(Alyanna POV)
Ang weirdo na talaga ng amo ko! Although from the start eh hindi naman na talaga ordinaryo si Brylle. "Galit-galitan ka, eh hindi naman nangingitim ang crystal sa singsing ko."
"Ano ba kasing ginagawa mo dito at nanggugulo ka?"
"Hinahanap ko si Vander. Magti-three days ko na siyang hindi nakikita eh. Nakaka-miss!"
"Inutusan ko papunta sa Otherworld. Gusto mong puntahan? Ipapadala rin kita dun."
"Sungit!" Tapos umalis na ako sa harap niya, baka kasi tuluyan na talaga siyang magalit saakin. Actually, kaya ko lang naman siya kinukulit ay dahil nacu-curious talaga ako sa mga ikinikilos niya.
After kasi nung nangyari dun sa Atrum Forest, parang nagbago na naman ang pakikitungo ni Brylle saakin. Siguro nga natutunan na niya akong pahalagahan. Nag-alala pa nga siya nang malagay ako sa panganib.
"Brylle..."
"Ano na naman!" Busy-busyhan kasi ang kumag! Pero hindi talaga ako naniniwala na may ginagawa siya.
"Naninigaw ka agad! Di ba sabi mo day off ko ngayon? Aayain sana kita sa labas. Uunahan na kita, hindi yun date!"
Pinaningkitan naman niya ako ng mata. "Ayoko."
"Sige na! Dagdagan natin ang social life experience mo! Pati na rin yung saakin. At saka hindi ko pa kasi nagagawang mamasyal dahil pinagbabawalan ako ng tiyahin ko noon! First time ko lang 'to kung sakali!"
Pagkasabi ko nun, saka siya napatingin saakin.
"Sige na, wala ka naman talagang ginagawa eh. Samahan mo na lang ako."
"Alam mo, ikaw na ang pinakamagulo, pinakamakulit at pinakamaingay na taong nakilala ko! Nakakasakit ka ng ulo!" Tumayo siya kaya napaatras ako. Ow no! Galit na ba siya?
"O—oo, sige na hindi na kita kukulitin! Sabi ko nga aalis na lang akong mag-isa eh."
"Saan ba tayo pupunta?" Ay biglang ganun?
"Hindi ko rin alam kung saan magandang pasyalan kaya nga gusto kitang isama. Baka sakaling may alam ka."
"Tsk! Ngayon lang 'to, Alyanna Rohan!" Nauna na siyang maglakad palabas kaya sumunod ako sa kanya.
"Ang init ng ulo, sasama rin pala. Nauna pa siya!" Nilingon niya ako pero nginitian ko siya. Pang-asar lang! Ahaha! Excited na ako! Makakapasyal na rin ako sa wakas!
Pero yung excitement ko, siguro mga after thirty minutes ay naglaho din ng parang bula. Paano ba naman, dinala niya ako sa isang gubat! Gubat na naman! Walang mall o ibang pasyalan siyang alam?
"Kung galit ka saakin Brylle, please wag mo naman akong iligaw sa gubat na yan. Wala nga sigurong Warg dito, pero ibang mababangis na hayop naman ang aatake saakin dyan."
Bigla siyang natawa sa sinabi ko, "Bakit ngayon mo lang sinabi yan? Dapat pala sa Atrum Forest na lang nga uli kita dinala."
"Eh! Bakit tayo nandito? Napakalayo nito sa kabihasnan! Di ba sabi ko sa pasyalan tayo? Social life, Brylle! Nasaan ang social life sa lugar na 'to?"
"Social life ba? Hindi ko kailangan nun." Nag-inarte na naman ang wizard! "Pero kung gusto mo talaga ng lugar kung saan mararamdaman mong talagang namamasyal ka, ito na yun."
"Eh mawawala nga tayo dyan."
"Mawawala ka kung ililigaw kita sa sobrang pagkapikon ko sayo! Itikum mo na nga yang bibig mo at sumunod ka saakin." Minsan ang hirap talagang intindihin ng mga lalaki! Lalo pa kung isang wizard yun! "Tara na!" At lalo pa kung si Brylle Zaffiro ang pinag-uusapan!
Siguro mga kalahating oras kaming nag-hike papunta dun sa pasyalang sinasabi niya. Pero sulit ang pagod nang makarating kami sa lugar na yun. Napatunganga na lang ako.
"Oh ano ka ngayon? Isarado mo yang bibig mo, baka pasukan ng insekto yan." Pang-aasar naman niya saakin.
Dinala niya ako sa isang natatagong paraiso! Bukod sa maikukumpara ko ito sa isang view ng isang hotel garden, may waterfalls pa sa malapit! At ito pa ang the best dyan, may tree house din akong natatanaw! "Ano 'tong lugar na 'to?"
"Ginawa namin ni Vander ang bahay na yun sa puno. Madalas kasi na kapag gusto naming magpalipas ng oras, nagpupunta kami dito."
"Wow! So para palang resort niyo 'to dito sa gubat! Ang galing ng hideout na 'to!"
May biglang naglabasan na animoy mga puting dahon at pinalibutan nila kami. Nang titigan kong maigi, nalaman kong hindi lang sila basta-bastang mga puting dahon. "A—ano ang mga yan?"
"Mga Silver Abeles. Sila ang pinagbabantay ko sa lugar na ito." Hindi sila nagsasalita pero alam kong masaya silang makita si Brylle. Lumulutang-lutang lang sila sa hangin at napakaganda nilang tingnan!
* * *
"Brylle, tingnan mo!" Naupo ako sa isang swing at ang mga Silver Abeles ang siyang nagdadala para gumalaw ang swing na inuupuan ko. Nakakatuwa! Parang kasama akong nadadala sa hangin!
"Para kang bata. Ay hindi pala, isip-bata ka talaga. Tumahimik ka nga!" Si Brylle naman, nakaupo sa isang puno ng kahoy na animo'y nag-hugis upuan. Pinagsisilbihan siya ng mga cute na nilalang na ito.
Napatingin ako bigla dun sa falls at naka-isip ako ng bagay na mas masayang gawin! "Gusto kong maligo! Brylle, pwede ba akong mag-swimming?"
"Bahala ka."
"Eh kaso wala akong dalang damit." Nakangiti kong sinabi at saka siya napatingin saakin.
"So?"
"Unless gusto mo akong makitang nakahubad, siguro naman pwede kang mag-magic ng damit?"
Napataas ng kilay si Brylle at nag-cross arms pa. "Tingin mo naman pagnanasaan kong silipan ka! At saka bakit mo ako inuutusan na gamitin ko ang kapangyarihan ko para sayo!"
"Bakit ba parang palagi kang galit? Hindi ka madaan sa joke." Umalis na ako at naglakad papunta dun sa waterfalls. Hindi na rin niya ako tinitingnan pero mabuti nang makasigurado. "Hoy Brylle. Maliligo talaga ako ha! Wag kang maninilip!"
Tiningnan ko yung reaction niya at mas sumama ang tingin niya saakin. Aba, lalaki pa rin naman kasi siya! "Bwiset!" Yun lang ang sinigaw niya, pagkatapos ay padabog nang tinalikuran ako.
"Mga Silver Abeles!" Kinausap ko naman sila kahit hindi ko sigurado kung naiintindihan nila ako. "Sabihan niyo ako kapag sinisilipan ako ni Brylle ha." Eh ang feeling ko naman din! Haha!
So hinubad ko na ang suot kong t-shirt at shorts pero naka-underwear pa rin naman ako. At saka dun ko balak maligo sa batuhan para may harang naman kahit papaano.
Paglusong ko sa tubig, "Woohoo! Ang sarap ng tubig!" Daig ko pa ang nag-spa sa experience na 'to! Sakto lang ang temperatura at ang linaw pa ng tubig! Ang lakas din ng buhos ng tubig mula sa taas!
Pinalilibutan pa rin ako ng mga Silver Abeles pero nag-iingat silang wag mabasa. Nang may mahulog kasing isa dun sa tubig, nahihirapan na silang umahon kaya tinulungan ko pa.
"Hala, dun na nga lang muna kayo. Delikado pala kayo dito sa tubig eh." Lumayo sila ng konti pero hindi sila umalis. Parang binabantayan lang nila ako.
In-enjoy ko lang ang paliligo kaso may napansin ako. Parang may gumagalaw sa may di-kalayuan. "Hoy Brylle, sinisilipan mo ba ako! Magkakakuliti ka niyan!"
Narinig ako ni Brylle at sumigaw naman siya pabalik. "Mukha mo! Nandito lang ako!"
Mukhang hindi nga si Brylle kasi ang layo ng boses niya eh. Eh sino yun? Muli itong gumalaw at nang titigan ko kung sino yun...
Ow. Em. Ji. "Aaaaaahhhhhhhhh!"
Pagtili ko, nagkagulo ang mga Silver Abeles. Dinumog nila yung nakita ko pero tumakbo ito agad palayo. Dahil naman sa gulat, agad na napapunta si Brylle palapit saakin. "Anong nangyari Yana?" At nang mapatingin siya saakin ...
"Aaaahhhhhhhh! Tumalikod ka bastos!" Naka-underwear lang ako! Pwede ba!
Tumalikod naman siya at hindi niya alam ang gagawin niya... "Teka naman! Bakit ka ba sumisigaw?"
"Brylle yung damit ko! May nagnakaw ng damit ko!"
Isang maliit na nilalang na malaki lang ng kaunti kay Vander ang nagnakaw ng damit ko. Pero hindi tulad ng isang Garden Gnome, masagwa ang itsura ng magnanakaw ng damit na yun! Mukhang palakang may antenna at naglalakad!
"Dali habulin mo! Hindi yun tao!"
"Ano!" Napalingon siya saakin kaya sumigaw uli ako!
"Hwaaaahhhh! Wag kang tumingin saakin! Yung damit ko, bawiin mo na!" Nataranta na rin siya kaya napatakbo na siya para hanapin kung anong nilalang yung nagnakaw ng damit ko.
At nakakahiya! Sobrang nakakahiya dahil nakita ako ni Brylle sa ganitong ayos! Syempre kahit naman nakapanloob ako, ang laswa pa rin ng itsura ko!
Kaduray much! Nakakahiya! Parang nakita na rin ni Brylle ang katawan ko! Hindi ko mapigilang maiyak at ilubog ang sarili ko sa tubig.
* * *
Medyo natagalan si Brylle pero pagbalik niya, hindi niya pa rin dala ang damit ko. Nakatalikod pa rin siya habang kinakausap ako. "Pesky hobgoblins! Ang galing mo talaga, Alyanna Rohan. Sa dinami-dami ng pwede nilang pagtripan, ikaw pa ang napili nila!"
"Hobgoblins?" Yun yung nakita ko? "Eh nasaan yung damit ko? Nanlalamig na ako dito sa tubig."
"Wala na! Hindi na nila ibabalik yun!" Tapos biglang naghubad ng suot na pang-itaas si Brylle kaya nakasando na lang siya. "Oh ito gamitin mo." Ni-levitate niya yung damit papunta saakin nang nakatalikod pa rin siya.
Pagkasuot ko nun, ako naman ang nahiyang humarap sa kanya. "Eh Brylle, ang ikli! Hindi ba pwedeng mag-magic ka na lang ng damit katulad ng ginawa mo dati?"
"Tingin mo gagamit ako ng kapangyarihan para lang dito?" Ang sama naman niya! Hindi kaya nae-enjoy niya ang ayos ko ngayon? Pasimpleng bastos din si Brylle. "Magtiis ka dyan!"
"Uuwi ako ng nakaganito?" Tiningnan na ako ni Brylle at napatingin siya sa lower part ko. Hanggang legs ko lang kasi yung t-shirt niya at ang ikli talaga nun.
Bigla siyang umiwas ng tingin na parang nahiya yata. "Tsk!" Wala na rin siyang nagawa kundi ilabas ang wand niya para gumamit ng magic. Ilang sandali pa, nagkaroon na nga ako ng suot na palda—pero yari sa dahon!
"Owkamown! Ano 'to!" Cute siya, pero lalo akong pagtitinginan ng mga tao nito eh! Mukha akong si Jane na ka-partner ni Tarzan sa suot kong pambaba!
Pagtingin naman ni Brylle sa suot ko, "Pfft!" Natawa siya bigla! Galak na galak! Eh di ako na ang nakakatawa ang itchura! "Oh mamimili ka, uuwi ka ng naka-ganyan o uuwi ka ng walang pambaba?"
"May choice pa ba ako?"
"Wala! Hahaha! Yan kasi! Napagdiskitahan ka tuloy ng Hobgoblin!"
Nang-asar pa siya! Pero buti na lang hindi ako pikon na tulad niya. Kahit naman kasi ang malas ko ngayon, hindi nun maaalis ang saya na na-experience ko sa lugar na ito.