رواية |غموض جارُنا|
الكاتبة سناريآ
قناة التلي https://t.me/nurse2_4
اندلس: انصدمت من شفت صديق نسيبي گاعد بالكرسي الي بصفنا بقيت فاگة حلگي واباوعلة هذا شجابة هنا
هو انتبه الي باوعلي بإبتسامة مستفزة وكأنة يگول وراج وراج وين ما تروحين خرزتة ورجعت اباوع من الشباك
الخبيث شي اكيد يريد يخرب فرحتي بس ما راح اسمحلة اوووه شبيه صايرة مخبلة علساس الناس فارغة وما عدها شغلة وعملة غيري شگد درامية
بقيت طول الوقت اباوع من الشباك صح ما جان اكو بس الغيم بس اني ردت استمتع بكل لحظة
وصلنا بوقت العصر ونسيبي اجر تكسي واخذنا لفندق بس الي ما جنت متوقعتة من شفت محمد حجز ويانا بنفس الفندق ومن شافنا اتقرب سلم على أمجد وكانة متفاجئ من شافة هنا شكد جذاب
وحسب ما گال عندة شغل هنا وراح يبقى بهذا الفندق لما يكمل كل شغلة
اخذنا المفاتيح ورحنا للغرف اني وأمجد بغرفة وزهراء وعائلتها بغرفة ومحمد طلعت غرفتة يم غرفتنا
بقيت گاعدة واسمع اغاني لما صارت ساعة 8 يالا أمجد طلب العشا للغرفة وهمزين يعرف يحجي انكليزي لو ما جان يعرف جان تفشلنة
بقيت الليل كلة اباوع من الشباك للناس لان أمجد گال تعبان وما اگدر اطلع هسة والمشكلة اني صار عندي ارق من الحماس
ما نمت الا ساعة 2 وأمجد نام عالجرباية وخلاني اني انام عالقنفة بحجة اني قزومة والقنفة تكفيني
ثاني يوم گعدت ساعة ثمانية من الحماس حتى ما تريگت رأسا دخلت للحمام سبحت ولبست تنورة بيضة بيها ورد صغار اصفر قصيرة بس مو كلش صايرة جوة الركبة وتيشيرت ابيض نص ردن وحذاء ابيض فديتني طالعة عبالك كريمة مشطت شعري وطلعت من الحمام لگيت أمجد امبدل ولابس قميص ابيض وبنطرون جينز وحذاء اسود
جان واگف يمشط شعرة من كمل باوعلي بس بنظرات كانه ما عاجب لبسي
أمجد:اني كم مرة گلت لا تلبسين ملابس عليها كتابة وشنو هذا المكتوب
باوعت لتيشيرت وبالگوة گدرت اقرا الكتابة جان مكتوب مجرد فتاة مجنونة ما عرفت شكو بيها
باوعتلة ببرأة وگلت برجاء
اندلس: يالا هسة خل نطلع وبعد ما البس هيج ملابس
هز راسة باستسلام وكأن ما عاجبة الوضع جر محفظتة واني لبست جنطتي وطلعت وراه قفل الباب
نزلنا بالمصعد وطلعنا من الفندق واني لحد هسة متعجبة ليش زهراء ونسيبي ما اجو ويانا سألت أمجد
_أمجد ليش ما اجو زهراء وآدم
_ما يطلعون هسة وانتي ابقي قريبة وامشي بصفي
_يعني شنو راح نتمشى وما ناخذ تكسييييييي
_صوتج نصي فضحتينا وليش ناخذ تكسي هو احنا بس راح نفتر ونشوف الاماكن يعني احنا ما جاين علمود نروح ونرجع بسيارة بس اذا تريدين الزملج تكسي
_ها لا لا المشي احسن بس والله طلعت تفكر
_شنو قصدج لج اشو ما تعرفين تحجين ولا عبالج الكل مثلج ما يستعمل دماغة
ردت اجاوبة بس گلت خل اسكت لا يتعصب ويرجعني
بقينا نمشي هواي وشفت هواي اماكن كلش حلوة وبكل مكان جان لازم اخذ صورة وأمجد جان هادئ وما يرفض
صارت ساعة 1 وأمجد قرر نتغدة بمطعم اخذنا لمطعم جان تصميمة وبسيط بس كلش حلو واهم شي جان اكلهم حلال
گعدنا بمكان منعزل وبنهاية المطعم علمود ناخذ راحتنا بس المشكلة جان اكو اثنين شباب گاعدين قريب من طاولتنا
أمجد طلب الاكل بس اني جنت متوترة وبالگوة اكل لان هذولة الولد جانو يباوعون باتجاهي ويحجون حسيتهم يحجون علي
أمجد انتبه عليهم باوعلهم بعصبية وهم شوية حسو وما گامو يباوعون باتجاهنا بس أمجد بقى متعصب ويهز رجلة بغضب
أمجد: كملي بسرعة واني بعد الصار حتى ما بقالي نفس اكل
بقيت ساكتة ما حجيت اي شي لان الجو كلش متوتر واخاف اجفص
أمجد اشترالي لفة من الطعم وطلعنا
بقينا نتمشى واني شايلة اللفة بيدي
امجد: ليش ما تاگلينها
اندلس: ما اگدر عيب اكل بالشارع
هز راسة بتفهم وگال
أمجد: تعاي نگعد على هاي الكراسي علمود تاكلينها
رحنا گعدنا فتحت اللفة وهو فتحلي قوطية الببسي
أمجد: اكلي على كيفج
اكلتها كلها يالا حسيت نفسي شبعت لان مشيت هواي
رجعنا للفندق نتمشى وبس دخلت للغرفة ذبيت نفسي ونمت من التعب ما گعدت الا ساعة سبعة بالليل
لگيت أمجد يبدل انتبه علي من گعدت باوعلي صفن وكانة يفكر بشي مهم
أمجد: اني وزهراء وزوجها راح نطلع سوية تطلعين ويانا لو تبقين هنا
حسيت نفسي تعبانة من المشي تثاوبت بتعب ورديت
اندلس: لا روحو انتو ما اروح
انطاني مفتاح الغرفة وگال بقي يمج ولا تفتحين الباب لاي احد ولا تطلعين مفهوم اني راح ارجع بسرعة واذا صار شي اتصلي علي افتهمتي
جاوبتة بنعاس مفهوم بقيت متمددة بمكاني ما گمت الا ورا نص ساعة
دخلت للحمام غسلت وجهي و بدلت ملابسي ولبست فستان صيفي
طلعت من الحمام رحت للجنطة طلعتلي جبس وتوجهت للجرباية طلعتلي فلم الغبي والاغبى شكد يضحك هالفلم يمكن شايفتة ست مرات وهاي السابعة
أمجد ما رجع الا ساعة 11 سألني اذا اريد عشا گتلة لا لان ما احب اتعشى عاد هو دخل سبح وبدل وبس طلع ذب روحة عالجرباية ونام
واني بقيت گاعدة ما نمت الا ساعة ثلاثة اباوع افلام كوميدية جوة البطانية وكل شوية ارفع راسي واباوع لأمجد اخاف يگعد من ورا صوت ضحكي
صار ثلاث ايام لجيتنا هنا وأمجد ما بقى شي بنفسي يومية مطلعني وياخذلي صور وملابس وابد ما يمل من طلباتي
اليوم رابع يوم وأمجد گال اليوم ما اطلعج عندي شغل مهم بدل وراح وعافني وحدي اباوع من الشباك بقيت هيج طول الوقت حسيت نفسي راح اموت من الجوع وأمجد ما رجع الا ساعة 1 وبس رجع طلبلي غدة وراح نام
كملت غداي بقيت لساعة 2 گاعدة واحس بملل اخر شي جتني فكرة جهنمية
گمت بسرعة سبحت ولبست بنطرون ازرق وتشيرت اصفر نص ردن وحذاء ابيض لبست جنطتي ورحت اتمشى على اطراف اصابيعي لما وصلت للميز اليم الجرباية اخذت مفتاح واحد وبقى الاخر يم أمجد لان أمجد طلب مفتاحين من الفندق للاحتياط
توجهت للباب فتحتة على كيفي وطلعت نزلت بالمصعد وطلعت اتمشى من الفندق بسرعة قررت اطلع اتمشى لوحدي وأمجد شي اكيد ما راح يگعد هسة واني ما اطول بسرعة ارجع
صرت اتمشى واخذ صور حتى ما حسيت على نفسي الا من لگيت نفسي تايهة بقيت امشي بخوف بس حسيت احد جاي يلحگني صرت اسرعي بمشيتي بس فجأة قاطع طريقي ولد يطلع بگد أمجد صار يحجي وياي بس اني اصلا ما اعرف انگليزي اني هنا حسيت جسمي يبس وريگي نشف ما عرفت شاسوي اتندمت عالساعة الطلعت بيها رجلي احسهن جمدن
گامت تجيني افكر سوداوية حسيت نفسي راح ابجي بس حاولت اتماسك علمود لا يحس بضعفي
ردت اتقدم بس هو سد الطريق علي اني اروح منا هو يجي منا بقينا هيج لما هو امر شي حصرني عالحايط قويت نفسي وضربتة بين رجلي
عفتة يتألم واني طگيتها بركضة سمعتة صوفر بشكل قوي
ورا شوية التفتت وراي لگيت نفس الشخص الضربتة واكو ويا اربعة اضخم منة يركضون وراي من شفتهم حسيت نفسي خرطت العافية
سرعت ركضي واني احس گلبي وگع بين رجلي گلت هسة راح يلزموني المشكلة هذا المكان الافرع مالتة ضيگة وامبين هم يعرفونة زين
حسيتهم بدو يتقربون مني صرت ابجي واحس قوتي راح تضعف وهاي نهايتية
فجأة انسحبت ايدي بقوة رفعت عيوني والرؤية مغوشة عندي بسبب الدموع ركزت اكثر لگيتة محمد يجرني ويركض بقوة وعاصر ايدي بين ايدي
محمد: حاولي تتحملين شوية لا تخافين راح اطلعج منا
شجعت نفسي وصرت اركض بقوة بس ذولة بعدهم يلحگونة
بس محمد صار يركض بشكل اسرع وما واجه مشكلة امبين يعرف الطريق لان جان يركض وابد ما يوگف
سألتة واني بالگوة اتنفس
_ليش... ما وگفت وكتلتهم مو احسن.... من هالركض
جاوبي وهو يضحك
_شكلج اتابعين مسلسلات هواي اولا اني بس واحد وهم خمسة يعني 90 بالمية الربح يكون الهم وثانيا انتي وياي حتى لو تعاركت وياهم راح تكونين نقطة ضعف بالنسبة وثالثا والاهم احنا سياح ولازم نحاول ما نسوي اي مشاكل لان كلشي نسوي ينحسب علينا وما يكون بصالحنا وهيج اشكال امبين ويا عصابات
استمرينا نركض واني احس راح ينقطع نفسي باوعت وراي ما لگيتهم
گتلة خل نوگف ضيعناهم
جاوبني وهو بالگوة يحجي لا انتظري شوية بس خل نتقدم شوي
ورا شوي بدة يخفف لما صرنا نمشي عادي وگفنا يم سوبر ماركت ودخل جاب مي انطاني البطل وگال انتظري فد شوية وشربي
مشي قبلي واني امشي وراه بالگوة بسبب الركض الركضتة يمكن اول مرة بحياتي اركض هيج بقيت افكر محمد شلون عرف مكاني واجة بالوقت المناسب لو ما جاي جان هسة اني قارين فاتحتي حسيت نفسي شكد حقيرة من جنت اكرهة وهو توا انقذ حياتي
اتمشينا للفندق واني الطريق كلة خايفة وارجف صارت ساعة اربعة وشي اكيد هسة أمجد گعد
انتبه علي ونظراتة قلقة
محمد: شبيج خايفة ذولة هم سوولج شي
اندلس: لا لا اصلا ما اتقربو بس.... بس طلعت بدون اذن من أمجد وشي اكيد هسة گعد من نومة واذا عرف بية طالعة لوحدي كلش راح يتعصب
محمد: لا تخافين اني اتصلت على آدم وفهمتة الوضع
سكتنا اثنينا واني الفضول كتلني اريد اعرف شلون لگاني
_ممكن اسألك سؤال
_اي سألي
_انت شلون لگيتني وشمدريك اني جنت بذاك المكان
_ضروي اجاوب
_لا براحتك بس حبيت اعرف
_همم اذا تريدين تعرفين سمعي لعد
اول ما طلعتي من الفندق جنت واگف بمكان قريب وانتظر شخص ومن شفتج طالعة وحدج اتعجبت شلون اخوج سمحلج اطلعين وحدج وبسبب فضولي لحگتج وبقيت امشي وراج بس بنص الطريق دخلت لسوبر ماركت اشتري جكاير ومن طلعت ما لگيتج عاد صرت ادور عليج وبصعوبة يالا لگيتج لان ذيج المنطقة اصلا محد يروحلها
وصلنا الفندق ولگيت آدم و امجد واگفين گدامة وامجد امبين كلش معصب
اول ما وصلت يمة لزم ايدي وعصرها بينوايدة بقوة حسيتة كسر عظامي بس وجهة ما امبين عليهةمعصب تشكر من محمد امبين آدم گايلة كل السالفة گلت هسة امجد الا يعلسني
نسيبي تحمدلي بالسلامة وتقرب من أمجد وگال على كيفك وياها لا تأذيها
أمجد هزلة راسة استأذن منهم جر ايدي ودخلنا الفندق ومحمد بقى ويا آدم
وصلنا للغرفة واني بسرعة رحت اختليت ورا زهراء وهو قفل الباب واتقدم باتجاهنا
گلت جاك الموت يا تارك الصلاة اليوم من صدگ راح اموت
أرينا ذ: گاعدة امشط شعري واسويلي تنظيف بالبشرة فجأة اتصل أمجد علي اتعجبت ليش يتصل وبهالوقت فتحت الخط باستغراب
زهراء: الو ها أمجد اكو شي ليش متصل
جاوبني بنبرة قلقة
أمجد: اگلج اندلس يمج
زهراء: لا شسوي يمي غير وياك
أمجد بقلق: ما موجودة گعدت من النوم ما لگيتها شي اكيد طالعة وحدها والمشكلة موبايلها موجود هنا واخاف يصيرلها شي راح اتخبل والله
زهراء: على كيفك أمجد لا تتوتر دور زين يمكن بالحمام
أمجد: گلبت الغرفة كلها وما لگيتها
زهراء: اقفل لعد وهسة راح اجي يمك بسرعة
غسلت وجهي وبدلت بسرعة دخل آدم لگاني مخبوصة گال خير شكو صاير شي
جاوبتة باستعجال: أمجد اتصل علي وگال اندي طالعة وحدها وحتى موبايلها ناسيتة ما اعرف وين رايحة
آدم: انتظري خل نروح سوية....... راح شال حسوني وطلعنا قفل الغرفة ورحنا لأمجد
دگينا الباب فتح أمجد وامبين القلق والخوف على وجهة دخلنا وسدة الباب
گال آدم وهو يحاول يهدي الوضع
_لا تخاف ان شاءلله ماكو شي هسة ترجع يمكن طالعة تتمشى قريب بس لا تنخبص خل نطلع اندور عليها
أمجد مسح راسة بقوة وتوتر وگال
_ان شاءلله ان شاءلله نلگاها واي اي خل نطلع اندورها
فجأة اتصل موبايل آدم جاوب علي وسمعنة اسم اندي بالسالفة باوعتلة بترقب وخوف اريد بس يقفل الموبايل ويحجي
سد الموبايل وگال لأمجد
_اندلس ويا محمد وهسة هو جايبها
عگد أمجد حواجبة باستغراب والحيرة انرسمت على وجهة
_ويا محمد وليش ويا محمد
آدم: هسة خل ننزل وننتظر جوة لان محمد گال راح يوصلون
رادو ينزلون وحسوني جلب برجل آدم وگام يبجي يريد ياخذة وياه
شالة وگالي ابقي هنا هسة بسرعة نرجع ولا تطلعين ابد هزيت راسي بمعنى اي
نزلو هو وأمجد واني بقيت گاعدة احس گلبي گام يوجعني حاولت اهدي نفسي بس ما گدرت كلش خفت على اندي لا صاير وياها شي وشي أمجد ما راح يعديها سلامات
ورا ربع ساعة صعد أمجد وهو يجر اندي بعصبية
بس شافتني ركضت اختلت وراي وصارت تبجي بخوف وهلع حاولت اهدي أمجد علمود لا يسويلها شي بس احسة فاصل ما يسمع كلشي تقدم باتجاهي بعصبية وبحركة سريعة جر اندي مني وحضنها
بقيت فاگة حلگي واني اشوفة يحضنها ويمسح على شعرها ويطبطب على ظهرها بكلمات اطمنها تصرفة خلاني اتعجب بس لحمدلله ما سوالها شي بس توقعت راح يجيبها براجدي عالسوتة باوعت لاندي لگيتها بعدها تبجي واحسها مثلي مصدومة
قاطع المشهد هذا أمجد وهو يبعد اندي من حضنة
أمجد: ليش ما گعدتيني من حسيتي نفسج مريضة ليش طلعتي وحدج
اندي وگفت بجي باوعتلي بصدمة واني صدمتي ما تقل من صدمتها
سألت أمجد
زهراء: شتقصد ما افتهمت
أمجد: محمد حجالي كل السالفة طلعت اندي صاير عدها ضيق بالتنفس ونازلة علمود تشم هوا شوية ومن طالعة بالشارع صايرة تتقئ وفاقدة الوعي ومحمد رحم الله والديه شايفها وعارفها اختي عاد موديها عالمستشفى وطالع عدها تسمم يمكن من هالجبس الي دائما تاكلة شي اكيد صاير اكسباير
رجع حضن واندي وگال
_خوفتيني عليج حسيت گلبي راح يوگف من الخوف عليج جان گعدتيني حتى لو ما گعدت ذبي علي مي وبعد اي شي يصيرلج گوليلي ولا تخوفيني تمام
هزتلة راسها بتوتر
رحت حضنت اندي وگتلها بهمس بعدين اعرف كل السالفة ما اصدگ هذا الصار
طلعت من عدهم ورحت لغرفتي لان اصلا اثنينهن متلازكات
فتحت الباب ودخلت للغرفة جانو آدم وحسوني بعدهم ما راجعين دخلت سبحت علمود النوتر والخوف الصار يروح
لبست فستان ازرق خفيف صاير من جوة كلوش لتحت الركبة ومن فوگ ضيق والاردنات للنص طلعت جني اميرة مشطت شعري وطلعت
حسيت بضوجة وملل رحت شغلت اغنية مشاعر وغمضت عيوني صرت اتخيل نفسي ارگص ويا آدم وحدنا عالشاطئ
بقيت ارگص وفرحانة وكانو آدم وياي تمنيت آدم يحس بحبي ويحبني مثل ما احبة وهالشي مستحيل يصير حسيت بحزن وفتحت عيوني گلت كافي تأمل
انصدمت من لگيت آدم واگف ومنتجي عالحايط يباوعلي
وعيونة صافنات علي بدون ماةيرمشن نزلت راسي من الصدمة والخجل ما عرفت شاسوي بقيت واگفة ما اتحركت
رفعت راسي من لمحتة تحرك شفتة اتجه للميز ولزم الموبايل عاد الاغنية وتقرب مني لزمي ايدي واني بس صافنة ما مستوعبة الجاي يصير
صار يرگص وياي واثنينة ما نحجي بس اني جتني الضحكة فجأة وصرت اضحك بشكل هستبيري عبالك ما مصدگة اندمجت ويا بالرگصة وهو ما حجى اي شي بس يبتسم
يا الله تصرفاتة وحركاتة تخليني احبة بالزايد احسة جاي يعذبني هيج واني اعرف نهايتنة طلاق
بقينا نرگص بدون اي حجي بس نباوع بعيون بعض عيونة الي ماكو مثلهن صوبن گلبي من اول مرة شفتة
خلصت الاغية وهو گال اروح اجيب حسوني من محمد
بس طلع ركضت للحمام اغسل وجهي بمي بارد احس وجهي صار نار من الخجل والفرح
بقيت طول اليوم احاول اتجنب آدم ماردي ليش من اشوفة احس بالخجل مع الرغم احنا بس رگصنا
صار خمس ايام من اجينا هنا واليوم لازم نرجع لان اهلي باجر يرجعون ولازم انظف كل البيت ونجهز كلشي نحتاج لان شي اكيد راح يجون گرايبنا
حزيران: رجعنا من العمرة وجانت احلى ايام بحياتي شعور جان كلش حلو وهادئ ويبعث الراحة والسكينة بالگلب ما اگدر اوصفة بس جنت احس بالامان وراحة البال
وصلنا للعراق،جانو ينتظرونا بالمطار أمجد وزوج زهراء
من شفت أمجد ما اعرف شصارلي احس رجعت روحي اتقربت منة وحضنتة بسرعة عبالك صاير سنين ما شايفتة بقيت حاضنتة وابجي مسح على راسي ومسح دموعي وگال بابتسامة عمرة مقبولة حجية
وخرت منة وصرت اضحك سواني حجية من هسة
بعدها اتقدم من بابا وماما سلم عليهم وحار شلون يبوسهم مرة من ايدهم ومرة من راسهم ضحكت علي ما عرفت أمجد هيج
بقى آسر واگف ورا اهلي وما حجى اي شي بس يبتسم وشايل جنطتة بيدة ياربي شكد هادئ يمكن آسر اهدئ رجال شفتة بحياتي تقرب أمجد منة وصار يحضنة ويبوس بي ويشم بشعرة عبالك ابنة مو اخو الصغير عيوني دمعت من شفتهم هيج
تقدم زوج زهراء من بابا وماما وآسر سلم عليهم واخذ الجنط هو وأمجد حطوهن بالسيارة
صعدت بالسيارة واني احس تعبانة كلش بس جانت اكو فرحة بگلبي من رجعت لبيتنا واخوتي
وصلنا للبيت وزوج زهراء بس نزل الجنط وعافنا وراح بابا طلب منة يبقى بس هو گال ان شاءلله امر العصر عرفتة سوة هيج علمود ناخذ راحتنا وما نتقيد
فتحنا الباب ولگينا اندي وزهراء وحسوني گاعدين بالحديقة ينتظرونا بس شافتنا اندي جت تركض اتقربت من ماما وبابا حضنتهم ودفنت راسها بحضن بابا سمعت صوت بجي بابا تعجب رفع راس اندي لگيناها تبجي وتشهك بصوت عالي وتگول ليش تاخرتو بابا مسح دموعها وگال بعد ما اعوفج وحدج بنيتي بس لا تبجين وجيت هداية هواي لبنتي الصغيرة
مسحت دموعها وباوعت عليه بفرحة
_صدگ يعني الي
_اي بابا اني كم اندلس عندي
_احبك بابا احبك
_واني هم بابا
اتعجبت من شفتها تبجي لان اني اعرف اندي ما تحب تبجي ولا تحب تبين عاطفتها للشخص الگدامها
تقربت زهراء منة حضنت بابا وماما وبعدها تقربت مني سلمت علي وحضنتني بس جانت عكس اندي فرحانة وتضحك گلت ذني مو طبيعيات امبدلين اعدادتهن اليوم
تقربت من آسر وحضنتة بقوة وهو حسيتة شكد ما حاضنها قوي راح يكسر عظامها صار يبوس راسها وشعرها احسة ما يريد يعوفها يمكن اكثر شخص يحبة آسر هو زهراء لان من جانت صغيرة جانت كلش متعلقة بي بحيث ما جانت تنام الا بحضنة واذا يروح لمدرستة بالگوة تعوفة فهو تعود عليها وصار دائما شوكت ما تحتاجة تلگي گدامها
حسيت شي لزم رجلي باوعت لگيتة حسوني يضحك ورافع ايده يمكن هو هم يريد نحضنة عالواهس شلتة وگتلة تعال لك ما اشتاقيت لخالتك فديتك يروحي صرت اعضعض وابوس بخدة وهو فرحان ويضحك
بابا گال انطيني اياه اخذة يمة وگال شنو ما تريد تسلم على جدك وبيبيتك
يا الله شكد محظوظ حسوني الحمدلله كلنا نحبة كأنة ابن زهراء الحقيقي معتبرينا حفيد العائلة الاول
دخلنا للصالة واحس رجعت للايام قبل من ورا الصوت العالي وحسوني مالي البيت وكل شوية آسر لو أمجد ياخذونة ويلعبون ويا ويسألونة منو تحب اكثر وهو حاير بينهم اخر شي اشر على بابا عاد هم طردو وگالو روح شكد خاين صرنا نضحك علي لان اصلا ما اهتملهم راح ركض گعد بحضن بابا
انتهى هذا اليوم بين الضحك والسوالف واللمة الحلوة وزوج زهراء اتعشى يمنة جانت لمة عائلية كلش حلوة
مر اسبوع على رجعتنا من العمرة والبيت مخبوص كلش من الخطار والگرايب وخطية زهراء وبنات خالتي التهن ويا الخطار و بالتنظيف والطبخ وكلشي ما خلني اسوي واندي جانت بس شغلتها تروح يم النسوان الكبار تسمع سوالف شكد تحب السوالف
متمددة عالجرباية ساعة 11 اريد انام بس عندي ارق ما اعرف ليش من اريد انام ما اگدر واذا عندي شغل وما اريد انام تجيني النومة من ساعة تسعة سمعت صوت اشعار سحبت الموبايل ولگيت مسج من رقم ما مسجل فتحتها وجان مكتوب
_سلام عليكم
_شلونج حزيران
اني بطبعي اي رقم غريب اجاوب عليه لان اگول مرات يمكن گرايبي واذا غريب الحظر موجود رأسا احظرة
_وعليكم السلام بس منو حضرتك
_اني حارث جيرانكم اخو سمر
_ ممكن اخذ شوية من وقتج اذا ما عندج زحمة
_اي تفضل محتاج شي اخوية
بقى كم دقيقة وراها دز
_يمكن راح تحسينة سؤال شخصي بس اني ردت اعرف الجواب منج اذا تسمحين ليش من خطبتج ما وافقتي هالسبب مني شفتي شي غلط علي لو سبب شخصي لحضرتج
بقيت كم دقيقة اباوع للمسج واني حايرة ليش يسأل هالسؤال وبهذا الوقت جاوبتة ورا عشر دقايق
_لا اخوية السبب مو منك والله شاهد على كلامي وانت رجال والنعم منك واني اعرفك من قبل شنو معدنك بس اني بعدني ما مستعدة للزواج وما مفكرة بي
رد دز مسج ورا خمس دقايق جان كاتب راح اسئلج سؤال ورجاء لا تفهميني غلط هل السبب لان اكو شخص ابالج
اتعصبت من گال هيج دزيتلة مسج بسرعة وكتبتلة
_هذا الشي ما يخصك ورجاء بعد لا تراسل لان حرام هالشي واني ما اريد احصل ذنوب بسببك
حذفت المحادثة وحظرتة قبل ما يرد شكد عصبني شلون يفكر
غمضت عيوني واني افكر ليش سأل هالسؤال ويعني هو صدگ يحبني بعدت هالافكار من راسي وگلت خل انام احسنلي عالاقل استفاد من النوم اكثر من حارث
بعد يومين تبدي الدراسة وگلت لماما اريد اروح اشتري ملابس للجامعة لان ناقصني كم شغلة والخطار هم خفوا يعني ماكو شكال
عاد هي وافقت وگالت نروح اني وياج العصر وصدگ بدلت وكملت وطلعنا اني وياها سوية لان دائما نروح اني وياها وحدنا والسوگ اصلا قريب علينا لزمنا تكسي ورحنا
وصلنا السوگ وبقيت افتر بالمولات هواي يالا لگيت على ذوقي عاد اخذت تنورة وشالات وقمصان وجنطة ظهر بس لفت انتباهي مول جان امبين يبيع ملابس وشغلت حلوة دخلنا وانصدمت من شفت سمر وحارث سوية ردت اگول لامي نطلع بس سمر انتبهت علينا واجت سلمت والخطة فشلت
سلمت علينا وگالت هي هم جاية تشتري ملابس للدوام
اني تحججت وگلت لامي كلشي ما اريد لان حتى نفس ما بقتلي اخذ اي شي من شفت حارث بس هي گالت انتظي لعد لما اروح اشتري كم شغلة
عاد امي راحت ويا سمر لان تريد تشتري قميص لاندي علمود المدرسة
بقيت واگفة اباوع بارجاء المول علمود لا اركز ويا حارث لان وگف يم اليحاسب
جانو حاطين شغلات بسيطة مثل سلاسل واسوارات يم اليحاسب رحت وگفت اشوفهن لگيت سوارة لون سلفر تصميمها يجنن وكيوت ردت اخذها واخذ خاتم هم مثلها
اخذت السوارة وسألت الشاب الواگف يحاسب اذا جان اكو خاتم مثلها
گال
_لا خلصنا منها بس تريدين عندي نوعية احلى وهي طقم كامل
_تمام لعد انطيني اشوفهن
طلعهن وجانن صدگ كلش حلوات
گال بابتسامة
_باوعي هذا حلو شي اكيد راح يلوگ لايدج ولرگبتج واسعارة كلش مناسبة ولعيونج راح انزل
تعجبت شلون عندة جرأة يحجي هيج كلام كلش تغصبت ردت ارزلة
بس تفاجئت من لگيت حارث گدامي گال بعصبية
_شو انت ما تعرف تحجي شنو يلوگلج شنو انزل علمودج ترا ما محتاجة صدقتكم وسوالفكم المكسرة عوفها ولا تنسى شغلتك بس تبيع افتهمت
رد العامل بتوتر
_استاذ ما جان هيج...
_اني اعرف شنو قصدكم سوالفكم مو علي
التفت علي وگال
_شنو بعدج واگفة هنا بس لا تريدين تشترين
جاوبتة بتوتر
_ها لا ما راح اشتري هسة راح اروح
استوعبت الجاي اسويه راسا حولت صوتي للعصبية وگتلة بصوت ناصي
حزيران: انت ليش تدخل اني جنت اعرف شلون راح ارزلة ومحد طلب مساعدتك
حارث باستفزاز هاي بدال ما تشكريني جاية ترزلين شكد ناكرة للجميل انتي
ردت اجاوبة بس سمعت صوت سمر التفتت لگيتهن راجعات وايديهن مليانات علاليك تقربت سمر وگالت بابتسامة ها خاف انتظرتونا هواي
جاوبها حارث بابتسامة لا جيتو بسرعة وما طولتو گالها وباوعلي خزرتة واتجهت لماما گتلها يالا ماما تعبت خل نرجع
ماما استأذنت منهم وراد حارث يوصلنا بس ماما گالت ما يحتاج ابني آسر جي علينا وجاي ينتظرنا برة
طلعت ماما واني ودعت سمر وطلعت وراها بس من مريت من يم حارث گال بهمس شوكت راح تحسين
سويت نفسي معصبة باوعتلة بخزرة وطلعت بس اني بداخلي فرحانة وارگص واخيرا حارث گام يحبني بس اني راح اعلمة واخلي يتعذب واذا من صدگ يحبني يتحمل
غزل: جنت اراسل اندي وگالت اهلها باجر راح يجون من العمرة قررت اگول لخالتي ام علي علمود نروح نزورهم من يرجعون وصدگ وافقت وگالت شكو بيها انتظري اسبوع ونروح نزورهم لان بالبداية راح يزورونهم اقاربهم وراح يصير يمهم ازدحام
وصدگ ورا اسبوع جنا گاعدين عالغدة وخالتي گالت لعمي ابو علي نريد نروح نزورهم وصدگ وافق وگال اي شكو بيها روحن وخل سامر ياخذجن
خالة گالتلي جهزي نفسج وبالليل نروح نزروهم عاد بسرعة غسلت المواعين وطلعت اركض لغرفتي راسلت اندي وگتلها راح نزوركم بالليل هي كيفت وگالت تعاي كلش مشتاقتلج لان صار حوالي اربع اشهر ما شايفتها
گمت سويت عناية وتنظيف بالبشرة وسويت عناية لاظافري ولايدي ورجلي هم فديتني مدللة نفسي كلش احب من اطلع اكون مرتبة وانيقة
العشا هاليوم ما سويتة لان سامر گال راح اجيب من برة لان صديقة مفتح مطعم جديد
تعشينا واني بس نظفت المطبخ وبيداء غسلت المواعين
صعدت لغرفتي فرحانة بس فتحت الباب اتجهت للكنتور وصرت اطلع كل شوية فستان واشوفهن ياهو احلى لما اخر شي اختاريت الوردي جان كلش حلو وبي ورد ابيض واخضر نسقت وياه شال زيتوني وحذاء صيفي اسود
دخلت للحمام سبحت بسرعة ولبست ملابسي وشعري بس لفيتة لان ما ظل وقت امشطة
اتجهت للمراية وحطيت مكياج بناتي علمود يكمل كلشي بس الشال كلش ضوجني لما ثبت لان قماشة جرجيت كملت وسحبت الحذاء بعدني توا ردت البسة سمعت صوت خالتي ام علي تصيحني وتگول ما كملتي لبست حذائي بسرعة وجريت الموبايل وطلعت نزلت بسرعة الدرج شافني عمو وگال على كيفج بنيتي لا توگعين هزيتلة راسي ورحت لخالتي لگيتها مكملة وبيداء هم امبدلة لان راح تروح ويانا
اخذنا سامر ووصلنا وگال اني راح اگعد بكوفي قريب قبل ما تطلعن اتصلن علي
دگينا الباب وفتحلنا الباب اخو اندي أمجد رحب بينا دخلنا الاستقبال وراح دخلت ام اندي واختها سلمنا علينا وام علي وام اندي اندمجن سوا عبالك صارلهن وحدة تعرف الثانية من زمان وبيداء گعدت يم اخت اندي واندمجت وياها اتعجبت من تصرفها هي تكره اندي وتگول عليها همجية شلون حبت اختها مادري بس يارب تعقل وتصير مثلها
بقيت گاعدة وصافنة عليهم ورا شوية دخلت اندي وبيدها ضيافة سلمت وقدمت الضيافة بس هالمرة مسوية نفسها هادئة وحبابة
اجت گعدت يمي وگالت بابتسامة شلونج يالخاينة ليش ما تجين علي
جاوبتها والله لان جنت احضر للجامعة وما عندي مجال وانتي ما تگولين على نفسج خاينة وانتي ابد ما زايرتنا
گالت ان شاءلله كم يوم واجيج لا تخافين
بقينا گاعدين شوية وبعدها اندي استأذنت من خالتي واخذتني وياها لغرفتها
صعدنا لغرفتها وبس دخلنا قفلت الباب واخذتني للجرباية وگالت بحماس انتظري اريد اشوفج شي گامت واتجهت للميز جابت من فوگاه دفتر تقربت گعدت فتحتة وطلعت ورقة بدت تحرك بيه وگالت بحماس تعرفين شنو هالورقة
جاوبتها باستغراب لا واني شمدريني غير انتي تعرفين
گالت بفرحة ولج هاي رسالة من وليد
شهگت بصدمة وگتلها لا تجذبين وشلون شفتيه
گالت بفرحة قبل حوالي 5 اشهر من جنت امتحن وبدت تحجيلي كلشي صار وياها من شافت وليد اخر مرة وشلون راح يلتقي بيها
وراها حجتلي على سفرها وشلون رايدة توگع بمصيبة والاسمة محمد ساعدها كلش شوقتني علمود اشوفة من بعد ما گالت هو هم ساعدها وجذب على اخوها علمود لا يعاقبها والله كلش كاسر خاطري هالامجد شكد يخاف عليها ودائما متحمل مصايبها بس هي دائما ظالمتة وتگول علي الخبيث
بقيت افكر هواي لما اخر شي قررت اگوللها على موضوع آسر وصدگ حجيتلها كلشي وشوفتها المحادثة مالتنا
هي انصدمت وگالت بصوت عالي جذذذذب بسرعة سديت حلگها الثولة فضحتنا وخرت ايدي صارت تضرب بية وتگول ليش ما گتلي
صرت ادفع بيها واگول انتي هم ما گلتيلي على رسالة وليد يعني هسة احنا متعادلين
اخذتلها صفنة وگالت اي صح متعادلات بس اريد اسئلج ليش ما توافقين على آسر لا يكون ما تحبينة
جاوبتها بتوتر وخجل لا اني هم معجبة بي بس اني اصلا بعدني ما مستعدة اريد اكمل دراستي وعندي هواي اشياء اريد احققها ودائما اخاف من الزواج لان هو قرار مصيري وحياة جديدة
اخذتلها صفنة وگالت اگلج احنا حجينا هواي اگوم اجيب عصير لان ريگي نشف واني عندي وياج حجي هواي اصبريلي
طلعت من الغرفة واني بقيت گاعدة وحدي ورا شوية طفت الكهرباء حسيت بالخوف بس گلت هسة اندي راح ترجج زاد الخوف عندي واندي بعدها ما راجعة والمشكلة موبايلي بجنطة خالتي ام علي گمت اتمشى على كيف واني احاول ما اطخ باي شغلة فتحت الباب وطلعت اتمشى على كيف واني احاول الزم الحايط
فجأة انضربت بشخص رجعت بسرعة ورا وهو فتح فلاش الموبايل انصدمت من لگيتة آسر اخو اندي ما اعرف شصار بقيت واگفة بمكاني وهو مثلي احس انثولينا اثنينا ورا شوية جت الكهرباء بقى واگف واني اعتذرت منة وتمشيت بسرعة ردت انزل الدرج بس وقفني صوتة من گال
_غزل
يتبع....