سليمة:ههه ايه انا امنت شوف معاهم
مازن:رايك يكفي ازين المهم نتي امنتي الباقي يزمرو
سليمة:ههه ايا نوض مالا افطر واهبط لخدمتك باه تقوم عرسك
مازن:هههه وليدك مرفه اجدة يقوم عرسو ويزيد راني مخبي راس مالي
سليمة:هههههه صحيت شاطر هادي تربية يدي وش تجيب
مازن:بااااينة هادي
في الشركة الحالة نشطت فالشهر اللي فات والشركة طلعت ومنعت من الافلاس وليوم راح تبان نتيجة المشروع اللي داروه يا يكون نجح يا نو ولهذا الكل يجري هنا ولهيه منغمس بأوراقو وداخلين خارجين على لي بيرو تاع لي باترون دانييل وماهر وجان ليوم مريحوش دقيقة من اللي دخلو الصباح للشركة وهوما مع التوقيعات وشوف التفصيل هدا والورقة هاديك مي تعبهم مش فالخصارة هدا النهار هو اللي راح يتعبو فيه باه ينجحو ويرجعو لروتينهم فالخدمة بالهدوء والكالم وبلا جهد زايد
في غرفة الاجتماعات تلمو الموظفين المسؤولين على المشروع هدا واللي هو ترميم مشفى خاص لمرضى السرطان يعني لازم يكون كلشي كيما يحب الخاطر ومتكون كاينة حتى غلطة فالمشروع
تلمو ماهر ودانييل وجان ونور ورائد وريماس في طرف شركتهم والطرف الثاني محامي ومدير المشفى ومختصين في مجال التصميم باه يضمنو الجودة تفرقو صور للمشفى كيفاه كان قبل وبعد الترميم والفرق كان وااضح المشفى كان تقريبا في حالة خرابة مي الآن صار كأنو جديد حيطانو كانت تسرب الما ولوكان يجي قط يفوت من ثم مش الما برك مي بعدما الشركة عاودت درست البلون عاودوه كامل وصار ميدخل والو وجديد الدروج اللي كانو تنزل فيهم نتا وزهرك يا توصل يا تريب بيك وحدة عاودو رجعو جدد وبدلوهم بالحديد المقوى والمضاد للزلال بيسك صاحب المشفى قال الزلازل هي اللي تسببت في اهترائهم المصاعد وموتوراتها واماكنها الغير استراتيجية تبدلو وتجددو ومام الحديقة تاع المشفة تططورت ككان فيها مجرب اشجار ورصيف مي مهندسينا قررو يمدو هبة من عندهم للأطفال المراض بلاصة تكون مريحة ليهم كثر وتنسيهم في مرضهم وريقلوها كثر بزرعهم اشجار ورد واماكن للعب ومن بينهم مسبح صغير على الأقل كي يشوفو مع الما يريحو
بالمختصر المشفى تبدلت خلاص وكأنو كي غير بناوها ومزالت فأيامها الأولى جديدة تبرق.
مدير المشفى بعدما تناقش مع فريقو بيناتهم وحطو مسؤولين اثبات الجودة تقريرهم باللي الخدمة طوب ومخاصها والو تحمحم ونطق
المدير:اذا وبعدما عيرنا كلشي والمختصين بحثو مليح فخدمتك سيد عمراني قررت باللي توكيلي ليكم هاد الخدمة مكانتش غالطة وانكم محل ثقة ونتمنى منا وجاي نخدمو كيف كيف في بزاف مشاريع
ماهر:يعني متصافيين مسيو المشروع اللي بيناتنا نجح؟؟
وقف المدير يتبسم ومدلو يدو وماهر ثاني وقف ومدها ليه يباركو لبعض
المدير:مبروك المشروع نجح واكثر من النجاح ثمن جهدكم راح يكون دوبل المبلغ المتفق عليه في العقد لأنو خدمتو خدمة تفوق بزااف المبلغ الرمزي المقرر..مبروك علينا
ماهر:يعطيك الصحة مبروك علينا كامل نشالله
وقف دانييل وجان سلمو على المدير وبوجرو كلهم على بعضاهم يباركو وصل المدير لنور اللي كانت تفرح مع ريماس ومدلها يدو وهي مكانتش من العاكسين عطاتو يدها وبوجرت معاها مي كي جات تجبدها زير عليها وحب يحضنها مي مقالش بسم الله جبد جان يد نور من يدو يتبسم مع المدير ابتسامتو الباردة لوكان ماشي برك بيناتهم خدمة رسمية لهنا يقصو
جان:الآنسة خطيبتي مسيو متسلمش على الرجال
المدير:ههه آسف مسيو جان صراحة محظوظ بيها تبان شاطرة بزاف ومام جمالها ساحر
ريماس قلبت عينيها وقربت ليه مادة يدها:متشرفين بخدمتنا معاك مسيو
المدير تبسم ومدلها يدو:الشرف ليا آنستي سلم على يدها كيما الجانتلمان وطلقها مد يدو لرائد والباقي فاتو سلمو على جان اللي جابد نور وراه وماهر ودانييل وخرجو ورا مديرهم
ماهر تبسملهم:ربحنا ليكيب رجعت شركتنا
دانييل:ههه مبروك عليكم شريكي
ماهر:يبارك فيك تعاوننا كان صح هو السبة فرجوعنا بعد ربي اكيد
دانييل:واجبي اولد عمراني هههه
حظنو ورائد طبطب على كتف نور
رائد:ههه عقروبة ربحنا خدمتنا عجبتهم
نور دارت له حاكمين فدين بعضاهم:هههه شفت مشاء الله علينا
ماهر:يا صغار
شافو فيه هازين حواجبهم :معانا؟؟
ماهر:ههه ايه مكانش من غيركم هنا اللي صغار
نور:عندنا 20سنة سي ماهر
ماهر:ههههه قالو عشرين وش نقول انا اللي عندي 32سنة؟؟
نور:شايب هههههه
دانييل:ههههه جابتها
رائد خربشلها شعرها:ههه ديما فمها مش ليها
نور:بلع نتا شغل خاطيك
دانييل تأمل فيها ويتفكر فصاحبتها وشبيه من لبارح مش قادر ينحيها من بالو؟؟
ماهر:المهم عليكم تنشرو خبر فالسيت تاع الشركة لكامل الموظفين باللي غدوة راح نديرو حفلة احتفالا بنجاحنا هدا في فندق @##(((زعما اسم الفندق هههه)والاحتفال راح يكون عشا مع سهرة
دانييل:هههه انا اوافق ونتا جان؟
جان كان متكي على الطابلة الكبيرة ويشوف غير لرائد اللي يدو على نور وعقلو يخربلو ويقولو قطعها وكسرها نورمال ميصرا والو(فطنو من تخمامو دانييل ضرب على كتفو)
دانييل:وين غايب صحبي؟؟
نور شافت فيه كيفاه يشوف ليهم فهمت روحها وبعدت:ههه اوك خلاص علينا مسيو ماهر
خرجت وخرج وراها رائد وريماس وبقاو الثلاثة لثم
جان:ليكيب راكم معروضين للعشا ليوم راح نديرو وليمة بمناسبة رجوع سيليا
ماهر:جان لبارح حكيت مع جدة وحبت تزوركم باه يحكيو على عرسي مع ايلين طولنا وبنتنا اللي راهي تتضر يسما ماذبيا لو يكون العرس قريباا
جان:ماشي قتلك معنديش بنات للزواج؟؟
ماهر:امشي تلعب انا جامي غلطت معاك انسيبي وهاديك مرتي وام بنتي لانسيت نديها ويدك على راسك تصفق نهار نقصدك في بنتك من@@@وقولي معنديش بنات للزواج
دانييل:هههههه..انا هنا معاك اشريكي وزيد الطفلة الصغيرة معندهاش ذنب فهبال عمها خليهم يتزوجو وتريح بالها
جان: خلاص مالا جيب عايلتك كامل وارواحو الليلة النسا يتفاهمو بين بعضاهم ونتا احكي مع بابا ونقررو
ماهر:هههه نسيبي ليزوووم
جان:مقبلتش علاجالك عمراني قابل علاجال لينار بررك
تقعد و مشا خارج:اتهلاو لقائنا الليلة
خلاهم و خرج ماشي ويديه فجيوبو حتى وصل قدام بيروها لقاها قاعدة وتشوف فتلفونها مشا شوي و مبعد رجع على وراه ووقف فالباب
جان: نقدر ندخل؟؟
نور شافت فيه وقلبت عينيها:نتا المدير وتقدر تدخل وين تحب مش حتى تشاورني
تبسم وغلق الباب وقرب ليها حاصرها بين البيرو والكرسي وين قاعدة
نور:واااش؟؟
جان:ههه ماشي قلتي نقدر ندخل و ين نحب؟؟
شافت ليه وتبسيمتو الخبيثة اللي لاصقة فشفافها دزتو بيديها من صدرو
نور:خاامج بعد علياا
جان:هههه نتي تهدري و تدوري ولا واش؟؟
نور:جان قيلني بركاك من التسوفيج تاع الخرا
جان:بصح نتي خطيبتي
نور: كي تعود تدير على اتصالات خطيبتك واهدر وزيد نتا قلتها خطيبتك مش مرتك نهار نولي مرتك وحقك الشرعي وقتها اطلب مني مش ضك مكلاه تحلم
قرب ليها كثر وباسها قدام شفافها وبعد مخليها تمسح ففمها بكف يدها وتعيط
نور:كلب..خراا..شيطااان..متفهمش قتلك متقربليييش؟
جان تبسم ولحس شفافو:مش انا اللي نترفض آنسة نور انا اللي نحبو نوصلو كيما وصلت ليك وخليتك خطيبتي نوصل لوين نحب فيك فاهمة؟؟..وهدا عقاب ليك من ليوم ورايح اي غلطة تخلصيها هكا
نور:شوووف؟؟...قول والله..فاه غلطت معاك؟
جان:كي خرجتي لبارح مع هداك الكلب وبلاصة ما انا نتغشش منك وليتي نتي قالبة خليقتك طريق كامل..
قاطعتو كي نطقت:ماشي كنت لاعبها غير تسوق ومتشوفش فيا كيفاه تولهت باللي خليقتي مقلوبة؟؟
جان حبستو بسؤالها وش يقولها كنت نمثل برك وعيني الطريق كامل عليك وتتشهى فيك كيفاه تعضي فشفافك من الغش؟؟..بااينة لالا غرورو ميخليهش.:عندي ربع عينين يا زيين عينين نشوف بيهم و عين على كل جنب
نور:مالا توخذت ديت فضائي
جان تبسيمة هربت منو ديما مهبولة الطفلة هادي:ههه احمم خليني نكمل..بركاي متتلوصقي فهاداك رائد وبطلي تسلام على الرجال خاصة فالخدمة منا وجاي شفتيه قبيل كيفاه حب يحضنك مالا اعرفي حدودك راكي مرت راجل ضك
نور:اول شييي رائد كيف خويا ومن صغري نعتبرو خويا و جامي قربت ليه ولا قرب ليا وبالو يخمم فشي غير اخلاقي ثاني شي انا من بكري نعرف حدودي وهازة اسم خويا وبابا اشرف ما يكون مش حتى نهز اسمك باه نولي لازم نعرف حدودي والرجال كلهم سواسية عندي ميسوااوش وواحد منهم منخمم نقرب ليه سيرتو اللي كيما الشايب تاع قبيل نحسبو بابا مي كي حب يفهم مخليتنيش نتصرف وتلحت نتا سينو كنت راح نعطيه كف
جان تبسم وقرب ليها وقفها وقعدها على البيرو وحكمها من خصرها جبهتو على جبهتها:مالا كي الرجال كامل ميسواوش عندك انا استثاء ونسوى عليها قبلتي بيا؟؟
نور تعقنت وش تقولو ايه عشقت فيك وحبيت رجولتك وكلشي فيك وحابة نكمل حياتي معاك؟
جان:ههه قولي الصح متكذبيش
نور:بالنسبة ليا نتا كنت ارحم واحد يقدر يزوجني ليه بابا سي بور سا قبلت بيك
جان:ههه ايه يا جنيتي كنتي حاسبة كي تنزلي هكاك راح تهربي العريس؟؟
نور:ههه باينة
جان فوت يدو على خدها:نو غالطة..جيتي وقتها حلوة كثر بهذاك المظهر كنتي كيووتة للخر ونحمد ربي اللي مشافك حتى واحد من غيري ونتي فهاديك الهيئة سينو راهم عشقو فيك ووليت قتال على آخر عمري نقتل في كل قلب خمم يضرب باسمك
حديقة حيوانات راهي تتخروض فكرش نور المغبونة احساس حلو اجتاحها وكلشي فيها تخلط المسكينة مش موالفها بالغزل وهو جا وقلبلها كامل لخيوط اول شي من غيرتو اللي بانت فوجهو وكلامو واللخرة كي اعترف بذاتو انو يعشقها ايه هو قال راهم عشقو فيك مي مقالش عشقت فيك اووف
نطقت بسيف بأنفاسها اللي هاربة منها تسيي تكبتهم وترتبهم:ههه يعني تعشق فيا؟؟
جان:نحبك ونقيم الحرب على اللي يقرب ليك..ايه عشقتك
نور تبسمت ودورت يديها على رقبتو:وأنا اكثر..جامي تخيلت يجي انسان ويطيح اسوار قلبي ويحتلو مي نتا درتها..(شافت فعينيه بعيون ذابلة):بلييز متخونيش و متكسرنيش جان.بليييز بعد كامل وش فات متكونش السبة اللي راح تريبني و انا حياتي كامل نسيي نلم شتات روحي بيسك مبقاتليش قوة
جان وجعو قلبو من كلامها جامي توقع يكون نذل ويتحط فموقف يضطر يكذب فيه ويلعب بطفلة مي انتقامو عاميه والشي اللي مريحو انو هو اللي تظلم قبل مش هي قرب ليها بالشوي وباسها عند شفافها بوسة حنينة وهي مبادلتو مالقري مش عارفة مي ركحتلو مستحلية قربو الله غالب العشق ومدار فيها
بعد عليها يتأمل فبريق عينيها بالدموع
جان:علاه تبكي؟؟
نور مسحت دمعتها وتبسمت:ههه تأثرت برك..بلاك كي اول مرة بعد حظن خويا نحس صح بالأمان والحب في حظن غيرو..راجل طبعا بيسك ختي اللي عوضتني على الفقدان تاع الحب و الأمان حياتي كاملة هي بشبوشتي..مي ضك..مشاعري متبدلة..انا...حبيتك يا جان ولوكان تروح عليا راح نتدمر صح
جان بعد عليها وخلاها توقف:بركاي متخممي فالفراق ضك راح يجي عرسنا ويكون خاص بزاف ولدرجة كبيرة تخليك تبكي من قلبك
نور:هههه متأكدة راح نبكي دموع فرحة
جان:توثقي فيا للدرجة هادي؟؟
هزتلو راسها بايه واكثر..متخيبنيش جان كامل لأنو بقات فيا شمعة وحدة عطيتهالك اذا طفات راح نغرق كلشي عليكم
جان:ههه تهددي فيا؟
نور:ههه نو نخبر فيك برك..حتى تعرف وش عندك
جان:انا علابالي باللي كاسب احلى مرا فالدنيا
نور:ههه اوك
جان:أوك؟؟..وينهو الغزل والشعر عيب عليك؟
نور:هههه انا فمي مش ليا يعرف غير الهدرة اللي خاطية الطريق
جان:هههه اوك مالا ابلوتي..و..
نور:وي؟
جان:هاد ليام كي تقلقتي مني ومكنتش نرفد على تلفوني مكنتش فالبلاد اصلا عليها رقمي كان خارج الخدمة
نور:وش كنت تدير برات البلاد؟؟
جان:رجعت سيليا
نور:واات؟؟..سيليا رجعت؟؟
جان:ايه لبارح جات
نور:ووين كانت راهي مليحة؟؟؟
جان:خفتي عليها صح؟؟
نور:بااينة خفت عليها نحسبها ختي لكبيرة ونحبها ونتقلق كي تتضر باينة
جان:هههه مليح....سيليا بسبة صغرها تحاسبت فكبرها كاين كلب كان راجل امها وهو باعها للمافيا في ايطاليا وواحد منهم بقا حاصل فيها وخلاها تهرب سينو يقتلنا كامل مي رجعت وتهنينا منو
نور بلعت ريقها على شوفاتو اللعابة يشوف كيف الثعبان كأنو يهدد ويحوس يوصل هدرة مي بطريقة سلمية مخادع بزاف الطفل هدا
نور:ونتا كيفاه تهنيت منو؟؟
جان:تيريت عليه رصاصة فالرجل ووحدة فالكبدةو..
نور:كيفااه؟؟..منين جاك السلاح؟؟
جان:ههه متولهتيش باللي في الرحلة كنت قناص ماهر
نور زيرت على حافة البيرو بخوف:شكون نتا؟؟
جان:هههه خفتي مني؟؟
نور:منيش نضحك شوف شوفاتك كيفاه مدايرين احكي الحق نتا سفاح؟؟
جان يقرب ليها بالشوي وهي ترجع على وراها حتى حاصرها جات تتطلق تجري هاربة مي حكمها هو يضحك ظهرها لاصق فصدرو وهي تتخبط تحب تبعد مي هو حاكمها ولاوي يدو على خصرها مش مخليها تبعد
جان:منيش سفاح ابهلولة اركحييي
نور:مالا واش نحي يدك
جان:ههه والو مضربتوش اركحي انا رحت برك مع مازن ياخي تعرفي خدمتو نفس خدمة خوك
نور ركحت:يعني مضربتوش؟؟
جان:تأأ الموت اهونلو من ضربي
نور:ااووف(بعدت عليه كي رخف عليها):اذا مزال شي مخبي ولازم تقولهولي غير قولو ضك
جان:مكاين والو اصلا ساعة عندك فالبيرو ونسيت علاه جيت لعشية راح نخرج سيليا ولينار وايلين وسيليا حبتك تجي نفوتو ليك؟؟
نور:امم لعشية نردلك بيسك كنت ناوية نخرج مع بيشو اذا صلحت نجيو حنا عندكم
جان:اوك اتهلاي فروحك
نور:يتهلى فينا ربي
خرج وخلاها هارب من ضميرو ووجيعة قلبو علاه واجعو انها مدايرة فيه امل؟؟..قادر يتراجع علاجالها؟..يقرر ينسى الانتقام ويكسبها هي؟؟
جان:اووووف اخرجي من بالي اوووف(كان وصل لبيروه ولقا روحو غير يضرب ويرمي فالأوراق على اللرض مهوش قادر يخمم كثر)
جان:اوف منك نور اووف..اصلا باينة شمتها وقررت تبدا تدير احتياطتها وتدمرني بلاصة ميصرا العكس مي محزرتش مش جان اللي تتحشالو من قطة كيفها
فبيرو فنفس الشركة مجمعين الكوبل تاعنا مبقالين وكل واحد منهم حاكم كاس قهوة
مازن:ونتي راكي مقلقة كي حكيتي هكاك
سيليا:باينة مفهمتش كيفاه تطرطقت فوجهو وخليت الشي اللي مصراش فاللول يصرا ضك ..يعني عاودت فكرتو بغلطتو وخليت الذنب ياكلو صح مبينش مي علابالي وفاهمتو هو مزال مقلق من روحو
مازن حط قهوتو وقرب ليها نازل على رجل ونص باه يجي مقابلها وهي على الكرسي:الشي اللي درتيه سي نورمال سليوشتي..اي انسان كي يتعمر بزاف يجي نهار وين يطرطق ويخرج كلش فيه وهكا صراتلك نتي نتي تعبيتي المدة هادي كامل من كلشي مي مكنتيش تفرغي على روحك..
سيليا:بصح كنت راضية وقانعة كنت نقول معليش نقدرلها ومفيها والو وحسيت باللي فت لحكايات كامل وتقويت كيما ديما محبيتش نخضع للواقع واني انسانة وتضعف ونورمال تطيح
مازن كمم وجها بين يديه:علابالي نعرفك مليح وكنتي غالطة بالشي هداك ياروحي ..سيليا نتي هزيتي كثرمن طاقتك ببزاااف وهوما متفهمينك علاه مكيش حابة تقنعي انو كل انسان لازم يحس بالألم ويعيش تجارب صعيبة علاه راكي حابة تبقاي هازة عليهم كامل
سيليا:معلاباليش...منشتيش يهزو هم بسبتي ولا يتقلقو عليا..من داخل بعد منحبش فكرة نكون ثقيلة على انسان انا والفت نكون لروحي يامازن منحبش نكون هم لغيري منقدرش
باس جبهتها بمعزة
مازن:مراح نخلي حتى واحد من غيري يهز همك ادنيتي نتي العمر والحب وكلشي فحياتي ضك لازم نتي ترضاي على روحك وتخليها تخضع للواقع وبقانون الانسان ضعيف وتبركاي تخضعيها لما كثرمنها..وش رايك تشوفي طبيبة نفسية تعاونك؟؟
سيليا عينيها رجفو من الفكرة بعدت يديه عليها ووقفت:نوو..منيش مريضة منيش مختلة نفسية مازن
مازن قرب ليها وحكمها من كتافها ركحها من رجفتها:بعيد الشر شكون قال احبي حكيت من خوفي عليك ياعمري نفسيتك تعبت بعد كامل وش فات بزاف عليك لازم تريحي وانا راح نبقى ديما معاك جامي نسمح فيك برك تهمني راحتك
سيليا حظنتو:راحتي معاك برك امازن سيبون منقدرش نبعد عليك نتا دوايا في كل ونتا طبيبي متخلينيش ومنحتاجش غيرك يعاوني
مازن مسح على شعرها يهدن فيها كيما توقع هي متقبلتش الفكرة مي راح يدعمها ويووقف معاها ويكون هو طبيبها بكل فرحة كلشي يهون فخاطر سيليا عندو .."الحب المكتسب من حروب"هكا يقدر يوصف الشي اللي بيناتهم:خلاص راني معاك اعمري ريحي روحك مازن عمراني ليك وديما كاين علاجالك و علاجال راحتك ياعيوني
سيليا:قربك يريحيني
مازن:ههه وانا كثر ازيين نحس بواحد الراحة مليهاش مثيل
فرقهم تلفونو كي صونا بعد عليها مخليها تمسح فعينيها من دمعاتها اللي هبطو ورد
مازن:وي؟
القائد:حظارات مازن صباح الخير
مازن:صباح النور قائد
القائد:جيب سيليا وارواح للمركز
مازن هز حاجبو مستفسر:علاه؟؟
قربت ليه سيليا :وش؟؟
مازن:القائد يقولي نروحولو
سيليا:أمم..ايه نجيو
مازن تبسم ورد فالتلفون:خلاص راح نجيو...شوي ونكونو ثم
كوبا وفوت يدو على خدها يمسح فالدموع
مازن:متأكدة قادرة تروحي؟
سيليا تبسمتلو: ايه متأكدة
مازن:يخليلي عصفوري اللي يتفاهم مع القائد ههههه
سيليا:هههههه...نروح نقول لجان وايلين ونجي
مازن:اوك و نا نفري شي فبيرويا ونجيك انزلي ديراكت لتحت هاكي لمفاتح
سيليا تبسمت بشيطانية
مازن:واش؟؟...راح تسرقيلي طوموبيلي؟؟
سيليا:ههه لالا احكم مفاتحك راح نروحو بطوموبيلتي
مازن:منحبش نسوق طوموبيل غير تاعي
سيليا:شكون قال راح نخليك تسوق؟...طوموبيلي تتفاهم غير معايا هههه
مازن::امسحي تبسيمتك الشريرة من و جهك منريسكيش ونروح معاك
سيليا:هههه وااش اللي حاب تعيش علاجالها معاك لكان خايف تموت فراح نموتو كيف كيف
مازن:وكن تحشيهولي ومتموتيش ههههه
سيليا:هه القط عندو 7ارواح و انا استهلكت منهم حاليا 6بقات روح وحدة متمنعنيش ههههه..ايا باااي
راحت تجري خارجة وخلاتو يتبسم وحدو ضام يديه لصدرو دار للبيرو قدامو شاف فوطوها مدامو بيروها هي تبسم يحكي مع روحو
مازن:وقتاه عشقتك قد هكا كامل؟؟....راح نهبل بيك مفيهاش هههه
نرجعو للبيرو تاع جان اللي ريح على كرسيه ينهج مقلق,مرة يزير على يدو مرة يرخف
دخلت ديراكت تجري
سيليا:جاااانووو خوووياااا
مردش عليها ومسمعهاش اصلا تخمامو فشي خلاف قربت ليها وف ;تت يدها على كتفها باه فطن ودار ليها
جان:هه وااش سيليا
سيليا:وشبيك؟..تبان مقلق
جان تبسم بحنانة وفوت يدو على شعرها:ههه والو بالعكس راني فرحان مخطط فراسي حاسو راح ينجح قريبا راني نتخيل فلحظة ربحي
سيليا:ههه اوو حمستني علابالك لازم نحظر للفوز هدا
جان تبسم بتبسيمة ليها معنى:هههه راح تحظريه متخمميش ..راح يحظرو الكل
سيليا:ههه نشالله..المهم (حكت راسها بغباء ضك هي من نيتها جاية تقولو شغل متعرفش خوها يقدر يرميها منا نورمال ..تكاكات مع روحها وحسمت قرارها بتخبرو وخلي يصرا اللي يصرا راح تبدا تصلح روحها وتبركا هاد التصرف من راسها وبقرارها هادو رجال عايلتها مش رجلين كرسي وكي عطاوها الحرية تعفسهم)
جان:وشبيك؟
سيليا:احمم..برووو خويا حبيبي الزين تاعي اناا خرجت تهبل ليوم علابالك؟؟(هههه خاوتي هادي القوادة تاعي لخويا باه يديرلي رايي)
جان:وش راح تطلبي؟
سيليا:اوو كيفاه عرفت؟؟
جان:باينة نتوما البنات تتسيتو غير كي تحتاجونا
رخفت شواربها ونطقت بترجي
سيليا:جاااان لاازم تقبل والله
جان:يابنتي خييير؟؟
سيليا جبدت نفس:اووك.....راح نروح مع مازن عند القائد وهو قالنا ارواحو يحتاجنا لازم نروحو و انا قلت هيه ولازم نروح ولازم تقبل(قعدت تنهج كي كملت هدرتها جابتها كامل مور بعضاها)
جان:فهمت غير نروحو عند القائد و معامن؟..مع ولد عمراني!!..مكانش
سيليا:يووو جاااانيييي بلييييييز انا ختك الصغيرة العزيزة اللي تحتاجها مرة اخرا فعرسك جااني بلييييييز (ذبلتلو عينيها كيف القطة الخطة هادي ديما تنجح عند لبنات شوي تسيتيت برك وكلشي نطلبوه يحضر هههه)
شاف معاها ينفخ على جنب
جان:احكمي عينيك ليك مكانش
سيليا هبطت راسها بأسى ووقفت ناطقة بصوت حزين وذابل:اووك..كيما تحب
شاف ليها كيفاه مخيبة ومكسورة وهادي نقطة ضعفو ميقدرش يشوفها هكا وهو متحوشها من شحال ويحب ديما يشوفها راضية وفرحانة تنهد من اعماق قلبو ونطق:خلااص..روحي
سيليا هزت راسها مصدومة:واات؟..قتلي روحي؟
جان:ايه...روحي قبل منبدل رايي
سيليا سوطات عليه تحظن وتسلم:يااي احلى اخ تاعي حبيبي انا خلاص مراحش نطول ومنديرش مشاكل وعد
.....
رايكم فجان ونور؟؟
ووش يحوس القائد من مازن وسيليا؟؟
اي توقع ولا رأي خليوه