ادور حجه
بيها وياك اسولف
بلكت تفتحلي گلبك
واحتاريت خلصن عندي
الاسباب وبعدك مادريت
شگد احبك...
_______
لزمت ايد ريم واني اباوع على المكان سبحان الله مبدع بكلشي
ألتفتت على ريم وهيه تكول : وهم هسه وين احنا شو الجو بارد هنا
- حسب الي أعرفه هسه احنا على الحدود وبخصوص الجو بارد المناخ يختلف هسه بلعراق خريف بس حاره وهنا كذالك خريف بس بارده
ريم : لك شنو انته كلك معلومات منين عرفتي واحنا حتى موبايل ماعدنا ؟
حجيت واني اشيل الجنط وامشي
- بوگت الجان عدنا دروس ومحد يجينه اروح يم حوراء وتنطيني معلومات عليها
ريم : هيه نفسها الگال عليها ممتاز مدري جيد جدا ؟ وشعجب ماسئلت المن تريدين هلمعلومات واضح غريب انُ يجيك واحد ويكلك اريد معلومات على دوله اكيد راح يسئل
- مو اني ريم الخوثه رحتلها على اساس خالتي تريد تروح للامانيا حته اشوف بناتها لان بقوا يدرسون هناك وهية ماعدها موبايل وتريد تعرف الوضع هناك وهاي حوراء بسرعة صدكت وكتتهن الي
ريم : صرتي تخوفين ولج
- عوفج من هلكلام هذاك باص خلنصعد بي
رحنا حته نصعد بس مقبلوا اله گارت
- اوو شلون سالفة محسبتلها حساب
ريم : هسه شنو وهم شنسوي؟
- سهلة خلنشوف هناك بلكي موجود احد يحول النا
بقينا نمشي وندور لحد ماستقرت عيني على مكان
- ابقي يم الجنط هسه اجي
ريم : وين رايحه وهم
- شبيج راح تبجين بس احول گارت واجي
رحت طلقة للمكتب مال الرجال الي يحول
دخلت حاولت اوصله كلامي لكن عجزت لان ميفهم ولا اني اعرف كلش إنكليزي اجيت ابجي اله شويه
لحد ماسمعت صوت ورايه يكول عراقيه انتِ؟
التفتت بفرح واني اهز راسي بمعنى اي، كال : كليلي شنو تريدين وانا اكله اعرف ألماني
- بس اريد گارت حتى اكدر اصعد الباص
عافني وراح يحجي وي الولد وبعدين رجعلي وهوه يكول : شكد تريدين تحطين فلوس بلگارت ؟
قدمتله الفلوس واني اكول : هذولي بس
هز رأسه باعتراض وهوه يكول : بت بلدي واخليها تدفع؟ زحمة يابة
- رحمة والله لاتحرجني رجاءً ماحب يصير علية دين
رد بسرعه : بس هذا مو دين ان...
قاطعته ميخالف اني أعتبره دين وهسه فدوة لتحرجني وياك
هز رأسه بتفهم وكال : صار يابة
انطاني الگارت وطلعت بسرعة قبل ليروح الباص ، حسيت احد يمشي بصفي ألتفت بخوف وإني أشوفه نفس الولد العراقي
هزيت راسي بمعنى شنو
رد : ترا انا هم رايح اصعد بلباص خلنكمل الطريق سوة
سكتت ، وصلنا يم ريم الي مرة تباوعلة ومرة تباوعلي ،
وهوه حجه قبل لتحجي : ليروح بالج بعيد لان شفتها من بلدي وشالتني الغيرة اعوفها وحدها
حجت الفطيرة بأبتسامه لا عبالي راحت ازوجت واجت فستغربت شبسرعة
طكاها بضحكه رنت المكان
حجيت بداخلي اشتعلو عيشرتج هسه متعرفين ادبرين كلمتين اله اچفصين ياريم
بقيت اباوعلهم بفشله احمم خلنصد حيروح
صعدنا كعدنا وهوه كعد بصفنه على السره الثاني
كال : احم لحد هسه معرفت اسمائكم؟
ريم : اني ريم وهاي وهم
رد : أشرفت يابة وانا "حميد"
ردينا ثنينه : ألنا الشرف
حميد : اكيد اول مره تجون ؟
- صح
حميد : عدكم مكان رايحيله بلضبط لو هيج ؟
- لا نروح فندق وبعدين ادور شقة و شغل
حميد : ها وانتِ اول متوصلين تلگين شقه وشغل صدك تحجين
- لعد شسوي
مارد بس فتح جنطتة وهوه يطلع دفتر وقلم كتب الصفحة مالته وانطانياها ، اخذتها منه ورجعت اباوعله حته يكمل كلامه
حميد : الشغل يدبر اعرف واحد راح اشغلج يمه بس الشقه شلون وانتِ اول مرة تجين هنا وبلا لغه
- صح وكلشي ماعرف ولا اندل
حميد : اووو هسه القفاصه يتلگوج لگوه شوفي بما انُ اول مرة جاية خلنصحج نصيحة لتثقين بأي احد يحجي وياج او يگلج تعالي لو هذا المكان شغل وانطيني فلوس تره بلد متروسه تقفيص ومافيات حتى يبيعون اعضائج واختج امبينه فقیره حيل خليج انتِ نبها
- عزا خوفتني
حميد : والله واكو شوارع خاصه الهم لاترحين أباي شارع متعرفي تره تلکفین خلیج ابين الناس
- شكراً هواي لو مگايلي جنت منو يگلي تعالي اروح وياه
حميد : لا على بختج
خلص الوقت واحنه انسولف ونتفق على الشقه والشغل كل هذا الوكت وريم نايمه وضاربة الوضعية بعرض الحايط
التفتت على صوت حميد وهوه يكول : يلا وصلنا
- احنا بـ برلين هسه صح ؟
حميد : صح عفيه عليج
كعدت ريم ونزلنا ، شفته راح يتصل ماقصدت اطفل واسمع اله بس جان صوته واضح وهوه يكول : بشرفكك ابو ليلى انتظرني حوالي ساعة واجي سكتت يسمع للطرف الثاني وهوه يكول لا عليك اخو زينب لتروحون بدوني شوية وغلقة
عرفت يريد يروح بس باقي علمودنا حجيت اني : احمم حميد مرة ثانية شكرا الك لان بدونك ماعرفت هاي الأشياء منك وتگدر هسه تروح تعبناك ويانا احنا ندبر وضعنا بعد
حميد : تعبكم راحه يابة ومتأكده تكدرن ادبرناها ؟
رديت بسرعه : اي نگدر والله مينسه عبده
هز رأسه بتفهم عافنا وراح بعد ماودعنا
وكفت محتاره وين اروح دوله غريبه ولغه مانعرفها واكفين بلشارع الجو بارد وحده باوعت للثانيه الفرحه الي بگلوبنه متنوصف
همست ريم وصلنا احنه بأمان هسه
ريم : اووف مامصدکه ولج وهم گرصيني
- الف الحمد الله والشكر ربي ماقصرت وياي
-هسه شنو الخطوه الثانيه
ريم : ماعرف انتي جبتينه هاي فكرتج اذا شنوووو انتِ تبتلين
رحنه نتمشى واحاول احجي بلنگليزي لان قليل اعرف وريم كذالك موكُلش شفت رجال جبير بلعمر رحت يمه واني اكول : Hello, we are tourists and we don't know anything here and we want a hotel nearby
(مرحبا نحن سائحون ولا نعرف اي شيء هنا ونريد فندق قريب)
رد : Ohhh welcome there is a hotel a couple of meters away called La Coza
(اوه اهلاً بكم هناك فندق على بعد كم متر اسمهُ لاكوزا)
تشكرنا منا واحنا ندور على الفندق لهناك وشفناه وأخيرً رحنا دخلنا للفندق وسلموا المفاتيح النا
دخلنا للغرفه واحنا نباوعلها بيها جربايتين رحت ركض شمرت نفسي عليها وانا اكول : لج ريم شوفي شكد ناعمم
كمت فتحت الجنطه اخذت ملابس رحت للحمام دخلت
اشتعلت روحك خالي تعال شوف الحمام كله مرمر وانت حمامك مزنجر
فتحت الدوش ودخلت جوا سبحت
طلعت بعد ماكملت سبح واني اكول : اويلييي اول مره اسبح هيج عبالك بحياتي ماسابحه
ردت ريم : امم اذا انتِ كل شهر لو تسبحين لو لا
- دنجبي ومُحمد كل يوم اسبح ليش اجذبين وثاني شي
روحي سبحي ذبي وسخ بيت خالج وبعدين
تعالي سولفي يالجذابة
ريم : جذابه ولا مثل بعض الناس اوي شنو
اني اسولف ويه هيج عالم اروح اخذ شاور
- شاور؟ خاب ماتوخرين منا لا ادفرج
راحت ريم للحمام واني رجعت لفراشي شمرت نفسي واني احضن المخده بفرح
طلعت ريم من الحمام وهيه تمشي بتموع
ريم : اويي شلون نايمة انتِ چؤ متعرفين الاتگيت
- ومُحمد اذا ماوليتي من يمي اجيبج بدفرة اصبج ويا الحايط عدل
حجت بضحكه : اعصابج وهومتيي خليج ريلاكس
- عوفج من هلمسلته رايحه اشتري تلفون ضروري نحتاجه منا وجاي
ريم : خاف اضيعين ولج
- چؤ غبية مشفتي مقابيل الفندق
ريم : ها والله منتبهت لتتاخرين عود وها بدل ملابس خُما هيج اطلعين وتفضحينا
- دخليطيرون ابدل من جديد علمود خاف الناس تحجي خب طُزز بيهم وبيج
غمتني وگعدت تمشط ، نزلت على سريع ورحت لبو التلفونات وطبعاً بعد عناء طويل كدرت افهمه واشتريته خليته يفعلي شبكه ورجعت للفندق
رحت للغرفه لكيت ريم تاكل حجيت بتساؤل : منين جبتي اكل؟
ردت وهيه تخلي اللگمه بحلكها : اهل الفندق جابو
هزيت راسي بمعنى اي
رحت گعدت على الچرباية فتحت الموبايل دخلت لكروبات حتى اسال عن الشقق خفت من کلام حميد اخذتلي فتره افتر واخذ معلومات
اتأخر الوقت كمت طلعت الفلوس حسبتها جيكت الوضع الحمد الله بيهن اجار واقامات
بقن ذني كم وحده انمشي روحنا بيهن لحد ما احصل شغل
اخذت نفس براحه رجعتهن ورديت لفراشي نمت واني احلم اشلون اكعد الصبح واشلون اجهز الشقه وافرشها واقدم عالاقامات ماسايعتني الفرحه
ما عرفت شنو منتظرني وراح اواجهه واتندم لجيتي لهنا ....
لاتنسون التصويت
استودعتكم اللَّه 💙