ثم يؤذيك الذي كُنت تخشى عليه من الأذى.
_________
بقيت ارجف بهسترية معقولة مات؟ بس اني ضربته ببطنه يعني شنو هاي هية صرت قاتله
رفعت راسي للسما واني اكول : دخيلك ربي انتَ تعرف وضعي ولصار
ردت امشي بس رجليه ماعانني بقيت امشي واوگع ألتمت الناس علية ويحاولون يعرفون شبيه
مجرد هزيتلهم رأسي بمعنى ماكو شي ورجعت امشي عضم يطگ بعضم بألف ياعلي وصلت للفندق فتحت الغرفه ولاگتني ريم وهية تباوع باستغراب على حالتي
ريم : وهم شبيج شنو هذا وضعج؟
اخذت نفس حاولت ابين الوضع طبيعي
- احم ماكوشي بس شفت واحد دعمته السيارة ومات فخفت
ردت وهية تباوعلي بشك
ريم : وهم متاكده؟
هزيتلها راسي عدة مرات وعفتها ورحت للحمام بقيت اباوع بلمراية واكول : معقولة راح يبلغ علية الشرطة وانسجن حسيت دموعي تنزل دخيلك ياعلي ساعدني فتحت الدوش حته لتسمع ريم صوت البجي
بقيت صافنة بلفراغ لمدة طويلة لحد مفززني صوت ريم وهية ادك بلباب
ريم : وهم بيج شي راح يصير ساعة ونص انتِ بلحمام وضعج كُلش ماعاجبني
حمحمت احاول ابين صوتي طبيعي
- لا بس عجبني المي دافي فنسيت نفسي هههه هسه اطلع
بسرعة غسلت بس شعري حته لتشك زيادة وتجبرني احجي ، فتحت الباب لگيتها واكفة مقابيل الباب
حجيت بضحكه واني ماخلي عيوني بعيونها حته لتعرف باجية
- هاي شبيج ريم گاعدتلي بلباب صدك تحجين لو ادري هلگد محتاجة تستخدمين الحمام مجان طبيت اصلا
ردت بصرامة : باوعيلي وهم حطي عينج بعيني
رديت وعيوني متوجهه للگاع
- شسالفتج ريم شتريدين من الاخير ؟؟
ريم : هه وهم ليش ناسية من يگلولج عينج صلفه جنها عين كح*** بسبب من تحجين تخلين عينج بنص عيونهم بدون خوف باوعيلي وهم شمسوية لدرجة خجلانه من نفسج ومتخلين عينج بعيني
رفعت عيوني الها واني احجي بقهر
- يلا شفتي عيوني؟؟ ارتاحيتي
عفتها ومشيت ، لحگتني وهية تكول بعصبية ولاول مرة تصير بهلعصبية
ريم : وهمممم واضح مسوية شي !!! شمسوية من مصيبة؟؟
- شقصدج ؟؟ احجيها طگ بطگ ليش هلمماطلة !!
ردت وياريت ماردت وصارت خرسة بوكتها
ريم : لتگولين انطيتي شرفج لواحد ونزلتي رأس ابونا عزيز گلبج؟
رديت واني الدموع متجمعة بعيني
- هه ليش هلگد متخيلة اني ساقطة؟ مسوية مكسورة قبل لو شارده وي صاحبي؟؟ ليش اتهمتيني بشرفي هاا ؟؟؟
ريم : لتتوقعين راح أتأثر بهلكلام وضعج يشكك اكبر واحد تجين بنص اليل وبس ترجفين بهسترية وكبل اسبحين بلا لو اني جنت مثل وضعج هيج مراح اشگين بيه ؟؟
سكتتت عنها لانُ فعلاً كلامها صح وضعيتي تشكك حته السكاره
رجعت حجت : سولفليلي وهمّي شبيج ؟اني اختج سرج من سري قابل اروح افضحج
باوعتلها ولاول مرة بحياتي احس ريم فعلاً اختي الچبيرة
بجيت بعجز وهية بسرعة احتضنتني وتكول بهدوء : مامتعودين على وهم الضعيفة هاي مو وهمنا يابة رجعولنا وهم الي تخش بنص عيونهم حته لو هية غلط
حجيت بشهكه
- ريمهه
ريم : عيونها حبيبتي
- اريد اكلج شي بس اسمعيني للاخير يلا تحكمين
هزت راسها بتفهم
گعدت اسردلها الصار من الألف للياء ، صدمتني برد فعلها وهية تكول : عين العقل السويتي قابل لو ما جاي ومتحرش ليش ادجينه؟ قابل عندج عداوة ويا وثاني شي منو كال مات انتِ كلتي دجيتي ببطنه يعني نكدر نكول الي دز الرسالة يا إما من خالج العار او واحد من القفاصين ويريد فلوس
باوعتلها بدموع واني اكول : وهسه شنو الحل
ريم : متسوين شي واذا بقه يدز تهديدات نبلغ عليه
سكتت وهديت شوية من كلامها
باوعتلي وكالت : اي تهديد يجيج ضمي وانتِ بعد اعرف بهلسوالف لتكسرج هلحادث
ابتسمت وحضنتها ، گمنا نمنا ماگدرت انام اباوع لريم نايمة فتحت الموبايل شفتها بعد وكت طلعت وحبيت اشتم شوية هوا
نزلت بلحديقة الي تصير خارج الفندق بقيت امشي واحجي وي ربي
يالله برد گلبي بجاه عزيزك وخلصني من هلسالفة والله ما عندي حيل بعد احس حيلي نهد من يوم غدرت بينا امي كلامها لهسه يدگ بلعضم دائما اتجنب اجيب طاريها كدام ريم حته لتنقهر بس باقية بعقلي 24 ساعة مهما سوت ابقه احبها
^^^^^رجعت بذاكرتي لقبل عدة سنوات^^^^^^
نزلت من الدرج واني اگمز على البايات تلاگيت وي امي
حجت بعتب
نادية : امي انتِ كم مرة گتلج لتگمزين هيجي على الدرج لو وگعتي ونكسرت رجلج لا سامح الله متخافين علية وتعرفين بيه سُكر
رديت واني احضنها : اخر مرة صدگيني
نادية : واذا عدتيها النا غير كلام
- جؤ صدگيني اخر مرة
نادية : مادام كلتي صدگيني يعني جذب
- عيب عليج تكولين علية جذابه ليش اني يايوم جذبت عليج ها ها؟؟
نادية : وهاي وحدة من جذباتج شو وخري الحجي وياج عقيم
- جؤ سفرو بلگي يصيرله جهال
خزرتني وراحت للمطبخ
""""رجعت للواقع"""""
- اوفف يوممم مشتاقه لحضنج حبيبه عيوني
حسين طابوگه نضربت يمي باوعت لمكانها انتبهت بيها ورقة
دگ گلبي بسرعة وكأن عرف من منو هلفعلة ردت اعرفها واروح
باوعتلها بقهر ليش اني منو غير اني وهم لازم اشوف
لان؟؟؟
(چؤ، مو خوش متابعين اذا ماعرفتوها)
لان الفضول چتال صاحبة رحت اخذت الطابوگه واني اباوع للحديقة بفحص عسى ولعل اعرف الي شمرها
تنهدت بقهر من مالگيت احد فتحت الورقة مالگيت شي !!!! بس اكو بقعة بالون الاحمر فهمت قصده رجعت بسرعة للفندق فتحت الغرفه ورحت عسريع للجرباية تمددت واني اباوع للسگف بشرود لحد محسيت الضوه طلع
گمت غسلت وجهي احاول اصحصح نزلت على الكافتيريا اخذت كهوة ثنين الي ولريم صعدت للغرفة لگيتها ترتب بلفراش انطيتها الكهوة واني اسولفلها على الصار
ردت من بعد صمت دام دقايق : اعتقد يريد بس يخوفج لان لو صدك يحس ضميره يأنبه ميبقى يهدد خو گبل ابلغ ماعرف احس اله غاية
- همصح وها ريم راح ادورلي على شغل ليوم صارلنا شكد بلفندق ونص فلوسنا طارت عليه
ريم : وين تلگين شغل لو هيج بهل سهولة جان اول ما اجينا لگيتي
باوعتلها بضوجه
- چؤؤ ريم دائماً اتفائلي حته لو بنص الخرا اتفائلي راح يجي نازح ويخلصج من الخرا الانتِ بي
غمتني وهية تكول : لو ماحاجية اشرف
باوعتلها بطرف عيني ومارديت ، ألتفت على صوت الموبايل وهوه يدل على وصول اشعار رحت علسريع لان؟؟؟؟
( وابوفاضل نتخارب اذا ماعرفتوها)
اخذت الموبايل اشوف شنو تحت انظار ريم لتباوعلي كذالك بفضول ههه عفية عائله الفضول وراثة عدنا
فتحته لگيت طلب صداقه جايني على الفيس بوك ماهتميت ولا شفته منو لان دائما هيج يجن طلبات
ريم : ها منو؟
- جؤؤ بابا عيب شهل تدخلات عيب بنتي
غمتني وراحت اتابع مسلسل على البلازمة
عفتها وطلعت فكرت اجيبلها موبايل الها احسن من موبايل الفندق خاف يسجلون او شي ماعندي ثقة حته اول محجزنا نكتتها نكت خاف اكو كامرات وينشرونه كلش يسوون علمود الطشة
كلت من ارجع اجيبلها ، وصلت للمعهد بقينا ساعتين تقريباً احنا نتعلم الأساسيات دونت كل شي ينطو الي واحاول اركز حته برموشي حته افهم ريم
كملت وطلعنا ردت اطلع گبل بس تراجعت واني ادخل للمعهد سئلت على مكتب مدير المعهد دكيت الباب فتحته ودخلت بعد مأذنلي ادخل
حمحمت بخجل واني اكول : احم السلام عليكم
رد : وعليكم السلام بنتي تفضلي اكُعدي ليش واكفه
- لا بس اجيت علمود اسئلك عن مكان بي شغل متوفر بما انُ انتَ عراقي واكيد عايش من زمان هنا فـ اي
رد بابتسامة : والله يابنتي اعرف ناس هنا عدهم شركات ومطاعم بس ماعرف اذا محتاجين موضفين بقي رقمج حته اذا عرفت اكلج
انطيته رقمي تشكرت منه وطلعت فرحانه بلگي تنفتح بوجهي ويلكالي شغل رجعت للفندق وألف الحمدلله من ماشفت شي مريب من الشخص" مجهول الهوية"
لگيت ريم تفتر يم باب الغرفة تروح وترجع رحتلها بسرعة وواضح على وجهي علامات السؤال بعدني ما حاجيه سحبتني من ايدي وطببتني للغرفة درت وجهي بأنحاء الغرفة وانصدم بلگدامي !!!
الجرباية عبارة عن شكل كف الايد بس بلون الاحمر باوعت لريم وهية كذالك بادلتني نفس النضره وعرفنا الفاعل
- شلون گدر يدخل للغرفة ويسوي كلهاذا وانتِ موجودة ؟؟
ريم : منو كالج جنت موجودة ؟ جعت فنزلت اطلب اكل وعجبني ابقه بلحديقة
- ماشفتي احد غريب يطب للفندق او تصرفات غريبة ؟؟
ريم : چؤ، واضح الي يهدد بيج داهيه لانُ الوضع جان جداً طبيعي ومامبين اكو فد زله عليه منين اجانا هذا اوفف ربي
تنهدت بقهر واني اكول : لازم نطلع منا باسرع وكت ممكن حته ميندلنا وها ليوم حاجيت ابو المعهد على شغل أخذ رقمي وكال من يلكه يكلي ادعيلي ريمه
ريم : وانتِ بس لا ناوية تبقين تنتظرينه علما يدزلج خبر ؟
- لا طبعاً راح ابقى ادور شغل لحد ما اللّٓه يفرجها ، تعالي خلنغسل الجراجف لايغرمونه وتتكحل السالفة
كملنا غسلهن عسريع رحت طلعت الدفتر مالتي وبيدي الثانية دفتر ريمه انطيته الها واني اكول : هذا الج حته ادرسين بي ، گعدت ادرسها لدرسته بقينا لمدة طويلة بين ماعرفت تكتب وتلفظ الكلمات صح يلا عفتها
كامت ريم تودي الدفاتر صفنت واني اذكر كلت اجيبلها موبايل بس نسيته مو ورا سالفة هذا المايسمى وهسه ضروري اجيبلها موبايل
رحت حسبت فلوس على كد الموبايل تنهدت بضيق واني اشوف الفلوس على وشك ان يخلصن بقه بس الذهب عدنا وهم شلون ذهب زين اذا كله جاب 3 ملايين
اخذت فلوس الموبايل ودحست الباقي بلجنطه رحت ألبس الحذاء واجتني ريم
ريم : خير ياطير وين طاير وانتَ هستوك حطيت
- خلف الله عليج سويتيني زاچل
ريم : رحم الله امرئ عرف قدر نفسه وثاني شي يمكن اقصد هُدهد او بُلبل
- شو دوخري
ريم : لتغلسين وين رايحه
- لتلحين هسه اجي شغله دقايق
ريم : اي غير نعرف
عفتها مارديت نزلت الكبوس حته ليبين وجهي دخلت للمحل وعدنا نفس الاسطوانة من اشتري موبايلي اخذته وطلعت للفندق اركض ، صعدت للغرفة لكيت ريم اتابع برنامج
حمحمت واني اكول : ريمه
بدون متباوع ردت : هممم
- شوف يحلو يگميل شجبتلك
دارت رأسها عليه بفضول
ريم : يولد شجايبلي
طلعتلها الموبايل اجتني تركض فرحانة لكن خلال ثواني تلاشت الضحكه
حجيت واني عاكده حواجبي
- شنو ماعجبج ميخالف بس يصيرلي راتب اجيبلج الاحسن منه
حضنتني وهيه تكول : لج صدك تحجين ماقصد هيج بس ضجت لان صرفتي فلوس علمود موبايل وانتِ تعرفين شنو وضعنا هسه ولا عدنا وارد اصلا حته نصرف براحتنا على العموم شكراً حبيبتي وهم
- يولد تستاهل الأكثر وثاني شي لازم عندج موبايل مدشوفين شديصير النا وها راح ننتقل فشلون حتتصلين علية وانتِ ماعندج موبايل
ريم : هم صح وصح وين راح نروح لگيتي مكان
هزيت راسي بمعنى لا
- قررت ابيع الذهب وبفلوسة نأجر شقة لحد ماشتغل
ريم : انتِ اعرف وها لگيتي شقة لو هيج؟
- طالعه اليوم ادور عسما ابقه للفجر ضروري الگه شقه ماريد ادفع بعد ليلة بلفندق
ريم : انجبي وهم قبل لتصير بـ8 انتِ هنا بـ8 ودقيقة النا غير حجي يصير خوش !!!
رديت بملل : امم خوش
- حدز على بيتزا تريدين غير شي ؟
ريم : چؤ، ايشي عادي
- اتصلت على الفندق من التلفون الموجود بلغرفة بقينا ننتظر الطلب بعد عده دقايق وندگ الباب گمت اخذ الطلب ورجعت لريم گعدنا ناكل ونفكر شنسوي مانسوي
ريم : اگلج وهم تتوقعين شصار يم خالي معقولة عاف السالفة لو شنو ممعقولة يسكت على السوينا بخصوص اخذنا فلوسه والذهب مو علمودنا طبعاً
- اول شي ماراح يسكت گاعد يطبخلنا سالفة على نار هادئة اكيد وثانياً شني فلوسه نسيتي هذا ورثنا من بيت ابونا؟؟ فـ غصباً عليه وعلى عشيرته يسكت وهوه الممنون
سكتت ماردت گملنا اكل لميت الغرفة عسريع باوعت للساعه بـ11 هم يالله انام حته اگعد من وگت ادور على المهجومه الشقة
گعدت ثاني يوم الساعه بـ9 گمت علسريع ابدل واني اصيح بصوت عالي حته تگعد ريم
- ريمم راح اروح اگعديييي
فتحت عيونها ببطء
ريم : اشتعلو عيشرتج من عمامج العارات لشيخهم خوش هيج
- هههههههههههه رايحه اني ابقي گاعده خاف يصير شي وها خليت رقمي بموبايلج وفعلتلج النت
ريم : تعالي اكلي وروحي شدعوه هلگد مستعجلة
- لا لازم استغل كل ثانية اليوم ، اليوم مانبات بلفندق عسما انام بلشارع زين هيج ويلا تعالي سدي الباب وراية وراجعي الدرسته الج فدوة ريمه
نزلت بعد ماسدت الباب ورايه طلعت امشي بلشارع صرت اندل شوية أحسن من قبل
وصلت يم عقار للشقق دخلت حجيت وسلمت علية باللغه الألمانية لان علمونا الترحيب فحفظته، طلعت الموبايل واخلي يترجم الاحجي للرجال وواضح فهم علية
اخذني وياه على شقة جانت صغيره بس زينه لنفرين بيها غرفة وحمام ومطبخ واستقبال وبلكونة وهاي اكثر شي حبيته لان يطل على البحر
جان السعر زين / بلعراقي تقريباً 290 ألف بلشهر اتفقت وياه وسلمته الفلوس وطلعت فرحانه، اتصلت على ريم
ريم : بشري حمامة غراب
- حمامةةة ومن هاي الحلوة
ريم : عليج الحمز لگيتي شقةة ؟
- اي ودفعت فلوس مال شهر لمي الغراض علما اجي حته گبل نطلع
ريم : تمام لج متحمسة هههههههه
- اويلي شهلضحكه ولج صُدقة لمُحمد
حجت بخجل : اهو وهم تعرفيني اخجل يلا ولي
ضحكت : باي
طلعت فرحان بقن عندي بعد فلوس زايده بـ200 ألف
فكرت اشتري شغلات للشقة ، رخت اشتريت منضفات وعطور جو
شفت محل يبيع فرشات على شكل بحر او شاطىء متت عليهن رحت اشتريت ثنين جان حجمهن صغير اخذتهن ورحت للشقة حطيتهن وقفلتها وطلعت گبل للفندق
فتحت غرفتنا لگيت ريم تفتر مامنتبهه لوجودي
- يتهنى الشاغل بالج
ردت بضحكه : دافكر بالشقة وين شطحتي
- ديلا يلا خلنروح ورانا شغل بلشقةة
اخذنا جنطنا وصعدنا بلباص لان الشقةة بعيده شوية من الفندق ، جانت الشقة بعمارة راقيه كلش حته استغربت ليش سعرها هيج المفروض اكثر حسب المكان لان يطل على البحر وهيج اماكن تكون اغلى ماهتميت للموضوع
فتحت الشقة ودخلنا بقت ريم تفتر لحد مراحت للبلكون وهية تكولل الله وهم حبيتهاا
- چؤ، هذا الي حبيتها قبلج
باوعتلي بطرف عينها وراحت ، بقينا انضف لحد مانكسر ضهرنا جانت الشقة متروكة ومتروسة تراب
باوعتلها بنظرة اخيرة وفرحانه بيها صارت تجننن وبلاخص من فرشنا المفروشات صارت حلوة ولطيفة
ريم : وهم نحتاج طباخ وثلاجه وها شوكت لحگتي وجبتي سبالت وحولتي كهرباء ومي
- من الشقة مخليهن بس اكيد وي الإيجار ياخذون حقهن
ريم : همزين حصلناها وأخيرا كعد حضنا
- ديلا تعالي غسلي وخلنطلع نجيب النواقص العدنا
گملنا قفلت الشقة وطلعنا واحنا جاي نطلع ونشوف واحد لابس بنطرون اسود وتيشيرت اسود ضاب على جسمه ولابس كمامه ومنزل الشفقه كلش على وجهه واكف يم نفس سياره السباق الي شخطت من يمي بذاك اليوم
بقيت ارجف واني احاجي بريم : ريم نفسه هوه نفسه
باوعتلي وعاكده حواجبها بعدها ماحاجية شي وشخطت السيارة من يمنا....
لتنسون التصويت 💙
وابوفاضل ليكول البارت قصير نتخارب ها
2114 كلمة تعبت يول بس تستاهلون على هلتفاعل أقل الاسبوع وصلنا هلعدد يجوز عند البعض قليل بس بنظري شي كُلش جبير لانُ اول عمل الي
والگم خبر حلو بنهاية الرواية حنزل صور حقيقية للابطال اخذت إذن منهم وقبلوا
دشوف عمي الدلال💙
استودعتكم اللَّه 💙