جان تبسم وحكمو من كول الشيميز تاعو:جرب ديرها وشوف جبدو على جيهة خاطيين عصماء:متنساش خدمتك وباللي لوكان يصرا تحقيق صغير على حياتها تروح فيها مراحش نخليك تدمرها فاااهم؟؟....
مازن بقا يشوف فيه بنظرة غريبة
طلقو جان وبقا واقف مقابلو:منيش الشرير تاع حكايات الحب ومعنديش مشكلة شخصية معاك مي عندي خوف كبير في قلبي على ختي الصغيرة خمم بعقلك مش قلبك بيسك ساعات كي نتبعو قلوبنا ما يدونا غير للهلاك
مازن:مش غير قلبي اللي يخمم فسيليا عقلي وكل حواسي خدامة علاجالها ليل ونهار واكيد وقت قررت نوقف وراها ديما كنت متأكد باللي مراحش نضرها
جان:وش قصدك.؟
مازن:انا توليت التحقيق ورايح نمد المعلومات اللي انا حابها على سيليا وواحد مراح يفيق ولا يتجرأ يتوشيها ويقيسها
جان:علاه حاصل فيها بقات غير هي فالدنيا؟؟
مازن تبسم:هههه ايه بالنسبة ليا مكاين حتى طفلة فالدنيا هادي تقدر توصل لبلاصة سيليا فقلبي
جان مزال وجهو بارد ملقا يفرح ملقا يحزن:امم ياعيني على روميو زمانو
مازن:كي ترجعلي جولييت تاعي ونتفاهمو
فات عند عصماء:خالتي وينهو عمي سمير رايح نشوف لينار
عصماء:بلاك هبطها للجاردان
مازن:اوك مرسي
جان بقا واقف مكالي يديه لصدرو ويشوف فيه مازن فات قدامو وضرب يدو على كتف جان وراح
في غرفة من غرف هاد المشفى راقدة ومحاسة بوالو وهوما قدامها يهدرو
ماهر:دكتورة نقدر نفهم وشبيها؟
طبيبة:مسيو المريضة ظاهرلي عندها صدمة نفسية من الصغر يعني غير شافت موقف مشابه عقلها فكرها بنقطة كانت في ذاكرتها تاع المدى القصير شغل تأثيرها يزول ومتبقاش متفكرة مي وقت العقل الباطن يخدم وينشط مع موقف مشابه لا اراديا ترجعلها الصدمة والموقف هداك
ماهر:مرتي عاشت موقف في صغرها وبقا حاصل معاها متعلق بوالديها بيسك هي خسرتهم فآكسيدون وكانت معاهم فيها هي منعت وهوما ماتو يعني هادي برك صدمة كبيرة ليها ...مكانش حل يخليها تفوت؟
طبيبة:مع الأسف مكانش منقدروش ندخلو لذاكرة انسان ونمحيو موقف منها لازم مرتك وحدها تتقبل تمحي النهار هداك من حياتها سينو تأثيرو رايح يبقا
ماهر:فهمت
شافوها بدات تهوتر وتهدر وحدها قربو ليها
ماهر حاكم يدها:ايليين اييلين
اما هي والو عقلها كان رجعها للماضي وللذكرى الأليمة
Flash bac
فاللوطو والديها من قدام وهي من اللور حاكمة وردة فيدها
ايلين:ماما...الوردة هادي غير نروحو نديروها فالما واشريولي فاز نديرو فيها منيش حابتها تموت
ليليان دارت تشوف فيها وفالوردة اللي فيدها كانت وردة حمراء مفتحة كامل نحاوها من الجاردان تاع جدات ايلين كي كانو عندها:ههه حاضر صغرونتي
جليل:ايلين بنتي الموت حق فالحياة هادي ديريها في بالك
ايلين كانت صغيرة عندها غير 6سنين :مي علاه نموتو؟
جليل تبسملها من المراية:الموت حق كل انسان يجي للدنيا هادي و من اول نهار مكتوبو وش يعيش والنهار اللي يموت فيه يكون مكتوب فجبينو هكا باه يخلف البلاصة للأجيال الجاية ههههه
ايلين:ههههه بصح انا نحبكم تموتووش نتوما ابقاو معايا
ليليان:باينة هادي ماما الزينة
غمرتها الفرحة وبقات قاعدة تتفرج فالوردة حتى فالدورة على جيهتها شافت كاميون جاي قاصدهم كانو فوسط الطريق علااه؟
ايلين:بااااباااااااا
بقات غير تتخبط وتعاود فاللوطو اللي تقلبت فيهم مجابت خبر لقات روحها مرفودة فسرير الاسعاف و اضواء سيارات الحماية المدنية فالبلاصة شافت فالارض قبل ميدخلوها سيارة الاسعاف لقات زوج شكاير مغطيين وجوهم فالأرض عرفتها النهاية
فالسبيطار غير فاقت لقات خيط السيروم مركب فيها وشاش على راسها بما انها كانت مدايرة السانتير فلوطو من اللور الضربة مكانتش قوية بزاف عليها شافت منا ومنا لقات ممرضة واقفة عند راسها
ايلين:وينهي ماما؟
ممرضة شافت فيها بأسف وهبطت عينيها
ايلين بدات تبكي:قتلك وينهي ماما؟؟
ممرضة قربت ليها:ماماك احبيبتي...راهي فالجنة ضك
ايلين:ديني ليهاااا
ممرضة:ممنوع حبيبتي ضك يجيو فاميلتك يدوك
بعد ما ايلين قريب قيمت الحرب بالعياط تاعها تقول الروس زدمت على هاداك السبيطار هزتها الممرضة ومشات بيها لغرفة ليليان اللي كانت في سابع موتة
حطتها وفتحت الباب سبقتها تجري
ايلين وقفت حدا سرير عالي عليها كان فيه واحد ومغطي بالأبيض وجهها برد وتنفسها ضياق بقات تحبج على الغطا هداك مي والو ملحقتش
ايلين:ماامااا..لااا..جيبوووهاااا
قربت الممرضة ليها هزتها خرجتها من ثم وهي تفرفط اللخرة عضتها ونزلت من عندها تجري راجعة للغرفة اللي كانت فيها مي غير وصلت ودخلت تفاجأت بواحد واقف قدام جهة ليليان ويحكي
....:ايه سيبون ماتت
راحت تعلقت فرجلو وتبكي ذاكرتها عطاتها موقف معاكس شوي هي شافت لينار كي كانت متعلقة فماهر وشافت روحها فبنتها والذاكرة لعبت دورها ورجعتها هنا
ايلين:كذاااب جيبولي مااماا...وينو باااباااا؟؟
هداك الراجل بقا واقف ويشوف فيها مشوكي من البلوة اللي جاتو
....:كيفاه نديرلهاا؟؟
......
....:اوك
دار شاف معاها وهزها من تريكوها وضربها لراسها دوخها
....:سيبون داخت
.....
.....:لالا متضرتش بزاف الطفلة هوما برك ماتو
سكت كي دخلت الممرضة تجري لقاتو رافدها
ممرضة:وش صراا؟؟
الراجل كان لابس لبس فرملي:جات هنا وداخت مفهمتش وشبيها هزيتها باه نخرجها جيتي
هزتها من عندو وخرجت وهو دار يدو على الايربودز:الطفلة هزوها......حااضر
Flash end
ماهر حاكم يدها ويمسح فدموعها اللي قواو فنزولهم :ايلين ياروحي راني هنا افطنيي
قربت ليها الطبيبة ودارتلها الكولونيا عند خشمها خلاتها تتفاطن شوي حلت عينيها لقاتهم يشوفو فيها وفي نظرة ماهر خوف كبير تفكرت وش جابها هنا تقعدت ديراكت
ايلين:ماهر سيليا؟؟؟
ماهر:اشش متخاافيش معليها والو راهي لباس
تنفست براحة تداري فخوفها :الحمد الله
طبيبة:ونتي آنسة لباس؟
ايلين:ايه الحمد الله
طبيبة تبسمت وقربت قعدت قدامها:انا طبيبة نفسية عزيزتي ايلين وراني شايفة حالتك النفسية مهيش مليحة تحبي تحكيلي وش راه مقلق بالك وتخليني نعاونك تفوتيه؟
ايلين زيرت بيدها على يد ماهر:نن مبيا والو دكتورة
طبيبة:متأكدة؟
ايلين:ايه...الحالة ومافيها ختي تقاست وخفت عليها برك
طبيبة شافت مع ماهر بغرابة شوي
ماهر وقف:بلاك نخليكم تحكيو آلاز حبي
ايلين:لا معندي منحكي وش يخصني مي...
طبيبة:تفضلي؟
ايلين حكمت يد ماهر:حابة نحكي بشي يخص بنتنا
طبيبة:ايه راني نسمع تفضلي
فالجاردان لتحت سمير قاعد وقدامو لينار فحجر مازن اللي قريب هبلت بالبكا كن ماشي مازن يعرفلها السيستام بسيف خلاها تسكت
سمير بقا يشوف فيه كيفاه يحن عليها ويحبها وهدرتو تتعاود على مسامعو بنتو اللي عمرها كامل بعيدة عليه جاها واحد وحبها وحماها خير عليه هو مالقري هو باباها مي معاونهاش كيما عاونها مازن زعما حنيتو هادي اللي مع لينار يقدر يمدها لسيليا ويعوضها وش فات عليها؟
سمير:مازن..
مازن:وي عمي
سمير:الهدرة اللي قلتها قبيل...من نيتك؟
مازن حشم شوي شغل اب حبيبتو وهو كان زي البغل يشعر ويتهيبل هدا وين فاق من صدمة خوفو عليها مي مهوش نادم هاديك ليه ولازم يعرفو كامل:ايه من نيتي وقلبي وريتي وكلشي اعمي
سمير تبسم يشوف فيه وهو شاف فلينار
مازن:قعرتها..كي العادة
لينار تبسمت وهزتلو براسها ايه
سمير:ههه وي قعرتها بزاف ثاني..(رجع شوفتو سيريو):منيش نضحك ولد عمراني هاديك بنتي وطرف من روحيي وقلبي وصح من قبل مكنتش معاها مي وانا معاها منخليش شي يضرها ديرها فبالك
مازن:علابالي..انا حتى فالوقت اللي كنت علابالي فيه سيليا وحيدة قررت نحط روحي بلاصة كلشي فحياتها نكون باباها وخوها وصديقها ورفيقها وراجلها نشالله وبهاد الصفات كامل رايح نكون سند ليها للخر نبقا معاها ونعطي حياتي هبة ليها وميهمنيش الباقي مي....وقت عرفت باللي عايلتها مزالت عايشة وشكون هوما بالذات زاد اصراري نتحدا نفسي ونوصل لنفس مرتبة جان فالأخوة ونفس مرتبتك فالأبوة..بالمختصر درتكم قدوة بيسك نتوما قبل متعرفو بيناتكم دم مع سيليا عطيتوها أرواحكم وجامي ننسا خيركم
سمير:هه قالك خير وقيل نسيت باللي هاديك بنتنا حنا ثاني وحقها علينا نوقفو معاها ديما
مازن:وي عندك حق
سمير:مي قبل كلشي انا معشتش مع بنتي مدة كافية حتى تجي نتا بعدما عرفتها تديها ليك
مازن وقف هاز لينار فيدو اللي كانت تلعب بتلفونو:اوااه اعمي هنا تحببببس انا قريب نموت بسبة هبال بنتك متزيدنيش نتا...نديرو بروقرام 11شهر ليا وشهر ليكم كامل
سمير وقف ليه:والله صح ؟؟واقيل ولدتها نتا؟
مازن:كيفاه ياعمي قريب هبلت مع بنتك وانا نشوف فيها كل مرة تتخطا الموت بصعوبة وقلبي يحب يحبس ومبعد نتا تقولي نديها نتا عشت وكبير ورجعت لمرتك ضك وانا المغبون اللي معشت متزوجت وحبيبتي الغاشي كامل حاب يسال فيها..والله ماهو عدل منيش قابل نخطفها ونروح اناا
سمير:ههه والله صح وش هادي ثاني تخطفها وتروح علاه سايبة بنتي ليا وتخيرني انا عليك
مازن:اهااه اعمي متبداش باللعب الواعر بنتك مهبولة وتديرها زوجهالي ونخليك تجي عندنا كل يوم الواحد قلبو طااب
سمير :راني قتلك اسنا تفيق بنتي وتشوف كيفاه هادي 11ليك وواحد لينا...ديجا نسيت ايلين تحكمك تشكردك
مازن:هاديك علاه هاي رجعت لراجلها وبنتها فيدي دليل انها ذاقت حلاوة الزواج وانا المغبون اللي حياتي كامل شايح معندها متسال عندي
سمير تلاح عطاه بوكس خفيف شوي لكرشو:احشممم ياولد متنساش باللي راك تهدر على بنتي
مازن حاكم كرشو بيد وبنت خوه بيد:ايي شفتي شفتي ابنت عمك كيفاه يحقرو فيا انطقيي
لينار شافت فيه تضحك:ههههه اممم كاين اللي راح يهدر مبعد متخاافش
طبيبة:اممم حالة بنتكم مهيش قراف ومهيش تخوف يعني هي حالة طبيعية وقت الانسان يعاني من الفقدان ويزيدولو الخوف من الوحدة طبيعي نفسيتو تتأزم
ايلين:كيفاه لو سمحتي اشرحيلنا كثر
طبيبة:اكيد..شوفي بنتكم في وقت الطفولة وبلاصة متعيش كيما لولاد اترابها عاشت وحيدة وبدون ام مع الخوف من الفقدان والوحدة اللي هو كيما قلتيلي كاين شكون حاولت تبعد الأب تاعها عليها
ماهر زير يدو بغش كل يوم يزيد حقدو على ميرال وحسابو معاها مزال مكملش
ايلين:ايه
طبيبة:وبما انها تعرضت للتنمر تاع الاطفال باسم اليتيمة الشي هدا خلاها تكون عدوانية فالتصرف مع الأشخاص اللي حولها خاصة اللي تحس معاهم انو كاين خطر يقدر يمس شي يخصها كيما قلتيلي على الانسان اللي حسبتو زوجك مدام تصرفها طبيعي هي حياتها كامل تتمنى عايلة وكي تحظى بيها تلقا باللي راهي مهددة بالخطر تاع الانهيار وصغرها وطيش الأطفال اللي فيها يزيد من اندفاعها نحو العدوانية وتولي هجومية في تصرفاتها بيسك والفت تكون قوية وتدي حقها الانسان لازم يربي ولادو يكونو اقوياء ويعرفو يديو حقهم مي مش هكا
ايلين/ماهر:والعلاج؟
طبيبة:العلاج هو انو تحبسو هاد الانفصال اللي بيناتكم وتحاولو تعطيوها حياة طبيعية يكونو اهلها فيهم مع بعضاهم عايشين عادي ..يعني الزواج مرة اخرى حلكم الوحيد باه ترجعو بنتكم واذا نجحت الخطوة هادي وجود أخ ولا أخت فحياتها رايح يعاونها بزاف
ايلين وماهر بقاو يشوفو فبعضاهم زواجهم مع الأول كان حلو لكلاهم وللزوج متمناوش يوصلو هنا مي لوكان يتعاود نفس الفيلم والمرة هادي اللعب خشان اذا لحقو للينار؟؟...وين الحل
ماهر:ان شاء الله دكتورة مرسي بزاف
طبيبة:بلا مزية مسيو ربي يهنيكم نشالله بنتكم ترجع عادي وشي ميأثر عليها
ايلين/ماهر:آمين ياربي
فاتو يومين سيليا خرجت من السبيطار بسييف تحت عياطها وهرجها كان لازم تبقى على الأقل سمانة مي هي دارتلهم حداد باللي متبقاش لثم وبسييف خرجوها وهاهي فالدار معاهم ديما مكسلة فبيتها وميخليوهاش تتحرك ولا تهبط
ايلين وماهر بعدما هدرو مع الطبيبة قررو يبداو حياة جديدة ويحاربو الجاي مع بعضاهم رايحين يعاودو العقد مع عرس صغير بيناتهم وترجع ايلين تعيش مع ماهر فدارو علاجال لينار
مازن من نهار خرجو سيليا من السبيطار مهدرش معاها ولا ميلقاش وقت حتى باه يدوش خدمتو هاد ليام تعقدت شوي مع قضية سيليا لازمو يجبد راسو باه يبان كلشي صح وميخليش مكان للغلط
سمير ليامات كامل متجاهل سيليا يدخل عليها دقيقة يطل برك ويخرج لحد الآن مهدروش 10كلمات ورا بعضاهم كل واحد منهم حاس بالضيق سمير ميقدرش يرقد من التخمام وسيليا كثر راهي تخمم فكلشي حاليا من غير روحها
قاعدة فشومبرتها كي العادة غير وحدها وهوما يجيو يقعدو عندها دق الباب ضربات خفاف عرفت شكون جاتها تبسمت تبسيمة كبيرة ونطقت
سيليا::ادخلي عمريي
لينار دخلت تجري عندها ميتة بالفرحة
طلعت قدامها باستها لخدها وبعدت
لينار:لباس سيليا حبي؟
سيليا:ههههه لباس اعمري ونتي؟
لينار:بيفركت
سيلياههه بيرفكت مش بيفركت
لينار:كيف كيف هههههه
سيليا::ههه ايه صح
لينار:امم..سيليا جبتلك الجديد شوفيي(جبدت تلفون مازن من جيبها)
سيليا تخلعت:يااه..منين جبتي تلفون مازن؟
لينار:هههه مازن راه لتحت وانا هزيتو
سيليا تبسمت شحال توحشتوووو:ههه معامن قاعد ؟؟
لينار تفتف فالتلفون مش مركزة مليح:شكون؟
سيليا:مازن ابنتي عمك
لينار مكملة فشغلها:مع جان وعمي سمير وام جان وماما تدير فالقهوة
سيليا:مليح(شافت معاها تفتف خاشعة)وش تديري فتلفونو اطفلة
لينار:خارجة ليك خالتي الزينة صورتلك وش صرا فغيابك حرب جميلة جدااااا بين عمك سمير وعمي
سيليا:قولي والله
لينار:والله قربت تكلست قدامها قاعدين نص قعدة ومشات الفيديو
".................................................................................
مازن وقف هاز لينار فيدو اللي كانت تلعب بتلفونو:اوااه اعمي هنا تحببببس انا قريب نموت بسبة هبال بنتك متزيدنيش نتا...نديرو بروقرام 11شهر ليا وشهر ليكم كامل
سمير وقف ليه:والله صح ؟؟واقيل ولدتها نتا؟"
سيليا حبست الفييديو:هههههههه عجبتني اللخرة
لينار:استناي مزال الخير
"مازن:كيفاه ياعمي قريب هبلت مع بنتك وانا نشوف فيها كل مرة تتخطا الموت بصعوبة وقلبي يحب يحبس ومبعد نتا تقولي نديها نتا عشت وكبير ورجعت لمرتك ضك وانا المغبون اللي معشت متزوجت وحبيبتي الغاشي كامل حاب يسال فيها..والله ماهو عدل منيش قابل نخطفها ونروح اناا
سمير:ههه والله صح وش هادي ثاني تخطفها وتروح علاه سايبة بنتي ليا وتخيرني انا عليك
مازن:اهااه اعمي متبداش باللعب الواعر بنتك مهبولة وتديرها زوجهالي ونخليك تجي عندنا كل يوم الواحد قلبو طااب"
سيليا:انا مهبوولة ياماازن اووك استنا تشوف
"سمير :راني قتلك اسنا تفيق بنتي وتشوف كيفاه هادي 11ليك وواحد لينا...ديجا نسيت ايلين تحكمك تشكردك
مازن:هاديك علاه هاي رجعت لراجلها وبنتها فيدي دليل انها ذاقت حلاوة الزواج وانا المغبون اللي حياتي كامل شايح معندها متسال عندي
سمير تلاح عطاه بوكس خفيف شوي لكرشو:احشممم ياولد متنساش باللي راك تهدر على بنتي"
سيليا:هههههههههههههه هادو هبلووو
لينار:ههه كن تشوفيهم اسيليا كانو تقول قطوط قريب يترافسو
سيليا جبدتها عندها فحجرها تمسح على شعرها
لينار:راني نوجعك خليني ننزل
سيليا:لالا راني مليحة هكا..مي..هههههه قوليلي من تجيبي هاد الأفكار
لينار هزت شعرات كانو طايحين على وجهها بكل فخر:ههههه سر المهنة حبيبتي بابا مكانش يقولي بنتي المافيا على والو
سيليا:ههههههه مليييح برافو عليك
لينار:مي وش هي المافيا...حاجة مليحة؟؟
سيليا جابت وجه لينار بين يديها اونفاص لوجها بعد:لا..المافيا حاجة بزااااف سيئة ومليئة بالأشرار هي عالم عبارة عن السواد والشر فكل بلاصة آخر شي تتمناه صغرونتي تكوني منهم ياروحي اوك؟
لينار:اععع منزيدش نخلي بابا يقولي هكاك انا مش شريرة
سيليا:ايه ياروحي نتي مش شريرة نتي برك فايقة بزااف هههههه
لينار:اممم علابالي هههههه
لتحت بسيف وقف يمشي على روس صباعو جيهة الدروج حتى خرجتلو من الكوزينة فيدها بلاطو فيه كاس جي وصحن ديسار
ايلين من وراه:وييين؟
مازن سوطا قريب طاح دار ليها شاد قلبو:اففف مرت خويا علاه يعني قريب حبستيلي قلبي
ايلين:ههههه متخافش راه والف منقدرش نحبسو في وجود الأخت الكريمة
مازن:في هادي عندك الحق...(شاف فيها من لفوق للوط)وين رايحة؟
ايلين هزتلو حاجبها قريب تموت بالضحك:والله صح انا اللي نسقسي ولا نتا؟
مازن:هممم....ايه انا رايح عند حبيبتي تجي معايا؟
ايلين:ههههه قول والله تحبك حية ياوجه البخض ابعد تشو يجي ليك جان يكسرك
مازن:تحتاجيني امرت خووويااا ونفكرك فهاد الموقف...فالدار رانا منقسمين ليكيب انا ولينار على راجلك تحتاجيييينا يااهااه
ايلين:شوف اسيدي فواه مثلا؟
مازن:ابسط مثال تحبو تروحو عشاء رومانسي ولا ليلة حمراء..
ايلين خبطتو لكتفو:اخخ ميكروووب
مازن:اسناي والله والو المهم تروحو عشاء رومانسي ولا تديرو اي شي انا نعس بنتكم الجنية والتحراميت كن جا بنادم
ايلين:جنية تركبك قيلني برك هز هادو طلعهملها البيت الثانية فالدورة اللولة..ربع ساعة تهبط متنزلش نخليهم يزدمو عليك
مازن حكم البلاطو:اوو تحيا مرت خووويا ايا بااي ازين نتلاقاو مبعد
ايلين راحت وخلاتو وهو طلع يجري قريب تفردم
وصل بلاما يطبطب زدم ديراكت قابلوه مجمعين للزوج وحاطين تلفون وسطهم
مازن مدقق مع التلفون:هداك مش...تلفووووووونييييي
تخلعو للزوج لينار رماتو للرض ولاحت فوقو الغطا خلات سيليا هكاك بسروال بيجامة مع بيستي ساتان كلشي على برا
سيليا:ياابنتي هاتي الغطااا
لينار:استناي ليوم يكسلناا
مازن قرب حط البلاطو على الكومود عند راس سيليا وهي دارت يديها على كتافها تغطي فرزقها ولينار مريحة قدامها برك وتشوف فيه لتحت لتحت
مازن:يسما طمعت نمنع والديك من التحراميت تاعك جيتي فراسي
لينار تذبل فعينيها:نحبك اماازن
مازن:تحبك....قطة..ازح دعوة ومنقدرش نخرجها فوجهك نعلبو زهري مسح على وجهو وشاف للرض تلاح هز الغطا حطو على سيليا مع نظرات العشق والهيام وعاود هز تلفونو من الأرض
مازن:اهيه اعصابة الشر نقدر نعرف وش جاب تلفوني هنا..ياجدكم كان فجيبي شاف مع سيليا:نتي مهبطتييش رجع شوفتو للينار:ونتي اعقوبتي الكلبة جاية زي الستوت تسلمي و تبوسي خطفتيه ومشيتي مي انا علاه بغل مخليلك الكود ونشكي
لينار:مناه تحبني اعميمو كما نحبك انا
مازن:ام صح امننت
شاف فها مزالت بشوفة القطة وسيليا غير قاعدة تشوف فيه هكاك تبسم بخبث ووجه هدرتو للينار
مازن:ايا اسمعي يخي تحبيني طيري اسنطري فالدروج كي يجي خالك جان ولا كاش واحد ارواحي قوليلي
سيليا:اوو ماازن مكلاه
مازن:هه متخافيش اعمري مناكلش الفراشات
لينار وقفت فوق السرير ولات قريب لطولو تلاحت للتلفون خطفتو من يدو ونزلت تجري لحقت عند الباب:نلعب بيه وكي يجي كاش واحد نقولك
مازن:روحي برك ازهري اجريي
هي غير خرجت وهو راح غلق الباب بالمفتاح ورجع عندها كانت قاعدة ودايرة الغطا على كتافها ميبان والو غير وجها وشوي من رقبتها
ريح قدامها:وشبيك قاتلة روحك بالغطا فالسخانة هادي
سيليا:لالا مكانش سخانة الجو مليح
مازن:مي انا سخنت..بزاااف
سيليا خدودها حمارو:وش دخلني روح اغسل
مازن:ههه لالا نحتاجك نتي هزها من خصرها جابها فحجرو ظهرها مع صدرو:توحشتك فوق ما تتصوري
سيليا حكمت يديه على كرشها:انا ثاني
مازن مخدر من ريحتها مغمض عينيه ومخلي خشمو فشعرها:نتي ثاني واش؟؟
سيليا بصوت خفيف:توحش.تك
مازن:ههه علابالي اعمري مي مع الخدمة مريحتش خلاص سمحيلي وصاي
سيليا:سماح حبيبي علابالي راك تتعب
مازن:مش خصارة فيك اميرتي(فوت يدو على طول كتفها):ايييه وش تحكيلي
سيليا رعشت من لمستو تحروزت تنوض زيرها كثر
مازن:خليييك...قربك مريحني
ركشت عندو مستحلية بوساتو على رقبتها ويديه الدافين اللي محاوطينها هي صح محتاجة هاد الاحتواء من مازن ضك
سيليا:مازن
مازن:روحو
سيليا:هدرت مع بابا؟
مازن بعد شوي وردها عندو بالجنب يجي صدرو مع كتفها باه يشوفها مليح باسها على جبهتها وخلا يديه يتساراو على وجهها:ايه هدرنا مي انا عميتها تعرفيني مهبول بعشقك هههه
سيليا:ههههه ايه سمعت كلشي
مازن:ههه شكون قالك
سيليا:قلت سمعت مش قالولي ..لينار حبيبتي صورت كلشي
مازن فتح عينيه صفاحي:اوووووو وقتااه؟؟
تفكر كي قالها انطقي راهم يحقرو فعمك هي كانت هازة التلفون وولا على بالها وختمتهالو ب
" لينار شافت فيه تضحك:ههههه اممم كاين اللي راح يهدر مبعد متخاافش"
مازن:اووو علابالك الطفلة هاديك تخوف والله يظهرلي نشوفلها بلاصة فالمخابرات ولا القوات الخاصة تخلف عمها(اللهم ارزقني عم بهاد التخمااااام)
سيليا:هههه خلاك خليلي اميرتي تقرا وتولي حاجة بعيد عن الريسك
مازن:هه نشالله احبي
سيليا:امم..مالا انا مهبولة؟
مازن:شكون قال اعشقي؟
سيليا:نتا مسيو مازن..متحشيليش بزوج كلمات
مازن:استغفري مولاك عمري وش دانا للحشوة ضك
ضربتو على صدرو:ازحح صفي مخك مسوووفج
مازن:من نهار عرفتك تسوفجت هههههه
سيليا:كذاب متحصلش شرك فيا
مازن:ههه خلاص احبيبي والله والو وشنو انا هبلت بعشقك برك وش انا نهبل وهوما يجيو بكل عين مليانة يطالبو بيك اووو شوييية عجبك عطيتهم شهر كااااامل ومرضاوش كيفاه ندير لجدهم؟(ذبللها عينيه ببراءة وهي غاست فيه هزت يديها تفوت فيهم على وجهو وشعرو عينيه كلشي فيه)
سيليا:لهاد الدرجة تحبي؟؟
مازن:مش غير نحبك اطفلة معلااباليش وقتاه ولا كيفاه مي عشقك ولالي ادمان منقدرش نرقد بلاما نخمم فيك وليت نحس حياتي كامل مرتبطة بيك عشقك نتي تمشالي فالدم
سيليا تبسيمتها كل مرة تتوسع كثر من هدرتو اللي خلات البغال والكلاب يسوطيو فكرشها:وانا نعشقك ونحبك بهيام جامي توقعت يجي نهار ويدخل حياتي انسان يكسب قلبي ويخليني نتوحشو ونحس نهاري ناقص بلاما نسمع صوتو بعد ايلين وعمي سمير
قربت لشفافو باستو بوسة حنينة وخفيفة وبعدت مدايرة جبهتها على جبهتو وساهية فعينيه:سميتك عوضي يا مازن عندك تخمم تخليني حتى لو بعدتنا الظروف ابقا ورايا ومتخلينيش نغيب عليك
"أسميتك عوضي بعد العذاب.....ارتبطت أرواحنا بخيط من ذهب...قلوبنا تغازلت وعيوننا تآمرت وأرواحنا قررت..ليبنى حبنا .."مازن وسيليا"....قصة عشق تخطت حدود الواقع لا شيء من الواقع يسمح بأن اكون قريبة منك او معك ولكن ومع ذلك اني أأبى الرحيل او البعد عنك,فاني ببساطة فراشة وجدت حارسها وترفض التخلي....سأعشقك للأبد حتى لو فرقتنا المسافات قلبي سيبقى ينبض فقط باسمك"
مازن عاود جبدها وغرق فشفافها بسيف بعد :عمرك تخممي باللي انا نقدر نخليك..شفتي انسان يعيش بلا قلب؟....لالا هكاك مازن بلا سيليا هو والوا
تخبط الباب خبطة قوية فرقتهم
سيليا:شكون؟؟
مازن:ديري الغطا عليك علابالي شكون (نعم هو اللي فبال مازن وبالكم....)
فتح الباب قابلو هاز لينار فيدو متشوكاش توقعو دار يدو على خصرو وبقا واقف
جان زدم فيه جابو ضارب فالحيط:وش تدير هنا عمرااني...قرب حط لينار قدام ختو اللي كانو خدودها حومر وخنزر فيها ودار لمازن:سقسيتك جاوب
مازن قربلو بكل ثقة:نطمن على مرتي المستقبلية باذن الله
سيليا غرقت فقشها جبدت لينار عندها وبقاو للزوج تحت الزاورة يتفرجو
لينار:تخلطت يخي؟
سيليا:ايه راني نشوف
لينار: ههههه خلييي
سيليا:والله مراني فمود ضحك ابنتي وينهي الاخت الكريمة تنقذ الموقف
لينار:ماما تخمرت مع سوق العجايز راهم مجمعين وسمعت لوطو تاع بابا ظاهرلي ضك عزرين ميفطنهاش
سيليا:اسمعي نتي صح عندك خمس سنين؟؟
لينار:ههه لالا خالتو حبيبتي قريب ندير 6سنين كبرت
سيليا:اييه كبرتي بزااف ثاني هادي هي اللي تتربى مع ذراري برك
جان قرب لمازن:نتا حالف تهبلني منين نغفل على جدك نلقاك حاصل عندها
مازن:القلب ومايوهى نسيبي كالم توا
جان:ولد عمراني يرحم باباك متخلينيش نتبلا بذنوبك
سيليا جمعت قوتها وعيطت:خلاااص
دار جان قرب ليها يسلم راسها ويشوف فمازن قريب يموت مهما كان خوها مي ميحملش فكرة يبوسها غيرو وجان لقاها سبة يحرقو بالصامت
جان:خلاص ياروحي هدا كامل من حبي ليك
مازن:اممم ومن حبي ثاني لا تنساي
جان زير يدو على كتف سيليا مريح قدامها هز كاس الجي:ظاهرلي متهلاش فيك كاس الجي عندو نص ساعة هنا معرفتش تشربهولها
مازن:كنا مشغولين بشي ثاني
جان جا يوقف ليه:واااش.؟؟
حكمتو سيليا:كنا نهدرو وانا محبيتش نشرب مكنتش قادرة
جان:عندك الحق اللي يشوف خليقتو تتسدلو الشهية
مازن:نسيبي المستقبلي بدينا باللعب اللي منحبوش
جان:كن تديها هاو وجهي
مازن:نديها ونخليك تزغرت فعرسنا جان كاامل
سيليا خلاص ذابت لا هداك عامل قيمة لروحو باللي راه خوها لكبير والشي هدا عيب ولا الثاني عاطي اعتبار للحشمة والنية المغبونة الي راهي تندب فالشوكة بلاما ننساو البراءة اللي هربت وتبخرت وعماتها كثر
لينار:جان يزغرت وانا نصفق ونشطح
مازن:هههههه ليييزووم تاع عمها باينة حبيبتي نرووبلوووها ديجا خالك عندو صوت شباب نخليوه يغنيلنا مع التزغريت
جان:عمراني علابالك عندي غير واحد الحد صغيييير تاع صبر بقاتلك فيه نطقة تزيد كلمة نوض نفلعصك
مازن قرب هز لينار وغمز سيليا وبعد:سلامة قلبك نسيبي خلي هاديك النقطةللعرس دارلو باي ومشا يتهيبل مع بنت خوه
.........
هاني رجعت بارت تعويض على الغياب كتبتو من عينيا فالسخانة والمرض هيا فرحوني بآرائكم وتوقعاتكم