#وئام_العشق
بقلمي الكاتبة : هبه الساعدي ✍🏼
يَا أَكْثَر النّاسِ بُعدًا عَن مَكَانِي
وأَقرَبَهم من دُعَائِي و من فُؤَادي
°°°°°°°°°°°°°°°°°°°°°°°°
_ ثاني يوم الصبح استلمنا التحاليل
ولازم اراجع دكتور اختصاص حتى يتابع حالتي
جهزت نفسي سندني ابراهيم وطلعنا من المستشفى
_ نزلنا بيت اهلي ما قبلوا اروح لبيت عيالي
گالو بعدج تعبانه وبيت اهل سراج هوسه وجهال
_ ضليت يم اهلي مداريني مثل الطفل
والاكل يجيبوه گدامي الحمدلله صرت احسن من قبل
وكل تفكيري يم سراج بالرغم كل شويه يتصل عليه
_ كملنا الغدى ونقلت السفرة ويا اميره بقيت گاعدة يمها نسولف
شويه ودخلت امي انطتني تلفوني سراج يتصل
اخذته مو ايدها صعدت لغرفتي
فتحت المكالمه جاوبته بهدوء "
- الووو حبيبي
- هلا يبعد العافيه
شلون صرتي؟
- الحمدلله احسن
انت شلون صرت؟
- من سمعت صوتج ردتلي عافيتي
ابتسمت على كلامه شجعت نفسي همست بحب وعيوني تلمع "
- تدري صورتك محفوره بجفوني وتنور طريقي
- وتدرين انتي ملكة گلبي ومتربعه بيه
_ خجلت من كلامه وضحكت بقينا نسولف اكثر من ساعة بعدها غلقت مكالمه ونزلت جوا
بقيت ٣ ايام بيت اهلي وراها رجعت لبيت عيالي صرت احسن
وهم ادير بالي على سراج
_ مرت الايام حياتي الحمدلله طبيعيه
التهيت بين دراستي واهتمامي بسراج وخوفي عليه
بدأ الدوام هملت نفسي خلصت ايام بين الدوام وامتحانات وسراج
_ كل وقتي بالغرفه ادرس واهلي قليل اروح لهم
والبنات خطيه ما يقبلن اساعدهن دائما يگولن اهتمي برجلج ودراستج
قربت امتحانات نصف السنه عبالك قرب موتي كل وقتي متوتره وعلى اعصابي دمعه بطرف عيني
ما اريد اي احد يحجي وياي لان انفجر بالبجي
_ احس بدوخه دائما تصير عندي
مرات نفسي تلعب بس ما اهتميت للموضوع
وگلت اخلص واروح اسوي فحوصات
_ مرت ايام الامتحانات اعصابي تلفت احس روحي خلصت يلا كملت
وخطيه سراج مرات يبقى سهران وياي
يشجعني بكلامه انتي بطله ... انتي شاطرة ... انتي گدها لا تخافين
والغرفه عبالك مقلع كتب واوراق
_ رجعت لحياتي طبيعيه بعيدا عن توتر الامتحانات
بقى الخوف من نتيجه بعد
واليوم اجت ميار لأهلي طلبت من سراج ياخذني
حضرت نفسي باوعت بالمرايه وجهي شاحب دائما احس بخمول ما هتميت رتبت وجهي رحنه
_ وصلت للبيت وهوسة جهال يلعبون بالحوش
دخلت جوا سلمت عليهم وتربعت يمهن وهن يباوعلي مستغربات
ميار : زوزه ليش وجهج هيج مصفر وذبلانه
زينب : تعرفين سادس وامتحانات ودروس وما الحك اكل واصلا نفسي تلعب صار فتره وادوخ هوايه
اميره : اي وبعد شنو تحسين
تنهدت بضيق وتعب "
زينب : ما ادري مرات احس روحي مخنوكه بس اريد ابجي
وصايره اموت من ريحة الأكل يمكن بيه فقر دم لان من يصير عندي فقر دم هيج يصير بيه
بس كملت كلامي التفتت ميار على اميره وگالت "
ميار : ترحين ويانا اميره لو لا ؟
اميره : طبعا اروح
باوعتلهن مستغربه وهن من كلامهن مبينات شكن بشي "
زينب : وين تروحن ؟
گامت من مكانها وگالت بحماس وهي تمشي "
ميار : ناخذج نسويلج تحليل گومي بساع خابري رجلج گوليله
راح اروح اسوي تحاليل ويا البنات گومي لا تضلين جرين بروحج
زينب : ماشي ثواني انتظروني
_ راحت هي واميره يركضن يحضرن نفسهن
طلعت تلفوني من جنطه اتصلت على سراج بلغته قبل اروح لان حتى هو منتبه وضعي مو تمام
_ خلصن وطلعنا نتمشى لان المختبر كلش قريب علينه دخلنا طلبت تحليل دم
سحبوا مني وگالو انتظروا نص ساعة ويطلع تحليل
طلعنا فترينه بالمحلات القريبه
اخذنا كم شغله خلصت نص ساعة
رجعنا للمختبر استلم التحاليل
ابتسمت ام المختبر بوجهي وگالت "
- مبروك انتي حامل
ولأفضل تراجعين دكتوره لان عندج فقر دم
باوعتله بصدمه گمت امتمت بالكلام حتى ما اعرف شحجيت "
زينب : شنو حامل متأكده انتي شتگولين
استغربت من ردت فعلي باوعتلي بتساؤل وگالت "
- ليش كم طفل عندج ؟
سحبتني ميار وگالت لها "
ميار : ما عدها بس متفاجأه شكرا
_ اخذت تحليل منها باركولي بقيت بس اهز براسي
رجعنا للبيت طول طريق افكر
هسه اني حامل راح اصير ام
زين ودراستي والسادس شلون
حسيت بشعور كلش حلو واني اتخيل اشيل طفلي بين ايدي وراح اصير ام
_ اول ما دخلنا للبيت طگتها ميار بهلهوله وتكمز من الفرح صاحت على امي
ميار : كللللللوووووش يمه لبشاره جايج احفاد بالطريق
ضربتها بكتفها بالشقه واضحك على كلامها ما عدها تفاهم تنطيها بالوجه "
زينب : حفيد مو احفاد تشتغلين كله بالجمع
طلعت امي من المطبخ مستغربه من هلاهل ميار وكفت گدامنا وگالت "
ام ادهم : شنو منو حامل ؟
ردت عليها اميره وهي هم طايره من الفرح "
اميره : مرة سراج خاله
تفاجأت بالخبر حضنتي بقوه وتبوس بيه وفرحه تلمع بعيونها وتصلي على محمد وگالت "
ام ادهم : يمه صدقه لوجهج راح تصير ام اللهم صلي على محمد وال محمد
سراج يعرف بيج طلعتي حامل لو لا ؟
زينب : لا ما لحكت اخابره
ام ادهم : اروح افرح نسيبي اميره جيبي تلفوني اخابره للولد افرحه
اميره : حاضر عمه
ميار : يمه فتحي مايك خلي نسمع ردت فعله
_ راحت اميره لغرفة امي جابت تلفونها واجت انطته الها واحنه ملتمين على راسها اتصلت عليه بسرعة جاوبها
سراج : الوو عمه
ام ادهم : هلا يمه
سراج : هلا بيج يمه
ام ادهم : يمه لك بشاره يمي
سراج : يا الله گولي عمه
ام ادهم : زنوبه حامل راح تصير اب يمه
رد عليها متفاجئ گام يمتمت بكلامه وفرحه وضحت بصوته "
سراج : تشاقين عمه مو ؟
ام ادهم : لا والله صدك وتحليل هذا تعال شوفه
سراج : جايكم جايكم
غلقت المكالمه امي واني گعدت ميته ضحك عليه "
زينب : هههههههه يمه ردت فعله تضحك لمفروض نشوفه صوت وصوره
ميار : دنجبي وعقلي منا وهيج ماكو تكمز وحركات مال زعاطيط ما يصير هجعي وگعدي
اميره : اي صح حجي ميار دفراتج وجلاليق
وحركات لولد بطليهن راح تصيرين ام مسؤوله عن اطفال وعائله
واكفات فوك راسي ويحجن عليه تذكرت الولادة گمزت من مكاني وهن صافنات عليه باوعت لأمي وصحت "
زينب : عزاااااا يمه شلون راح اجيب
ضربتني على راسي بخفه رجعتني لمكاني "
ميار : تفضلي يمه تفعل الثول عدها
ام ادهم : يمه وينج وين الولاده بعدج بسم الله
عدي هذن لأشهر راح يجن مال وحام ونساوه
وبعدين فكري بالولاده
زينب : هم صدك بس اني مداتخيل روحي ام ومسوؤليات وكذا
ميار : اسكتي رحمه لربج اسكتي
گمزت من مكاني وعيوني تتنقل بيناتهن وصحت "
زينب : اسكتو بديت اتوحم اشتهيت فد شي
اميره : بدت رحمة الله
ميار : اي بالله شنو
تربعت گدامهن اتخيل واسوي حركات بأيدي شلون اعصر ليمونه "
زينب : لبن وفوكا نومي حامض بحيث طعم الحامض اكثر من طعم لبن
اميره : خرب يومج اني هم اريد
هزت ايدها امي وتباوعلنه صفح "
ام ادهم : توحمن كلجن سوا گابلنهه وگعدن
_ بعدنا نسولف وتلفون احترك من الاتصالات
جاوبته امي طلع احمد فتحت مايك ونسمع صوته يحجي بفرح عبالك ما مصدك ...
احمد : يمه صدك هذا اثول يگول راح اصير اب
ام ادهم : يا اثول يمه ؟
احمد : سراج
ام ادهم : اي يمه صدك
_ سدته منه بعدنا ما حاجين رجع دك تلفون طلع ابراهيم
سدته منه اتصل ادهم وراه ابوي يسألون
ضحكت على سراج طاش الخبر بكل مكان
ام ادهم : اني اگول شلون سراج متحمل زينب ثاري هم خبل مثلج
ميار : ابو المثل يگول دهده الجدر ولگه غطاء وهم نفس الشي
اميره : انتظروا انتظروا منا لنص ساعه يجي اتصال من البيت الأبيض سراج موصل لهم خبر حمل زنوبه هههههههه
ضحكت على كلامهن گلت بدلع "
زينب : اي شبيكم ويا زوجي فرحان
وين يودي فرحته تلگو فقد هسه ههههههههههه
_ بقينه گاعدين وامي ولبنات ينصحون بيه
لا تسوين هذا ولا ذاك انتبهي من تمشين لا تكمزين
انتبهي لأكلج
اخر شي لزمت راسي دخت من كلامهن وعطت
زينب : بس كافييي دوختني
_ صار المغرب گعدت يمهن يحضرن بالعشه
بهل اثناء دخل احمد للمطبخ يهلهل ويكمز
احمد : كلللللوووش
خالي هااا هاا خالي اني ابن اختك وانخاني كبلك طايح تلكاني من صغري الشر رباني خالي ها ها خالي
بندت من الضحك على كلامه ومنظره يضحك لزمت بطني وصحت "
زينب : ههههههه ولكم بطني ونبي گامت توجعني
عدل وكفته لزم بطنه وقلد صوتي "
احمد : راح تبدأ سوالف نسوان عاد ولعيارات
صعد الطفل نزل الطفل غرك طفل طوف الطفل
بعد ما مكمل كلامه دخل ادهم وابراهيم گوه كاتم ضحكته "
ابراهيم : لك ادبسز عوفها نفسية الحوامل مهمه
احمد : غير تكعد راحه دكتورة عواطف
ادهم : اسمعي كوني صرت اب قبلكم واعرف بهل سوالف اسمعوا من ظهرج يوجعج يعني مو زين روحي نامي وعلكي رجليج بالبنكه
اميره : هاي النصيحه ابد لا تمشين بيها
ادهم صدك تحجي ترا هاي خبله تسويها
باوعلها صفح وگال "
ادهم : انتم مو مال نصيحه
ابراهيم : احتفظ بنصايحك لنفسك تفيدك بعدين
احمد رجع ظهره على كاونتر وكتف ايدي وگال بفخر "
- اني منتظر نسيبي احتفل ويا بهل مناسبه
والله اسويلكم عرس بدون عروس بس انتظروا وشوفوا
_ ضحكنا عليه لبنات رجعن يكملن العشه
ولولد دخلوا جوا گعدوا شويه ندك الباب حيل
عرفته سراج ضحكت بداخلي عليه
طلع ابراهيم فتح الباب
دخل سراج يحجي بصوت عالي والفرحه تلمع بعيونه حاير شيسوي "
- الف مبروك الكم ولنا وان شاء تكومون بالسلامه
هز ايده ابراهيم ويضحك عليه "
- انت نشخطت لو من صدك ضرب عندك واير
ترا فاهمين الموضوع غلط من تسمع مرتك حامل تزيد ثكل وعقل مو تستخفون هههههههه
سراج : والله كمت اخبط شاطي باطي اجيبها منا الزكها هنا
دخل جوا سلم على اهلي تلگاه احمد "
احمد : احتفل بيك اليوم اسمع اسمع
سراج : اخذ راحتك حبيبي
احمد : فرحانه يا يمه اليوم فرحانه
فرحانه الحبايب موش بس انه
_ طلعنا من المطبخ نضحك عليهم لگيتهم ملتمين يم امي ويهوسون
ابراهيم : تدرون هاي لمه صار هواي ما فرحانين هيج لذلك گومو شاركوا احمد اني بالنسبه اليه رايح اجيب صينيه واجي
ام ادهم : ما تجوزون انتم من صواني صار كم وحده تتلف من وراكم
احمد : يلا عود اني انطيج فلوسها
ام ادهم : ما تناوشوني النعال ارگعه بي
جيب فلوسها هسه يلا بسرعة
احمد : كلكم شهدوا عليه انطيها فلوس صينيه
_ تگابلو ابراهيم واحمد وادهم وسراج يهوسون ويا هرجو البيت هرج
اخر شي صاروا يقلدون علينه واحنه ميتين ضحك على حركاتهم
ابراهيم : تركوا هل سوالف اريد اسأل سؤال
سراج شنو بنفسك ولد لو بنت
سراج : بنت
ابراهيم : وانتي زوزه
زينب : ولد
ام ادهم : سؤال لكم اثنينكم ليش انت تريد بنيه وليش انتي تردين ولد
اسكتوا خلي اسمع
سراج : بالنسبه اليه لبنيه حنينه اكثر تصير حبيبة ابوها واذا ربيتها وتعبت عليها تسوى ابو الولد
ابو ادهم : وانتي
زينب : ولد لان عندي هواي اسباب
التفتت على سراج صارت عيني بعينه مرا يغمز
ومرا يرفعلي بحواجبه بمعنى جاوبي دنكت راسي اخذت نفس همست بصراحه "
- بابا تريد صراحه اني اغار يعني بس تصير عندي بنيه ابراهيم راح يحبها اكثر مني
وسراج راح يحبها اكثر مني
وانت تكوم تطلعها تشتري الها وتنساني واني ابد ما اريد بنات لهذا سبب
_ رفعت راسي على صوت ضحكهم
اباوع على ابوي گوه كاتم ضحكته
ابراهيم وسراج متمددين من الضحك ، احمد صافن عليه ويهز بأيده
ادهم مسح دموعه نزلوا من كثرة الضحك وصاح "
ادهم : لا هنا شكد جنت اگول مرتي بعقل طفله لا لا لا انتي عبرتي كل الحدود
الحمدلله مرتي كلش عاقله طلعت
_ من شفتهم هيج يضحكون ما ادري ليش تحسست من الموضوع وهو ما يستاهل نهضمت بدون سبب استغربت من نفسي ليش هيج تأثرت
برطمت بزعل خليت ايدي على وجهي كمت ابجي واشهك
صاحت امي عليهم ...
ام ادهم : بسكم عاد ولا حس اسمع
افتهموا منا وهيج عدنا بنيه صغيره وحامل
يعني صارت تتحسس من كل شي انتبهوا على كلامكم وتصرفاتكم
لان من كل شي تنقهر وتتعارك وتزعل ، وبأي لحظه تشتهي شغلات لازم تتوفر
احمد : واحنه شعلينه رجلها يبتلي بيها
هو يلبي طلباتها ، اني لحد يخابرني لا تبرطمين وتسوي حركات ابد
وخرت ايدي من وجهي دموعي على خدي وبعدني مبرطمه گتله "
زينب : منو خالنه حبيبنا دارينه حتى نجي ومن نكبر نركص بعرسك
اشر على عيونه وابتسم "
احمد : ادللي عيون لخالو
ابراهيم : ها شفت بكلمتين جابتك للطريق
وصار لك ساعه تزامط وتحجي اني واني تالي بكلمه ونص نخيت
احمد : مو اني خالو
ولخالو حبيب ولد اخته ولد اخو لا تسوون تفرقه بيني وبين ابن اختي
ام ادهم : هسه لــ يشوفكم تتعاركون مو يگول باجر ولادتها كومو كافي
وانتي لازم منا وهيج تنتبهين لــ أكلج ونومج ولكل شي تذكرني هسه انتي ابنج مسؤول منج
كافي راحت ايام دلال شوفي هسه الأم شكد عظيمه وشكد تضحي وتتعب حتى تشوف اطفالها سالمين
وانتم ما وصلتوا لهيج عمر ولهيج كعده اذا مو نص حيلنه راح عليكم
احمد : انتم بس تخيلوا الجنة تصير تحت اقدام المزعطه تخيلوا ...
بعده ما مكمل كلامه ما حسينه الا كفخه على راسه من ابوي وزمخ عليه "
ابو ادهم : انت عينك طالعه وكله صوجي اني ما عرفت اربيكم واضبكم من بداية
احمد : حجي غير انت جايب براغي مو اصليه شعليه اني والله هو هذا لـ يسوي زين بهل وقت ما ينراد
سراج : هذا راح يدوخنه ويسطر راسنه
واني ما اريد جهالي يطلعون على خالهم يحجون هواي احبهم هادئين مثل ابوهم وامهم
ابراهيم مضيق عيونه عليه وگال بأستهزاء "
- لعقل يخر من اذنكم صلوات
سراج : يلا ابويه كومي للبيت وهم نرجع نبشر اهلي خطيه ما يدرون
ادهم : شعجب ما خابرتهم گلت هسه الخبر وصل للبصره لان انت كلنا خابرتنه
سراج : صراحه كوه جنت لازم نفسي بس اريد اشوف ردت فعلهم صوت وصوره ههههههه
ام ادهم : الله يديم عليكم سعاده ويبعد شر كل حاسد وحاقد عنكم
- امين يارب
كام من مكانه اخذ تلفونه ومحفظته وگال "
سراج : يلا الكعده حلوه وياكم احنه نترخص
زينب : تصبحون على خير
- وانتي بالف خير
وكفت امي بصفي باستني وگالت بحنان "
زينب : تمام
_ لبست بشت اخذت اغراضي و طلعنا نتمشى لزم ايدي بحنان
الشارع بس احنه بيه دنيا ليل وبس اضوية لبيوت
التفت عليه ونظراته كلها فرح وتلمع اول مرا اشوفهن هيج سحب نفس وگال "
سراج : شحجي عن فرحتي حتى ما تنوصف والله ربي عطائك جبير ويجي جبر للخواطر
شايفه الدنيا من تحني ضهرج من الم وخذلان وأذيه بـأبشع صوره ، بس فجأة رحمة ربج تحيطج من كل مكان واليوم رب العالمين نطاني شي خلاني اسجد من فرحتي شكد ما احب هل شعور تمنيته لكل محروم الله يرزقه
زينب : امين يارب العالمين
°°°°°°°°°°°°°°°°°°°°°°°°°°
قرائه ممتعه 🤍
البارت 2140 كلمه
💌 لتنسون التصويت ⭐ وتعليقات حلوه من ايديكم الجميلات 💕
توقعاتكم للاحداث القادمه 🤔
#هبه_الساعدي
يوزر الانستا / heba_alsaadi04
دمتم سالمين 🌸