အခန်း(၄၉) ဆန်းစထရိုက်ခ် စတူဒီယို
ကွမ်ကျိုး
ဆန်းစထရိုက်ခ် စတူဒီယိုတွင်...။
"ထန်းတာ့ နက်ခ်ဝါ နည်းပညာ ကုမ္ပဏီလိမိတက် ဟုတ်လား"
"သူတို့က ငါတို့စတူဒီယိုကို ပညာဖလှယ်ဖို့ လာချင်တယ် ဟုတ်လား"
ကျိုးမူယန်က ခေါင်းရှုပ်သွား၏။
ဂိမ်းကုမ္ပဏီတစ်ခုက တခြားဂိမ်းကုမ္ပဏီတစ်ခုနဲ့ ပညာဖလှယ်တာကို သူ ကြားဖူးတာ ပထမဆုံးအကြိမ် ဖြစ်သည်။
ပုံမှန်ဆို ဒီလိုကိစ္စမျိုးကို တက္ကသိုလ်ကျောင်းသားများက အတွေ့အကြုံယူဖို့နှင့် ကျောင်းပြီးသောအခါ အလုပ်ခွင်ဝင်နိုင်အောင် ပြင်ဆင်ဖို့အတွက် လုပ်တတ်ကြသည်။
သို့သော် ကိုယ့်ဝန်ထမ်းများအတွက် ဒီလိုကိစ္စမျိုး စီစဥ်ပေးသော ဂိမ်းကုမ္ပဏီတစ်ခု ဘယ်တုန်းကမှ မရှိခဲ့ဖူးပေ။
အနည်းဆုံးတော့ ပြည်တွင်းမှာ မရှိပေ။
အဘယ့်ကြောင့်ဆိုသော် ပြည်တွင်းဂိမ်းကုမ္ပဏီအများစုက အမြတ်အစွန်းကိုသာ အာရုံစိုက်တတ်ကြ၏။ ဒီလို ပညာဖလှယ် ခရီးရှည်ကြီးက သေချောပေါက် ကုန်ကျစရိတ် များပြားပါလိမ့်မည်။
ခန့်မှန်းခြေ လူအယောက် ၃၀ အတွက် လေယာဥ်လက်မှတ်ဖိုး၊ ဟိုတယ်ခနှင့် တခြား ကုန်ကျစရိတ်များ၊ ထို့အပြင် ထိုရက်ပိုင်းများတွင် သူတို့ အလုပ်မလုပ်ကြမှာကိုပါ ထည့်တွက်သောအခါ တော်တော်လေး အရှုံးများပါသည်။
ထို့အပြင် ဒီလိုဆောင်ရွက်ခြင်းက ကုမ္ပဏီအတွက် အမြတ်အစွန်းတစ်ပြားမှ ပြန်ရနိုင်မှာ မဟုတ်ပေ။ အရှုံးသက်သက်သာ ဖြစ်သည်။
သူတို့က ပညာဖလှယ်ဖို့ဟု ခေါင်းစဥ်တပ်သော်လည်း ဘာပညာကို ဖလှယ်ကြမှာလဲ။
ဘယ်လို ကုမ္ပဏီက ဒီလောက်ထိ တုံးမှာလဲ...။
ကျိုးမူယန်၏ ပထမဆုံး တုံ့ပြန်မှုကတော့ ငြင်းဆန်ဖို့ပဲဖြစ်သည်။
သူက ဆန်းစထရိုက်ခ် စတူဒီယို၏ ပရိုဂျူဆာ ဖြစ်ပြီး ဒီလုပ်ငန်းထဲမှာလည်း အတော်လေး အာဏာကြီး၏။
အမှန်ပင်။ ပြောရမည်ဆိုလျှင် နာမည်ဆိုးဖြင့် ကျော်ကြားတာဖြစ်သည်။ ဆန်းစထရိုက်ခ် စတူဒီယိုကို မုန်းတီးကြသည့် လူများစွာ ရှိသဖြင့် သူက ပရိုဂျူဆာတစ်ယောက်လည်း ဖြစ်နေသောကြောင့် စော်ကားမှုများကို မရှောင်လွှဲနိုင်ပေ။
ကျိုးမူယန်ဆိုတာ နာမည်ပြောင်သာဖြစ်သည်။ သူ့နာမည်အရင်းမဟုတ်ပါ။ တောင်ပိုင်းတွင် ကုမ္ပဏီများစွာ၌ နာမည်ပြောင်ရှိကြ၏။ ဆန်းစထရိုက်ခ် စတူဒီယိုကလည်း ထူးမခြားနားသာ ဖြစ်သည်။
မကြာသေးခင်ကမှ ဆန်းစထရိုက်ခ်စတူဒီယိုမှာ အွန်လိုင်း FPS ဂိမ်းတစ်ခုကို ဖန်တီးရင်း တန်းလန်းဖြစ်နေပြီး တစ်နှစ်ကျော်ကျော်လောက် ဖန်တီးခဲ့ကြရကာ ဖြန့်ချီဖို့အတွက် အတွင်းပိုင်း beta စမ်းသပ်ချက်များပင် ပြုလိုက်နေကြပါပြီ။
ဒီလို အရေးကြီးသည့် ကာလမျိုးတွင် ကျိုးမူယန်က ဝေးကွာလှသည့် ဟန်တုံးပြည်နယ်မှ ဂိမ်းကုမ္ပဏီတစ်ခု၏ ဝန်ထမ်းများကို ဧည့်ခံဖို့ စိတ်ရှုပ်မခံနိုင်ပါ။
"ဘော့စ်ကျိုး သူတို့က နာမည်ကြီး ကုမ္ပဏီနော်၊ တစ္ဆေစစ်သူကြီးကို ဖန်တီးခဲ့တာ၊ သူတို့ပဲ ကျွန်မတို့ အချိန်ယူပြီး သူတို့နဲ့တွေ့ဖို့ အကြံပေးချင်တယ်။ အချိန်မရှိရင်လည်း အစ်ကိုစွန်းကို သွားတွေ့ခိုင်းလိုက်လို့ ရတာပဲ။ သူတို့ကို ကုမ္ပဏီကို လိုက်ပြတာက ဘာမှ အပန်းမကြီးပါဘူး"
ရှင်းဟိုက်လူနှင့် ဆက်သွယ်ခဲ့သည့် စီမံခန့်ခွဲရေး ကောင်မလေးက သတိပေးလိုက်ပါသည်။
"သူတို့က တစ္ဆေစစ်သူကြီးကို လုပ်တဲ့လူတွေလား"
ကျိုးမူယန်က ကြက်သေသေသွားပြီး ချက်ချင်းဆိုသလိုပဲ ကောင်မလေး၏ စကားများက အဓိပ္ပာယ်ရှိသည်ဟု ခံစားလိုက်ရသည်။
ဆိုရိုးစကားအတိုင်းပင်။ မိတ်ဆွေ ပိုများလေလေ ဘဝမှာ ရွေးချယ်စရာတွေ ပိုများလာလေလေ ဖြစ်သည်။
သူတို့က ပြိုင်ဘက်များ ဖြစ်ကြသော်လည်း ဒီလောက်ခရီးအရှည်ကြီးလာကာ ပညာဖလှယ်တာကို ငြင်းဆန်လိုက်ပါက နှလုံးသား မဲ့ရာ ကျလွန်းမည်။
ထို့အပြင် ကျိုးမူယန်လည်း တစ္ဆေစစ်သူကြီးကို သိပါသည်။ ဒါက လတ်တလော အလွန်ရေပန်းစားခဲ့သည့် မိုဘိုင်း ဂိမ်းတစ်ခုဖြစ်သည်။ ထိုဂိမ်းကို ဖန်တီးသူက ခေသူမဟုတ်တာ သိသာပါသည်။
ဧကန္တ ဒီလိုလူမျိုးတွေနဲ့ တွေ့ဆုံပြီး ရင်းနှီးအောင် လုပ်လိုက်တာ ကောင်းနိုင်တယ်။
ဘယ်လိုပဲဖြစ်ဖြစ် အများဆုံး တစ်ရက်လောက်သာ ကြာနိုင်ပြီး သူတို့ကလည်း ရုံးခန်းတွေထဲလျှောက်သွားပြီး သူများအလုပ်ကို မနှောင့်ယှက်နိုင်လောက်ပေ။
ထိုအတွေးဖြင့် ကျိုးမူယန်က ခေါင်းညိတ်လိုက်၏။ "ဟုတ်ပြီ ဒါဆိုလည်း လက်ခံလိုက်။ သူတို့နဲ ရက်စွဲတစ်ခု အရင်သတ်မှတ်လိုက်။ ငါကိုယ်တိုင် ကြိုဆိုမယ်"
"ဟုတ်ကဲ့ပါ ဘော့စ်ကျိုး။ ပြီးတော့ လူသစ် ထုတ်စာရင်း ထွက်ပါပြီ။ ကျေးဇူးပြုပြီး တစ်ချက်လောက် ကြည့်ပါဦး"
ကျိုးမူယန်က စာရင်းကို ကြည့်လိုက်ပါသည်။
"လင်းဝမ်ကလွဲပြီး တခြားသူတွေကို လုပ်နည်းအတိုင်း ထုတ်ပစ်လိုက်ပါ။"
"ဟုတ်ကဲ့ပါ" ကောင်မလေးက ဘာမှ ဆက်မပြောဘဲ စာရင်းဖြင့် ထွက်သွားခဲ့ပါသည်။
အနိမ့်ဆုံး လူထုတ်စနစ်မှာ ဂိမ်းကုမ္ပဏီများစွာတွင် ကျင့်သုံးနေကျဖြစ်သည်။ အထူးသဖြင့် ကျောင်းမှ လူများကို ပိုငှားထားသော ကုမ္ပဏီများတွင် ဖြစ်ကြ၏။
ဆန်းစထရိုက်ခ် ကုမ္ပဏီလည်း ထိုနည်းလည်းကောင်း ဖြစ်သည်။ သူတို့ ဘွဲ့ရ ကျောင်းသားများကို ငှားရမ်းပြီး လအနည်းငယ် အစမ်း ခန့်အပ်ကာ အနိမ့်ဆုံး အဆင့် သတ်မှတ်ခံရသည့် ၁၅ ရာခိုင်နှုန်းကို အလုပ်ဖြုတ်ပစ်မည်ဖြစသည်။
ထိုအလုပ်ဖြုတ်ခံလိုက်ရသော ဘွဲ့ရ ကျောင်းသားများအတွက် အလွန်ခွကျသော အခြေအနေ ဖြစ်သွားနိုင်သည်။
ပထမဆုံး သူတို့က ဘွဲ့ရကျောင်းသား အသစ်များ မဟုတ်တော့ဘဲ တခြား ကုမ္ပဏီ၏ ကျောင်းသား အလုပ်သင်ခေါ်ယူမှုများတွင်လည်း ပါဝင်နိုင်မှာ မဟုတ်တော့ပေ။
ဒုတိယ အနေဖြင့် သူတို့ အလုပ်အတွေ့အကြုံက လပိုင်းသာ ရှိသေးပြီး အရင်ကုမ္ပဏီ၏ အလုပ်ထုတ်ခြင်းကို ခံလိုက်ရသဖြင့် အနာဂတ် အလုပ်အကိုင်ရှာဖွေဖို့အတွက် အတော်လေး အကူအညီမဖြစ်နိုင်ပါ။
တစ်နည်းအားဖြင့် ကျိုးမူယန်၏ အမိန့်တစ်ခုတည်းကြောင့် အလုပ်ထုတ်ခံလိုက်ရသည့် ဘွဲ့ရကျောင်းသားများ၏ လမ်းတွင် ဧရာမ အဟန့်အတားကြီးတစ်ခုကို ပိတ်ပစ်လိုက်သလို ဖြစ်သွားပါသည်။
သို့သော် ကျိုးမူယန်က ဘာမှ မှားယွင်းသည်ဟု မခံစားရပေ။ အလုပ်ထုတ်ခံလိုက်ရသည့် ဘွဲ့ရကျောင်းသားများက သေချာပေါက် သူနှင့် သူ့မိသားစုကို ဆဲဆိုနေမှာ သိသော်လည်း သူဂရုမစိုက်ပေ။
ကျိုးမူယန်အတွက် ဂိမ်းလောကဆိုတော့ အသန်မာဆုံးသူများသာ ရှင်သန်နိုင်သည့် တောအုပ်ကြီးတစ်ခုဖြစ်သည်။
ဒီလို ရက်စက်သည့် ပတ်ဝန်းကျင်မျိုးတွင် ကရုဏာတရားဆိုတာမရှိပါ။
သို့သော်လည်း အမှန်ပင်။ စာရင်းတွင် ခြွင်းချက် တစ်ယောက်တော့ ရှိနေသည်။ လင်းဝမ် ဖြစ်သည်။
သူမက ကောင်မလေးတစ်ယောက်ဖြစ်ပြီး တခြားသူများလိုပဲ ပေကျင်းတက္ကသိုလ်ကြီးမှ မြင့်မားသော အရည်အချင်းများဖြင့် ခေါ်ယူခံထားရသူဖြစ်၏။
လူထုတ်စာရင်း၏ အဆင့်သတ်မှတ်ချက်အရ သူမလည်း အောက်ဆုံး ၁၅ ရာခိုင်နှုန်းတွင် ပါဝင်သည်။
တခြား လူငယ်တွေလိုပဲ လင်းဝမ်တွင် ရိုးလွန်းအလွန်းပြီး အလွန်အကောင်းမြင်တတ်သည့် အမှားများ ရှိခဲ့ပါသည်။
ကျိုးမူယန်အတွက် ဂိမ်းတွေက စီးပွားရေး ဖြစ်သည်။
သို့သော် လင်းဝမ်နှင့် တခြားလူငယ်တွေက ဂိမ်းတွေကို အနုပညာတစ်ခု သို့မဟုတ် စိတ်အားထက်သန်သော အိပ်မက်တစ်ခုလို မြင်နေကြသည်။ ထို့ကြောင့် သူတို့ဆောင်ရွက်သည့် ပုံစံများက လူထုတ်စနစ်၏ စံနှုန်းများကို ဆန့်ကျင်သလို ဖြစ်သွားခဲ့ပါသည်။
တစ်နည်းအားဖြင့် သူမက ဆန်းစထရိုက်ခ် စတူဒီယို လိုအပ်သည့် ပါရမီရှင်မျိုး မဟုတ်ပေ။
သို့သော် လူထုတ်စာရင်းထဲမှ သူမကို ကျိုးမူယန် ချန်ထားခဲ့ရသည့် အကြောင်းအရင်းရှိပါသည်။
သူမ၏ နောက်ကြောင်းက အလွန်ကြောက်ဖို့ ကောင်းသောာကြောင့်ဖြစ်သည်။
သူမက အဖေက အကြီးမားဆုံး ဆက်သွယ်ရေးနှင့် စမတ်ဟာ့ဒ်ဝဲဖြန့်ချီရေး ရှန်းဟွာ ကော်ပိုရေးရှင်း၏ ဥက္ကဋ္ဌကြီးဖြစ်သည်။ ကျိုးမူယန်က ဒီလိုလူမျိုးကို မတိုက်ခိုက်ရဲပေ။
တကယ်တော့ ဒီလိုလူမျိုးနဲ့ အဆက်အသွယ် ရနိုင်ဖို့ထက် လိုချင်တာ ဘာမှမရှိပါ။
အမှန်ပင်။ သူမက ဆန်းစထရိုက်ခ် စတူဒီယိုကို သာမန် အလုပ်သင်ခေါ်ယူခြင်းမှ ဝင်ရောက်ခဲ့သဖြင့် သူမ သရုပ်မှန် ပေါ်သွားပြီဖြစ်ကြောင်း လင်းဝမ် မသိခဲ့ပါ၊။
သို့သော်လည်း လင်းဝမ်က သူမအဖေ၏ သူမအပေါ်ထားသော ဂရုစိုက်မှုနှင့် စိုးရိမ်မှုတို့ကို လျှော့တွက်ခဲ့မိပါသည်။
လင်းဝမ် ဆန်းစထရိုက်ခ် စတူဒီယိုကို ဝင်ပြီး ဒုတိယမြောက်နေ့တွင် ရှန်းဟွာ ကော်ပိုရေးရှင်း၏ ဥက္ကဋ္ဌရုံးခန်းမှ ကျိုးမူယန် ဖုန်းတစ်ကော လက်ခံရရှိခဲ့သည်။
တောင်းဆိုချက် နှစ်ခုရှိခဲ့၏။
ပထမဆုံးမှာ ကျိုးမူယန်နှင့် ဆန်းစထရိုက်ခ် စတူဒီယိုတို့က လင်းဝမ်ကို ဂရုစိုက်ပေးပြီး သူမ အလုပ်အလွန်အကျွံလုပ်ကာ နာမကျန်း မဖြစ်အောင် ထိန်းပေးရမည်။
ဒုတိယအနေဖြင့် လင်းဝမ်၏ ဂိမ်းလောကအပေါ် ထားသည့် အိပ်မက်များကို ကျိုးမူယန်က အမြန်ဆုံး ဖျက်ဆီးပေးရမည်ဖြစ်သည်။ ဒါမှ ဒီလောကတွင် အလုပ်လုပ်ချင်စိတ် သူမ ပျောက်သွားမည်ဖြစ်သည်။
ထိုစကားများကို ပြောရတွင် သူက ဗျူဟာ နည်းလမ်းကျသော်လည်း ကျိုးမူယန်လို ထက်မြက်သည့် လူတစ်ယောက်က ဆိုလိုရင်းကို ချက်ချင်း နားလည်လိုက်ပါသည်။
လင်းဝမ်၏ အဖေက သူ့သမီးကို ဂိမ်းလောကထဲ မဝင်စေချင်ပေ။ သို့သော်လည်း ပွင့်ပွင်လင်းလင်း မတားမြစ်ရဲပေ။ သူတို့ ဆက်ဆံရေး ပျက်စီးသွားမှာကို စိုးရိမ်နေသောကြောင့် ဖြစ်သည်။ ထို့ကြောင့် ဒီလိုကွေ့ပတ်ပြီး ကြံစည်ရခြင်းဖြစ်သည်။
ဒီလိုကိစ္စမျိုးကို ကျိုးမူယန်က ချက်ချင်း လက်ခံခဲ့ပါသည်။
ဒါက ရှန်းဟွာ ကော်ပိုရေးရှင်းကြီးဖြစ်၏။ သူတို့နဲ့ ဆက်နွယ်မှုတချို့ ဖန်တီးနိုင်ပါက ဆန်းစထရိုက်ခ် စတူဒီယိုမှာ အနာဂတ်တွင် အကျိုးအမြတ်များသာ ရဖို့ ရှိပါသည်။
ထို့ကြောင့် လင်းဝမ်က လူထုတ်စာရင်းထဲမှ တစ်ယောက်တည်း ကျန်ခဲ့သူဖြစ်သည်။
ကျိုးမူယန်က လင်းဝမ်၏ ဂိမ်းလောကအပေါ် ထားသော စိတ်အားထက်သန်မှုကို အမြန်ဆုံး ပျောက်ဆုံးအောင် ဘယ်လိုနည်းလမ်းဖြင့် လုပ်ရမလဲ စဥ်းစားနေတာ ကြာပါပြီ။
ခက်တော့မခက်ပါ။
ဒီလောက၏ အမှန်တရားကို ပြသလိုက်ပါက အဆင်ပြေသွားပါလိမ့်မည်။
ဂိမ်းလောကကြီး သို့မဟုတ် ပြည်တွင်း ဂိမ်းလောကကြီးမှာ လက်ဝါးကြီးအုပ်သော လုပ်ငန်းတစ်ခုသာ ဖြစ်သည်။
လူထုတ်စာရင်းများ၊ ၉၉၆ စနစ်များ၊ ပိုက်ဆံအတွက် အိပ်မက်နှင့် စိတ်အားထက်သန်မှုများကို စွန့်လွှတ်ကာ၊ အနုပညာကိုလည်း ပိုက်ဆံအဖြစ် ပြောင်းလဲပစ်ရသည်။
ဒါတွေက ပြည်တွင်း ဂိမ်းလောကထဲမှာ ဘာမှ မထူးခြားပါ။
အမှန်ပင်။ ထိုအချက်များက လုံးဝ မှန်ကန်တာတော့ မဟုတ်ပေ။ ပြည်တွင်းတွင် သဘောထားပြည့်ဝသည့် ဒီဇိုင်နာ ပါရမီရှင်များနှင့် စတူဒီယိုများလည်း ရှိပါသေးသည်။
သို့သော် အလွန်အမင်း ရှားပါးပါသည်။
ဂိမ်းလောက၏ အမှန်တရားကို ပြလိုက်တာနဲ့ လင်းဝမ်သေချာပေါက် အလွန့်အလွန် စိတ်ပျက်သွားပြီး ထွက်သွားလိမ့်မည်ဟု ကျိုးမူယန် ယုံကြည်ထားသည့် ရာနှုန်းပြည့် သေချာပါသည်။
အခန်း(၅၀) ကွမ်ကျိုးသို့
"ရှောင်လု။ ဒီလုပ်ဆောင်ချက်က ပြဿနာ နည်းနည်းရှိသေးတယ်။ လိုအပ်တဲ့ ပြောင်းလဲမှုတွေ လုပ်လိုက်ဦး။ လက်တိကျမှုနဲ့ ပတ်သက်တဲ့ မေးခွန်းတွေဆိုရင် အစ်ကိုပေါင်ကို မေးလိုက်။ သူက ကျွမ်းကျင်ပညာရှင်ပဲ" ဟွမ်းစစ်ပေါ်က ဒီဇိုင်းမူကြမ်းနှင့် ပတ်သက်ပြီး စိတ်ရှည်စွာဖြင့် အထင်အမြင်ကို ပြောလိုက်ပါသည်။
ရှောင်လုက ဒီဇိုင်းအဖွဲ့က အဖွဲ့ဝင်တစ်ယောက်ဖြစ်ပြီး ဇွန်ဘီများ၏ အစွမ်းဒီဇိုင်းကို ဖန်တီးရသော တာဝန်ကို ယူထားရ၏။
သူ့အတွေ့အကြုံက ဟွမ်းစစ်ပေါ်ထက်တောင် နည်းပါးပြီး အရင်တုန်းက တခြားကုမ္ပဏီတစ်ခု၏ အလုပ်သင်တစ်ယောက်ဖြစ်သည်။ သို့သော် အရေးကြီးသည့် ကဏ္ဍတွင်် ဘယ်တော့မှ တာဝန်ပေးမခံခဲ့ရဘဲ ဖောင်များကိုသာ ဖြည့်ရုံဖြစ်ခဲ့ပြီး မကြာခဏ အရေးမပါသည့် တာဝန်များကိုသာ လုပ်ရသည်။ ထို့ကြောင့် သူ့အလုပ်အတွေ့အကြုံက ဗလာကျင်းဖြစ်သည်ဟု သတ်မှတ်လို့မရသော်လည်း လျစ်လျူရှုလို့ရသည်။
ကုမ္ပဏီအများစုတွင် လူတွေက မကြာခဏ ၎င်းတို့၏ ရာထူးနှင့် အတွေ့အကြုံ (အစွမ်းအစများ) အပေါ်မူတည်ပြီး အဆင့်သတ်မှတ်ရသည်။ သူတို့က အချိန်တူတူလောက် အလုပ်လုပ်ခဲ့ကြသော်လည်း အတွေ့အကြုံက မတူညီသဖြင့် ဟွမ်းစစ်ပေါ်က ဒီရာထူးတွင် စီနီယာကျသွားပါသည်။
"အင်းပါ ညီအစ်ကိုဟွမ် ငါချက်ချင်းပဲ လုပ်လိုက်မယ်"
ရှောင်လုက ဂိမ်းအယ်ဒီတာကို ဖွင့်လိုက်ပြီး ဟွမ်းစစ်ပေါ်၏ အမြင်အတိုင်း လုပ်ဆောင်ချက်များကို ပြင်ဆင်ခဲ့ပါသည်။
သမုဒ္ဒရာရဲတိုက်က ဖန်တီးနေသည့် အဆင့် ရောက်နေပြီဖြစ်ပြီး အရင်တုန်းက ဝယ်ထားည့် နမူနာမျိုးစုံနှင့် လုပ်ဆောင်ချက်များကိုလည်း ဂိမ်းအယ်ဒီတာထဲ ထည့်ပြီး ဒီဇိုင်နာများက ဂိမ်းကို ဖန်တီးနေကြပါပြီ။
ဂိမ်းအယ်ဒီတာက အသုံးပြုဖို့ သိပ်မခက်ဘဲ အားလုံးကလည်း ယခင်အတွေ့အကြုံများ ရှိကြသဖြင့် ပြီးမြောက်နှုန်းက ဖေးချမ့်လို ငပျင်းတစ်ယောက်လုပ်တာထက် အများကြီး ပိုမြန်နေသည်။
"အလုပ်ကို အာရုံစိုက်ကြပြီး ကွမ်ကျိုးခရီးကြောင့် အာရုံလွင့်မသွားကြစေနဲ့။ အလုပ်ကိုပဲ အရင်ဆုံး အာရုံစိုက်"
ရှောင်လု အနည်းငယ် စိတ်လွင့်နေသည်ကို မြင်သောအခါ ဟွမ်းစစ်ပေါ်က သတိပေးလိုက်ပါသည်။
ရှက်သွားပြီး ရှောင်လုက နောက်စေ့ကို ပွတ်လိုက်ပါသည်။
"ဟာကွာ ညီအစ်ကိုဟွမ် ငါကွမ်ကျိုးကို အရင်တုန်းက တစ်ခါမှမရောက်ဖူးဘူး သိလား။ ပြီးတော့ ငါတို့က နာမည်ကျော် ဆန်းစထရိုက်ခ် စတူဒီယိုလိုမျိုး နေရာကိုတောင် သွားရမှာတဲ့ ငါစိတ်လှုပ်ရှားမိတာ ပုံမှန်ပါပဲ။ ဒါပေမဲ့ စိတ်မပူပါနဲ့ ငါတို့အလုပ် အရည်အသွေး ကျမသွားစေရဘူးလို့ အာမခံတယ်"
ဟွမ်းစစ်ပေါ်က ခေါင်းညိတ်လိုက်ပြီး အလုပ်စားပွဲကို ပြန်ကာ အလုပ်ဆက်လုပ်နေလိုက်ပါသည်။
တကယ်တော့ သူလည်း ကွမ်ကျိုးကို မရောက်ဖူးပါ။
သူတင်မကသေးဘဲ ကုမ္ပဏီထဲက လူအများစုလည်း မရောက်ဖူးကြသေးပေ။
ကျင်းကျိုးမှ ကွမ်ကျိုးသို့ လေယာဥ်လက်မှတ်က ယွမ်ထောင်ချီပြီး ကုန်ကျ၏။ သူတို့အများစုက ထန်းတာ့ကို မဝင်ခင်က ငမွဲများဖြစ်ကြသဖြင့် ဘယ်လိုလုပ် တတ်နိုင်မည်နည်း။
ပညာဖလှယ်မည့်အကြောင့် ကြားလိုက်ရသောအခါ ပျော်ရွှင်နေသည့် တခြားသူတွေလို မဟုတ်ဘဲ ဟွမ်းစစ်ပေါ်နှင့် ပေါင်ရှုတို့က တည်တံ့နေခဲ့ပါသည်။
အစကတည်းက ပေါင်ရှုမှာ အပြင်ထွက်ရတာ စိတ်မဝင်စားသည့် အိမ်တွင်းအောင်း တစ်ယောက်ဖြစ်သည်။ ရုံးထဲမှာသာ ဂိမ်းတွေကို တစ်ချိန်လုံး Grind လုပ်ချင်မိပါသည်။
ဟွမ်းစစ်ပေါ်ကလည်း ဂိမ်း၏ လုပ်ငန်းစဥ်များ ထိခိုက်မှုမရှိရန်သာ အာရုံစိုက်နေသည်။
အလုပ်တာဝန်များကို အကြမ်းဖျင်း ခန့်မှန်းကြည့်သောအခါ ခရီးကြောင့် လုပ်ငန်းပြီးမြောက်မှုကို သိပ်ပြီးမထိခိုက်စေဘဲ သမုဒ္ဒရာရဲတိုက်က အချိန်မီ ပြီးမြောက်နိုင်မှန်း ဟွမ်းစစ်ပေါ် သိလိုက်ရသည်။ ထိုအခါမှ စိတ်အေးအေး ထားနိုင်သွားခဲ့၏။
လက်ရှိ ဟွမ်းစစ်ပေါ်အတွက် တစ်ခုတည်းသော အရေးကြီးသည့် အရာမှာ ဂိမ်း၏ ပြီးမြောက်မှုပဲဖြစ်သည်။
ဘော့စ်ဖေးက သူ့ကို လေးလံသော တာဝန်များကပေးအပ်ပြီး ကျေနပ်လောက်အောက် ဆုလာဘ်များ ပေးတတ်သည့် အမြော်အမြင်ရှိသော လူတစ်ယောက်ဖြစ်သည်။
တစ်ချိန်တည်းမှာပဲ အားလုံးကို ပညာဖလှယ်ဖို့အတွက် ကွမ်ကျိုးကိုခေါ်သွားဦးမယ်တဲ့လား။ သူ့စေတနာကို ကျေးဇူးပြန်ဆပ်နိုင်ဖို့ နည်းလမ်းပင် မရှိတော့ပါ။
ဟွမ်းစစ်ပေါ်သာ ဒီဂိမ်းကို ပြီးပြည့်စုံအောင် သေချာ မဖန်တီးနိုင်ပ်ါက ဘော့စ်ဖေးကို စိတ်ပျက်သွားစေလိမ့်မည်။
ထို့အပြင် ဟွမ်းစစ်ပေါ်လည်း ဆန်းစထရိုက်ခ် စတူဒီယိုကို ကြည့်ရှုချင်ပါသည်။
သူဒီလောကထဲ ဝင်မလာခင်ကတည်းက သူတို့က ပြည်တွင်းမှာ နာမည်ကြီးနေသော စတူဒီယိုတစ်ခုဖြစ်သည်။ ဟွမ်းစစ်ပေါ် တစ်ချိန်တုန်းက ဒီလောကထဲမှာ ထိုစတူဒီယိုသို့ ရောက်နိုင်ဖို့ကို အိပ်မက်အဖြစ် ထားခဲ့ဖူးသည်။
သူအလုပ်စလုပ်တော့ ဆန်းစထရိုက်ခ် စတူဒီယိုနှင့် ပတ်သက်သည့် ကောလာဟလများကို ကြားခဲ့ရသည်။
ဆန်းစထရိုက်ခ် စတူဒီယိုက လစာ ငါးလစာခန့် ရှိသည့် ဘောနစ်ပ်များကို တစ်ခါက ပေးခဲ့ဖူးသည်ဟု ဆိုကြ၏။
တခြားသူများက ဆန်းစထရိုက်ခ် စတူဒီယို၏ ဒီဇိုင်းအဖွဲ့ကို ပေးသော လစဥ်ဘောနပ်စ်ကြေးမှာ သူတို့ရဲ့ ကိုယ်ပိုင်အခြေခံလစာထက်ပင် ပိုများနေသည်ဟု ဆိုကြ၏။
တချို့ဆို ဆန်းစထရိုက်ခ် စတူဒီယိုက နှစ်ကုန်ပိုင်းတွင် ဂရမ်းဘောနပ်စ်တစ်ခုအဖြစ် ပြိုင်ကားတစ်စီးပေးခဲ့သည်ဟု ဆို၏။
ထိုကောလာဟလများကို ဟွမ်းစစ်ပေါ် အတည်မပြုနိုင်ခဲ့သော်လည်း ဆန်းစထရိုက်ခ်စတူဒီယိုမှာ ဂိမ်းလောကထဲက လူအများစု၏ အိပ်မက်ဖြစ်တာ သိသာပါသည်။
ဒီလိုနေရာမျိုးကို သွားရောက်လည်ပတ်နိုင်ဖို့က သေချာပေါက် သူ့အလုပ်အတွက် အကျိုးကျေးဇူးရှိနိုင်သည်။
...
အချိန် တစ်လမှာ ခပ်မြန်မြန်ပဲ ကုန်ဆုံးသွားခဲ့၏။
နိုဝင်ဘာလ ၂၇ ရက်နေ့၊ သောကြာနေ့။
ထန်းတာ့ နက်ခ်ဝါ့နည်းပညာ ကုမ္ပဏီလိမိတက်၏ ဝန်ထမ်းများက လေဆိပ်မှတဆင့် ဟိုတယ်သို့ ရောက်ရှိသွာားကြပြီး ခရီးဆောင်အိတ်များ ထားသိုဖို့အတွက် ၎င်းတို့၏ ကိုယ်ပိုင်အခန်းဆီသို့ ပို့ဆောင်ပေးခဲ့ပါသည်။
ဟန်တုံးပြည်နယ်တွင် အခုချိန် ဆောင်းရာသီ ဝင်နေဆဲဖြစ်ပြီး အေးစက်နေသည်။ သို့သော် ကွမ်ကျိုးက အပူချိန်က ပိုမြင့်မားပြီး နေ့လယ်ခင်းနေရောင်ခြည်ကြောင့် အားလုံး နွေးထွေးမှုကို ခံစားလိုက်ကြရသည်။
ဟွမ်းစစ်ပေါ်သည် အနည်းငယ် အူကြောင်ကြောင် ဖြစ်နေသည်။
အခြေအနေကြီးက အားလပ်ရက်တစ်ခုလိုပင်။
တချို့ စီမံခန့်ခွဲရေး ကောင်မလေးများက ၎င်းတို့၏ ဖုန်းထဲတွင် အချိန်စာရင်းကို စစ်ဆေးနေကြပြီး ဘယ်နေရာကို ခရီးသွားရမလဲ၊ နောက်တစ်နောက် ဘယ်ရှော့ပင်းမောကို ထွက်ရမလဲ စီစဥ်နေကြပါသည်။
ဒီဇိုင်းအဖွဲ့က ကောင်လေးတချို့ကတော့ ညဘက် ဟိုတယ်ခန်းထဲတွင် သောက်စားပြီး ကတ်ဂိမ်းများ ကစားနိုင်ဖို့ ဘီယာဝယ်ရန် စူပါမားကတ်လိုက်ရှာနေကြသည်။
ဒီခရီးလိုက်ပါလာသည့် လူစုစုပေါင်း ၂၇ ယောက်ရှိပါသည်။ ပေါင်ရှုက လုံးဝစိတ်မဝင်စားဘဲ ရုံးထဲမှာသာ နေချင်သဖြင့် လိုက်မလာခဲ့ပေ။
ဘော့စ်ဖေးကလည်း...
သူတို့လူအုပ်ထဲမဝင်ဘဲ သူ့အခန်းထဲသို့သာ ခပ်စောစော ပြန်ဝင်လာခဲ့ပါသည်။ လေယာဥ် ခရီးပန်းမှုကြောင့် အနားယူနေတာဖြစ်နိုင်သည်။
ခရီးစဥ်တစ်ခုလုံးကို လက်ထောက်ရှင်းက စီစဥ်ထားခြင်းဖြစ်ပြီး ဖေးချမ့်က ဝင်မပါခဲ့ပေ။
ဟွမ်းစစ်ပေါ်နှင့် ရှောင်လုတို့က တစ်ခန်းတည်း အတူတူနေကြ၏။ ခရီးဆောင်အိတ်ကို နေရာ ချပြီးသောအခါ ဟွမ်းစစ်ပေါ်က လက်ပ်တော့ကို ထုတ်လိုက်ပြီး ဒီဇိုင်းမူကြမ်းကို စစ်ဆေးရင်း ဇာတ်လမ်းကို ပြင်ဆင်နေသည်။
လောလောဆယ် သမုဒ္ဒရာရဲတိုက်၏ နမူနာ ပြီးဆုံးသွားပါပြီ။ သို့သော် ပေါင်ရှုကတော့ လက်တိကျမှု သို့မဟုတ် အထွေထွေ အသေးစိပ် အချက်များတွင် တိုးတက်အောင် လုပ်နိုင်သေးသည်ဟု ခံစားရသည်။
ဟွမ်းစစ်ပေါ်ကလည်း ဂိမ်းကို ပြီးပြည့်စုံအောင် ဖန်တီးချင်သဖြင့် ထိုနည်းတူ စိတ်ပူနေသည်။
ပေါင်ရှုလို ဝါရင့် ကစားသမားကြီးက ဘာပြဿနာမှ မတွေ့ရတော့သည့်အခါ ဒီဂိမ်း အလွန် ကောင်းမွန်ပါလိမ့်မည်။
"ညီအစ်ကိုဟွမ် ငါအပြင်ထွက်ပြီး တခြားသူတွေဆီ သွားလိုက်ဦးမယ်နော်။ မင်းပင်ပန်းရင် နားနှင့်ပါ"
ရှောင်လုက ဟွမ်းစစ်ပေါ်ကို အသိပေးလိုက်ပြီး တခြားသူတွေနဲ့ ကစားဖို့ ရွှင်ရွှင်လန်းလန်း ထွက်သွားတော့သည်။
...
ဖေးချမ့်၏ အခန်းတွင်...
"ယောက်ဖချမ့်။ ငါ ဟန်ဆောင်ရတာ ပင်ပန်းနေပြီ... အလုပ်ကြောင့် ငါတို့တွေ မရင်းနှီးသလို ဟန်ဆောင်နေရတာ..." မာယန်က စိတ်ကုန်စွာ ပြောလိုက်ပါသည်။
အခုချိန်ထိ မာယန်နှင့် ဖေးချမ့်တို့၏ ဆက်ဆံရေးကို သိထားသည့် ကုမ္ပဏီထဲက တစ်ယောက်တည်းသော သူမှာ လက်ထောက်ရှင်းဖြစ်သည်။
ထို့ကြောင့်လည်း မာယန်က အားလုံး၏ရှေ့တွင် ဖေးချမ့်ကို သူစိမ်းတစ်ယောက်လို ဆက်ဆံရသည်။ ဖေးချမ့်ကို တစ်ချိန်လုံး ဘော့စ်ဖေးဟု ခေါ်နေရသဖြင့် သူစိတ်ပျက်လာပါပြီ။
သူတို့က နှစ်ထပ်ခုတင်တစ်ခုတည်း အတူတူ အိပ်ခဲ့ကြသည့် ဘရိုများဖြစ်ကြသော်လည်း အခုတော့ သူတို့နှစ်ယောက်အကြား ကွာဟချက်ကြီးတစ်ခု ရှိလာခဲ့ပါပြီ။
"ကုမ္ပဏီအတွက် စတေးသင့်တာ စတေးရမှာပေါ့" ဖေးချမ့်က မာယန်၏ ပခုံးကို ပုတ်ကာ ပြောလိုက်ပါသည်။
"အခု မင်းက ကုမ္ပဏီထဲမှာ ငါ့ရဲ့မျက်လုံးနှစ်လုံးလိုပဲ။ ပြဿနာတစ်ခုခုတွေ့ရင် ငါ့ကိုချက်ချင်း သတိပေးရမယ်နော်"
ဖေးချမ့်သာ သူတို့ဆက်ဆံရေးကို ဖွင့်ချလိုက်ပါက ကျန်သောလူများမှာ မာယန်ကို သတိထားလာနိုင်ကြသည်။
ထိုအခါ ကုမ္ပဏီထဲတွင် ဘာတွေဖြစ်နေသလဲ သူသိရဖို့ခက်သွားနိုင်သည်။
ဖေးချမ့်က သူ့နောက်ကွယ်မှာလည်း အခြေအနေတွေကို သိရအောင် သေသေချာချာ စီစဥ်ထားသည်။ မဟုတ်ပါက သူတို့ငွေအရှုံးပေါ်အောင် မလုပ်နိုင်လျှင် ပြဿနာတက်ပါလိမ့်မည်။
မာယန်၏ မျက်နှာကြီးကြီးက ပို၍ပင် မှုန်မှိုင်းကျသွားသည်။
"မင်းပြောတဲ့ပုံစံက ငါကပဲ စပိုင်လိုလိုနဲ့။ မကြာသေးခင်ကတော့ ဘာမှထူးထူးခြားခြား မဖြစ်ခဲ့ပါဘူး။ အားလုံးက ဒီဇိုင်းမူကြမ်းအတွက်ပဲ ကြိုးစားပမ်းစား အလုပ်လုပ်နေကြတယ်။"
ဖေးချမ့်က ခေါင်းညိတ်လိုက်ပါသည်။ "ကောင်းတာပေါ့"
အရင်တုန်းက သူလည်း ဒီဇိုင်းမူကြမ်းကို အသေးစိပ် ကြည့်ခဲ့ပြီးပါပြီ။ ဘာတွေလဲ တိတိကျကျ နားမလည်နိုင်သော်လည်း သူ့လိုအပ်ချက် သုံးချက်တော့ ပြည့်မှီမှန်း သူသိပါသည်။
ဒီဇိုင်းမူကြမ်း ကြီးကြီးမားမား ပြောင်းလဲမှု မရှိပါက ဂိမ်းကသေချာပေါက် ကျရှုံးပြီး သူစိတ်ပူစရာလည်း ဘာမှမလိုပါ။
"သြော် ပြီးတော့လည်း အကုန်လုံးက ဆန်းစထရိုက်ခ် စတူဒီယိုကို စိတ်ဝင်စားနေကြတဲ့ပုံပဲနော်။ သူတို့တွေက အဲ့လောက်တော်တာလား" မာယန်က မေးလိုက်၏။
"ငါက ဘယ်သိမှာလဲ" ဖေးချမ့်က ဒီလုပ်ငန်းအကြောင်းကိုပင် သိပ်နားမလည်ဘဲ ဘယ်လို စတူဒီယိုလဲဆိုတာတောင် မသိပါ။
ကွမ်ကျိုးကို ငွေဖြုန်းဖို့သက်သက် လာခဲ့ခြင်းသာဖြစ်ပြီး ဆန်းစထရိုက်ခ် စတူဒီယိုက လက်ထောက်ရှင်း ဆက်သွယ်နိုင်ခဲ့သော စတူဒီယို အနည်းစုထဲက တစ်ခုဖြစ်၏။
တခြားဝန်ထမ်းများက ဖေးချမ့် ဒီလိုလည်ပတ်ဖို့ အထူးတလည် စီစဥ်ထားသည်ဟု ထင်နေကြသည်။ သို့သော်လည်း အမှန်တရားကတော့ ဒီလိုမဟုတ်ပါ။ ဆန်းစထရိုက်ခ် စတူဒီယို၏ တည်ထောင်သူကိုပင် သူမသိပါ။
"ငါတို့မနက်ဖြန် ပထမဆုံး စတင်လည်ပတ်မဲ့ နေရာက ဆန်းစထရိုက်ခ် စတူဒီယိုပဲ။ ခွမကျအောင် မေးခွန်းများများ မေးနော်။ သူတို့က ငါတို့ကို ကြိုဆိုတော့ ရင်းနှီးအောင် လုပ်ရမယ်" ဖေးချမ့်က သတိပေးလိုက်သည်။
ဘော့စ်တစ်ယောက်အနေဖြင့် ဖေးချမ့် မေးခွန်းအများကြီး မေးလို့လည်း မကောင်းသလို အလွန်ပေါ့ပေါ့တန်တန်ပြုမူလို့လည်း မကောင်းပေ။ ရုပ်ပျက်နိုင်သည်။
ထို့ကြောင့် ဒီတာဝန်များကို မာယန်က ယူရမည်။
မာယန်က ခေါင်းညိတ်လိုက်၏။ "စိတ်မပူပါနဲ့ ယောက်ဖချမ့် ငါ့တာဝန်သာ ထားလိုက်စမ်းပါ။"