عروس الجنوب

الــبـارت " الأربـعــــون "

فَـي رفوف الذكريات
گانت ذاكرتي هيَ الأقوى على الإطلاق
لا تُنسى أبداً..
جـعلتني شخصاً ربما سيئاً
شخصاً يكرهُ كُل شيء حوله
لستُ انا بهذهِ الفِگر
ولكـنها الحياة...
‏كُنت اتسأل دوماً وكُنت أتمنّى لو كان بوسعي أن اعرف,أين يستريح المُتعبون من انفسهم؟.

﹏﹏﹏﹏﹏﹏﹏﹏﹏﹏﹏﹏﹏﹏

الرَجُل قائد المرأة لا سَيدها ، والمرأة تعيش في كَنَفه ، وليست أَمَته .
لَم تَكُن القَضية يوماً مَن يُسيطر على مَن ، ولا مَن يلغي مَن !
القَضية كانت دَوماً في أن يَحنو الكُل على جُزئِه ، وأن يَحتمي البعض بكُلّه .
وحين فَطَر الله الرجل ليكون قوّاماً !  هذا يعني أنه جعلَ المرأة إحدىٰ مَسؤولياته لا إحدىٰ مُمتلكاته .
وحين فطَر المرأة لتعيش في كنفِ الرجل فلِأنه فطَرُه - أولًا - أن يُحب رقّتها ويستعذب لُجوءَها إليه .

﹏﹏﹏﹏﹏﹏﹏﹏﹏﹏﹏﹏﹏﹏

الـكاتبـــة فــاطمـــة عـلـــي🦋🦋
﹏﹏﹏﹏﹏﹏﹏﹏﹏﹏﹏﹏﹏﹏

شهد
صار اسبوعين عمر موده
راح حسنين يجيب النتائج مالتي ومالته اني رحت وديت موده يم عمتي ورجعت للبيت مالتي نظفته و طلعت كم قطعة ملابس مال موده غسلتهن دك جهازي ......
📲📲

شهد : الووو هااا حسنين

حسنين : هااا شهد اكلج اني رايح اتغده ويه جماعتي
اذا سالو علي كوليلهم معزوم

شهد : صار بس اكلك شني نتيجتي

حسنين : من اجي نسولف

شهد : شنو نسولف كول لو ناجحه لو راسبه

حسنين : يله مع السلامه الولد يصيحون عليه.

شهد : سد الخط بوجهي..........

شهد
يا ربي شلون شلون اعرف...... ضليت بقلق للعصر اجه حسنين
ركضت من سمعت صوت السيارة دخلت لكيته يريد يغسل رحت وراه
اني اسال وهوه يأشرلي اصبري هم حقه وجهه كله صابون واني اسأل
رجع وكف بالصاله يريد يشحن جهازه بهل حجي دخل حسين تركته وباوع على حسنين شلع گلبي..

حسنين : هااا شنو گلتي

شهد : شطلعت هاي من الصبح لهسه اسألك

حسنين : من العشرة الاوائل بالكلية

شهد : سمعت بس ما مستوعبه باوعت على حسين ورجعت باوعت علي....... حسنين شنو

حسنين : مثل ما سمعتي الف مبروك انتي تستاهلين كل خير

شهد : من الفرحه فتحت اديه وحضنت حسنين

حسين
اعرف بالنتيجه طلعت من الصبح حته اشوفها
اعرفها راح تنجح بس من العشرة الاوائل انصدمت هيه كلش تحب دراستها وتستاهل .......
من حضنت حسنين متت احس مو اخوي بلحظه كرهته احساس الغيره جان مدمرني
شي مالتي شلون هيج بحظنه وهوه هم حظنها ويباركلها وثنينهم نفس العمر وبيناتهم ميانه كلش قويه حته من بجت هوه يمسح دموعها ويشاقيها على الصوت كلها لتمت باركولها
انوب موده كامت تبجي اخذتها وراحت تنومها
اني  هم تركتهم ردت اصعد صارت بوجهي تريد تروح للبيت مالتها وبيدها موده

حسين : الف مبروك

شهد : الله يبارك بيك

حسين : انطيني ابوسها

شهد : والله لحيتك تزعجها عليك الله لا تبوسها حيل

حسين : ليش خاف جانت تزعجج

شهد : ........................................

حسين : هااا شو سكتي

شهد : مو مهم انته كلت جانت

حسين : ليش ما نشوف هسه بعدها تزعجج لو لا

شهد : من رخصتك

حسين : ليش شردتي يا خوافه

شهد : مو شغلة خوف مو اني الي تذبني وترجع تلكاني نفسي متانيتك
تره الحياة ما توكف على احد انته ختاريت حياتك واني هم ختاريت حياتي من رخصتك اروح انوم البنيه

حسين : شهد تعاي ....... تركتني وراحت للمشتمل لحكتها وسديت الباب علينه

شهد : شكو حسين

حسين : هاي من شوكت تعوفيني احجي وتمشين وين الاحترام كلش هيج زعتيها

شهد : اني كتلك من رخصتك

حسين : واني ما سمحتلج تروحين

شهد : اني اسفه هسه تكدر تتفضل

حسين : مو بكيفج اكعد وانام بالمكان الي يعجبني

شهد : شنو يعني

حسين : يعني اليوم انام هنا

شهد : لا اكيد تشاقه حسين فدوه اتركني بحال سبيلي وارجع لمرتك والمكانك عوفني اني وهل طفلة حياتنا مستقره

حسين :  واني هنا هم مكاني وزوجتي

شهد : حسين ........... تعبت من المشاكل اتركني وارجع لحياتك هذا الاهتمام اعرف علمود موده بنتك الك شوكت ما حبيت بس اني اتركني

حسين : واني ما رايد احد اريدج انتي

شهد : ............. حسين

حسين : كولي يا حبيبت قلب حسين

شهد
اول مره اسمعه يحجي وياي بهاي الطريقة ضليت اباوع بعيونه
شفت النظرة الي جنت اتمنى اشوفها بيوم من الايام وهوه هم يباوع بعيوني
اني على الجربايه وهوه واكف باب الغرفه بنتي نامت بحظني وما حسيت عليها هنا عرفت دخلت گلب حسين
بهل لحظه عرفت حسين يحبني عيونه ما جانت تجذب ابد اكو بيهن لمعه وحب مو طبيعي بس ما اعرف ليش بس بيناتنا هل حب ليش ما يكون شي حقيقي يعني كدام الناس يدافعلي ليش ما يسكت مرته لو يخليلها حد كل ما تتجاوز عليه رجال احسه عبالك تتحكم بي
بعدت نظري عنه وسكتت كمت خليت موده بسريرها وهوه بعده يمنه
كعد على الجربايه اني اخذت ملابس ورحت للحمام طلعت لكيته نفس مكانه ويراسل اعرفها تماره تركته مشطت شعري من فتت منه لزم ايدي

حسين : تعاي نطلع للصاله خلي البنيه تنام

شهد
احس ما الي كل طاقه  مشيت وياه
طلعنه وطفه الضوء على موده
وكعدنه واحد بصف الثاني بس احساس متوتره عبالك اول مره اكعد يمه بهل قرب

حسين : شهد هل موضوع لازم ينحل اني معاجبني هل وضع
شهد : انحل هل موضوع من اشهر وحلينا بالشي الي تريده انته صح هل كلام لو لا

حسين : شهد لا ترجعين للبداية رحمه لاهلج

شهد : انته وين حاب نحجي من زواجنا الي خلصته وياك بعلاقه كلها برود لو بحياة مالها معنى لو بسفرك كل اسبوعين ويه صديقاتك

حسين : رجعنا لنفس الموضوع

شهد : ما رجعنا احنه هذا موضوعنا

حسين : شهد ليش حابه تشلعين گلبي

شهد : بالعكس اني تركتلك كلشي حته انته ترتاح

حسين : واني ما مرتاح بشي  لليوم

شهد : شنو بيدي اسويلك

حسين : ترجعيلي شهد انتي زوجتي على سنة الله ورسوله وام بنتي
هسه شنو اريد اسوي بيج من حقي بس ما حاب اغصبج على شي انتي ما عاجبج ولا من گلبج

شهد : ........ الزواج مو بس عقد وانتي زوجتي واني زوجج وهل كلام
  الزواج حب وموده ورحمه واني ما شفت منك ولا وحده من ذني

حسين : واني اعترف مقصر بحقج اعترف ما جنت حاس بهل نعمه

شهد : مو مهم

حسين : شهد والله مشتاقلج حرام عليج هيج حارمتني منج
شهد : ........ احجي بداخلي........... واني هم مشتاقتلك والله
حسين : شهد كلبج ما حن عليه ما تريديني ما مشتاقه لحبيبج
شهد : هوه يحجي واني العبره خنكتني لان صدك مشتاقه له ومحتاجته واريده يمي

حسين : لا تضلين ساكته احجيلج شي

شهد : حسين فدوه اني بصعوبة عبرت ذيج المرحله لا ترجعني للصفر اتركني عايشه بحياتي لوحدي

حسين : ما اتركج شهد انسي هل موضوع وخليها بالج راح اضل اجي يمكم كل يوم كتلج ما اريد اغصبج على شي بس اني راح اتعامل بكلشي طبيعي وخلي علاقتنا ترجع احسن من قبل بالف مره
اليوم راح اتركج وباجر اني يمج مو لشي بس حته تفكرين زين

شهد
تركني وطلع وهنا عرف اني بدت معركتي الجديده يعني كلت راح ارتاح خلصت من الحمل والتعب وخلصت من الكلية وتعبها انوب طلعلي حسين من جديد استغفر الله ربي رحمتك بيه
نمت بيومها وره تفكير بكلشي بس رغم كل هل تفكير ما وصلت لنتيجه بس لشغله وحده حسين حس بغلطته وجاي يصلح كلشي هدمه بيده

.
.
.
.

اليوم الثاني
كعدت من الصبح على صوت مي يجري بالسنك
باوعت الساعه بالسبعه كعدت ماكو موده يربي منو ماخذها خاف سجى . ..........
طلعت اباوع حسين مبدل وريحة العطر تارسه البيت الشعر يجنن باوعت علي تمنيت اكله شكد حلو

حسين : صباح الخير

شهد : صباح النور

حسين : اجيت عليكم لكيتج نايمه بس موده كاعده بدون صوت وفاتحه الكماط مالتها طلعتها وشربتها حليب جاي ادخل اكعدج هسه
اعرف بيج سهرانه من وراها ان شاء الله اليوم اني اسهر عليها وخليج تنامين ترتاحين

شهد : ما حجيت شي بس اباوع علي......... احجي بداخلي..... بس كلي شتريد على شنو ناوي تعبت اريدك وما اريدك

حسين : اعرف بيج تحبيني بس مو لهل درجه صار ساعه تباوعين عليه......
على العموم اني رايح للشغل من ارجع اتغده وياج حضريلنه غده من ايدج الحلوه تمام يله مع السلامه

شهد
باس راسي وطلع حرت شنو اسوي بالبدايه كلت خلي يحجي لوحده ضليت افكر بطلبه مال الاكل ساعه اكول اسوي تبسي ولحم ساعه كبه انوب اكول كلشي ما اسوي واني شعليه غسلت لموده ورضعتها ونامت كمت سبحت اني انوب كعدت كلشي ما عندي اسوي رحت يم خالتي شويه نظفت الحديقه والوقت ما خلصان كلت اسوي برياني ودجاج احسن شي
رحت سويت اكل وطفيته بهل مده كلها اني التفكير ينهش بعقلي كاعده صافنه بزماني دخل حسين بيده الستره مالته

حسين : السلام عليكم

شهد : وعليكم السلام الله يساعدك

حسين : حبيبي ويساعدج

شهد : خجلت منه موت يمه عبالك مو زوجي متت بدمي

حسين : شبيك يحلو ليش خجلان

شهد : لا ماكو شي

حسين : تمام ادخل اسبح من اطلع نتغده ونسولف ليش خجلانه

شهد : اشو دخل سبح بالحمام مالتي اني ستغليت الوقت اخذت الاكل وصبيته بالبيت الجبير يمهم
شفته طلع من المشتمل وصعد فوك من نزل باس راسي كدام الكل

حسين : عاشت ايدج ريحة الاكل تارسه البيت

شهد : خجلت منهم اباوع تماره تريد تاكلني بسنونها

سجاد
رجعت للشغل مالتي بس بدون كل واهس مجرد جسم يتحرك
امي كاسره خاطري اعرف بيها محترگ گلبها عليه بس شبيدي اسوي مو شي سهل واكدر اعبره
بيتنا اني وفرح دمر اعصابي دمر كل حياتي ما دخلتله مره اذا ما نهاريت
بيوم قررت اروح لبغداد بس ما كتلهم من سالتني امي كتلها راجع للشمال لان ما اريد بيت خالي فلاح يعرفون
خابرت صديقي عنده شقه وكلت اكعد بيها قبل ما اطلع بيوم رحت سلمت عليهم

سجاد : خالي اني رايح

صادق : بويه سجاد هذا امر ربك لا عتراض علي

سجاد : ونعم بالله

ام سجاد : يمه فدوه اروحلك لا اطول هناك

سجاد : ان شاء الله يمه

الجده : حبوبه سجاد من اغديلك فدوه ونذر لا تغهر رويحتك البت راحت يم رب كريم واحسن مني ومنك
سجاد حبوبه دير بالك على شبابك يمن فدوه لوجهك

سجاد : ان شاء الله حبوبه

كرار : سجاد لا تتاخر

سجاد : ان شاء الله خويه...... كرار اريد منك شغله

كرار : امرني

سجاد : ما يأمر عليك ضالم....... خويه البيت وغراضه وكلشي بي اريدك تبيعه اني باجر طالع الصبح انته باجر ابدي بالموضوع ولا توكف على الشراي شينطيك مبلغ بيعه

كرار : ليش خويه غير بيتك

ام سجاد : يمه سجاد بيتك هذا شكد تعبت علي حرامات تبيعه

سجاد : مو مهم البيت يمه خلي يولي .........كرار بعد ما اوصيك

كرار : على امرك صار

شهد

صار حسين يوم يمي يجي ويوم يم تماره
يوم الي يمي من وكت احضر كلشي احتاجله وادخل واقفل الغرفه عليه
يجي هوه ينام بالصاله
اني اتقصد اسوي هيج بلكي يمل ويروح
بيوم من الايام هوه يمي بس اجه من الدوام بوجهه راح نام بالغرفه
ضليت اني كاعده بالصاله  والله لو مو اتكسر من القنفه ما اتقرب للجربايه وانام عليها
للمغرب كعد هم يشتغل على اللابتوب و بالغرفه
هاي احنه بدون كلام صارت بالتسعه بليل حته عشه ما سويت كلت حته يطلع تركته اخذت موده ورحت يم بيت عمي للعشره وهوه ما طالع سالوني علي كتلهم يشتغل بالحجي شفته طلع من المشتمل......  ركضت دخلت الغرفه مالتي شويه ورجع بيده علاگه
.
.
.
.
.

حسين : تعالي نتعشه وصيت من بره

شهد : ما الي نفس اتعشه بس انته

حسين : اوكي تمام لعد كومي بس رتبي بصينيه

شهد : كمت خليت الاكل وجبته اله هوه كاعد بالصاله

حسين : بطلي عناد وتعاي

شهد : مو عناد بس ما اريد

حسين  : من اكمل عشه اريد نكعد سوه نسولف نومي موده وتعاي

شهد : صار

.
.
.
.
.
.
.
.
شهد : نومت البنيه وطلعت لكيته شايل الصينيه وينتظرني بس شافني شمر جهازه

حسين : تعاي هنا

شهد : كول حسين

حسين : لشوكت تضلين بهل اسلوب والتعامل
كلت ميخالف زعلانه وحقها بس ما تشوفين طولتي

شهد : زين من كلت حقها رحمة الله على والديك

حسين : شهد لا اطلعيني من طوري

شهد : انته شجابرك على هل شلعان الگلب جاي اكلك ارجع لزوجتك

حسين : ولج لعد انتي شنو مو زوجتي شهد تتعودين على هل وضع كان بها ما عاجبج راح يكون وياج غير تصرف

شهد : اي وضع هذا مال كل يوم عد وحده
شوف حسين شنو تريد تتصرف بكيفك اني هيج حال ما عاجبني

حسين : ولج انتي شتريدين احجيلي حته افتهم

شهد : تعبت ومليت من مزاجيتك وتعاملك وياي كافي حسين كافي عليك الله تعبت

حسين : ولج احبج تفهمين شنو احبج

شهد : اي واني هم احبك  ......بس كافي تعبت
هل فتره شدكول اكلك اي واسايرك وكل هذا علمود احبك
انته شني سويت لان تحبني احنه  شني حياتنا اني هنا شنو بت عمك لو ام بنتك لو زوجتك غير افتهم غير اعرف اني شنو
راح يصير على زواجنا سنتين شني سويته الي
رحت تزوجت عليه هذا الانجاز بس هذا

حسين : رجعتي لنفس النقطه

شهد : شوف حسين من البداية ما قبلت اضل تحت رحمتك انته ومرتك وياما كتلك اتركني
هسه جايني تريدني ارجع لك وره ما صرنا ثنين ما ارجع اني وبنتي تحت رحمتك

حسين : ........................................

شهد : اي هذا الي تكدر علي تسكت ودير وجهك
حسين انته غدرتني مره ما اتحمل تسويه مره ثانيه ما اريد ارجع لذيج الفتره تعرف  شنو ذيج الفتره بالنسبة الي عباره عن دمار وبس اني بي
جنت اساعد نفسي واكوم
اني عمري ما انسى اي شي عشت قبل
بكلشي جاي تسوي ما تكدر تنسيني جرح واحد من الي بگلبي

حسين : ........................................

شهد : اني الي ساعدت نفسي حته ارجع اوكف
اني ضمدت جروحي لوحدي محد ساعدني ومحد سمع بجي روحي كل يوم  ، كلكم دورتو مصلحتكم اهلي وانته وبين عمي ، بالاخير كتشفت محد يستاهل اضحيله ومحد خطيه بس اني

حسين : كافي شهد  ما مليتي شسوي وتقنعين وتتقبلين حياتنا الجديده

شهد : لا مو كافي وعن اي حياة تحجي ماكو حياتنا اكو حياة بس اني وبنتي 

حسين : شهد بزعتي روحي يا ناس يا علم اجرمت لان تزوجت

شهد : لا ما اجرمت انته كتلت روحي و گلبي

حسين : شهد اني لا اول ولا اخر واحد يتزوج ثنين

شهد : والله لو بوقتها جنت مقصره وياك لو بشغله وحده اكول ميخالف خلي يتزوج حسين
انته جاي تتذكر شلون حاربتني ولا عبالك زوجتك من اول يوم تزوجنا وكل المده الي بقيت بيها يمك بوجهي ما تباوع
اني ما معترضه على زواجك  لو جان الك حق هذا شرع رب العالمين قابل اعترض علي
حته هناك بالقرية شكد همه لا دارسين ولا واصلين ولا من اهل المدينة بس محترمين نسوانهم من يريد يتزوج يكلها وبكل احترام كدام كل الناس يكول فلانه هيه الاصل هيه ام البيت
انته كدام كل اهلك تصيح ما اريدها ما مرتاح وياها

حسين : ........................................

شهد : ساكت لان تعرف كلشي جاي اكوله صح

حسين : هسه انتي الي فتهمته ما ترجعيلي من وره تماره

شهد : من كلشي بحياتنا و اكثر هذا الموضوع

حسين : ........................................

شهد
تركني وكام طلع
شتميت ريحة جكاير تجي من الحديقة ..... الي سوا وياي مو قليل والي كاتلني اكثر ضعف شخصيته يم تماره ادري شمسويتلك وهلكد تحبها..........رجع كعد على القنفه گبالي ويباوع بعيوني

حسين : شهد

شهد : نعم

حسين : هاي حياتي وهذا وضعي اني ضلمتج اعترف ما اريد ارجع اشيل ذنب تماره هيه تحبني ما اريد اكسر رگبتها واطلگها حابه تكملين وياي كان بها ما حابه بعد هاي هيه  واني طلاگ ما اطلگ هذا الوضع الي احنه بي
مو دورين وياي كرامه اذا عندج كرامه روحي الاهلج
...

لقد خذلنا الرفاق والعائلة والأشخاص الّذين نحبهم حتى الأيام لم نسلم من خذلانها يا عزيزي

حبايبي لا تنسوون التصويت والتعليق
♥🦋
﹏﹏﹏﹏﹏﹏﹏﹏﹏﹏﹏﹏﹏﹏

الـكاتـبــة فـاطمــه عـلـي 🦋🦋
﹏﹏﹏﹏﹏﹏﹏﹏﹏﹏﹏﹏﹏﹏