مازن خلاهم وقعدو اخو اخت وحدهم
فوت يدو على شعرها بحنية وقرب صحن الديسار قدامها
جان:كولي باه تهزي صحتك الرقدة موالمتكش خشنتي
سيليا تشوف مع روحها:قول والله نندب على زهري الكلب
جان:هههه وشبيكم نتوما النسا مخلوعات فرواحكم خشنتي هاكي خشنتي وش فيها؟؟
سيليا:نن فيها عرااام ...المرأة لازم طول تشوف روحها مثالية من شعرها للبستها لوزنها لزينها لطولها من كللش هكا تحس روحها آلاز عكسكم نتوما الرجال تزدمو برك
جان:ايه خرطي فخرطي الجمال جمال الأخلاق والمعدن مش المظاهر
سيليا:نشوفوك فمرتك كي تعود تشرط لازم لاطاي ولازم لخلا
جان تبسملها:هههه نشالله لاطاي لازمة وشنو ميهمش الحجم
سيليا:ظاهرلي فاتني الجديد
جان:انا اللي رايح نسقسيك
شربت من كاس الجي وقعدت مركزة معاه زعما:ايه سقسي
جان عدل قعدتو وربع مقابلها:الحادث اللي صرا لحد الآن ولا واحد حاسبك ولا سقساك وش وصلك لثم مي انا منيش قادر نحكمها فقلبي كثر
سيليا:اممم انطق وش عندك لا تطرطق
جان:نستناك نتي تنطقي وش داك لثم وعلاه؟؟..وكيفاه طحتي بين يديهم
سيليا حطت الكاس على جنب وهزت برج تفاح ليها ومدت واحد لجان ذاقت من تاعها وبدات تحكي
Flash bac
من نهار سهرتها فالجاردان مع البيسي تفكرت النومرو اللي وصلها منو الميساج انو ممنوع تخلي لينار وايلين يتلاقاو حاولت تتعقب موقعو وبسييف بعد محاولات عديدة لقاتو وخلات موقع هداك التلفون مربوط بتلفونها منين يتحرك يبقا موقعو مربوط بيه ويعطيها المسافة بيناتهم شحال استعملتو وتعقبت الرساءل لهاد الرقم مي فمدة قصيرة التهكير راح بيسك ظاهرلي الرقم مراقب مقدرتش تدي علومات كثر اصلا وش يهمها المهم دات لادات والمكان تاع هاد المهمة ولازم تعرف شكون صاحبها ووش فايدتو من بعد ايلين وماهر
وصات هداك الراجل ووجدت روحها واخيرا هربت من الدار كيف القردة وبدات مهمتها من:
شوي وحبس قدامها على الموطو
راجل:تفضلي
سيليا حكمت عليه المفتاح وطلعت على الموطو شافت فيه من لفوق للوط:وجهي تنساه والليلة هادي تحذفها من حياتك نسمع غييرك سمعها منك لسانك نقصوو
راجل خاف من نبرة الصوت اللي كانت تحكي بيها ولا يتلكك:اووك اووك
شافت فيه بتسيمة رضا باردة و حطت الكاسك وديمارات
كانت تمشي بالموطو وتبع فتلفونها كانت حاطة الgps بيسك المهمة صرات فميناء من مناءات العاصمة مي هي مش بنت البلاد وين رايحة تفرقهم الوغ خلاتو يعاونها بقات تمشي مدة ودرست الموقع بدقة وشافت باللي كاين غابة صغيرة قبل المنياء تقدر تتخبى فيها وتراقب بصمت
بعد مدة كانت قاعدة ومترصدة حطت سلاحها كان سلاح تقنيص فيه تقنية التصويب فالظلام عادي شغل عندو عدسة توضحلك الرؤية جيهة الهدف المطلوب ليلا
تكسلت فاللرض مقابلة الميناء من على جرف صغير كانت تشوف غير فحاويات وسيارات متخبية باينة خدمة مافيا وتهريب لهنا تشوكات شكون من المافيا ورا ماهر؟؟!!!!
بقات تشوف وتعس تستنا غير هدفها ينزل من السيارة المحمية بالحراس اللي يدلو انو الرئيس تاعهم فيها هزت المنظار منين شافتو نزل من لوطو مي مقالتش بسم الله تشوفو حست بسلاح على راسها
.....: Cosa stai facendo qui?
(وش تديري هنا؟)
سيليا حبست بلاصتها من غير حراك واو الهدرة بالايطالية لهاد الدرجة كثرو الايطاليين فدزاير حتى وين تروح تلقى واحد لا وزيد مسلحين وش هدا؟؟
وقفت بالشوي هازة يديها باستسلام وهداك الراجل باقي وراها تقاسيم وجهو مش باينة مع الليل وكان موراها مقدرتش تشوف حاجة غريبة عليه
بقا يدز فيها بسلاحو وهي تمشي وتسب تحت لسانها من وكتاه ولات طايشة هك فخدمتها كيفاه متولهتش تعس البلاصة مي مهوش خطأها هي كانت تخدم مع فريق مهمتها التهكير واستعمال السلاح والقتل مي كان كاين مجموعة هي تعس وتترقب هاد لحشرات اللي تخرج من الجوانب بالمختصر مهمتها كانت تقتل لي بوص اللي يحبو يفوتوها عليهم وصاي مي ضك.....سيبون خرجت من هاداك العالم ومهيش متمنية ترجعلو
فاقت من تخمامها كي هاداك البغل رماها عند رجلين واحد طاحت الكاسكيطا اللي كانت مغطية ملامحها وبقات تسمع فاللي جابها يحكي مع البوص
حارس:بوص الهدف اللي كنا عاسين عليه ظاهرلي حبنا وجانا وحدو
(Il boss bersaglio che stavamo osservando mi sembrava che ci amasse e che fosse venuto da noi da solo)
Flash end
سيليا:والباقي تعرفوه ظهر البوص الخرا هو ورا ايلين وماهر
جان:استناي تشوفي متقوليليش اب مارك؟
سيليا:امم هو
جان وقف رايح جاي يمسح على شعرو فهاديك لاشومبر:من نيتك سييليااا؟؟؟(حبس وقرب ليها بقا مقابلها ويحكي ويعمل حركات بيديه تبين شحال راهو مقلق)يااا الرب الشي هدا كامل درتيه وحدكك؟؟؟؟معرفتيش تنطقيلي نعاونك؟؟؟ مخفتيش؟؟سيليا هبلتي تبعتيهم وزدمتي بالسلاح شحال من مرة نقولك تربيتي معاهم مي مكيش منهم سييليا..علاه هكا ومع اللخر قريب خسرناك يا طفلة
سيليا:علابالي جان..علابالييي..مي وش ندير خوفي عليها وعليكم كان اكبر من كلشي ومراحش يقل منا وجاي ولوكان يكون واحد منكم فخطر نعاودها وانا فرحانة
جان تكالا بيدو على السرير وبقات هي بين يدو ووجهو اللي كان حمر قريب ينطق:لوكان تجربي تديريها مرة اخرى...ندمممك متخليش جان الكلب اللي فيا يظهر مزال متعرفيهش..كامل نعرفو نلعبو البطولة مي لازم نخممو بالمنطق مخممتيش لوكان صرالك شي انا وش يصرالي ولا بابا ولا ايلين ولا هداك المكلوب تاع مازن....(بعد عليها ساخط مزال متفكر كلام الطبيبة كي وصاتهم ميقلقوهاش وملازملهاش ستراس سينو يفقدوها حالتها مزالت غير مستقرة )
سيليا شافت معاه عينيها مغرغرين:انا من خوفي عليكم منخممش فروحي..(دار يشوف فيها ميلتلو رقبتها مع ابتسامة ودمعة هبطت على خدها)لأنو ببساطة والفت انو انا ديما الأخيرة فكلشي..مكانش عندي اللي يخمم فيا واللي يجي يضحي بيا انا ما غيري ووقت خممت فروحي مربحت والو وش ربحت؟؟..وش ذنبي اذا اي شي نحبو يهرب مني من بابا ليماا ل....(شهقت تدارك فدموعها ) ايه .. نحبو ومحبيتش يهرب مني ونخسرو....وش ذنبي بعدما فقدت الأمل فلحياة وأحاسيسها وجا اللي نوضهم نخلي روحي نخسرو كيما كل مرة؟؟.....وش ذنب ايلين حتى كل مرة نبقا نسمعها دموعي وآلامي وهي اللي فيها كثر مني؟؟...علاه معنديش الحق نخاف عليكم؟...علاه اللي ينوض يعاتب سيليا ويلوومها ويغلطهاا وواحد ميسمعها ويسمي تضحيتها وخوفها لعب..بابا ياا الرحمة علاه مفسرليش ومقابلنيش كامل هاد ليام متجاهلني وقلت معليش مي علاه مقالش تحتاجني وتحتاج تقولي بابا وهي فحظني حتى وقت مكانش علابالو كان حنين على هك...(هزت يديها باستسلام دموعها قواو كثر)ها علاش خفت ومحبيتكش تخبرهم ها علاش ديما خوف سيليا ميعجبش الناس ووقت يخرج رايح يفسد غير الحالة
جان قلبو تقسم من كلام ختو بقا غير واقف ويشوف فيها ويحس موس كل مرة يتغرس كثر فقلبو هادي هي عدالة الحياة؟؟ كيما ضرها بكلامو السطحي ووصل لأعمق نقطة من ألامها الحقيقية كسرتلو شوكتو وهدت جبروتو وقسوتو اللي كانت فالأرجاء ضك قرب ليها رجليه باش يطرطقو رما روحو قدامها و هي طيشت روحها فصدرو محظنة جنابو وتبكي
سيليا:متخليونيش منيش حابة نرجع وحيدة كيما كنت ...متعاتبونيش على خوفي عليكم...قتلي مكنتيش خايفة؟....كنت خايفة ايييه..انا ثاني انثى ونخاف ونحب القطوط ونحب براءة الأطفال ونحب الكياتة ونحب الجو الجميل ونحب نلبس ونتأنق ونخاف من السلاح و الدم والموت ..ايه انا ثاني انسان وعندي الحق نخاف,مي....حبي ليكم اقوى من كلشي علاه ديما تحاسبوني فخوفي عليكم كأني ندير شي غالط(شهقة)وش ذنبييي حتى لحياة هادي تمرمدني هكا؟؟اهئ اهئ
جان يمسح على شعرها ويسلم على راسها دموعو حصلو فطرف عيونو عماها ومعندو منين يكحلها ضك
جان:سامحيني تعيشي ياروحي معرفتش وش نهدر ياك نتوما لبنات ديما هكا تقولو حنا الرجال بغال ومنعرفوش نعبرو ايه انا ثاني منعرفش نعبر نبقا راجل اسمحيلي على كلامي مي خرج من خوفي عليك والله
سيليا:حتى خوفي عليكم يدير ما كثر منيش لايمتك مي تبقى حاجة توجع ومنقدروش نتجاهلوها والفت ندير رايي بلاما نتحاسب علموني بالشوي علاه راكم تجبدو عليا؟؟
جان زيرها عندو كثر:شكون جبد عليك ختي الزينة واحد مجبد عليك وواحد مراح يديرها اوك؟
سيليا:اممم(توسدتو كثر وغمضت عينيها مستحلية دفا صدرو اللي مهما يضياق عليها العالم رايحة تبقا متأكدة باللي هو ديما واسع علاجالها)
لتحت كي كانت الدنيا قايمة عند جان وسيليا فالصالون كانو قاعدين عصماء وسمير وايلين ولحق عليهم ماهر
ماهر كمل قهوتو وشاف فسمير اللي كان مقابلو هو ديما يخاف منو ومن تخنزيرتو بلع ريقو وعدل قعدتو ونطق
ماهر:عمي سمييير
سمير هز راسو معاه ببرود يترشف من القهوة:خير ولد عمراني
ماهر يحمحم صح صوتو راح من نبرة سمير اللي خلات ايلين وعصماء يحكمو ضحكتهم فوق قلوبهم على هبال سمير
ماهر:احمم
سمير:مك تتوحم؟؟
عصماء محملتش طلقتها بالضحك :ههههههه سمير بالشوي على الولد
ايلين تتبسم تداري فضحكتها تشوف فخزرة ماهر تاع اضحكي وشوفي عيات كابرت كابرت مي والو طلقتها مع تطرشيقة تقول بومبة
ايلين:هههههههههههههه ياااه وش قالو ههههههههههههههه تتوحم ههههه (هزت عينيها فماهر اللي كان يزير فالكاس عينيه قريب يخرجو دارت يدها على فمها وسكتت)
سمير:من الصباح تتخنزر وتحمحم على والو انطق وشمن ريح جابتك عندنا؟
ماهر:..جيت نخطب
سمير تبسم وحط كاس القهوة:خصارة معنديش بنات للزواج سيليا مخليها عندي وايلين داتها بنتها
ماهر:وبنتها شكون جابها؟؟...انااا..عمي سمير والله بلا لعب سامط مرتي هادي وام بنتي اعبد ربي
ايلين وعصماء وجوهم حمارو من قلة الحشمة اللي زرعها ماهر سمير مكانش بعيد عليهم مي تدارك الموقف
سمير:شوووف شكون زوجهالك؟
ماهر:جدة وجداتها بالفاتحة والعقد والعرس و كلشيي
سمير:وضك ناوي تعاود كلشي؟
ماهر:ايه نهزو الفاتحة ونديرو العقد والعرس وكلشي يكون كيما حبت مرتي
سمير:ماشي تحمست بزاف؟؟
ماهر:اكيد نتحمس راني نصلح فحياتي وعندي الحق فالشي هدا عجبك اللهم بارك معجبكش نهزها هي وبنتي ونخطفهم ونهرب بيهم
سمير:والله مليحة هادي عاد اللي ينوض من ولاد عمراني يهدد بخطف بناتي
ماهر ضحك علابالو راه يمعني على هبال خوه:اا يا عمي هدا الموجود عندك 3خيارات يا قابل يا موافق ياراضي خير اللي يناسبك
سمير شاف معاه مع نص تبسيمة ودار لايلين اللي ذابت من شوفتو:بنتي ايلين..قابلة تتزوجي بماهر عمراني وتكملي حياتك معاه مالقري ميستاهلش مي معليش قولي الصح ومتخافيش
ماهر:عمي والله عيب الناس يمنشرو فأعدائهم وهوما غايبين مش حاضرين تقول حجرة ونتا تهدر وش تحب؟
سمير:انا نهدر فالوجه ديرها فبالك..كملي بنتي اعطينا رايك
ايلين تلبكت وتفكرت اول نهار ماهر جاها مع سليمة يطلب يدها شحال كان شبااب مي ضك هاهي بين عايلتها ويطلب فيها من باباها حسب الأصول والعادات حلم وتحقق واخيرا حياتها اشعت بالنور ومراح يكون فيها غير الفرحة منا وجاي مع راجلها وبنتها بقات تفرك فيديها ححتى لقات يد عصماء تحطت عليها
عصماء:اعطيهم رايك بنتي
ايلين شافت مع سمير بحشمة ووجها طلع حمر:امم..ايه..قابلة
ماهر صفق قرب ناض يشط من الفرحة:هااه..سيبون..ايه ياعمي ضك نتفاهمو على الشرط والعقد والفاتحة وقتاه نديروهم
سمير:عمراني بنتنا شرطها غالي
ماهر:حاجة ما تغلى على ايلين عندي
سمير:مليييح
برا كانو قاعدين فلوطو تاع مازن هو قاعد وحاطها فحجرو يديها على الفولون
مازن:صايي حفظتيهم؟
لينار تفوت فيديها على الفولون:اه سيبون هدا يزيد السرعة وهدا الفران وهدا لومبرياج وهادو كي تحب تفوت لوطو يخليو الأضواء الخلفية والامامية تشعل دليل انك رايك تدوبلي لوطو اللي قبلك
مازن:ايه والفولون نسوقو بيها
لينار:اايه هات المفتاح
مازن:اسمعي هاني رايح نديرلك رايك مي تقولي لباباك ولا ايلين نكسرك
لينار:علابالي منهونش مي معليش وعد منقولهمش ههههه
مازن:مي تنفذي الشرط
لينار:ايه عميمو والله هيا ديماري
حط السانتير عليهم في زوج وعاونها تدور المفتاح باه تنوض لوطو وديمارا بالشوي مخليها تتحكم فالفولون ميتة بالفرحة مش شايفة يديه اللي كانو حاكمين الفولون من تحت يعاون فيها
لينار::ههه عميمو راني نسوق صوور صوور
مازن:هههه علاه؟
لينار:هكاا نخبيييهم
مازن:ههههههه اوك اضرتي نتي سباب مشاكلي علابالي
شاف فيها بعينيه لقاها مغمضة عينيها وقاعدة
جان:رقدتي؟
سيليا:نن
مسح على شعرها وتنهد
جان:قوليلي الصح
سيليا:امم
جان:تحبيه؟
هزت راسها لقات وجهو حمر قريب يموت بالحشمة وهي كثرمنو من الصدمة معرفتش وش تهدر
سيليا:شكون؟؟
جان:ولد عمراني
سيليا هبطت راسها بحشمة ومبعد عاودت هزتو مع نظرة القطة المسكينة:اييه
جان تبسم:ههههه صار سيليا بجلالها طاحت فولد عمراني مازن البهلول
سيليا شنفت شوي:مهوش بهلول
جان نقر خشمها:هههه بالنسبة ليا اللي عشق سيليا ختي هو بهلول بيسك يا تهبلو ياتهبلو مكانش حل ثالث
سيليا تفكرت هدرتو فالفيديو هي اصلا هبلت وخلصت ههههه:هههه اوااه نشفق عليه
جان رجع شوفتو سيريو خلاص راني خوك لكبير شوي قدر..المهم نوض نشوف وش دارو فيها مع ماهر ونجي
سيليا:اوك
جان::ونقصي هدرة مع ولد عمراني قدامنا طبيعتي غيار ونكسرو نورمال خاصة ورا البيبان المغلوقة
حركتلو راسها بايه وهو تبسملها وخرج غير خرج هزت مخدتها وغمتها وجها فيها
سيليا:ااااااه ههههههه ياايمااا
رمات مخدتها وبقات تشوف للفراغ:منيش قادرة نبعد عليهم تعلقت بيهم صايي بلاصتي هناا
نور تحكي
فاتت سمانة واليوم خطبتي من مكلوب السعد اللي طلبني من بابا مزلت منيش مأمنة باللي جا نهار ورايحة نعيش فيه هاد اللحظة غاضني غير جانير اللي قلب الدنيا لبارح بالتكسار والعياط مي واحد مرد عليه وهو يروح يخدم وميقدرش يحضر ليوم يعني عقلو رايح يبقى مشطن عندي علابالي راه حاس بالعجز كي مقدر يدير والو ..شحال صعيبة هاد الدنيا كي والديك بعد يوقفو فوجهك وطموحاتك ومعطيوش ولا اهتمام لقراراتك مي معليش لكان هوما راسهم يابس انا كثرمنهم
قربت لسريرها تشوف فالروب اللي جابتها أمها كانت غوب بيضا قصيرة حد الركبة من فوق بومبي وذرعيها بومبي مي تحد عند خصرها وتولي سير طاي شافت على جيهة لقات صوندال بيضا سامبل وطالوها قصير تبسمت بعجرفة
نور:هههه احلمي احلمي امي الكريمة كي نزدم عليكم روس وتشوفو الخطوبة تاع جدكم الكلب هادي كيفاه تخلص
دارت على الباب اللي تفتح لقاتها زربت غلقتو بالمفتاح وقربت بالصاشي اللي فيدها
نور:بشرى..جبتي كلشي ياك؟
بشرى::اكيد خبيتهم فخزانة صابر باه ماما متتولهش ليها
نور:ايه ماشي ندورو الدنيا كامل علاجلهم فالتالي تتحشالنا آخر لحظة
بشرى:متحشات موالو هيا ازربي ادوشي وارواحي نتفنن فيك
هزتلها براسها ايه مع تبسيمة كبيرة وراحت تجري
بعد مدة من الوقت سمعت صوت امها جاي من اسفل الدرج
ملاك:نوور انزليي يابنتي
رفدت مراية صغيرة وبقات تشوف فروحها مع تبسيمة رضا وبشرى فوق راسها الفرحة مش سايعتها
بشرى:ييي طالعة تهبليييي
نور:ههههه مرسي عمري عينيك الملااح(كانت تضحك بحشمة ومبعد شافو مع بعضاهم وتفلقو بالضحك)
نور:ههههه قريب امنت روحي علابالك؟؟
بشرى:اسكتي برك انا كثثثر ههههههههههه ليوم يهرب وميوليييش
نور:اهم حاجة طلبتها يخي درتيها؟
بشرى:بااينة متحتاجش يهدرو فيها زوج
نور:اوو روعة ههههه
ملاك:نوور بشرىىى جيبي صاحبتك وانزلي
بشرى:اييييه جاييين
تبسمو بشر وقفت حكمت فيد ختهاا ونزلو فرحانين برواحهم وافكارهم زدمو على الصالو روس
جان كان قاعد فالصالون ويرجف فرجليه بقلقة ويطرطق فصباع يديه كاره من المهزلة هادي علاه تعطلت لاعبة روحها اميرة ومخليتو هنايا مكوي من نيتها؟؟مي غير هز راسو على الكارثة اللي دخلت تشوكا كانت لابسة قندورة(ولا جبة كيف كيف)ذراعها اليمين مقطع وحجار السمسم من ركبتها للارض تجرجر فيها هي تمشي وحجر السمسم الغوج اللي مش خارجين مع الوانها يطيحو شعرها محكوم زوج طمطومات وحدة للشرق ولخرا للجنوب والمكياج دايرة واحد اللون خضر فوق عينيها والحماير موv اصورتي مع القندور الموv اللي فيها كلاب خوضر منين جابتها الله اعلم
ايلين بدات تسعل وينهي نور الاناقة والفخامة المعتادة فالشركة ضك هذا مظهر انسانة عصرية كيما نور فخطبتها؟؟اوااه مشكيييتش
مجيد ولا يقطر من العرق وش رايحة تزيد تديرلو هاد الطفلة كثرمن البلاوي اللي دارتهم من قبل مي شوفات سيليا زادو وتروه كثر وقف يبينلها باللي مزال مسيطر عند روحو رايح يخوفها مي..ههههه سيليا ضك الجنون ميخوفوهاش خوفها الوحيد عايلتها وتعرف باللي ترتور كيما مجيد معندو ميقضيلهم
عصماء وملاك بقاو يسعلو حتى وقفت ملاك لبنتها
ملاك:نووور وش تدييييريي؟؟
نور تبسمت بانتصار وهزت راسها تشوف فحالة امها وباباها تستشفى حتى شافت راجل شعرو شايب وعينيه زورق مقابلها مهندم الله الله عقدت حواجبها زعما هدا هو الشايب اللي رايح يزوجهولها باباها؟؟كملت تشوف فالناس اللي قدامو ولهنا تشوكات كانت كاينة مرا ثاني شعرها شايب مي يبان رمادي وابيض فخم منظر جميل صح مي اللي مفهمتوش قدامها ايلين سيليا و..جااان!!!!!!!!!!!!!!!!!!! فضيحة العمر هادي يا عباد الله سيبوون رااحت الهيبة فداك الشي بشرى بقات واقفة مشوكية وش دارو هي وصاحبتها ضك؟ يعني سيبون ضيعو خدمة صحبتها؟؟ وكبريائها وكل شي طاح فالما
نور نسات خوفها ومبعد تبهديلة و تفوت اصلا هوما علاه مش حاشمين جايين يخطبو فيها لشايب نطقت بكل ثقة تشوف فسمير:عمي منيش قابلة بيك
سمير تشوكا: ااه؟؟؟
نور:كيما سمعت كيفاه عطاك قلبك تجي تخطب بنت قد حفيدتك؟
سمير شاف فجان وايلين وسيليا كامل فوتت عينو عليهم وشاف فيها:مجيناش نخطبوك ليا يا بنتي لوليدي جان..انا باباه
نور:هاا؟؟...علاه هو ماشي...
ايلين :لالا مش متزوج كان كلشي مسرحية
نور بقات واقفة مشوكية وشمن وجه يخليها تكمل هاد النهار ولا ترجع ليهم
جان:نور..روحي بدلي والبسي زي الناس بعدها نهدرو ونتفاهمو مليح
كانو كامل يشوفو فيها وهي تشوف فيهم خرجتهم من صدمتهم طفلة لابسة ربيبة غوز وحاكمة شعرها الذهبي لاتخاس مخلية شعيرات برك طايحين على وجهها مع ابتسامة بريئة
لينار:هههه خالي جان صمت صمت وفطرت على بصلة..(شافت مع نور فوق للوط وضحكت)ههههه المشكل محرووقة هههه
ايلين تلاحت حكمت لينار:اسكتيي يابنتي فضحتيينا
لينار طلعت يديها باستسلام مي غير بعدت عليها ايلين سوطات تجري عند نور تدور بيها هي وبشرى مزالو واقفين يستناو فتبهديل اكبر يصرا ولا واش؟؟
لينار:وشبيك العروسة؟....جان قالي نجيبو عروسة زينة مي نتي علاه زي الغولة اللي كانت تخوفني بيها جدة؟؟...علابالك انا نعرف ندير مكياج خيرمن اللي دارتلك سقسي مازن يقولك شحال من مرة نردلو وجهو يهبببل
بشرى شافت فيها هادي قزمة مي فمها معندوش قيس منين خرجتلهم ثاني تمالكت روحها على قرصات نور قريب يطيرو يدها جرتها وراها تحكي و تشاور بيدها
بشرى:ههه هادي مش نور انساوها عرض مسرحي برك باه تقارنو عروستكم اللي طرتو بيها الله الله بالجنيات اللي برا شغل عرضنالكم السلعة اللي برا باه نعتولكم باللي سلعتنا مكانش وين ما كان و....صحيتي ابيشو زادت عماتها كثر برك
مجيد وقف يسلت فعروقاتو:سمحولنا على المهزلة اللي صرات بنتي عندها فرخ فراسها ساعات يخرف عليها متديروش عليها ربع ساعة وتهبط راح يجري طالع للدروج وملاك تولات الجبهة
ملاك:سمحولنا والله معرفتش وشبيها المهم دقيقة وتهبطلكم ياك تعرفوها من قبل تشتي الدراما الله غالب بنتي هكا مخدومة سيليا تبسمت على جنب ونطقت
سيليا:الله اعلم لمن خارجة..خالتيييي
جان شاف فيها يسيي يقرا عينيها معندوش يامات شاف جني سيليا وين يقدر يوصل زعما ضك راهي تخطط لكاش حاجة؟؟زعما لازمو يخاف؟؟...معليش هو معاها ديما ظالمة او مظلومة من حقها.
لفوق نور طلعت تجري لهون ولهيه تغسل وتنحي فالمكياج اللي داروه الوان مائية تقول حلفو يندرو وخلاو هالات خضراء حول عينين نور
نور:اععع بشرىى محبببش
بشرى:اسناي نعاونك
نور بعدتها بيدها:روحي يرحم باباك المعاونة تاعك لعادت هادي هي قولي خلات فالأول تقولي نردك جنية ومبعد رديني سلعة والله براافو
هوما هكاك سمعو ضرب على الباب
مجيد:نوور ربع ساعة تهبطي عادلة كيما ايامك اللي تروحيها للشركة لا موتك تكون على يدييي
نور سبت بكل اللغات اللي تعرفها تحت لسانها تمنات تقولو روح تخرااا مي شوي لازم القدر:اووك خلااص فهممت
مجيد:حسابك مبعععد (ضرب على الباب وراح نازل فالدروج حتى لقاها غلقتلو الطريق وجهو بياض شوي مي محبش يبين)
مجيد:انسة وش تحوسي؟
سيليا:هههه آنسة؟؟؟...من نيتك السي مجيد...معرفتنييش؟؟
مجيد بلع ريقو:لا نتي نسيبتي برك
سيليا:هههه لالا مجيد بيك انا هنا بصفتي عدوتك نتا السبة فكامل وش جوزت وجد روحك للجاي مراحش نرحمك
خلاتو واقف وجات تمشي مي هو حكملها يدها حست ماص تريسيتي ضربها زربت جبدتها عندها هازة صبعها فوجهو تهدد
سيليا:رد بااالك تخمم تقيسني مرة ثانية..رد باالك
مجيد بعد:خلاص بعدت..مي..سيليا تعيشي متأذينيش بنور
سيليا:ههه شوفو شكون يترجا علاجال ولادو سبحان الله,ماشي لبارح برك كنت انا قد القطة قدامك معندي والو ونتا استغليتني بكامل الطرق ياما شريتلك الشراب والمخدرات وعاونت فخدمة الدار باه متزعكنيش مي هكاك وبقيت كل مرة تعفس عليا كثر مالقري علابالك كان عندي غير نتا مي هكاك وهنتني و عذبتني و عفستني ودمرتني وكنت السبب فكلشي فتت بيه فحياتي...فتت ببزاف امور السي مجيد.....بسبتك نتا بكيت وطحت ونضت ووقفت وتقست وتجرحت مي وقفت..وحدييي ونتا وين كنت؟؟؟..كنت اسست حياة في وجود يما اللي ضحات بكلشي علاجالك وعلاجالي..وش السبب اللي يخليني نرحم ولادك ومنردش شرك فيهم؟؟
مجيد :سيليا نتي قلبك ابيض كيما امك متأكد مراحش تقيسي نور ولا جانير هوما خاطيين اللعبة ومعلابالهم بوالو
سيليا:غالط فحساباتك قلبي اسود وبزااف فوق ما تتصور وجد روحك مبقاش بزاف لنهايتك سكتت كي لقات لينار تشد فيها من روبها
لينار:سيليا ديني للحمام
سيليا رجعت خنزرت فمجيد وهزت لينار وراحت
مجيد قعد فالدروج يمسد فقلبو وينهج:سيبون جات بلوة حياتي عليها اصر يخطب نور متأكد كاين لعبة جاية مي منقدرش نرفض حكمني على اليد اللي توجع
سيليا واقفة فالحمام تستنا لينار تخرج من الطوالات شافت فالمراية وتكات بيدها على الحوض تشوف فعينيها فالمراية:سبحان الله هادي الدنيا صح صغيرة فوق الحق
فتحت العينخلاتها تسيح وبقات هي دايرة يديها تحتها تتفكر كيفاه كلشي فات بالخف وفدقيقة
.....
نهاية اليوم هههه بارت برعاية هبال نو وبشرى والصحابات وقت يتلاقاو على حاجة مزال نزيدو شوي هبال للحكاية في بارت غدوة ولا بعدو نشالله
وش رايكم فاللي دارتو نور؟؟