သူဌေးကြီးဖြစ်ဖို့ ပိုက်ဆံတွေ ဆုံးရှုံးဖို့လိုတယ်

Ch-63/64

အခန်း(၆၃) ဇာတ်ကွက်

ချန်းရှက ဖန်သားပြင်ပေါ်က ညွှန်ကြားချက်များအတိုင်း လိုက်နာပြီး မောက်စ်ကို ရွေ့လျားကာ left-click နှိပ်လိုက်ပြီး ဖမ်းချုပ်မှုမှ လွတ်မြောက်အောင် ကြိုးစားလိုက်သည်။

ဇာတ်လိုက်က အစွမ်းကုန်လွတ်မြောက်အောင် ကြိုးစားရင်း နာကျင်စွာဖြင့် အော်ဟစ်နေသည်။ ဇွန်ဘီကို ဘေးဘက်သို့ ဆောင့်ကန်ပစ်လိုက်ပြီး ခေါင်းကို နင်းပစ်လိုက်သည်။ ဇွန်ဘီ၏ ခေါင်း ပေါက်ထွက်သွားရသည်။

အမှန်ပင်။ ဒီလိုကြမ်းတမ်းသည့် မြင်ကွင်းမျိုးကို မပြမိအောင် ရှောင်ရှားဖို့အတွက် သူ့မြင်ကွင်းက ဘေးဘက်များကို ယိမ်းသွား၏။

ESRO တွင် ကိုယ်ပိုင် Rating စနစ်ရှိသော်လည်း ပေါင်ရှုနှင့် ဟွမ်စစ်ပေါ်တို့ နှစ်ယောက်စလုံးက သမုဒ္ဒရာရဲတိုက်ကို လူငယ်များအတွက် မသင့်တော်ဘူးဟု မသတ်မှတ်စေချင်ပေ။ မဟုတ်လျှင် ကစားသမားဦးရေ လျော့ကျသွားနိုင်သည်။

ဂိမ်းက အလွန်ကြမ်းတမ်းသည့် မြင်ကွင်းမျိုးကို မပြသအောင် ချိန်ညှိမှုတချို့ လုပ်ထားသည်။

ဇာတ်လိုက်က နာကျင်မှုကြောင့် ကြမ်းပြင်ပေါ်သို့ လဲကျသွားသည်။ First-person ရှုထောင့်တွင် ဇွန်ဘီ၏ ကိုက်ချက်ကြောင့် ဇာတ်လိုက်၏ ညာဘက်ခြေထောက်ပေါ်၌ သွေးရွှဲနေသည့် ဒဏ်ရာတစ်ခု ရှိနေတာကို မြင်လိုက်ရသည်။ ၎င်း၏ စစ်ဘောင်းဘီ အလယ်တွင် အပေါက်တစ်ပေါက်ရှိနေပြီး အပေါက်၏ အောက်ဘက်တွင် အသားများက စုတ်ပြဲကာ သွေးများ စီးကျနေသည်။

ဇာတ်လိုက်က ရုန်းကန်ရင်း မတ်တတ်ရပ်လိုက်ကာ ထွက်ပေါက်ဆီသို့ ရှပ်တိုက်လျှောက်လာခဲ့သည်။

နောက်ဆုံးတော့ နောက်ဆုံးတံခါးထံသို့ ရောက်လာခဲ့လေပြီ။

တံခါးက ဖွင့်လျက်သား ရှိနေပြီး တံခါးဟနေသည့် ကြားတွင် အလင်းရောင်ကို မြင်ရသည်။ တံခါး၏ အနောက်တွင် မသဲဲမကွဲအသံတစ်ခုကို ကြားနေရသည့်ပုံပင်။

ဇာတ်လိုက်က လက်နှစ်ဖက်စလုံးဖြင့် တံခါးကို တွန်းဖွင့်ကြည့်လိုက်သည်။

တံခါးပွင့်သွားသောအခါ သွေးများစိုရွှဲနေသည့် ဇွန်ဘီတစ်ကောင်က တံခါးနောက်မှထွက်လာပြီး ဇာတ်လိုက်ဆီသို့ ခုန်အုပ်ကာ ကြမ်းပြင်ပေါ် လှဲချလိုက်သည်။

"လခွီး လခွီး လခွီး လခွီး လခွီး..."

ချန်းရှ လုံးဝ ထိတ်လန့်သွားခဲ့သည်။ ဇွန်ဘီ၏ မျက်နှာကြီးက ဇာတ်လိုက်ပေါ်တွင် ရှိနေပြီး ဖန်သားပြင်တစ်ခုလုံးကို ဖုံးလွှမ်းထားသည်။ သွေးကွက်များ၏ ၎င်း၏ သွားများပေါ်က အသားစများကိုပင် ရှင်းရှင်းလင်းလင်း မြင်နိုင်သည်။

ထိုဇွန်ဘီ၏ မျက်နှာကို အရမ်းကြီး လက်တွေ့ဆန်ပြီး အသေးစိတ်ကျအောင် ဒီဇိုင်းဆွဲမထားသော်လည်း ချန်းရှ လန့်သွားဆဲဖြစ်သည်။ ဇွန်ဘီ ဒီလိုမျိုး ရုတ်တရက်ကြီးပေါ်လာလိမ့်မည်ဟု သူမထင်ထားခဲ့ပေ။

ဇွန်ဘီက ကြေးစားစစ်သည် ဝတ်စုံဝတ်ထားသည်။ ၎င်း၏ ခန္ဓာကိုယ်က တစ်ဆက်တည်း ရှိနေဆဲဖြစ်ကာ ထွားကြိုင်းလှသည်။ ခုနက အားနည်းပြီး စုတ်ပြတ်နေသည့် ဇွန်ဘီလိုမဟုတ်ပေ။

ကြေးစား ဇွန်ဘီကြီးက ဒဏ်ရာရနေသည့် ဇာတ်လိုက်ကို ကြမ်းပြင်ပေါ်သို့ တွန်းလှဲလိုက်ပြီး ရုန်းကန်ကာ သူ့ခေါင်းကို ဇာတ်လိုက်အနား ကပ်ဖို့ ကြိုးစားနေသည်။ "ဂါးးး" မာန်ဖီသံများကို ၎င်း၏ လည်ချောင်းနောက်ဘက်မှ ကြားနေရပြီး ဇာတ်လိုက်၏ လည်ပင်းကို ကိုက်ဖြတ်ဖို့ ကြိုးစားနေသည်။

ဇာတ်လိုက်က ညာဘက်လက်ဖြင့် ကြေးစားဇွန်ဘီ၏ လည်ပင်းကို ညှစ်ထားပြီး သူ့ဘယ်ဘက်လက်က ဇွန်ဘီ၏ ခါးနားသို့ ရွေ့လျားသွားခဲ့သည်။

ဒိုင်း...

သေနတ်ပစ်သံတစ်သံ ထွက်ပေါ်လာခဲ့သည်။ သွေးများ ဖုံးလွှမ်းနေသော အမြင်အာရုံကြားထဲတွင် ဇာတ်လိုက်က ကြေးစားဇွန်ဘီကို တွန်းလိုက်ပြီး ၎င်း၏ အလောင်းကို ဘေးဘက်သို့ လွှင့်ပစ်လိုက်တာကို ချန်ရှ မြင်နိုင်သည်။

ကြေးစားဇွန်ဘီ၏ ခါးတွင် ပစ္စတိုတစ်လက် ရှိနေခဲ့သည်။ ဇာတ်လိုက်က ထိုသေနတ်ကို ဆွဲထုတ်ကာ ဇွန်ဘီ၏ ခေါင်းကို ပစ်လိုက်ခြင်း ဖြစ်သည်။

ဇာတ်လိုက်က သွေးထွက်လွန်နေသဖြင့် ဖန်သားပြင်က တဖြည်းဖြည်း ဝါးလာခဲ့သည်။ ထို့ကြောင့် သေနတ်ပစ်ချက်ကြောင့် ဇွန်ဘီ၏ ခေါင်းဘယ်လို ပေါက်ထွက်သွားသလဲ မမြင်ရခဲ့ပါ။ သို့သော်လည်း မှုန်ဝါးနေသည့် အမြင်အာရုံနှင့် ဇာတ်လိုက်၏ အသံတို့က ဖိအားကို ပိုမြင့်မားသွားစေသည်။

ချန်းရှက ချောက်ချားသွားသည်။ ဒီဂိမ်းက တကယ်ဆိုးရွားတာပဲ။

ဒီဂိမ်းက FPS ဂိမ်းလို့ ပြောပေမဲ့ အကြောင်းအရာက ခြောက်ခြားဖွယ်ဂိမ်းတစ်ခုနှင့် တူနေသည်။ လူတွေသေအောင် ကြောက်လန့်သွားနိုင်သည်။

တကယ်တော့ ထိုတိုက်ပွဲနှစ်ခုက မျက်တစ်မှိတ်အချိန်အတွင်း ပြီးဆုံးသွားနိုင်သည်ံ တိုက်ပွဲများ ဖြစ်သည်။ ၎င်းတို့၏ လက်ကို အသုံးပြုပြီး မောက်စ်ကို ရွှေ့လိုက်သည်နှင့် တိုက်ပွဲများက ခဏလေးနှင့် ပြီးဆုံးသွားပါလိမ့်မည်။ သို့သော်လည်း ချန်းရှက ချွေးစေးများ ပြန်ခဲ့သေးသည်။

အဓိက အကြောင်းအရင်းကတော့ ခြေထောက်ကိုက်သည့် ဇွန်ဘီနှင့် တံခါးနောက်ကနေ ရုတ်တရက် ပေါ်လာပြီး တိုက်ခိုက်သည့် ဇွန်ဘီတို့ကြောင့်ဖြစ်သည်။ ထိုဇွန်ဘီများကို ရင်ဆိုင်ရဖို့ စိတ်ပိုင်းဆိုင်ရာအရ လုံးဝ မပြင်ဆင်ထားခဲ့ပါ။ ထို့ကြောင့် အကြောက်တရားက လုံးဝ ပြင်းထန်ခဲ့သည်။

ဂိမ်း၏ နောက်တစ်ဆင့်ကတော့ ပုံမှန် လမ်းညွှန်မုဒ်ဖြစ်သည်။

စနစ်က ပစ္စတိုဖြင့် ဘယ်လိုချိန်ရမလဲ၊ ပစ်ရမလဲ၊ ကျည်ဘယ်လိုလဲရမလဲ၊ ဘယ်လို ငုံ့ရမလဲ အစရှိသည့် ဂိမ်းကွန်ထရိုးများကို စတင် သင်ကြားပေးသည်။ ဂိမ်း၏ ကွန်ထရိုးများက တခြား FPS ဂိမ်းများနှင့် သိပ်ပြီး မခြားနားလှပါ။ ချန်းရှက ခပ်မြန်မြန်ပဲ သဘောပေါက် သွားခဲ့သည်။

ထိုအချိန်တွင် ဇာတ်လမ်းထဲ၌ ဇာတ်လိုက်က အခန်းထဲရှိ ဗီရိုများထဲတွင် ဆေးအကူသေတ္တာ တစ်လုံးကို ရှာတွေ့ခဲ့ပြီး သူ့ဝမ်းဗိုက်နှင့် ညာခြေထောက်ပေါ်က ဒဏ်ရာများကို ပက်တီးစီးခဲ့သည်။

တစ်ပြိုင်တည်းမှာပင် အခန်းထဲက အလောင်းတစ်လောင်းတွင် ဖြတ်သန်းခွင့် ကတ်တစ်ခုကိုလည်း ရှာတွေ့ခဲ့သည်။

ရိုးရှင်းသည့် ကုသမှုနှင့် ပတ်တီးစီးမှုတချို့ လုပ်ပြီးသွားသောအခါ ဂိမ်း၏ ဇာတ်ကြောင်းမုဒ်တရားဝင် စတင်ခဲ့ပါပြီ။ အစပိုင်းတွင် ဇာတ်လိုက်က ဖြည်းညင်းစွာ လှုပ်ရှားသည့် အားနည်းသော ဇွန်ဘီများဖြင့်သာ ဆုံခဲ့ရသည်။ ဇွန်ဘီများကို တစ်ကောင်ချင်းစီ ခေါင်းကို သေနတ်ဖြင့်ပစ်နိုင်၏။

သို့သော်လည်း ဂိမ်း၏ အစိပိုင်းတွင် ဇာတ်လိုက်မှာ ကျည်ဆန် များများစားစားမရှိခဲ့ပါ။ ဇွန်ဘီများကလည်း အမြဲတမ်း မျှော်လင့်မထားသည့် နေရာများတွင်သာ ပေါ်လာတတ်သည်။ ထို့ကြောင့် အနည်းငယ် အာရုံလွဲသွားရုံနဲ့ အကိုက်ခံရခြင်း သို့မဟုတ် မြေပေါ်သို့ တွန်းလှဲခံရခြင်းများ ဖြစ်သွားနိုင်သည်။

ချန်းရှက အချိန်အရွယ်တော်သော်လည်း ဆက်တိုက် ထိန်လန့်နေရဆဲဖြစ်သည်။

ဂိမ်းက ဇာတ်လိုက်၏ သရုပ်မှန်နှင့် ရည်ရွယ်ချက်ကို တိုက်ရိုက် နှင့် သိသိသာသာ ပြောမပြပါ။ သို့သော်လည်း စဦးပိုင်း ဇာတ်လမ်း တဖြည်းဖြည်းရောက်လာသည်နှင့် ချန်းရှက ဖြစ်နိုင်ခြေများကို ခန့်မှန်းမိနေပါပြီ။

ဇာတ်လိုက်က လျှို့ဝှက်ခံတပ်တစ်ခုထဲတွင် ရှိနေတာဖြစ်ရမည်။ ဒီနေရာကြီးတွင် ဆန်းကြယ်သည့် ဗိုင်းရပ်စ်တစ်မျိုးက လည်ပတ်နေ၏။ လူများစွာက ဗိုင်းရပ်စ်ကူးစက်ခံခဲ့ရပြီး ဇွန်ဘီများအဖြစ် ပြောင်းလဲ သွားကြသည်။

ဇာတ်လိုက်က လျှို့ဝှက်ခံတပ်မှ ကြေးစားများ လိုက်တာကို ခံရရုံတင်မကသေးဘဲ ဇွန်ဘီများ ကိုက်တာကိုလည်း ခံရသည်။

ဇာတ်လိုက်က သူ့ဒဏ်ရာများကို ဆေးအကူ သေတ္တာထဲက ပစ္စည်းများသုံးကာ သွေးတိပ်အောင် ပက်တီးစီးဖို့ ကြိုးစားခဲ့သော်လည်း ဗိုင်းရပ်စ်ပိုး မပျံ့နှံ့အောင် တားဆီးဖို့ မလုံလောက်ပေ။ သူလည်း ဇွန်ဘီတစ်ကောင် ဖြစ်သွားဖို့ သိပ်မလိုတော့ပါ။

ဇာတ်လိုက်တွင် မိတ်ဆွေ၊ ရဲဘော်ရဲဘက် သို့မဟုတ် အပြင်လောကနှင့် ဆက်သွယ်နိုင်မည့် ကိရိယာလည်း တစ်ခုမှမရှိပါ။ အန္တရာယ်များကို ရဲရင့်စွာ ရင်ဆိုင်ရင်း ခံတပ်ထဲက ရင်းမြစ်များကို တစ်ယောက်တည်း ရှာဖွေရုံသာရှိတော့သည်။ ဇွန်ဘီများနှင့် သက်ရှိ ကြေးစားတချို့ကို တိုက်ခိုက်ရင်း ရှင်သန်နေရသည်။

ထိုသို့ တိုက်ခိုက်ရင်း ကစားသမားက မရေမတွက်နိုင်အောင် များပြားသော အဟန့်အတား များကို ရင်ဆိုင်ခဲ့ရသည်။

တိုက်ပွဲများအရ ဇွန်ဘီနှင့် ကြေးစားများကို တိုက်ခိုက်ဖို့အတွက် မတူညီသော နည်းလမ်းများ ရှိကြသည်။

ဇွန်ဘီများက အကြားအာရုံကောင်းကြသည်။ စိတ်ကြိုက် ပစ်ခတ်ခြင်းက ဘေးပတ်လည်ရှိ ဇွန်ဘီများကို ဆွဲဆောင်ရုံသာ ရှိမည်။ ကစားသမားတွင် ထူးချွန်သည့် သေနတ်ပစ် စွမ်းရည်မရှိပါက ဇွန်ဘီအုပ်ကြီး တိုက်ခိုက်တာကို ခံရလျှင် သူပြဿနာ အကြီးကြိးတက်နိုင်သည်။

ထို့အပြင် ကစားသမာားများက ဇွန်ဘီများကို သတ်နိုင်ခဲ့ရင်တောင် ကျည်ကုန်သွားနိုင်သည်။ ကျည်ဆန်လိုအပ်သော အခြေအနေမျိုးတွင် ပိတ်မိသွားနိုင်ကြသည်။

ထို့ကြောင့် ဇွန်ဘီများကို ရှင်းဖို့အကောင်းဆုံး နည်းလမ်းက အနီးကပ်တိုက်ခိုက်ဖို့သာ ဖြစ်သည်။ ကစားသမားများက ဇွန်ဘီများကို လျှို့ဝှက်စွာဖြင့် တစ်ကောင်ချင်း သတ်ဖြတ်ရသည်။

ကြေးစားများကတော့ အုပ်စုလိုက် ကင်းလှည့်ကြ၏။ တစ်ယောက်ယောက် ပျောက််သွားတာနဲ့ အခြားသူတွေက သတိပေးလိမ့်မည်။ သူတို့ အော်ဟစ်ကြပြီး သူတို့၏ ရဲဘော်ရဲဘက်များကို အသိပေးလိမ့်မည်။ ထိုအခါ သူတို့ပိုပြီး သတိဝီရိယ ရှိလာကြပါလိမ့်မည်။

ထို့ကြောင့် ကြေးစားများနှင့် ရင်ဆိုင်ရသောအခါ လုပ်ကြံသတ်ဖြတ်ခြင်းက ရွေးချယ်မှုကောင်း မဟုတ်လောက်ပေ။ ကစားသမားများက ထိုကြေးစားများနှင့် သေနတ်ချင်း ယှဥ်ပစ်နိုင်ဖို့ အကောင်းဆုံးကြိုးစားပြီး တိုက်ပွဲကို တတ်နိုင်သမျှမြန်မြန် အဆုံးသတ်အောင် လုပ်သင့်သည်။ သူတို့ ကြေးစားများကို သတ်ပြီးသည်နှင့် ၎င်းတို့၏ ကျည်ဆန်ကို သိမ်းယူနိုင်သည်။ သေနတ်အသစ်များကိုပင် ရယူနိုင်သည်။

အမှန်ပင်။ အခြေအနေတချို့တွင် ကစားသမားများက ကြေးစားများနှင့် ဇွန်ဘီများကို တစ်ပြိုင်တည်း ရင်ဆိုင်ရနိုင်၏။ သူတို့ သေချာပေါက် ဇွန်ဘီနဲ့ ကြေးစားများကို မျှားခေါ်ပြီး အချင်းချင်း တိုက်ခိုက်အောင် လုပ်နိုင်သည်။ ထို့နောက် နောက်ဆုံးအချိန်ကျမှ ဝင်တိုက်ပြီး ၎င်း၏ တိုက်ပွဲကို အကျိုးခံစားခွင့် ဝင်ယူနိုင်သည်။

တချို့ အတားအဆီးများတွင် ကစားသမားများက အထူး ပစ္စည်းကိရိယာများဖြင့်လည်း ပျော်နိုင်သည်။ ဥပမာ သတ်မှတ်ထားသည့် နေရာများတွင် ဇွန်ဘီများကို ရှင်းလင်းဖို့ စက်သေနတ်ကြီးများ အသုံးပြုခြင်းဖြစ်သည်။ သို့သော်လည်း အများဆုံအချိန်မှာတော့ ကစားသမားက သေနတ်နှင့် ကျည်အသုံးချမှုကို သေသေချာချာလေး ထိန်းသိမ်းရမည်။ ၎င်းတို့ ရှင်သန်ဖို့အတွက် ကြိုးစားရာတွင် ကျည်ဆန်တိုင်းက အရေးပါ၏။

ဂိမ်းထဲက ဇာတ်ကွက်အားလုံးနီးပါးမှာ ခံတပ်ထဲတွင် ဖြစ်သော်လည်း ဝင်္ကပါတစ်ခုလို ဒီဇိုင်းဆွဲထားခြင်း ဖြစ်သည်။

တချို့တံခါးများက ကာရံခံထားရပြီး ဖြတ်သန်းလို့မရပါ။ တချို့က ဖြတ်သန်းခွင့် ကတ်များ လိုအပ်သည်။ တချို့ကတော့ အထူးကိရိယာများကို သုံးရင် ဖျက်ဆီးရမည်။

ဂိမ်းအဆင့်တဖြည်းဖြည်း တက်လာတာနဲ့ ၎င်းတို့၏ ရန်သူများက ခွန်အားကော ပုံစံကွဲပြားမှုကော ပိုမြင့်မားလာမည်ဖြစ်သည်။

ပိုဆိုးတာက ဇာတ်လိုက်၏ စိတ်ပိုင်းဆိုင်ရာ အခြေအနေက တဖြည်းဖြည်း ဆိုးဝါးလာမည် ဖြစ်သည်။ ဖန်သားပြင်က ရုတ်တရက်ကြီး မှုန်ဝါးသွားတတ်ပြီး အတော်ကြာမှ မူလအခြေအနေသို့ ပြန်ရောက်သွားတတ်၏။ ဇာတ်လိုက်၏ လက်များက တုန်ယင်ပြီး သေသေချာချာ မချိန်ရွယ်နိုင်လောက်ပါ။ သူ့လှုပ်ရှားမှုကလည်း နှေးကွေးလာပြီး လမ်းကို ဖြောင့်အောင်ပင် မလျှောက်နိုင်လောက်တော့ပေ။

နောက်ဆုံးတော့ ချန်းရှက သူ့ပထမဆုံး ဘော့စ် အသေးစားလေးကို ရင်ဆိုင်ခဲ့ရသည်။

ပထမဘော့စ်က အားကောင်းသည့် သန္ဓေပြောင်း ဇွန်ဘီတစ်ကောင်ဖြစ်သည်။ တခြား ဇွန်ဘီများထက် ပိုကြီးမားပြီး ပိုရှည်လျားသည့် အသက်ဘားတန်းလည်း ရှိသည်။

သို့သော်လည်း ပထမ ဘော့စ်အသေးစားသာ ရှိသေးသဖြင့် ချန်းရှက သူ စုဆောင်းခဲ့သည့် လက်နက်မျိုးစုံကို အသုံးပြုပြီး သတ်နိုင်ခဲ့သည်။

ထို့နောက် ဇာတ်လိုက်ကပင်ပန်းစွာဖြင့် ကြမ်းပြင်ပေါ်သို့ ပြုတ်ကျသွားသည်။ သူ့အမြင်အာရုံများ တဖြည်းဖြည်း မှုန်ဝါးသွားခဲ့၏။

သူ့အားအင်အကုန်လုံးကို သုံးလိုက်မိပြီး သူကူးစက်ခံထားရသည့် ဗိုင်းရပ်စ်ပိုးကလည်း သူ့ကို အသိစိတ်မဲ့အောင် စလုပ်နေပြီဖြစ်သည်။

နောက်ဆုံးမှာတော့ ဇာတ်လိုက် မျက်လုံးကို ပိတ်လိုက်ပြီး ဖန်သားပြင်လည်း အမှောင်ကျသွားခဲ့တော့သည်။

အခန်း(၆၄) ဇာတ်လမ်းဇာတ်ကွက် ဒီလောက် ကောင်းလိမ့်မယ်လို့ မထင်ထားဘူး

ခဏကြာသောအခါ ဇာတ်လိုက်က သတိပြန်လည်လာ၏။

ထိုအခန်းထဲမှာပဲ ရှိနေဆဲဖြစ်ပြီး သန္ဓေပြောင်း သတ္တဝါများ၏ အလောင်းဘေးတွင် လဲနေတာကို မြင်လိုက်ရသည်။

သို့သော်လည်း သူ့အသက် အခြေအနေက အများကြီး ပိုတိုးတက်သွားသည်။ ဗိုင်းရပ်စ်ပိုး ကူးစက်ပြီးနောက် သူခံစားခဲ့ရသည့် အဖျားရောဂါလက္ခဏာများလည်း ပျောက်ကွယ်သွားပါပြီ။

ကလေးမလေးတစ်ယောက်က စွန့်ပစ်ဗီရိုတစ်လုံး အနောက်တွင် ပုန်းနေသည်။ သူ့ကို စိတ်ဝင်စားမှု၊ သတိရှိမှုများဖြင့် ကြည့်နေ၏။

ဇာတ်လိုက်က ကလေးမလေးကို ဘာသာစကားမျိုးစုံ သုံးကာ ဆက်သွယ်ဖို့ ကြိုးစားကြည့်သည်။ ကလေးမလေးက တရုတ်စကားနားလည်တာကို သတိထားမိသည်။ သို့သော် ဘာမှမတုံ့ပြန်နိုင်ပေ။။ သူမ၏ ပါးစပ်ကို လက်ညှိုးထိုးပြပြီး လက်ခါပြလိုက်သည်။

"သြော် စကားမပြောနိုင်ဘူးကို။ သူက ဇာတ်လမ်းထဲက ဇာတ်ကောင်တစ်ကောင်လား" ချန််းရှက စဥ်းစားလိုက်သည်။

သည်လိုနှင့် ဇာတ်လမ်းဆက်ခဲ့သည်။

ဇာတ်လိုက်က မတ်တတ်ရပ်လိုက်ပြီး ရင်းနှီးသည့် အပြုအမူမျိုးဖြင့် ကောင်မလေးကို ချဥ်းကပ်လိုက်ကာ သူမကို စကားပြောဖို့ ကြိုးစားကြည့်လိုက်သည်။ ထိုမှတစ်ဆင့် သူ့ကို ကယ်တင်ခဲ့တာ သူမဖြစ်ကြောင်း သိလိုက်ရသည်။

ကလေးမလေးက ဇာတ်လိုက်ကို ထူးဆန်းသည့် ဆေးထိုးအပ်တစ်ချောင်းကို ပြခဲ့သည်။ ဤခံတပ်ထဲက သိပ္ပံပညာရှင်များ ဖန်တီးထားတာ ဖြစ်နိုင်ပြီး ခန္ဓာကိုယ်ထဲမှ သွေးများစု ထုတ်ယူ၊ အရည်များသွင်းနိုင်ဖို့ အသုံးပြုနိုင်သည်။

ဇာတ်လိုက်က သူကူးစက်ခံထားရသည့် ဗိုင်းရပ်စ်ကို ဖိနှိပ်ပြီး သူ့ကို ကုသပေးနိုင်ခဲ့တာ ကောင်မလေး၏ သွေးကြောင့်ဖြစ်ကြောင်း မသဲမကွဲ နားလည်လိုက်သည်။ ထို့ကြောင့်လည်း သူ ဇွန်ဘီအဖြစ် ပြောင်းလဲမသွားခြင်း ဖြစ်သည်။

ကလေးမလေးက ဇာတ်လိုက်ကို အနီးအနားရှိ သုတေသန ဓာတ်ခွဲခန်းတစ်ခုဆီသို့ ခေါ်လာခဲ့သည်။ ဓာတ်ခွဲခန်းက ရှုပ်ပွနေ၏။ ဒီထဲတွင် တိုက်ပွဲပြင်းပြင်းထန်ထန် ဖြစ်ပွားခဲ့သည့်ပုံပင်။ လေထဲတွင်လည်း ခပ်စူးစူး အနံ့တစ်ခုထွက်နေ၏။ ဇာတ်လိုက်က အနီးအနားရှိ အလောင်းတစ်လောင်းထံမှ ဓာတ်ငွေ့ မျက်နှာဖုံးတစ်ခုကို တပ်ဆင်ပြီးမှ ဓာတ်ခွဲခန်းထဲ ဝင်ရဲခဲ့သည်။

ဇာတ်လိုက်က ဓာတ်ခွဲခန်းထဲတွင် ကျန်ခဲ့သည့် စာရွက်စာတမ်းများနှင့် ဒီနေရာကြီး၏ အခြေအနေကို ကြည့်ရင်း ဖြစ်ပျက်ခဲ့သည့် အဖြစ်အပျက်များကို ခန့်မှန်းမိသည်။

ကလေးမလေး၏ ခန္ဓာကိုယ်တွင် ဗိုင်းရပ်စ်ပိုးကို ကာကွယ်နိုင်သည့် ပဋိပစ္စည်းတစ်မျိုးရှိသည်။ သူမ၏ သွေးက ဗိုင်းရပ်စ်ကို ကုသပေးနိုင်သည်။ ခံတပ်ထဲတွင် ဗိုင်းရပ်စ်ပိုး လည်ပတ်သွားသောအခါ ကြေးစားအဖွဲ့တစ်ဖွဲ့အား ကလေးမလေးကို ဓာတ်ခွဲခန်းမှ ခေါ်ထုတ်လာဖို့ တာဝန်ပေးခံခဲ့ရသည်။ သို့သော်လည်း ထိုသို့ ခေါ်ထုတ်လာရင်း ဇွန်ဘီတိုက်ခိုက်ခံရမှုနှင့် ကြုံခဲ့ရသည်။ ပြင်းထန်းသည့် တိုက်ပွဲအကြားတွင် အဖွဲ့က ဇွန်ဘီများကို သတ်ဖို့အတွက် အထူး အဆိပ်ဓာတ်ငွေ့တစ်မျိုးကို ထုတ်ခဲ့သည်။ ကံဆိုးသည်မှာ ဇွန်ဘီအရေအတွက်က သူတို့အဖွဲ့တိုက်ခိုက်ဖို့အတွက် များလွန်းနေဆဲ ဖြစ်ကာ နောက်ဆုံးမှာတော့ သူတို့အားလုံး စတေးခဲ့ရသည်။

ထိုအချိန်တွင် ခံတပ်ထဲတွင် နဂိုကတည်းက ရှိနေခဲ့သော ဇွန်ဘီများနှင့် ဇွန်ဘီအဖြစ် ပြောင်းလဲသွားသော အဖွဲ့ဝင်များမှာ အဆိပ်ဓာတ်ငွေ့ကြောင့် အားလုံးသေဆုံးသွားခဲ့ကြသည်။

လက်နက်ကိရိယာများလည်း ပျက်စီး ချို့ယွင်းကုန်ကြသည်။ ကလေးမလေးကတော့ လွတ်မြောက်လာခဲ့၏။ သူမခန္ဓာကိုယ်ထဲက ပဋိပစ္စည်းများမှာ ဇီဝဓာတု ဗိုင်းရပ်စ်နှင့် အဆိပ်ဓာတ်ငွေ့များကို ခံနိုင်ရည်ရှိသည်။ ထို့အပြင် သူမ၏ သွေးကလည်း ကူးစပ်ခံထားရသော လူများကို ကုသပေးနိုင်သည်။

သို့သော် သွေးထုတ်ယူရာတွင် အထူးကိရိယာတစ်ခုကို အသုံးပြုရသည်။ ကလေးမလေး ခုနက ကိုင်ထားသည့် အထူးဆေးထိုးအပ်မျိုးဖြစ်သည်။ အသုံးပြုပြီးတာနှင့် စွန့်ပစ်ရသည်။

ထို့ကြောင့် ဇာတ်လိုက်က ကလေးမလေးကို ခေါ်ရင်း ခံတပ်မှ ထွက်ပေါက်ကို ရှာဖွေခဲ့သည်။

ထိုသို့ ရှာဖွေရင်း ချန်းရှ အတားအဆီးများနှင့် ထပ်တွေ့ခဲ့ရသည်။

မြေပုံက ပိုပိုပြီး ရှုပ်ထွေးလာခဲ့သည်။ တစ်ခါတစ်ရံ ချန်းရှက ဆက်ရွေ့လျားနိုင်ဖို့အတွက် ရိုးရှင်းသည့် ပဟေဠိများကိုပင် ဖြေရှင်းရတတ်သည်။

ထိုသတ္တဝါများကို တိုက်ခိုက်ရသည့် ခက်ခဲမှုကလည်း ပိုမိုပြင်းထန်လာခဲ့သည်။ ဇွန်ဘီတချို့တွင် လျင်မြန်ခြင်း၊ အလွန်ရှည်လျားသော အသက်ဘားများ၊ ကိုယ်တစ်ဝက်ပျောက်အောင် လုပ်နိုင်စွမ်း အစရှိသော သန္ဓေပြောင်းစွမ်းရည်တချို့ ပါဝင်လာခဲ့သည်။ ကြေးစားများ၏ လက်နက်ကလည်း ပိုပိုပြီး အဆင့်မြင့်လာ၏။ လူဦးရေလည်း တိုးလာခဲ့သည်။

ထိုရန်သူများကို တိုက်ခိုက်ခြင်းအပြင် ချန်းရှက မြေပုံထဲရှိ ရင်းမြစ်များကိုလည်းရှာဖွေရကာ မဖြုန်းတီးမိအောင် ကျည်ဆန်ကိုလည်း တွက်ချက်ရသေး၏။

ကျည်ဆန်နှင့် ဆေးအကူပစ္စည်းများအပြင် ဇာတ်လိုက်က ဆေးထိုးအပ် ရင်းမြစ်များကိုလည်း ရှာဖွေရသေးသည်။

ကလေးမလေး၏ သွေးက သူ့ကို ဇွန်ဘီဗိုင်းရပ်စ်ပိုး ရာသက်ပန်ခံနိုင်အောင် လုပ်ဆောင်မပေးနိုင်ပေ။ ဇာတ်လိုက် အကိုက်ခံလိုက်ရပါက ဗိုင်းရပ်စ် ထပ်ကူးစက်နိုင်သေးသည်။ ထိုအခါ ကလေးမလေးထံမှ သွေးကို ထိုးသွင်းဖို့ လိုအပ်သည်။

ဆေးထိုးအပ်များ မရှိလျှင် ကလေးမလေးက ဇာတ်လိုက်ကို သွေးထိုးသွင်းပေးနိုင်မည် မဟုတ်ပေ။

ထို့အပြင် နယ်မြေတချို့၌ ကလေးမလေး၏ အကူအညီကို လိုအပ်သည်။

သူမတွင် တိုက်ခိုက်စွမ်းရည်မြင့်မြင့်မားမား မရှိသော်လည်း တခြား ကဏ္ဍများစွာတွင် ကူညီပေးနိုင်သည်။ ဥပမာအားဖြင့် တချို့ အဟန့်အတားများအတွက် ပဟေဠိများကို ဖြေရှင်းရာတွင် ချန်းရှ ကလေးမလေးနှင့် ပူးပေါင်းဆောင်ရွက်ဖို့ လိုအပ်သည်။ သူမက သေးငယ်၊ သွက်လက်ပြီး အဆိပ်ဓာတ်ငွေ့နှင့် ဗိုင်းရပ်စ်ပိုးများကို ခံနိုင်ရည်ရှိသည်။ သူမ၏ သွေးကလည်း ဗိုင်းရပ်စ်ကြောင့် ဖြစ်ပေါ်လာသော အားနည်းမှုများကို ဖယ်ရှားနိုင်ပြီး ဇာတ်လိုက်၏ အသက်ဘားကို ပြန်ဖြည့်နိုင်သည်။

တိုက်ပွဲပြင်ပတွင် ကလေးမလေးက ကွယ်ပျောက်နေသည့် ပစ္စည်းများကို ကူညီပြီး ရှာဖွေပေးလိမ့်မည်။

ကလေးမလေးက အနီးအနားတွင်ရှိနေသော ဇွန်ဘီများကို အာရုံခံနိုင်စွမ်းရှိ၏။ သူတို့ လမ််းလျှောက်နေစဥ် ကလေးမလေးက ရုတ်တရက်ကြီး ပုန်းခိုဖို့ နေရာရှာပါက တိုက်ပွဲစတော့မည်ဟု ဆိုလိုခြင်းဖြစ်သည်။

တိုက်ပွဲအတွင်း ကလေးမလေးကြောင့် သူ့စိတ်ခံစားချက် လွှမ်းမိုးမှုရှိနိုင်သည်ကို ချန်းရှ ခံစားမိသည်။

ကလေးမလေးနှင့်အတူတူ အဟန့်အတားတစ်ခုကို ကျော်ဖြတ်ပြီးသောအခါ အလွန်ဂုဏ်ယူမိ၏။

ကလေးမလေးအား ဇွန်ဘီများ ဝိုင်းရံထားတာကို မြင်လျှင် အလွန်ထိတ်လန့်ပြီး ထိုနေရာသို့ ချက်ချင်း ရောက်သွားချင်မိသည်။

သွေးထုတ်ယူပြီးသောအခါ ကလေးမလေး အားနည်းသွားတာကိုမြင်ပြီး စိတ်ဓာတ်ကျမိပါသေးသည်။ သူ့ကိုယ်သူ ညံ့လွန်းသည်ဟု အပြစ်တင်ကာ တိုက်ပွဲအတွင်း ဒဏ်ရာမရလျှင်ကောင်းမည်ဟု တွေးမိသည်။

...

ချန်းရှသည် အမှတ်တမဲ့ ဂိမ်းကို စွဲလမ်းသွားခဲ့သည်။

ပြောရမည်ဆိုလျှင် သမုဒ္ဒရာရဲတိုက်မှာ ရှုထောင့်မျိုးစုံတွင် နိုင်ငံခြားက AAA ဂိမ်းများနှင့် နှိုင်းယှဥ်လို့ မရသေးပေ။ ဥပမာအားဖြင့် ၎င်း၏ ဂိမ်းအရည်အသွေး (ရုပ်ထွက်၊ ဇာတ်ကောင်မော်ဒယ်၊ အက်ရှင်၊ အသေးစိတ် စသည်) နှင့် ဇာတ်ကွက်၏ လှည့်ကွက်များဖြစ်သည်။

သို့သော်လည်း ချန်းရှက ဒီဂိမ်းကိုစွဲလမ်းမိသည်။ တခြား နိုင်ငံခြားက AAA ဂိမ်းများဖြင့် ခြားနားသည်ဟု ခံစားမိသည်။

ဇာတ်လိုက်က သာမန်နိုင်ငံသားတစ်ဦးဖြစ်သည်။ အခြေမဲ့အဖွဲ့အစည်းတစ်ခု၏ လျှို့ဝှက်ခံတပ်ထဲသို့ အမှန်တရားကို လာရောက်ရှာဖွေသော အထူးတပ်ဖွဲ့နှင့် ပါလာခဲ့သည်။ သူက ဘာသာစကားများစွာ တတ်ထားသော်လည်း အနားယူနေစဥ် ကိုယ့်ကိုယ်ကိုယ် စကားပြောသည့်အခါ တရုတ်စကားကို သုံးခဲ့သည်။ ကလေးမလေးကိုလည်း တရုတ်စကားသုံးကာ ပြောတတ်၏။ ထို့ကြောင့် ဂိမ်းမှာ အလွန်အမင်း နစ်မျောသွားစေသည်။

ဇာတ်လိုက်က သာမန်နိုင်ငံသားတစ်ဦးဖြစ်သည့်အခါ ကစားသမားများ ဂိမ်းကို ဆွဲဆောင်မှုရှိသည်ဟု ထင်တာ ပုံမှန်ပဲဖြစ်သည်။ ထို့အပြင် ပြောရမည်ဆိုလျှင် ပြည်တွင်းထုတ် ဂိမ်းတစ်ခု ဒီလိုအထင်ကြီးစရာ ကောင်းသည့် ဇာတ်ကြောင်းမုဒ်တစ်ခုကို ထုတ်လုပ်နိုင်တာ အံ့သြဖို့ ကောင်းလှသည်။

Counter Strike နဲ့ Bullet Hole လို ဂိမ်းတွေကတောင် ဇာတ်ကြောင်းမုဒ်ကို မထည့်ရဲကြပေ။

သမုဒ္ဒရာရဲတိုက်၏ ဇာတ်ကြောင်းမုဒ်က ရင်းမြစ် လိုအပ်ချက်ကြောင့် တချို့ နိုင်ငံခြား AAA ဂိမ်းများထက် နိမ့်ကျသော်လည်း အရည်အသွေးက သိပ်ပြီး မကွာလှပါ။ တခြား ပြည်တွင်းထုတ်ဂိမ်းများနဲ့ ယှဥ်ကြည့်လျှင် ထိပ်တန်းအဆင့်ရှိသည်ဟု ပြောနိုင်သည်။ ထုတ်လုပ်သူများကို သူတို့လုပ်နိုင်ခဲ့သည့် အရာအတွက် အမှတ်ပြည့်ပေးသင့်သည်။

ထို့အပြင် ဂိမ်း၏ ဇာတ်ကြောင်းမုဒ်မှာအတော်လေး ရိုးရှင်းသော်လည်း လိုအပ်တာတွေတော့ ပါနေတာကို သိထားရပါမည်။

အဟန့်အတားများ၏ ဒီဇိုင်းကလည်း ကျိုးကြောင်းသင့်လျော်မှုရှိသည်။ သတ္တဝါများနှင့် သေနတ်များ မျိုးစုံရှိသည်။ အဟန့်အတားများ၏ ခက်ခဲမှုအဆင့်ကလည်း လုံလောက်မှုရှိသည်။

အထင်ကြီးစရာအကောင်းဆုံးက ကလေးမလေး၏ ဒီဇိုင်းဖြစ်သည်။ ဇာတ်လမ်းတစ်ပုဒ်လုံးကို အသက်ဝင်သွားစေသည်။

ကလေးမလေးသာ မပါလျှင် ဇာတ်ကြောင်းမုဒ်ဟုပင် မခေါ်နိုင်ဘဲ 'Infinite Mode' ဟု ခေါ်နိုင်သွားပါလိမ့်မည်။ ဘာပဲဖြစ်ဖြစ် အဟန့်အတားများ၊ ဇွန်ဘီများ၊ ကြေးစားများနဲ့သာ တိုက်ခိုက်နေရလျှင် ဇာတ်လမ်းက ဘယ်မှာလဲ။

သို့သော်လည်း ကလေးမလေးကို ထည့်လိုက်သောအခါ ဇာတ်ကြောင်းမုဒ်တစ်ခုလုံး အသက်ဝင်လာခဲ့သည်။

ပျင်းစရာကောင်းသည့် သေနတ်တိုက်ပွဲများတွင် ဝိညာဥ်တစ်ခု ပါလာသည်။ အဘယ့်ကြောင့်ဆိုသော် ကစားသမားများက ၎င်းတို့၏ စိတ်ခံစားချက်အစစ်အမှန်များကို ဂိမ်းထဲတွင် မြှုပ်နှံထားကြသောကြောင့် ဖြစ်သည်။

ကစားသမားများနှင့် ဆက်သွယ်နိုင်စွမ်းရှိသည့် ဂိမ်းများကိုသာ ဇာတ်လမ်းဇာတ်ကွက် ကောင်းမွန်သည်ဟု ဆိုနိုင်သည်။

ဂိမ်း၏ အဆုံးသတ်တွင် ဇာတ်လိုက်က အခက်အခဲအားလုံးကို ရဲရင့်စွာ ကျော်ဖြတ်ပြီး သမုဒ္ဒရာရဲတိုက်ကြီး၏ အမြင့်ဆုံးအထပ်ကို ရောက်ရှိသွားခဲ့သည်။ နောက်ဆုံး သန္ဓေပြောင်း ဘော့စ်ကြီးကို အနိုင်ယူကာ ထိုနေရာမှ ရဟတ်ယာဥ်တစ်စီးဖြင့် ထွက်ခွာနိုင်ခဲ့သည်။

ရဟတ်ယာဥ်ပေါ်တွင် ရှိနေစဥ် ဇာတ်လိုက်က ဗုံးခွဲခလုတ်ကို နှိပ်ခဲ့သည်။ သမုဒ္ဒရာရဲတိုက်၏ အပေါ်မှ ကြီးမားသည့် ဧရာမ မှိုပွင့်တိမ်တိုက်ကြီးတစ်ခု မြင့်တက်လာသည်။ မိစ္ဆာဆန်သည့် ဗိုင်းရပ်စ်စမ်းသပ်ချက်များ၊ ကြောက်စရာကောင်းသည့် သန္ဓေပြောင်း သတ္တဝါများ၊ ငွေမက်သည့် ကြေးစားများနှင့် တရားမဝင်အဖွဲ့အစည်း၏ အာဏာပိုင်များအကုန်လုံး ပင်လယ်အောက်ထဲသို့ နစ်မြုပ်သွားခဲ့သည်။

ဇာတ်လိုက်က ရဟယ်ယာဥ်ထဲတွင် ပျံသန်းနေစဥ် ကင်မရာက ကလေးမလေးကို ဦးတည်ပြသ၏။

ကလေးမလေးက ဇာတ်လိုက်၏ ဂျာကင်အောက်တွင် တိတ်ဆိတ်စွာ အိပ်ပျော်နေခဲ့သည်။

နေဝင်ဆည်းဆာအလယ်၊ ပေါက်ကွဲမှုကြောင့် ရိုက်ခတ်နေသည့် လှိုင်းလုံးများအက်တွင် ဇာတ်လိုက်က ကလေးမလေးနှင့်အတူ ပျံသန်းသွားခဲ့တော့သည်။ ဇာတ်ကြောင်းမုဒ် ပြီးဆုံးသွားသည်။

ဖန်တီးသူများ၏ နာမည် ဖန်သားပြင်ပေါ်တွင် ပေါ်လာခဲ့သည်။ ချန်းရှ အံ့သြသွားရလောက်အောင် စုစုပေါင်း ဖန်တီးမှုအဖွဲ့တွင် လူ ၆၀ ကျော်ကျော်လေးသာ ပါဝင်သည်။

၆၀ ဝန်းကျင်နာမည်များထဲတွင် ၂၀ ဝန်းကျင်လောက်ကသာ ထန်းတာ့မှ သုတေသနနှင့် ဒီဇိုင်းဝန်ထမ်းများ ဖြစ်ကြသည်။ ကျန်တာက ဒီဂိမ်းအတွက် ထန်းတာ့ ငှားရမ်းထားသည့် ကျန်ကုမ္ပဏီများမှ ဝန်ထမ်းများ ဖြစ်ကြသည်။ ဇာတ်ကောင် မော်ဒယ် ဒီဇိုင်နာများ၊ ဂိမ်းလုပ်ဆောင်ချက် ဒီဇိုင်နာများ၊ အသံသရုပ်ဆောင်များ၊ ဂီတနှင့် အသံ effect ဒီဇိုင်နာများ စသည်တို့ပါဝင်သည်။

ဘာပဲဖြစ်ဖြစ် ချန်းရှ ထိတ်လန့်မိဆဲဖြစ်သည်။ ဒီလောက်လူနည်းနည်းလေးနှင့် ဒီလောက်အမှတ်ရစရာ ကောင်းသည့် ဇာတ်လမ်းကို ဖန်တီးနိုင်လိမ့်မည်ဟု မထင်ထားခဲ့ပေ။

တကယ်တော့ သေသေချာချာ ပြန်စဥ်းစားကြည့်ရလျှင် ရင်းမြစ်များစွာကို ဇာတ်ကြောင်းမုဒ်ထဲ ထည့်ပြီး သုံးမထားသည့်ပုံပင်။ အမှတ်ရစရာကောင်းသည့် တစ်ယောက်တည်းသော ဇာတ်ကောင်က ကလေးမလေးသာ ဖြစ်သည်။

သို့သော် သမုဒ္ဒရာရဲတိုက်ဂိမ်းထဲက ဇာတ်ကြောင်းမုဒ်မှာ မေ့မရနိုင်စရာပင် ဖြစ်သည်။ ဒီဇိုင်နာများ၏ အစွမ်းအစကို သက်သေပြပြီးသားဖြစ်သွားသည်။

ချန်းရှ လုံးဝ မှင်တက်သွားမိသည်။ ထိတ်လန့်မှုမှ ပြန်ပြီးအသိဝင်လာဖို့ အချိန်အတော်ယူလိုက်ရသည်။

အစကတော့ သူတို့ဖန်တီးထားသည့် ဇာတ်ကြောင်းမုဒ်ကြောင့် သူတို့ကိုယ်သူတို့ အရှက်ရစေလိမ့်မည်ဟု ချန်းရှ ထင်ထားခဲ့သည်။ သို့သော်လည်း ကုမ္ပဏီက ဒီလောက်ထိ ကျွမ်းကျင်လိမ့်မည်ဟု မထင်ထားခဲ့ပါ။