وئام العشق

البارت واحد والأربعون

#وئام_العشق

بقلمي الكاتبة : هبه الساعدي ✍🏼

الــتــعــب

عاشر گلايدنه وصفت صفره

النهر ضيگ ومامش حيل ونعبره !!

شــبـعــد ونعاشر التابوت مو متنه الف مره

°°°°°°°°°°°°°°°°°°°°°°

الدكتوره : الحمدلله على سلامتها
بس الطفل شويه تعبان اخذنا بالحاضنة شويه ويطلعوا ينطو لكم والمريضة هسه راح يطلعوها

ام ادهم : تسلمين عيوني دكتوره رحمه الله والديج

الدكتوره : لا ادللي خاله واجبي هذا

_ راحت الدكتوره شويه وطلعوها وجها ذبلانه
وعاگد حواجبها من الم وتون بكلام ما مفهوم
اخذوها للغرفه واحنه وياها هدأت شويه
ورجعت تحجي بدون ما تدري من ورا تأثير التخدير

زينب : اخ بطني يمه

وكفت يمها لزمت ايدها وعيوني على ملامحها تعبانه گلت بهدوء "

سراج : شبيها

زينب : كله من ورا الدكتوره ******

بعدت عنها گوه كاتم ضحكتي ولد ضحكوا بصوت عالي
صاحت امها علينه "

ام ادهم : واكفين تتمضحكون سدو حلگهه  لا تفضحنا

رجعت صاحت بصوت واهن وتجر بالكلمه "

زينب : اخخ ...خخ عو ...فوني يمه بطني الحگيلي 

وكفت يم راسها باستها وگالت "

ام ادهم : عيون امج هسه ينطوج مسكن

سكتت ما حجت شي وامي وكفت عدلت عبايتها وگالت "

ام صكر : امشو واحد منكم وياي نشوف الطفل يلا بساع احسن ما گاعدين

ابراهيم : جيت وياج خاله امشي

سراج : جيبو ابني وياكم لا تتأخرون ههههههه

التفت عليه قبل ما يطلع وگال "

ابراهيم : اي ليش لا هو انت شكول تصير اب انت طليان ما انطيك تسرح بيهن اخاف عليهن هههههههه

سراج : والله لو مو گاعدين بالمستشفى جان عرفت شتصرف وياك امشي يلا

زينب : فتحت عيوني احسهم ثگال ومغوشات
وألم بطني يذبح احس مثل سجاجين بيها
دخلت الممرضة انطوني ابرة مسكن وطلعت
غمضت عيوني بألم
شويه ونفتح الباب دخلت خالتي مبتسمه وشايله طفل بين ايديها
وصلت يمي خلته بحضني وگالت ...

ام صكر : بالمبارك يمه يتربى بعزكم

حسيت بأحساس كلش حلو اول مرا احس بيه
عيوني تتجول على ملامح وجه البريئه ونايم
بسرعه دموعي نزلن واتحسس ملامحه بأصبعي وبوس بديناته الناعمه مثل القطن .. وهمست بحب وحنان "

زينب : امي حبيبي فدوه اروحلك حبيب ماما يمه فدوه اروح لريحتك

رفعته لوجهي شميته بقوه رفعت نظري لــ سراج صافن علينه وعيونه تلمع بدموع الفرح ابتسمت وگتله "

- صرت بابا

هز راسه بـ اي ضحك وگال "

سراج : اي مع الاسف كبرنا

_ ندكت الباب فتحه ابراهيم
دخلوا الولد وعمي وسجى والابتسامه مرسومه على ملامحهم
تحمدولي بالسلامه وعمي شال طفل باسه من راسه
بقوا يسولفون لحد سألت خالتي ...

ام صكر : شنو راح تسمونه ؟

اخذه من حضني شاله بين ايديه ابتسم وگال "

سراج : اني ناذر اسمي عباس
على اسم الامام العباس عليه السلام
لان ما قصر ويانا

ابتسمت من اختار الاسم على اسم مولاي ابو فضل وتذكرت من گال 
اخذني صاحبي لكربلاء وطلبتج منه
رجعت من ذاكرتي على صوتهم كلهم يگولون له

- عاشت الاسامي

ابراهيم : يتربى بعزكم ودلالكم ابو عبوسي

ضحك بصوت ورجع عبوسي يمي
باوعله ضرغام مستغرب من ضحكته وسأله "

ضرغام : ليش تضحك

سراج : اسم غريب ابو عباس كبرنا
وصاروا يصيحون لنا ابو فلان والله وكت

ابو سراج : جعله من صالحين وبارين بيكم

- امين يارب

ابو صكر : زيارة المريض قصيره

گام من القنفه وكمل كلامه " يلا يابه ام صكر ترحين

ام صكر : محتاجين شي تردون ابقى وياكم حبايب ؟ 

ام ادهم : لا عيوني اخذي راحتج
اختها راح تجي ومرة اخوها واني ورجلها واخوانها كلهم موجودين انتي هم تعبتي روحي ارتاحي

ام صكر : شنو تحتاجون بس اتصلو

ابو صكر : سراج تعال بويه

سراج : اي جيت

سلموا وطلعوا من الغرفة طلعت وياهم
وكفت بصف ابوي "

- ها بويه گول

ابو صكر : بويه حول مسواك وذبيحه لــ سيارتك اخذهن لبيت اهلها
وعيب يگولون عايفينها ورايحين انا وامك كل ٣ ايام نجي

مد ايده بجيب دشداشته طلع فلوس حطهم بأيدي وگال "
-  هاك هذني خليهن بجيبك خاف تحتاج
واذا احتاجيت بعد گول اجيبلك وياي من اجي نوبه

بست راسه وگتله " تسلم حجي رحمة الله على والديك عندي والله
بس ما راح اردك ربي جعلك سالم من كل شي

ابو صكر : الله يسلمك وليدي شوكت تطلعها

سراج : الظهر اطلعها

ابو صكر : بالسلامه

_ طلعت ويا اهلي بره مستشفى اخذت مسواك لسيارتي
ودعتهم وراحوا
رجعت دخلت يمهم بقينا لظهر وطلعنا على مسؤوليتنا

زينب : طلعنا لبيت اهلي واستقبلوني بكل فرح
ومداريني مثل مي بالصينيه كل شي احتاجه يجي يمي
وما يخلوني اتحرك شبر واحد

_ مشت الايام كل اهتمامي وتركيزي على طفلي
استولى على حياتي من يبدأ يومي لحد ما يخلص اقضي ويا يسهرنا الليل وينام النهار مثل الملاك
ناعم حيل وابيض بس جمال عيونه يخليني اكمز من يفتحهم

_ بقيت يم اهلي لان صعبه عليه ما اگدر وحدي من ورا عمليه ورا عشرة ايام فتحت خياطات العمليه
امي ولبنات ما تركوني ابد
وسراج من يروح للدوام كل شويه متصل يطلب افتح  كامره يشوفه ويطمئن علينا ويغلقه
ومن يلگي فرصه يجي يشوفه ويروح ،
عيالي ما قصروا كل ما تصير لهم فرصه يجون يشوفونا

_ واخوتي كل ما يشوفوا يشبهوا بواحد منا وميته من ضحك عليهم ومن يشلوه بحذر يخافون لا يوگع منهم
قبل ما تطلع الاربعين بيوم اتصل عليه سراج وهو بالدوام بعد سلمت عليه وگال ...

- تحضري نرجع للأنبار كافي صارلج اربعين يوم
لازم نرجع لبيتنا نشوف شبي ما بي

- ماشي راح احضر اغراضي

- تمام عيوني لازم اروح

- اخذ راحتك حبيبي

_  غلقته منه ونمت
فزيت على صوت عبوسي يبجي وامي يمه
بقينا سهرانين ونام ويا نومته
گعدنا الصبح تريكنا ، وامي سبحت عبوسي لان اربعينه طلعت
وغسلت كل الملابس لان عادتنا بالأربعين نغسل
ونغسل كل الملابس لبسهن الطفل والام
ونذبح ضحيه للطفل 

_ وابوي من فرحته بعبوسي سوه عشه وعازم اقاربنا كلها
البيت صار هوسه من صوت والحركه
بقيت حايره بعبوسي بس يبجي اختنك ووجهه مو طبيعي صار على ازرك ما اعرف شنو سبب
ارتعبت من حالته خفت عليه

_ ترخصت منهم صعدت لغرفة ادهم فتحت تبريد
وبقيت اهز بيه احاول نومه ارتاح شويه ونام
خليته على سرير ضليت مكابلته خايفه عليه وعيوني تتجول على ملامحه هادئه

_ بقيت لحد ما راحوا اخذته ونزلت جوا خليته يم امي وكملت تجهيز اغراضي
راح عن بالي حالته صارت وجهه من صار ازرك
كملت كل شي اخذته من امي رضعته ونمت

_ گعدت على صوت منبه غلقته بسرعة قبل ما يفز عباس
گمت سبحت وحضرت نفسي ، رجعت لعبوسي بدلت اله وعطرته
اخذته وطلعت صبحت على اهلي تريكت وياهم
شويه واجه سراج سلمنا عليهم وطلعنا
واهلي كل ضاجوا تعودوا علينه

_ طريق كله عبوسي بحضني كل شويه يلعبه سراج بأيده لو ارضعه لحد ما وصلنا لبيتنا كله تراب وصخ لان كل هل  فتره مقفول

سراج : اخذي يم امي ونظفي مو زين عليه لبيت كله تراب

زينب : ماشي شيل جنطته واني اشيله وامشي نودي 

_ طلعنا لبيت عيالي سلمنه عليهم وكيفو بــ عبوسي كأن اول حفيد لهم بقوا بس يبوسون بيه ومن حضن لحضن
وهو يخبل  دنفوش وبياضه قطن يخلي الگلب يرفرف عليه من جماله

زينب : خاله خلي عبوسي عندج
بين ما انظف لبيت لان كله تراب 

ام صكر : خلي يمه وروحي كملي شغلج وشوكت ما تكملين تعالي اخذي

_ تشكرت منها ورجعت للبيت
اول ما دخلت بديت انظف واشتغل بي
رفعت راسي باوعت على مكان حوالي حسيت احساس غريب
ومن دخلت للبيت كأن بيت مهجور ما بيه ناس
تغلغل الخوف بداخلي ورجفه سرت بجسمي
استغفرت ربي وگلت بداخلي
لان ما منظف هسه انظفه ويرجع مثل قبل

_ نظفته كله وطلعت للطارمه غسلتها وسقيت زرعات
دخلت جوا حسيت مثل الخيال خطف گدامي
رجعت لورا بخوف خليت ايدي على گلبي ارجف
اتعوذت من شيطان گعدت على قنفه من الهبطه

اجه سراج يمشي سريع وشايل عباس جان بيت اهله
وگفت حاولت ما بين بيه شي وريگي يابس
اخذته منه ودخل للغرفه وصاح

سراج : دحكي عندي طلعه بين ما اروح يم الولد كويلي الدشداشة بساع وحضريها اليه

زينب : ماشي ثواني ويكونون جاهزات

_ صليت على محمد ودخلت للغرفه خليت عبوسي على سرير يمي
رحت فتحت ميز الكوي طلعت دشداشة من كنتور وكويتها بسرعة
اول ما خلصتها دخل مستعجل كشخ وتعطر وطلع ما اعرف وين
التهيت طفلي بدلتله وشربته حليب ونام
خليته بكاروكه ورحت توضيت وصليت لميت سجادة صلاة
وتمددت على سرير ونمت ويا من تعب وهبطة البيت خلت كل جسمي يرجف

_ مرت الايام حياتي هدوء بين اهتمامي بطفلي والبيت
ورجع سراج للدوام وخالتي خطيه ما تعوفني لوحدي تجي يمي خاف احتاج شي

_ هل ايام وضع عباس ما عاجبني الاحظ عليه يختنك من يشرب حليب بالرغم اشربه علي كيفي ومن يبجي بسرعة يصير ازوك ويسكر
ايدي يصيرون يرجفون ابقى اهز بيه وانفخ بوجه يلا يسكت وشفايفه دائما لونهن ابيض لو زرك
ومن اگول لهم على حالته يردون عليه انتي توهوسين زايد

_ الى ان بيوم صادف سراج نازل من دوامه
خليته يمه ودخلت للمطبخ اسويله اكل
دقايق سمعت صوته سراج يصيح
شمرت بأيدي وطلعت اركض مفزوعه على صوته
شفته شايل عباس وصاير ازرك
جمدت بمكاني وايدي على صدري لحد ما عاط بيه اروح اغير ملابسي ناخذه للدكتور
ومثل مخبل يركض منا ويرجع منا يحاول يسكته

_ دخلت للغرفة ودمعتي بطرف عيني ادعي بداخلي ما بيه شي
لبست عبايه وطلعنا نركض بيه صعدنا بالسيارة وسراج يسوق سريع
اباوع عليه وهو بحضني وجهه بعده ازرك وخانس ضميته لصدري واناجي ربي يطلع ما بيه شي
وصلنا للدكتور انتظرنا شويه ودخلنا طلب تحاليل وفحوصات

_ سوينه له كل شي وهو هادئ ما يتحرك رجعنا للدكتور
انطينا فحوصات بقى يگلب بيهن ويدقق واحنه عيونه تتجول عليه شويه رفع نظره علينه وصفن بوجهنه وگال

الدكتور : بنتي معقوله ما انتبهتي عليه ما حسيتي

زينب : دكتور من زمان لاحظت بس كل ما اگول لهم يگولون انتي بالج يمه توهوسين والطفل ما بي شي

سراج : دكتور بي شي ؟

نزع نظارته خلاها على ميز واحنه نترقب كلامه على نار اخذ نفس وگال " عنده فتحه رباعيه بالقلب وهذا كلش خطر عليه

كلامه مثل صاعقة نزلت عليه ضربتني نهضت من مكاني ارجف دموعي صارت تسابق رجفت شفتي وصرت امتمت بالكلام گوه احجي واهز راسي بـرفض "

زينب : شش ... ششنو شتگول شنو فتحه رباعيه

الدكتور : اهدي بنتي اسمعيني زين طفلج حاليا مو مثل أي طفل عادي لا
لازم عنايه خاصه وما تخلي يبجي ولازم ما تخليي يتعب
لحد ما يصير عمره ٦ اشهر يلا نگدر نسوي تحاليل ونحوله عمليه
لحد هذاك الوقت تستمرين على ادويه
وعلى شغلات نبهتج عليه تبتعدن بلشي وكلي اكلات صحيه وخضروات هرسيهن وانطي له
وللعملية والله كريم ما بي غير العافيه

رفعت راسي اباوع على سراج ودموعي حاره على خدي طغى حزن والكسره على ملامحه هز راسه بتفهم ورد عليه

سراج : شكرا دكتور

_ اخذني سراج وطلعنا حاضنته لصدري بوسط صدمتي وكسرتي صعدني بالسياره واني بلا شعور ما احس بأي شي حولي
تركني وراح يجيب العلاج شويه ورجع بأيده علاگة العلاج
شغل سيارة وطلعنا خلصنا الطريق كله اثنينه ساكتين  جان السكًوت سيد المكان

°°°°°°°°°°°°°°°°°°°°°°°
قراءة ممتعه وان شاء الله يعجبكم البارت 🧡

اسفه على التأخير وان شاء الله يعجبكم واعوضكم على بارت قادم

💌 لتنسون التصويت ⭐ وتعليقات حلوه من ايديكم 💕

يوزر الانستا / heba_alsaadi04

#هبه_الساعدي

دمتم سالمين 🌸