(Alyanna POV)
Sa byahe namin pabalik sa palasyo ay naikwento ni Sorceress Louhi ang dahilan kung para saan ang mga Yosuzume feathers na madalas niyang hingiin. "Mahalagang sangkap ang balahibo ng Yosuzume sa aking Youth Potion! Sarili ko itong recipe at pinakatatago kong beauty secret!"
Bigla naman siyang tinawanan ni Lolo Lorcan—na bumalik na sa pagiging matanda niya dahil humulas na ang epekto ng Youth Potion sa kanya. "Alam mo ba na ang Lux Princess, kahit baguhan pa lamang noon ay nagawa nang gawing bata ang sarili niya na walang gamit na kahit na anong potion?"
"Ano? Posible ba 'yun?" Hinarap ako ng Sorceress. "Kay tagal ko nang naghahanap ng ibang paraan pero wala akong makita! Anong spell ang ginamit mo?"
"Ah... eh... literal pong magiging sanggol ka kapag sinabi mo 'yun. Baka kapag binanggit ko ngayon, maging baby po uli ako."
Masyado yata kaming nawili sa usapan at panandalian naming nakalimutan ang maaring banta sa paligid. Tumigil na lang bigla sa paglipad si Milka at umatungal ito sa 'di malamang dahilan.
"Anong nangyayari sa alaga mo?"
"Hindi ko alam..." Hinimas ko ang alaga kong Rohlynx sa leeg ngunit laking gulat ko nang lumipad ito paibaba. Sa sobrang bilis, kamuntikan pa akong mahulog kaya napakapit ako sa kanya ng mas mahigpit. "Milka! Magdahan-dahan ka!"
Wala na ring nagawa ang mga kasama ko kundi ang sundan kami sa baba ng gubat. At pagtapak namin sa lupa, "Bad Rohlynx! Bakit mo ginawa 'yun? Kamuntikan na akong mahulog sa ginawa mo!" Ngunit kahit pinagagalitan ko na siya, nakuha pa niya akong dambahin na para bang hinaharangan ako mula sa kung ano.
Saka pa lang namin naintindihan ang kakaibang ikinikilos ni Milka nang biglang makaramdam ng kakaiba si Sorceress Louhi, "Maghanda kayo! Hindi lang tayo ang naririto sa gubat."
Pinakiramdaman namin ang buong paligid at tama nga ang Class S Sorceress. Ramdam namin ang masamang enerhiya na nagmumula sa iba't ibang direksyon.
Ilang sandali pa, isang surpresang atake ang bumulaga sa pwestong kinaroroonan namin. Umulan ng mga palaso at nakagawa man ng barrier ang dalawang Class S na kasama namin, hindi pala basta-bastang mga palaso ang tumatama sa amin. May itim na likido sa arrowheads nito na tumutunaw sa barrier kaya kinailangan pang gumawa ng magkakapatong na barriers.
"Ano yung itim na likido na 'yun?"
"Blacquid." Isang tingin pa lang ay alam na ni Brylle. "Ginawa ng mga Hollowick para patayin ang sino mang Luxurian." At sa naalala ko, 'yun din ang nakalagay sa punyal na ginamit noon para sana patayin ako noong sanggol pa lang ako.
Ngunit bukod sa Blacquid, grabe 'yung pagtitig ni Brylle doon sa mismong palaso. Para bang may nalalaman o gumugulo sa isip niya na ayaw niya lang sabihin.
Ilang segundo ang itinagal ng pagpapaulan sa amin ng Blacquid Arrows. Ngunit nang saktong alisin na nina Lolo Lorcan at Sorceress Louhi ang barrier, isang grupo naman ng nilalang ang umatake saamin.
"Cruorlusts!" Mga dark-type humanoids sila na may kulay asul at magagaspang na balat, mahahaba at kulay-violet na dila at ayon sa pangalan nilang 'Cruor' na ang ibig sabihin ay dugo, mga brutal na nilalang sila na gustung-gustong makakita ng dumadanak na dugo.
Nagmistulang ambush ang nangyari. May mga isip ang Cruorlusts at bihasa rin sa pakikipaglaban. Makunat rin sila at hindi basta-bastang tinatablan ng Elemental Magic.
"Mabuti pa, mauna na kayo sa palasyo! Batang Zaffiro, Sylfer, kayo nang bahala sa Prinsesa!"
"Pero Lolo—" Hindi ko na natuloy pa ang sasabihin ko dahil humarang na si Brylle at hinawakan ang kamay ko. "Kaya na nina Master Lorcan at Sorceress Louhi 'yan. Tandaan mo, mga Class S sila."
"Mas mahalaga ang kaligtasan mo, Princess Love." Dagdag naman ni Sylfer.
Muli na akong sumakay kay Milka samantalang sina Brylle at Sylfer naman ay sumakay na uli sa mga Peryton nila. Hindi na kami lumipad dahil alam naming delikado pa rin sa ere kaya ang plano ay lisanin na agad ang gubat na 'yun.
Ngunit hindi pa man nga kami lubusang nakakalayo, muling umulan ng mga palaso. Tinamaan 'yung mga Peryton na sinasakyan nina Brylle at Sylfer at wala silang nagawa kundi ang iwan na ang mga ito. Pansin ko namang ako at si Sylfer ang talagang pinupuntirya marahil dahil kaming dalawa na lang naman ang Luxurian dito.
Gumawa kami ng barriers ngunit natutunaw lamang ito sa Blacquid Arrows. Dahil doon kaya kinailangang humiwalay sa amin ni Sylfer para mabawasan ang tumatamang palaso sa grupo namin.
"Wag kang hihiwalay sa akin, Yana!" sigaw ni Brylle.
Ngunit minamalas pa rin talaga kami dahil isang palaso ang nakalusot at ako sana ang tatamaan noon kung hindi lang iniharang ng alaga kong Rohlynx ang kanyang sarili.
"Milka!" Hahawakan ko sana 'yung parte na tinamaan kay Milka ngunit hinila ni Brylle ang kamay ko...
"Wag!" At hinila niya ako palayo kay Milka. "Sasabog siya!"
Sasabog? Gumawa ng panibagong barrier si Brylle. This time, hindi na kasama ang alaga kong Rohlynx sa loob nun.
Hindi na ako nakapag-react. Sobrang bilis ng pangyayari. Mabilis na humalo 'yung Blacquid sa dugo ni Milka na dahilan para malagas ang mga balahibo niya. Kitang-kita ko ang pagmarka ng lason sa kanyang katawan na hugis sapot ng gagamba.
"Brylle, magagamot ko pa siya..."
"Wala nang oras, Yana."
Wala akong magawa kundi ang tingnan lang sa malayo ang paghihirap ng alaga kong Rohlynx. 'Yung mga mata niyang umaamo lang kapag kaharap ako, nabalot ng sakit at takot. At nang makita ko siyang lumuha, naluha na rin ako. "Milka..."
Hinarangan ni Brylle ang paningin ko at pilit na inilubog sa yakap niya, "Ayokong makita mo 'to, Yana." At hindi ko na nga talaga nakita ang sumunod na nangyari kay Milka.
Basta nakarinig na lang kami ng nakakabinging pagsabog kasabay ng huling 'Ngawr' ng alaga ko. Nang ipawalang-bisa na ni Brylle ang barrier, doon ko pa lang nakita ang mga nangyari.
Sumabog nga... at walang natirang bakas ni Milka sa paligid. Wala na ang alaga kong Rohlynx. Wala na siya!
Napaluhod ako ngunit hindi pa man ako nakakapagluksa sa trahedyang sinapit ng alaga ko, agad na napalitan ng matinding poot at paghihiganti ang naramdaman ko. Lumabas na ang taong may pakana ng lahat ng ito, "Myera..."
Nakangisi siyang humakbang mula sa dilim. May mga alagad pa siyang Cruorlusts sa magkabilang gilid ngunit mukhang naubusan na ang mga ito ng mga pana nilang may lason.
Isang bagay agad ang pumasok sa isip ko—ang sumugod! Ngunit hindi ako pinayagan ni Brylle na gawin 'yun. "Hindi pa ligtas, Yana. Sigurado akong may natitira pang palaso si Myera at hangga't magkatabi tayo, hindi niya yun maititira sayo."
Tama si Brylle sa kanyang palagay. May nakatabi pa ngang nag-iisang palaso si Myera. Ngunit may napagtanto naman ako...
"Alam mong siya 'yun, Brylle?"
"Ano?"
"Alam mong si Myera ang umaatake sa atin! Alam mo na noong tinitigan mo 'yung palasong may lason kanina!"
"Oo, pero—"
"Bakit hindi mo agad sinabi?" Naitulak ko palayo si Brylle. Hindi ko alam kung bakit niya ginawa 'yun pero naiinis ako. At tinawanan lang kami ni Myera nang mapanood niya 'yun. "Anong nakakatawa? Gusto mong nag-aaway kami dahil sayo?"
"But of course! Bakit nga ba hindi niya sinabi na ako ang umaatake sa inyo? Dahil pinoprotektahan niya ako at mahal pa ako ni Brylle—ng aking Kaleel!"
Tiningnan namin pareho ang reaksyon ni Brylle. Ni hindi man lang siya umimik! Ni hindi man lang niya sinalungat 'yung mga sinabi ni Myera! So anong ibig sabihin nun? Totoo 'yun? Na mahal pa niya talaga si Myera kaya parang pinoprotektahan niya ito?
Nanikip ang dibdib ko dahil sa halo-halong emosyon. Hindi ko na alam kung anong dapat maramdaman ngayon. Katulad ng nangyari kay Milka, parang gusto ko nang sumabog!
Lumayo ako kay Brylle at hindi ko na siya hinayaang pigilan ako. Lakas-loob kong hinarap si Myera kahit alam kong may mga Cruorlusts na nakapalibot sa kanya.
"Alam ko kung bakit ka nagpunta rito. Gusto mo akong patayin para mabawi mo si Brylle, tama ba? Nagpunta ka rito at nagsummon lang ng mga Cruorlusts para i-ambush kami! At kapag nagkagulo na, lalasunin mo uli si Brylle para angkinin siya! Pero itong tinitiyak ko sayo, Myera. Hangga't hindi mo ako napapatay, hindi ka rin magtatagumpay!"
"Hinahamon mo ba ako?"
"Oo! Tapusin na natin 'to! Prinsesa ng Lux laban sa Prinsesa ng mga mang-aagaw!" Napataas siya ng kilay dahil sa sinabi ko. Totoo naman 'yun.
"Yana, this is not a good idea..."
"Wag mo na akong pigilan, Brylle! Hindi ka pa rin ba naniniwala sa akin na matatalo ko siya?"
"Ayoko lang na masaktan ka."
"Hindi na ako mahina!"
Wala nang makapipigil pa sa one-on-one na laban namin ni Myera. Humarap siya sa akin at pinag-cheer siya ng mga halimaw na Cruourlusts. Humarap din ako sa kanya ngunit hindi ko man lang narinig ang boses ni Brylle para palakasin ang loob ko.
Nagpaikot-ikot muna kami at nagpalitan ng maaanghang na salita, "Alam mo kung ano ang hindi nagbago sayo? 'Yang katangahan mo." Pang-asar na sabi sa akin ni Myera.
"Kung may mas tanga man sa atin, ikaw 'yun dahil umaasa ka pang makukuha mo si Brylle! Ako lang ang tunay niyang mahal, Myera! Ako lang, bruha ka!"
Nakita ko ang pagdilim ng paningin ni Myera dahil sa pagkapikon. Una siyang umatake gamit ang pinaka-malakas na Dark Spell na alam niya ngunit hindi man lang ako tinablan nun. Tinawanan ko siya para lalo siyang asarin. "Hanggang dyan lang ba ang kaya mo, Myera?"
"Malakas lang naman ang loob mo dahil alam mong pinoprotektahan ka ng Lux Amulet. Kung matapang ka, bakit hindi mo hubarin 'yan at labanan mo ako ng mag-isa!"
Sa pagkakataong iyon, muling sumabat si Brylle. "Wag mo na siyang susundin, Yana! Patibong niya lang 'yan!"
Ikinatuwa naman ng bruha ang reaksyong iyon ni Brylle, "Bakit? Kasi totoong wala pa rin siyang binatbat sa kakayahan ko!"
"Ah ganun?" Dahil sa kayabangan niya, tinatanggap ko ang hamon niya. Hinubad ko ang Lux Amulet at ibinato ko ito kay Brylle.
"Yana!" Galit na talaga ito sa katigasan ng ulo ko pero hindi ko siya pinansin. Ngayon ko papatunayan na iba na ang naabot ng kapangyarihan ko ngayon. Hindi na ako ang dating iyakin at mahinang Yana.
Ipinagpatuloy na namin ni Myera ang laban. Napalibutan ako ng dark orbs sa spell na ginamit niya. Isa-isa niya itong pinatama sa akin pero ligtas ako sa shield na ginawa ko. Ngunit may isang dark orb pa rin na nakalusot sa shield ko at tumama sa braso ko.
Nangitim ang buong braso ko at pakiramdam ko'y gumagapang pa ito sa ibang parte ng katawan ko. Nakita ko ang takot sa mukha ni Brylle nang maganap 'yun. Pero inalis ko ang pag-aalinlangan niya nang magpalabas ako ng healing dust mula sa daliri ko at kusa na itong naghilom.
"Kahit wala ang Lux Amulet, hindi na rin ako basta-bastang magpapaapekto sa dark spells niyo!" It's my turn to attack.
"Blixtar från terra!"
May lumabas na kuryente sa lupa at pumalibot sa kinatatayuan ni Myera. Hindi na siya nakatakbo pa dahil sa isang kumpas ng kamay ko ay nakulong na siya sa dambuhalang bolang kuryente.
"Aaaaaaaaaahhh!" Nangibabaw ang nakakakilabot na sigaw ni Myera. Humingi siya ng tulong sa mga alagad niyang Cruorlusts pero parang natakot na ito sa kaya kong gawin. Nagsitakbuhan sila at pinabayaan ang Hollowician Princess nila.
Ilang sandali pa ay bumagsak na sa lupa si Myera. Ngunit hindi siya basta-bastang susuko. Muli siyang bumangon at masidhi pa ngayon ang kagustuhan nitong patayin ako.
"Líkami Alterazione!"
"Mag-iingat ka, Yana!" Mabilis na nagbigay-babala si Brylle.
At kahit kaunti lang ang nalalaman ko sa Dark Sorcery, naintindihan ko naman ang spell na ginamit ni Myera—isang Body Alteration Spell. Parang katulad ng pagbabagong-anyo ng mga aswang, ganun din ang ginagawa niya ngayon.
Kung dati ay bruha siya, ngayon ay halimaw na talaga! Distorted ang mukha at tinubuan pa ng dalawang pangil. 'Yung pang-ibabang katawan niya ay nag-transform na parang sa gagamba at kulay pula pa! Ang sakit niya sa mata!
Matapos ang monster spider-girl transformation niya, ang yabang ng mukha niya na feeling niya ang ganda-ganda niya! Sinimulan pa niya akong tirahin ng sapot niyang may asido.
Iniwasan ko ang bawat atake niya at naisip kong 'wag nang patagalin ito. Hindi ko na siya paaasahin na mananalo siya sa laban na 'to. Tatapusin ko na agad 'to.
"Osam Sværd i Von!"
O mas kilala bilang Summoning of Eight Blades of Hope. May walong light energy-based blades na lumabas sa ere at sakto ang bilang ng blades sa walong galamay ni Myera.
Sabay-sabay ko itong isinaksak sa kanya at nang magpumiglas siya, lumipad ako papunta sa likod niya at inipon ang lahat ng enerhiya sa palad ko. Nang lingunin niya ako, pinatama ko mismo sa kanyang mukha ang huling atake ko.
"Lumină Blast!"
Panandaliang nabalot ng nakasisilaw na liwanag ang buong paligid. Ngunit nang humupa na ito, nagbalik na sa dating anyo si Myera, nakahandusay sa lupa at hinang-hina. Wala na siyang lakas para lumaban pa at ang dapat sa kanya, manghiram na ng mukha sa Warg.
"Sino uli ang mahina sa atin, Myera?" Lumapit ako sa kanya. Isang kamay ko ang humila sa makapal niyang pulang buhok upang tingalain niya ako, at 'yung kabilang kamay ko naman ay nagliliyab na sa White Flames. "Pagbabayaran mo lahat ng mga kasalanan mo sa akin!"
Handa na akong tuluyang burahin sa mundong ito ang babaeng pinakasusuklaman ko sa lahat, pero 'di ko inaasahan na pipigilan ako ni Brylle. "Tama na, Yana!" sigaw niya. "Nanalo ka na! Hindi mo na kailangang gawin 'yan sa kanya!"
"Pinatay niya si Milka!"
"Kaya dapat patayin mo rin siya?"
"Oo! Dahil 'yun ang bagay sa kanya!" Buong panggigil kong isinigaw at mas hinigpitan ko pa ang pagsabunot kay Myera. "Dapat lang talaga na mamatay lahat ng Dark Sorcerers!"
Nang sabihin ko 'yun, nakita kong may kung anong pait sa mukha ni Brylle, "Kung ganun dapat na rin ba akong mamatay? Si Clerion at ang Snow Vetters Tribe? Mga Dark Sorcerers kami, Yana. Talaga bang 'yan ang gusto mong mangyari?"
Hindi ako agad nakasagot. Tama siya, pero hindi ko mapigilan na mainis, malito at magselos. "Bakit parang ipinagtatanggol mo pa siya, Brylle?" Medyo naiiyak kong tanong.
"Hindi ko siya ipinagtatanggol."
"Pinaglayo niya tayo noon. Inagaw ka niya sa akin! Sa lahat ng kasalanang ginawa niya, ngayon pa lang ako maniningil! Bakit ipinararamdam mo na ako ang may mali ngayon!"
Tinitigan akong maigi ni Brylle. "Hindi ko siya pinagtatanggol," ulit niya at dahan-dahang lumapit sa akin. Nakikita ko ang pagkabahala sa kanyang mga mata habang nakatitig sa akin. "Pero hindi na ikaw 'yan, Yana. Kinakain ka ng galit mo. Sa kagustuhan mong patayin si Myera, tingnan mo ang kapangyarihang gamit mo."
Napatingin ako bigla sa kamay ko na may nagliliyab pa rin na apoy. Nagimbal ako dahil hindi na iyon ang sagradong White Flames ng Lux. Hindi rin 'yung normal na apoy na madalas gamitin ng lahat. The fire in my hand was black and dark. Shadow Fire.
Dahil sa masamang intensyon ko na maghiganti at patayin si Myera, nag-reflect din iyon sa enerhiyang lumabas sa akin. Nakapagpalabas ako ng Shadow Fire nang hindi man lang ito namamalayan!
Nahiya ako sa inasal ko. Hindi na nga ako ito. Binitawan ko na si Myera at dahan-dahan akong umatras palayo sa kanya, "Makakabalik ka na sa Atreria. Sabihin mo sa kapatid mo na may pagkakataon pa kayong umatras sa digmaang balak niyong simulan."
Saka ko muling hinarap si Brylle at kinuha na pabalik ang Lux Amulet sa kanya. Malaking pagkakamali na tinanggal ko 'yun sa leeg ko para lang magmalaki na kaya ko nang lumaban kahit wala 'yun...
Pero mas malaking pagkakamali pala ang ginawa kong pagtalikod sa kalaban.
"Die, Princess of Light!" Narinig naming isinigaw ni Myera at paglingon namin sa kanya, nakatutok na sa direksyon ko ang natitira niyang Blacquid Arrow.
Sa sobrang bilis ng pangyayari, hindi na kami nakagawa pa ng barrier. Ngunit imbes na ako ang maging biktima ng ginawa niya, sa mismong Lux Amulet ito tumama. Hindi lang namin lubos akalain na ito ang babasag sa kwintas.
"Anong... paanong..." Hindi ko mahugot ang mga salitang gusto kong sabihin nang masalo ng kamay ko ang nagkapi-pirasong kristal ng kwintas. Napasalampak ako sa lupa at nag-iisip kung paano 'yun aayusin... kung maaayos pa ba.
Muli pa sanang susugod si Myera habang wala ako sa sarili ngunit sa pagkakataong ito, humarang na si Brylle. "Anong ginawa mo, Myera?!" Galit na tanong niya at hawak na niya ngayon sa leeg ang Hollowician Princess. "Anong ginawa mo sa Lux Amulet?"
"Hi—hindi ko alam... ang babaeng iyon ang dapat na mamatay!"
"Bakit kailangan mong gawin 'to?! Hindi ka naman kasing sama ng kapatid mo!"
"Dahil sayo! Dahil gusto kong bumalik ka na sa akin Brylle!"
"Si Yana ang mahal ko!"
"Minahal mo rin ako!"
"Dahil niloko mo ako!" Sa galit ni Brylle, nagpalabas siya ng Shadow Fire sa isang kamay niya. Ngunit sa kabila nito, bakas ang lungkot at takot sa kanyang boses. "Umasa akong may pag-asa pa para magbago ka pero nagkamali ako, Myera. Nagkamali ako sayo."
"Kung hindi ka lang rin mapapasaakin, patayin mo na lang ako." Nakita ko ang paglambot ng mukha ni Myera sa harap ni Brylle. Nakuha pa nitong hawakan ang kamay na nakasakal ngayon sa leeg niya. "Without you, I have nothing to live for. So please, just kill me forever." Pikit-mata nitong hiniling.
Hindi ko alam kung matatawag bang tanga o martyr itong si Myera. Ngunit isa lang ang sigurado ko, ganun niya kamahal si Brylle na kung hindi lang rin sila magkakatuluyan, mas mabuti pang ikamatay na lang niya.
* * *
(Brylle POV)
"Kung hindi ka lang rin mapapasaakin, patayin mo na lang ako. Without you, I have nothing to live for. So please, just kill me forever."
Myera wanted me to kill her and banish her completely. And I know exactly why.
Kapag simpleng kamatayan lang kasi, maari pa rin siyang buhayin uli ng kapatid niyang si Night upang gawing parte ng Draugar Army nila. Kapag nangyari iyon, maghaharap lang uli kami ngunit wala na siyang kontrol sa mga pwede niyang gawin sa pagkakataong iyon.
Muli akong tumingin sa direksyon ni Yana na balot pa rin ng takot dahil sa nangyari sa Lux Amulet niya, ngunit nakatingin din siya sa amin at naghihintay sa gagawin ko.
Saglit akong napapikit at tinimbang kong mabuti ang lahat ng nararamdaman ko. "Ikaw ang nagligtas saakin noong nahulog ako sa No-Magic Zone ng Terrashaw. Ngunit ikaw rin ang lumason sa utak ko, nag-impluwensya sa akin na maging Dark Sorcerer... at dahilan kung bakit nasaktan ko si Yana, ang totoong mahal ko."
Muli akong dumilat at alam ko na ngayon ang dapat kong gawin—ang gusto niya ring gawin ko.
"Aschen ut Aschen. Pulvis ut pulvis.
Darf Sie exsisto beim endlos poena."
Oblivious Death Whisper lamang ang nararapat na ipataw ko sa kanya. Isang kamatayang walang kasiguraduhan kung saan tutungo pagkatapos nito. At tanggap ni Myera kung ano ang kabayaran sa lahat ng mga ginawa niya. Lumuha siya ngunit hindi nanlaban.
"Aschen ut Aschen. Pulvis ut pulvis.
Zoen nex quod nunquam ut reverto iterum."
At ilang minuto ang itinigal ng paghihirap niya sa mga kamay ko bago siya tuluyang nalagutan ng hininga. Her body turned into ashes and became dirt on the ground. I cursed her to never to return again.
Dumating naman na muli nang magkakasama sina Master Lorcan, Sorceress Louhi at Sylfer. Naabutan nila ang eksenang paggamit ko ng Dark Sorcery para tapusin si Myera ngunit hindi na nila iyon pinagtuunan pa ng pansin.
Sabay-sabay naming inalala si Yana na tulala sa kanyang kinauupuan at paulit-ulit sa pagbanggit ng, "Wala na ang Lux... iniwan na tayo ng Lux."
* * *
Masaya kaming sinalubong ng mga tao sa palasyo nang makita nilang tagumpay naming nakumbinsi si Sorceress Louhi na sumama sa amin. Ngunit agad din napalitan ng takot ang kanilang reaksyon nang sabihin na namin ang masamang nangyari bago kami nakabalik.
Ibinalita namin na sinugod kami ni Myera at mga kampon nitong Crourlusts at binalak nilang patayin ang Prinsesa sa pamamagitan ng Blacquid Arrow. Nakaligtas man si Yana, tumama naman ang palaso sa Lux Amulet at dahilan para mawalan ito ng bisa.
"Prinsesa, subukan mo ngang magpalabas ng White Flames," utos ni King Hollace kay Yana ngunit...
"Kanina ko pa po sinusubukan pero walang nangyayari."
Hindi ko maipinta ang itsura ng mga leaders at iba pa naming kasama ngayon. Dahil kung si Yana nga na mismong holder ng Lux ay hindi na magawang makapagpalabas ng sagradong White Flames, "Ibig sabihin ay wala na talaga ang Lux. Binawi na ito ng Luxurian Being."
Nakapanlulumo ang katotohanan at paliwanag naman ng pinakamatanda sa Ministry, "Sa sunud-sunod na kataksilan dito sa White Light Clan, pinaparusahan na niya tayo. Hindi nagustuhan ng Luxurian Being na nadungisan na ng kadiliman ang dapat sana'y malinis at tapat nating angkan."
Katahimikan ang bumalot sa lahat. Nang muli ko namang tingnan ang mukha ni Yana, nakikita ko ang labis na pagsisisi sa mga mata niya. Alam ko at sigurado ako na sinisisi niya ang sarili niya sa lahat ng ito. Nararamdaman ko ang labis na pagkabagabag niya dahil nakapagpalabas siya ng Shadow Fire.
Kinagabihan, pinili ni Yana na mapag-isa. Bukod sa problema sa nawalang kapangyarihan ng Lux, nagluluksa rin siya sa pagkawala ng alaga niyang Rohlynx. At wala akong magawa kundi ang tumayo lang sa isang gilid at panoorin siya.
Paano? Paano ko nga ba siya matutulungan ngayon?
"Bakit 'di mo siya lapitan?" Bigla ko na lang narinig ang boses ni Prince Rouel.
"Mas gusto niyang mapag-isa."
"Mas kailangan niya ng kasama ngayon." Napakunot ang noo kong tumitig ng masama sa kanya. Nagmamamagaling na naman! "Kung hindi mo alam ang gagawin mo, pwede bang ipaubaya mo na lang muna siya sa akin? Kakausapin ko lang siya para pagaanin ang loob niya."
"And what makes you think na magagawa mo nga 'yun?"
"Noong akala naming namatay ka, sino sa tingin mo ang kasama niya? Sa pagkakataong ito Wizard, ang gusto ko lang ay makatulong sa kanya."
Kahit pa mainit ang dugo ko sa Prinsipe, ramdam ko naman ang sinseridad at kagustuhan niya talagang makatulong. At mahirap mang aminin pero marahil nga ay tama siya. Sigurado akong na-master na ni Prince Rouel kung paano damayan ang naluluksang si Yana.
"Fine. Go ahead and talk to her." Aalis na sana ang Prinsipe ngunit may isang babala muna ako sa kanya. "And just so you know, I won't be leaving my place here. Bantay-sarado ko kayo kaya kung may binabalak ka pang iba, 'wag mo nang ituloy.
Isang pang-asar lang na ngiti ang itinugon niya pero ilang sandali pa ay lumapit na siya sa babaeng pinag-aagawan namin.