وئام العشق

البارت الثاني والثلاثون

#وئام_العشق

بقلمي الكاتبة : هبه الساعدي ✍🏼

يا ذات الربيع و الريحان
اسيكون اللقاء بالبستان ؟
اسنتمكن من الحب ..
و نطوي صفحات الزمان ؟

°°°°°°°°°°°°°°°°°°°°

_ باوعت عليها لگيتها غافيه غطيتها ضليت صافن بشكلها وكل ما اباوع عليها اشوفها بعيني هذيج الي هستوني حبيتها ... بقيت اتمعن بشكلها ورموشها لطوال ما حسيت بنفسي الا واني نايم

_ گعدت من الصبح بكامل نشاطي ولازم اليوم ارجع زينب ليعرفوها تنهدت بحسرة صح كم يوم راحت تأثرت بالصار ويانا وطلعنا الف الحمدلله

_ غيرت ملابسي ونزلت جوا كلها نايمه صادف يوم جمعه باوعت لساعه بــ ٨ فتحت تلفوني ودخلت على يوتيوب تعلمت طريقة المخلمه طلعت لمواد من ثلاجه وثرمتهم وخليتهم بالمقلاية سويت كمية كافيه للكل

_ حطيت قوري چاي على لنار خلصت مخلمه رشيت عليها كرفس رتبتهم على ميز الطعام دخلت امي مبتسمه ...

- صباح الخير يمه شهل نشاط من الصبح بيج شي

- لا يمه كل شي ما بيه صباح العافيه حبيبتي داجهز لريوك بين ما يگعدون

- عندي كليجه خلي اطلعها واسخنها

- تمام بين ما اگلي كباب بالبيض

- شذكرج بي

- ما ادري شو اتذكرته هسه

_ جهزت كل شي ورتبته صارت بـــ ٩ ونص كلها گعدت ويا هو ينزل امي تگله زينب سوت الريوك ليگول صنعت ذره هههههه ... نزل ابراهيم وسراج يسولفون صاح احمد

احمد : تعال شوف مرتك مبدعه اليوم شوف الريوك شهي هي مسويته

ابراهيم : شفتوها اخاف مصخنه

سراج : لا ما بيها شي

التفت عليه وضيق عيونه "

ابراهيم : شلون عرفت

اشر عليها وهي ملتهيه ترتب وتركض هيج وهيج بفرح "

سراج : دحك ما طول تشوفها نغرت بنفسها يعني عين لحصان كل شي ما بيها
دشوفها شلون نافشه ريشاتها بعد شويه يمدحونها تطير وتلحق بجناحاتها

ابراهيم : اني هنا ارفعلك القبعه واهنيك من كل گلبي لان فعلا كلامك صحيح

احمد باوع لسراج وگال بأستهزاء

- اليوم انام كلنا بالردهة الطوارئ لا تقلقون يا اصحاب

ابراهيم دفعه بأتجاة مطبخ "

- دمشي امشي لا تسمعك شيخلصنه

_ كعدنا كلنا مجموعين على سفره نتريك بس صوت استكاين چاي

سراج : فدوه لأيدج مريتي عاشت ايدج اكل طيب بس من ايد مرتي الا اگوم ابوس اصابيعج كدام اخوانج

ابراهيم : عيب مو هسه لا تتهور اگعد بعدين بوس حتى راسها

صكر : هاي سوتله طماطه وبيض يريد يگوم يبوس اصابعها اذا تسويله دليميه يسجل حاله وماله بأسمها
شدي حيلج وركزي على دليميه وعوفي طفل هههههههههه

سراج هز راسه بأسف "

- فهمتوني غلط مع الأسف عليكم مرتي ما تعيش بينكم تاكلوها وتشربوها

احمد شرب من الچاي وگال "

- قصدك لعكس الصحيح

هيثم يباوع على اخوه ورافع حاجبه ويستهزء "

- وين هذاك ابو الهيبه وشخصيه شو مرتك ساحلتك

ادهم : بس تزوج انت هم مرتك تسحلك

هيثم : لازم انت هم مسحول ؟

ادهم : وسفه عليك ما مرجيه منك اذا اني ما انسحل منو ينسحل

اسد غص بالچاي من الضحك "

- والله عبالي راح يگول لا اني مسيطر هههههه طلع لعينتين هم مسحول

ابو صكر ضحك بهدوء " كلكم مسحولين من نسوانكم ههههههه دسكتوا يلا

_ خلصوا ريوك وطلعوا يدورون بيت قريب تأخروا يلا رجعوا تعبانين وجوههم سود من التعب وشمس گالوا لگينه بيت واتفقنا ويا صاحبه ونضفنا ورجعنا هلكانين من التعب

ام ادهم : يساعدكم الله يمه جوعانين اكيد ثواني واصبلكم

احمد : اي والله يمه ميتين جوع استعجلوا

زينب : كملت تنظيف ويا اميرة ولبنات خطيه ساعدنا ما قبلن يگعدن لولد تأخروا .. صعدت رتبت غرفتي وغرفة ابراهيم ونزلت شفتهم جايين صاح عليه سراج ...

- يلا محيسن ايدك وياهم ساعدهم جوعانين رحمه لأهلك

ضحكت ورديت عليه "

زينب : هههه ادلل ثواني والغده يكون جاهز

_ صبينه الغده وتجمعنا اكلنا بهدوء محد نطق بكلمه كملنا نظفنا لمطبخ لبنات واميرة واني صبيت چاي الهم
للمغرب گالو راح نطلع نشتري كم غرض للبيت مستعملات لان اول وتالي هن راح يضلن مؤقت مو شي دائمي بين ما رب العالمين يفرجها علينه

_ ورا ما طلعوا طلعنا احنه ويانا عمتي ام صكر وامي نشتري ملابس وكم غرض محتاجين بقينا نتمشى لشارع العام على محلات القريبه اخذت كم دشداشه
ولبنات وياي يشترون اخذت ملابس لسراج لان كل شي ما جبت اله ويانا طلعونه بطرك ارواحنا

_ و اشترينا اغراض مطبخ وكم شغله على گد نحتاجهم ورجعنا للبيت بس وصلنا لگينه لولد راجعين
سألونا اذا بينا حيل نروح نرتب البيت علمود باجر الصبح ان شاء الله نسكن بيه عمتي گالت ...

ام صكر : اي يمه بينا حيل جايين

_ تركنا اغراض ورحنه وياهم واول ما وصلنا شمرنا العبي وگعدنا نجلف ونغسل اغراض جايبيهن صح مو مثل بيوتنا تركناها ولا مثل اثاث يختلف جذري
بس حمدنا رب العالمين خلصنا من ظلم داعش وطلعنا وام صكر وام ابتسام ضلن يدعن للناس خطيه بعدهم ما طلعوا لان سمعنا الوضع صار بعد اصعب

_ كملنا تنظيف ورتبنا لأغراض صح مو هوايه بس افضل من بيت فارغ يصوصي لولد راحو اشتروا فراشات يعني صار ينسكن نوعا ما خلصنا قفلنا
ورجعنا لبيت اهلي تعشينا وبتنا يمهم
ثاني يوم رحنه للبيت أجرنا الحمدلله سكنا بيه امتحاناتي قربت اخير سنه ما ضل شي بس كم يوم واني نص منهج ما قاريته

_ صرت اروح بالنهار لبيت اهلي على الهدوء اقرأ وباليل ارجع للبيت عيالي مرت الايام وما بقى بس يومين وسراج يلتحق هو وابراهيم
واخوانه جواد واسد رسول تطوعو ويا جيش وراحو عمتي خطيه دكت وبجت بس رادت ما يروح ما قبلوا ودائما يگولون الها

"نروح فدوة لتراب العراق"

_ وبس طلعوا متنا بجي وخوف وايدينا على گلبنا وعمتي خطيه صعد سكرها ودمعتها صب على ولدها وخاصه طلعوا كلهم طلعه وحده
وما اعرف هل مرا صار عندي احساس ونغزات بصدري أذتني ويا طلعتهم خليت ايدي على صدري بخوف

_ طلعوا من البيت وطلعت روحنا وياهم ذبينه وراهم طاسة مي مسحت دموعي ودعيت من كل گلبي يرجعون بالسلامه .. دخلت لعمتي لگيته گاعدة بالصالة گعدت يمها باوعتلي وابتسمت بحزن

زينب : عمه اريد اروح لبيت اهلي اني اكمل دراستي تعرفين الامتحانات على لأبواب اكمل امتحانات وارجع الكم ان شاء الله

ام صكر : روحي امي روحي دراستج ومستقبلج مهمات اكثر من كل شي

_ بستها وترخصت منها رحت اخذت اغراضي وكتبي ورحت لأهلي سلمت عليهم وصعدت لغرفتي بديت ادرس وامي واميره يجيون اكل وعصاير يمي خطيه ابد ما قصروا وياي خلصت اليومين واليوم امتحاني اول امتحان ومتوترة اجاني احمد

احمد : اليوم شعندج ؟

خليت الكتاب على وجهي وصحت بتذمر "

زينب : غضب الله على عربي

احمد : ههههههه من انتي صف اول ما تحبي و لحد الان انتي ويا عداوه

شمرت كتاب بعيد عني واباوعله بحقد عبالك انسان "

زينب : ما احبه احس حاقده عليه

مشى خطوات گدامي وصاح "

احمد : دمشي يلا امشي

_ تنهدت بتعب وخوف اخذت الكتاب وسلمت على ماما وطلعت صعدت بالسيارة مسافة قليله وصلني يم المدرسه دخلت وشفت صديقاتي بعدها دخلنا للقاعات امتحانيه بقيت اردد بالادعية حافظتهن

«اللّهم ارزقنا نوراً في القلب ، وزينة في الوجه ، وقوة في العمل ، اللّهم قنا شرّ الإنس والجان ،
وهب لنا حقيقـة الإيمان»

«اللهم إني توكلت عليك، وفوضت أمري إليك لا ملجأ ولا منجى منك إلا إليك ،
لا إله إلا الله الحليم الكريم رب العرش العظيم»

«اللّهم إنا نسألك التوفيق والهداية ، والرشد والإعانة ، والرضى والصيانة ، والحب والإنابة ،
والدعاء والإجابة»

_ سلمونا اسئله قلبتها وقريت سورة الفاتحه لأم البنين غمضت عيوني وشفت الاسئله جانت صعبه حيل ومن اعترضنا گالو وراكم سادس وخامس مو مهم
ركزت زين وكتبت اعرفه وگلت بگلبي ما طول احل بالاسئله مو مهم هسه لمهم انجح وبالسادس عود اطلع معدل ... كملت حل اعرفه ولباقي عفته سلمت دفتر وطلعت گالبه وجهي وما يكصه السيف وبس واحد يگلي شبيج ابجي

_ طلعت من المدرسة واحمد ينتظرني ركض عليه يسئلني

احمد : ها وجهج ما يبشر بخير

باوعت عليه بدون انذار نزلن دموعي "

زينب : ما جاوبت الاسئله حيل صعبه

باوعلي صفح ومصغر عيون وگال بأستهزاء "

احمد : تضلين تبجين تالي ١٠٠ سوالفج ترا حافظيهن سوالف سچاچين بطليها
امشي اصعدي عبالي مسمعيج حجايه بيج شي دمشي لا ابتلي بيج

_ رجعنا للبيت واستمرت امتحن ومرت الايام بين تعب الامتحانات وخوفنا على الولد خلصت امتحانات وبنفس اليوم نزلوا لولد من دوامهم رجعت من امتحان فرحانه فتحت باب بيت اهلي حيل ودخلت اصيح باركولي خلصت امتحانات

دخل احمد وراي سحب جلكان مال نفط ويدك عليه ويهوس بصوت عالي "

- تعالي تباركي يامن تحبين

اكمز كدامه ولكتاب بأيدي واهوس بيه واضحك وارد ويا "

- خضر عودنه اليابس من سنين

فجأة وطلعنا ادهم عاگد حواجبه وجه يلطم مبين ضايج وصاح "

- هااي شكووو

احمد : اووختي فرحانه كملت امتحانات واني فرحان وياها واعاونها بفرحتها

هز ايدة معاجبه وگال "

ادهم : استغفر الله شكبركم تصيرون بكد لبغوله

التفتت على احمد وگوه كاتمه ضحكتي واعض بشفتي "

زينب : انت تعرفهم للبغوله ؟

ضحك وبسرعة خفى ضحكته وگال بأستنكار "

احمد : لا انتي مسبق وتعرفتي عليهم

زينب : لا وين ابد ولا شايفتهم بحياتي

احمد : لعد دتعالي نغني عبرت شط علمودك

تربع باب مطبخ وخله جلكان گدامه وگال "

احمد : اني ادك وانتي صفكي وغني

تربعت بصفه وتحمست ههههه "

زينب : يلا

گام يدك واني اغني "

- عبرت شط علمودك خليت على راسي
كل غطه احس بالموت كوه اشهك انفاسي

احمد : شو سكتي

زينب : تذكرت ملابسهم بهاي الاغنيه ههههههههه شنو جان يحسون بهذا لبسهم 

طلعت امي من المطبخ على اصواتنا وگالت "

ام ادهم : هذا لبس جيل طيبين جان بوكته بس الي عنده وزنكين يكشخ هيج كشخات

التفت على امي وصاح "

احمد : يمااااااا

ام ادهم : وحمه كون شكو

گلب ملامح وجه بحزن مصطنع وبراءه وگال الها "
احمد : ليش تحسسيني اني مو ابنج لاكيني  باب جامع

زينب : قابل جذب هو انت لكوك باب جامع

باوعلي صفح ودفعني بشقه "

احمد : اسطرها هسه بعجل احط عيونج بحظنج كومي كومي مو مال واحد ينطيج عين
وبعدين رجلج اليوم مو جاي ليش ما ترحين لبيته لازكه على گلبي ليش ما صدكت زوجتج تالي ترجعين على گلبي ليش

زينب : ليسمعك يگول معيشني وهو جان يبوك من جنطتي فلوس ويروح يلعب فيشه وبلي

احمد : الله شكد حلوه ايام المراهقه من نسوي بلم بالورق فدوه لعيني شلون طفوله عشت
ومشط الج واطلع من راسج بهل كمل واطكهن بالطابوكه وارجع ليوره شنو فتهمت من طفولتي اني

نرفزني كلامه دفعته بخفه وصحت "

زينب : عزا هاي شوكت صاير بيه كمل

ام ادهم : انجب وكافي جذب

التفت الها وگال بجديه "

احمد : يمه تعالي اسولفلج اول البارحه شفت ابويه

ام ادهم : وين شفته

سوا الها مكان بصفه وگال "

احمد : اكعدي خلي اسولفلج مرا بالليل فتحت باب الاستقبال لگيت ابويه يخابر وحده يگول الها اي عيني اني ارمل مرتي متوفيه من سنة الفين جابت بنتي وتوفت

لطمت على صدرها وصاحت "

ام ادهم : يمههه عزاااا تحجي صدك

هز راسه بأسف وكمل كلامه عبالك يحجي صدك "
احمد : اغشج اني لعد خلي اكملج ضليت اتسمع عليه يگول الها خطيه بنتي بيها سكر
ويوميه تتخربط كمت زوجتها ويوميه رجلها كاتلها ومرجعها عليه واني حالتي بالضيم بلا مره

شهكت بصوت وصفكت ايد بأيد وحجت بأسى "

ام ادهم : عزا لعزاك يا اوس بشنو مقصره ويا اني فهموني صدك لو گال ابو مثل عكب ما شاب ودو للكتاب

لزم ايدها ويمسح عليها يواسيها وشبه ابتسامه على وجه "
احمد : يمه هدي شنو سالفه هي خيانه بسيطه لعد لو مزوج عليج شتسوين

سحبت ايدها منه وگالت بتفاجئ "

ام ادهم : فال الله ولا فالك عاب هل حلك الاعوج

احمد : تحبي يمه

ابتسمت وكأن تذكرت الماضي وكالت "

ام ادهم : تزوجني على حب شلون ما احبه

احمد : ها لوتيه والله جنت شاك بيكم مبينين حي على صلاة كم مره اشوفه بالمطبخ يتغزل بيج 

سوا صوته ناعم وكمل كلامه بدلع "

- يا وردة عمره عيني لو من يگلج خدود لو فرط رمان  

وجهه صار احمر سحبت نعالها وهو طفر من يمها وصاحت "

ام ادهم : كوم لك ادبسسز جاي تسحب مني كلام لا بارك الله بيك

مخليه ايدي على خدي وصافنه عليهم واضحك "

زينب : يمه ليش تخلي يضحك عليج صارله ساعه يصفط بالحجي من يمه وانتي مصدكته هسه يلا حسيتي

_ ما حسينه الا واحد من فوك باب الكراج وصاح التفتنا عليه لگيناه ابراهيم

ابراهيم :ها ولكم شعندكم بره 

دار وجه بأتجاة شارع وصاح بصوت عالي "

- ولك سراج تعال

احمد وهو يمشي بأتجاة الباب ويحجي "

- لعالم دك باب مو تصعد فوكاها شصاير عليك دك باب ونفتحها الك

_ فتح لباب وابراهيم مجلب بالباب واحمد يفتح وهذاك يسده ويضحك لحد ما اجه سراج سحب ابراهيم ودخلوا وهز ايدة واشر عليه

سراج : تفضل عود هذا جبير لا تعتب على صغار

ابراهيم : المن عايشين دخلي نتونس

احمد مكتف ايده ويباوعله وگال بأستهزاء

- ولـيريد يتونس بالباب استغفر الله يا ربي

التفت عليه سراج شافني واكفة باب المطبخ "

- شعندج هنا واشو بعدج بملابس المدرسه

زينب : هسه جيت من الامتحان

ام ادهم : دخلوا يمه بين ما اسويلكم چاي

سراج : روحي جيبي غراضج وامشي يلا

زينب : تمام ثواني

_ دخلت جوا وهم دخلوا وراي ...

ابراهيم : شلونج بالامتحانات

جاوبته واني اصعد الدرج " زينه بس بالعربي لصت دنيا

هز راسه وگال "

ابراهيم : عرفتج ماكو داعي تگليلي

_ لميت اغراضي ودخلت سبحت لبست دشداشه وطلعت مشطت شعري ولبست فوكاها بشت ونزلت يمهم شافني سراج گام وصاح ...

- يلا اني اترخص لان حيل تعبان

ام ادهم (بابتسامة) : غالي يمه دومك غالي

احمد يباوع لأمي ومخنزر وجه "

- اي بعد كومي حضني وبوسي وگولي يمه اروحلك فدوه انطي اغراض لزينب تشيلهن انت مو زين عليك جنين يصير بخطر

ابراهيم كوه كاتم ضحكته "

- وانت شبيك محروك دمك

سراج : اويلي الغيره شسوي بالانسان

ام ادهم : يمه خلي زينب تساعدك وتعال ابوسك من فدوه لطولك

ضربت رجلي بالگاع وعطت بزعل "

زينب : يمههههه صدددددك تحجين بالعباس هاي مو عيشه ابراهيم دتشوف

ابراهيم : تعالي بعد روحي انتي مكانج بگلبي اصلا هاي مو امج اني امج

ام ادهم : ياااا

°°°°°°°°°°°°°°°°°°°°°

قرائه ممتعه 🌼 وتفاعلكم على بارتات مو مثل قبل ومعاجبتني ☹️

والاحداث القادمه بعد احلى

💌 لتنسون التصويت ⭐ وتعليقات حلوه

يوزر الانستا / heba_alsaadi04

#هبه_الساعدي

دمتم سالمين 💓