دانييل غير يسمعلها ومركز معاها ويحاول يقرا وش كاين بين الكلمات ويجبد خيط يقدر يعاونها بيه: ماعلاباليش واش هي الحاجة اللي تقصديها مي ... أنا عندي إحساس قوي أنك راح تكملي و توصلي و كلش يجي كيما حابة , هكذا حاس , راكي تمشي بعقلك و عندك مبادئ و أهم حاجة مدايرة أولويات , راكي راضية و قانعة بمصيرك , هاذ الشي يكفي أنك تتقواي أكثر باه تكملي , اوصلي بعقلك و تخلاي على قلبك , هدفك نبيل بزاف راني حاس هكذا و احساسي مايخيبش , نقولك كملي للخر , تصالحي مع نفسك , احبسي شوية , خممي و ريڨلي مخططاتك و حساباتك , و كملي واش بديتي , هكذا باه ماتندمي على والو , الإستسلام ماوش حل , صدقيني هو دمار , عندك تستسلمي , ديري اي حاجة من غير الإستسلام , أنا متأكد باللي ندمك و حسرتك على إستسلامك و تضييعك كل تعبك بيدك راح يكون مؤلم و موجع أكثر من قهرك على الخسارة بيد القدر , ديري أسبابك و خلي الأوضاع بيد الأقدار , راح ترتاحي هكذا
بشرى تسمع لكلماتو اللي دخلو لأعماق قلبها و خلاوها ترتاح صح , كانت محتاجة هاذ الكلمات و واحد يشجعها باه تحدد طريقها و تعاود تنوض من جديد , قربت و حطت راسها على كتفو و مغمضة عينيها مستحلية هذاك الوضع أنها ضاعت و ممبعد لقات واحد سقسى عليها و تشجع و قرب ليها و حب يعرف واش واجع قلبها , و مدلها راحتها و قدرت أنها تحكيلو جزء من مشكلتها باه ترتاح , الكبت من بين أسوأ المشاعر , شعور سيء جدا و قاسي على نفسية كل واحد فينا , يحطم القلب و يكسر الروح و يخلي قوة الإنسان معدومة , سيرتو كي يفوت و يفيق بيك واحد باللي راك مضغوط و محتاج تفرغ همك و يقبل يعاونك عندك تفوت الفرصة و تضيعها , تجي مرة وحدة في فال باه تخليك تقوم من جديد , اديها و استغلها . باقيين وسط هذاك الهدوء و الشمس قربت تغيب خلاص و الهوا بدا يبرد , دور ليها حسبها رقدت مي لقاها تشوف مع البحر و عينيها مزالو حومر من بكاء قبيل , حسها طفلة صغويرة محتاجة إحتواء و راهي رافدة ضيق كبير في قلبها حد ماو عارف بيه , جاه سؤال في بالو
دانييل : شكون اللي راهو عارف بضيقك و مشكلتك من غيري ?
بشرى : حتى واحد
دانييل تشوكا شوي و سقساها : و نور ? ياخي صاحبتك لانتيم ?
بشرى : قلتلك من قبل أنا إنسان كتوم و مانحبش نكسر راس الناس بمشاكلي , ماكلاه نقولها و زيد تخطبت و حياتها تتحسن أكثر و حلمها فالتصميم بدا يتحقق , صغرونتي موهوبة و يدها فريدة من نوعها فالرسم الله يبارك , لازمها تستغل كل لحظة و كل ثانية باه تطور نفسها و تبني حياتها و تكون فرحانة مع خطيبها , مانقدرش نزيد عليها , ماتفهمنيش على أساس مشكلة ثقة , نوووو إذا قالولي شكون أكثر واحد توثقي فيه فهي نونوش , برك علابالي بيها تبقى تخمم و تحزن معايا , مانخليهاش تكتئب محال , من الأفضل تبقى هكذا خير
دانييل : هههههههه حكالي جان على الكارثة اللي درتيها نهار الخطبة
بشرى ولات تضحك من قلبها : ههههههههه ماتفكرنيش تعيش ههههههه ااااا ربي من بين أهم أعمالي الشريرة الرائدة التي سيخلدها التاريخ , نستعرف بروحي
دانييل : ربي يستر منك , ماكلاه تحضري للخطبة تاعي باينة تديري كارثة نووية
بشرى : هههههه كي تلقى اللي تقبل بيك وساهلة ههههه , انا مانيش حابة نحضر بصح الله غالب مانقدرش نقاوم هاذ المناسبات لازمني نوظف فيهم مواهبي الفريدة هههههه
دانييل : مديتها فروحك زيادة لالا؟؟
بشرى :ههه تعلمت منك
دانييل ماوش مصدق باللي هي نفسها المتكبرة و المزعجة اللي كان يظل يتقابض هو و ياها , في هاذي اللحظات بانتلو طفلة كيوت و بريئة و من أطيب الناس , و أهم حاجة عاقلة و موزونة للخر و شريفة , خيرت عايلتها و أولوياتها على قلبها و رغبتها اللي حابتها بزاف , أول مرة يشوف طفلة تتنازل بالسهولة هاذي و تقبل أنها تتخلى بكل قناعة و تكمل في طريقها ( التنازل و التخلي عما هو ليس لنا أحيانا يكون نعمة , حتى لو أردناه بكل جوارحنا , لكن قربه و حضوره سيكون الهلاك لأرواحنا و نحن لا ندري , حب الأشياء و الأشخاص لا يعني أنه يحق لنا إمتلاكها أو الإقتراب منها , أحيانا تكون مشاعر الحب محتما عليها الكبت و الخضوع للواقع الذي ينص على تركها و قمعها حتى لو كان معارضا لرغباتنا , لن تفنى الأرواح , الثمن سيكون القلب , لكن المقابل سيكون حياة أفضل , ففي الكرامة ألم يجمل العذاب ) بعدت من قدامو و بقات تهدر و متعمدة ماتشوفش فيه : نتمنى أنو الشي اللي صرا اليوم هنا يبقى بيناتنا بليز , كون ماشي وصلت بيا للطوب كون و الله مانكسرلك راسك معايا , مي ... الله غالب ساعات توصل بالإنسان وين خلاص مايقدرش يزيد يتحمل القهر و الضغط أكثر
دانييل : ربي سبحانو حاشاه يلقى عبد من عبادو ضايقة بيه و مكسور و مايجبرش بخاطرو , حتى لو طال الحال راح يجيك الفرج , توصل بيك للطوب و كلش يروح في لحظة وحدة , و اليوم طرقنا تلاقات باه قدرتي تنحي عليك كلش و تبداي من جديد , نتمنى انو الكلام فادك و لقيتي طريقك درك و واش رايحة تديري , قرارك خليه عندك , و أنا متأكد تخيري الصح , بيسك نتي وحدة تعتمد على عقلها , متأكد تفكيرك راجح و تخيري الشي الصحيح
بشرى : مرسي بزااااف على كل كلمة قلتهالي , عاونتني صح ماتتخيلش قدماه , نتمنى تلقى كل خير جراء هاذ الشي , صح كبريائي كبير , مي ماننكرش الخير , مهما كنت مزعج بصح عاونتني , ثانكيو
دانييل : دير الخير وانساه ودير الشر وأتفكرو, مادرت والو (ناض من بلاصتو و مدلها يدو باه تنوض و هي ماكانتش من المعارضين ), وقفو للزوج حط يدو في جيبو و هي ضمت يديها لصدرها , شافو في بعضاهم و تبسمو
بشرى : بلا ضغينة
دانييل : موافق و دور هو ماشي منين جا مخليها وراه تشوف لبعيد فالبحر و تحكي مع نفسها : مستحيل نتراجع , نكمل للخر و أنا نكون الرابحة , يا نربح يا مانخسرش , مكانش حاجة أخرى ( رفعت راسها للسماء ) يااااا رب ساعدني ليس لي سواك ! و هزت كارطابلها و حكمت طريقها للدار بيسك هذاك هو الوقت .
تمشا شوي وشاف على وراه لقاها شافت للسما ومشات فعكس اتجاهو تبسم و عاود شاف للسما
دانييل:ان شاء الله توصل وين حابة..تستاهل (حط يديه فجيوبو وكمل طريقو لطوموبيلتو وقلع) مام هو حاس روحو مرتاح كي قدر يخفف عليها .."عليها"هي بالذات؟؟...ولا كي قدر برك يعاون انسان؟
في فيلا عمراني مجمعين فطاولة لعشا العايلة كلها فرحانة وزاهية ليوم علاه لالا وفرحة الدار وهبالها رجع لعادتو بعدما رجعتلو حبيبة القلب
سليمة تشوف ليه فرحان ويريع بماهر تبسمت ونطقت:واش مازن كيفاه فات نهارك؟؟
مازن:طووب اجدة
ماهر:يادرا علاه خوو؟؟
مازن :درت براتيك شبااااب(غمز ماهر اللي صقلو لظهرو وخلا سليمة تكح)
سليمة:خاامج شوفي وش جابت كرشك(هدرت مع نسيمة)
نسيمة:نتي اللي تظلي تقولي ولادي ولادي و نتي اللي ربيتيهم شوفي وش خرجولك
مازن بلع المضغة حاكم ضحكتو:وشبيكم فهمتو الناقص لحكاية ومافيها لعبت شوي سبور فالصالة .مييي صدق اللي قال المواقف تبين الناس على حقيقتها ضك كل وحدة ظهرت تبرات مني عييييب عليكم و الله عييييب
ماهر شرب الماا:همم امننت يا مسكين
مازن:نتا غير اسكت بال المتزوجين ديما فاسد
سليمة:على سيرة الزواج ماشي طولتو نتا وايلين هاي سيلا ولا كي يسموها رجعت
مازن تطلق منهيه:سييليا اسمها سيليا جدة
نسيمة:ونتا وش همك فيها وفي اسمها المهم تبان بنت تاع مشاكل كيفها كيف...(سكتت على تخنزيرة ماهر فيها)
ماهر:كمليي
نسيمة:كيفها كيف بنات الشوارع (كانت راح تقول كيفها كيف ايلين مي بلعتها لثم باه متتخاسرش مع ماهر كيما العادة)
مازن وقف:كثرتي ايما علاابالك؟..وين تعرفي جدها حتى تحكمي عليها متخليوش الواحد يغلط فيكم ضك اللي يدير خير فيكم لازم ديما تهدرو فظهرو
نسيمة:وشمن خير دارتو فيا حتى راك تحامي عليها هكا ريح بلاصتك
مازن جا نطق زيرلو ماهر على يدو تاع اركح رما السارفيات اللي كان يمسح بيها ومشا
نسيمة:وشبيه رجع مكلوب هكا اللي يهدر معاه يشعل؟؟
سليمة:غياب الطفلة أثر عليه ورجوعها كثر(شافت فماهر):وش بينو وبينها؟؟
ماهر:حكاية متخصنيش وملازمش تسمعيها مني (وقف سلم على راسها وفات لنسيمة دار نفس الشي باه متتنشعش وراح)
فطاولة عايلة كامل
مريحين كلهم على الطاولة وكل واحد غير يقلب فصحنو ويتفرج فيه
سمير مهبط راسو وياكل ومشاف مع حتى واحد منهم وعصماء وايلين وجان يشوفو لسيليا اللي عينيها مغرغرين غايضتها كيفاه متجاهلها وكأنو مهيش موجودة أبدا
بسيف نطق
سمير:عصماء هاتي الخبز
حكمت سيليا سلة الخبز وفوتتهالو مشافش فيها وعاود نطق
سمير:شحال من عصماء كاين هنا؟؟
جان:6
خنزر فيه سمير وشاف فعصماء:مكانش خبز؟؟
خبطت السلة تاع الخبز ووقفت دموعها هابطين على وجهها
سيليا:علاه كي غلطت نتا لامن حاسبك ولامك؟؟....علاه كي نتا كنت السبة فكلشي مهدرتش معاك ولا كلمة زايدة ولا شكيت مالقري جوزت الجحيم مي قلت عادي المهم رجعلي..علاه ديما تمشيو بقانون حلال عليا حرام عليك؟علاه في الوقت اللي كنت نخمم فيكم واحد واحد لامن فاقلي وخفف عليا النيران اللي لاهبة وسطي من خوفي عليكم ..علاه كي رحت مقريتوش ما بين الأسطر ولا حتى حاولت تسمعني.؟؟..علاه حكمت عليا ولمتني وحاسبتني حساب خاطيني ..غللطت اييه غلطت ياديني مي مكانش فينا اللي ميغلطش..يازح حتى المحكوم عليه بالاعدام يعطوه فرصة يبين جزئو من لحكاية ويحاول يثبت براءتو مي نتا....(فوتت يدها على وجها مسحت دموعها ورجعو خدودها حمر)مالقري كامل وش عشت وتوجعت مي تناسيت وفت غير باه ترتاح يشهد عليا جان باللي كنت خايفة عليك تعرفني بنتك وتقلق بيسك نتا هربت مني ومن امي وكان عندي حق ..ههه اصلا انا بنت المرا اللي نتا كرهتها وجامي عطيتها قيمتها وهي بعد سنين بعثتلك بديلتها اللي تربطك كان عندي حق كي قررت نخبي عليك...ربي يشهد عليا باللي خممت فيكم كلكم وفي حياتكم ومستقبلكم وخدمتكم وكلشيييي كلشييي خممت فيه وحدي وخليتكم نتوما على راحتكم ومنيش نادمة...منش نادمة بيسك راحتكم تهمني ...مي مش على حساب راحتي انا ماشي اللي يجي يضحي بسيليا خلاص (شافت فيه يشوف فيها وعينيه مدمعين رققت صوتها ونبرة البكا غلبتها)جامي هزيت فقلبي من جيهتك حتى بعدا سمعت لحكاية وعرفت باللي نتا سبب معاناة يما والشي اللي فوتو مع مجيد وقلت معليش ربي كتب يحطلو غمامة في تخمامو باه غلط فهاديك المدة والحكمة راح تجي وتغاضيت مي صاايي صااااييي(زيرت على قلبها بتعب ودموعها قواو)راني عيييت عيييت كل منقول تحلت من جيهة تتعقد كثر رجعت لدزاير على اساس مع ايلين يامات ونرجعو للندن ونرجع لروتيني الوحدة من الخدمة للدار وصاي مي نوو عرفت بلينار قبلهم كامل وبقيت نخمم كيفاه نحميهم مدامهم فالريسك وقلت معليش وفي نفس النهار وانا في اشد حالات انهياري عرفت باللي نتا بابا كي خليت اوراق دوصيي موت يما في يدي وقريتهم وحدي وسط لوتال فالظلام وبكيت لثم وحدي واكتأبت وحدي 3ايام هنا فالدار ولامن درا بيا وقلت معليش كنا في رحلة نبوجيو رجعنا منها وانا قلبي ياكل فيا لا ينتن خويا ولا اب بنت ختي فالحبس وفاتت وقلت الحمد الله عرفت ايلين ببنتها وقتها وقلت السراء والضراء ديما متقابلين هانا من مشكلة عرفت ايلين بلينار وزاادت حكاية المطاردة قلبي تفتت وانا نشوف فجماعة ورا ختي وبنتها بالسلاح اللي تربيت عمري كامل رافدتو مي نخاف منو وعلاابالي باللي اذا فات وضرب ضربتو اللي تقاس ميرجعش وفاتت بعدو عرفت باللي الرقم اللي وصلني منو ميساج تابع للبوص وهو اللي ورا ايلين فواالاا كابوس حياتي ورا ختي قريب نموت من خلعتي وليت غير نخطط نوصل ليه ونقتلو ونتهناو كامل ووقتها قريب خسرت الانسان الوحيد اللي حبني بلا حساب وبلا قوانين جامي حاسبني على اغلاطي و عمايلي ولا شكك فكلامي وديما كان السند ليا وقتها ملقيت روحي غير نمدلو حياتي وانا راضية وصلت للموت ورجعت منها على انامل الشيطان يتساراو على وجهي اييه مارك جا للسبيطار وهو اول وجه شفتو بعدما حسيت روحي ريحت وزاد عليا ووقتها هددني بيكم فالوقت اللي كنت نخمم فيكم و نبكي من خوفي عليكم وهو يهدد لامن دخل وشاف حالي ولا دافع عليا من غير مازن اللي كي سمع مارك بيه جاي هرب هو اللي هداني وضحكني كي عادتو وملامنيش ومسألنيش وشبيا اكتفا برك يهديني وتفهم باللي منقدرش نقولو صحا فاتت نزييد...كي عرفت باللي نتا بابا زدت عملت نفس الشي وتجاهلتني نتا ديما تفضل الهروب من انو تواجه الحقيقة وقلت معليييش مبعد قلت حياتنا تصلحت الحمد الله جايتنا افراح واعراس مي لا الفرحة مكملتش وظهر القائد من خدمة مازن وباللي كاين شكون هددو بيا وسكت علاجالي وكان ماكل روحو بالتخمام باه يخرجني بريئة وقتها شفت باللي لازم انا ثاني نوقف معاه علاجال روحي قبلت وقررت نروح مع مارك كيما طلب سينو كان ناوي يحرق بيكم الصالة كلها وزدت قريب خسرت الانسان الوحيد بعد ايلين اللي ضحى علاجالي قريب خسرتو والسلاح فيدي وانا رميت عليه شكون كان معايا وواساني في كل هاد الشي؟؟...مكمش ملاحظين باللي يديما نبلع الهم ليا ونخمم فالكل مي انا اول واحد يتلام؟؟ شكون فاق وش جوزت ولا قال سيليا اللي فات عليها مش ساهل نعذروها هاد المرة لالا نتوما ديما تعاتبو...علاه؟؟..بيسك نتوم مكانش اللي يعاتبكم ويحاسبكم فتصرفاتكم (مسحت دموعها ونفضتهم من يدها تتبسم):منيش نادمة وراضية وفخورة بروحي بيسك درت كلشي من حبي ليكم وكنت نتغاضا على اغلاطكم بيسك نحبكم من قلبي عكسكم بيسك كي نتوما متلمتوش نسيتو باللي غلطتو....هادي هي سيليا وهادي هي عقليتها وهدا هو تخمامها رضيتو بيها اللهم بارك مرضيتوش عادي معتادة الرفض والوحدة ومراحش نتصدم بيسك والفت
سمير تبسم حاكم دموعو مزال مهبط راسو مع الطابلة:قررتي تتخلاي علينا كي عاد ولد عمراني طايح فيك؟؟
حست قلبها تقسم هدا وش فهم من كلامها كاااامل؟؟؟؟
تبسمت ببرود:علابالي باللي الحب ميدومش مي انا متخليتش عليكم انا قلت قررو يا تقبلوني يا ترفضوني..ميي..يظهرلي نتا بينت جوابك...مش هادي اول مرة تتخلا فيها عليا نتا تخليت عليا قبل منجي للدنيا اصلا
جان:بابا نوض لبنتك وش راكم تخلطو نتوما الزوج وشمن تخلي ومعرف واش وشبيكم هبلتو مع الليل (وقف لسيليا حكمها من ذراعها):وين تروحي نتي هادي دارك وعايلتك مستحيل نخليوك تروحي من بيناتنا ....بركاي ما كل مرة تخيري تتخلاي علينا
سيليا (حطت يدها على يدو تسيي تبعدها):انا والفت اني نتخلا بيسك جامي ديت وش كنت حابة وليت انا نتخلا قبل ميُتخلى عليا
ايلين حكمتها من يدها الثانية ولينار تبكي وحاكمة فيها من رجلها
لينار:تروحيش يا سيليا عييشك ياخي قلتيلي منزيدش نخليك اقعدي هنا سيليا صاحبتي
ايلين:مستحيل نخليك تكوني وحدك سامحيني بيسك مفقتش ومقدرتش نعاونك فاللي فات مي منقدرش نتخلا عليك نتي تعنيلي كثرمن حياتي اصلا حياتي والو بلا بيك كيفاه تخممي باللي نقدر نعيش بلابيك يا طفلة ارزاني
سيليا زيرت عليها تبكي:نتي ختي لكبيرة ويما و كلشي نتي الأمل اللي خرجني من الظلام مي انا غرقتك فيه كثر سامحيني مي راحتكم في بعدي عليكم منبقاش كل مرة نكسرلكم فراسكم بمشاكلي
ايلين صقلتها لراسها بالشوي:بلعيي..شكون قالك تكسريلي راسي يا بهلولة اصلا هبالك وتشيطينك هوما حلاوة حياتي و نهاري ناقص بلا بيهم
عصماء وقفت ليها:سيليا رجاءا متروحيش يابنتي هادي دارك نتي وهدا باباك (نوضت سمير):سميير قول شي لبنتك علاه ساكت؟؟؟
سمير:ملقيييتش وش نقوول...ملقيييتش وش نهدر راني نشوف فروحي زييييرو منسوا والو كيفاه انا نديرها قد راسي ومبعد وشمن وجه نقابل بيه ونحكي بيه راني حشماان ايييه حشمان منيش قادر نشوف فبنتي اللي كانت تلوم فيا ونطلب منها السماح على استهتاري وتدميري حياتها ولومها وكوني ديما غالط معاها مقدررررتش
شاف فيهم للثلاثة قارنين روسهم لبعض ويشوفو فيه(ايلين/سيليا/جان):كلمتي الوحيدة سامحوني وراني حشمان
تمصلت من بينهم وقربت ليه حظنتو تشهق
سيليا:منيش هازة عليك والو في قلبي والله مي انا ثاني انسان نتعب ونكره من اللوم وانا بريئة وطبيعتي اصلا نكره نتحط فموقف الملام وانا نخمم فالكل بيسك صراتلي شحال من مرة ديما نكون نخمم فيكم مي نتلام ونظهر غالطة قلتلكم حاسبوني مي متتخلاوش عليا مي الخيار الأول أصعب من الثاني لأنو اللوم والعتاب من عند المقربين يوجع كثر من التخلي بيسك التخلي راح يخليك تعيش غير فالذكريات المليحة ليك مع هداك الانسان مي اللوم يوجع ويحطم..خلاص عرفت غلطتي مي نتوما مغفرتوليش
سمير حظنها عندو يسلم على راسها:خلاص انا سامحتك يا بنتي سامحتك وتعيشي سامحيني على وش فات سامحينيي والسماح كلمة قليلة فحقك
سيليا:قتلك من قبل مسامحتك دنيا وآخرة وسامحوني كي كثرت هدرة مي راني تعمرت ومقدرتش نشد كثر
جان جبد ايلين عندو وهز لينار اللي كانت غير تبكي وحظنهم يسكت فيهم
سيليا بعدت على سمير وشافت فعصماء وفيهم كامل ونطقت:صايي..صفات القلوب؟؟
نطقو كامل مرة وحدة(جان سمير عصماء ايلين):من بكري صافية
حظنو بعضاهم كامل فعناق عائلي مستمتعين بلمتهم ضك ولا واحد فيهم هاز فقلبو من جهة الثاني رجعو كيما كانو من اول ايامات رجعت لمتهم
في دار صغيرة في حي قريب لحارة لنور واقفة فالتاقة وتشوف للقمر هو من زمان عشقها ديما تحب الليل والقمر لأنهم ديما يسمعوها وجامي تخاف وهي تحكيلهم همها بيسك علابالها مستحيل ينطقو و يكشفوها
تبسمت مخاطبة القمر في سماء هاد الليل الصافية
بشرى:ليوم خنت صداقتنا وحكيت لغيركم همي وتعبي....زعما يصون السر كيما نتوما تصونوه؟؟
هبطت راسها تتفكر كيفاه كان يشوف فيها وكلماتو اللي تحفرو في عقلها:هي سي فري معتادة نكره الناس والشباب خاصة مي هو غير..كان استثناء منهم..عينيه مكانوش يكذبو وكلماتو كانو صافيين ونابعين من القلب....(رجعت تشوف للقمر وتتبسم):على كل منيش نادمة بيسك ريحت كي حكيت واصلا عرف غير وش حبيتو انا يعرف متخافش بلاصتك ميديها حتى واحد يا قمر أسراري (تبسمت بتفائل وغلقت التاقة ومشات لسريرها شعلت فيوزها اللي عند راسها وهزت كتابها وقعدت تقرا بشرى معروفة خباشة وعندها حق لازمها تخبش وتزيد بقالها 3سنين وتتخرج وتولي طبيبة وتحقق حلمها في لبس المأزر الأبيض وانو تداوي الناس وتعاونهم واولهم القراب ليها
صباح جديد في دار عمراني مازن قاعد على سريرو وفتح عينيه بالشوي قابلتو قاعدة قدامو وتمسح على شعرو تبسم تبسيمة كبيرة وحكم يدها وباسها
مازن:صباحو اميرتي
سيليا:صباحو يا كسول..نوض راح الحال
مازن:همم خلينا نبقاو هنا وش نروحو نديرو برا
سيليا:هههه نخدمو هيا نووض
حكمها من يدها وجبدها قدامو متكسلة:انا نعرف خدمة شابة تصرا هنا برك نعلمك؟؟
"ااااااااااه"
عيط فرد عيطة على كاس الما اللي تكب فوقو
سليمة:نووض يا الخايب راقد وتحلم تقققعد
مازن ناض يسب تحت نيفو شوي ويطيح القدر لسليمة
مازن:جدة هكا الناس ينوضو ولادهم؟؟
سليمة تفتح فالتاقة :ايه يا وليدي بكري كانو ينوضو بصوت السردوك مي الوقت تبدل وتطور ولا كاس الما فعال كثر
مازن:همممممم
راحت قعدت قدامو وهو يحك فعشرو من الماء
سليمة:راح نسقسيك
مازن:ايه سقسي
سليمة:حاط عينك على وحدة؟؟
مازن:اااه؟؟..كيفاه؟
سليمة:قتلك عاجبتك كاش وحدة وحاب تتقدملها؟؟
مازن:ههه(زعما ضحك بحشمة):هااي باينة اجدة ني نستنا يفرج ربي وتحن قلوبكم وتخممو فيا وتقولولي هيا نقدمو
سليمة:هههه وشكون هاد الطفلة؟
مازن غاس يشوف فصورتها بين عينيه وحكا بهيام:سيليا..صحبة ايلين
سليمة فوتت يدها على خدو فطنتو من غيستو:بصح ياوليدي الطفلة من آخر عملة دارتها تبان مش سوية وزيد تربات فالخارج وين شفتها نتا وش عاشت ووين ومعامن؟؟
مازن:علابالي بكلشي ايما والطفلة عاشت ظروف قاسية وكي خرجت منهم بقات مع ايلين وباباها اللي كي غير عرفتو وانا طفل نعرف الطفلة واصلها من زوج كلمات وسيليا مختلفة ومهيش من النوع اللي يخلط انا واثق باللي ياتكون هي فحياتي يا متكون حتى وحدة
سليمة:وش فيها يعجب ياوليدي الطفلة زينة مي..
مازن:انا جامي خممت على اساس زينة والعين الزرقة كاين غير العين الزرقة وليلونتي يخليو اي طفلة تديرهم مي انا عجبتني سيليا بكونها "سيليا" برك عجبتني عقلية سيليا وتصرفات سيليا وحب سيليا واهتمام سيليا وبراءة سيليا ورقتها ..تعجبني تضحيتها ديما علاجال حبابها بيسك كي تحب تحب بلا قيود وشروط وبلاما تدي ضمان او تعويض لحبها سيليا تحب من قلبها لا علاجال شي ...سيليا بالمختصر كتلة براءة وقوة وعلابالي باللي هي المرا اللي مرة اخرا كي نسافر ونخليها وسط داري تربيلي ولادي راح نكون متأكد 100بال100باللي مستحيل تخون ثقتي بيسك هي عندها كلشي من غير تكذب اذا قالتلك نحبك فهي تحبك واذا محبتكش راح تقولها فوجهك بيسك معندهاش مع الحشمة والنفاق ...تعجبني سيليا ضمن الكل لأنو هي استثناء كل القوانين عن الأنثى هي ديما تخرجلك من الجنب بعقلية جديدة وتصرفات وكلمات متقدريش تفوتيهم بلاما يتحفرو فبالك
سليمة:هههه جامي توقعت يجي نهار نتقابلو هكا وتحكيلي وتشعر على طفلة مالقري كنت تظل تريع نجيب المرا وولادي و معرف واش اما حاليا راني نشوف فيك تحكي من قلبك ...مالا وش رايك نروحو نخطبولك ونديرو العرس مع عرس ايلين وماهر
مازن:هههه فكرة شابة مي راني موجد بلون فراسي حاب كلشي بيناتنا يكون مميز خلي عرس ماهر وايلين يفوت وساهلة من وراه نتهلا فيها ونقوم عرسي واوموراتي كامل
سليمة:ههه مالا بالبراكة عليك قربو ليام اللي نشوف فيهم مرا تجر فيك من وذنيك
مازن:علاه تشوفي فيا حمار حتى تجرني من وذنيا باينة راح نكونو زوج وزوجة متفاهمين وكلشي بنياتنا راكح ياجدة
سليمة:هههههه كي تفوت وتجيب منها طفل ولا طفلة وتشوف وزيد الطفلة هاديك تبان فليفلة
مازن:هههه ايه مش غير فليفلة مي حلوة دنيتي الغالية
ضربتو لكتفو:خلااص احشم يا ولد ربيتك عمرك كامل جامي قتلي دنيتي وغالية باابابا
مازن تلاح باس راسها:ههههه نتي العمر ازين الحب حبك تعجز الكلمات عن وصفه,كل واحد وبلاصتو احبي متخلطيش
سليمة:هيه احشيلي برك نتوما ولاد هاد الجيل تعرفو غير التبلعيط
مازن:هههههه خصارة عليك سلومتي انا ديما نقول الصح
.....
بنات وش رايكم فعلاقة داني وبيشو زعما تكمل؟
ووش رايكم فتصرف سيليا عندها حق ولا نو؟