(Alyanna POV)
Isang kagimbal-gimbal na delubyo ang nangyari. Sa unang pag-atake ng mga kalaban, ang Twin Walls ang sinira nila. At hindi pa man nga kami nakaka-recover doon, napabagsak pa nila ngayon sa lower ground ang palasyo.
Ngunit ang pinakadahilan ng panlulumo ng lahat ay ang pagtalikod sa amin ng 5th Family. At makakalaban pa namin sila sa parating na digmaan.
"Kapag nalaman ng mga kaalyado natin ang tungkol sa pagbaliktad ng Flemwall, maaring talikuran na rin nila tayo at hindi na tumulong sa digmaan." Nag-aalalang sabi ni King Roland.
"Yan din ang ikinakatakot ko. Bukod sa 1st Family, sa Flemwall nanggagaling ang pinakamatinding pwersa ng ating angkan." Pag-aanalisa naman ni Lolo Wendel. "Nakasisiguro akong hindi na tayo makakaasa sa mga non-Luxurian Wizards na pumapasok sa camp. Hindi nila gugustuhin na masangkot sa gulo kung saan makakalaban nila ang Headmaster."
"Nariyan pa sina Lolo Lorcan at Sylfer." Napatingin ang lahat sa mga taong nabanggit ko. And they all looked at them with doubt.
"Paano tayo nakakasiguro na hindi nagpapanggap ang dalawang 'yan?" saad ni Chief Clive.
"Hindi lahat ng Flemwall ay kalaban, Chief Clive!" pagtatanggol ni Lolo Lorcan. At hindi lang sarili niya ang kanyang pinagtanggol, "Batid kong may mga inosenteng Flemwall lang din ang nadamay sa maling desisyon ni Diazo."
"Nagsasabi siya ng totoo," sagot naman ni King Roland. "Habang nagkakagulo, naramdaman kong ilan sa mga myembro ng Flemwall ang napilitan lang na sumama sa Headmaster. Nagulat din sila sa ginawa ng leader nila, ngunit wala silang magawa kundi ang sundin siya."
"Ano kaya kung sundin na lang natin ang hinihinging kundisyon ng mga Hollowick?" Mungkahi ng isang elder.
"Papayag ka na makaisang-dibdib ng Prinsesa ang pinuno ng mga kalaban?"
"Kung 'yun ang tanging paraan para matigil ito."
Nakikita ko na ang pagtutol sa mukha ng mga magulang ko. Pero ang unang tumayo at naglakas-loob na magsalita ay si Brylle. "Hindi po ako papayag."
"Hindi namin hinihingi ang opinyon mo, Wizard." Pinagalitan siya ng isang nakakatanda.
Ngunit sa wakas ay binigyan siya ng pagkakataon ng isang leader na noong una ay labis ang pagtutol sa amin. Si King Roland mismo. "Hayaan niyo siyang magsalita! Lahat ng naririto ay may karapatang maglabas ng kanilang saloobin."
Dahil dito, mas kampante nang magsalita si Brylle. "Kapag nakuha ni Night ang gusto niya, mas lalong malalagay sa panganib, hindi lamang ang buhay ng Prinsesa, kundi ang buong angkan at lahat ng sangkot dito."
"May mga nalalaman ka ba sa pinaplano ng kalaban?"
"Opo. Marami." Napangiti ako nang sabihin ni Brylle 'yun. Nagpapasalamat talaga ako dahil nagbalik na siya para ibahagi sa amin 'to.
"Masasabi mo ba kung kailan sila eksaktong aatake sa atin?"
"Minsan nang nabanggit sa akin noon ng Hollowician Princess..." May pakinabang din pala ang Myera na 'yun! Buti nagkukwento siya kay Brylle. "The war will happen the night before the start of the Ornus Moon Season. Sinadya nila 'yun para isunod agad na sakupin ang Mortal World."
"So in seven nights? Sa gabing 'yun din mismo ang Light Flag Feast!"
"Opo. Ayon din 'yun sa kagustuhan ng leader nilang si Night Hollowick na ipareho ang petsa ng First Dark War at Second Dark War."
"Ano pang mga plano nila? Anong uri ng mga estratehiya ang gagawin nila?"
"Sa tulong ng mga kumamping Luxurian sa kanila," Ang mga Flemwall. "Magsasagawa sila ng spell upang bumuo ng isang hukbo ng mga yumao nang Dark Sorcerers—isang Draugar Army."
"Padagdag nang padagdag ang mga kalaban! Una, mga Hollowick lamang. Tapos sinundan ng mga Flemwall Wizards. At ngayon, isang hukbo ng Draugar! Ibig sabihin, mas lalo tayong dehado sa digmaan!"
"Pero hindi rin sagot ang hinihingi nilang pagpapakasal ng Prinsesa kay Night Hollowick. Kapag nangyari 'yun, mas padadaliin lang nito ang pag-alipin nila sa White Light Clan. At kung hindi man matuloy ang digmaan dito sa Otherworld, itutuloy pa rin nila ang pagsakop sa Mortal World," paliwanag ni Brylle. "Kung hindi natin sila pipigilan, wala nang iba pang makakagawa nun. Sa atin lamang po dumidepende ang lahat ng Otherworlders."
Natahimik ang lahat sa pag-iisip. Pinagnilay-nilayan nila ang mahabang speech ni Brylle kaya tingin ko'y panahon na rin para dagdagan ko ito.
"Naniniwala ako sa mga sinabi ni Brylle. 'Wag tayong mawalan ng pag-asa. Nasa atin pa rin ang Lux. Kahit na iniwan tayo ng ibang Flemwall, ang Luxurian Being ang magbibigay sa atin ng lakas at magpaparusa sa kanila. Hindi niya tayo iiwan."
At dahil dito, unti-unti na naming nakikitaan ng pag-asa ang mga mukha ng kausap namin.
"Magtutungo ako sa Plumdust City upang puntahan ang Flemwall Wizardry Camp," sabi ni Lolo Lorcan. "Maaring makinig pa sa pakiusap ko ang ibang non-Luxurian Wizards para tulungan tayo sa laban."
"Kung ganun, simulan na rin nating lapitan ang mga mapagkakatiwalaang tribo na matatagpuan sa iba't ibang panig ng Otherworld," wika ni Lolo Wendel. "Ipapadala ko ang mga pinakamaliliksing Aerssians para ibahagi ang mensaheng ito."
"Ang Terrashaw na ang bahala sa pansamantalang defense zone nitong palasyo," saad naman ni Chief. "Gagawin namin ang lahat para madepensahan pa rin lupain ng Lux sa araw ng digmaan."
"At ipaubaya niyo sa amin ang mga sandatang gagamitin ng mga kawal. Gagamitin ko ang lahat ng yamang itinatago ng aming kaharian." Nakangiting sabi naman ng Hari ng Glaciever.
"Kung ganun, makakapagsimula na rin tayong bumuo ng estratehiya. May the legendary Luxurian Being guide us." Nang banggitin ito ni King Hollace, pumikit ang lahat at sabay-sabay na nag-alay ng dasal ng patnubay.
"Brylle..." Muli ko namang kinausap sa isip si Brylle. Nakadilat ang isang mata ko at nakatingin sa kanyang direksyon. "I'm proud of you."
"I'm proud of you too. Let's do this!" Nagngitian kami at saka na namin itinuloy ang dasal na sana'y pinapakinggan ngayon ng Luxurian Being.
* * *
Hindi sapat ang panahong natitira saamin. Ang araw ng digmaan ay papatak eksaktong isang linggo mula ngayon. Hindi ito tulad ng test na ginawa ko noon na kapag natalo ay mapupunta ka sa safe zone. Kapag natalo kami, buong Otherworld at Mortal World ang nasa danger zone.
Grabe ang pressure. Parehong emosyon, utak at katawan ko ay sumisigaw na ng pahinga.
Kaya naman matapos ang strategic plans na binuo namin kasama ang mga leaders, saka pa lang kami nagpasyang magpahinga. Lumabas na ako ng silid at nag-unat ng katawan ko. Nag-iisip ako kung meron bang spell na nakakaalis ng pagod.
Mayamaya pa ay nakaramdam ako ng dalawang kamay sa baywang ko, "Are you okay?" Si Brylle pala. Tumango ako at nginitian ko siya para 'di siya masyadong mag-alala. Pero sinimangutan niya ako dahil alam niyang nagkukunwari lang ako.
Hinawakan niya ako sa may gilid ng ulo ko at saka hinalikan sa noo, "Tara. Magpahangin muna tayo sa labas."
Inabot na niya ang kamay ko at sabay na sanang maglalakad, kaso nagbukas uli 'yung pinto sa silid na pinanggalingan namin at sina King Roland at Rouel ang lumabas. Napatingin sila sa amin ni Brylle—at sa mga kamay namin. Medyo awkward, pero hindi kami nagbitaw.
"Saan kayo pupunta, mahal na Prinsesa?"
"Magpapahangin lang po kami sa labas ni Brylle."
Nahuli kong tumingin ang Glaciever King kay Rouel. At bago pa man ito magsalita uli, "We should go ahead, Father." Pag-aaya ni Rouel sa kanyang ama na para bang sadyang umiiwas. "Excuse us, Your Highness," sabi niya sa akin at saka na sila umalis na mag-ama.
Nang maiwan na uli kaming dalawa ni Brylle, "Alam na ni King Roland na may gusto ang anak niya sayo. Kaya nga ganun na lang ang pagtutol niya saatin noong una."
"At siguro alam na rin ng Hari na hanggang pagkakaibigan lang ang maibibigay ko sa anak niya." Ilang ulit ko naman na kasing pinaintindi kay Rouel ang sitwasyon namin. Alam na niyang walang makapagbabago sa desisyon ng puso ko.
Nagpasya na kaming magpunta sa labas ni Brylle. Madilim na at malamig din ang simoy ng hangin. Nagbago na ang tanawin namin dito dahil nga nasa lower ground na itong palasyo. At noong inakala namin na masosolo na namin ang isa't isa, biglang may sumitsit sa amin.
"Psst!"
"Sino 'yun?"
"Malay ko. Baka hangin lang."
"Psst!"
"Oh! Sumitsit na naman!"
Kumunot na ang noo ni Brylle. "Sinong nariyan?!" Attack mode na nga sana siya kaso...
"Psst! Psst! Pssssst!" Paulit-ulit na sitsit? Mga three times pa siguro!
Parang kilala na namin kung sino 'yun. "Vander?"
Nang banggitin namin ang pangalan niya, saka pa lamang siya lumabas mula sa halamanan. "Master, Master, Master! Yana, Yana, Yana! Ako na nga 'to!" Si Vander nga! Walang halong duda!
Masaya naming sinalubong ang lamang-lupang missing-in-action. Natutuwa kami na maayos naman pala siya. "Bakit naman sitsit ka lang ng sitsit sa amin? Akala namin kung sino na."
"Pasensya ka na, Master Brylle. Baka kasi magalit ka na sumingit ako sa eksena niyo ni Yana."
Tinawanan naman namin siya, "Buti ayos ka lang! Nasaan na nga pala si Lala?"
"Nagpakita na rin siya sa Master Kerria niya." Tapos nagbago bigla ang expression ng mukha niya. Parang nagpapaawa, and I swear, nakakaawa talaga siya. "Pasensya na po kayo kung pareho kaming nagtago ni Lala noong hinanap na kami ng mga leaders."
"Tama lang ang ginawa niyo ni Lala. Kung hindi kayo nagtago, baka sapilitan nila kayong pinagsalita tungkol sa propesiya."
"At hindi rin namin papayagang mangyari 'yun. You did a great job, Vander."
"Talaga? Hindi kayo nagtatampo sa amin?"
"Hinding hinding hindi, Vander!"
"Wag mo nga akong gayahin, Yana!" At nag-group hug na lang kaming tatlo. Actually, kaming dalawa lang ni Brylle, tapos inipit namin sa gitna si Vander. Masaya pa rin ako dahil sa kabila ng kaguluhan dito sa palasyo, walang nasaktan sa mga minamahal ko.
"Pero kailangan mo pa ring bumawi sa amin, Vander."
"Sa paanong paraan, Master Brylle?" Biglang nag-glow ang mukha nito. Gustung-gusto niya talagang inuutusan siya.
"May mahalaga kaming tungkuling ibibigay sayo. Ikaw na ang magsabi, Yana."
"Kailangan namin ang tulong mo para hikayatin ang lahat na pwedeng makatulong sa atin. Kailangan na mapabilis ng mga Terrashaw ang pag-gawa ng bagong wall of defense ng palasyo at malaking bagay kung lahat ng creatures under the Element of Earth ang aalalay sa atin."
"Yun lang pala! Makakaasa po kayo!" Nakasaludong sagot sa amin ni Vander. "Ako na ang bahalang magtawag ng mga katropa kong tutulong sa atin!"