nito ang pamilya niya na buo pa sana hanggang ngayon.
Lumaki siyang nasasaksihan ang unti-unting pagtakas ng katinuan ng kanyang ina dahil sa malagim na pagkamatay ng kanyang ama. Lumaki siyang salat sa pagmamahal ngunit sagana sa pang-aabuso mula sa pamilya nito at sa pangalawang asawa nitong si Aoki.
Hindi marahil mangyayari iyon kung nasa katinuan pa ang kanyang ina. Pero biktima rin ito ng mga pangyayari. Hindi tulad niya, hindi nito nakayanan ang bigat ng malagim na mga pangyayaring nagwasak sa buhay niya dalawampu't dalawang taon na ang nakararaan.
Pumayag itong magpakasal kay Aoki dahil sa pamimilit dito ng pamilya nito. Ngunit nakatanim na sa isip nito ang malagim na pagkamatay ng kanyang ama at iyon ang unti-unting umagaw sa katinuan nito hanggang sa bumalik ang isip nito sa pagiging bata.
At dahil hindi niya masandalan ang mga taong dapat ay pumoprotekta sa kanya, tinuruan na lang niya ang sariling huwag umasa sa ibang tao. Sa halip, ang mga solidong bagay na kaya lamang niyang kontrolin ang pinagtuunan niya ng pansin tulad ng pera, posisyon sa kompanya ng ama ng kanyang ina, at kapangyarihang hindi maaaring agawin ng sinuman sa kanya.
Sa kabila niyon, hindi pa rin niya tuluyang matalikuran ang mga itinuro sa kanya ng kanyang ama noon. At ang isa sa mga pinakamahalaga roon ay ang responsibilidad at obligasyon niya sa pamilya. Iyon ang pinakadahilan kung bakit hindi niya matalikuran o matanggihan si Lola Dorinda sa hiling nitong gawan niya ng paraan upang mailayo sa Lolo Nemo niya ang Charie Veil na iyon.